Tualchhung

NH fur zawhah siam dawn
PWD chuan fur ruahtui tlak zawh ve leh National Highway siamthat hna an tan dawn a. NH siamthat nan hian Ministry of road transport & highway chuan pawisa a pe chhuak tawh a. An ruahman dan chuan Aizawl - Thingsul inkar Rs. nuai 709.24 sengin kawng siam hna an thawk. Thing sul leh Serchhip inkarah Rs. nuai 800.81, Serchhip leh Hnahthial inkar Rs.nuai 143.3 leh Hnahthial - Hrangchalkawn inkar Rs. nuai 660.28 a thawh tur a ni.


Beihrual zanin atangin
Nimin kha Ramthar Ni niin, Kohhran tam zawk chuan nizan khan Pathian biak Inkhawmin an hmang.Kum 1918 September atanga lo hman tan tawh ‘Beihrual thla’ chu kan lo chuangkai leh ta a. Zanin atang hian Kohhran hrang hrang ten thupui thlan bik hmangin hun an hmang tan dawn a ni.

Rulngan in Pu Vanlalnghaka a chukhlum

Nizan Aug. ni 30 zan dar 7 vel khan Serchhip Dinthar Vengsang a mi Pu Vanlalnghaka(41) chu Tuikum lui kamah Rulngan ni ngeia hriatin a chukhlum. Pu Vanlalnghaka hi zan len den tumin tlai khawthim hma deuhvah a thawkchhuak a, ruahsur in Tuikum lui a tihlen nasat deuh avangin haw mai tumin a insingsa a, Tuikum lui kama Pu Zosiama leilet enkawltu Paliana(Pawih) riahna thlamah chanchinthar reilote an ngaithla dun a, chumi hnu ah a riahna thlam - Dawngzawl rama Pu T.Rosiama thlam pan turin a chhuak a, thui pawh a kal hma in Rulngan chuan a ke dinglam kawn sir deuhvah chukin a na ti lutuk chu a te chiam a, Paliana chu a thawm hria in a tlanchhuak a, a bawihsawm nghal a, a thim em avangin Pu Vanlalnghaka chuktu Rul pawh chu a hmu hman ta lo a ni.
Paliana chuan Pu Vanlalnghaka chu a thlam chhungah a kuahlut a, tihngaihna vak a hriat loh avangin thei leh thei lovin Tuikum lui kama an thlam atang chuan Serchhip Dawngzawl a Pu T.Rosiama thlam lam an pan dun a, thlam an thlen hian zan dar 10 vel a ri tawh a ni. Tichuan, Paliana tihngaihna hre lo chuan a thlang lawk Keitum khua ah motor hman tur a zu zawng a, zan a lo rei tawh si nen tumah an lo tho duh lo niin Paliana chuan kan palai a hrilh a, Health Worker pakhat Madailova an tih chu a kaitho thei hram a, mahse a ni pawh hian a Ha nat chhuanlamin a lo tlawmngai theilo niin Paliana chuan a sawi a, hei hian Serchhip Pa tam tak thin a tirim hle.
Tichuan, beidawngin Dawngzawl lam chu Paliana chuan a pan leh ta a, tukin zing dar dar 1 vel khan Pu Vanlalnghaka chuan a hliam tuar lovin a chatthla ta niin Paliana chuan kan palai a hrilh. Motor veivak han phar din mai tur a awm si lova, tichuan Dawngzawl a lo riak ve Vai ho chu Paliana chuan a kaitho ta ringawt a, Vai ho in an Phone number hriat chhun LAD JE Pu Sailova chu zing dar 3 velah an rawn bepawp a, Pu Sailova hian midang punin Dawngzawl lam hi an pan nghal a, mahse Sailiamkawn ah lei a lo min avangin tukin zing zing dar 7 velah Serchhip Hospital an rawn thlenpui hman hram a ni.
Pu Vanlalnghaka hi a thih hnu pawh hian rei tak a la lum niin Paliana chuan a sawi a, mahse kan palaiin tukin zing dar 7:00am vela a ruang, Hospital a a han hmuh chuan a lo dai vek tawh a, Rulngan in a chukna hmuamhma pawh tehin Centimetre 1 a inhlatin Rul ngho luhna chu a lo thi ser ser a, he a chukna hmuamhma hi a chuk tirh ata a chahthlak thlengin a thi nasa hle niin Paliana chuan a sawi.
Pu Vanlalnghaka ruang hi Serchhip Hospital a Doctor leh Police ten an endik hnu ah tukin zing dar 8:30am khan an chenna In Dinthar Vengsang lamah lakchhoh a ni a, chawhnu dar 1:00pm khan vuiliam nghal a ni. Pu Vanlalnghaka hian a nupui leh a fa pakhat a kalsan a, lainattu an thahnem hle.
Pu Vanlalnghaka chuktu Rul hi midangin a tak hmu zui chiah lo mahse a Tur hnathawhdan en hian Rulngan ngei niin Doctor leh mi thil chinchang hre deuhte chuan an sawi a, tin, Pu Vanlalnghaka hian a boral hma khan a mah chuktu hi Rul dum tle zuar mai a ni tih a sawi niin a mah dawmhlumtu Paliana chuan a sawi bawk.
Rulngan humhalh tuma theihtawpa hma latu Thenzawl DFO Pu C.Lalbiaka chu vawiin khan kan palaiin bepawpin a bial chhunga Rulngan chukhlum an awm chungchangah enganginnge hmalak a tum tih a zawt a, Pu C.Lalbiaka chuan Serchhip Dist. Wildlife Warden Pu Zonuntluanga hnenah Rulngan chukhlum chungchang a hnena report pe tura a hriattir tawh thu leh chumi ang chuan Zangnadawmna pek an nih theihnan theihtawpa hmalak a nih tur thu a sawi. - source Serchhip Times

Tualchhung

School naupang invenna pe
Presbyterian Hospital Durtlanga thawktute chuan nimin khan Serchhipa Presbyterian School zirlaite hnenah man tlawm zawkin natna hrang hrang laka invenna vaccine an pe.

Serchhip Dist. atanga sipai zat
December 2009 atanga May 2010 thleng sipai lak runpui neiha Mizoram atangin mi 229 lak an ni a, a hnuai ami ang hi District hrang hranga sipai lak dan a ni. Aizawl District atangin mi 68 lak an ni a, Champhai District 32, Kolasib District 9, Lawngtlai District 6, Lunglei Dist. 56, Mamit District 5, Saiha District 21 leh Serchhip District 32 an ni.

Rul-in chu-hlum
Serchhip Dinthar Venga cheng Pu Vana h/o Thiami chu a ram kalna Dawngzawl ramah rul-in a chuk a, nizan khan a thi. Chanchin kimchang zawk kan ngaichang a. Rawn tarlan belh a ni ang.

Tualchhung

Pu Kawlbela vuiliam
Inrinni chawhma dar 11 khan Pu Kawlbela(73) b/o R.Thanghnuni Ser chhip Darnam Veng chu Thluaka thisen zam chat avangin a boral a, lumen a nih hnu nimin Pathianni khan vuiliam a ni.

