Mizoram Education Reforms Commission-in a report CM kutah an hlan ta

Serchhip 31st July 2010 : Mizorama zirna kalphung siamtha tura din ‘Mizoram Education Reforms Commission’ chuan an rawtna hrang hrang ziahna report zo felin, nimin khan Chief Minister Pu Lal Thanhawla hnenah an thehlut.
Report thehluhna inkhawm hi Aizawla I&PR auditorium-ah Education Minister Pu Lalsawta kaihhruaiin neih a ni a. Education Reforms Commission member-te bakah Assembly Speaker leh Dy. Speaker, Council of Minister, Parliamentary Secretaries, Chief Secretary leh sorkar mi pawimawh thahnem tak an tel a ni.
Commission report dawngtu Chief Minister Pu Lal Thanhawla chuan, Commission Chairman Dr. AK.Sharma leh a thawhpuite chungah an thawhrimna chu fakin, commission hi rinna nghet tak nei chunga din a nih thu a tarlang a. Commission chu Prof. AK.Sharma kaihhruai a nih angin ‘Sharma Commission’ tia koh a nih tur thu a sawi bawk.
Commission-in thla 11 chhunga report felfai leh belhchiandawl tak an peih fel chu lawmthu hrilhin, Pu Hawla chuan Mizorama zirna kalphung chu a pumpui thuin, khawvel huapa rin tlak a nih loh avangin hmasawnna tur kawng namen lo a awm avanga ‘Commission’ chu din a ni a ti a. State bilin hetiang education reforms commission hi din an la awm ngai loh thu sawiin, report hi Prime Minister leh UPA Chairman Pi Sonia Gandhi-te pawh pek an ni ang a ti bawk.
Hemi hnua thutharlakhawmtute a kawmnaah Education Minister Pu Lalsawta chuan Commission rawtna te kengkawh tura hmalakna bul tan turin task force din phawt tul a tih thu a sawi a.
Zawhna chhangin Commission chuan College hrang hrang zirlai tlemte chhunfin rawt ngam chiah lo mah se, chhunfin erawh thaa an hriat thu leh khaw thenkhat zirna khar phah a tul a nih chuan fine arts leh zirna dang heng hmun ruakah hian din tul an ti tih an sawi niin a sawi a. School Education leh a kaihhnawih bika rawtna dang an siam zingah Vocational kalpui dan thlak te leh zirtirtu trained tawh RR tih danglam loh te pawh a tel a. Heng bakah hian High School-a Hindi telh leh zirna lama a fawng vuantu hrang hrang chungchanga rawtna an tel bawk tih a sawi.
Commission Chairman Prof.AK.Sharma chuan a report khaikhawmin, Commission tum ber chu Pre-School atanga Higher Education huapa Vocational leh professional zirna school-a telha, heng atanga zirna tha zawk leh mi hmantlak chherchhuak tura rawtna siam chu a ni a ti.

NLUP September thla atangin

Chief Minister Pu Lal Thanhawla hova nimina(Zirtawpni) NLUP Apex board thukhawm chuan NLUP chu kumin September thla atangin kalpui tan nise an ti.
Meeting hian NLUP hnuaia kum 1 chhung chhungkaw tanpui tur zat chu sum awm dan azirin a tul anga tih pun theih nise an ti bawk. Pu Hawla chuan NLUP chu miretheite khaichhuahna tur a nih piah lamah Mizoram sum leh pai dehchhuah tipungtu nih tir tum a ni a ti.

13th Finance Commission-in sum pe chhuak

13th Finance commission chuan Mizoramin kum 2010-2011 chhunga sum a hman tur thawhkhatna Rs.vaibelchhe 2209, nuai 70 a pe chhuak.
Tunhnaia sum pekchhuah takte hi khawtlang inrelbawlna hrang hrang atan Rs.nuai 1466 a ni a, hetah hian LAD hnuaia Panchayati Raj Institution atan Rs. nuai 939, UD&PA Department hnuaia Urban Local bodies kalpuina tur Rs.nuai 437 leh Special area basic grant Rs.nuai 90 te an ni.
Special area basic grant-ah hian Lai Autonomous Dist. Council hman tur Rs. nuai 30, Mara Autonomous Dist. council hman tur Rs. nuai 27,sing 5, Chakma Autonomous Dist. council atan Rs. nuai 22,sing 5 leh Sinlung Hills Development council atan Rs. nuai 10 a tel a ni.
Heng bakah hian State Disaster Responsed fund atan Rs. nuai 385, Elementary Education atan Rs. nuai 100 bakah UID kalpuina tur Rs. nuai 12 a pe bawk.

Tualchhung 28.7.2010

Power supply awm lo
132 KV line chhiat avangin Thawhleh tlai atang khan Serchhip leh a chheh vel khuaah power supply a awm lova, hei vang hian vawiinah tualchhung chanchinbu chhuak a awm lo

Inawkhlum
Lalkima s/o Hrangchungnuna Serchhip Dinthar Veng chu Thawhtann zan khan an chenna In Field road ah a inawkhlum a, lumen a nih hnu nimin Thawhlehni khan vuiliam a ni.

Lianmawia a boral

Vawiin Pathianni zing dar 10:45 khan Lianmawia(45) s/o H.Lalhmingliana Serchhip P&E Veng chu Septicemia natna avangin a boral a, lumen a nih hnu naktuk Thawhtanni hian an Veng thlanmualah vui a ni ang.

Buhfai harsatna chhan pakhat chu HC-in motor bungraw phurh zat a bithliah vang a ni - Supply Minister

Serchhip 26th July 2010 : Food Civil Supply & Consumer Affairs Minister Pu H.Rohluna chuan, Mizoram buhfai dinhmun duhthusama a that theih lohna chhan pakhat chu Supreme Court-in National Highway zawhtu motor bungraw phurh theih zat 90 Qtls. tia a bithliah thar vang a ni a ti.
Mizorama buhfai chawkluhna hmunpui ber Bairabi leh Kolasib District chhunga FCI kudam hrang hrangte Zirtawpnia a tlawh a, he thu hi sawiin, Minister chuan, Mizoram buhfai dinhmun duhthusama a that theih lohna chhan pakhat chu Supreme Court in National Highway zawhtu Motor bungraw phurh theih zat 90 Qtls tia a bithliah thar chu hun hmalama 200 quintals vel phur thin tan chuan hlawkpuina tham a tlin tak loh avangin buhfai phur duh an tlahniam ta a. Hun hma lama Guwahati, Silchar inkara nitin truck trip 30 vel buhfai phur tlan thin chuan ngai a awh thei tawh lo a ni a ti a. Mizorama Rel hmanga buhfai thawnluh tun aia ti chak turin Central Ministry chak takin dawr nghal dawn tih Pu Rohluna chuan a sawi bawk.
Minister hian Bairabi khaw luh dawna PWD enkawl Bailey bridge kumin 26 June atanga Indian Road Congress guideline anga truck load lak theih zat 200 qtls a bituk tharna chu uluk takin a thlir a, motor lian rihna 80 qtls. paih hnuah 120 qtls. chauh truck 1 in a phurh theih tak a vang leh he Lei hi a rim em avang te leh Bairabi kawng hi Zoram mamawh phurh chhuahna pui ber anih avanga a pawimawh em si avangin thuam that a tih chak vat ngaia a hriat thu Pu Rohluna chuan a sawi a. Bairabi -Assam inrina lai Minister hian tlawh nghalin, Forest leh Police check gate dah tura ruahman nise Minister chuan a ti bawk.

Tualchhung

I-Day Field-II ah
Nimina DC’s meeting room-a Indepen dence Day Celebration Committee thu khawm chuan, kumin Independence Day lo thleng tur chu Pathianni ah a tlak avang in kum dang anga uar taka hman ni lo se, At home prog. pawh hman loh mai nise, Day hi zing dar 8 ah Field-II ah hman nise, khuallian tur chu sorkar-in a rawn ruat ang hman nise an ti a. Parade contingent atan khawpui chhunga High school zirlaite ruat an ni a.Day pual thil pek Damdawi In, Orphanage Home leh Shalom Special School-ah te hlan nise an ti.


Rualbanlote enkawl dan zirtir
Spastic Society of Mizoram chuan nimin khan Serchhip Hmar Veng YMA Hall -ah Serchhip leh a chheh vela rualbanlo nu leh pate training an neihpui. Spastic Society of Mizoram Secretary Pi Chhing puii chuan rilru lama rualbanlote chungchang leh heng mite tana hma an lakna leh hmachhawpte a sawi a. Rualbanlote chu khawngaihna nena enkawl aiin hma ngaihna nena enkawl an tul thu sawiin, an mahni kaihhruai zelna tura hriat tur hrang hrangte a sawi bawk.
Bengngawngte zirtir kawnga thiam bik Special teacher Pi Vanlalruati chuan bengngawng awm theih chhan leh a inven dante a zirtir a.Pi Sarah Lalmuan kimi pawhin rualbanlote tana Special oylmpic buatsaih leh infiamna kawnga hma an sawn theih dante a sawi bawk.


Pi Biakchhingi vuiliam
Nizan hmasa dar 10 vel khan Pi Lalbiakchhingi(85) w/o PC.Lalchungnunga New Serchhip chu cancer avangin a boral a, nimin khan vuiliam a ni.


Ni 100 inhlawhna
Serchhip-IV VC hnuaiah mipui ten ni 100 inhlawhna hna an thawk leh mek a, tun tumah hian khawl an hmang lo thung a ni.

Tualchhung

I-Day lawm dan rel dawn
Vawiin chawhma dar 10 hian DC’s meeting room-ah Independence Day lo thleng tur, Serchhipa hman dan ngaih tuahin khawtlang mi pawimawhte an thukhawm dawn.


