Hmeichhe naupang vanduai vuiliam

Bethlehem Vengthlanga hmeichhe naupang kum 3 leh a chanve mi, Lalnunkimi d/o Zonuntluanga chu an thenawmte septic tank-ah thi-a hmuh a ni a, nimin(Inrinni) khan vuiliam a ni.

Lalnunkimi hi Zirtawpni tlai dar 3 vel khan In atangin a leng chhuak a, a haw tak mai loh avangin a chhungte leh YMA ten nasa takin an zawng nghal a. Nimin zing dar 6 vel khan an thenawmte septic tank chung khuhna rangva, naupang lenna khawp vela kua chu enfiah a nih hnu-ah Lalnunkimi ruang hi septic tank chhung ek tui ft. 5 vel chim chhungah an hmu ta niin thudawnna chuan a sawi.

Lalnunkimi hi a chhung ten thil lei turin an kawmchhakah an tir a, lei tura an tihte pawh dawrah hian a lei ngei a, mahse, a haw zui tak loh avangin YMA ten an zawng zui ta a ni. Ruang an silfaina-ah a pum atangin ek tui engemawzat an nemchhuak a, misual kut tuar hnuhma emaw, pawngsual hnuhma emaw hmuh a ni lo a, mahni-a chesual nia ngaiin postmortem ti lovin nimin khan vuiliam a ni. source Zalen

Tualchhung

Rih dil tlawh dawn
Rih Dil leh a chheh vel fang turin naktuk(26.4.2011) hian Serchhip Florist Society leh Anthurium Grower Society member ten Serchhip an chhuahsan dawn. He Study tour hi Horticulture buatsaih niin, Department hotu ten an hruai dawn a ni.

Topper Pass lawm dawn
HSLC topper F.Lalvenhimi nu leh pa te chuan naktuk(26.4.2011) chawhnu dar 1 hian an chenna In New Serchhipah an fanu pass lawmna hun an buatsaih dawn.

MJA thukhawm
Vawiina MJA Serchhip Dist. executive committee chuan Annual Conference rorel bawhzui dan tur an sawi hova. Hemi bakah hian tunkar Ningania MJA Gen.Conference Aizawla neih tur kal dan an rel bawk.


Rualbanlo School hawng
Thawhtanni kalta ni 18.4.2011 khan Military Civic Action Project hmanga 23 Sector AR hnuaia 4 Assam Rifles ten an sak New Serchhip Pioneer Camp hmuna Spastic Society Building thar chu 23 Sector Assam Rifles Commander Brig. SK Verma-a'n a hawng.

Police-in tanpuina pe
Serchhip District Police Welfare ten ni 21.4.2011khan Serchhipa Orphanage Home leh ZOAR Childrens Home ah tanpuina Sum Rs 5000 ve ve an pe. Serchhip Dist Police Welfare hian thla khata an hlawh atangin Rs. 20/- zel dahthain, heta tanga tlingkhawm hi fahrah leh riangvaite tan, an awmna hmun ah kal chilhin an hlan a ni.

Thlai lu man pe chhuak
April ni 20 khan Agriculture Depart ment Serchhip chuan District chhunga loneitu chhungkua 119 te hnenah Crop Insurance pawisa Rs. 11,23,141.20 a sem chhuak a ni.

Congress kaihhruai Mizoram sorkar-in thla 23 chhungin a manifesto 19.13% a la ti hlawhtling

