Tualchhung ni 27.4.2010

Mibo zawng mek
Lalroluaha(22) s/o PC.Malsawma Serchhip Dinthar Veng chu Inrinni kalta zan atang khan chin hriat lovin a bova. A chhungkhat laina hnai ten an zawn hnuah nimin atang khan an Veng YMA branch ten an zawng a, nizan thleng khan hmuh a la ni lo.

Chhiarpui atan training
Nimin khan DC’s Conference hall-ah Serchhip Dist. a chhiarpui neih tur atan training buatsaih a ni. Tarlan a nih danin chhiarpuiah hian mipui zawng zawng ID siamsak an ni ang a, May ni 15 - June ni 30 inkarah chenna In leh chhungkua chhiar phawt a ni ang a, nakuk Feb - March-ah mihring chhiar hna thawh a ni ang.

SAY-in thisen an pe
Zoram Sipai pawl ‘Salvation Army’ chuan an pawl din champha pualin nimin khan Serchhip leh Thenzawla SAY ten Serchhip Damdawi Inah a mamawh apiangte hman atan thisen unit 60 an pe.

MNP-in Minister Pu Lalsawta bang turin an phut

Mizo Zirlai Pawl chuan Technical entrance exam result fel lo avanga mawhphur nia puhin Minister Pu Lalsawta bang turin an phut.
Hun engemaw ti kalta atanga kumtin deuh thaw a kaihhruaina hnuaia exam chungchanga buaina awm ziah thin chinfel a nih theih nan Director leh Technical wing enkawltute chu senghawi nise an ti bawk a. Nikum lama result felfai lo tiam tawhtu leh he buaina bulthum chingfel thei lo nia an sawi Minister chuan a chanvo tlansan ngam se an ti a. Result fel lo chu tun thla ni 30 ral hma ngeia siam that an phut bawk.
MZP-in bang tura an nawrna chungchangah hian Minister Pu Lalsawta chuan he thil hi CM kut a nih thu a sawi a. Director leh Technical wing hnathawktute pawhin theihtawp an chhuah tih sawiin, thil diklo awmte chu an tih luih vang a ni lo tih a sawi.

Kum 5 kalta atang khan MST chuan Cheng vaibelchhe 14-16 a hloh ziah

Serchhip 25th April 2010 : Mizoram State Transport Department chuan kum 5 kalta chhung khan kumtin Rs. vaibelchhe 14 atanga 16 a hloh ziah.
Comtroller & Auditor General of India report thar berin a tarlan danin, Mizoram State Transport tlanna zawng zawng kawng 29 ah an tlan man pawh an hmu chhuak lova. An tlanna man tur bituk atanga za zela 67.65% chu hnathawktute hlawh atan ringawt a kal ral a, hei hi ngaimawh awm an tih thu a sawi a ni.
Hetianga Mizoram State Transport hloh zawnga a kal loh nan hian ruahmanna thar siam a, lirtheia chuangte vui leh vaina lo dawngsawng tur leh rate siamtu tur thuneihna sang tak nei din nise an tih thu sawiin Controller & Auditor General of India chuan a tarlang.
Report chuan sorkar sum vei vel a hun taka report chungchangah te, sum dawn atanga sum lo kal hman dan tur chungchangah leh a kal kawng hrim hrimah Mizoram sorkar chu a chak tawk lo hle niin a sawi a. Autonomous body te leh thuneitu ten an annual account an thehluh tlai danah te inrelbawl dan a chak tawk lo tih a lan chian bakah heng avang hian sum hloh leh dik hlel taka hman a awm ngei tih hriat a ni bawk niin a sawi a.Hemi chungchangah hian a dik lo te hrem a, chhung lam atanga inkhuahkhirh that a pawimawh tih a sawi bawk.

Lawrkhawm

Earth Day hmang
Khawvel hmun dang rualin nimin khan Mizoramah pawh Earth day hman a ni a. Forest Department buatsaihin Aizawl khawpui chhung thenfai hnatlang thawh a nih bakah leilung leh a chhunga awmte humhalh tura inzirtirna thuziakte tarchhuah a ni.

Thli leh ruah thawkah mi 1 a thi
Niminpiah zinga ruah leh thli thawkin Tlabung leh a chheh vel khuate a nuainaah mi 1 thiin, midang 5 an hliam a, In 300 chuang a chhe bawk. Mithi hi Chantru Kanto(53) a ni.

Suahsualna a pung
Nikum tun ang hun leh kumin chhunga Mizoram puma Police-te thubuai ziah luh zat khaikhina a lan danin, kumin hian nikum aiin suah sualna a zahve deuh thaw in a pung. He thu hi DIG range Pu L.Hrang nawna hova Mizoram puma Police hotute crime review meeting nimina Aizawla neihah tarlan a ni. Hetianga suahsualna hrang hrang a pun nachhan hi mihring pun chhoh zel vang a nih bakah suahsualna man chhuak tura police-te an thawhrim vang niin an sawi a ni.Nikum aia kumina thubuai ziahluh zat punna hi 49.42% niin, Aizawl Dist. ah thubuai tam berin, Mamit Dist. ah a tlem ber a ni.

VC-te hnenah aurinna pe
Thingtlang khaw hrang hranga VC ten khawtlang huap thu pawi mawh puanzarna atana an hman tur aurinna PA set 22 chu LAD Minister Pu PC.Lalthanliana’n nimin khan Aizawlah LAD conference hall-ah a semchhuak. Minister chuan 13th finance commission thingtlang mipuite hmasawnna atan sum tam tak a ruahman thu sawiin, heng sumte hi mipui tan rinawm leh dik taka hmang theuh turin VC te chu a chah a ni.

NH 54 PWD kutah
Parliamentary Secretary Pu Lalthanzara chuan,BRTF te enkawl lai Silchar leh Saiha inkar kawngpui chu Mizoram PWD hnenah hlan fel a ni tih a sawi. He thu hi niminpiaha BADP sum Rs. nuai 8 hmanga sak Cham phai Chhungte veng community hall a hawnnaah sawiin, Pu Lal thanzara chuan hall sakna tura sum dawn chu dik taka hman a nih avanga lawmthu a sawi a.Power lama Mizoramin har satna a tawh chhan chu sorkar hmasa ten ram rotling engmah an siam loh vang a ni a ti bawk.

Leiminah mi 12 an thi
Ram chhung hmar lam bial khaw lum lutukin a tihbuai mek laiin Arunachal Pradesh ah chuan ruah sur nasa avanga leiminah mi 12 an thi a, chhanchhuah hna thawh mek a ni.

Cancer vaccine hman khap rih
Union Health Ministry chuan cancer hri thenkhat danna vaccine hman dik lohna a awma sawi chhuina thupek a siam. He thu hi nimina Parliament-ah Health minister chuan sawiin, tun hnaia thihna thleng leh he vaccine hman nia sawi hian inzawm na a neia hriat a ni lo va,amah erawhchu inventhawn thilah thu leh awm hma chuan he vaccine hi hmang lo turin State tinte hriattir an ni a ti a. Andra Pradesh-a hmeichhe naupang 14000 chuang he vaccine pek zinga mi 4 thi te chu thil dang vanga thi an ni a ti.