SP-in notification a ti chhuak
Pu John Zothansanga Superintendent of Police Serchhip Dist. chuan Serchhip khawpui chhunga lirthei dahna hmunhma notification a ti chhuak a. Tunhmaa lirthei stand leh park-na chu a pangngai anga kalpui a nih laiin, AOC atanga Tuikhuah Veng inkar-ah zing dar 7 atanga tlai dar 6 inkar chhungin motor lian leh a laihawlte tan bungrua load leh un-load khap a ni a. Serchhip Bazar, Pi Chhiarpuii dawr kawt, Traffic point bul chu dropping zone a ni.

Lawrkhawm

NLUP kalpui tur chu sorkar laipuiin a vil dawn - Larsap
Larsap chuan NLUP kalpui tur chu sorkar laipuiin uluk takin a endik dawn a ni a ti.
Nimina Raj Bhavan hall-a Mizoram Journalist Association member te kawmnaah he thu hi sawiin, Mizoram Larsap Pu MM Lakhera chuan, NLUP kalpui tur chu sorkar laipuiin uluk takin a endik dawn a.NLUP hmasa chu duh anga hman tangkai tawk a nih loh avangin NLUP thar kalpui danah sorkar laipui chuan thil a vil uluk hle dawn a. A hmang diklote chungah pawh a thik thu a chhe hle dawn a ni a ti a.Hemi vang hian mipuite chuan an hlawhtlinpui ngei theihna turin rinawm taka an inpuahchah a tul a ni a ti.
Larsap chuan, Journalist-te chu mipuite hrechiangtu an ni a, harsatna kawng hrang hrang mipui ten an tawh thin te chinfel dan ngaihtuah pui turin a sawm a.Harsatna ramin kan tawh te tlangnel taka a hnena thlen turin a sawm a ni. Journalist te chu chanchin chhe lam chauh nilo, a tha lam leh Mizoramin kawng hrang hrang a hma a sawnna te tarlang ve fo turin a chah a ni.

NLUP workshop
Ni 2 awh Dist. Level Workshop on NLUP Lunglei chu nimin khan Social Welfare Minister Pu P.C. Lalthanliana'n a hawng. Hawnna thu sawiin Pu P.C. Lalthanliana chuan NLUP hi kan ram leh hman damna tura sorkar programme pawimawh ber pawl a ni a ti a. He programme hmang hian Mizoram sorkar chuan mipuite hruai chhuaka Kanan ramah hruai thlen a tum a ni a ti. Pu S. Laldingliana, Parliamentary Secretary pawh in thusawiin he NLUP prog ramme hi kan ram thing leh mau leh nungchate vennan pawh a pawimawh a ni a ti.

NABARD meeting
Nimin khan NABARD, Mizoram Regional Office, Aizawl chuan "State Level Pre-PLP Meet for the year 2011-12" chu an office Confe rence Room, Bawngkawnah an buatsaih a, Mizoram sorkar hnuaia NABARD kaihhnawih Department aiawhte, Bank hrang hrang aiawhte leh Developmental Organisation/Agency hrang hrang aiawhte an tel tha hle. He hunah hian sorkar laipui leh State sorkar leh NABARD hnuaia ruahmanna (Scheme) hrang hrangte leh NABARD hmalakna hrang hrangte thlirhona neih a ni.

MLA 12 ten banna thehlut
Bihar Assembly-a Lok Jansakti party MLA zawng zawng 12 te chuan an lungawiloh lantirna House chhunga an neih laia an laka mawi lo taka chetna a awma sawiin, an banna State Party President hnen ah an thehlut a. An Party President hian a thawhpui dangte a berawn phawt dawn niin a sawi.

OBC pawmpui
Union Cabinet chuan sorkar laipui list-a hnam hnufual dang OBC-a telh tur leh siamthat tur hnamte chu nimin khan a pawmpui a.Hengte hi Hariyana, Chhatish garh, Himachal Pradesh, Jarkhand, Karnataka, Rajasthan leh Dama nandew UT-a cheng OBC te an ni.

UD&PA atanga Serchhip Town chhunga hnathawh tur te

1. Serchhip- I
Link drain - Pu F.Rokima in bul, Pu Ronghinglova in atanga Pu Drivet Thanga in thleng, Pu Lalauva in atanga bakah, Pu Thansanga in atanga Kawrpui inkar Culvert siam, Dam dawi in thlanga lungrem pawm tawh bakah Damdawi in bul, Tuikhuah Veng kawngko Footpath leh kawng siam that theh luh thar leh a ni a, pawm a nih a beiseiawm Thu lakna - VCP Pu R.Vanlaldula

2. Serchhip-II
Community Hall tuna a awmnaa siam, Lunglak kawr ft 300 thui leh Pi Daii In kawr tui hawk tha taka a luan theih nana zau tha taka Congcrete-a siam, Pu Hrangchia in bul kawrah a thlang kawngpui, Pu Chawngsavunga dawrte bul pawh tura step leh tuihawk luankawr ni nghal siam, Farm Veng thlanmual kawng ko lungrem leh tuihawk luankawr siam te an ni. Thu lakna - Vice VCP Pu Zamlova

3. Serchhip- III
Community Hall Rs nuai 50 vel senna tur YMA lungphun hmuina siam, Pu Zaithantluanga in piah atanga a thlang lane pawh tur step, a hnuaia tuihawk luan theiha siam, Pi Rinchhani kawt atanga Bazar thlenga tuihawk luankawr siam, Pu PC Lalhmachhuana in atanga a thlang lam lane paltlanga Pu Liantluanga in pawh tura Culvert step siam, Pu Lalvuana in bul kawng phei, Chhim Veng Field ko leh thlang lam lungrem Chhim Veng Primary School thlang Pu Khawtinthanga in pawh tur leh kawng hnuai zawk Pu PC Siamliana in atanga Pu Zakiamlova in thleng bakah Pu V.Thanchhunga in leh Pu H.Saidawla in nkar kawng siam
Thu lakna - VCP Pu Lalramliana Sailo

4. Serchhip-IV
Indoor stadium PWD muala siam tur te, AOC atanga Sport Complex thleng step siam
Pu Vanlalhluna in bul kawrah a thlang Hmar Veng YMA Hall pawhna tur leh AOC Pu Lalnunsiama Pachuau in bul atanga a thlang lam Lower Chanmari kawng phei pawhna tur bakah Chanmari Veng Pu F.Lianchhunga in bul atanga a thlang lam Pu Thankima in bul kawng ah te step, Culvert ni nghal siam te a tel a.
Thu lakna - VCP Pu Lalzuiliana

5. Serchhip-V
Pu J.Romandinga in bula step, a thlang lane kawng pawh tura siam, BDO tlanga High Mass dah, Field-II pavilion siam leh field ko lungrem, Pu Nghinglova in bula step siam leh a hnuaia tuihawk luanna siam nghal bakah Boxing hall siam te a tel.
Thu lakna - VCP Pu R.Thanchuanga

6. New Serchhip
Link drain (tuihawk luankawr zau chi) Darkhuma in bul, Pu Lalzidinga Kawlni in bul, Supply godown bul leh Pu Roluahpuia in bula siam .
Thu lakna - VC Secretary Pu Vanlalhmuaka

Chhiahtlangah-
Tuihawk luankawr zau chi Kawn Vengah Pu K.Thangkhuam in atanga 7th Day Biak in thleng siam, Pu R.Thangkhuma in bula tuihawk luankawr lian siam, Pi Darneihthangi in atanga PWD ram thleng, Sailam Veng Pu Kaptluanga in atanga Pu Pakunga in inkar , Pu Thaikawia in bul Chanmari, Sailam Centenary building bula Sihpui lui, Chhim Vengah Pu Zalianvela in bul leh Pi Rohnuni in bula culvert siam, Venghlun PHE tui dahna Reservoir leh Pu Ngursiama inkar, Lungrem tur Pu H.Zahmingliana in inkar atang Pi Raltawni in inkar Kawn Veng, MHIP Building bul Venghlun, Kawn Venga Chhiahtlang field ko lungrem, Kawn Veng Anganwadi bul, Pub Thakima kawmthang kawn veng, Kawn Veng veka Pu Lalmuana in atanga Pu Ramnghinga in bul lungrem leh tuihawk luankawr siam te a ni.
source - Laisuih

Tualchhung

Tirenga khapna ti chhuak
Sub-Divisional Magistrate Pi K.Van lalruati chuan hriselna ti chhe thei Tiranga/Gutkha leh a kaihhnawih thil te zawrh, hralh leh ei tur atana kawl a khap a. He khapna thupek hi tihchhuah a nih (20.7.2010) atanga thla 2 chhung atan hman a ni ang a, thupek zawmte chu dan hmanga hrem an ni ang a ti.

Lirthei dah khap
CMO Serchhip Dist.chuan Serchhip Health Sub-Centre leh Pu T.Rosiama dawr inkar, Damdawi In tlang kawngpui kamah lirthei dah a khap.

