Hriattirna

MJA Serchhip District member-te enkawl chanchinbu chu vawiin (ni 18.12.2010) hi kumin 2010 atan a chhuah ni hnuhnung ber a lo ni ta a. Hei vang hian Lamkal Blog pawh hi kan update lo deuh a ni mai thei a, chuvangin tlawhtu min lo hre thiam dawn nia.

Tualchhung

Khapna thupek ti chhuak
Pi K.Vanlalruati Sub-Divisional Magistrate chuan Serchhip Sadar, Sub-Division huamchhunga hman turin niminpiah khan halpuah leh halmawi lam chi bakah naupang silai a mu kah chhuah theih chi zawrh leh hralh a khap.
Tin, vaihlo atanga siam Tiranga /Gutkha chi hrang hrang zawrh/ hralh bakah ei tura kawl a khap bawk.

MRB Chhiahtlang Branch thar
Nimin khan Mizoram Rural Bank, Chhiahtlang Branch chu Bialtu MLA Pu K.Lianzuala’n Pu C.Lalengliana building Chhiahtlang Kawn Vengah a hawng. He hunah hian khawtlang hruaitute bakah mi sawm bikte telin, Dist.Bawrhsap Pu H.Darzika pawh a tel a ni.

Rural Haat hawng
Nimin khan Chhiahtlang Kawn Venga Rural Haat (Bazar building) chu Bialtu MLA Pu K.Lianzuala’n a hawng. Pu Lian zuala chuan hmun dang aia tha a tih thu sawiin, khawtlang mipui te chu tangkai tak leh tha taka enkawl hmang turin a chah a ni.

Zaipawl intihsiak
HIV/AIDS dona chikhat atana hman Red Ribbon Choir final round chu nimin atang khan Aizawl Chaltlang Kohhran hall-ah neih tan a ni a. Serchhip Zone atangin BCM Serchhip Bial, BCM Serchhip, Peniel Kohhran,Sailam Koh hran leh Keitum Kohhran zaipawlte an tel a ni.

Mizoram Journalistss’ Association Serchhip District

Hriattirna

Kristiante hunpui Krismas leh Kumthar chu kan lo thleng leh dawn ta reng mai a, heng hunpui kan thlen tur hi mipui ten hlim leh lawm taka in hman theih nan Mizoram Journalists’ Association Serchhip District chuan duhsakna sang ber a hlan che u.
He hunpui lo thleng turah hian MJA Serchhip District chuan kum danga a lo tih tawh thin angin Krismas leh Kumthar vuakvet laia Chanchinbu chawlh chu kumin pawh hian hman a ni leh dawn a, MJA Serchhip District executive committee-in a lo rel tawh angin MJA member enkawl tualchhung chanchinbute chu kumin atan ni 18th December 2010 (Inrinni) thleng rawn chhuakin, kumthar ni 5th January 2011 (Nilaini) atangin dan pangngaiin a rawn chhuak leh ang.
He kan chawlh hman tur hi Serchhip mipui leh tualchhung chanchinbu chhiar thin ten lo hrethiam hram turin kan han ngen che u a, he kan chawlh hman avang hian tualchhung chanchinbu lak man pawh a man pangngai aia Rs.10/- a tih hniam a ni dawn bawk a ni.

Sd/- Zonunsanga Kawlni
Secretary,
Information & Publicity
Mizoram Journalists’ Association Serchhip District

Tualchhung

Krismas leh kumthar intihhlimna
Krismas leh kumthar vuakvetah thalaite intihhlimna buatsaih a ni dawn.
Nimina Pu R. Lalzirliana, Home Minister kaihhruaina hnuaia Halpuah leh Halmawi Krismas leh Kumthar vuakveta khap dan tur chungchang sawihovin, khap nise an ti a.
Hei bakah hian meeting chuan Krismas leh Kumthar vuakvet hun remchangah Aizawl leh district Hqrs. dangah intih hlimna hmun siam nise an ti a, District tin DC ten tlawmngai pawlte nena tangho in lo bawhzui se tih a ni bawk. Heng intih hlimna senso atan hian Rs. 6,50,000 Planning Department in a ruahman a, Aizawl leh Lunglei tih loh Dist. dangah hemi senso atan hian Rs. 40,000/- theuh ruahman a ni.