Serchhip25th April 2011 : Congress kaihhruai Mizoram sorkar chuan thla 23 ro a rel chhungin an party manifesto tih hlawhtlin a tum chi hrang hrang zinga 19.13% a ti hlawhtling tawh tih PRISM chuan a sawi.
An thil hmuh dan hi lehkhabu an buatsaih ‘Vapar’ah tarlangin, hemi chungchang sawihona vawiina Aizawl Vanapa hall-ah neih a ni a. Hetah hian political party hrang hrangte bakah MJA, AMFU,MPF, Mizoram Forum leh zirlai pawlte an tel a ni.
He sawihona PRISM leh a thawhpui SOSA, FOMTU, Y4M,SDYC, SDDVC te buatsaihah hian Congress chuan kum 5 term ah thla 60 chhung hun a nei a, tunah hian a hun neih zat atanga thla 23(46.66%) a hmang zo tawh a, hemi chhung hian hna a thawk thahnem lem lo tih he sawihona hun thusawitute chuan an sawi hlawm a ni.
PRISM lehkhabu siam ‘Vapar’ zir chiangtu State Election Watch Committee sawi danin, Congress sorkar chuan an manifesto a tarlan zinga 29.53% a bawhzui mek a, 34.19% a bawhzui lova, sorkar hmasa MNF bul tansa 4.66% a ti hlawhtling bawk a ni. Heng bakah hian Manifesto kalh zawnga hmalak 6.21% awmin, hmalak ngaihna awm lo 6.69% a awm bawk a ni.
Minister ten an hna chanpual an bawh zui dan pawh tarlangin, LAD leh Social Welfare changtu Pu PC.Lalthanliana’n 42% thawk tawhin, a thawk tha ber a. Health, Trade & Commerce leh Labour changtu Pu Lalrin liana Sailovin dawtin 35% a thawk tawh a ni.Hetihlai hian manifesto bawhzui tha ber chu Tourism, PHE leh Industries changtu Pu S.Hiato a ni.

Tualchhung

Chawlhah puang
Mizoram Larsap chuan Negotiable Instrument Act 1881 in thuneihna a pek angin naktuk Ningani hi Dr. B.R. Ambedkar piancham anih avangin sorkar chawlhah a puang.

Ruang 3 vuiliam
Nimin zing dar 8:30 khan Pi H.Lal mawii(94)m/o F.Lalzawngkima Serchhip Chanmari Veng chu Lungna avangin a boral a, nimin vek khan vuiliam a ni.
Nimin khan ruang 3 - Pu Rualkhuma, Pu Lalvunga Sailo leh Pi H.Lalmawii te vuiliam a ni.

Sipai tur la mek
Nimin atang khan Serchhip Field-II ah sipai tur lak hna tan a ni ta.

Zirna hmang hian khawvel a hneh theih a ni - Edn.Minister

Serchhip13th April 2011 : Education Minister Pu Lalsawta chuan, kan ram leilung hausakna neih tam kawngahte ram dangte el pha lo mah ila, zirna hmang hian khawvel a hneh theih a ni a ti.
Mount Carmel School, Chaltlangin kum 2011 HSLC Exam a an zirlai hlawhtlingte chawimawina hun nimina an buatsaih a hmanpuinaa he thu hi sawiin, Minister Pu Lalsawta chuan, Mount Carmel School zirlai leh zirtirtute chu an hlawhtlinna a lawmpui takzet thu sawiin, an sikul chu zirlaite leh nu leh pate tana innghahna tlak, rin tlak School tha a ni a ti a. Minister chuan, sorkar chuan zirna kawnga Mizoram hmasawnna tur a tan a lakna kawngah thil thar tam tak, Continuous and Comprehensive Evaluation (CCE) leh Right to Education, 2009 te hmang tanin, Education Reforms Commission-te hial a din a. Sawiselna karah pawh sorkar chuan Mizoram a hruaina kawngah a tum ram a hmuh chian em avangin hma an sawn zel dawn a ni a ti a. Ram danga an lo chin tawh thil tha, zawng chhang tlak ni a an ngaihte chu a tul dan angin kan hmang chho zel ang a ti a. Mi fing leh thluak tha apiang chungnunna khawvelah hian Mizoram pawhin thil siam chhuah kawngahte, ram leilung hausakna (natural resources) neih tam kawngahte ram dangte el pha lo mah se, zirna hmang hian khawvel a hneh theih a ni Education Minister chuan a ti bawk.

Tualchhung

sipai la tan dawn
Vawiin atang hian Serchhip Field-II ah sipai chi hrang hrang lak tan a ni dawn ta a. He huna intlar tur hian District chhung khaw hrang hranga tlangval thahnem takin Serchhip an rawn thleng tawh a ni.