Lawrkhawm

Ruihhlo halral
Central YMA ruihhlo do pawl CADS-te ruihhlo man khawl thahnem tak chu nimin khan Aizawla CYMA Office tualah Chief Secretary Pu Vanhela Pachuau-in a halral. Thu sawiin, Pu Vanhela chuan Mizoram ah corruption a nasa-in, kan rilru hrim hrim hi hniam tawh a, Bible-in sual a tihte pawh sualah kan ngai tawh lo a ni a ti. CADS hi kumin May ni 16 khan ding tanin, tun thlenga ruihhlo an man tawh hlut zawng chuan Rs.nuai 36 a chuang tawh a ni.

e-Panchayati Raj
Tunlai thiamna hmanga Pancha yati Raj inrelbawlna fel zawk nei tura hmalakna chi khat e-Panchayati Raj chu nimin khan LAD leh WIPRO buatsaihin Aizawlah neih a ni a. He hunah hian WIPRO in Sairang Village leh Tlangnuam Block a zirchianna report leh department hrang hrangte mawhphurhna leh tihturte ngaihthlak a ni bawk.

MLA 67 suspend
Bihar Assembly Speaker chuan House-a buaina chhuah ni 2-na nimin khan Opposition MLA 67 te chu tun fur session neih mek chhung atan a suspend. Suspend an nih nachhan hi session neih laia dik lo leh mawi lo taka an chet vang a ni. Eptu member thenkhatte hi State Legis lature In 2 chhuatah an riak a ni.

Thil ti khawbaw ah puh
Aizawl khawpui chhunga MNF Block hrang hrang OB te nimina an party office-a thu khawm chuan sorkar dinglai chu hna thawh mumal nei lovah leh thil awmsate pawh ti khaw baw zovah an puh a. Congress sorkar chu hnam ro tling tur hmalakna engmah nei lo, an hna thawh ber chu buhfai awmsa tih tlemte, electrict eng sa tih thimte, gas tam sa tih tlem, petrol leh diesel tih tlemte a ni an ti.

Pakistan-in India a kap
Pakistan-in inkahhaina tun thlaa an bawhchhiat vawi 9-na atan nimin zing khan Jammu sector-a ramri forward post an rawn kahnaah BSF sipai 1 a hliam a, BSF-te chuan an kap let ve nghal a ni. Nizan hmasa dar 11:30 vel khan helho ramri kana rawn luhruk tir tuma an rawn kahna chu BSF-te hian chhangletin, darkar chanve chhung vel an inkap a, hel luhruk tumte chu an nawr kir thei a ni.

Tualchhung

Electoral roll thar tarchhuak
Nimin khan District dangte rualin Ser chhip Dist-a Assembly bial 3-a Electoral roll thar tarchhuah a ni a. A pumpuiah vote nei thei mi 41698 awmin, hei hi 2.02% niin, mi 821-in an pung a. Vote nei thei pun tamna ber Tuikum bialah 354 pun belhin, a pun tlemna ber Serchhip ah 205 in an pung a ni.

Dist.Edn.Comtt. thukhawm
Nimin khan District Bawrhsap Pu H.Darzika hovin a pisa ah District Education Committee an thukhawm a. District Education hmasawnna tur hrang hrang bakah SSA hnuaia hnathawh turte relin, an thlir ho a ni.

Mizoram Electoral roll 2010 tarchhuah a ni

Kum 2010 Electoral roll puitling chu nimin khan Mizorama District tinah tarchhuah a ni a, District dangah vote nei thei an pun vek laiin, Champhai Dist. ah erawh vote nei thei 553-in an kiam thung.
Champhai Dist. ah hian Assembly bial 5 ah vote nei thei mi 71730 awmin, mi 553 zet an kiam nachhan hi pem an tam vang nia sawi a ni.
Aizawl Dist. Assembly bial 14 ah service voter te nen vote nei thei mi 2,32,367 an awm a. Vote nei thei zingah mipa aiin hmeichhia 8178 in an tam zawk a ni. Aizawl District-a vote nei thei punna hi 2.09% a ni.
Lunglei Dist. Assembly bial 7 awmna ah vote nei thei mi 90502 awmin, vote nei thei mi 2303 in an pun belh a, hei hi 2.62% a ni.
Serchhip District-a Assembly bial 3 ah vote nei thei mi 41698 an awm a, hei hi 2.02% niin, mi 821-in an pung a ni. Vote nei thei pun tamna ber Tuikum bialah 354 pun belhin, a pun tlemna ber Serchhip ah 205 a ni.
Kolasib Dist-a Assembly bial 3 ah vote nei thei mi 47314 awmin, vote nei thei mi 610 an awm belh a ni.
Saiha Dist-a Assembly bial 2 ah vote nei thei mi 31457 an awm a. Lawngtlai Dist-a Assembly bial 3 ah vote nei thei mi 65316 awmin, 3.71% in an pung a ni.

MHIP in Tiranga hal

Serchhip Darnam Branch MHIP chuan nimin Thawhtan zing dar 8:45 khan MHIP ten Tiranga do beihpui an thlakna bawhzuiin, an huam chhung dawr hrang hrang atanga an leikhawm Tiranga pack 380 an hal ral. An huam chhunga dawr nei te hian khap a nih atang khan an lak thar loh avangin lei tur pawh a awm tawh mang lo nia sawiin, an chungah an lawm takzet tih an sawi a. MHIP Chhim Veng Branch pawhin an huam chhungah Tiranga that lohzia tarlanna poster an tar bawk.

MPSC Secretary in Serchhip Centre-a tam tak an exam theih nan tan la turin NGO aiawh te a chah

Nimin (19.7.2010) khan MPSC Exam Serchhip Centre-a a hmasa ber chu zo fel in, hemi denchhen hian Pu Tamlal Lohar MPSC Secretary chuan DC’s Meeting Room ah tlawmngaipawl aiawhte a kawm a. Exam hi October thla vel atanga buatsaih chhoh leh tur a nih avangin mi tam tak an exam theih nan tan lo la sauh sauh rawh u a ti.
Pu Tamlal chuan Serchhipah exam tura hming 19 zinga 15 in ID an la chhuak a, chu’ng zinga 10 chauh exam in, a tawp thleng chu 8 chauh an ni a. Serchhip chu Centre thar exam-na tura tih pawh ni lo, siamchawp leh chuk chuk a nih avanga tlem a nih theih rualin, tan lak erawh a ngai tih a lang a ti a. MPSC chuan mi hausa fa emaw, chhungkhat nei tha fa emaw aiin mithiam ngei lak an duh thu te, a theih chin chinah rintlak thei ang bera hnathawh an tum tlat thu te sawiin, exam beitute chu ba sa ngam ve ngawt lova inbuatsaih nachang hia se a duh thu leh a tum tak tak chuan hna dang zawng zawng kalsana kum khat chhung zet an inbuatsaih thu te a sawi.
A sawi zelnaah MPSC Secretary chuan exam an buatsaih tawh, a bikin Assistant exam result chhuak thei lawk lo chu paper endik tura an sawm ten an en zawhfel mai theih loh vang a nih thu a sawi a. Exam an neih reng rengah ni 10 chhunga peihfel vek an tum thu te, insawipui a rem ve loh thu te sawiin, insawipuia tlin tum zirlaite chu nakinah an exam leh phalsak lo tura hrem theih an nih thu te sawiin, hna lakah leh sorkar officer lian kaisanna chungchangah chung lam atanga thu rawn nei Politician an la tawng lo chu lawmawm a tih thu a sawi a. Tunah chuan objectve type zawhna chhanna awlsam taka en zung zungna tur khawl thar chi hnih Rs nuai 20 leh Rs nuai 30 man an neih tawh thu sawiin, sorkar hna Direct-a lak chi zawng zawng pawh MPSC kutah dah pawh nise an inhuam thu zawh belhna chhangin a sawi bawk. He hunah hian Sub Hqrs YMA, MJA, MUP, MZP leh SEDNOC aiawh te telin, SEDNOC aiawh an Chairman Pu R.Laldaih zauva chuan MPSC Centre Serchhipa dah tura MHIP leh SEDNOC te hmalak hnua a hlawhtlinna hmuh a ni ta chu lawmawm a tih thu a sawi.

An mahni rawktu hnamdang Vai ten an vawhlum Tualthattute man nghal an ni

Serchhip 20th July 2010 : Nizan hmasa Dar 12:30 bawr vel khan Kolasib tlaklam Dumlui zaua vai awm te chuan misual pahnih umin, pakhat zawk an nangching a, an khawih nat deuh avangin an hliam tura lovin nimin zing khan an khawihna hmunah hian thiin hmuh a ni.
Thia hmuh tak hi Roland-a(20) s/o Lalramthanga Kolasib Diakkawn Challui Venga cheng niin, nizan hmasa zanlai dar 12:00 bawr vel khan Dumlui zauvah hian a thianpa nen hmaituamin Pu C.Zakhuma te vai Inah lutin, Meidum kalkawng an zawt a, Vai (Halim-a) hian kawng a hawn veleh heng misual hmaituam pahnihte hian rek nghalin kar hmasa lama Halim-a bawng pakhat hralhna pawisa cheng 15000 bawr vel chu an laksak a, hetia an inbiak lai vel hian Halim-a nupui chu pawnah tlanchhuakin, Dumlui Zauva an awmna hnaih deuha awm vai dangte chu punkhawm in, vaiho chuan heng misual pahnih te hi an nangching ta a, Halim-a te In thlang zawl laiah chuan nangchingin an inbei ta a, an inbeihna ah hian misual pakhat zawk chu a tlanchhe hman a, pakhat zawk chu tlanchhe ve hman lovin, vaiho hian khawihin mauvin a luah an vuak sak a, an khawih nat deuh avangin a hmunah hian a thi nghal nia sawi a ni.
Police te'n thu an hriat hnuin SDO(S) leh SDPO te a hmunah kal nghalin a hmunah hian Halim-a leh Moila Uddin te chu an man nghal a ni.