Tualchhung 17.4.2010

Presby. Bial inkhawmpui
Nizan atang khan Presbyterian Kohhran Bial inkhawmpui neih tan a ni a. Vawiin ah rorel inkhawm neiin, Pathianni zanah a tiak ang. Bial Inkhawmpui hi Serchhip bial in Kawnpui Kohhranah, Vengchung bialin Dinthar kohhranah, New Serchhip bialin New Serchhip Kohhranah inkhawm pui hi an hmang a ni.

RD-i Serchhipah a chesual
Mizo hmeichhe Rapper lar tak RD-i chu nizan hmasa dar 10 vel khan Serchhipa an chhungte tlawha an rawn zin chu AOC venga Non-Mizo Biak In bul, kawng thlang Hmar Veng kawngah an tlan liam a, amah hi a tirah chuan a biak theih lohva mahse tunah chuan a tha leh deuh tawh. RD-i hi a fapa kum 2 mi vel nen an ni a, motor hi Maruti Zen niin, RD-i hian a khalh a, Motor hi kawngtlang Hmar Veng Road-ah a zangthal zawnga innghatin, a chhe nasa hle.

Tualchhung

NWDPRA training buatsaih
Nimin khan New Serchhip YMA hall-ah NWDPRA trianing ni 2 awh tur chu Dist.Bawrhsap Pu H.Darzika’n a hawng. Pu Zika chuan Agriculture Deptt. kal phung chu tunhma lam khan loneitute hmakhaw ngai tak tak lovin supply thila tute emaw hlawkna tur thil ngaihtuah a ni thin a, tun ah erawh kuthnathawktute mamawh dik tak ngaihtuah a hmalak a ni ta a, a lawm awm hle a ni a ti. He training-ah hian mi thiam ten Lo neitute zirtirna hrang hrang an pe a, vawiinah chhunzawm leh a ni ang.

Ramngaw leh nunchang zirho
Nimin khan MHIP Sub-Hqrs. Serchhip Office, Bazar-ah Mizoram Consaltative Forum buatsaihin ramngaw leh nungcha humhalh tul zia inzirtirna neih a ni. He hun MUP Serchhip Area President Pu K.Chawi liana kaihhruaiah hian Mizoram Consal tative Forum Gen.Secretary Pu C.Than mawia paper buatsaih zirho a ni a. Pu Than mawia chuan ramngaw leh nung chate chu mihring dam khawchhuahna atana thil pawimawh ber a ni a ti.

Lawrkhawm

CS coaching khar
Mizoram Youth Commission chuan Civil Service Coaching June ni 13, 2009 atanga a tan chunimin khan kharna hun Chairman Pu Hmingdailova Khiangte, MLA hovin an Office-ah an hmang.Pu Hmingdailova Khiangte chuan zirlaite chu vannei a tih thu sawiin, India ram khawi hmunah mah mahni mimal senso, fee leh a dang te pakhat mah chawi lova IAS coaching kalna hi a awm ngai lo a ni a ti.

CYMA Vice President thar
Central YMA CEC nimina Aizawl a thukhawm chuan Vice President hmun ruak luahkhat turin an President hlui Pu JH.Zoremthanga an thlang. Vice President tanglai Pu C.Lalram liana tunhnaia a thih avanga a hmun ruak luah tur thlanna hi ballot paper hmanga thlangin Pu JH.Zorem thanga lung rual takin an thlang ta a ni. CEC thukhawm hian Zanlawn Branch YMA, Sakawrhmuituai Group-a awm thin chu Aithangpa Group-a beh tir an remti bawk.

6th Pay hman dil tum
Mizoram sorkar hnathawk pawl hrang hrang inzawmkhawmna, Federation of Mizoram Govt. Em- ployees & workers executive com mittee nimina Aizawla thukhawm chuan thla thar May atanga 6th pay hmang ve turin sorkar ngen nise an ti a. Thil man to chho lutuk chuan sorkar hnathawkte a nghawng nasa hle nia sawiin, hei vang hian 6th pay hmang ve lo te tan DA 13% a pung chu a pawisaa lak sorkar-ah dil nise an ti bawk

Thla lem kapchhuak
Nimin tlai khan ISRO chuan setellite GSLV D3 a kapchhuak. He thla lem hi India chuan kawng tam takah a chhawr tangkai thei dawn a. Tun hmain hetiang hi a la kap chhuak ngai lo a ni.

Hel inbiakpuiah sawm an ni
Union Home Minister Pu P.Chidam beram chuan Moist hel pawlte chu an ralthuamte tunga inbiakna neih puiah a sawm. He thu hi nimina Parlia ment budget session thutkhawm thawh hnihna rorel inkhawm ah sawiin, Pu Chidamberam chuan, hel pawlte chu tharum thawh ban sana inbiak an duh chuan sorkar laipui chu a inpeih reng a. Hetih rual hian state sorkar-te chu hel beih leh dapchhuah kawngah sorkar laipui chuan a pui zel dawn a ni a ti bawk.

Open School centre hawng

National Open School Serchhip Centre thar chu nimin khan hawn a ni. Hawnna inkhawm CMO’s Conference hall-a neih ah hian khuallian DEO C.Zolawma chuan thu sawiin, Open school-a zir chhuakte chu India ram khawiah pawh pawm an ni a. He school hian mipui tling tak tak thahnem tak a chherchhuak tawh a ni a ti. Centre hawn pual hian Damdawi In leh Fahrah enkawlna Ina tanpuina Rs. 1000 ve ve hlan a ni.

Pu Zorama’n Pu Hawla a mawhphurhna la zo lovah a puh

MNF President Pu Zoramthanga chuan sorkar kum kalta chhunga sorkar sum hman hman loh chungchangah Chief Minister Pu Lal Thanhawla chu mawhphurhna lian la zo lovah a puh.
Nimina Aizawl Press Club-a thutharlakhawmtute a kawmnaah Pu Zoramthanga chuan sorkar kumtawpin a liam pui Rs. nuai 7000 vel liam chu a uihawm lutuk tih sawiin, mipui retheite mamawh a san em em laia hetia a liam ta mai hi a pawi tak zet zet a ni a ti a.
Sorkar kum tawp dawn leh budget session pawimawh vanglai taka Chief Minister Pu Lal Thanhawla’n Delhi lama Plan discassion a neih pui tlat vang a ni a ti a. Working group discussion an neihah sorkar hotu lian an kal vek a ngai thin tih sawiin, hemi rual hian pawisa sanction tu ber Chief chu kar khat zet a thangbo bawk si a, a haw lamah Kolkatta ah cham lehin, a ngai pawimawh tawk lo a ni a ti a. Hetiang hun laklawhah hian tun hma pawhin Chief Minister-in a hun a sawn theih thu leh sawn a lo ni fo tawh tih a sawi a. Pu Zoramthanga chuan hotu tam tak Delhi lama thang bona hun um lutuk avanga pawisa heti zat a liam ta hi mipui leh ram tan a pawi hle a ni a ti.
Pu Zoramthanga chuan, Chief Minister Pu Lal Thanhawla’n kum 2007-2008 plan sum 9% hman lovin a liam tawh tih a sawi chu thu dik lo a nih thu sawiin, khatih lai khan annual plan pawisa nuai 8000 hman lovin liam tak tak se chuan au bengchhenna tham a ni a ti a. Khatihlai khan system ngai reng hman a nih thu leh dawhkan 94-a kaltlang tur pawhin vil ngun chuan a lapse kher lo a ni a ti bawk.