NREGS ni 94 inhlawh tawh
NREGS atanga thingtlang mite hnathawh tur siamsak chungchanga Mizoram district hrang hrang zinga titha ber, Serchhip district chuan kumin sorkar kumtir atanga tun thlengin ni 94 inhlawhna a siam tawh a, ni 6 dang inhlawhna chu kumthar, January thlaah siam leh a tum bawk.

Lawrkhawm

Workshop cum training
Nimin khan ni 3 awh tur NTFP leh Medicinal and Aromatic Plants leh Rain water harvesting chung changa Joint Forest Management Committee te, ramchhung thil siamna neitute, sumdawng ho leh Forest Officer-te tana buatsaih Workshop-cum-training chu I & PR Confe rence Hall-ah Pu H Rohluna, Forest Minister-in a hawng.

Technology exhibition
Mizoram Architects Forum buatsaih Building Materials & Technology Exhibition chu Pu Lal Thanzara, Parliamentary Secretary-in nimin chawhma dar 11 khan Millenium Centre Roof Top-ah a hawng a, he exhibition hian December ni 18, 2010 (Inrinni) thleng a awh ang a, insakna bungrua changkang tha tak takte bakah insak dan him leh tha te mipui vantlang hmuh theih tura phochhuah a ni ang.

Croatia PM hlui man a ni
Croatia PM hlui, ei ruk thubuai vanga an ram atanga tlanchhia, Ivo Sanader chu Austria-ah man a ni. Nikuma an ram PM nihna bansan ta, Sanader-a chungchang hi Ningani khan Parliament-in a ngaihtuah a, a thubuai avanga hrem a nih theihna an hlihsak hnuah amah manna tur thupek chhuah nghal mah se, Sanader hian an ram a lo chhuahsan hman a ni.

Lawrkhawm

Myanmar leh India inbia
Ram venhimna kawnga thawh dunna tha zawk neih dan tur sawi hovin nimin khan Myanmar leh India ram sorkar aiawhte Champhai ah an inbia. He hunah hian inbiak pawhnaa harsatna a awm loh nan Mizo tawng hman nise an ti a, Myanmar sipai leh police aiawhte chu Champhai a Mizotawng zir tura ruahmanna siam a ni bawk.India chuan Myanmar sorkar hnenah hian lirthei Bolero, Bike 3, Generator, computer set 3 leh wireless phone 6 a pe a ni.

Magistrate zu man sak a ni
Vairengtea Excise checkgate-a duty ten nimina zu an man sak Magistrate chuan manah a vau let. Silchar lam atanga Bike lo kal chu duty-te hian check-in sap zu um 27 an phurh chu man sakin, heng Kolasib tlangval te hian Magistrate tirh an nih thu an sawi a. Hemi hnu hian an mahni tirtu Kolasib Dist. a Magis trate pakhat chuan telephone hmangin excise duty-te chu man ah a vau zui a. Hei hi Excise-te chuan an ngai thiam lo hle a, zu phurtute hi thu buai siamsakin an man zui nghal a ni.

Bus chesualah mi 8 an thi
Inrinni zing dar 1 vel khan Cham phai night bus, ZK Travels MZ-01 D- 1484, Aizawl atanga Champhai pana tlan chu Dulte thlen hma km 5 velah a chesual a, a hmunah mi 8 thi nghalin mi 34 in hliam an tuar.

Mizoram Journalistss’ Association Serchhip District

PRESS RELEASE

Tunhnaiah thutharlakhawmtu ten mi tute emaw thusawi Chanchinbu leh Cable TV-a an tarlan chungchangah a sawitu lam aia a thehdarhtu lam demna leh sawiselna a awm thin a, hei hi thil kalphung hriat chian tawk loh vang niin MJA Serchhip District chuan a ngai a, thil dik tawk lo leh tute emaw ngaimawh zawng Chanchinbu leh Cable TV-ah a lo lang a nih pawhin a sawitu chiang taka tarlan a nih chuan a chhuahtu ni lovin a sawitute hnena lungawilohna thlen leh a tul a nih chuan tih dikna pawh siam leh tura tih thin hi thil kalphung zawk tur niin MJA Serchhip District chuan a ngai a ni.
Tin, pawl leh mimalin an hmalakna leh mipui hnena an puanzar duh thutharlakhawmtute kaltlanga puanzar tuma programme an siam leh Press Conference an neih thin ah hian mipuite hnena puanzar sak vek hi thutharlakhawmtute bat a ni lova, mipui hnena puanzar sak leh sak loh hi an zalenna a ni tih min lo hriat nawn sak kan duh bawk a ni.

