Tualchhung

27.3.2010 - MCO-in certificate hlan dawn
Mizo Cultural Organisation P&E Branch Serchhip chuan Cheraw kan hmanga Guinness World record siamnaa tel an member-te hnena certificate hlanna hun vawiin chhun dar 12 hian Little Flower convent school-ah an hmang dawn.

Tumkau Ni
Naktuk Pathianni hi Isua Krista-in lal anga Jerusalem a luh Ni, Tumkau Ni a ni a, hemi pual hian Sunday school zirlai naupang ten tumkau chawiin; khawilai an fang leh dawn a ni.

HSLC exam result tihchhuah a ni Exam beitu zirlai 66.6% an pass

Serchhip 26th March 2010 : Nimin khan Mizoram Board of School chuan kum 2010 HSLC exam result a ti chhuak ta a. Exam beitu zawng zawng zinga 66.6% in an pass a. Exam beitu mipa za zela 69.64% in an pass a, hmeichhia 63.62% an pass.
Kumin hi HSLC exam beitu an tam ber tum niin, mi 14652 exam an bei a, an zinga mi 9758 te an pass a, hei hi za zela 66.6% a ni. A pumpuiah distinction-a pass mi 320 awmin, 1st division-ah mi 1586, 2nd division-ah mi 3337, 3rd division-ah mi 4513 an pass a. Heng bakah hian subject pass kim lo compartment mi333 an awm bawk.
Mizoram pumah Benjamin Lalfakmawia s/o Biakdika Colney, St.Peter’s Higher Secondary School Chhingchhip a ni a. Top 10 ah mi 12 awmin an zingah hian hnam dang zirlai mi 4 an tel a, Heng mite hi Top 10 te chu an ni :
1. Benjamin Lalfakmawia - St Peter's HSS
2. Anna Skariah -St Paul's HSS
3. Rakhee Sharma - New Angel Public School
4. Sujata Sharma - St.Pauls HSS
4. Vishwanidh Sharma - St.Pauls HSS
5. Shirley Lalrinfeli - Helen Lowry HSS
6. JC Laltharmawia - St Lawrence School
7. C Lianpuithangi - Helen Lowry HSS
8. Malsawmkima - St. Paul's HSS
9. Zochampari - Govt. Mizo High School
9. Jenny Lalramliani - St.Pauls HSS
10. Anne Lalliankimi Fanai - Highland Public School

Lawrkhawm

Sipai bangte chhuanawm ti
Indopui 2-na hunlaia Nagaland leh Burma inrina hmun, Jessami a 1st Assam Regiment sipai ten Japan rallian an lo danchahna hmun, Mizo sipai 50 chuang thihna hriat rengna ni 'Jessami Day' nimina Vanapa Hall-a neih hmanpuitu Chief Minister Pu Hawla chuan India sipai hrang hranga Mizo sipai ten huaisen taka an tih tur an hlen thin avangin Mizote hming an ti tha thin chu chhuan awm a tih thu leh mi hmantlak an nih avangin Mizo mipui zahve hi sipai bang ni ta ila kan khawtlang nun hi a nuam hle ang tih a beisei thu a sawi.

Mou sign
Chief Secretary Chamber-ah Mizo ram Sorkar leh Atomic Energy Regulatory Board (AERB), Govt. of India chuan X-Ray hmanga thlalak chungchangah mipui, damlote leh x-ray khawl enkawltute himna tur MOU an sign.Mizoram Sorkar aiawhin Pu Lalrothanga, Joint Secretary, Health & Family Welfare chuan a hming a sign a ni.


Hnama chiang turin duh
National commission for minorities Vice Chairman Pu HT.Sangliana chuan Mizote chung ram chhung ah hnam te ni mah ila, Mizoramah chuan nu leh pa chan changin Mizote aia hnam te lehzual zawk te than tir ve a tul a ni a ti. He thu hi nimina Aizawla thutharlakhawm tute a kawmnaah sawiin, Pu Sangliana chuan Bru leh Chakma hruaitute a kawmnaah identity tih hran thinna a awm chhan chu Mizo nihna a chian tawk loh vang a ni tih a hrilh thu sawiin, hnam tenau zawkte pawhin hming bula hnam nihna dah lan a that rualin, Mizo nihna chianga, Mizochakma, Mizobru leh Mizohmar nihnaa chian a tul a ni a ti.

Pvt. Resolution hnawl sak
Nimina Mizoram Assembly session chhunzawmah Pu Lalduh awma private member resolution putluh ‘Kan dan hman lai act leh rules zawng zawngte hi Mizo tawnga dah vek ni rawh se’ tih chu sawiho a nih hnuah House-in a hnawl. Resolution neitu Pu Lalduhawma chuan tha ti lo mi 1 bak an awm lo nia a hriat thu a sawi a, act leh rules zawng zawng lehlin huphurh vanga mipui nawlpui tana a pawimawh zual thlanchhuah rawt pawh a pawm tih sawiin, he resolution pawm leh pawm loh hian tute nge kan VIP-te hi tih a hrilh fiah dawn niin a sawi.

Ralthuam dahnaah kangmei
India sipaite ralthuam dahkhawmna lian ber zing ami W.Bengal-a Panaga Dist. ah nimin khan kangmei a chhuak a, ralthuam thahnem tak kangralin, mihring tawrhna erawh a thleng lova, thuneitu ten kangmei chhuah chhan hi an chhui mek.

LK.Advani-'an fuihpawrh ti
Sr.IPS officer-in kum 18 kaltaa Babri Majit tih chhiat a nih hmain BJP hruaitu LK. Advani-a’n mipui fuihpawrh zawngin thu a sawi tih CBI court-ah a sawi.