Lawrkhawm

Huaisen lawmman hlan
Lunglei Farm Veng naupang kum 12 mi, Joseph Vanlalhruaia hnenah huaisen chawimawina sang ‘Jeevan Raksha padat’ Award chu nimin khan Home minister Pu R.Lalzir liana’n Lunglei DC Office ah a hlan. Joseph Vanlalhruaia hian nikum khan kum 7 mi Jenet Vanlal ruati tui tla a chhanchhuak a ni.

YMA-in BPL servey dawn
Central YMA committee sang Central Co-ordination Committee nimina Aizawla thukhawm chuan BPL servey neih an remti.He meeting an President Pu Lalchung nunga kaihhruaiah hian Gen.Confe rence hnuhnung bera YMA leh sorkar khawih thil an rel bawhzuina te ngaihthlak a nih bakah hmalak zui zel dan turte sawi ho a ni a. Thil dang bakah sorkar-in BPL list a siam turah YMA-te servey nei tura ngenna chu neih an duh leh duhloh ngaih tuahin, member ten banphar in vote an la a, ban phar an tam zawk angin servey hi neih remtih a ni.

Thlipui thawkah mi 56 an thi
Cyclon thlipui leh ruahpui vanawn in nimina Bihar thlang lam bial a nuainaah; hriat theih chinah mi 56 an thi a, In leh Lo thahnem tak a chhe bawk. State Chief Minister Pu Nitish Kumar chuan chhiatna tawktute a tawrhpui thu sawiin, Dist. thuneitu te chu chhanchhuah leh chhawm dawl hna ngawrh taka thawk turin a hrilh a. Thi chhungte hnenah zangna dawmna Rs.15000 theuh pek an ni ang tih a sawi bawk.

China lirnghingah mi 400 an thi
Nimin zinga lirnghing na takin China hmar thlang lam Jinhai Province a sawinaah mi 400 vel an thi a, midang sing chuang an hliam bawk. Lirnghing hian chenna In tam tak a ti chhia a, vocational school 1 chim karah zirlai eng emaw zat an la tang bawk.

India a dinna ngaiah a ding
Prime Minister Dr.Manmohan Singh chuan ramdangmi firfiaka che thin te bakah a rukarala pawi khawih thinte chunga India ngaihdan chu nemnghehin a awm tih a sawi. He thu hi Washington-a ni 2 chhung awh Nuclear security summit neih zawh a nih hnuah sawiin, Dr.Singh chuan India chu ram dang atanga lo kal firfiak pawl a ruk arala che thin ten nasa takin an ti buai thin a. Amah erawhchu India chu a dinna ngaiah a ding nghet zel dawn a ni a ti.

Ni 13 April 2010 Tualchhung

Pu Kammanga a boral
Nimin tlai dar 3 vel khan Pu FK.Manga (92) f/o F.Vanlalhruaia Serchhip Chhim Veng chu khawsik/asthma avangin a boral a. Lumen a nih hnu vawiin hian Chhim Veng thlanmualah vui a ni ang.

HSLC compartment exam hun
MBSE chuan HSLC result puan taka subject bat neih, compartment exam ni atan thla thar May ni 11 khi a ruat a. District khawpui tin Centre 1 theuhvah exam theih a ni ang.

1st term exam
Tunlai hian School hrang hrang zirlai ten 1st term exam an bei mek a. A nawlpuiin tunkar Nilaini atang khian an bei tan ang.


SDO(Sadar) thar
Serchhip SDO(Sadar) thar, Pu Dolian buaia Thenzawl SDO(Civil) chuan hun reilote hnuah a hna a zawm dawn.

Sorkar laipuiin Mizorama mirethei In sakna tur sum a rawn pe

Mizoram District hrang hranga mirethei chhungkaw 2638-te chenna tur In sakna, thawhkhatna atan Rs. vaibelchhe 27 nuai 69,17,000 chu sorkar laipuiin nimin tlai khan Mizoram sorkar a rawn pe.
UD&PA Director sawi danin, miretheite In sakna tur hi a pumpui atan Rs. vaibelchhe 962 nuai 5,71,000 niin, hetah hian 25% chu state sorkar tum ve tur a ni a. Mirethei In sakna tur hi Lunglei, Champhai-I leh II, Kolasib-I leh II, Saiha, Serchhip leh Mamit te a ni.
Heng bakah hian District khawpui 4 tih changtlunna tur hrang hrang - Lungleia convention centre leh khawpui tih changtlunna tur, Serchhip leh Saihaa Development scheme leh Lawngtlaia farm area tih changtlunnaa atan Ministry of Urban Development leh Ministry of Housing Poverty alluviation atangin Rs.vai belchhe 73, nuai 31,37,000 dawn a ni bawk.

Lawrkhawm

Khaw lum tuar lovin mi 3 thi
Ram chhung hmar lam state hrang hrangah khaw lum lutukin nun phung a ti buai mek a. Chhatis garh-ah nimin khan khaw lum tuar lovin naupang 3 an thi a ni. Hetihlai hian Uttar Pradesh-ah chuan thing tlang hmun hrang hranga kangmei chhuakah mi 50 aia tam an kang hlum a ni.

Dr. Singh leh Obama inkawm
Prime Minister Dr.Manmohan singh chuan India chu firfiakte nuai chimit turin a inpeih a ni a ti. He thu hi US President Barak Obama nena an inkawmnaah Prime Minister chuan a sawi a. India chuan Mumbai beihna a inhnamhnawihte an phu tawk hrem na pek vek a duh tih a sawi a. Pakis tan atangin firfiak pawlte India-ah pawi khawih turin an rawn kal thin tih sawiin,Mumbai beihnaa inhnamhnawih te chu Pakis tan chuan a phu tawk hremna a pe lo niin a sawi a. Obama chuan Pakistan atanga firfiak ten India an bei thin chu US chuan tha lo a ti a, heng mite nuai chimit tura theihtawpa tan lak a ngai a ni a ti.

Nuclear security summit
Nuclear security summit chu nimin khan Washington-ah tan a ni a. He summit ah hian ram hrang hrang 42 atangin hruaitu an kalkhawm a. Hetah hian nuclear ralthuam khuah khirh dan leh helho kuta a awm loh dan tur an rel a ni.