Sd/- C.Ramengmawia
Gen.Secretary,
MJA Serchhip District

Tualchhung (9.12.2010)

Art Exhibition khar ta
Ni 2 awh tur lemziak phochhuahna ‘Art Exhibition’ NEZCC leh Art & Culture Deptt. buatsaih chu nimin khan zawh fel a ni ta. Tarlan tawh angin exhibition-ah hian Mizoram hmun hrang hranga lemziak thiam mi 10 te lemziak 41 pho chhuah a ni a. Tlawhtu erawh an thahnem tehchiam lo thung.

MJA-in mithi an ral
MJA chuan nimin khan Pu C.Lalhming hlua Laisuih Editor pa, Pu Lalmaka ralna hun an hmang.

NSS-te an fehchhuak
Govt.Higher Secondary School Serchhip NSS Volunteer-te chu nimin khan South Vanlaiphai leh Phawngpui hmunhma tlawh turin an fehchhuak.

Chanchinbu chawlh rel
Nimin MJA Serchhip Dist. thukhawm chuan kumin Krismas leh Kumthar vuak veta chan chinbu chawlh chungchang relin, kumin Dec. ni 18 thleng chanchin bu tih chhuah nise, kumthar January ni 5 -ah chhuah tan leh nise an ti a. Hei bakah hian Member-te sum thawh tling khawm hmangin mi harsa zawkte tanpuina thilpek hlan nise an ti bawk.

PLANNING COMMISSION MEMBER IN SERCHHIP AN TLAWH

Vawiin (9.12.2010) chawhnu dar 1 khan Planning Commission of India Member, Pu PK Chaturvedi leh Pu S.N. Brohmo Chowdhury, Adviser (NE) Planning Commission of India ten Serchhip an tlawh a, Pu P.L. Thanga IAS(Rtd), Vice Chairman, NLUP Implementing Board leh Agriculture Director Pu C.Lalzarliana ten an tawiawm a ni.

Anmahni kawmna hi DC’s Meeting Room-ah neih niin, Serchhip District Bawrhsap Pu H. Darzika’n a kaihruai a, Planning Commission Member Pu P.K Chaturvedi hian Department hrang hrang hmalakna te zawt kualin an hlawhtlinna te report a ni a,MNREGS leh IAY hmalakna hrang hrang te pawh report a ni. Mat lui Mutipurpose Dam Project chungchang pawh hrilhfiah niin, a theih ang angah hmalakpui a inhuam thu a sawi bawk a ni.

He meeting ah hian Head of Office te an tel tha hle a, Planning Commission Memberte pawh hian Serchhip an tlawh theih avang leh tha taka dawn sawn anih avangin lawmthu an sawi a, thil tam tak chhum zin avanga hmuh theih loh erawh pawi a tih thu a sawi bawk. Serchhip a tlawh hi Serchhip District tan hlawkna a nih ngei a beisei thu a sawi a, Pu P.K Chaturdevi hian Serchhip District chhunga hmasawnna hnathawh kalpui dan chu tha a a hriat thu a sawi bawk a ni. source : IPR Deptt.

Tualchhung

IOC Vengah In a kang
Nizan hmasa dar 11 vel khan Serchhip IOC Venga Pu Lalrikhuma bungraw dahna Inah kangmei chhuakin, a kang fai vek a. Vawk note 6 vek ah a pui a thi bawk. In ruhrel hi nimin khan hnatlanga senghawi nghal a ni.

Cultural Festival neih a ni
Sub-Hqrs.YMA Serchhip buatsaihin nimin khan Serchhip Field-II ah Cultural Festival neih a ni. He hun hmanpuitu Dist.Bawrhsap Pu H.Darzika chuan, mahni hnam zia hloh reng reng hnam ding chhuak an awm ngai lova, hnam zia hloh chuang lova tunlai hmasawnna man phaka kal erawh a ngai a ni a ti. Khual zahawm Pu Ngurbiaka Jt.Director Art & Culture Deptt. pawhin thu a sawi bawk. He hunah hian YMA Group 16 telin, an zinga Group hi Serchhip khawpui pawn ami te an ni.