Gas booking tih theih
MIZOFED LPG Serchhip Manager Pi Hmarsangi hnen atanga thu kan dawn danin Gas la nei lo te tan an Office AOC Vengah tun August thla chhung hian Gas booking tih theih a ni e.

Police laka lungawilohna lantirin Zamuang mipuiin kawng an zawh

Zamuang tlangval pakhat WT set ru-a puh, Zawlnuam Police ten an dawpnaa kut an thlak nia sawi, duh loh lantirnan Zamuang mipui ten Inrinni khan Zawlnuamah kawng an zawh.
Zamuang VC-te leh Zawlnuam Magistrate leh Kawrthah SDPO-te inbiakna angin he thil thleng chungchang hi chhui zui a ni ang a,thil ti dik lo tu nia puh Zawlnuam OC-in an kuta a awm laia Zamuang tlangval Laldawngliana kut a thlak nia sawi chungchangah thiamloh chang an awm chuan hremna let a ni ang an ti. Zamuang tlangval hi Police kut atanga chhuakin, damdawi Inah enkawl a ni a. WT set bo pawh hi khaw kar kawngah mi fehin an chhar a ni.

NLUP chhawmdawlna sum hmang dik lote chu sorkar-in a dim dawn lo - Chief Minister

Serchhip 30th Aug. 2010 : Chief Minister Pu Lal Thanhawla chuan, NLUP chhawmdawlna sum dawn hmang diklo te chu sorkar in a dim dawn lo a ti.
Nihnih awh Serchhip District tana NLUP Workshop Serchhip DC Conference Hall-a Inrinnia neih chhunzawm a hmanpuinaah he thu hi sawiin, Chief Minister Pu Lal Thanhawla chuan, NLUP sem nghakhlela dawn tum ringawtna chu kan sim a tul a ni a ti a. NLUP ti hlawhtling tur chuan taimak leh hrisel a ngai a, hnathawk tak tak tur pawhin hrisel a ngai a, zuk leh hmuam laka invawn thianghlim a pawimawh thute a tarlang a. NLUP chu keimahni tana hlawkna tur awm lo nangmahni hlawkna tur a ni tiin tih takzetna nen thawka din chhuahpui tum theuh turin a chah a. Ti tak tak peih loa NLUP chhawmdawlna sum dawn hmang diklo te chu sorkar in a dim dawn loh thu sawiin, fimkhur taka kalpui turin kalkhawm te chu a fuih bawk.
Pu Hawla chuan, chhungkua 12000 tana sum vaibelchhia 2500 chuang NLUP tana dah chu tam tham tak a ni tiin, kan hlawhtlinpui lo a nih ngat chuan a zahthlak khawp ang a, India pum hmuhah Kristian state Mizoram chu a mualpho dawn a ni a ti bawk.
He Workshop District Bawrhsap Pu H. Darzika kaihhruaiah hian NLUP Implementing Board Vice Chairman Pu P.L. Thanga’n sawihawnna hun a hmang bawk.
Workshop-ah hian Serchhip District huamchhung khaw hrang hranga Village Level Committee te kohkhawm an ni a. Line Department 8 Soil & Water Conservation, Environment & Forest, Horticulture, Agriculture, Industries, AH & Vety, Fisheries leh Sericulture Department a Nodal Officer ten power point hmangin an Department hnuaia Trade hrang hrang thlan theih tur an kalpui dan tur te, a thawh dan hmang leh sum dawn theih ruahman te leh lo neitute hriat tur tul leh pawimawhte an sawifiah a. Kalkhawmte atangin an hriat chian loh laite inzawtfiahin sawihona hun tha tak an hmang tlang a ni.

Tualchhung

PYKKA sports zo
Serchhip Block Level PYKKA sports Inrinni khan zawh fel a ni ta a, a pumpui ah Thenzawl VC champion, Serchhip-IV 2-na an ni a, Bungtlang VC 3-na an ni. Football-ah Serchhip-III chuan 1-0 Bungtlang hnehin an champion a, mipa volleyball-ah Bungtlang, hmeichhia ah Thenzawlte an champion a ni.
PYKKA Sports District level hi thla thar September ni 8 atang khian neih leh tura ruahman a ni.

Hmangaihna In hawng
Salvation Army Hmangaihna In hawng
The Salvation Army Territorial Commander Col. Samuel Charan chuan nimin Aug ni 22 chawhnu khan ruihhlo ngai mi 30 enkawl theihna 'Hmangaihna In' an Hqrs building hlui Serchhip Towna Chhiahtlang chhim vengah a hawng. Hawnna inkhawm hi Chief Secretary Col. Lal ngaihawmi'n a kaihruai a. PCR H/S hmun hlui ah an building pawh 'Tar dahna' Old age home-ah siam in hawn leh thuai an tum bawk. Hetianga an tih chhan hi Midland Division chu central south Division tia Aizawl lama suanthla vek a, Aizawla atanga rawn enkawl tawh tur a nih tak vang a ni. Hmangaihna in ah hian Rs 250/- admission fee pein in admit theih a ni ang.


Inentir theih loh
Thawktu ten rokhawlhna an neih avangin Serchhip Civil Hospital OPD ah vawiin atanga Nilaini thleng a inentir theih dawn lova, amaherawhchu emer gency thil erawh an en thei thung ang.


YMA quiz kalzel
Sub-Hqrs.YMA Serchhip hnuaia Branch YMA-te inelna YMA quiz 2010 chu tluang taka neih mek a ni.

MZP-in lungawilohna lantirin advertisement an hal

MZP chuan Ministry of Home affairs-in Indo-Tibetan Border Police Force-a lut tur constable leh General duty a lakna turah state dang zawng zawng leh UT ten quota an neih vek laia Mizoramin a neih ve loh chungchanga lungawilohna lantir nan Inrinni khan he hna lakna tur chhuahna advertisement an hal.
Aizawla an lungawilohna lantirnaah hian MZP President Pu VL.Kroshnehzova chuan thu sawiin, India sorkar-in Mizote a thlauh thlak zia a ti lang a ni a ti a. He thil hian Mizo thalaite rilru a ti na tak zet a ni a ti bawk.
Hna ruak dil theih thu hi thla hlui ni 26 khan tihchhuah a ni a, siam that a nih theih nan President, Governor, Home Affairs Minister leh Mizoram MP 2 te hnenah MZP hian lehkha a thawn tawh niin MZP thuchhuah chuan a tarlang a ni.

Tualchhung

Pu Kharliana a boral
Nizan dar 6 vel khan Pu Kharliana (83) f/o Lalchhanhima Serchhip Chhim Veng chu asthma avangin a boral a, lumen a nih hnu vawiin hian Chhim Veng thlan mualah vui a ni ang.

PYKKA sport kal zel
Block level PYKKA sport neih mek chu tluang taka kalpui zel a ni a, inelna thenkhat chu zo tawhin, tunkar chhung hian zawh fel hman tum a ni.