HSLC Serchhip Dist. result

HSLC Serchhip result
2010 HSLC exam result tih chhuah taka Serchhip Dist. chhung school hrang hrangte dinhmun :
School Exam Regular Pvt. P F D I II III C
Govt.H.S Serchhip 92 56 36 57 30 1 5 19 32 5
Zoluti H.S Serchhip 14 10 4 4 10 - - - 4 -
CV.Residential 30 16 14 27 3 - 3 9 15 -
Marian H.S Serchhip 47 29 18 47 - - 20 18 9 -
Govt.JM H.S Serchhip 39 30 9 37 2 3 14 8 12 -
Govt. Chhiahtlang 167 61 106 72 89 - 12 33 27 6
Govt. Thenzawl H.S. 30 26 4 25 5 - - 2 8 15
Govt. Bungtlang H.S 25 16 9 15 8 - - 4 11 2
Govt. Keitum H.S. 16 16 - 15 1 - 1 6 8 -
Govt. N.Vanlaiphai 44 34 10 18 21 - 2 5 11 5
Govt. Chhingchhip 23 16 7 7 15 - - 2 5 1
St.Peters Chhingchhip 59 46 13 41 14 1 6 24 10 4
Govt. Baktawng H.S. 13 9 4 9 4 - - - 9 -

HSLC result

TOP TEN OF HSLC 2010
Position Name Father's Name School Marks out of 500 Letters
1.BENJAMIN LALFAKMAWIA BIAKDIKA COLNEY ST. PETERS HIGHER SECONDARY SCHOOL 467 E, M, SS, Sc,Mz,IT

2. ANNA SKARIAH SKARIAH P.C. ST.PAULS HIGHER SECONDARY SCHOOL 463 E, M, SS, Sc,Hn,IT

3. RAKHEE SHARMA BINOD KUMAR SHARMA NEW ANGEL PUBLIC SCHOOL 459 E, M, SS, Sc,Hn

4. SUJATA SHARMA SK SHARMA ST.PAULS HIGHER SECONDARY SCHOOL 458 E, M, SS, Sc,Hn,IT

4. VISHWANIDH SINGH GAURI SHANKAR SINGH ST.PAULS HIGHER SECONDARY SCHOOL 458 E, M, SS, Sc,Hn,IT

5. SHIRLEY LALRINFELI JOEL JOSEPH DENGA HELEN LOWRY HIGHER SECONDARY SCHOOL 450 E, M, SS, Sc,Mz

6. JC LALTHARMAWIA C LALDUHAWMA ST.LAWRENCE SCHOOL 447 M, SS, Sc,Mz

7. C LIANPUITHANGI C LALTHOVA HELEN LOWRY HIGHER SECONDARY SCHOOL 443 E, M, SS, Sc,Mz

8. MALSAWMKIMA LALBIAKTHANGA ST.PAULS HIGHER SECONDARY SCHOOL 442 E, M, SS, Sc,Mz,IT

9. ZOCHAMPARI SIAMKUNGA GOVT. MIZO HIGH SCHOOL 441 E, M, SS, Sc,Mz

9. JENNY LALRAMLIANI JOSEPH ZOSANGZUALA ST.PAULS HIGHER SECONDARY SCHOOL 441 E, M, SS, Sc,Mz,IT

10. ANNIE LALLIANKIMI FANAI LALHMINGTHANGA HIGHLAND PUBLIC SCHOOL

Result hrechiang duh tan http://www.mbse.in ah a en theih e.

Tualchhung

Ni 26.3.2010 : HSLC result vawiinah
MBSE chuan vawiin chawhma dar 11:15 hian kumin 2010 HSLC exam result a ti chhuak dawn a. Result hi MBSE office Chaltlang bakah an website-ah te tarchhuah a ni ang.

MJA Gen.conference-ah kal tha
MJA Gen.Conference neih zawh takah MJA Serchhip District member-te an kal tha hle a, member 17 zingah mi 16 an kal a ni.

Zikhlum thar vanglai
Serchhip tharchhuah zikhlum chuan a vanglai a thleng chho mek.

Department sum indaihlohna phuhruk nan NLUP sum hman a ni

Serchhip 26th March 2010 : Nimin Mizoram Legislative Assembly budget session neihah Home Minister R. Lalzirliana chuan, kum 2009-2010 financial year chhunga NLUP sum an dah, budget-a cheng vaibelchhe 100 an dah chu an hmang hman ta lo tih sawiin, heng pawisa hi department hrang hrang indaih lohna phuhruk turin an sem darh tih a sawi.
Minister Pu R.Lalzirliana chuan, sorkar laipui atangin sum tam zawk an la dawng dawn tho a ni tih sawiin, hlawhtling ngeia kalpui an tum avangin an che rum rum hman lova. NLUP atan hrim hrim hian cheng vaibelchhe 2900 vel an hmu thei dawn niin a sawi a.
Zawhna chhangin, Pu R.Lalzirliana chuan NREGS chu VC ten sum hmuhna anga an hmang dawn a nih chuan thil dik lo tawp a ni a ti a. Sum hman bang awm anga sawi pawh enfiah a ni ang a ti a. NREGS enkawltu VC tam takin hmasawnna ruhrel ro tling siam nan dan lo angin JCB te an hmang fova, hei hi thuneitute pawhin haider chang an nei thin a ni tih House a hrilh a. Hetih lai hian NREG Act hmangin thil ti dikte chu Rs. 1000 chawia hrem theih an nih thu leh police-ah pawh report theihin, IPC hmanga hrem theih an nih thu a sawi bawk.
Nimin session chhunzawmah hian MLA-te sem thin puanthui khawl, Mistiri bungrua leh thirdeng bungruate sem a nih tawh loh chhan chu Industries Department-in tlak hniam lam a pan vang a nih thu Industries Minister Pu S.Hiato chuan a sawi a. Mizoram annual plan budget chu pung bawk mah se, department budget chuan kum 2008-2009 budget chuan tlak hniam lam a pan zel a, hei vang hian tunhmaa lo sem thin bungrua te chu sem zui theih a ni ta lo a ni a ti.

Lawrkhawm

Ni 26.3.2010 : Minister sum mamawh pass
Mizoram Assembly budget session neih mekah nimin tlai khan Minister Pu R.Lalzirliana leh Pu S.Hiato-a enkawl department hrang hrangte sum mamawh sawi hova pass a ni. Minister Pu R.Lalzirliana enkawl Department hrang hrang enkawlna tur hi a vaiin Rs. vaibel chhe 578,60, 83,000 a ni a. Pu Hiato-a enkawl department hrang hrang sum mamawh hi nizan thleng khan sawi ho a ni.

Phunchawngah In a kang
Nimin zing dar 7 vel khan Aizawl Phunchawng Mel 6-a In pakhat chu bungrua engmah chuh hman lovin a kangral vek. He In hi Pu Vanchung nunga In, a bang dap a chung rangva a ni a, kangmei chhuah lai hian Pu Vanchungnunga nupui Pi Sang thangi’n eirawng a bawl a. An In hnuaia an fapa in mei a chhem atanga kang mei hi chhuak nia sawi a ni a. Kang thelh pawl leh mi tlawmngaite kalkhawm mah se a chak em avangin an thelh hman ta lo a ni.