Art Exhibition neih mek a ni
Ni 2 awh tur lemziak phochhuahna ‘Art Exhibition’ NEZCC leh Art & Culture Deptt. buatsaihin nimin khan Govt. Higher Secondary School-ah Pu Ngurbiaka Jt.Director Art & Culture Deptt. in a hawng. Hawnna thu sawiin, Pu Ngurbiaka chuan,lemziak mawi hlutna hi mi zawng zawngin kan hre lova, lemziak thiam pawh mi 90 zela 2 vel chauh an nih avangin buaipui hut hut chi a ni lova, mahse hlutna erawh thuk tak a ni thung a ti. He exhibition-ah hian Mizoram hmun hrang hranga lemziak thiam mi 10 te lemziak 41 phochhuah a ni.

Champhai District-a khaw 2 ah naupang kum tling lo pawngsual an ni

Serchhip 7th Dec. 2010 : Ni 2 kalta chhung khan Champhai District-ah hmeichhe naupang kum tlinglo 2-in pawngsual an tawk.
Mizoram khawchhak lam, Tuichangral bial chhung Chalrang khuaah niminpiah Pathianni chawhnu khan hmeichhe naupang kum 5 mi chu an Venga kum 30 mi Lalhunliana’n thlemin a pawngsual a, pawngsualtua puh Lalhunliana hi hemi tlai vek khan Khawzawl police ten an man nghal.
Pawngsualtu nia sawi Lalhunliana hian a nu leh pa inkhawm hlanin 'Rum pum' leh 'Sweet' leisak turin a thlem chhuak a, huanah kalpuiin a khawih zui ta ni-a hriat a ni.
Hmeichhe naupang hi In lamah a tap haw a, a thuamhnaw velah chabet te a kai avangin a nu leh pate inkhawm bang chuan eng vanga tap nge tih an zawt a. 'U Huna'n min khawih' tiin a chhang a, a taksa vel an enchian chuan a serhah mipa chi an hmu a, Khawzawl police-te hriattir an ni a. Police-te an thlen hma hian pawi khawihtu hi mipui thinrimin an khawih mai loh nan leh a tlanbo loh nan YMA -in an lo veng a ni.
Lalhunliana hi nupui nei lai, fa pathum nei tawh, zu in ve thin, khawtlang tana hnawksak zawnga khawsak ching tak niin an sawi. Hmeichhe naupang hi he thu buatsaih lai hian Khawhai damdawi In-ah medical check-up neihpui tum mek a ni.
Inrinni khan Kawlkulh bul, Vankal khaw hmeichhe naupang kum 9 mi chu Lalrozauva (30) chuan a pawngsual bawk a. Amah hi Police ten an man nghal bawk. He hmeichhia hi rilru lama rualban chiah lo nia sawi a ni.

Tualchhung (6.12.2010)

Festival inbuatsaihna
Sub-Hqrs.YMA Serchhip buatsaihin naktuk hian Serchhip Field-II ah Cultural Festival neih a ni dawn a. Hemi atana inbuatsaih hnatlang vawiin hian thawh a ni ang. Hetihlai hian he festival-a tel tur hian Branch 20 chuangin hming an pe lut a ni.

Camping/ Crusade
BCM New Serchhip Kohhran Biak Inah naktuk atang hian camping buatsaih a ni dawn a, Speaker-ah Upa VL.Nithanga hman a ni ang. Tin, Bazar Kohhran Biak Ina Vanlalsailova speaker-a hmanga crusade neih chu nizan khan a tiak.

Pu Chawpa vuiliam a ni
Inrinni zing lam dar 3:30 khan Pu Chawpthanga(67) f/o Lalchh- uanthanga Serchhip Bazar hnuai chu zunthlum natna-in a boral a, hemi ni vek hian Field Veng thlanmual ah vuiliam a ni.

Result puang dawn
Tukin hian Serchhip Govt. Modern Middle School leh Primary School-a zirlai nu leh pa ten Modern School-ah Community training neiin, result an puang nghal dawn.