Mizo zingah rualbanlo kan awm rualin, piangsual kan tam hle a ni - cm

Serchhip 12th April 2010 : Chief Minister Pu Lal Thanhawla chuan, Mizo zingah hian duhamna ah te, chapona te, inngaihhlutna, inhmangaihna te leh thil dang tam takah piangsual kan tam hle a ti.
He thu hi Inrinnia Spastic Society of Mizoram-in an din champha kum 21-na Founder's Day tia an vuah Vanapa Hall-a a hmanpuinaah sawiin, Chief Minister Pu Lal Thanhawla chuan, heng naupang duhawm tak takte hi piangsual an ni lova, pianphunga rualbanlo mai an ni zawk a ni, a ti a. Mizo zingah hian duhamna ah te, chapona te, inngaihhlutna, in hmangaihna te leh thil dang tam takah piangsual kan tam hle a, an ni te ai hian piangsual kan tam zawk hle a ni a ti a.
Pu Hawla chuan pianphunga rualbanlo te hi India sorkar-in a ngaih pawimawh thu sawiin, sorkar ah pawh an tan hian danin a phut angin hmun hauhsak an ni a ti a.Spastic Society of Mizoram hruaitute leh Gilead Special School thawktute inpekna chu ropui a tih thu sawiin, hetiang mi hmantlakte hi kan ram mamawh an ni a ti a an chungah lawmthu a sawi a.
Spastic Society of Mizoram (SSM) hotu ten ram zau tha tak an mamawh thu an sawi chu Chief Minister chuan ram in pek a harsat thu a sawi a. Tunah pawh hian IIMC, NIT, NIFT etc. te tan ram pek tur te pawh ngaihtuah a tul thu a sawi a. SSM tan chuan ram zau tak chu a tul a ni a ti a. Hun lo kal zel turah Bus an mamawh tur thu an thlen pawh pek a remti a ni.
He hunah hian naupangten an thiam thil chi hrang hrang an entir a. Kal khawm mipui ten an lawmin, a enkawltute inpekzia leh an thawhrim zia an ti lang ni.

tualchhung

NREGS sum chingpen an ti
MNF Serchhip Block ‘E’ chuan thu chhuah siamin, Serchhip Dist.a NREGS hmalakna kal mekah a kaihhruaina dan anga kal lova hmalakna a tam hle a. Hei vang hian Serchhip Dist. mipuite chan tur sum tam tak hi a chingpen nasa hle niin a lang a. Assembly House-a Pu Lal Thanhawla’n Serchhip Dist.ah NREGS sum chingpen a tam tia a lo puan tawh hi corruption a zung nen lam pawt phawia phoro tum’ nia insawi thin Pu Lal Than hawla kaihhruai Congress sorkar hian mipuite chanai ti chingpena, ti khawlotu hi chhui chhuak hrem ngei turin Serchhip MNF Block E’ chuan kan phut tlat a ni an ti.

Class-IV Contractor Assn. hruaitu
Inrinni khan Pu H.Malsawma In Bazar Vengah PWD hnuaia Class-IV Contractor Association ten assembly neiin, chawhnu lamah MJA-te kaihhruaina hnuaiah hruaitu thar atan heng mite hi an thlang :
President : Lalthlanthanga Chawngthu
Vice Pre. : H.Malsawma
Secretary : Saizampuia Sailo
Asst.Secy. : Vanlalzarliana
Tresurer : F.Lalthlamuana
Fin.Secy. : Rozuali

Ration semchhuak
Supply Department chuan Retailer hrang hrang kaltlangin mipui ration buhfai pangngai bakah BPL leh AAY a semchhuak.

Tualchhung

Malaria do beihpui hawng dawn
Zanin dar 7 hian CMO’s Conference hall-ah Anti-Malaria Month hawnna inkhawm neih a ni dawn a. Hemi rual hian YMA zaipawl intihsiak final round neih a ni nghal ang. Sikserh do beihpui thlak hawnna inkhawmah hian Dr.C.Lalthan mawia State Prog.Officer (Malaria) Directorate of Health Services chu khual lian a ni ang.

Mizoram aiawhin kal dawn
National Junior Wrestling Champion ship Haryana-a neih turah Mizoram aiawha kal turin Vanlalruata s/o Lalrem mawia Serchhip Vengchung leh Anita Lalsiamkimi s/o T.Rengkhuma Serchhip Vengthar te chu an kal dawn a, tukin hian Serchhip an chhuahsan ang.

PHE tui sem rim a na
PHE Department-in mipui hnena tui a sem mekah tui tih thianghlimna atana an bawlhlo pawlh rim a nam nasat avangin mi tam takin in harsa an ti hle. Hetihlai hian tui tih thianghlimna lama Deptt. mi thiamte chuan hetianga bleaching rim nam nasa hi hriselna atan a hlauhawm loh tih an lo sawi tawh a ni.

Mizorama Village Council inthlanna zawhfel a ni Serchhip-V ah Congress seat an la vek

Serchhip 8th April 2010 : Serchhip-V Village Council inthlanna chu tluang taka neih zawh niin, seat awm zawng zawng 4 Congress party candidate ten an la.
Serchhip P&E Veng behchhan, Serchhip-V VC inthlanna hi nimin zing dar 7 atanga tlai dar 4 inkar chhung khan Little Flower Convent School-ah neih a ni a. Inthlannaah hian vote awm 1237 atangin mi 870 in vote an thlak a, hei hi za zela 70.33% a ni a. Vote thlak zawh veleh hian DRDA Confe rence hall-ah vote-te hi chhiar nghal niin, nizan dar 7:56 khan result puan a ni a.Heng mi Congress candidate-te hi Serchhip-V VC atan thlan an ni :
1. G.Vanlalngaia, - 542 vote
2. R.Thanchuanga, - 486 vote
3. Haukunga Jahau - 470 vote
4. Lalzamlova Sailo - 462 vote
Serchhip-V VC inthlanna rual hian Mizoram Dist dang 4 ah inthlanna hi kalpui a ni bawk a. Aizawl District-a khaw 2- Zuangtui leh Tuivamit bakah Lunglei Dist. a khaw 3- Thlengang, Rotlang West, Champhai Dist. ah Champhai Vengthar, Serchhip Dist. ah Serchhip-V leh Kolasib Dist. ah Kolasib Project Vengte a ni a.
Lunglei Dist.a Sailen khuaah chuhtu dang awm lovin Congress candidate 3 thlantlin an lo ni tawh a ni. VC siamthar Malsuri, Rotlang West leh Kolasib Project Vengah te hian an dinna VC-a member ni sa te chu rin nghal tura ruahmanna siam a ni a. Hei hi MNF Party chuan tha ti lovin court-ah a zualkova. High court chuan ruahmanna a lo siam tawh anga kal turin state election commission chu hriattirin, kar 2 chhunga insawifiah turin sorkar chu a hriattir a ni.

PSLC Merit list tihchhuah a ni

Kum 2009-a Mizoram Primary School leaving certificate examination-a mark 75% chung lam hmute paper chhanna ennawn lehna result chu nimin khan School Education Department-in a ti chhuak.
A pumpuiah Aizawl District-a Sakawrtuichhun Primary School-I zirlai Lalvenpuia chu pakhatna a ni a. He school-a zirlai vek Lalawmpuii chu pahnihna niin, Serchhip Chhiahtlang Primary School-II zirlai Lalremruati chu pathumna a ni.
He merit list-ah hian Aizawl Dist. ah zirlai 67 an tel a. Champhaiah zirlai 6, Kola sib District- ah 8, Serchhip Dist. ah 17, Mamit Dist. ah 2 leh Lunglei Dist.zirlai 30 an tel a ni.