CM zin lo haw
New Delhi-a Planing commis sion Deputy Chairman leh hotu dangte nen Mizoram annual plan 2010-2011 chhung atana plan sum Rs. vaibelchhe 1500 an tih fel hnu ah Chief Minister Pu Lal Than hawla chuan nimin khan Aizawl a lo thleng leh ta a. Chief Minister hi a thawhpui Minister dang ten Lengpui airport-ah an lo hmuak a ni.

Ram dang pawh him lo ti
India chuan khawthlang ramte chu India ang bawkin Pakistan-a awm Laskar-e-toiba te ang firfiaka chete beih mai theihna an hma chhawn tih a hrilh.BBC-in a kawmna ah Union Home Minister P.Chidam beram chuan Laskar-e-toiba chu ram hrang hranga hel pawlte telna Al-queada pawl ang an nih avangin eng ram mah an him tak tak lo a ni a ti a. Pakistan thian US leh UK te ang hian Pakistan chu an rama firfiak camp-te khar tura an nawr tul a tih thu a sawi bawk.

Mi firfiak thahnem tak man
Saudi Arabia chuan an ram beih tum Al-queada pawla cell pathum atangin mi firfiak 100 aia tam an man a. Heng an mi mante hi Saudi mi bakah Yamini, Somali leh Bangladeshi te an ni a. An chet lak dan tur leh ruahmanna an siam ang zawng zawngte hriat tumin, police ten thu an zawt mek a ni.

Kutke tang paih sak

Chinese mipa naupang kum 6-a upa, kut zungtang 15 leh ke zungtang 16 nei chu tun dinhmunah hlawhtling taka zai sak a ni.
He naupang, a hming tarlan loh, kut zungtang leh ke zungtang 31 nei hi Shenyang Hospital, Lioning-ah darkar 6 leh a chanve chhung zai a ni a, a kut leh ke zungtang pangngai bak 11 chu paihsak a ni .

MJA Gen.Hqrs. hruaitu tharte

Mizoram Journalists’s Association (MJA) General Hqrs. chuan March ni 23, 2010 khan hruaitu thar thlangin, President-ah H. Zosangliana; Vice President-ah Vanlalrema Vantawl; Treasurer-ah Zonunsanga Khiangte te thlantlin an ni.

Executive Member-ah heng mite hi thlantlin an ni bawk :-

1. Sangzuala Hmar
2. C. Lalzamlova
3. BK Renthlei
4. E. Lalhleia
5. R. Lalhmangaihzuala
6. Lalrinmawia Sailo
7. C. Lalhmachhuana
8. C. Lalduhawma
9. Lalbiakzama
10. Lalremsiama
11. Lal Rinmawia

Tualchhung

MJA Gen.conference dawn
MJA Gen.Conference naktuk khian Aizawlah neih a ni dawn a, Serchhip Dist.MJA member-te pawh tukin hian an kal dawn. MJA Conference avang hian tualchhung chanchinbu chu naktuk Thawhlehni atanga Ningani thleng a chhuak dawn lo a ni.

Tlanchhuaha a boral
Tv Laltlanchhuaha (20) s/o C.Ring zuala Serchhip Leisang Veng chu nimin zing khan a boral a, a ruang hi lumen a nih hnu vawiin chawhma dar 11 hian vui a ni ang.

Lengah In a kang
Inrinni chawhnu lam khan Serchhip Dist.Leng khua Vengchhaka Pu Dengrikhuma In chu bungrua chuh hman lovin a kangral vek. He kangmei hi thuk mei ti mit lova an faten tui an chawisan vang nia sawi a ni a. Kangmei hian a bula High School pawh a kangkai hman a, amaherawhchu a kan nasat hmain an thelhmit thei a ni.

PCI Moderator a thi
Presbyterian Church of India (PCI) Moderator Rev. E.F. Lyngdoh (64) chu Inrinni zing khan lungphu chawlin a thi.Rev. E.F. Lyngdoh hi Halflong-ah Jeme Naga Gospel Centenary lawmnaah Khuallian atana sawm a nih angin a kal a, PCI Administrative Secretary Rev. Laldawngliana’n a tawiawm a. Inrinni zing khan a thawh har deuh avang in, a thlen In ten chaw ei tura kaih thawh an tum chu a mutna khum bul chhuatah a lo let reng a, a lo chatthla fel der tawh a, a thih chhan hi lungphuchawl ni-a ngaih a ni.

Sports
Inrinni zan EPL result :
Aston 2-2 Wolves
Everton 2-0 Bolton
P.mouth 3-2 Hull City
Stoke City 1-2 Tottenham
S.derland 3-1 B.mingham
Wigan 1-0 Burnley
Arsenal 2-0 West Ham

†UEFA champions league quater final khel turte tih chian a ni ta a, khel hmasa zawk tun thla ni 30 & 31 ah khelh a ni ang a, a hnuhnung zawk April ni 6&7 ah khelh a ni ang. Intum turte :
Oly.Lyonnais - Bordeaux
B.Munchen - Man.Utd.
Arsenal - Barcelona
Internazionale - CSKA