Chekawnah mahni intihlum
Tlangval Malsawmtluanga (31) s/o Pu Hmingliana (L) Serchhip Dist. Chekawn khuachu nimin zing dar 6:30 vel khan Petrol hmang chi thing tanna khawl (Power shaw)ah a nghawng barh lutin, a nghawng hi a bung thelh a, nimin vek khan bialtu Pastor Rev.Lalnunmawia Pachuau-in a vui liam nghal. Malsawm tluanga hi kum khat kalta vel atanga rilru buaina nei, vantlang zawn pawh lo tawk tawh a ni a, tun hnaiah pawh hian a chhungten theihtawpin an veng a, vanduaithlak takin an thing tanna khawl hmang hian a intihlum ta a ni.

Electric ban tlu-in Pu Rualkhuma a vawhlum He thirban hian mi 3 a ti na tawh

Serchhip11th April 2011 : Vawiin khan Serchhipa Chhim Venga Electric ban tluin P&E Department hnathawk Pu H.Rualkhuma a delhhlum.
Vawiin chawhnu 1 vel khan Serchhip Chhim Venga Salvation Army Meeting hall thlang, YMA lungphun bula Electric ban chu, helai hmuna Serchhip-III Community hall sak a nih dawn avangin sawn hna thawh a ni a. Electric ban hi sawn tura phawi a nih dawn laiin, a bul lam lei nghet tawh lo avangin hnathawktute inrin hmain a tlu a, hnathawk zinga mi insaseng tura tlansawn Pu H.Rualkhuma (61) h/o Pi Rokungi Serchhip Darnam Veng chu a chhipah vuain, thuk takin a kak a, Damdawi in panpui a nih hnu, chawhnu dar 2:55 khan a hliam tuar lovin a boral ta a ni.
Pu H.Rualkhuma hian fanu 4 leh fapa 1 neiin, kum 1997 khan a fapa neihchhun Lalromawia chu electric in a man avanga boral a, P&E Deptt. ah MR-a thawk tura lak niin, a fapain vanduaina a tawh hnu kum 14 ah boral ve leh ta a ni.
A ruang hi vawiin tlai khan Serchhip Damdawi inah postmortem a ni a, Police ten thil tul ang ang an tih zawh hnuah a ruang hi an chenna Inah la in, lumen a nih hnu naktuk hian vui a ni ang.
Helai hmuna electrict Thirban ah hian P&E Deptt. hnathawktu Pu Lalhmingmawia a lo chesual tawh a, nikum April ni 1 khan he bana Electric siama lawn bawk P&E Deptt. a mi Pu Lalliansawta chu chesualin, Electric in a man a, a lo boral phah tawh bawk a ni. He thirban hi a thlang Pu Kapthianga te kawmcharah phuna hman zui lehnghal a ni.

Tualchhung

Pu Rualkhuma a thi
Vawiin chawhnu dar 1:30 vel khan Pu H.Rualkhuma(61) Serchhip Darnam Veng chu electric ban-in a delh a, Serchhip Damdawi In panpui a nih hnu ah a thi. Pu Rualkhuma hi a fapa current in a man hlum avanga P&E Deptt.-a MR-a hna thawh tir a ni a. Electric ban an thlak tur an tundinna lamah chesualin, ban tlu hian a lu ah a hem fuh ta a ni.

MJA meeting dawn
Vawiin chawhnu 2 hian MJA Serchhip Dist.-te an Gen.Secretary Pu C.Rameng mawia te Inah meeting-in, thil dang bakah Annual Conference an neih tur chungchang an sawiho ang.

Marksheet lam theih
HSLC exam zawh taka Marksheet-te chu exam Centre hrang hrangah a lam theih tih School thuneitute hnen atangin kan dawn.

Gas double theih dawn
Kum 2009 hma lama Gas connection la tawh, la double lo te tan vawiin atang hian Mizofed Serchhipah a double theih dawn.