Lawrkhawm

Chhiarpui training nei
Nimin khan Circuit House Con ference Hall Lunglei-ah chhimlam district huap Lunglei, Saiha leh Lawngtlai tan Second District Level Meeting cum Training on Census neih a ni. He training hi Pu P.C. Lalthan liana, LAD Minister-in a hawng a. Pu Lalthanliana chuan chhiarpui hi Isua hun lai atang tawhin a in tan tawh tih kan hria a. India ramah kum 10 danah neih a ni thin a. 2001 hnuah 2011 chhiarpui hi India ram pumah neih a ni dawn a ni a ti.

Mi vit hlumtu a tlanbo
Myanmar mi Lalthianghlima(38) Champhai Vengsanga mi In luaha awm chuan a thenawmpa Lalrawng bawla chu nizan hmasa khan a vit hlum. He mite 2 hi inkawm thin an ni a. Hemi tum pawh hian inkawm in, inhnial buaina an neih avangin Lalthianghlima hian a hnute vei lam hnuaiah chemte-in a vit ta a, hun reilote hnuah a thi zui ta mai a ni. Tualthattu hi a tlanbo nghal avangin zawn mek a ni.

Hel ding thar biak tum lo
Sorkar laipui chuan hmarchhak biala hel pawl atanga chhuaka pawl thar anga ding chi reng rengte inbiakna a neihpui dawn lo tih a sawi. Nimina New Delhi-a thuchhuah a siamah sorkar chuan hmarchhak bialah hel pawl thenkhat atanga ralthuam chelek bansan lo leh inremna dapa hmalak mek zawm lo tute awmin, heng zinga thenkhatte chuan pawl an din tih a sawi a. Vantlang inkhawm ang ah te an ralthuam an dah a nih pawhin pawm a ni dawn lova, inpekna leh inbenbelna policy awm mek angin an inpe tur a ni a ti.

Naxal hel nuaibo tum
Sorkar laipui chuan ram chhunga Naxal helho chetna chu kum 2/3 chhunga nuaibo a tum thu a sawi nawn. Chhatisgarh-a Jagdalpura press conference-ah thusawiin, Home Minister Pu P.Chidamberam chuan Naxal ho dona hi hun rei awh chi a nih angin vawi lehkhata hlawhtlin nghal beisei theih a ni lo a ti a. Kum 10 vel kaltaa Naxal lo chet tanna ngaihthah avanga harsatna chu ramin a tuar mek a ni a ti bawk.

Thi turin mi 16 chungthu rem
Nimin khan Patna court chuan kum 1997 December ni 1 zana Dalit mi 58 Laxmanpur-a thahna thu buaiah mi 16 thi tura an chung thu remin, midang 10 dam chhunga tang turin a ti bawk.

Tualchhung

Serchhip-V VC tur thlang dawn
H Serchhip-V Village Council inthlanna chu tukin dar 7 atanga tlai dar 4 chhung hian Booth 2-ah Veng chhung mipui ten vote an thlak dawn ta a. Vote thlak zawh hnu hian chhiara puan nghal a ni ang. Tarlan tawh angin inthlanna hi Rulling party, eptu pawl leh Independent ten kil 3 atangin an chuh dawn a. Hetiangte hi candidate-te chu an ni :
MNF & ZNP :
1. B.Thlamuana, 2. C.Lalhmingfaka
3. J.Bualchhuakhnuna, 4. Lalthansanga

Congress :
1. R.Thanchuanga, 2. Lalzamlova Sailo
3. Haukhuma Jahau, 4. G.Vanlalngaia

Independent :
Robert Zosangliana
Lalneihthangi

Innei dawn
Vawiin chhun hian T.Zalianzela s/o T.Zasiama Serchhip Dinthar Veng leh Lalrinkimi d/o Sangkungi Serchhip AOC Vengte chu Baptist Kohhranah an innei dawn.

YMA zaipawl intihsiak
Nimin atang khan CMO’s Conference hall-ah Serchhip Sub-Hqrs. YMA Branch 27 te Zaipawl intih siak neih tan a ni a, nizan thleng khan chhunzawm a ni.

Lung phun dawn
Vawiin hian Pu Malsawma te unau Ramthlun Veng ami chuan boral ta, an pa Lalchungnunga hriatrengna lung an phun dawn.

Pu Hrangchungnunga vuiliam
Pathianni zan khan Pu H.Hrangchungunga (65) h/o Lalnunmawii Serchhip Zen mual Veng (Lower Chanmari) chu cancer avangin a boral a, lumen a nih hnu niminpiah khan vui liam a ni.


V&M thukhawm
Nimin khan Serchhip Dist. Vigilance & Monitoring committee chu an Chairman Pu CL.Ruala MP leh Co-Chairman Pu Lalhmingliana MP te hovin DC’s meeting room-ah an thukhawm a. Serchhip District chhunga sorkar laipui hmalakna hrang hrangte thlir letin, an sawiho a ni. He meeting ah hian MLA Pu K.Lian zuala bakah District Bawrhsap leh Officer thenkhat te an tel a ni.

April - June chhungin NLUP bul tan tum a ni

Serchhip 7th April 2010 : Nimina NLUP Apex Board meeting, Chief Minister Pu Lal Thanhawla hova thukhawm chuan, NLUP programme beihpui thlak thuai nise, kumin April - June thla chhungin a dawng tur mi 10,000 vel hnenah a hma thei ang bera bul tana, line departmentte pawhin a tul ang thawk nghal se an ti.
Meeting-ah hian agenda chi hrang hrang 15 chhawpchhuah niin, siam that ngai awmte siam tha in pawm an ni a. Chief Minister chuan NLUP chu tihkhawtlai rei anih loh nan training nei turte pawhin kar hnih - khat chhunga training buatsaih sak nise a ti.
Meeting chuan agenda chhawpchhuah, Village leh District level committee chu pawmin, baseline survey report pawh a pawm a. Implementing Boatd Secretary hnenah financial leh administrative power hlanchhawn remtih a ni bawk a. NLUP chu kan state plan piah lam central sorkar sum atanga kalpui anih dawn avangin central sorkar funding pattern anga kalpuia, NLUP Apex Board ah central sorkar aiawh tel ve leh State Level Technical Committee a line department tinah Central Ministries / Deptt aiawh dah te pawm a ni.
Heng bakah hian NLUP Implementation kaihhnawih, land use planning, district level plan leh capacity building te remtih a ni a. NLUP policy intervention chungchangte, investment policy leh kuthnathawktute hamthatna tur insurance chi hrang hrang te pawm a ni bawk a ni.

Lawrkhawm

Picnic cottage hawng
Lunglei Dist. park-a Tlawng hall leh picnic cottage chu nimin khan LAD Minister Pu PC.Lalthanliana’n a hawng. Minister chuan Mizoram in park tha a neih zing ami Lunglei park chu chhungkua, pawl, thalai leh naupang ten hun awl hman that nan an hman ngei a duh thu a sawi a. Hetiang park hi Thenzawlah leh hmundangah te siam turin sorkar a inbuatsaih mek a ni a ti. Minister-in a hawn takte hi Rs. nuai 13 senga sak an ni.

Thuampuiah bomb 2 a puak
Nizan hmasa khan Aizawl Thuampui Venga BRTF hmunpui Puskpak-a hmun 2 ah minute khat dan veleh bomb a puak a, thil tih chhiat lian tham emaw mihring thi leh hliam emaw an awm lo. Bomb 1 hi BRTF Chief Engineer quarters gate bulah tih puah a ni a, 1 dang chu Mandir awmna bul ah tihpuah a ni bawk. Heng bomb gelitine puakte hian tukverh darthla lang tih vel chauh a ti chhia a, motor tlan chung atanga paih nia hriat a ni.