Lawrkhawm

Games meichher
Common Wealth Games meichher lo dawng turin Mizo ram sorkar chu ruahmanna a peih fel thawkhat ta. Khawvel ram 71 telna he games hi October ni 3-a Delhi a tan turin, Games meichher chu India State hrang hrang fanpui mek a ni a. Tun thla ni 29 khian he meichher hi Shillong atangin thlawhna hmangin Mizoram rawn luh pui a ni ang.

SCRB hawng
Mizorama pawi khawihna chi hrang hrang report vawnna hmun, State Crime Records Bereau training hall chu nimin khan Aizawla Khatla CID tlangah hawn a ni a. Hemi rual hian pawi khawihtu leh pawi khawih na chhuina crime & criminal tracking network & system chungchanga zirtirna pe chhawngtu tur-te training pek nghal an ni. SCRB hi District tin SP-te hnuaiah din fel a ni tawh tih Department chuan a sawi.

Health Deptt. insawifiah
Mizoram sorkar Health & Family Welfare Deptt.chuan Vanglaini chanchinbua Health Worker Result chhuak chungchangah insawifiah in, kumin 2010-ah hian Health Worker Training diltu mi 4611 zingahmi 448 an inziak tling a.Nikuma topper P.C. Lalmuanpuii chu tun ah hian a training mek a. Pahnihna Roneih sanga, Bilkhawthlir erawh Tattoo alo neih avangin thlan a ni ta lo tih an sawi.

Rel chesualah thihna
W.Bengal, Birbum District-a passenger phur Rel-in Rel ding lai a sut vaknaa thi zat chu mi 61 an tling tawh a, midang 90 vel an hliam bawk. He chetsualna hi nimin zing lam dar 1 vela thleng kha niin, thil awmzia chhui mek a ni a. Hliam zingah hian ngaihtuah awm tak tak an awm avangin thi zat hi la pung tura ngaih a ni.

Khawnvartui sem mek

Supply Deptt. chuan mipui hnenah ration khawnvartui a sem chhuak leh mek.

Tualchhung

Ran khuahkhirhna en
An lo rel tawh angin Inrinni zing khan tlawmngai pawl aiawh leh Dist. thuneitu ten khawpui chhunga ran khuahkhirh a nih dan leh khawtlang faina dinhmun an thlir a. Vantlang tana hnawksaka bungraw dahte senghawi turin an hriattir bawk.

Tui renchem turin ngen
PHE Department-in mipui vantlang hnena tui sem tur an pump chhawnna Booster electrict khawl a chhiat avangin diesel khawl chauh hman theih a ni a, hei vang hian dan pangngaia tui sem theih a ni dawn lova, mipuite tui renchem turin Department chuan a ngen a ni.

Cable TV intlansiak mek
H Serchhipa Star Cable TV 3 te chu a tha lamin an intlansiak mek a. TTV-in receiver hmanga LPS-1 channel an pek mek laiin, KLS chuan LPS prog.pumpui line hmangin an rawn thlung lut ta a. HCN pawh IOC atangin Venglaiah an rawn insawn mek bawk.

Mipat pui kawm tam

Kumin chhung hian mahni mipat pui kawm thin nia inchhal mi 200 chuang chhinchhiah thar an ni. Heng mite thlur bingtu FXB chuan heng mite hi an duh thlanna ngeia chhin chhiah an nih thu sawiin, tun thlengin mi 256 hming an chhinchhiah tawh niin an sawi a. An mahni an zir chiannaah an zinga mi 7-in HIV/AIDS an vei tih finfiah a ni a. An zingah hian mipa leh hmeichhia kawp ve ve thei an tam ber a, amah erawhchu mahni mipat pui kawp thei zingah hian kawp kher lova nupui neite pawh an awm a ni.
Hetihlai hian thla 2 kalta chhung khan hmeichhe inzuar KS mi 45 Aizawlah chhinchhiah thar belh an ni a, an vaiin mi 600 bawr vel an awm nia hriat a ni.

Thuthar lawrkhawm

Ar vulh tur thlang
Ministry of Agriculture, Animal husbandry dairy & fisheries sum Rs. nuai 213 sengin Aibawk leh Thingsul block-ah mahni In bul hnaia Ar vulhtu tur thlan mek an ni. Ar vulh turte hi mi 900 thlan tuma hmalak mek a ni.

Dapchhuah beihpui thlak
Buhfai leh eirawngbawlna gas hralh ruk leh tih chingpen man chhuak turin Food Civil Supplies & Consu mers Affairs Department chuan beih pui a thlak mek a. Legal Metrogy Wing-a thawktute pawhin hemi rual hian a hranpa-in beihpui an thlak ve bawk.

RMSA dan angin
RMSA sum hmanga High School thar sak leh a thuamthat hna chu dan anga kalpui a nih tur thu zawhna chhangin, Education Minister Pu Lalsawta’n a sawi a, eng dan nge tih erawh a sawi lo thung.

CRPF-in mi 6 kaphlum
Jarkhand-a Seralkila Dist.-ah Zirtawpni khan CRPF constable 1 zuruiin silai a tawngpawng kah vaknaah Asst.Commandent telin a thawhpui mi 6 a kaphlum a, a mah pawh hi kahhlum ve nghal a ni. An sawi danin Harpinder Singh hian a duty laiin a silai kawl chu a thiante awmna lamah a kap vak a, darkar 4 hnu zetah pawh a la kah zui zel avangin Camp-a duty dang te chuan an kaphlum ve ta a ni.

Tualchhung : 17.7.2010

MZP-in FIR an thehlut
MZP Hqrs. Serchhip chuan nimin chhun dar 12 khan Serchhip Police Station ah FIR thehlutin, kum 2007-a Lok Sabha MP Pu Vanlalzawma'n MP LAD Fund a pek hmanga Serchhip Town Hall a dah tur Chair an lei 100 zinga 62 chu kumin Republic Day Jan. ni 26 a DC Pu H.Darzika'n a hawh atangin a kim lo tih an FIR ah chuan an tarlang a. He Town Hall Pastic Chair bo hi zawnpui turin an ngen tih an sawiin, Police te hian vawiin atang khan a chhui hna hi an thawk nghal a ni.

Lawmthu sawina hun hmang
Nizan khan Serchhip Venglai chuan kum 10 chhunga an Veng huamchhunga Malaria leh TB natna avanga thi an awm lo chu Pathian hnena lawmthu sawina inkhawm Pu T.Rosiama Inah an nei a. Hetih rual hian awareness campaign an nei nghal bawk.

Khawtlang fang dawn
An lo rel tawh angin tukin hian Dist. Bawrhsap Pu H.Darzika hovin khawtlang mi pawimawh leh tlawmngai pawl aiawh ten khawtlang thianghlimna chungchang thlirin Veng thenkhat an tlawh kual dawn a.Hetihrual hian ran khuahkhirh leh khuah khirh loh te pawh an en nghal a dawn a ni.

India-in pawisa chhinchhiahna thar a hmang dawn

Union Cabinet thukhawm chuan India pawisa chhinchhiahna (symbol) thar hman an remti.

He thu tlukna hi nimin khan Information & Broadcasting Minister Pi Ambika Soni chuan Cabinet thutkhawm neih zawha thutharlakhawmtute a kawmnaah sawiin, India pawisa chhinchhiahna(Symbol) thar tur hi D.Udai Kumar IIT Post Graduat-in a design a ni a. Thla ruk chhungin ram chhung hmun hrang hrangah hman theih tura ruahman a nih bakah thla 18 chhungin ram pawnah hman theih tura ruahman a ni tih a sawi a.Pi Ambika chuan he chhinchhiahna hi pawisa note leh thir ah chhut kai vek a ni ang tih a sawi bawk.
He chhinchhiahna hi US dollar leh British pound ten chhinchhiahna an neih anga chhinchhiahna tihna mai a ni a. Ram dang pawisa chhinchhiahna ang chhinchhiahna a zawm ve dawn ta a ni.
India pawisa chhinchhiahna (symbol) hman tur atan hian mi hrang hrang 3000 chuangin an ngaihdan design an thehlut a, heta tang hian Udai Kumar-a design hi thlanchhuah niin, hman a ni dawn ta a. A design tu hian lawmman pawisafai Rs. 250,000 a dawng dawn a ni.

Cabinet on Economic Affairs chuan Mizoram sorkar NLUP Project a pawmpui ta

Serchhip 16th July 2010 : NLUP Project Mizoram sorkar buatsaih Rs. vaibelchhe 2873.13 chu Cabinet Committee on Economic Affairs, Govt. of India, nimina Meeting chuan Mizoram sorkar ruahman ang chiahin an pawmpui ta.
Centrally Sponsored Scheme kal mek leh NLUP-a hmalakna tur a inbukthuah awm thei tur te inbukthuah lohna turin 'Convergence Principle' kalpui tura ruahman a ni a. CSS a sum awm sa rin nghal tur leh NLUP atan-a Central sorkarin a bik taka min pek dan hetiang hi a ni:
1. CSS a fund awmsa hman tel tur - Rs. vbch.1000.84
2. NLUP atan a bika Additional Central Assistance (ACA/SPA)- Rs. vbch.1526.14
3. Beneficiary te tha hah man hlut zawng (dawn tur nilovin hlutna) - Rs. vbch.346.15
A vaia belh khawm Total - Rs. vaibelchhe 2873.13
NLUP atana Central atanga sum hmuh tur zat (sanction amount) Rs. vbch. 2526.98
A vai hian kum nga chhunga hman tur a ruahman a ni.
A sum hman dan tur hetiang a ruahman a ni :-
1. Chhungkua 120000 chanai tur - Rs. vbch.1282
2. Infrastructure Component - Rs. vbch.1172.78
3. Project Management, Administration,
Capacity building, etc. - Rs. vbch.72.2075
Centrally Sponsored Scheme NLUP nena inkaihhnawihte Unit Cost tih danglam a awm chuan ACA/SPA hi tih pun emaw tih tlem theih emaw a ni ang. Mizoram Sorkar ruahmanna anga 2010-2011 atanga 2014-2015 chhunga kumtin atana chhungkua tanpui tur zat leh sum hman tura ruahmanna pawh Mizoram sorkar rawtna angin pawmpui a ni.Project anga NLUP sanction a nih tak avang hian sum bo thei lo,(lapse awmlo tur) project anga kal pui tur a ni ang.