RMSA leh SSA hna lak sawiselna a tam tial tial MSU-in order sut turin sorkar a phut

Serchhip11th April 2011 : RMSA leh SSA hnuaia hna lak chungchang sawi hnawmna chu awm belh zelin, Mizo Students Union(MSU) chuan District hrang hrang atan Common Merit sorkar-in a siam anga a insawi chu result chhuah vek hnua siam chawp mai mai nia an ngaihthu an sawi.
He hna lak chungchang an ngaihtuahnaah MSU chuan thil felhlel a awm ngei nia sawiin, hna lakna appointment order chu tun thla ni 15 hma ngeia cancel turin Mizoram sorkar an phut tih an sawi bawk.
MSU Gen.Hqrs. hian thuchhuah siam zui nghalin, RMSA/SSA hnalak buarchuar chungchangah hian State Project Director (SPD) T. Rohmingliana'n zirlai hruaitute a lo dawnsawn dan an dem hle tih an sawi a, hnalak chungchangah hian thuk taka inrawlh ve ni-a an ngaih thu tarlangin, a hna chelhzui zel tlaka an ngaih loh thu an sawi bawk a ni.
Hetihlai hian Mizoram Pradesh Congress Committee (MPCC) chuan thuchhuah siamin, RMSA leh SSA hnalak a felfai tih vawiin khan an sawi a, hun chep tak karah Education Minister Pu Lalsawta leh Parliamentary Secy Pu Chawngtinthanga te kaihhruaina hnuaia RMSA/SSA hnuaia zirtirtu lak hna felfai taka kalpui a ni.
He hnalak chungchanga thil fel lo awm anga sawiselna chu hriatchian loh vang a ni, an ti. MPCC thuchhuah chuan, SSA leh RMSA hnalak danah Written Test/Interview neih tur tih a awm loh thu te, sorkar hmasa MNF hunah pawh Written Test/Interview awm lova appointment pek tawpa lak vek a nih thu te an tarlang a.
SSA/RMSA hnuaia zirtirtu hnalak chungchangah mipui leh education deptt. hotute pawhin Interview buatsaih kher lova party induhsak nan hmang tura congress sorkar an ngaih avanga Interview kher lova lak theih a nih laiin, Minister leh Parliamentary Secretary ten Mizoram tan zirna tha (quality education) neihna tura thahnem an ngaih avangin mithiam thlanchhuah nan Interview neihtir an ni an ti a ni.
Hna dilna chungchangah pawh district chhunga post district mitetana hauh bik theih tura ruahmanna leh kalpuina a awm lo tih sawiin, hna diltute tana remchan zawk nan dilna form lak leh thehluhna bakah interview nan district office te hman a ni a, result erawh Aizawl-ah khaikhawma tihchhuah a ni ta niin an sawi a, hemi chungchangah hian MPCC chuan a fel lohna leh dik lo taka thiltih a awm a hre lo tih an thuchhuahah chuan an tarlang bawk a ni.