World Health day
Vawiin hi khawvel pumhuap hriselna Day ‘World Health Day’ a ni a. Kumin thupui atan hian "Urbanisation and Health" tih hmangin, khawpui thang zelin kan hriselna a thalo zawnga a nghawng dan inhrilh hriat a ni ang.

Ramri hungah total bandh
Indo-Bangla Border Fencing Affected Families Resettlement Demand Committee chuan hun rei tak ramri hung Border Fencing-in an ram, huan leh leilet tihchhiatte zangnadawmna pek a tum tun thlenga an la pek loh avanga lung awilohna lantir nan nimin atang khan ramri hrul velah tiamchin awm lo total bandh an huaihawt.He Bandh neih chhung hian mipui lungawilote chuan ramri hung hna thawktu company contractor-te leh hnathawktute chu hnathawk thei lo turin an dang dawn a ni.

Naxal hovin CRPF 73 kaphlum
Chhatisgarh-a Dandewada District-ah nimin zing khan Naxal helhovin CRPF mi 73 an kaphlum a, midang tam tak an hliam bawk. He inkahna hi Security force ten helho dapchhuah beihpui an thlakna a thleng a ni a, Security force te hi helhote hian lo lambuni, an lo kap ta chiam mai a ni. CRPF hliam zingah hian dinhmun tha lo tak tak an awm avangin thi zat hi pung thei a ni.

Tualchhung

YMA zaipawl intihsiak dawn
Vawiin chawhnu dar 2 atang hian CMO’s Conference hall-ah Serchhip Sub-Hqrs. YMA Branch 27 te Zaipawl intih siak a ni dawn a. Heta tang hian Zaipawl ti tha zual 5 thlangchhuakin, Tunkar Ningani zan khian Top 5 te intihsiak lehin, final nghal a ni ang a. Hemi rual hian Sikserh do beihpui thla hawnna neih nghal a ni bawk ang.

VC thlang turin inpeih ta
Serchhip-V Village Council inthlanna chu naktuk hian neih a ni dawn ta a. Hemi atana inbuatsaihna pawh engkim peih fel a ni tawh bawk. He inthlanna hi Rulling party, eptu pawl leh Independent ten kil 3 atangin an chuh dawn a ni.

Planning & Finance Deptt. changtu hian mi dang pe ngam rawh se - Dr.R.Lalthangliana

Serchhip 6th April 2010 : Dr. R.Lalthangliana MLA chuan, Planning leh Finance Department hi a enkawl zo tur Minister hnenah Chief Minister hian pe ngam se a duh tih a sawi.
He thu hi nimina Mizoram Legislative Assembly budget session-ah sawiin, Dr.R.Lalthangliana chuan, sokar sum cheng vaibelchhe tam tak hman theih lova a liam ta chu tu mawh nge tih ngaihtuah a tul a, sorkar-in state planning board ropui taka a dinte chuan enge an thawh tih ngaihtuah tham a tling a. He thil hi a mawhphurtu lian ber chu Planning leh Finance changtu Chief Minister a nih avangin Planning leh Finance-te hi a enkawl zo tur Minister dang pe ngam se a duh tih a sawi a ni.
Sorkar sum hman lova liam ta chungchang hi house-a sawiho turin Pu Lalrinmawia Ralte chuan a pu lut a. He thil hi sorkar tana thil zahthlak tak a ni tih sawiin, mipui chanai sum tam tak hman theih lovin a liam chu a pawi tak zet a ni a ti.
Pu Lalduhawma pawhin, Minister an department chana Rs. vaibelchhe 1 chin chung lam laspe tirte chu an sum neih zat pawh hre chiang lo an nih avangin bang ngam se a duh tih a sawi a ni.
Finance changtu CM Pu Lal Thanhawla chuan hetianga sum hman lova liam ta hi a chhan hrang hrang a awm tih house chu hrilhin, plan sum chinfel tlai vangte, SBI lamin an dawn theih hun an tih tawi vangte, Deptt-in sanction dilna an thehluh tlai vangte, Finance leh planning lama tih khawtlai a awm vangte a ni thei a. Amaherawhchu a pawimawh ber chu engtin nge hetiang thil hi a thlen nawn tawh lohna tura kalphung kan thlak danglam ang tih hi a ni a ti a.Sum lapse ta hi a vaiin Rs. vbch.68, 95,61000 a ni a tih house a hrilh bawk.

Chhiat tawkte tanpui tur sum ruahman belh a ni

Tunhnaia rial leh thli avanga chhiatna tawkte chhawmdawlna atana sorkar-in Rs. nuai 69 a ruahman tawh belh chhahna ‘Calamity relief fund’ Rs. nuai 211 chu nimin khan ruahman belh a ni.
Kar kalta khan chhiatna tawkte chhawmdawlna tur Rs.nuai 69 chu hman nghal theihin Disaster Management & Rehabilition Department hnuaiah pekchhuah tawh a ni a. Amaherawhchu chhiatna tuartu zat an pun chhoh zel avang leh sum ruahman zat chuan a daih dawn loh avangin tun Inrinni khan Chief Secretary chuan meeting ko lehin, Rs. nuai 211 chu nimin khan ruahman fel lehnghal a ni.
Heng chhawmdawlna tur pawisate hi vawiin hian District tinah a tul anga hman nghal theih tura pekchhuah tum a ni a. Aizawl Dist. atan Rs. nuai 36, Lunglei, Serchhip leh Kolasib Dist. tan Rs. nuai 30 theuh, Saiha Dist. tan Rs. nuai 25, Mamit, Champhai leh Lawngtlai Dist. tan Rs. nuai 20 theuh ruahman a ni.
Tunhnaia chhiatna thlenga Disaster Management & Rehabilition Department-in a chhinchhiah danin In chhe zat hi 6807 a ni a, heng zinga In 644 chu luah zui tlak loh a ni.

Lawrkhawm

Malaria hluarna Dist.ah
Lawngtlai Dist.Vector borne diseases control society buatsaihin nimin khan Lawngtlaiah Malaria chungchang zirhona neih a ni a. Hetah hian India ram puma malaria hluarna District 13 thlanchhuah zingah Lawngtlai District a tel thu leh kum 2009 chhungin thisen endik mi 12160 zingah mi 1225 malaria an vei thu leh mi 8 malara in an thihpui thu tarlan a ni. He hun hi Dist.Bawrhsapin khuallian niin a hmanpui a ni.

Assembly session zo ta
Mizoram Legislative Assembly budget session chu an tih tur ang tih an tih zawh hnu nimin khan Speaker Pu R.Romawia tiam chin awm lovin a ti tawp ta. Tun tum Assembly ah hian zawhna star question 314 zingah zawhn 282 pawm a ni a. Zawhna 93 chu house ah chhan hman a ni a.Ziaka chhan chi Un-star question 99 zingah 92 pawm a ni a. Resolution 1 pass-in bill 7 pass a ni bawk.