NYK thawk tur la fel
Serchhip District tan Nehru Yuva Kendra voluntier hna diltute interview chu nimin khan DC’s office-ah neih a ni a, mi 6 lak an ni.

Tualchhung

Thisen unit 54 pe
Nimin khan MZP Platinum Jubilee lawmna chikhat atan MZP Hqrs. Serchhip leh Govt. Serchhip College NSS Unit te chuan Serchhip Hospital ah a duh apiang ten a thlawna an hman turin thisen Unit 54 an pe. Thisen petu te hi mipa 37 leh hmeichhia 17 an ni.

I&PR Office hawng dawn hnai ?
Serchhip District Information & Public Relation Department Office building, DC Office bul ami chu tun thla ni 27 khian hawn tuma inbuatsaih mek a ni

Mamit-ah hnamdang unau an inthat Police ten tualthattu an man nghal

Serchhip 19th Aug. 2010 : Nimin zing khan Mamit-ah Ziap Uddin ruang chhar a ni a, postmortem a nih hnu nimin vek khan an khua Karinganj lamah lak nghal a ni.
Mamit Bazar venga Pu Rokima Inluahtu; Hellal Uddin(20) leh Ziap Uddin (25) te unau niin, Okhamia (L) fapa, Kudragandhi, Karimganj Dist. Assam an ni a. Mamit-ah hian cement Mistiri hna thawkin, a u zawk Ziap Uddin hi Mistiri niin, a nau Hellal Uddin hi a helper a ni.
Police-te hnena a sawi danin, Hellal Uddin hian a u Ziap Uddin chu nizan hmasa dar 1 leh dar 2 inkar vel khan a that tih sawiin, a thahna hmanrua hi thingzai char-char bung leh cubit lung a ni a, Ziap Uddin biang dinglam hi a dam a, a khabe ah inches hnih vel a kak a, a ruh a tliak bawk a, a mitko vei lam hmun 2 ah inches thum velin a kak a, a ka, a beng leh hnarah te thisen a chhuak a ni.
Hetianga a pianpui unaupa a thah nachhan hi an chhungkaw thil niin a u chuan phone hmanga a nu a biaknaah a rawn haw hunah ka that ang che a tih avanga thinrimin, a u chu kut a thlak ta niin Police hnenah a inpuang. Hellal Uddin hian a u ruang hi satha-ip a khuhin, an kawm thlang ah a paih a, naupang infiam-in ruang hi an hmuchhuak a ni.

Tualchhung

World Bank kawng a ping
Aizawl Ngaizel, Lalnghakliana Petrol pump piah lawka kopang lung tla-in, Aizawl - Sialsuk World Bank kawngpui chu nimin tlai khan a hnawhping a, vawiin chawhnu lam hian thenfai theih beisei a ni.


Jubilee pual thisen pek tum
MZP Hqrs.Serchhip leh Govt. Serchhip College NSS tangkawp chuan MZP Platinum Jubilee pualin vawiin hian a mamawh apiangte hman turin thisen an pe dawn.


YMA Quiz tan ta
Sub-Hqrs. YMA Serchhip thuthmun YMA branch-te puala inelna YMA Quiz 2010 chu nizan atang khan nei tanin, TTVision chuan live-in a pe chhuak a ni. He competition-ah hian YMA Branch 18 telin, ruahman ang chuan September ni 3 zanah final a ni ang.

Chief Minister hovin State Level Bankers meeting

Serchhip 18th Aug. 2010 : Nimin khan Chief Minister Pu Lal Thanhawla hovin CM Conference Hall-ah Mizoram State Level Bankers' Committee an thu khawm a, sorkar nena tangkawpa Mizoram hmasawn nana an thawh theih dan tur kawng hrang hrangte an sawiho.
Chief Minister chuan Mizoram-a bank awmte chu sorkar an tawi awmna ah lawmthu a sawi a. Sorkar leh Bank-te chu an hnathawh dan hmang inang lo mah se mipui tana thawk an nih ve ve avanga tha taka thawk hova, mipui hamthatna tura hmalakpuiah a sawm a. Mizoram mipui tam takin bank chhawr tur an la neih loh avanga harsatna chi hrang hrang an tawh thin chu hriatpuia, mipui chhawr tangkai theih tura ruahmanna te a remchan anga duang thin turin Bank hotute chu a ngen bawk.
Self-help Group leh midangte hnena loan pek tihkhawtlai a ni thin chuan harsatna a thlen thin thu sawiin, Chief Minister chuan sorkar ruahmanna te ngaihpawimawh chu Bank te mawhphurhna a nih hre reng tura ngenin department kaihhnawih leh bank te chu inpawh taka hma la tlang turin a chah a. Sorkar-in reilote-a NLUP programme a kalpui tur atan bank services mamawh a nih tur thu sawiin, mirethei leh harsa tak tak te tana hma la chhunzawm zel turin bank hotu kalkhawmte chu a chah bawk.
Banker's Meeting ah hian Bank hrang hrangte hnathawh dan leh dinhmunte thlirho a ni a, Mizoram chhunga mihring 2000 aia tam awmna khua bank la nei lo Phuaibuang, Sesawng, Baktawng, Khawlailung, Mimbung, Biate, Farkawn, Hnahlan, Tuichawng, N.Thingdawl, Hortoki, Kawrtethaw veng, Rajivnagar leh Silsuri te zinga khaw 7 te chu kum hnihkhat chhunga branch an neih theih nana hma la tu turte ruat an ni bawk.
Banker's Meeting ah hian Mizoram hmun hrang hranga Bank hotu te leh Guwahati atangin Reserve Bank of India (RBI) hotute an kal tha hle a, Mizoram Sorkar atangin Chief Secretary leh department kaihhnawih hotute an kal bawk a ni.

Lawrkhawm

Suangpuilawn tlangdung ping
Mizoram sorkar-in Taxi te Group 3 ah thena intlan chhawk tura a tih chungchangah ZTDA ten High Court-a Mizoram sorkar an khinna chu Division Bench ah ngaihtuah nawn leh anih hnuin nimin Mizoram sorkar chuan thiam a chang a ni.

Mawhphurtu inruat
Nimin khan Disaster Manage ment & Rehabilitation Secretary Pu Rohmingliana room-ah Mizo rama chhiatrupna thlen thulha thuthar lakhawmtute hnena mipui hriat tur tul puanchhuah zung zung theih dan tur ruahmanna an sawi hova. Hemi kawnga mawhphur turin I&PR Department chu an ruat a. Anni hian PIB kaltlangin Sorkar laipuia hriattur tul angte pawh an pe bawk ang. District Level ah pawh District Information & Public Relations Officer hovin hma an la ang tiin thu tlukna an siam a ni.


Fimkhur turin chah
RBI chuan Mizoram mipuite chu an account midangte hriattir lo leh an ATM card hman tir lo turin an ngen. Nimin tlaia State Guest House-a thutharla khawmtute an kawmnaah RBI hotute chuan tunlai hian hetiang lama inbumna a awm avangin fimkhur turin mipui an chah a ni.