Matric Result chhuaka Top 10

Vawiin khan MBSE chuan HSLC result a ti chhuak a, Top 10

1. F Lalvenhimi F 466 D E, M, SS, Sc,Mz

Mount Carmel School

1Sujaya Singha F 466 D E, M, SS, Sc,Hn,IIT

St.Paul’s Higher Secondary School

2. Devapriya S Kaimal F 464 D E, M, SS, Sc,Hn,IIT

St.Paul’s Higher Secondary School

3. K Ngohlaki F 463 D E, M, SS, Sc,Mz

Donbosco High School, Saiha

4. Benjamin Zonunsanga Zote M 460 D E, M, SS,Sc,Mz,IIT

St.Paul’s Higher Secondary School

K Gospel Khaingiarili F 460 D E, M, SS, Sc,Mz

Donbosco High School, Saiha

5. Songhoti Adak F 459 D E, M, SS, Sc,Hn,IIT

St.Paul’s Higher Secondary School

6. Esther Ngurdingpuii F 457 D E, M, SS,Sc,Mz,IIT

St.Paul’s Higher Secondary School

Laltlansangi F 457 D E, M, SS,Sc,Mz,IIT

R Lalrinkima

St.Paul’s Higher Secondary School

7. 1101006603 Parikha Sarkar F 456 D E, M, SS, Sc,Hn,IIT

Pradip Sarkar

St.John’s Higher Secondary School

8. C. Vanlalpianpuia M 454 D E, M,SS,Sc,Mz

K.V.Multipurpose School, Durtlang

9. Lallawmzuali F 453 D E, M,SS, Sc,Mz,IIT

St.Paul’s Higher Secondary School

10. Lalrinchhani F 451 D E, M, SS,Sc,Mz,IIT

St.Paul’s Higher Secondary School

Tualchhung

LFCS-in Court order nghak
School Education Director Pi Esther Lalruatkimi'n March ni 16 a Serchhip a Little Flower Convent School te, RTEAct 2009 kalha School Fee an lak tawh te pekir leh tura a rawn hriattir tawh chu April ni 5, 2011 khan rawn tidanglamin Little Flower Convent School Headmistress hnen ah RTE Act chungchanga Case tam tak High Court a Pending a awm nual avangin Fee peklet chungchangah High Court Judgement Order lo nghak rih phawt a, chumi hnu a pelet chauh turin a rawn hriattir. Hemi chungchang ngaihtuah hian vawiin khan he School-a zirlai nu leh pate an inhmukhawm a ni. He tih lai hian zirlaite hnena fee pek kir hun chhung atana MZP-chuan tunkar Zirtawpni thleng khi ngaih chan an tum thu an lo sawi tawh a ni.

Pu Rozika vuiliam
Mit liam avanga boral Pu Rozikas/o Tuhranga Serchhip Chanmari Veng chu lumen a nih hnu vawiin khan Serchhip Dinthar thlanmualah vuiliam a ni.

YMA Zaipawl intihsiak
Sikserh do thla puala Sub-Hqrs. YMA Serchhip hnuaia YMA Branch -te pualin Zaipawl intihsiak neih mekah Branch 11 an tel a, neih chhunzawm zel a ni.

ATS fehchhuak leh
Vawiin khan Anti Tobacco Squad, Serchhip District te chuan kumin chhunga a tum 8-na atan Serchhip khaw chhunga puipunna hmun hrang hrangah te kal kualin phallohna hmuna meizu an awm leh awm loh leh "No Smoking" Signage leh Complaint Board tar anih leh nih loh an check. Kumin chhung hian Serchhip Anti Tobacco Squad, te hian phallohna hmuna meizu mi 36 an man tawh a ni.

MHIP-in Aizawl an fang
Information & Public Rela tions Department huaihawtin Chhiahtlang MHIP Saikuti Branch ten niminpiah khan Aizawl Dharsan neiin, Aizawl khawpui chhunga hmun pawi mawh leh Sorkar hmalakna hrang hrangte an tlawh.

Home Minister-in kum 2011 Chhiarpuia Mizoram dinhmun tarlanna a tlangzarh

Serchhip 6th April 2011 : Vawiin khan Home Minister Pu R. Lalzirliana’n I&PR Auditorium Aizawlah kum 2011 Chhiarpuia Mizoram dinhmun tarlanna "Paper -I of 2011 Census (Provisional Population Totals)" a tlangzarh.
Pu R. Lalzirliana chuan thu sawiin, Chhiarpui hi India ram inrel bawlna dana hlawhtling ber a ni tih a sawi a. 2011 Chhiarpuia Mizoram dinhmunte sawi langin sex ratio a lo pung ta chu lawmawm a tih thu a sawi a. Ziak leh chhiar thiam tam lamah 3-na ni mah ila 2001 Chhiarpui atanga chhutin 2.78% zetin ziak leh chhiar thiam kan pung hian kan hma lakna a pho lang a, thil ropui leh lawmawm tak a ni a ti bawk.
Kum 2011 Chhiarpui hi Mizoram state nih hnu-a vawi 3-na a ni a, Mizoram Directorate of Census Operations in a hranga Chhiarpui a buaipui vawi 4-na a ni thung. 2011 Chhiarpui atan hian Charge Officer 64, Supervisor 491 leh Enumerator 2370 chhawr an ni a. He Chhiarpuia a lan dan chuan Mizoramah mihring 10,91,014 awmin mihring punna hi 22.78% a ni a. Khua 830 awmin heng zinga 23 chu khawpui (town) a ni a; mihring chenna khua 719 awmin mihring luah loh khaw hming nei si 111 a awm bawk. Paper -I of 2011 Census hi dinhmun lailawk tarlanna (provisional figure) chauh a la ni a, Mizoram dinhmun tak tak (final figure) chu Household Schedule-te uluk zawka endik a nih hnuah tihchhuah a ni ang.
He inkhawm hi Pu H.P. Sahu, Director, Census Operations, Mizoram in a kaihruai a, Pu Lalhmingthanga, Dy. Director, Census Operations, Mizoram chuan 2011 Chhiarpui hna thawh a nih dan report tawi a sawi bawk.