SIDBI buatsaihin Baktawngah Cluster Dev.Prog.on Carpentry neih a ni

Serchhip 22nd March 2010 : Small Industries Development Bank (SIDBI ) bul tumin Sacred Heart Society chuan Serchhip District huam chhung atan 'Cluster Development Programme on Carpentry' chu Inrinni khan Multi-Purpose Building, Tlangnuam, Baktawng-ah neih a ni.
Hawnna inkhawm Serchhip D.C. Pu H.Darzika kaihruaiah hian khuallian Industries Minister Pu S.Hiato thu sawiin, Pathian-in leilungah hausakna tam taka dahte haichhuah hna hi mihringte mawhphurhna a ni a, he thuneihna kan kuta awm hi kan hman thiam a ngai a ni, a ti a. Mizoram chu hmasawnna kawngah chak zawka a kal theih nan sorkarin theihtawp a chhuah zel a, mipuite pawh thahnemngaihna chang hriaa intodelh tum a tul a. Thenawm ram leh state ten Mizoram an en thup a, chuvangin hlawhtling tak tak tur chuan khawi lai nge kan tlakchham a, kan siamthat ngai inen a pawimawh a ni, a ti.
Baktawng khua chu fakin Minister chuan sorkar tanpuina tel miah lova khaw intodelh an ni chu entawn tlakin a chhuanawm hle a ni tiin sorkar pawhin an khaw tan hamthatna hrang hrang ngaihtuahsak a tum zel tur thu a sawilang bawk.
Parliamentary Secretary Pu H.Zothangliana leh Bialtu MLA Pu K.Lian zuala pawhin thu an sawi a. Hmasawnna thlenpui tak tak turin mipuiin sorkar an rin ngam ang bawkin mipuite pawh rinawm an nih a ngai a. Hlawh tlinna atana pawimawh ber chu taimakna leh rinawma a ni a, Baktawng khua mipuite entawntlak khawpa an intodelh theihnaah zirtur tam tak a awm a. Tunah hian Baktawng atanga furniture leh bungbel siamte chu India hmarchhak mai bakah ram pawn a thleng tawh a ni an ti.
Guwahati atanga lo kal SIDBI General Manager Pu S.S.Bakshee pawhin thu sawiin India hmarchhak state te chu state dangte aiin an hnufual avangin SIDBI-in a tum ber chu he biala mipuite tan scheme hrang hrang kaltlanga, loan tenau pek a, chawikan chhoh zel a ni, a ti. Hmarchhak bialah chuan mau leh hnang tah, handloom, carpentry, tailoring leh terracotta pottery a hlawhtling viau zel a, SIDBI pawhin vawi duai lo training a pe kual tawh a. Vawiina training hian furniture siam lam ai mahin Baktawng khaw mipuiten an sumdawnna huang tizauh dan tur leh sum leh pai vawn thiam zawk dan tur inzirtir a ni, a ti.
SIDBI hi kum 20 vel ding tawh a ni a, India hmun hrang hrangah Branch an neiin a bik takin mi harsa zualte loan tenau Small & medium loan lampang an pechhuak thin a. SIDBI headquarters hi Lucknow-ah a awm a ni.

Tualchhung

NYK training hawng
Karleh Thawhlehni thleng awh tur Nehru Yuva Kendra Lunglei bul tuma New Serchhip YMA hall-a Life skill development training chu nimin khan Dist.Bawrhsap Pu H.Darzika’n a hawng a. Pu Darzika chuan, thalaite chu hmasawn zel tur an nih avanga theihna leh chakna an neihte chu khawtlang leh ram tana hmang tura chahin, lehkha thiam ringawt hi kan ramin a mamawh tawh lova, mi inpe, a taka hnathawk peih a mamawh tawh a ni a ti. He training-ah hian thalai mi 40 vel telin, a hmunah hian an riak nghal dawn a. Mi thiam ten thupui hrang hrangah zirtirna an pe dawn a ni.

Pi Chuailovi vuiliam
Nimin zing dar 3:40 khan Pi Lalchuailovi (78) m/o Hmingthan mawia(L) Serchhip Farm Veng chu Asthma avangin a boral a, nimin vek khan Dinthar thlanmualah vui a ni.

MPF Seminar ‘sorkar tha’
Nimin khan Serchhip Hmar veng YMA Hall-ah MPF Serchhip-te huaihawtin, ‘Sorkar tha’ tih thupui hmangin seminar neih a ni a. MPF Gen.Hqrs. Aizawl hruaitute thuziak zirho a ni. Seminar-ah hian sorkar tha neih tura Mizoram mamawh chu kalphung tha hnuaia roreltu tha leh khua leh tui tha neih a nih thu leh Mizoram state level leh village level inkar zau siamtha turin Panchayati Raj neih a tul tih te, sorkar tha chu rulling party ta bil ni lova mipui ta a nih thute zirin, kalkhawm ten hlawk thlak an ti hle.

Ni 100 inhlawh dawn
NREGS ni 9 inhlawhna tur chu siam fel a ni leh tawh tih DPC Pu Darzika’n a sawi a. VC-te inpeih hun hunah mipui ten an thawk lehnghal thei tawh dawn a. He ni 9 inhlawhna hi kumin chhunga ni 100 a tlinna tur a ni a ti bawk. Hetihlai hian inhlawhna hmasa pawisa sem mek a ni.

2010-2011 Mizoram budget pharh a ni Chhiah thar lak tumna a awm lo

Serchhip 20th March 2010 : Kum 2010-2011 Mizoram budget-ah chuan chhiah thar lak tumna a awm lova, chhiah lak lai leh lak dan tih thata chhiah tam zawk hmuh tum a ni.
Budget hi nimin khan House-ah Finance changtu Pu Lal Thanhawla Chief Minister ni bawk chuan a pharh a. Pu Lal Thanhawla chuan motor atanga chhiah lak tihsan tum a nih thute, Champhai leh Hnahlana winary atanga chhiah tam zawk lak theih a nih beisei thusawiin, VAT lak dan phung pawh siamthat a ni dawn a ni a ti a. Hei bakah hian kum 2010-2011 chhung hian budget neih thar tum a ni tih sawiin, hetah hian Department hrang hrang leh sorkar Department hnuaia organisation tin ten an sum lakluh tura ruahman an hmuh ngei theih nan tha takin an bawhzui a ngai dawn a ti bawk.
Kum 2010-2011 Mizoram budget hi a pumpui Rs.vaibelchhe 3719 nuai 66,18000 a ni a. Hetah hian non plan sum Rs. vaibelchhe 2134,nuai 65,94000 leh Plan sum Rs.vaibelchhe 1250 bakah CSS sum Rs. vaibelchhe 193, nuai 25,24000 a tel a. NEC atanga sum hmuh tur a la chian loh avangin telh a la ni rih lo.
He sum ruahman pumpuiah hian hemi kum chhunga sum virvel tur dah tel a ni a. Chief Minister chuan kumin sorkar kumtawpa Mizoram sorkar leiba tling khawm chu Rs.vaibelchhe 3346 leh nuai 83 a ni dawn tih sawiin, hei hi kum 2008-2009 a Mizoram GSDP nena chhut kawp chuan 85.58% atangin 78.44% ah a tla thla tihna a ni a, hei hian Mizoram sorkar leiba chu sorkar-in zawi zawiin a rul thla tih a tarlang a ni a ti a. Kum in sorkar kum chhunga sum indaihlohna phuhrukna tur Rs.vaibelchhe 642 leh nuai 81 a pharh nghal bawk.