Tuilian tuar chhawmdawlna
Prime Minister Dr.Manmohan Singh chuan nimin khan J&K khawpui pakhat Leh tuilian tuarte chhawmdawl nan Prime Minister National relief fund atangin Rs. vaibelchhe 125 pek a nih tur thu a puang. Prime Minister hian nimin khan tuilian tawrhna hmun Leh khawpui hi tlawhin, In chhiate chu thla hnih leh a chanve chhunga sak that sak vek an ni ang tiin, chhiat tawkte chu a thlamuan a ni.

Thlawhna chesualah mi 1 thi
Colombia-a St.Andries thliarkar ah passenger 131 phurtu thlawhna, thli tleh karah loh theih lova tumin, Airport-a a tum kawnga a tlan laiin, thlawhna chu hmun thumah a bung a. He thil thlengah hian mi 1 chauh thiin, hei hi thil mak a tling niin chhanchhuaktute chuan sawi. He thlawhna hi Tekin a deng nia hriat a ni a, thil awmzia chhui mek a ni.

Tualchhung

KVK-ah training dawn
Ni 4 chhung awh tur, Farmer Training chu vawiin atang hian KVK North Vanlai phaiah neih tan a ni dawn a. District Bawrhsap Pu H.Darzika’n khuallian niin a hmanpui ang. He hunah hian Serchhip Block chhunga loneitu thlanchhuah mi 20 ten training an nei dawn a ni.


Student’s Science Seminar
Vawiin chawhma dar 10:30 hian Ser chhip Town hall-ah Serchhip Dist. Student’s Science Seminar 2010 neih a ni dawn.


Polythene hmang tawh lo
Serchhip Bazar Welfare Association chauan an lo puanzar lawk tawh angin an thil hralhchhuah funna atana polythene hman thin chu hriselna atan a tha lo tih hria-in an hmang ta lo.


PYKKA sports vawiin atangin
Serchhip Block level PYKKA sports chu vawiin hian Khawtetlang field-ah hawnna programme neih a ni dawn a. Infiamna hi hmun hrang hrangah neih chhunzawm nghal a ni ang.

Lawrkhawm

Suangpuilawn tlangdung ping
Suangpuilawn tlangdung pawhna kawngpui chu nimin a ni 7-na thleng khan leimin avangin a la ping a.Helai tlangdungah hian chhiar theih chinah hmun 150 velah leimin a awm nia sawi a ni.

HIV hrik kai thar mi 125
Thla hlui khan HIV hrik pai mi 125 hmuhchhuah belh a ni a. Heng hmuhchhuah belhte nen hian a vaiin Mizorama HIV hrik pai mi 4846 an awm a ni. Mizoram State AIDS Control Society chhinchhiah danin thla hlui khan mi 4169 thisen test a ni a, heng zinga mi 86 chu mipat hmeichhiatna atanga kai an ni a.Ruihhlo hmansual avanga kai mi 35 awmin, nu-in a nau pai a kaichhawn mi 4 an awm bawk.

Training Centre din dawn
Geological servey of India chuan Mizoramah Field training centre siam an remti a, hemi atana sum mamawh zawng zawng leh zirtirtu pawh a tum dawn a, hei hi hmar chhak biala Training centre 2-na tur a ni ang a. Centre hmun tur atana mamawh ram hectre 3 vel chu Industries Deptt. ram, Central Jail bulah en mek a ni.

ADA dan siamthat rel
Nimin khan The Aizawl Development Authority chu Chairman leh Chief Minister Pu Lal Thanhawla hovin Meeting vawi 11-na an nei a, in sak thua mipui ten harsatna an tawh hrang hrangte sutkian nan leh an awlsam zawk nan dan dinglai ADA Building Regulations, 2008 siamthat dan turte an rel ho a ni.

Hel 2 kaphlum
Nimin zing khan Assam-a Gorpara Railway signal point-ah Police ten ULFA hel pawl ami 2 kaphlumin, ralthuam leh lehkha pawimawh an kut atangin an la.

Chief Minister-in RTI kan hmang tangkai lova a sawi hi kan pawm lo hulhual

Serchhip 17th Aug. 2010 : Prism chuan Chief Minister Lal Thanhawla'n Independence Day-a RTI kanhmang tangkai lova a sawi kha kan pawm lo hul hual a. Vigilance Commission an din loh chhan nia a sawi kha pawm har kan ti hle, an ti.
Thuchhuah an siamah PRISM chuan, RTI hi Mizoramah kan hmang tangkai hle a. Pawl leh mimal hrang hrangin sorkar document tam tak la chhuakin hemi hmang hian corruption pawh kan haichhuak hnem ta hle a. Kan pawl ringawt hian information 254 la chhuak tawhin heng behchhan hian PIL 8 kan file tawh a, FIR 29 kan theh lut tawh a, khaw 9-ah Social Audit kan buatsaih tawh a, thil dik lo siamthat anih theihnan thuneitu hrang hrang hnenah rawtna 30 chuang kan thlen tawh a, booklet hriat hlawh tak tak 8 kan chhuah tawh a. Heng avang hian mi engemaw zatin corruption thubuai an awrh tawh a, pawisa kawngbo tawh cheng nuai tam tak sorkarin a hmuh let tawh mai bakah pawisa kawngbo tur cheng vaibelchhe eng engemaw zat kawng bo lovin a awm tawh a.
Mizorama RTI hman tangkai tawk loh chhan hi sorkar vang a ni a. RTI tangkaina ber tur Section 4 of RTI Act sorkarin a tihlawhtling duh lo leh mipui hnena awareness campaign a nei tha duh lo hi a pawi ber zawk chu a ni a. Mipuiin kan hman duh laia harsatna siam ching official te lakah hian sorkarin mipui a hum a tul tak meuh a ni.
Congress Party in Election Manifesto-a pakhatnaa an ziah Vigilance Commission an din loh tur thu kan Chief Minister-in a sawi mai hi hriatthiam har kan tiin hetianga mipui min bum hi a pawi kan ti a. Engineer rual criminal case awrh tur tih zuzi leh tak mai te, criminal case pahnih awrh tawh Officer suspend loh a dah reng te, an rin tawk ACB in an chhui chhuah tawh prosecution sanction awm lova dah mai mai ang te hi an tih zawm zel theihnan Vigilance Commission hi an din ngam lo a nih zawk Prism chuan kan ring a.
Sorkar hi inlamlet se, kan ram tichhetu bulpui corruption tihtlem anih theihnan Chief Information Commissioner ruatin Section 4 of RTI Act hi anih dan tur dik takin tihlawhtling se; corruption haichhuah mawh phurtu in Dan hremna a tawh ngei theihnan mipui hnena an tiam tawh Vigilance Commission din thuai se kan duh tak zet a ni tiin thuchhuah an siam a ni.