SERCHHIP DISTRICT ANTI-TOBACCO SQUAD TEN HMA LA ZEL

Vawiin nileng khan Anti Tobacco Squad, Serchhip District te chuan kumin (2011) chhunga a tum 8 na atan Serchhip khaw chhunga puipunna hmun hrang hrang ah te kal kualin phallohna hmuna meizu an awm leh awm loh leh “No Smoking” Signage leh Complaint Board tar anih leh nih loh an check ani. Tun kum chhung hian Serchhip ATS te hian phallohna hmuna meizu mi 36 an man tawh a, Serchhip khaw chhunga phallohna hmuna meizu chawi tir zat hi mi 51 an tling tawh ani. Serchhip khaw chhunga Ofiice leh Zirna in hrang hrang ah te phallohna hmuna meizu man tur an tlem tawh thu leh Zirnain, Office leh Dawrkai ten COTPA hnuaia signage tar tur hrang hrang te an tar avangin ATS te chuan lawmthu an sawi a ni.

Tualchhung

YMA Zaipawl intihsiak dawn
Tukin tukthuan eikham atang hian CMO Conference Hall-ah Sub-Hqrs. YMA Serchhip thutkhawm YMA Branch-te pualin Zaipawl intihsiak neih tan a ni dawn. He Zaipawl intihsiak turah hian Branch 20 velin hming an pe lut nia hriat a ni.

Harhna thlen Ni hmang
Nimin khan Mizorama ‘Harhna thlen Ni’ niin, Kohhran hrang hrang ten an serh a. Kohhran tam zawk chuan hemi pual inkhawm hi nizan khan an hmang a ni.

SDEO thar
Serchhip SDEO Pu Lawmawma chu Aizawlah sawn a ni a, a hmunah hian Pi Lallianzuali Bawitlung Aizawl atangin a rawn awm dawn a, nimin khan Pu Lawmawma nen charge an inhlan a ni.

Lawrkhawm

Hna thawh enfiah
Saiha District Development Vigillance committee tunhnaia an District khawthlang lam bial Tuipang RD Block huamchhunga sorkar hmalakna hrang hrang enfiaha kalte chuan Village Council te hnathawh chu a tha thawkhata an hriat thu sawiin, mimal thenkhat contract hnathawh chu a tha lo hle niin an sawi a. Hna thawh tha lo zingah hian Minor Irrigation hnuaia hnathawh leh Phura High School building sakte chu a langsar a ni.

Fai beihpui thlak tum
Lai Students Association Gen.Hqrs. hruaitute chuan Lawngtlai khawpui Mizoram khawpui zingah faina lama entawn tlak a nih theih nan hmalak an tum tih nimin khan Lawngtlaia thutharthehdarhtute an hrilh. Faina Hapta an hmang tan tih sawiin, Zirtawpni khian khawpui chhung thenfai beihpui an thlak dawn tih an sawi bawk.

Rukru tu man chhuak
PHE Deptt. Aizawl hnuaia Storage & Sanitation EE Office atanga Rs. 1,60,000 rutu nia puh, MR-a thawk lai Lalruat fela Mission Venga khawsa chu tunhnai khan man a ni a. He Office atanga pawisa bo hi hriat nghal a ni mai lova, Forensic Deptt.-ten an chhui hnuah an rinhlel man Lalruatfela chuan a ma ruk ngei a ni tih Police hmaah a puang ta a ni.