Blanket sut hnatlannaah KTP member 2 tuiah an tlahlum

Sairang Tlawngluia Blanket sua hnatlang KTP member 2 tuiah an tlahlum.
Aizawl Ramhlun Vengchhak Br. KTP te hian nimin khan Sairang tlawnglui ah Blanket su in an kal a, hnatlanga kalte hi an vaiin mi 70 bawr vel an ni a, Blanket suk tur hi 100 bawr vel an kenga. Chanmari kawi li an tih mai Sairang balu kai thlang lawkah insu turin an inbuatsaih a, Blanket sahbawm tuia chiahna tur sylpoline chu silfai hmasak an tum chu mi 4 tui ah hian an chesual a, heng mi 4 te chhanchhuah an tumna lamah an thian 1 chu an pawt thla veleh a, ti chuan tuia tla hi mi 5 an ni a, an zinga mi 3 te chu chhan chhuah hman an ni a, an zinga mi 2 C.Lalruatfela (27)s/o C.Lalhluna leh Lalfakawma(21)s/o Pu Lalfakzuala te chu tui ah hian an tla hlum ta a ni.
Midang 2 an chhanchhuah te pawh hi an chau hman hle a, tui atanga an lakchhuah hnuah pawh nikhaw hre lovin an awma thawk te pe a nasa taka an buaipui hnu ah an rawn harhchhuak chauh a ni.

Tualchhung - 19.3.2010

MCPA hruaitu tharte
Mizoram Civil Pensioner Association Sub-Hqrs. Serchhip hruaitu tharte ,President : Pu Sangzika Hauhnar Hmar Veng, Vice President : Pu S.Thangthuama Ram thlun Veng, Treasurer : Pu Rangkhuma Chhim Veng te an ni.

NYK training dawn
Nehru Yuva Kendra Lunglei bul tumin vawiin atang hian New Serchhip YMA hall-ah Life skill development training neih a ni dawn a. Dar 10:30 hian District Bawrhsap Pu H.Darzika’n a hawng ang. Thangtharte nun kawng dik zawh tura training-na turah hian khaw hrang hrang thalai thahnem takin Serchhip an rawn thleng tawh a ni.

Ram a kang mek
Nimin khan Bawngchawm ram leh a chheh vel a kang a, nizan thleng khan mi tlawmngai ten thelh mih tuma beih a ni. Tunlai hian Serchhip leh a chheh velah ram kang a tam hle a ni.

SOC-in lawmpui
khan a chenna Bangla-ah Serchhip Offier’s Club ten NREGS hnathawk tha lawmman DC Pu Darzika’n a dawn lawmpuina hun an hmang.

Current awm dawn lo
Hnathawh a nih dawn avangin vawiin leh naktuk zing dar 9:30- 4:30 inkar hian Serchhip AOC Veng atanga chhim lam zawngah Power supply a awm dawn lo.

Inter-District Women Hockey championship Mamit a khelh mekah nimin khan Serchhip District team chuan a thlengtu Mamit 4-0 a hnehin, Semi final an lut a, vawiin hian Lunglei District an khel leh ang.

Ramngaw suasam hian chhiatna leh harsatna min thlen mek a ni - Forest Minister

Serchhip 19th March 2010 : Pu H.Rohluna Forest Minister chuan, fimkhur lo leh kan thil tihin mihringte min nghawng let dan tur ngaihtuah lo leka thing leh mau kih a, ramngaw suasam hian chhiatna leh harsatna hrang hrang a thlen thin a. Kan Zoramah pawh hian kan eizawnna pui ber tlangram Lo neih kan la bansan theih loh avangin kan ramngaw kan tichereu chakin, chu chuan a tha lo zawnga nghawng neiin sik leh sa a mumal theih loh bakah buh leh bal thar a hlawk thei lo a ni tih chu nitin, kumtinin kan hre chho zel a ni a ti.
He thu hi World Forestry Day 2010 puala thuchah a siamah sawiin, Forest Minister Pu H.Rohluna chuan, World Forestry Day tih hi Zotawnga kan dah dawn chuan, Ramngaw humhalh pawimawhzia inzirtirna Ni tiin dah ta ila, a sual tam lovin ka ring a. World Forestry Day hi khawvel puma mihring ten ramngaw pawimawhzia leh ramngaw hausakna atanga hlawkna hrang hrang kan hmuhte hlutzia kan hriat thar theih nana hman thin a ni a ti a.
He ni hi ramngaw pawimawhna kawng thum - thilsiam chhuah leh min hualveltu environment siamthatna kawnga a tangkaina te, humhalh a tulzia leh kan hun awla intihhlimna hmun tha tak anih zia kan hriat theih nan khawvel pumah hman thin a ni a. Kan ramah hian ramngaw hausakna behchhana thilsiamna kan din chho ve mek zel a, a lawmawm hle. Heng thilsiamna atana chakkhaite hi siamtu Pathian min peksa ringawt hi chuan hun rei min daih thei dawn lova, keimahni kutkawih ngeia kan tharchhuah ve a ngai dawn a ni a ti.
Minister Pu Rohluna chuan, kum 2009-a Forest Survey of India-in State of the Forest Report-a a tarlan danin Mizoramah hian ramngaw leh hnim hringin a khuh zau zawng chu sq. kilometre 19,240 a ni a, chu chu kan state zau zawng atanga teha za zela 91.27 lai a ni. Amaherawhchu, ramngaw dur tha tak erawh chu kan hriat theuh angin a zim tawh hle a, sq. kilometre 134 chauh a ni a, chu chu kan state zau zawng atanga tehin za zela 0.63 a ni.
Minister chuan,World Forestry Day alo thlen hian tunlaia mi thiamte lu tihaitu sik leh sa inthlak danglam chak lutuk tih zia awmna tha ber chu a tam thei ang ber thing leh mau phun belh zel hi a ni tih hriain, thingphun uar tur leh, kan ramngaw neihsa te uluk taka humhalh a, venghim tura rilru siam thar turin Zoram mipuite ka ngen a che u a ni a ti.

19.3.2010 - Lawrkhawm

Budget session
Mizoram Assembly budget session ni 2-na nimin khan Larsap thusawi chungchanga lawmthu sawina motion chu house-ah lung rual taka pass a ni a. Ruahman ang in nimin thutkhawmah hian house member boral ta Pu LN.Tluanga sunna hun hman a ni a. Hemi hnu hian zawhna leh chhanna hun hmanzui nghal a ni. Pu Lalduh awma zawhna chhangin, Industry Minister Pu S.Hiato chuan Geology & mining chu Directorate hrana dah tum a ni a ti.