Serchhip chanchinbumi te leh NBCC hotu ten Field No.I a Auditorium sak mek an thlir ho

Vawiin(6.12.2010) chawhma dar 11 khan Serchhip Field No.I a Auditorium sak mek chu a satu National Building Construction Corporatio(NBCC) hotute leh Serchhip a tualchhung chanchinbumi thenkhat ten tlawhin hna kal mek dan an thlir ho. Field No.I a Auditorium sak chungchangah hian NBCC hi Contractor nimahse NBCC hnuaiah vek hian BMG Company in a sak hna an thawk chhawng veleh thung a, NBCC hi chuan a vil hna an thawk a ni ber. Mizoram sorkar hnuaia Urban Development & Poverty Alleviation(UD & PA) Department hi NBCC hnuaiah Nodal Department an ni a, mahse Auditorium lungphum phum a nih ni, 9th Oct. 2010 atanga nimin thleng kha chuan Serchhip a UD & PA Deptt. lam hian Official a Nodal Department an nihna anga hma la tura hriattirna emaw an la dawng lova, Aizawl lam atangin a vil tur an rawn kal ngai bawk si lova, viltu nei lovin NBCC hnuaiah BMG Company hian Auditorium an sa mek a ni.

BMG Company hna-thawktute hian 30th Nov. 2010 khan NBCC Project Manager AK Sharkar hriatpuina lovin a ban pui ber tur Foundation an lo chhung tawh a, hei hi AK Sharkar hian duh lovin a chhutchhiat tir leh vek a, a foundation chhunna tur bankhur thuk zawng a han teh thattir leh chuan .10 metres laiin a lo tling lo lehnghal a, a laihthattir leh vek nghe nghe a ni.

Auditorium sakna tura an hmanraw hman te pawh chanchinbumite hi entira hrilhfiah vek an ni a, an Iron Rod hman te pawh ISI mark chuang ngei a ni hlawm a, an Cement hman te pawh Star Cement Quality tha ber chi 43 Grade lai a ni a, 1-4-8 Proportion an hmang a, a tha thawkhat tura ngaih a ni. Auditorium banpui hi a vaiin 27 zet a ding dawn niin NBCC hotute chuan an sawi a, a bankhur thukzawng hi 2.1 metres tur niin tualchhungmite tan pawh Daily Rate Rs.150/- hlawha thawk duh chu hlawhfa 30 rual vel zet an mamawh reng tih an sawi bawk. Tunah hian Vai 21 leh Mizo 8 velin an thawk mek a ni.

Auditorium hi mi 1000 lenna tur a niin hei bakah hian a hnunglam chu chhawng 3 a sak tur a ni a, Conference Hall tenau mi 75 len theihna leh mi 25 len theihna Room siam tum a ni bawk. Estimate hi Complex Field cheinna tur nena pek kawp an niin a vaiin Cheng Vaibelchhe .32.9 pek an ni a, Auditorium saknan hian Cheng Vaibelchhe 8 -9 inkar vel hman turin an ruahman a, a bak zawng chu Complex Field cheinan an hmang dawn niin BMG Company Project Director Manoj Mukher -jee chuan a sawi.

A sak hunchhung hi Complex Field cheina nen thla 18 ve ve, kum 3 chhung hun pek an ni a, hetihlai hian Complex Field chei hna hi a panna kawngin a zir loh avangin an la thawk tan thei lova, hei hian an thawh hunchhung turah an zawh hmanloh phah ang tih an hlau hle niin NBCC hotute chuan an sawi.

source - serchhip times

Lawrkhawm

Sorkar-ah mipui beidawng
Mipui Tangrual pawl chuan Mizoram sorkar-in kum 2 hmel a hmuh hnu ah an rawng bawlsak tuma an intiam ang an tlin dawn lo tih a chiang thawkhat a ni an ti a. Congress sorkar chu insiam thaa an zia an thlak a nih ngawt loh chuan tunhma ang thovin mipui an bei dawng leh dawn niin an sawi bawk.