Hmun dang rualin Independence Day Serchhipah ropui taka hman a ni

Serchhip 16th Aug. 2010 : India Independence Day vawi 63-na chu nimin khan ram chhung hmun dangte rualin Serchhipah pawh ropui taka hman a ni.
Independence Day lawmna Khawtetlang Field-a neihah hian khuallian Food Civil Supplies & Consumers Affairs Minister Pu H.Rohluna chuan hnam puanzar pawt pharh-in, Parade contingent 11-te chibai a chhanglet a. Minister Pu H.Rohluna chuan, kan ram zalenna sualtu zawng zawngte he Ni ah hian kan hre reng a, kan chhuang a ni a ti.
Pu Rohluna chuan sorkar hmalakna leh hmachhawp hrang hrang tarlangin, mipuiin nghakhlel taka an thlir NLUP chu September thla atangin tanpuina pek tan tum a ni a, hemi atan hian sorkar laipui chuan Rs. vaibelchhe 2873.13 min tih fel sak tawh a ni a ti a. Buh leh thlai kan thar chhuah tam zawk theih nan sorkar-in nasa taka tan lain, loneitute mamawh hrang hrang buatsaihin hma a la mek a. Man tlawm zawka mipui ten buhfai ei tur an lei theih nan FCI atangin thla tin buhfai Qtls. 80,000 lei chhuakin, a lei chhuahna aia tlem zawkin mipuiah a hralhchhuak a, hetah hian sorkar chuan thla tin Rs. vaibelchhe 9.60 a seng thin a ni a ti a. Mizoram State Health Care Scheme pawh September thla atangin hman tan tum a ni a, BPL-te tan sorkar-in a thlawnin a tih sak dawn a ni a ti bawk.
Serchhip leh Serchhip Dist. hmasawnna tur leh hmachhawpte tarlangin, Minister Pu Rohluna chuan, Serchhipah Inspector of Legal Metrology a rawn dah thar a. Serchhipah Stadium complex buatsaih a ni a, Serchhip Field No.I ah Auditorium sak hna chu fur ruahtui han hunah tan a ni ang a ti a. Hei bakah hian Serchhip Dist.Jail chu hawn thuai a nih theih nan hmalak mek nia sawiin, Thenzawlah khum 50 awm theihna Ayush Hospital din a ni dawn a. Serchhip Dist. chhungah College of Nursing & Mid Wifery din a ni bawk ang a. PWD National Highway Circle leh Division Office Serchhipah hawn thuai a ni ang a ti.
Independence Day lawmna inkhawm hi zing dar 7:30 ah neih ni mah se, sorkar hnathawk leh mipui thahnem tak an tel a ni.

Tualchhung

Pi Zairemi a boral
Nimin chawhma dar 11:25 khan Pi C.Zairemthangi (75) m/o Lalnuntluanga Serchhip Dinthar Veng chu cancer avangin a boral a, lumen a nih hnu vawiin hian vui a ni ang.


PYKKA sports inbuatsaih
Karleh Thawhlehni atanga Block level PYKKA sports neih tur thlirin nimin khan Organising committee chu BDO Pu Malsawmtluanga hovin an thukhawm. Hetihlai hian VC hrang hrang hnuaia infiammite chu he infiamna atan hian an inbuatsaih ngawrh hle.


Taxi, etc. stand siam belh
Superintendent of Police, Pu John Zothansanga chuan Serchhip Taxi temporary stand atan Serchhip Bazar Venga Pu R.Sipaithanga kawt -metre 12 a zau chu a ruahman thar a, hei hi nimin atang khan hmang tanin, thu leh awm hma chu hman a ni ang a ti a. Hei bakah hian Bazar Bus / Passenger Bus stand atan Tuikhuah Venga Pu PC.Lalhma chhuana kawm chhak kawngpui kam chu a ruahman a. Veng hrang hranga eirawngbawlna gas semna hmun tur reserve a siam bawk.

Tualchhung

Pvt. Higher Secondary School
Serchhipa Private Higher Secondary School din dan tur chungchang relin nimin khan RMSA Office-ah DEO Pu C.Zolawma hovin meeting neih a ni. He meeting-ah hian Managing committee din a ni a, Chairman ah PC.Vanlalsawma Venglai, Vice Chairman Pu T.Rosiama Venglai leh Pu K.Remthanga Chhiahtlang, Secretary -ah Pu RK.Sanghmingliana Ramthlung Veng, Asst.Secy. ah Pu Lalzuiliana Bazar hnuai, Treasurer-ah Pu K.Chawiliana Bazar leh Fin.Secy.ah Pu C.Lalthanzira te ruat niin, Adviser atan Pu Lal Thanhawla CM leh bialtu MLA bakah Pu H.Darzika DC te ruat an ni bawk. Meeting hian he Higher Secondary school thar din tur hi nakum atanga tan thei tura hmalak nise an ti a ni.

Minister Rohluna hovin I-Day
Tun Pathiannia Independence Day lo thleng tur, Serchhipa lawmna chu Minister Pu H.Rohluna hova hman a ni dawn. I-Day inbuatsaihna thlir hian nimin khan Addl.DC Pu Lalfakzuala hovin DC’s meeting room-ah meeting neih a ni a. March-pass rehersal vawiin atanga neih tur chu Khawtetlang field-ah neih nise tiin bak ruahmanna lo siam tawh chu a pangngaia kalpui nise an ti a ni.

Kawngpui tha zawk an neih theih nan TRAC leh hnathawktu Contractor-in inremna an siam

Serchhip 11th Aug. 2010 : Nimin khan VC leh Tuichangrala tlawmngai pawl hrang hrangte telna ‘Tuichangral road action committee’ chuan Tuichang ral kawng siam mek a tha tawk lo tiin, tha zawka siam turin contractor inremna an siampui.
Tuichangral road action committee-te hian nimin khan Contractor camp pankhawmin, buaina awm lovin contractor Aizawl ami Pu F.Kapsanga fapa Pu F.Rodingliana’n a lo dawngsawng a. He inbiaknaah hian inremna thuthlung an ziak a. An thuthlungah chuan - kawngpui black-top tawh tha lo zawng zawngte chu khawk leh vekin tha zawka siam a ni ang tihte, April 2011 hmain hna zawng zawng zawh fel a ni ang tihte, contractor ten harsatna an tawk a nih chuan Tuichangral road action committee-in a theih ang angin a pui thin ang tih te leh rokhawlhna leh harsatna a awmin inbiakna neih thin nise tih te, hna zawh a nih a completion certificate pek chhuah a nih hmain Tuichangral road action committee-in an pawmpuina lak phawt a ni ang tihte, kawng siam hna thawkin a thawh mek Tuichang leh Lei dawh hna thawh mek pawh hun tiam kum 2011 ral hma ngeiin zawh fel nise tih te an inremna thuthlungah ziakin, Pu J.Chenhranga Chairman Tuichangral road action committee leh Contractor aiawh Pu F.Rodingliana ten an hming an ziak hnan a ni.
Tuichangral kawng siam hna hi kum 2004 atanga kum 2008 chhunga zawh fel tura tih a ni a. Hnathawh hun tura tih pawh kum 2 atan pawhsei a ni chungin tun thleng hian thawh zawh a la ni lova, amaherawhchu kum 2011 ral hma ngeia zo fel tura beisei an ni ta a ni.