Sandalwood mansak
Vairengtea Forest checkgate duty ten phai lam atanga dan lova Mizorama phurhluh tur red sandal wood thahnem tak an man. Heng sandal wood te hi alu phur motor 1 atanga manin, alu karah thiam taka thuhruk a ni. Forest Deptt. thuneitu te heng thingte hi phalna nei lova Mizorama lakluh anih vanga man an nih thu sawiin, Myanmar-a kalpui tum a nih thu an sawi bawk.

Firfiak camp awmna hriattir
India chuan Pakistan nena inri-na bawr vela firfiakte inkhuarna hmun a tihchhiat beiseiin, India chuan fir fiakte camp awmna hmunte Pakistan a hriattir. Thutharla khawmtute a kawmnaah MOS for Defence Pu MM.Palam Raju chuan India-in a himna tihchhiat tumna awm thei reng reng hmuh hmaih a nei dawn lova, hei vang hian ram 2 inrina bawr vela firfiakte inkhuarna hmun hriat theih zawng zawng chu Pakistan hnenah a hriattir a ni a ti.

Thawnchhuak dawn lo
Sorkar-in chhangphut chhek khawl mekte ram pawna thawnchhuah tumna a awm lo tih a puang. Minister Pu Sharat Pawar chuan sorkar-in chhangphut Ton nuai 183 chuang a chhek khawl mek chu ram pawna thawnchhuah aiin mipuite hnena semchhuahna chak zawka kalpui dan a ruahman zawk a ni a ti a. Tun dinhmunah chhang phut hi mamawh zat aia tam a nih tawh avangin engemaw zat tihchhiat a ni a ti bawk.

Thisenin theh an tum
Thailand-a eptu pawlte chuan sorkar laka an lungawi lohna lantirna kal mekah an thisen thawh khawmin litre 1,000 a tlin hunah sorkar In theh nan hman an tum. Thailand-a eptu pawlte hi an PM, Abhisit Vejjajiva chu bang turin an nawr a ni.

Tualchhung

Teakwondo championship
Mizoram Sub-Junior & Junior Teakwondo Championship 2010 chu nimin khan Thenzawl Bazar veng YMA hall-ah DC Pu Darzika’n a hawng a. Infiammite chu ruihtheih thil, zuk leh hmuam laka inthiar fihlim turin a chah a ni. He championship-ah hian infiammi 352 an tel a ni.

Pu Sangliana vuiliam
Nimin zing khan Pu B.Lalsangliana (54) b/o B.Vanlalsawma Leisang Veng chu cancer avangin a boral a, nimin vek khan Hmar Vengah vui a ni.

MCPA inthlang dawn
chawhma dar 11 hian Mizoram Civil Pensioner Association Sub-Hqrs. Serchhip chuan CMO’s Conf.hall-ah MJA -te kaihhruaiin, hruaitu an thlang dawn.

MTKP inkhawmpui palai kal
Zanin atang hian Aizawl Vaivakawn Field-ah MTKP inkhawmpui neih tan a ni dawn a, tukin khan Serchhip atangin palai thahnem tak an kal.

Lirthei chesualah mi 3 an thi

Vawiin Serchhip Dist.a hmun 2 a lirthei chetsualna thlengah mi 3 an thi. Nimin khan Tawi Group YMA Conference Thingliana neih tura Rullam palaite chuanna 407 truck chu Thinglian thlen hma Km 4 vela hla ah a kualzo lo chu hnung tawlin kawng thlangah a tla, a hmunah hian Rullam Branch YMA Secretary Lalrinawma (26) a thi a, hliam mi 11 zinga mi 3 te chu an na hle a ni.
Vawiin vek khan Aizawl atang Lunglei pan Sumo chu Sialsuk leh Thenzawl inkar Chalkhan ramah chesualin kawng thlangah a tla a. Hetah hian Kanghmun khua Pu Rosiama(60) chu a hmunah a thi nghal a, Sangtuahlala(35) Aizawl Tuikual ‘C’ chu Damdawi in panpui a nih laiin a thi bawk. He sumo hian a hmaa tlan motor dang chu lehpelh tuma a tlan chu kual zo lovin kawngtlanah a tla ta a ni.

Hriselna leh thianghlimna hi hnam changkang tehna pakhat a ni- Dist.Bawrhsap

Serchhip 16th March 2010 : District Bawrhsap Pu H.Darzika chuan, hriselna leh thianghlimna hi hnam changkang leh changkang lo tehna pakhat a ni a ti.
He thu hi vawiina New Serchhip YMA hall-a neih tan,workshop on institutionalisation of Village water & sanition committee a hawnnaah sawiin, District Bawrhsap Pu H.Darzika chuan, hriselna hi hnam changkang leh changkang lo tehna pakhat a ni a, hriselna chuan thianghlimna leh tui a keng tel a. Kan mamawh ber pakhat tui hi hnianghnar hle mah ila a thianghlim si loh chuan kan hriselna in a tuar thin a ni a ti a.
Pu Darzika chuan, Mizote chu hnam inlungrual thei tak kan nih avangin kan ram leh khawtlang tana thil tha lote chu kan duh phawt chuan kan paih bovin, kan hlamchhiah thei a, he kan inlungrualna hi kan hman thiam phawt chuan State dangte entawn tlakah kan ram hi kan siam thei a ni a ti a. PHE Department-in tui leh thianghlimna kawng zawh tura mipui te a kaihhruaina kawnga mipui ngaihdan a la thin chu fakawm a tih thu a sawi bawk.
He Workshop ni 3 chhung awh tur, hawnna inkhawm kaihruaitu Pu Lalrothanga, Director, Communication & Capacity Development Unit chuan, mipui hnena tui thianghlim pek hi sorkar mawhphurhna a ni a, hriselna chu taksa mai bakah rilru pawhin a mamawh a ni a ti.
Workshop hawnna inkhawm hi Er.Lalhruaia EE PHE Serchhipin lawmthu sawiin, a tin a. Chawhnu lamah thupui thlan bik hrang hrang Pu Lalrothanga, Pu H.Lalduhkima leh Pu Lalhruaia te hnen atangin ngaih thlaka zirho a ni.
He worshop ah hian Serchhip District khaw hrang hranga Village water & sanition committee member thahnem tak bakah tlawmngai pawl leh VC member-te an tel a ni.