Mizo pawngsual rawn
Assam, Cachar Dist. Karimganj-ah Inrinni khan Mizo hmeichhia kum 30 mi Champhai Dist. ami chu zirlai-in an pawngsual rawn nia sawi a ni. He hmeichhia hi zirlaite hian In 1 ah an pawngsual rawn a, hemi hnu hian he hmeichhia hi tlan chhuakin Mizoram House-ah a tlan lut a ni. Pawngsualtute hi Police te chuan an man kim nghal a ni.

Kawngpui kama inpho man
Aizawl Bazar pui lunlai hmun hrang hranga phalna nei lova kawngsir leh remchang laia ei chawp leh nepnawi zuara inpho dapchhuah beihpui chu Inrinni khan thlak a ni a. Mi thahnem tak man chhuahte chu ti tawp lo tura hriattirin, vawiin atanga man te chu na taka hrem an ni tawh dawn

Kangmei chhuahtu chawitir
Champhai Venglai VC te chuan danin thuneihna a pek angin tun thla ni 1 zana C.Vanlalthlana In kang chungchangah, a dawr atanga kang mei chhuak avanga he In hi kang a nih avangin Rs.50/- an chawitir. Champhai Venglaia C Vanlalthlana In hi an In hnuai lam atangin a kang a, an mutbu bakah an khum a kang chhe vek a. Kangmei chhuah tanna nia sawi, kawngpui ana Laltlan thangi dawr bungrua leh a bul garage chhunga C Lallianpuia bike leh scooty pawh a kang chhe nual.

Khawvel hmun dang rualin Serchhipah Rualbanlote Ni hman a ni

Serchhip 4th Dec. 2010 : Serchhip District hnuaia Spastic Society enkawlna hnuaia din Shalom Special School Naupangte leh SSA Mission Serchhip District chuan Block Resource Centre Hall, Serchhip-ah SSA bultumin nimin khan World Disable Day (Rualbanlote Ni ) an hmang.
He hunah hian Serchhip SSA DPC Pu C.Lalthanzira chuan thu sawiin, rualbanlote enkawl chungchangah Mizote hian hmasawnna tur kan la ngah hle a, mithiamte leh hetiang lama training chhuakte hi rawn thin a pawimawh thu leh a taka enkawl zuinaah pawh zirthiam leh train chhuakte hman tangkai kan zir a pawimawh thu a sawi a. Rualbanlote hi endawng mai lova hmangaihna leh lainatna nena enkawl hi kan zavaia kan mawh phurhna a ni a ti a. Rualbanlo (Vohbik) naupangte zirna chungchanga SSA hmalakna hrang hrang report a pe bawk.
Heng Vohbik naupangte hian intihhlimna hun hmangin an thiam thil chi hrang hrang an entir a, ei tur tuihnai tak buatsaih sak an ni. He hun a tel Shalom Special School naupang zawng zawngte, zirtirtu leh Board Memberte Rualbanlo te Ni pualin thilpek hlu tak pek vek an ni bawk.
He hun Pi C.Lianbuangi Inclusive Education Co-Ordinator kaihhruai ah hian Spastic Society Board Chairman, Pu H. Vanlalhruaia chuan thu sawiin, hetiang hun remchang hmang thei tura SSA hmalaknaah lawmthu a sawi a ni. He hun hlimawm tak an hmanna ah hian Shalom Special School Naupang leh Zirtirtute bakah Rualbanlo nu leh pa,Board Member leh SSA Staff te an tel a ni.

Lawrkhawm (4.12.2010)

A pasal then tak kut tuarin
Pi Lianpari a thi
Nizan hmasa zanlaia a pasalin a mut hilh laia a lu kham hnuaia geletine daha hal khum Pi Lianpari(45) Aizawl Kanan Veng chu nimin tlai khan a hliam tuar lovin a thi.
Pi Lianpari leh a pasal Pu H.Ngurchhuana(52) te hi kar 2 kalta khan inthenin, tunkar tir khan Pi Lianpari hian a bungrua a la a. An fapa upa ber Pu H.Rochungnunga te In luah ah a invawm lut a. Nizan hmasa zanlai pelh vel khan Pu Ngurchhuana hian a nupui then tak awmna; a fapate Inah hian kalin, a nupui chhuata mu lai lukham hnuai ah geletine hi dahin a hal a. Hemi hnu hian a tlan chhuak lehnghal nia hriat a ni.
Tualthattu Pu Ngurchhuana hi nimin zing khan Police ten an chenna Inah manin, thubuai siamsak a ni.