TAC meeting neih a ni
Telecom Advisory Committee (TAC) meeting chu nimin khan Aizawlah neih a ni a. MP 2 - Pu C.L Ruala leh Pu Lalhmingliana ten an hmanpui. He Meeting ah hian BSNL hmalakna hrang hrang thlir ho a ni a, hmalak dan tur te sawi ho a ni bawk.

Pak. bomb puakah mi 25 thi
Nimin khan Pakistan-a thih chilh bomb puakah mi 25 an thi a, mi dang 100 chuang an hliam bawk. He pawi khawihna hi Pesawar khawpuia thleng niin, bomb hi tum 5 lai tih puah a ni tih Police-te chuan an sawi a. Pawi khawihtute hian Awami National Party meeting leh US consulate bakah Bazar lun lai chu an tum ber niin an sawi bawk.

Hmeichhe bill sawiho
Hmeichhiate hamthatna dan ‘Women reservation bill’ chung chang ngaihtuahin nimin khan Finance Minister Pranab Mukher jee kaihhruaina hnuaiah All party meeting neih a ni. Ram rorelna Ina hmeichhiate tana seat 33% hauh sakna bill hi House-a putluh a nih hnuah eptu member ten nasa takin an sawisel a. Tun thla ni 15-a budget session neih chhunzawm leh turah he bill hi Lok Sabha-ah pass a nih ngei theih nan sorkar chuan party hrang hrangte a sawipui hmasa ta a ni.

Chhiat tawkte chhawmdawlna ruahman

Ni 3.4.2010 (Inrinni) dar 10:30 a.m.- khan Chief Secretary Conference Room-ah Thlipui leh Ruahpui tuarte avanga chhawmdawlna chungchang sawiho a ni. DC 8 te hnen atanga Report dawn danin In chhia zawng zawng chu 4824 a ni a. Thingtlang khaw hrang hrang atanga In chhe zat report hi la dawn kim a ni lova. Dawn kim a nih chuan In 5000 aia tam a nih rin a ni.
Heng chhiat tuarte tanpuina atan hian Sorkar chuan Silpoulin 3700 DC 8 te hnenah pek a ni. Hetiangin -

DC. Aizawl - 800 DC. Serchhip - 400
DC. Mamit - 400 DC. Lawngtlai - 400
DC. Lunglei - 400 DC. Kolasib - 400
DC. Saiha - 500 DC. Champhai - 400


Silpoulin bakah hian chhiat tawkte tanpuina atan DC tinte hnenah hetiang hian sumfai pek a ni - DC, Aizawl - Rs. 17.00 lakhs, DC, Lunglei - Rs. 10.00 lakhs DC dang 6 te hnenah Rs. 7.00 lakhs theuh pek an ni. A vaiin Rs. 69.00 lakhs. Hemi bakah hian Rs. 211.00 lakhs chu karleh ah DC 8 te hnenah hian hetiang hian pek leh tura ruahman a ni.

DC. Aizawl- Rs. 36.00 lakhs DC, Lunglei - Rs. 30.00 lakhs
DC. Serchhip - Rs. 30.00 lakhs DC. Kolasib - Rs. 30.00 lakhs DC Saiha - Rs. 25.00 lakhs DC. Mamit - Rs. 20.00 lakhs
DC Lawngtlai - Rs. 20.00 lakhs DC.Champhai - Rs. 20.00 lakhs

Inkalpawhna kawng pawimawh te pawh leimin avanga ping te pawh a awm nia report dawn a ni a. Heng thingtlang a inkalpawhna leimin avanga kawng ping te hi NREGS sum a thenfai vat nise tih a ni. A tul chuan DC te pawh heng kawng ping clear tur hian khawl hmang tura hriattir an ni.

He meeting, Van Hela Pachuau, Chief Secretary hova neih ah hian Pu V. Sapchhunga, Director, Disaster Management & Rehabilitation Department, Pu C. Thanchhuma. DC, Aizawl. Pi M.Zohmingthangi, DC, Lunglei, Pu Hmingthanmawia, Additional DC, Aizawl. Pi Lalzarmawii. Joint Director, Disaster Management & Rehabilitation Department. Pi Thanhliri Pachuau, Deputy Secretary. Disaster Management & Rehabilitation Department te an tel a ni- source DIPR

Tualchhung

Good Friday urhsun takin
Khawvel hmun dangte rualin nimin Good Friday kha Serchhipah pawh Kohhran hrang hrang ten urhsun takin an hmang. Good Friday ah hian thupui thlan bik hmangin Pathian thuchah ngaihthlak a ni.

Chhawmdawlna pe mek
Nilai zana ruah leh thlipuiin Serchhip leh a chheh vela In leh lo a tih chhiat hrang hrangte thuam that hna chu thawh mek zel a ni a. Hetihlai hian sorkar thu neitute pawhin sorkar atanga chhawm dawlna a pek tur angte pawh a pe chhuak mek bawk.

Kawlphetha pek thuah mipui an lawm
Thli leh ruah thawkin khawpui chhunga electric ban leh hrui engemaw zat a ti chhe chunga kawlphetha rang taka mipui hnena an pek leh nghal mai theih thuah mipuiin P&E Deptt.-a thawktute hnenah lawmthu an sawi a ni.

Lawrkhawm

Ruah leh thli avanga chhiatna
Mizoram hmun thenkhatah ruah leh thlipui nimin thleng khan la thawk chhunzawmin,Champhai Dist.a Kelkang khua ah chenna In 25 vel a ti chhia a, Dilkawnah In 7 vel a chhe bawk. Hetihlai hian Zoram hmun dangah chuan In chhia thawmthat hnatlang neih a ni bawk.

Kolasib Dist. ah zial zu an tam ber
Mizoram pumah mi za zela 61.69% in meizial an zu thin a, District zawng zawngah Kolasib Dist. chu vaihlo hmang nasa ber niin, mi 75% in zial an zu a ni. Mizoram State Tobacco control society-in an zirchianna thar ber an tihchhuah ah he thu hi tarlan a ni a. Kolasib Dist. hi Champhai Dist. in dawtin, 70% in zial an zu a, Lunglei Dist. ah 66.66%, Serchhip leh Mamit Dist. ah 62.66%, Aizawl Dist. ah 55.55% in an zu a. Zial zu tlemna ber chu Lawngtlai niin 50% an ni.

Chhiarpui hna tan ta
Kum 2011 chhiarpui, State leh UT hrang hrang 35-a neih tur chu Ningani khan President Pi Pra tibha Patil-i’n a hawng. President chuan mipuite chu hnathawktute tawiawm turin a chah nghal a ni. He hnathawktu nuai 25 dawnin, ram chhunga state leh UT 35-a mipui tluklehdingawn khat chuangte bih chian leh chhinchhiah hna an thawk dawn a ni.