Bru-te la kir leh dawn
Tripura Relief camp-a cheng Bru-te laklet chhunzawm an ni leh dawn a. Laklet dan tur hi vawiin hian Mamit DC Pu Zothankhuma hova relin, an kal dan tur tih chian a ni dawn a ni. Ruahman dan chuan tunhnaia Naisingpara camp-a kangmei tuarte chu an chenna tur In sak that leh ai chuan Mizorama laklet mai nise tih a ni a. Tun tumah hian Mizoram mi leh sa dik tak tih finfiah tawh chhungkaw 450 lak let tum a ni.

Ration card siam thar dawn
Kumin sorkar kumtharah hian Mizoram Ration Card zawng zawng a thar en that leh vek tum a ni. Food, Civil Supplies & Consu mer Affairs Deptt. Secretary Pu K.Riachho sawi danin, Ration card tam lutuk leh ration card-a hming chuang leh Mizorama mihring cheng zat inmil lo siamtha turin census figure thar ber nghah mek a ni a. VC leh YMA te puihna in ration card thar ber hi siam tum a ni a ti.

Speed enna nei thar
Motor tlan chak dan endikna Speed reader gun thar Aizawl Police Traffic chuan nei tharin, nimin khan an en chhin. He Speed reader Rs. 1,30,000 man bakah hian Police modernazation hnuaiah 10 dil belh mek a nih thu Traffic SP chuan a sawi.

Damdawi thi tawh ei avangin Chawngtlai naupang a thi ?

Serchhip 5th April 2011 : Chawngtlai khua ah damdawi thi tawh ei avangin naupang kum 2 mi in a thih phah a, pakhat damdawi in ah dahluh a ni bawk.
April ni 3, Tun Pathianni chawhnu dar 2 vel khan Lalnunmawii kum 3 mi leh a u Liansangpuii kum 5 mi d/o Lianchungnunga Chawngtlai Vengpui te chuan Sub-Centre bulhnaia Cloraquin an paih chu Pathianni chawhnu dar 2 vel khan chharin an ei a, an pum a nat tak avangin Khawzawl Damdawi In panpui an ni a, Lalnunmawii (2) mi chu a boral a, a u zawk Liansangpuii erawh ngaihtuah awm lutuk a ni lo nia sawi a ni.
An damdawi ei hi Gloraquin niin, naupang inkawm a vakkual hi mi 9 vel lai an ni a, a khak em avangin midangte hi chuan an ei thei lova, Liansangpuii kum 5 mi hian mum 2 a ei niin a sawi a, a nau hian engzatnge a ei erawh a hriat loh thu a sawi niin ka nthu dawnna chuan a sawi.
Hetihlai hian Health Department thuchhuah siamin, he thil thleng, Damdawi expired ei avanga thihna thleng anga ngaih hi Health Department chuan pawi a ti hle a. Damdawi expired tawh hi miin a lo eiin, damdawi hian a chakna (potency) a hloh mai a ni a, thihna khawp thlentu a ni lova, he damdawi hi Malaria damdawi (chloroquine) a ni a, a khak em avangin tam pawi ei theih a ni lova, thihna khawp an ei a rinawm lo a ni a ti.
He bawlhhlawh khur an siam hi tunhma pawha bawlhhlawh leh damdawi expired an lo paih fo na thin a ni awm e, tiin thu chhuah chuan a ti lang.He thil thleng a hmuna chiang taka hmu turin Minister, Health & Faminly Welfare leh officer te hruaiin vawiin hian he khua hi an tlawh dawn a ni.

Tualchhung

Ziak leh chhiar thiam tamna
India ram pum zirna chungchanga census tih chhuah tharah Serchhip District chu rampuma ziak leh chhiar thiam tamna ber District a ni.

ATM hman theih tep
Khawl hmanga pawisa lakchhuahna ATM chu Serchhipah pawh hman theih a ni dawn hnai ta a. State Bank ATM hi Serchhip AOC Venga Pu T.Rosiama building-ah hman mai theih tura peih fel thawkhat a ni tawh.

MJA Comtt.thurel
Inrinni zana thukhawm MJA Serchhip District chuan tun thla ni 15 khian Annual Conference hman nise, khuallian atan District Bawrhsap hman nise an ti a. Tun thla ni 18-a North East Press Tour MJA Hqrs. buatsaiha neih turah District aiawh pakhat intirh nise an ti bawk.