Zawlaidi-ah acid a tam
Mizoram State Planning Board member secretary, PL Thanga chuan Champhai leh Hnahlan Winery atanga siam chhuah grape wine (Zawlaidi) chu a hming thlak turin a hriattir a, winery neitute erawh chuan Zawlaidi hming chu thlak an tum rih lo nia nia sawi a ni. Hetihlai hian Zawlaidi' ah hian thûr (tarticid acid) a awm tur aia tam a awm a, hei vang hian pumpuiin a ngeih dawn lo niin mithiamte chuan an sawi.

Rualbanlote Ni hmang
Nimin, 'World Disabled Day' (Rualbanlote Ni) Mizorama hmanna lian ber Aizawla neih chu Social Welfare Minister Pu P.C. Lalthan liana’n hmanpuiin, rualbanlote tan Ni bik awm hian sira hnawl emaw ngaihsak hlawh lo an nih loh zia a lantir a, an tan malsawmna ni thei tura theihtawp chhuahsaktu zawng zawng te chungah lawm thu a hrilh a ni.

Chhiarpui 2011 training
Nimin khan Census of India 2011 hnuaia Chhiarpui thawh hnihna atan State Level Meeting cum Training for 2nd Phase, Population Enumeration chu Secretariat Conference Hall, New Secretariat Complex-ah neih a ni. Population Enumeration hna hi 9th - 28th February, 2011 chhunga thawh tur niin hemi chhung hian belh ngaite, paih ngai te leh siamthat ngai dang te siam that tur a ni a, DCO-in 15th March, 2011 hmain Census Commissioner (Registrar General, India) hnenah thehlutin 31st March, 2011-ah Provisional Population tihchhuah hman tura ruahman a ni
.
5S presentation thlirho
5S Institute, Mumbai chuan nimin khan Secretariat Conference Hall, New Secretariat Complex-ah pre sentation an nei a, Chief Secretary Pu Vanhela Pachuau chu Chairman niin Principal Secretaries, Secretaries te leh sorkar mipawimawh tak takin he presentation hi an thlir a ni. 5S hi Japanese thumal panga thlar bul lak khawm a ni.

Sunna hun hmang
Parliament chuan ni 16 chhung opposition-te tih buaina karah nimin khan sum leh pai lama a tih tur te a zo fel ta. Nimin inkhawmah hian Bhopal gas put avanga thi ta te sunna hun hman a ni.

Agri. Minister hovin Watershed & NLUP chungchang sawihona neih a ni

Serchhip 3rd Dec. 2010 : Nimin khan Serchhip Agriculture Complex-a Farmers Information & Advisory Centre-ah Agriculture Minister Pu H.Liansailova hovin NEDPRA leh NLUP chungchang sawiho a ni.
Sorkar laipuiin kuthnathawktute tana ruahmanna a siam NWDPRA leh State sorkar-in a ruahman WDPSCA Serchhip District-a kalpui dan; NLUP-a hman tangkai theih dan sawihonaah hian Minister Pu H.Liansai lova chuan, Mizoram ei leh bar dinhmun siam tha a ram intodelh ni tur chuan Lo neitu ten eizawnna nghet an neih a; an hnathawh hahna-in awmzia a neih ngei a tul a, chumi atan chuan theihtawpa tan lak mek a ni a. Sorkar ruahmanna anga tanpuina dawng ten a nihna anga hna an thawh theih nan khauh takin hma lak a ni dawn a, dik lo taka thil ti te chu dimdawi an ni dawn lova, ti sual palhte erawhchu hriatthiamna thui tak neih theih a ni thung a ti a.Nikum khan Mizoram pumah leiletah buh qtls. 24,0000 thar chhuah a ni a, thingtlangah qtls.460,000 thar chhuah a nih thu a tarlang bawk.
He hun Agriculture Deptt. Secretary Pu Vanengmawia kaihhruai ah hian District Bawrhsap Pu H.Darzika bakah District chhunga Lo neitu mi thahnem tak telin, DAO Pu Thansiama’n Serchhip Dist. chhunga an hmalakna hrang hrang a tarlang a. Deptt. Jt.Director Pu Lalniliana’n lawmthu sawiin inkhawm hi a tin a ni.