Tualchhung

Khawtlang faina relho
Nimin khan Dist. Bawrhsap Pu H.Darzika hovin a office-ah khawtlang mi pawimawh leh tlawmngai pawl aiawhte thukhawmin, khawtlang thianghlimna chungchang an sawi hova. Inrinni zing khian khawlai fangin, ran khuahkhirh leh khuahkhirh loh te enfiah nise an ti a ni.

Pu Vanhnuna vuiliam
Nimin zing dar 8:20 khan Pu Vanhnuna h/o Biakthangi Ramthlun Veng chu Malaria avangin a boral a, nimin vek khan Field Veng thlanmualah vui a ni.

Chanchinthar lawrkhawm

Tualthattu man a ni
Inrinni kaltaa Lungzalhtum khaw nu pakhat Pi Mentha-i thattu te zinga tel nia hriat Thawmliana(38) Lungzalhtum khua vek chu nimin khan Lawngtlai Council Veng YLA duty ten an man a, Police-te kutah an hlan nghal. Lalthawmliana hian a thianpa Lalhmingthanga Myanmar ram, Belthar khua ami nen Pi Mentha-i hi a fehnaah an that tih Police hnen ah a puang a, a pawisa kawl lai Rs.30000 pawh an lak sak tih sawiin, a thianpa chu Myanmar lamah a tlanchhia tih a sawi bawk.

India leh Pak. an inbia
India leh Pakistan Foreign Minister-te chu nimin khan Pakis tan khawpui Islamabad-ah an inkawm a, ram 2 -te inrin tawnna chungchang bakah inlaichinna hrang hrang an sawi dun a ni. India Foreign Minis ter Pu SM Krishna hian Pakistan President leh Prime Minister-te a kawm zui leh dawn a ni.

Buhfai a tlawma leina
National Advisory council thukhawm chuan ram chhung hmun hrang hranga mirethei ten buhfai man tlawm zawka an lei theihna tur ruahmanna a siam. Ruahman dan chuan ram chhunga mirethei ten ei tur hnianghnar zawka an neih theih nan buhfai Kg.1 Rs. 3 zelin thla tin Kg. 35 an lei thei dawn a ni.

Tualchhung

Petrol free sale
Hun engemaw chen Mizoram puma tuialhthei a harsat avanga Serchhip IOC pump khar a nih hnuah nimin khan Petrol rawn thlengin free sale nghal a ni a, nimin tlai vek khan diesel pawh a rawn thlen beisei a ni.

Second term exam
School hrang hrang ten second term exam an nei leh dawn ta a. Vawiin hian School thenkhata pawl hniam zawk ten nei tanin, karleh lam khian a nawlpuiin an nei ang.

Police-te Anticipatory bail dilna hnawl a ni chu Tanhril JAC te nawrna vang a ni -MPSA

Mizoram Police Sub-ordinate Association chuan Tanhril Veng Lalpiangliana thihna kaihhnawiha Police-te anticipatory bail dilna hnawl a ni chu Tanhril JAC ten Court an nawrna vangah ngaiin, Veng pakhat vauna avanga Police-te chunga hleilenna thlengah an ngai tih an sawi.
Hemi chungchangah hian nimin khan MPSA chu inhmukhawmin, Inspector atanga a hnuai lam zawng an tel a ni.
Court-in Police-te bail dilna a hnawl zan khan Police 4 - ASI Gnat Lalrinchhana, Constable Lalhmangaiha Sailo, Constable J.Lalchungnunga leh Driver Lalrinfela te chu man nghal an ni a. Niminpiah khan midang 2 - ASI Prem Nath leh constable Chanchinliana te man an ni leh a. Anticipatory bail dil hlawhchham zing ami Luangmual OC, SI VL.Ramhluna erawh an chhungkuaa an zinbo rih avangin man a la ni ve lo a ni.
Hetihlai hian Tanhril JAC-te chuan Police-te anticipatory bail dilna hnawl a ni leh Police 6 mana, lock-up a dah an ni ta chu lawmawm an tih thu an sawi ve thung nia sawi a ni.
He tualthihna chungchang hi Police (CID) te chuan ngawrh takin an chhui mek zel a ni.

Chanchinthar lawrkhawm

MISSTA-in ringhlel
Mizoram Secondary School Teachers Association chuan RMSA sum hmanga School class room leh mamawh dangte sak a tum danah hlauhthawn an neih thu an sawi. MISSTA hruaitute hian nimin khan Aizawla thutharlakhawmtute kawmin, RMSA danin a sawi angin state management & development Pricipal emaw Headmaster emaw in a kaihhruai chuan civil works hrang hrang a thawk tur a ni a. Hetihlai hian a hna tak tak thawk tur chuan party mi leh sa dah tumna a awm nia sawi a nih avangin tunlai contractor hnathawh thlirin school building tha a chhuak lovang tih an hlau thawng hle niin an sawi.

MPCC hruaitu thar
MPCC President atan an President nilai, Chief Minister Pu Lal Thanhawla chu chuhtu dang awm lova tlinga puan a ni. MPCC hruaitu thlanna hi nimin khan Aizawla Vanapa hall-an neih a ni a, hetah hian an Vice President atan Pu R.Lalzirliana Home Minister pawh chuhtu dang awm lovin Vice President atan an thlanga, Tresurer atan chuhtu awm lo bawkin Minister Pu H.Liansailova thlan a ni bawk. Hetih rual hian MPCC executive member tur mi 40, mipa tan seat 33, hmeichhe tan seat 7 an thlang nghal a ni.

Rit phur zawh phal lo
Bairabi bul, Kawnpui lui kaina thir Lei chu motor rihna nena qtls. 162 aia rit tan zawh phal a nih loh avangin nimin atang khan buhfai phurtu truck 30 chuang chu Bairabi-ah an tangkhang mek.

Gas put vangin damlo
Nimina Mumbai-a boruak chhia Chlorine gas puk avang in mi 80 chuang an dam loh phah. He gas hi Lal Bahadur Sastri College chheh vel atanga put niin, dam lo te chu a bul hnai damdawi inah dah luh nghal an ni a, an kaw chhung a sat bakah an khua a sik a ni.

Lawrkhawm

Chhiah lak tum duh lo
Mizoram road transport Union chuan petrol leh diesel man sang zing lutuk leh chhiah a hrana lak an duh loh thu nimin khan thuthar lakhawmtute an hrilh a. An lungawi lohna lantir nan Zirtawpni khian Aizawl khawpui chhunga lirthei sumdawnna atana hman chi zawng zawng bandh huaihawt an tum thu an sawi bawk.

Gurkha-te hun hmanpui
Nimin khan Nepali mi ropui Adikavi Bhanu Bhakta Acharya piancham vawi 196-na Kolasib Tumpui Hall-ah lawm a ni a, Hun hmanpuitu Pu Lal Thanzara, Parliamentary Secy. chuan, Gurkha te nen hian chhul khat chhuak nilo mah ila kan khawsak hona a tha hle a ni a ti a. Gurkha te chu kum 1890 atang Mizorama an lo awm tawh thu sawiin, OBC-a an awm theih nan hmalakpui a tum thu a sawi bawk.

Minister hovin meeting
Nimin khan Guwahati-ah Pi Ambika Soni, Union Minister of Informa tion & Broadcasting hovin, meeting pawimawh tak neih a.He meeting-ah hian Mizoram atangin, AIR, DDK, Field Publicity te leh I&PR Officer-te pawh telin, Mizoram aiawhin Pu Lalsiama Fambawl, Dy. Director, I&PR chuan thu a sawi a ni. Union Minister of I&B hi, Minister of State bakah Secretary leh a hoten an tawiawm tha hle a ni.

Saiha-ah pawisa lem
New Saiha-a cheng Suichin pari inti hnen atangin cheng 500 note lem Rs. 1,48,500 hu man a ni. Suichini hian kar kalta khan SBI Saiha ah pawisa hi dahluh a tum a. A pawisa dah tur zingah hian Rs. 500 note lem hi man chhuah a ni ta a ni. Suichinpari hian a pawisa chu Sangau khua ami Ngun thawnga hnen atanga a dawn a nih thu a sawi a. Ngunthawnga pawh hian a thawn ngei tih a sawi a ni. Suichinpari hi Police ten manin, bail-a chhuah a ni.

Ruallung khua-ah mibo
Lalremruata(29)s/o Thinlaihnema Ruallung chu kar kalta Zirtawpnia a aiawt en a haw lova, tun thlengin a chin chang hriat a la ni lo. Hetianga a chin hriat lova a awm tak avang hian an khawtlang leh thenawm khua ten ngawrh takin an zawng mek a ni.

Lalpiangliana thihna kaihhnawihah Police 6 man an ni

Tanhril Veng Lalpiangliana thih dan chungchang chhuina kal zelah vawiin(13.7.2010) Police 6 man an ni a, an zinga thenkhat chu an mahni an inpe nia sawi a ni.
He thil chhui hna hi Police kut atangin CID crime chuan a la chhawng a, nimin khan anticipatory bail dil hnawlsak leh tak Police 7 zinga 6 te chu CID chuan manin, thu zawhfiah mek an ni.