Sorkar hnathawk inthlahdahte chu an hriat vawng vawng tama enkawl an ngai a ni

Serchhip 2rd April 2010 : Chief Minister Pu Lal Thanhawla chuan sorkar hnathawk inthlahdahte an inthlahdah tawh loh nan sorkar hna an thawh chhung zawnga an hriat vawng vawng thama enkawl an ngai a ni a ti.
Mizoram Legislative Assembly budget session Ningani-a neihah he thu hi sorkar kumtawpa sum hman zawh hman loh engemaw zat a awm chungchang a sawinaah tarlangin, Chief Minister Pu Lal Thanhawla chuan, miretheite chanpual tur sum tam tak tute emaw inthlahdah leh zelthel vang emaw a hman theih lova a ral mai tur chu pawmzam mai chi a ni lova. Heng mite hi a tul a nih chuan sorkar hna an thawh chhung zawnga an hriat reng tawh tura thunun an ni ang tih house a hrilh a.
Chief Minister Pu Lal Thanhawla chuan, Department leh Tresuary-a thawkte sawiselin, hnathawktute hian dawhkan hnuaia engemaw inban khum zeuh a awm loh chuan hna an thawk tha duh ta lo em ni tih hi ngaihtuah a ngai ta a. Hman theih lova sum liam ta zingah hian tunlaia ruah leh rial avanga chhiatna tuartute tanpuina tura Rural Development Department kaltlanga rangva In chung leina tur pawh a tel a, hetiang hi thil awm dan ni mahse, sorkar chuan puk chawp pawhin a mamawhte tan rangva hi a pe tho dawn a ni a ti.

Ram chhungah Right to Education Act hman a ni ta

Ram chhunga naupang zawng zawngin zirna tha an neih theihna tur dan ‘Right to education act’ chu Ningani atang khan ram chhungah hman tan a ni.
He dan hian ram chhung naupang kum 6 atanga kum 14 inkarte chu a thlawna zirna an dawn vek theihna tur chanvo a siamsak a. Tun dinhmunah ram chhung hmun hrang hrangah naupang nuai 92 chuangin zirna an dawng lo a ni.
Right to Education Act hawnna inkhawma thusawitu Prime Minister Dr.Manmohan Singh chuan,zirna chu ram leh hnam hmasawnna bul a ni tih sawiin, state sorkar bakah zirtirtu, nu leh pa, ram chhung mipui zawng zawngte chu he dan hi a hlawhtlin theih nana tanrualpuiah a sawm a ni.

Lawrkhawm

Khawzawlah In a kang
Ningani khan Khawzawl Vengthara Pu PC. Lalparluaia In, assam type chu a chhung bungrua engmah chuh hman lovin a kangral vek. Kangmei chhuah lai hian In neitute hi an awm lova, ruahsur lai ni mah se a nasat avangin an thelh thei lova, kangmei hi electric kalsual vang nia sawi a ni.

Current man a thi
Electric Deptt. line men Pu Chanchinmawia(45) Phuaibuang khua, current-in a man avanga Aizawl Civil Hospital-a awm chu Ningani zing khan a thi. Pu Chanchinmawia hi an khuaa electric line siamtha tura bana a lawn lai, kar kalta Zirtawpni khan current-in a man a ni. Pu Chanchinmawia hian current a siam tur thu hi Saitual Station-ah a hriattir a, amaherawhchu, a siam zawh hma-in current hi line-ah kal tirin, a man ta a ni.Hemi chung changa mawhphurtu zawn chhuah a hrem a nih tur thu hi CM chuan House-ah a lo sawi tawh bawk.

Chhiarpui hna tan ta
Kum 2011 chhiarpui, State leh UT hrang hrang 35-a neih tur chu Ningani khan President Pi Pratibha Patil-i’n a hawng a. President chuan mipuite chu hnathawktute tawiawm turin a chah nghal a ni. He hnathawktu nuai 25 dawnin, ram chhunga state leh UT 35-a mipui tluklehdingawn khat chuangte bihchian leh chhinchhiah hna an thawk dawn a ni.

Ruah leh thlipui thawkin Mizoram a nuai Mi 2-in nunna an chan tawh

Serchhip 1st April 2010 : Nizan hmasaa ruah leh thlipui thawk leh chuan Mizoram hmun hrang hrangah chhiatna thlen belh lehin hemi avanga thi mi 2 an awm a, chenna In 100 chuang a nuai chhe vek bawk.
Nizan hmasa dar 10:30 vel atanga ruah leh thli thawk chuan Serchhip IOC Veng Quarry road-a cheng Pu TBC Zalawma(65) chu a mutna khum chawpin an kawm thlangah a vawrh chhuak a. Pu Zalawma hi Damdawi In panpui a nih hnu nimin zing lam dar 2 khan a hliam tuar lovin a thi a. A mutpui a tupa Lalhruai tluanga(7)pawh an kawm thlangah hian vawrh chhuak telin, hliam na vak lo a tuar a ni.
Pu Zalawma In hi assam type, In pangngai tak niin thli hian a chung bakah a bang thlang a la vek a. Nimin khan ruang hi vui liam a ni a. Dist. Bawrhsap chuan Pu Zalawma chhungte hnenah zangna dawmna Rs.50, 000 a hlan nghal a, bialtu MLA, Chief Minister-in tawrhpuina thu a rawn thawn pawh vuina inkhawmah chhiar chhuah a ni bawk.
Hei bakah hian sorkar chuan In chhe vekte chu Rs.10,000 pek a tiam bakah a chhiat dan azirin In thawm that ngaite chu Rs. 1000 atanga Rs. 2000 pek a tiam bawk.
Nizan hmasa ruah leh thli thawk hi Serchhip District chuan a tuar nasa hle a, hriat theih chinah chenna In 80 chu a nuai chhe vek a, In chhe nasa deuh 538 a awm bawk.
Serchhip khawpui chhung bikah hian chenna In 10 a chhe vek a. Chanmari Vengah In 5, New Serchhipah In 4, AOC leh P&E Vengah In 1 ve ve a chhe vek a. Hei bakah hian In chhe nasa leh chhe ve deuh thahnem tak a awm bawk.
Heng mimal chenna In chhe bakah hian District Treasury Office, Serchhip Civil Hospital building thenkhat leh Govt. JM High school-te pawh a chhe bawk a. Medical compound-a P&E Deptt.-in high mash an bun chu tlu-in, a thlanga Pu T.Rosiama In a delh a. He In luahtu Pi Zohmangaihi fapa Zolawmzuala(15) chuan hliam na vak lo a tuar bawk.
He eng sang tlu hian In hi a delh chhe nual a, nimin khan senghawi nghal a ni a. Veng thenkhatah electric ban tlu a awm bawk.
Serchhip District chhung khaw hrang hrang zingah Thenzawl khua in ruah leh thli thawk hi an tuar nasa hle a. Sorkar building, school leh Biak In tiamin In 35 a chhe vek a, In 130 a chung hawkte, a bang chhia te a awm a. Thenzawl bak khaw hrang hrangah In engemaw zat a chhe bawk.
Mamit Dist. W.Phailengah ruah leh thlipui thawk hian nimin zing khawvar hma khan a thiante mi 3 nen thlama riak Vanropuia(32) mi chu thing tlu-in a delhhlum a, a ruang hi nimin vek khan vuilian a ni. Mamit ah hian In 12 a nuai chhe vek a, In 55 a chhe nasa hle a, chhe ve deuh In 63 a awm bawk.
Tun tuma ruah leh thli thawk hi Aizawl Dist.-in tuar na berin In chhia zawng zawng chu 1135 tlingin, heng zinga In 304 te chu luah zui tlak loh niin, chhe nasa leh chhe ve deuh thahnem tak a awm bawk