Tualchhung

Serchhipah mi 81 HIV+
Serchhipa thisen test zawng zawng mi 7060 zinga mi 81 te chu HIV+ an ni tih niminpiah World AIDS Day hmannaah tarlan a ni.

Sub-Hqrs.YMA thukhawm
Nimin khan Hmar Veng YMA hall-ah Sub-Hqrs. YMA executive committee chu thukhawmin, Krismas leh kumthar vuakveta puakthei thil leh Zawlaidi chungchang sawihona talk show cable TV neih nise an ti a. Sub-Hqrs.YMA zaipawl music video siam, Cultural troop T-shirt lei dilna te chu an pawm bawk.

Traffic Mag.-in enfiah
Nimin zing khan Serchhip Traffic Management committee chuan Serchhip Bazar leh a chheh vela lirthei chetna dal thei bungraw dahhnawkte a hmunah enin, a neitute dah kiang turin an hriattir.

Lawrkhawm

Pawngsual sawiho
Naupangte laka mipat hmeichhiat na hman khawloh chungchang sawi hona nimin khan Aizawl I&PR auditorium-ah neih a ni a. Tunlaia pawngsual hluar ta lutuk chu inchhungkhur inenkawlna that tawk loh vang leh sex education hriat loh vang a nih thu he hunah hian tarlang a ni a. Kum 2006 -2010 chhungin naupang pawngsual tawk 209 leh puitling 135 a awm tawh thu tarlan a ni bawk.

Tanpuina sem chhuak
Nimin khan sorkar-in tlawmngai pawl hrang hrang hnenah tanpuina pawisa fai Rs. nuai 75 a sem chhuak. Social Welfare Deptt. kaltlanga tanpuina semna hun hi Aizawl Chaltlanga Social Welfare Deptt. Conf.hall-a neih ah Minister Pu PC.Lalthanliana chuan mahni hlawkna hamthatna ngaihtuah chang lova midangte tana thawk tlawmngai pawlte chu sorkar-in a ngaisang a ni a ti.

Health Clinic hawng
Nimin khan Law Commission Chairman Pu R.Lalrinawma MLA chuan a bial chhung Zemabawk North-ah Health Clinic centre thar a hawng a. Pu R.Lalrinawma chuan, hriselna kawnga hmasawn a nih theihna tura Zemabawk ‘N’ VC leh Health Department hmalak na chu a lawmawm a ni a ti.

Europe-ah khaw vawt
Europe dung leh vanga thlasik vur tla nasa-in harsatna a thlen mek a.Airport tam taka thlawhna thlawk chhuak turte pawh khaw vawt avang hian cancel a ni tawh a, nunna chan phah erawh an awm thu hriat a la ni lo.

CBI Director thar
Pu Amar Pratap Singh chu IPS officer te hna chelh theih sang bera ngaih, Central Bureau of Investiga tion (CBI) Director thar atan ruat a ni a, kum 2 chhung he hna hi a chelh ang. Prime Minister Manmo han Singh-a hova thukhawm, Cabinet Appointment Committee chuan, kum 58 mi, Amar Pratap Singh hian Ashwani Kumar-a thlak turin a ruat a, amah hi CBI Special Director leh BSF Additional Direc tor General lo ni tawh a ni a, a hna thawh that avangin Police chawi mawina sang, Indian Police Medal leh President's Police Medal-te pawh a lo dawng tawh a ni.

Tualchhung

Red Ribbon Zaipawl
Red Ribbon Choir competition Serchhip Dist. Zone BCM Serchhip Kohhran Biak Ina neih nizana zawh fel takah BCM Bial zaipawl Serchhip 1-na an ni. He Zaipawl intihsiaknaah hian zaipawl 8 an tel a ni.

Traffic Mag. thukhawm dawn
Vawiin chawhma dar 11 hian DC’s Office chamber-ah Serchhip Traffic Management Committee chu District Bawrhsap hovin an thukhawm dawn.

Pi Neihsangi a boral
Nimin zing dar 9:11 khan Pi Lalneih sangi(39) w/o Lalmuankima Serchhip Vengchung chu Septicemia natna-in a boral a, lumen a nih hnu vawiin hian vui a ni ang.