Ruihhlo do pawl SADS ten damdawi hmansual theih manin, Drugs Inspector kutah an hlan

Serchhip Sub-Hqrs. YMA hnuaia ruihhlo do pawl, Sub-Hqrs. Anti-Drugs Squad (SADS) leh Police ten Pathianni zan khan damdawi ruih nana an hman sual chi ‘Tramodole mum 903 manin, vawiin (9.8.2010) chawhnu khan Drugs Inspector Pu R.Vanlalsiama kutah an hlan.
SADS Secretary Pu F.Malsawmtluanga tarlan danin, heng damdawi ruih nana thalai ten an hmansual mek ‘Tramodole’ hi an report dawn bawhzuiin, Pathianni zan khan Chhiahtlanga Venghluna Pu R.Zothansanga In (Marina Drugs Store) atangin an man a. Heng damdawite tlep khat hi retail price-ah Rs. 40 & Rs. 49 a nih laiin, ruih nana hmangtute hnenah tlep khat Rs. 100 ten an hralh thin a. An damdawi mante hi a vaiin khawlai rate ah Rs. 22000 man a ni.
Drugs Inspector Pu R.Vanlalsiama chuan, damdawi zuar, license nei pawh an zawrh turin a huam loh damdawi zawrh chu dan kalh a nih angin tuna an man sak tak, Pu R.Zothansanga te drugs license pawh hi sorkar-ah an cancel tura hriattir an nih tur thu a sawi a ni.
He hunah hian SADS Chairman Pu Kawlthuama leh Vice Chairman Pu R.France Ramthanga te pawhin, thusawiin, damdawi ruih nana hmansual theih chi an dapchhuahna kawngah mipui tawiawmna an dil a ni.

Tualchhung

Hnam dang mi leh ramdang mi man
Nimin Pathianni khan Serchhip Police ten dan lova lo lut Myanmar mi 8 leh hnamdang (Vai) 8 ve ve manin, thubuai an siam sak a. Vawiin hian Magistrate hma-ah hruaiin, an haw lama thawn haw tum a ni.

I-Day infiamna kalpui
Independence Day DC’s running trophy Badminton leh Football-te chu khelh mek a ni a. Badminton erawh khelh zo tawhin, Football erawh tunkar Zirtawpni khian zawh fel a ni ang a, lawmmante chu Inde pendence Day lawmna hunah sem a ni ang.

Falkawn khawtlang leh IR police inkarah buaina chhuak : Police ten silai vawi 3 hmet puak

Zozam Times : Nimin tlaia Fakhawn khawltlang leh 5th IR Bn te inkara buaina chhuak vangin IR police te chuan boruak tha lo zel tur venna atan vawi 3 silai an hmetpuak nia thu dawn a ni.


Police te hnen atanga thu dawn danin vawiin tlai dar 5 vel khan IR police pahnih khawlai leng chu tualchhung tlangval pa-hnih, zurui nia sawi ten an lo tibuai a. He buaina hi punlunin khawtlang mipui leh police te chu lung leh hmanraw dang hmangin an intawng ta niin an sawi.

Falkawn branch YMA president Lalhmachhuana chuan, buaina tireh turin YMA chuan buaina chhuak karah ban an phar tih sawiin,‘Tunhnai deuhah hetiang buaina hi kan tawk a, kan inrem fel viau tawh emaw tih laiin hetiang boruak hi a lo awm leh a ni. Buaina chhuah chhan kan la hre chiah lova, a khawi lam ve ve pawh hian zu an rui niin an sawi a, thu leng vel a tam hle,’ tiin kan palai zawhna chhangin a sawi.

Police te chuan khawtual tlangvalte nen intihbuai chang an nei zauh zauh tih sawiin, boruak tha lo awm tawh sa avangin he buaina hi a chhuak niin an sawi a, police lam chuan zu an rui ve lo niin an sawi thung.

Falkawn branch YMA vice president PC Kapliana chuan, khawtual mite chuan thiam loh chang an neih ve tho thu a sawi rualin, police thenkhat zu rui mawl deuh an awm thin thu leh khawtual mite hmusit zawnga che thin an awm thu kan palai zawhna chhangin a sawi bawk.

Nimin tlaia buaina chhuak avang hian hliam tuar engemaw zat an awm a, hliam thenkhat chu first aid pek hnu-ah chhuahtir an ni a, hliam zinga 4 erawh damdawi in-ah admit nghal an ni. ‘Hliam zingah hian ruh tliak leh lu kak te an awm a, mahse an dinhmun ngaihtuah awm lutuk an awm lo,’ tiin Falkawn Hospital doctor, Dr. LC Liana chuan kan palai a hrilh.

He buaina chhuak avang hian Aizawl SP, Lalbiakthanga Khiangte leh a hote pawh Falkawnah hian an thleng phei nghal a. Zanin inkhawm kal hun lai vel kha chuan boruak a muanawm tawh nain, boruak tha lo a chhuah hlauhthawn thilah police lam chuan khawtual mite chu inchhunga tawm turin an hriattir nia thu dawn a ni.

Pu Zaliana Kidnap-a sawisatu mi sual 5 man an ni

Aizawl atanga Sesawng lam pan Taxi 1-a chuang ten an mi phurh 1 an sawisak hnuah Hel nia insawia mi dang rikrap zawnga an chet avangin Taxi khalhtu leh a mi phurh mi 4 te man an ni.
Inrinni zan dar 6 vel khan Aizawl atanga Sesawng pan, Taxi 1-a chuang ten an chuanpui Sesawng khua Pu Zaliana(58) chu sawisa-in a pawisa an chhuhsak a. Taxi khalhtu hi Laldinpuia Phuldungsei khua, tuna Aizawl Thakthing Venga cheng nia insawi a ni a. A thianpa Vanlalpeka Chanmari Venga khawsa nia insawi nen Zuangtuia an awm laiin, Zuangtui mi 3 - Laltlanmawia(35) Lalinliana(30) leh Lalnuntluanga(39) te chuan Tuirial lamah an hmang a. Zemabawk daiah Sesawnga haw tur Pu Zaliana hian lo phar dingin, a chuang ve a. Taxi-a lo chuang tawhsa mi 5 te nen hian Tuirialah thingpui an in a. Hetah hian Pu Zaliana chu an thingpui in man pe turin an ti a. A pek hnu, Taxi-a an chuan leh hnuah an vau zui ta a, a pawisa ah lai Rs. 5000 an lak sak a ni.
He thil chungchanga hruaitu ber nia ngaih Laltlanmawia chuan HPCD an nih thute sawiin, hmar tawngte pawh an hmang a. Sesawngah chuan chhuk tir lovin Tuirini leh Mualmam inkarah dinpuiin, an zinga 2 chuan thahah vau-in, an khawih bawk a ni.
Pu Zaliana hi an zinga 1 chuan remchang siamsakin a putchhuah tir a, motor lo kal phar dingin a thil tawn a hrilh hnuah heng mite hi man an ni ta a ni.
He thil thleng chungchang hi Bawngkawn Police station-ah thubuai ziah luh a ni a. Police ten pawi khawihtute Aizawl lama phurh an tum chu Sesawng khawtlang chuan kaltlang phal lovin, tlaivar-in an dang a. Misualte hi Police-te ruahmanna-in mipui an hmel an hmuhtir bawk.Bialtu MLA Pu Chawngtinthanga leh Police hotute leh khawtlang hruaitute an inbiak hnu nimin khan Aizawl phurh thlen an ni.

