Mualcheng South-ah kangmei a chhuak Pafa an kanghlum

Serchhip 18th Jan. 2011 : Lunglei District Mualcheng South ah tun Pathianni zan dar 9:35 khan Pu Lianchhunga In a kang a, amah Pu Lianchhunga kum 76 mi leh a fanu Chhuansangi (23) te chu an kanghlum a, an fanu te ber Remruatdiki chu na takin a hliam a, Lunglei Civil Hospital ah enkawl mek a ni a, a dinhmun a thalo hle a ni.

He In kangah hian chhungkaw nu ber Pi Zalawmi leh an fapa Vanlalzawna te chu engtin tin emaw scarting atangin a chhuak thei hram a, a him a ni. Kangmei chhuah chhan hi hriat a ni chiah lo na-in Sikri atanga chhuak nia ring an awm laiin, thenkhat chuan electric kalsual a ni ang an ti a. In hi Assam Type niin, a hnuai hi furniture workshop a ni a, phuai a tam hle a ni.
Kangmei chhuah lai hian an mu tawh a, chhuahna tur kawngka lam a kan hmasak avangin an chhuak thei lo nia ngaih a ni. He kangmei chhuakah hian pawisa Rs. 10 note Rs. 8000, Rs. 500/- note 11,000 leh pawisa thir engemawzat bakah bungrua cheng nuai thum man vel a kang chhia nia sawi a ni a, Bible erawhchu a kang lo nia thu dawn a ni.