Tualchhung

Ni 16.3.2010 :
Ni 3 awh tur Workshop
Ni 3 chhung awh tur, Village Water & Sanitation Comtt. din leh kal dan tur chungchang sawihona workshop vawiin hian PHE Deptt. buatsaihin, New Serchhip YMA Hall-ah neih a ni dawn.

CMO-in bial fang mek
H Tunlai hian CMO Dr.Mal sawma chuan thingtlang khaw hrang hrang fang mekin, thawk tute intuaitharna hun a hman pui a, naktuk hian Ngentiang a tlawh leh ang a. Ni 18 ah Thinglian tlawhin, Tawi Group YMA Conference a hmanpui ang.

VC candidate ti fel ta
Thla thar April ni 7-a Serchhip-V VC inthlanna neih tura chuh tumte tana hming pekluh theih hun chu nimin khan a tawp ta a. MNF leh ZNP tangdun pawh in candidate atan heng mite hi hming an pelut :
1. J.Bualchhuakhnuna
2. Lalthansanga
3. C.Lalhmingfaka
4. B.Thlamuana

Congress candidate :
1. R.Thanchuanga
2. Lalzamlova Sailo
3. Haukunga Jauhau
4. G.Vanlalngaia

Lawrkhawm

Flower show
khan Horticulture Confe rence Hall Aizawlah Parliamentary Secretary, Pu K.S. Thanga’n Mizoram Florist Association buatsaih, State Level Flower Show Cum Fair, 2010 a hawng.Pu K.S. Thanga chuan pangpar chingtute hamthatna ngaih tuah chu ram tan thil pawimawh leh tangkai tak anih thu sawiin, nasa lehzual a tan la zel turin a fuih a ni.

Lo halnaah lum hlum
Dist. Khuangthing khaw Lo halnaah nimin khan Rohlupuia(30) chu khamah a lum hlum. Khuangthing khua hian nimin khan Dam ramah lo an hal a, an hal zawh hnuah Rohlupuia hi che sualin khamah a lum hlum ta a ni.

Bru-te chenna In 372 a kang
Tripura-a Bru-te awmna camp pakhat Hamsapara-a nimina kang mei chhuakah In 372 a kangral vek a, a kan kai belh hlauh thawn thilah In dang 40 thiah a ni bawk. Kangmei hi nimin tlai dar 3 vela chhuak kha niin, kangmei hi In 1 a neitute awm lohna atanga chhuak niin mihring thi leh hliam erawh an awm lo.

Zirlai 26 an thi
Nimin khan Rajasthana Sawai Madhopur District a zirlai phur Bus chesualah mi 26 an thi a, midang 34 an hliam bawk. Heng zirlaite hi an haw lam chu bungraw phur truck nen an insu ta a ni.

Tualchhung

Lirnghingin sawi
Inrinni zing dar 3 vel khan Serchhip telin Mizoram khawchhak lam chu lirnghingin a sawi a, lir nghin chhung hi second 30 niin, a thawk na ve hle a ni.


Pastor Chhawna lung phun dawn
Mizote zinga Zawlnei ropui, Pastor Chhawna hriat rengna lung chu vawiin hian a chenna thin Kawlri-a a In hmunah phun a ni dawn a. Pastor Chhawna ngai sangtute leh a duh apiang he huna tel tur hian an insawm.
Pastor Chhawna hriat rengna lung hi Serchhip Kawnpui YMA Branch chuan Tuizemsen kawnah an lo phun tawh bawk a ni.

Pi Hluti vui liam
Nimin khan Pi F.Lalhluti(90) m/o Dr.R.Lalmakthanga P&E Veng chu Lungna avangin a boral a, nimin vek khan vui a ni.

Chuh tumte tan ni hnuhnung
Thla thar April ni 7-a Serchhip-V VC inthlanna neih tura chuh tumte tana hming pekluh theih hun chu vawiin hian a tawp dawn a, naktukah hming pekluhte hi endik a ni ang a, a tuk Nilaini thleng inhnukdawk duhte tan hun hawn a ni.

VC-V Congress candidate
Serchhip-V (P&E Veng Ser chhip)VC atana Congress party candidate-te :
1. R.Thanchuanga
2. Lalzamlova Sailo
3. Haukhuma Jauhau
4. G.Vanlalngaia

BCM Assembly-in inkawplo chi inkawp khapin, Kohhranin a phuar dawn

Serchhip 15th March 2010 : Mizoram Baptist Kohhran Assembly vawi 113-na chuan an Kohhran member neih inang inneih khapin, inneite chu Kohhranin a phuar dawn.
BCM assembly Lawngtlai Bazar Kohhran Biak Ina neih hi nizan khan a tiak a. Rorel palai mi 1044 kalin, nimin chawhma inkhawmah Pastor 6 nemngheh an ni a, Rev.Dr.K.Thanzauva chu BCM President thar atan an thlang a, Pro-Pastor 8 lak belh an remtih bakah Pastor bial thar 3 - Vathuampui, Damdep leh Zawlpui ah te hawn an rem ti a. Kum 2011 Assembly chu Lunglei Rahsi Vengah nghah nise an ti bawk.
BCM Assembly hian kum 2010-2011 budget atan Rs. vaibelchhe 16, nuai 15,33960 an pawm a, hei hi nikum budget aiin 35.57% in a pung a. Palaite hian Kohhran inrelbawlna hrang hrang an rel a, chungzinga langsar zual zingah chuan mipa leh mipa inkawp, hmeichhia leh hmeichhia inkawp chu khapin, hetiang hi an awm a nih chuan Kohhranin phuar nise an ti a. Hei bakah hian birth control nana nau tih tlak chu dodal zui zel nise an ti a.
Assembly chuan, Kohhran upa pension chungchang relin, Kohhran Upa tupawh kum 70 a tlin tawh chuan Upa neih theih bi chhutna-ah telh a ni lo ang a . A hmunah Upa dang thlan a ni ang a, chumi hnuah chuan ama inhuam dana zirin mawhphurhna a la chelh zel thei ang tih bakah Area Baptist Council (ABC) siam belh rawtna awm angin, Aizawl West ABC leh Aizawl East ABC-te chu siam remin Aizawl North ABC siam thar a ni a, ABC huam chhunga Pastor Bial awm turte pawh duan fel nghal a ni bawk.