Phai lam atanga tawlhruk Red Sandal Wood man a ni

Serchhip 9th Aug. 2010 : Inrinni zing khawvar hma hret khan Phai lam atanga Mizorama luhpui tur Red Sandal-wood engemaw zat Vairengtea Excise check gate-a duty ten an man.
Excise check gate duty-te hian Silchar-a Central Custome Department atanga an thu dawn bawhzuiin, phai lam atanga Mizorama lut tur truck 1 chu zing dar 3:30 vela Vairengte check gate-a thleng chu an enfiah a. He motor bungraw phurh leitha leh bungraw dang kara Red Sandal-wood thahnem tak phum ruk chu an hmuchhuak ta a. Hei vang hian he motor hi check gate duty-te chuan an hreng zui nghal a ni.
Hetihlai hian Vairengte Forest check gate duty-te pawhin he motor hi zankhua-in an lo chang ve bawk a.Zing khawvar thlenga an chan chhuah tak loh avangin Forest check gate duty-te chuan Vairengta check gate dang an enkualnaah an motor chan; Excise check gate-a ding an hmuh chuan heng thingte hi an man ve nghal a ni.
Hetihlai lai vek hian Silchar Custome Department hnathawktute chu Vairengtea kalin, thing mante chu Silchar lama phurh kir an tum a. Amaherawhchu Vairengte Forest hnathawkte chuan rem ti lovin, Mizorama man a nih angin Mizoram Custome Department Aizawl thlenpui a nih loh chuan an mahni Forest Department-in man mai an tum tih an sawi a. Thu inchuh a awm tak avangin Custome lam chuan Aizawla thlenpui an remti ta a ni.
Heng thingte hi a neitu nia inchhal Malsawmtluangi Thingdawl khua nia insawi chuan Silchar-ah an inhlan chhawng tih sawiin, Burma lama thawnchhoh tur niin a sawi a. Phai lam bakah Mizoram leh Burma lama buaipuitu tur mi hran theuh an awm niin a sawi bawk.

Thuthar lawrkhawm

Zo Inpui din tum
Central YMA chuan Zo Inpui din chungchangah ngaihdan siamin, YMA chu Zo Inpui a nih nghal mai avangin YMA telna Zo Inpui hran din leh tula an hriat loh thu a sawi.
ZORO-in zohnahthlak zawng zawngte insuihkhawm lehna tura hma a lak meknaah Central YMA chuan YMA chu Zo Inpui a nih nghal avangin hetianga a hranpaa hmalak kher hi tul lovah a ngai a ni. Vawiin hian Pawl hrang hrang telna Zo Inpui din tum a ni.

Guest House chei dawn
Mizoram sorkar khualbuk Aizawla State Guest House building hlui tawh chei that dan tur thli thlaiin, Inrinni zing khan Chief Minister Pu Lal Thanhawla leh PWD hotute an kal a. Tum khata a zavaia khawih a hautak deuh dawn avangin chhawng khat te te a khawih nise an ti a. PWD-in a cheithatna tura estimate a siam hmangin hmalak nise an ti bawk.


Sunhlu thatna campaing
Health & Family Welfare Ministry chuan Mizorama Sunhlu thatna inzirtirna ‘Amla campaign’ kalpui nan tun hnai khan Rs. nuai 53 a pe chhuak a. Campaign hi tunkar atang hian kalpui tan a ni ang. He sum hmang hian Mizoram State medicinal plants board chuan zirna In leh Jail-ah te kum 3 chhung zir tirna a pek dawn bakah Sunhlu tiak phun tur semchhuah a ni bawk ang.

Damdawi tha lo 6 a awm
Mizorama damdawi rinhlel hawm, mihring ei atana tlak loh nia ngaih 37 zinga 6 te chu ei tlak loh tih fiah a ni tawh a, a dang fiahna nghah mek a ni. Damdawi tha leh tha lo te hi Guwahati leh Kolkatta-a enfiah tura thawn thin a ni a. A enfiahna khawl nei turin Mizoram sorkar chuan ruahmanna a siam mek a ni.

Tuiliana thi pung zel
Zirtawpnia J&K Leh khawpuia tuilian avanga thi zat chu mi 137 an chuang tawh a, chanchang hriat loh mi 600 vel zawn mek an ni.

Tualchhung

IWMP awareness campaign
Sorkar laipuiin kuthnathawktute tana programme a duan thar ‘Integrated Wasteland Management Programme (IWMP) inhrilhhriatna awareness campaign chu nimin khan Serchhip-III amite pualin Hmar Veng YMA hall-ah neih a ni a. Vawiin hian Serchhip-II huamchhung amite pualin neih leh a ni ang.

PYKKA atan inbuatsaih
Village Council hrang hrangte inelna PYKKA neih leh tur atan tunlai hian VC hrang hrang ten infiammi thiam bikte thlanchhuahna hun an hmang mek.

Pi Chuhthangi a boral
Pi Chuhthangi(54) s/o KL.Hmingliana Serchhip Vengchung chu zunthlum natna avangin nizan dar 6:30 khan a boral a, lumen a nih hnu vawiin hian vui a ni ang.