Sekibuhchhuak mantute

Serchhipa Cable TV, TT vision-in FIFA World Cup sekibuhchhuak a buatsaih chu July ni 12 (Mon) hian MJA Serchhip Dist ten result enin, a man tur pawh thum an vawr nghal a, Champion ring dik mi 695 zingah Thangmami Vengnuam P&E Veng chuan Mobile handset manin, Freddy Lalhruaizela Chhim Veng, F.Lallungmuana Darnam, Lalramtluanga Chhim Veng, Lallawmkima Chhim Veng bakah Ph. 9063354148 ten consoation an dawng.
3-na Germnay ring dik mi tam tak zingah B.Zathangpuia Vengchungin Rs 500/- dawngin, consolation- Lalhmingthangi Chhim Veng,Hmangaihi Vengchung, Lalremsanga IOC, Zothankhumi Med qtr leh VL Ralte Vengnuam New Serchhip ten Rs 50/- theuh an dawng bawk.

FIFA World Cup-ah Spain an champion

FIFA World Cup 2010, S.Africa Johnnesburg-a khelh zawh takah Spain chuan Netherlands 1-0 hnehin an Champion ta.
Heng ram 2 te hi hun pangngaiah goal inpe lova inhneh tawkin, hun pek belh minute 30 an khel leh a, hun tawp dawnah Iniesta chuan an chakna goal hi a pet lut ta a ni.
Heng team 2 inkhel boruak hi a tang hle a, yellow card 13 bakah red card 1-in an hmu a, inhneh tawk viau anga an lan laiin hnehna chang ta Spain erawh inkhel pangngai ah pawh an chungnung deuh zawk a ni.

Aizawl Chatlang leh Sairang khuate ramri avangin an inep hman thelh

Serchhip 12th July 2010 : Aizawl Chaltlang leh Sairang khuate chu Inrinni khan ramri chungchanga ngaihdan inan loh avangin khawtlang an inpunkhawmin, buaina lian awm lovin tin tir an ni.
Chaltlanga YMA Branch hruaitute leh midang mi 40 te chu Inrinni khan an Veng thlanmual hmun tur, Sairang thlen thlak hmalawk ami chu en fela, samfai turin an thawkchhuak a. Hei hi hriain Sairang khua chuan ramri chungchang enfel tura thawkchhuak emaw tiin, mipui an inpunkhawm a. Chatlang YMA hruaitute chu hnathawk hleithei lova hun rei tak an awm hnuah an khawtlangin tlai lama thil awm dan an hriatin an inpunkhawm ve leh bawk a. Tlai dar 5 vel khan an thlanmual hmun tur en hian an thawk chhuak ve leh ta a ni.
Buaina lian zawk a chhuah palh venthawn thilah helai hmunah hian Police thahnem tak duty nghalin, sorkar lam thuneitute pawh an awm a. Veng 2 mipuite an inkalpawhlohna turin Police-te hian kawng an dang ping a ni. Buaina lian tham awm lovin khawtlang hruaitute chuan an inkar ramri buai chu sorkar-in chingfelin, gazette-ah chhuah thuai se an duh tih an sawi ve ve a. Mipui pungkhawmte hi zan dar 11:30 vel khan an tin darh chauh a ni.

Lawrkhawm

Tanhrila Gorkhali pawnchhuak lo tura tihna sut turin ngen
Gorkha Youth Association chuan thuchhuah siamin, Tanhril VC member Pu Lalpiangliana thihna chu pawi an tih thu leh a chhungte an tawrhpui tak zet tih an sawi a. He thihnaa mawhphurtute zawng chhuaka an phu tawk hremna pe turin sorkar an beisei tih an sawi a.
Tanhrila Gorkhali-te vawiina pawn chhuak lo tura tih an ni chuan a barakhaih hle tih an sawi a. Tanhril JAC-te chu an Veng chhung Gorkhali te pawn chhuak lo tura an tihna chu sut leh hram turin an ngen a ni.

Lawngtlai VC inthlang dawn
Lai Autonomous Dist. Council huamchhunga VC seat 5 awmna Lawngtlai Chanmari-II a VC by-election chu vawiin hian neih a ni dawn a, zing dar 7 atanga tlai dar 4 inkar chhungin vote thlak a ni ang. He inthlanna hi Congress atangin mi 5-in an chuh a, MNF atangin mi 1 leh Independent mi 4 te an ni.

Tuialhthei lo thlen tan mek
Mizoramah petrol leh diesel a rawn thleng tan mek a, harsatna pawhin ziaawm lam a pan chhoh zel beisei a ni. Aizawlah chuan petrol pump-te chuan nimin pawh khan a duh apiangte tan an pe chhuak nghal a, District danga harsatna pawh ziaawm lam a pan chhoh nghal beisei a ni.

World Population Day
Khawvel hmundangte rualin India ramah pawh nimin khan mihringte ni ‘World Population Day’ hman a ni. He ni lawmna pui ber New Delhi-a neih chu Union Health Minister Gulam Nabi Azad-a’n a hmanpui a ni. He Ni hi mihring kan pun chak lutuk avanga harsatna kan tawh tur inzirtirna Ni atan United National population fund hmalakna in kum 1987 atang khan hman tan a ni. Tunah hian khawvel pumah mihring tluklehdingawn 7 vel kan awm nia chhut a ni a. India ramah chuan mi tluklehdingawn 1 leh nuai 150 vel kan awm mek nia rin a ni.

MULCO bawnghnute
MULCO-in thingpui pawlh atana bawnghnu a bika a siamthar chu mipui lei theih turin Inrinni khan Aizawlah Pi Lalriliani’n a tlang zarh. Pi Ri-i chuan MULCO-in Mizo mipuite hrisel zawkna tur ngaih tuaha bawhnute tha zawk an siam chhuak chu lawmawm a tih thu a sawi a, tun aia hriselna kan ngaih pawimawh deuh deuh tul a tih thu a sawi bawk.

Chhiarpui hun pawtsei
Mizorama chhiarpui neih hun chhung chu sakawlh nena inzawmna nei nia hriat vanga tel duh lote avang in ni 15-a pawhsei a ni. He chhiapui hnathawh hi thla hlui ni 30 a zo tawh tura tih a ni a, hetihlai hian chhiar puia tel duh lo chhungkaw 1355 tun dinhmunah an la awm avangin Registre Gen. of India chuan ni 15 chhung a pawt sei leh a ni. Chhiar puia tel duh lo chhinchhiah danin tun ah hian Aizawl Dist. ah chhungkaw 449, Lunglei Dist ah 106, Kolasib-ah 328 Lawngtlai-ah 173, Serchhip ah 50, Champhaiah 167 Saiha-ah 64 leh Mamit ah 18 an awm a ni.

Tualchhung 12:7.2010

Sangluri a boral
PC.Lalsangluri (56) d/o PC.Lalchung nunga New Serchhip chu nimin chaw hma dar 1:30 khan Chuapna avangin a boral a, lumen a nih hnu vawiin hian vui a ni ang.

Pi Vuani vuiliam a ni
Zirtawp zan dar 10:50 khan Pi Lalvuani(78) w/o Upa Hrangdawla, Serchhip Field road chu pumna in a boral a, lumen a nih hnu Inrinni khan Field Veng thlanmualah Pastor Hrangaia Hmar-in a vui.

Thupek bawhzui
Sub-Divisional Magistrate-in ran khuahkhirhna thupek a chhuah bawhzui in, Inrinni zing khan Police ten Serchhip Bazar-ah Ui 4 an man.

MUP-in darkhuang thar an lawm
Inrinni khan Serchhip P&E Veng MUP Unit chuan Pu TC Sangkama Inah Dar khuang lawmna hun an hmang.He hun Unit President Pu T.Zakunga kaihhruai ah hian Pu Lalramliana Dist Soil & Water Conservation Officer chu khuallian ah hman a ni a.Darkhuang thar khap 8 a lian petu, Pu Lalhmingmawia Ralte chu khualzahawmah hman ni bawk

Tualchhung

SDPO thar
Pu Lalrinpuia Varte chu SDPO Serchhip in a rawn awm thar a. He hna lo chelhtu Pu P.Lalzuala chu 5th IR ah sawnchhuah a ni.

Seminar buatsaih dawn
Vawiin chawhma dar 11 atang hian DC’s Conference hall-ah SEDAL leh ZOPPEN buatsaihin, Seminar neih a ni dawn a. He seminar-ah hian Rev.Liang khaia thu leh hla chungchang zira, sawiho a ni ang.

Innei dawn
Vawiin chawhma dar 11 hian Lalrin zuala s/o Zalenthangi Serchhip Vengchung leh Rengkungi d/o Hrangmana Saron Vengte chu Vengchung Kohhran Biak Inah an innei dawn.