Thuthar lawrkhawm

Iskut chingtu thahnem
Kumin hian Mizoramah eizawn na atana iskut chingtu an tam ber a, tun ah hian chhungkaw 1100-in iskut hi an ching mek a. Nikum khan chhungkaw 890 in ram hac.2040 a zauvah iskut Qtls.4690 an thar a, heta tang hian sum Rs. vbch.1, nuai 84,3600 an hmu a, kumin hian nikum lama an sum hmuh hi khum ngei an tum tih Iskut chingtu pawl hruaitute chuan an sawi.

Curfew puang mek
Tunhnaia Kristian leh muslim inkara buaina nasa tak chhuahna Uttar Pradesh-a Bareli khawpuiah buaina a chhuah thar leh avangin Police station 5 huamchhungah curfew puan a ni. Heti chung hian Inrinni khan dawr 20 vel hal a nih bakah police 10 velin hliam an tuar bawk.

LPG thingtlangmite tan
Thingtlangmite tana eirawng bawlna gas hnianghnar zawka pekna tur Rajiv Gandhi Gramin LPG Vitarak Yajona chu nimin khan Rajasthan Laxamanagar khawpuiah hawn a ni. He scheme hnuaiah hian kum 5 lo awm tur chhungin LGP connection vaibelchhe 5 pek belh tum a ni a. He scheme hawnna thu sawitu Petrolium Minister Pu Dewra chuan LPG chu khawsak relna thianghlim leh awlsam zawk neih theihna tur a ni a ti.

ONGC hal tumtu mi 2 man an ni
Mumbaia ONGC hal tumtu nia puh mi 2 chu Maharastra Anti-Terrorism squad ten an man a. Heng mite hi mi firfiak pawl thil ti thei tak te nen inzawmna an nei nia hriat a ni a. Court chuan tun thla ni 18 thleng Police te kuta awm turin a lo ti a ni.

Thailand sorkar duhlohna
Thailand sorkar duhloh entirna nimin khan eptu party te huaihawtin Bangkok khaw puiah mi sang tam takin kawng an zawh a, sorkar chu bang turin an phut a ni. Nawrhna huaihawttu eptu pawl hruai tute chuan sorkar chu inthlan thatna puang turin vawiin thleng hian hun an pe a ni.

Lalrintluanga a kang hlum

Kawnpui ah nasa takin nimin tlai khan ram a kang a, he kangmei hi telhmih theih loh khawpa a nasat avangin chenna In a man kai loh nan kawngpui atangin venhim hna thawh a ni. He kangmei hi chhuak hi Thawhtanni liam ta atanga intan kha niin, kangmei hian thlai leh eizawnna nghet huan lo ram tha hnem tak a ti chhe tawh a, khaw thenawma mi tlawmngaite leh sipai tui phur motor hmangte in kangmei thelh hna hi ngawrh taka thawh mek a ni
Kawnpui ram kang thelhnaah Kawnpui Vengthar tlangval HT.Lal rintluanga (52)Inrinnia a thih leh hnu ah kumina kangmei chhuak avanga thi chu mi 7 an tling ta. Lalrin tluanga hi Kawnpui ram kang-in khaw chhung a man kai mai tur a telhna lamah vanduaiin, a kang a, Durtlang damdawi in panpui a nih hnuah a hliam hi tuar lovin a thi zui ta a ni.

Cheraw kan hmangin World record siam a ni ta

Record siam tur hian Aizawl Chanmari leh Sikulpuikawn inkar kawngpui dungah cheraw kan a ni a, Lammual-ah a pui ber awmin chuta tang chuan kawngdung amite chu thunun an ni. Cheraw kan a tel zawng zawng te hi mi 10,736 an niin cheraw 'bu' 671 a awm a, hetah hian Lammual-ah ringawt bu 156 a awm a ni. Cheraw kan a a ber nihna hi Lucia Sinigagliesi, Adjudicator, Guinness Book of Records, London a miin puangin, certificate pawh Pu P.C. Zoram Sangliana, Art & Culture Minister hnenah a hlan nghal a ni.
Thingtlang lam atanga cheraw kan tute hnenah vawiin hian lawmman pek a ni ang a, Aizawl khawpui a mite chu 15th March, 2010 (Thawhtan) ah lawmman pek an ni ang.

Serchhipah Chapchar Kut ropui taka hman a ni

Nimin khan Serchhip Field-II ah YMA Sub-Hqrs. Serchhip huaihawtin Chapchar Kut ropui taka hman a ni.
Kut lawmna inkhawm Pu R.Chalhmingliana, Chairman Cultural Committee kaihhruaiah Kut pa, District Bawrhsap Pu H.Darzika chuan thu sawiin, Chapchar Kut chu Mizo kut neihte zinga ngaihhlut ber a nih thu leh kan pi leh pute nunze mawite chu chhawm nun zel nise a ti a. Kan hnam zai leh lam bakah nunphung mawi takte humhalha chhawm nun zel kawngah mitinin mawh kan phur a, Chapchar Kut hian inpumkhatna leh inunau min siam thar leh rawh se a ti a ni.
Thu sawitu dang Dr.Malsawma CMO pawhin, Mizo nunze mawi kan chhawmnun zel a pawimawh thu sawiin, tunlai khawvelah nun thlahdahna avangin natna chi hrang hrang kan vei mek a, hetiang laka fihlim tur hian Mizo nunze mawi kha kan neih leh a tul a ni a ti.
Pu Lalzuiliana President YMA Sub-Hqrs. Serchhip pawhin kan hmanlai kut chi hrang hrang leh kan Mizo nun ze hrang hrangte chu Kohhran leh Kristianna hmanga kaikhawm a, Mizo Kristian tih awma mawia kan her rem zel a tha a ni a ti.
Chapchar Kut hmanna ah hian YMA Branch hrang hrang ten hnam lam leh ziarang pho lang thei thil an entir a. Hei bakah hian Red Ribbon Youth Icon-a zai thiam hrang hrangte an zai bawk.
Chapchar Kut hmannah hian Lalnu atan Bawrhsap nupui Pi Zoramthangi bakah MUP, MHIP, YMA leh tlawmngai pawl thenkhat te telin, hnam ro thil chi hrang hrang pholan a ni bawk

Serchhip thlalak

Chapchar Kut Serchhipah

Vawiin hian YMA Sub-Hqrs. huaihawtin Serchhip Field-II ah Chapchar Kut ropui taka hman a ni dawn a, Kut pa ah District Bawrhsap Pu H.Darzika niin, YMA Branch hrang hrang ten hnam zia rang chi hrang hrang an entir ang.