Pathian lamah kan tang em ? tih hi chhut chian a pawimawh hle a ni - Chief Minister

Serchhip 7th Aug. 2010 : Chief Minister Pu Lal Thanhawla chuan, "Pathian kan lamah a tang em ?" tih aiin "Pathian lamah kan tang em ?" tih hi chhut chian a pawimawh hle a ni a ti.
Aizawl YMCA General Conference vawi 23-na leh YMCA World Peace Day 2010 nimina Aizawla I&PR Auditorium-a neih a hmanpuinaah he thu hi sawiin, Chief Minister chuan khawvel sakhaw lian ber ber pathum Hindu, Muslim leh Buddhist-ten kil tin atangin min hual vel chung pawhin Pathianin min hum tlatna chhan hi ngaihtuah chiang a Pathian laka kan mawhphurhna chanvo kan tih hlawhtlin ngei a tul a, "Pathian kan lamah a tang em ?" tih aiin "Pathian lamah kan tang em ?" tih hi chhut chian a pawimawh hle a ni a ti bawk. Mizote hian kan mihring puite hnena chanchintha hril hna hi kan thawk tha em em a, hetih lai hian kan ramchhunga thilsiam dangte hnena chanchintha kan hril danah hian Pathian a lungawi em tih chhut ngun a ngaih thu sawiin ringlo mi kan tihte hi Pathian thilsiam nungchate humhalh leh zah thiam kawngah kan phak lo hle a ni a ti a.
Pu Hawla chuan Mizo Kristian, kohhran mi ringtu intite hian YMCA innghahna leh thil tumte hi kan nunpui tak zetin kan vela ringlo mite hian kan nunah Lal Isua hmel an hmu em ? tih zawhna hi mahni theuhvah inzawh nawn fo a pawimawh thu a sawi a, khawvel hmun hrang hranga inremlohna leh innghirnghona tichhuaktute chu miduham, pamham leh chapote an ni a ti a, Indopui II-na a USA in Hiroshima Atom Bomb hmanga a beih na ni denchhena YMCA in World Peace Day a hmang hi a fuh em em a ni a ti bawk.

Fish Farmer training Centre & State Level Laboratory CM-in a hawng

Nimin tlai khan Lengpui Fish Seed Farm-a Fisheries department sak thar Fish Farmer Training Centre & State Level Laboratory chu Chief Minister Pu Lal Thanhawla’n a hawng.
Hawnna thu sawiin, Chief Minister Pu Lal Thanhawla chuan Mizoram a mi tam takin hnathawh tur kan hriat loh laia ram leilung fa ni lo ten hnathawh sen loh an hmu rengte hi kan harhchhuah a ngai a. Ram leiluing fate kan thanharh a ngai a ni a ti. Tan kan lak thuai loh chuan kan ramah hian hnam tlem zawk minority dinhmunah kan ding mai ang tih pawh a hlauhthawnawm a ni a ti. Sorkar department chu a len leh a tet ah teh tur nilovin an pawimawh vek a, thawktute inpekna leh rinawmna a pawimawh ber zawk a ni a ti. Fishery department in sum a sen tawh zawng zawng chu dik taka hman tangkai nisela chuan vawiinah hian Mizoram pawna hralhchhuah tham nei tawh tur kan ni a ti bawk. He hunah hian Khualzahawm Fisheries Minister Pu H. Liansailova pawhin thu a sawi a ni. He Fish Farmer Training Centre & State Level Laboratory hawn thar hi 2008 July a sak tan a ni a. 30 April 2009 ah sak zawh hiin Dec 9, 2009 khan Fisheries Departmen kutah hlanchhawn a ni. He building sakna senso zawng zawng chu cheng nuai 37.5 a ni a, in chhawng hnih, a zau zawng belhkhawm hi 242 sq.m a ni.

Thuthar lawrkhawm

Mamit leikhi enfiah
Nimin khan Pu John Rotluang liana Deputy Speaker, Bialtu MLA ni bawk chuan Mamit Bazar Veng a Lei khi chu a hmunah tlawhin Lei khi-ina chhungkua 70 lai a tih buai dan te a enfiah a ni.He Lei khi avang hian tunah In 3 thiah a ni tawh a, chhung kua 10 in bungrua thiar chhuakin an In an chhuahsan tawh a, chhungkua 40 velin zantin an In an riah chhuah san tawh a ni.Heng chhungkua In 3 thiah te hi Bialtu MLA chuan Rs. 20,000 theuhin a tanpui a, a dang chhung kua 67 te hi Rs. 2,000 theuhin a tanpui bawk a ni.


Thlanmual hmun min
Niminpiaha Aizawl leh a chhehvela ruahsur nasa tak vanga Dawrpui Vengthar thlanmual min chuan thlan 30 chuang a tih chhiat rin a ni a. Nimina an hnatlannaah thlan lung 13 chu an chhar chhuak tawh a, kuang eng zat chiah nge chhuak tih hriat theih a la ni lo.


Vairengte khauh tum
Mizorama ruihhlo lutru nasa leh Mizoram hmun hrang hrang atanga ruihhlo tlan tura Vairengte lam pan thahnem lutuk chungchangah Vairengte chuan khauh taka hma lak an tum. Vairengtea Kohhran leh pawl hrang hrangte chuan thalai zu leh ruihhlo tlan tura Lailapur-a mi tam tak an liam thla thin chu ngai mawhawm tiin, ram leh hnam a him zawk theih nan khauh leh chak taka hmalak nise tiin thu tlukna an siam a ni.

Tui lianah mi 100 chuang thi
Jammu & Kashmir-a, Ladak biala Leh-ah nimin zinga ruah tam tham tak sur avanga tui lian thutah mi 100 aia tam an thi a, midang tam tak chinchang hriat loh an awm avangin thi zat hi an la pun rin a ni. He tui lian avang hian hmun tam zawk chu tlawhpawh theih lovin a awm mek bawk.

Misualin Rel an rawk
Nimin zing khawvar hma khan Bihar-ah misual rualin Delhi pan Lal Kila express Rel passenger-te beiin, an rawk a, mi 30 chuangin hliam an tuar a, an zinga mi 1 chu silaia kah hliam a ni. Hetiang thil a thlen avang hian passenger-te thin rim chuan Rel station suasamin, Station Superintendent an hreng a, Rel dang service pawh hun eng emaw chen a khaihlak phah a ni.

Hriatthiam dilna

Kan Editor dam samloh avangin kan update lo deuh a ni thei a, chhiartute hriatthiamna kan dil e.

Tualchhung

Magistrate thupek bawhzui
Magistrate-in ran khuahkhirhna thupek a chhuah bawhzuiin, Inrinni khan Police ten Serchhip Bazar leh a chheh vel atangin Ui 5 an man a, heng Ui te hi a neitu ten an khul chhuak lehnghal a ni.


Foreigner sumdawng ngaimawh
Tunlai a Serchhip khawchhung Veng hrang hrangah, In tina lut lawra thil zuar thin Foreigner sumdawng thin ten mipui himna nasa takin an tiderthawng thei nia hriat a nih avangin Serchhip Dist. NGO Co-Ordination Committee (SEDNOC) chuan an ngaihmawh hle tih an sawi a, an lakah lo fimkhura, lo ti tlangnel lutuk lo turin chhung tin te an ngen.

Pass kim vek
Hindi School exam result chhuakah Serchhip Dinthar Hindi school atanga exam zirlaite an pass kim vek.

YMA-in SADS din
Serchhip Sub-Hqrs. YMA thukhawm chuan ruihhlo do kawnga chak lehzuala kal tur in ruihhlo do pawl, Sub-Hqrs. Anti-Drugs Squad (SADS) a din a, Convener ah Pu Kawl thuama, Asst.Convener-ah Pu R.France Ramthanga, Secre tary ah Pu F.Malsawmtluanga leh Treasurer ah Pu H.Lalduh awma te an ruat a. An ni hian executive member tur an ruat leh dawn a ni.