Home Minister hovin hnamdang laka pawisa khawn thin chungchang sawiho a ni

Serchhip 9th July 2010 : Nimin khan Secretariat Conference Hall-ah Home Minister R.Lalzirliana'n tunlaia Mizorama Tlawmngai Pawl zinga hnamdang hnen atanga pawisa khawn thin tam lutuk chungchangah Tlawmngai pawl hrang hrang hruaitu kalkhawmte nen sawiho.
Home Minister R.Lalzirliana chuan, he inkawmhona-ah hian thusawiin, tunlaiah hnathawk peih lo awm mai mai, eng Tlawmngai Pawl emawh invuah chawpa pawisa khawn Mizoram chhunga tam ta lutuk hian state ralmuang ber leh Kristian za-a za inti thin hnam hi min ti mualphova, kan hmai an ti mawk a, hnamdangte tan Mizoram chu ralmuan lohna hmunah an chantir a ni a ti a. Minister chuan ram tina kala chanchin tha hril tur kan nih laiin, kan bula min chenchilhtu ringlo mi te'n mizo chu hnam sual tak, hah taka mi thawhchhuahsa chhuhsaka mi chunga hleilen thin anga min hmu chuan kan Kristiana nen phei chuan a inhmeh lo hle dawn a ni a ti bawk.
Home Minister chuan kalkhawm Tlawmngai Pawl hrang hrang hruaitute hian sorkar rilru in hria a, sorkar chuan donation hming put tira pawisa khawn hi kan duh lova, dan in a phal bawk lova, Dan in a phal loh a ni tih hre reng chunga dan kalha tilui an awm chuan dan in milian leh mi te thliar hrang lovin ro a rel tur thu a sawi bawk.
He inkawmhona-ah hian sorkar lam atangin Home Minister, Parliamentary Secretary (Home) Pu Lalrinmawia Ralte, Home Commissioner Pu Lalmalsawma bakah sorkar mi pawimawh tha hnem tak an tel a Tlawmngai Pawl CYMA, MHIP, MUP, MZP leh MEWA aiawh te bakah MJA te an tel a ni.

Tuialhthei leh buhfaia harsatna reilote hnuah sutkian a ni dawn - Supply Minister

Food, Civil Supplies & Consumer Affairs Minister Pu H.Rohluna chuan, tuialhthei leh buhfaia harsatna Mizoramin a tawh mek chu reite ah sutkian a ni dawn a ti.
Nimin khan he thu hi Aizawla thutharlakhawmtute hrilhin, Minister chuan Mizoramah June ni 16 atanga tuialhthei leh buhfai a thlen mumal loh hnuah vawiin khan buhfai phur Rel wagon 22-in Bairabi a thlen bakah tuialhthei pawh Mizoram atanga a lakna ber Ramnager-ah a thleng leh tawh a ni a ti a. Hun reilote chhung Mizoramin harsatna a tawh chhan chu State pawna rel kawng chhia leh Bandh vangte a ni tih sawiin, heng vangte hian sorkar tan hmalak vut vut a harsat a ni a ti.
Minister chuan vawiina diesel tanker 12 leh petrol tanker 1 in Mizoram a rawn luh beisei a nih thu sawiin, Guwahati atangin petrol tanker 14 leh diesel tanker 8 ten Mizoram an rawn pan mek tih a sawi bawk.

Lawrkhawm

Industrial Estate
Nimin khan Industrial Estate, Zuangtui fel leh tha zawk a enkawl a nih theihna tur leh thil siamtute leh mipui tan chenfakawm zawk a siam anih theihna tur ngaihtuahin Industries Department meeting hall-ah Pu R.L. Rinawma, IRS, Com missioner & Secretary Govt. of Mizo ram hovin Management Com mittee meeting neih a ni.

Mi bum hmang man
Pawisa puk lawra Rs.vaibelchhe 2, nuai 36,57750 vel ti chingpentu nia sawi, Lawngtlai Vengpuia cheng Jenet Lalthansangi chungchang chak zawka chhui tura nawr turin a pawisa pukna ten Lawngtlai DC an ngen. Jenet Lalthansangi hian sorkar-ah bill leh contract lei tur awm anga sawiin, a pung awmin mi pawisa puk a dil a, a tir lamah chuan a pung nen pekirin, a hnu lam ah erawh a pe thei ta lova. Police te chuan June ni 12 khan manin, thu zawh fiah atan an kawl a ni.

GoM din nise a ti
Chhungkaw hming thatna humhalh nana mi thahna thleng thin laka dan anga thil tih a nih theih nana dan neih lai siamthat dan tur ngaihtuahtu tur Group of Ministers din nise tiin, sorkar laipui chuan thutlukna a siam a, hemi chung changah hian State sorkar-te ngaih dan pawh ngaihchan tum a ni.

Sangha khawina tlawh
Sangha tharchhuah kawnga mahni State chhung chawmzo thei tur ruangam ruhrel ngialnghet siam turin hma lak mek a ni a. Infras tructure for Fisheries Development siam tur hian Pu P.L. Thanga, IAS (Rtd.) Member Secretary, Planning Department leh a tawiawmtu Technical Officer ten Mamit Dist.a sangha note Nursery chu niminpiah khan a hmunah sorkar leh mimal siamte an tlawh kual.NLUP hnuaiah sangha vulh thlangtute mamawh sangha note vaibelchhe 2.45 tling tura ngaih a nih avangin ngawrh taka hmalak a ni.

Anthurium festival
Nimin khan Pu S.Hiato, Tourism Minister hovin a Office ah Anthurium Festival 2010 neih hun leh neih tum dan sawiho a ni. He festival hi Sawrkar laipui atanga sum hmuhin buatsaih a ni dawn a, September 10 leh 11, 2010 ah Reiek Tourist Resort ah neih tura rel a ni.

DP&AR-in sorkar hnathawk aikal late a bihchiang

Mizoram sorkara DP&AR chuan Department hrang hranga hrisel lohna avanga aikal la sorkar hnathawkte dinhmun enfiahin an chungchang a ngaihtuah mek.
Nimin khan heng sorkar hnathawkte hi kokhawmin, a mal te te in a kawm a, an harsatna leh an dinhmunte zawtfiahin, an dinhmun azirin invalid pension-a kaltir theih dante a ngaihtuahsak a ni.
Sorkar hnathawk aikal la zingah hrisellohna chhuanlama aikalte chauh nimin khan koh an ni a. Chhan leh vang hriat chiah lova aikal la te chu la ngaihtuah nawn leh tura tih a ni. Hrisellohna avanga mahni hna thawk hleithei lova aikal late chu invalid pension hmanga kal tir a, an post chu dan hmanga hnawhkhah theih dan kawng zawn mek niin, vawiin hian midang an kawm chhunzawm leh dawn a ni.
Hrisellohna chhuanlama aikal la Department hrang hranga kohte hi PWD-ah mi 14, PHE-ah 6, Art & Culture-ah mi 3, Education Department ah mi 12, Health Services-ah mi 2, UD & PA-ah mi 5, Transport-ah mi 14 leh Agriculture, Horticulture, Law & Judicial, AH & Vety, Home Guards, Printing & Stationary, Land Revenue & Resettlement, Secretariat Administration atangte in mi 1 theuh an ni.
Hetihlai hian DP&AR chuan sorkar hnathawkte semzai hna a thawk mek bawk a. Hemi chungchang buaipuitu Assessment Committee chuan report an siam zo tawh a. Sorkar Deptt. thenkhatah an indaih hle laiin, then khat chu an indaihlo hle tih committee chuan chuan hmuchhuakin, heng mite semrual dan hi a ngaihtuah a ni.

Tualchhung

Pu Hminga vuiliam
Nimin zing 1 vel khan Pu Lalhming liana f/o Lalhmangaiha Chawngthu, Serchhip Field road chu zunthlum leh thisen sang avangin a boral a, nimin vek khan Field Veng thlanmualah vui a ni.

Ran khuahkhirhna thupek
Sub-Divisional Magistrate Pu K.Van lalruati chuan June ni 28 khan ran khuahkhirhna thupek chhuahin, ran khawlaia tla chhuak reng reng chu a neitu awm lo anga ngaih a ni ang a ti. He thupek hi chhuah a nih atanga thla 2 chhung atan hman a ni ang.

SDATA-in player 8 a tir
Vawiin atang hian Aizawl Eletric Veng YMA Hall-ah Mizoram Taekwondo Championship neih tan a ni dawn a. Serchhip Dist.Amateur Taekwondo Assn. chuan player 8 a tir a ni.

MHIP Day hmang
Nimin MHIP Day vawi 36-na chu ram pumah MHIP member ten uar taka hmangin, mi harsa zawk tanpui nan leh vantlang thenfai hnatlang nei te-in he Ni hi hman a ni tlangpui. MHIP hian Mizoram pumah member 223976 an nei mek nia sawi a ni.

Tuialhthei harsatna
Mizoram puma tuialhthei harsatna chuan zual lam a pan mek zel a. Serchhip khawpui chhungah pawh vantlang hman chi Taxi leh Auto-rickshaw tam zawkte pawh an tlan chhuak thei tawh lova. A tlan chhunte pawhin chuan man ti sang hialin, nunphung pang ngai a nghawng mek.

MHIP Sub-Hqrs. Serchhip-in Tiringa do beihpui thlakna hun a hawng

Serchhip 6th July 2010 : Nimin khan Serchhip CMO’s Conference hall-ah Sub-Hqrs. MHIP Serchhip-in ‘Tiringa leh a kaihhnawih’ do beihpui thlak hawnna hun an hmang.
He hun MHIP Sub-Hqrs. Vice President Pi Lalhruaitluangi kaihhruaiah hian khuallian CMO Dr.Malsawma chuan thu sawiin, hnam dang ten ei leh hmuam tur chi hrang hrang, itawm leh a tuamna mawi tak taka an siamte hi inchimralna hmanrua a ni thei a. MHIP-in Teringa chu mihring hriselna atan a tha lo a ni tih hria a, do tura ke an rawn pen chhuak chu lawmawm a tih thu a sawi a. Vaihlo atanga siam Teringa chuan sum leh paiah chhiatna min thlen lo mah se, taksa hriselnaah chhiatna min thlen mek avangin chhungtinte mahni In chhung theuh atanga a do hna tan turin a chah a. MHIP-te chu Teringa an dona kawngah an hlawhtlinna chu a zuartu an awm tawh loh lamah ni lovin, mi-in an eia an hmuam duh lohnaah a innghat zawk tih hria a, mite thinlung hnehsak turin a chah bawk.
Teringa thatlohna hrang hrang tarlangtu Pi PC.Lalrintluangi Secretary, MHIP Sub-Hqrs. Serchhip chuan, Teringa chuan cancer chi hrang hrang a thlen theih bakah hrisel lohna tam tak mihringah a thlen thin a ni tih a sawi a. Sumdawngte leh dawrkaite chu mihring hriselna ti chhe thei Teringa leh a kaihhnawih lam chi zuar tawh lo turin MHIP chuan a ngen tih a tarlang bawk.
Thusawitu dang, an pawl President Pi Saimawii Sailo chuan, Teringa leh a kaihhnawih thilte an dona kawngah mipui leh khawtlang tawiawmna an mamawh dawn tih sawiin, an dona kawngah Teringa zuartute chu zaizap taka an dawr tur thu sawiin, zuar tawh lo tura ngenna lehkha an pek tur thute a sawi a ni.
He hunah hian Sub-Hqrs. MHIP hnuaia Branch hrang hrang aiawh member thahnem tak telin, Tiringa do beihpui hi an mahni Branch theuh ah chak taka kalpui an tum a ni.

Tualchhung

Teringa do beihpui hawng dawn
Vawiin chawhma dar 10 hian CMO’s Conference hall-ah MHIP Sub-Hqrs. chuan ‘Teringa’ do beihpui thlak hawnna hun an hmang dawn.

Bike bo hmu
Inrinni zan khan Serchhip khawpui chhung kawngpui kama hmun hrang hrang dah Bike 3 chu a bova, amah erawhchu nimin lam khan heng Bike hi khawpui chhung Veng dangah hmuh leh nghal vek a ni.

Tuialhthei harsatna a lian
Tunlaia Mizoram puma tuialhthei harsatna chuan Serchhip pawh a nghawng nasa hle a, vantlang hman chi lirthei tlan chhunte pawhin chuan man an ti sang hial nia sawi a ni.

Mitin ban phak zirna siam tum a ni - Education Minister

Mitin banphaka zirna siam a nih theihna tura sorkar laipui ruahmanna siam hrang hrangte chu Mizorama hman ve turin hmalak mek a nih thu Education Minister Pu Lalsawta chuan a sawi.
Inrinnia Aizawl Press Club-a thutharlakhawmtute a kawmnaah he thu hi sawiin, Minister Pu Lalsawta chuan, Mizoram sorkar-in zirlai harsa te tan student loan leh technical leh professional course zirna man tlawm zawka buatsaih a tum a ni a ti a. Loan a pekchhuah rulh hun chhung tur hi kum 5 bituk niin, a bul tan nan Rs. nuai 11 leh 9372 sorkar chuan ruahman a tum tih sawiin, hemi bawhzui tur hian NEFC din tum a ni a ti.
Minister chuan India rama zirna sang enkawltu tam tak, Council, authority leh commission tam lutukin harsatna a thlen thin avangin hei hi tihbova a khaikhawmtu tur Higher Education & Research commission din tura hmalak mek a nih thute, Electronic data base hmanga result leh mark sheet buatsaih tum a nih thu leh ramin a mamawh mila mihring chhawr tlaka buatsaihna National Vocational Qualification frame work hman tum a nih thu te a sawi a. Mizoramah ITI, Polytechnic leh Professional leh Technical college tam zawk din a nih theih nan ruahmanna siam a ni a ti bawk.
He huna thu sawitu dang Parliamentary Secretary Pu Chawngtin thanga chuan Mizoramin trained teacher a ngah chunga zirna quality tha a awm loh chhan chu inpekna a awm tawk loh vang leh Mizo ten tih dan phung pangngai kan thlak hreh vang a ni a ti.

Horticulture Department buatsaihin Loneitute training pek an ni

Serchhip 2nd July 2010 : Nimin khan New Serchhip YMA Hall-ah Horticulture Department buatsaihin Farmers training neih a ni.
He hun Dr.E.Saipari, Jt.Director Horticulture kaihhruaiah hian khuallian District Bawrhsap Pu H.Darzika chuan thusawiin, Mizoram leilung chi eng thlai pawh that duhna hmun a nih avangin kuthnathawktute chu taima taka hnathawk tur leh sorkar tanpui tlaka thawk turin a chah a. Mizoram sorkar tluka Loneitute ngaihsak sorkar an awm theia a rin loh thu sawiin, Pu Darzika chuan, sorkar-in thlai chi a sem a, a enkawl dan leh chin dan mithiam ten min zirtir a, a hralhna thlengin min ngaihtuah sak chunga kan hlawhtling thin lo hi chu inenfiah kan mamawh a ni a ti a. Lo neitute chu Department mithiam ten zirtirna leh tih dan tur an kawh hmuh te zawm tum hram hram thin turin a chah bawk.
Training hawnna inkhawmah hian Nl.Laithangpuii a solo a, Tv C.Laldinpuia’n fiamthu a thawh a. DHO Pu Lalhmangaiha’n lawmthu sawiin hun a ti tawp a. Chawhnu lamah thupui hrang hrang hmangin heng mite hian zirtirna an pe - Dr.E.Saipari Jt. Director, Pu VL.Remruatpuia HEO, Pi Lucy Zaithangpuii HEO, Pu K.Lalduhawma Dy.Director, Pi M.Vanlalzami HDO leh Pu K.Lalengliana HEO. He hunah hian District chhunga Loneitu thahnem tak telin, thupui sawihona tha tak an nei zui a ni.

Tualchhung

H.Secondary School din dawn
Serchhip khawpui chhunga Higher Secondary School din belh chungchanga nimina SSA BRC Hall-a khawtlang aiawh thukhawmte chuan nakum 2011 atang khian Serchhipah private-in Higher Secondary School din nise an ti a, a hmun hma tur pawh tun atanga ngaihtuahin, Managing Board pawh din nghal nise an ti a ni. Hetianga School thar din belh rawt a nih chhan hi tuna Govt. Serchhip Higher Secondary School ah hian zirlai seat chang lo thahnem tak an awm tak vang a ni.

Serchhipah HIV+ mi 66
Nimin khan MHIP Drop-in-centre Ser chhip leh ICTC thawktu ten Joint meeting neiin, HIV/AIDS darh zel tur kawnga hmalak dan an rel a ni. Report a a lan dan in Serchhip Dist. ah thisen test mi 4775 awmin, an zinga mi 81 te chuan HIV+ an nei a. Serchhip Drop-in Centre bikah mi 3440-in thisen test-in nu naupai 12 telin, mi 66-in HIV+ an nei bawk.

Day pualin thilpek
Nimin Doctors Day pual khan Indian Medical Association Serchhip Branch chuan Serchhipa Orphanage Home-ah thilpek pawisa fai Rs. 5000 an hlan a, hei bakah hian Home naupangte hreiselna an enfiah nghal bawk.

Ei leh barah harsatna
Lamding leh Bhadalpur inkar rel kawng chhiat avangin Mizoramin tuialhthei bakah ei leh barah harsatna a tawk mek.

Lawrkhawm

Ran talh zat
AH & Vety Deptt. tarlan danin Mizoramah Inrinni apiangin Bawng 200-300 talh thin a ni a, chung zinga a tam ber 90% chu ramdang atanga lakluh a ni a. Kum 2007-2008 khan ramdang atanga bawng talh tur Mizoramin a lakluh 19117 chu Rs. vbch. 29 man a ni a. Hemi kum veka Vawk talh tur lakluh 82542 chu Rs. vbch 125 chuang man a ni. Hei bakah hian kum 1 vawk note Mizoramin a mamawh zat chu 8,60,000 chuang niin, mamawh zat hi kan inphuhruk zo lo hle niin Deptt. chuan a tarlang.

Thihna hrethiam lo
New Vervek Police lock-up-a inawk hlum nia sawi Ngurhmingthanga thih dan chungchanga an lungawi lohna chu New Vervek khuaa tlawmngai pawl ten thuchhuah siamin an tarlang a. He thihna hi an hriatthiam loh thu tarlangin, mipui chhanhim tur Police kuta a awm laia a thi chu police-te inthlah dah vangah an ngai tih an sawi a. Ni 29 zing dar 2-3 inkara thi nia Police ten an sawi laia zing dar 6 a chhungte an hrilh chauh chu police ten an dinhmun insawifiahna atan hun an hmang nia an hriat thusawi in, Ngurhmingliana nupui fanaute hnenah sorkar-in zangnadawmna Rs. nuai 5 pe se an tih thu an sawi bawk a ni.

Sa zawrhna hawng
Nimin khan sa thianghlim leh hrisel zawrhna (Modern Meat Shop) Meat Marketing Network chu AH & Vety Minister Pu Nihar Kanti Chakma’n a hawng. Minister chuan Vety. Department-in Sa hrisel leh thianghlim zawrhna 'Modern Meat Shop' a hawng thei ta chu lawmawm a tih thu leh ram changkang leh hmasawn kan nihna kawnga rahbi chhin chhiah tlak pawimawh tak pakhat a nih thu a sawi a ni.
Meat Marketing Network hnuaiah hian Aizawl khawpui veng hrang hrang hmun 11 - Bawngkawn, Ramhlun Venglai, Chaltlang Dawrkawn, Chanmari, Zarkawt, Dawrpui, Treasury Square, Sikulpuikawn, Dinthar, Vaivakawn leh Khatla-ah te Sa zawrhna dawr hi siam phawt a ni.