Tualchhung

Khapna thupek ti chhuak
SDO(Sadar) Pi K.Vanlalruati chuan thupek chhuahin, Serchhip Sadar, Sub-Division huam chhungah mi tumahin Tiranga/Gutkha lam chi hrang hrang zawrh, hralh leh ei tura kawl a khap tlat a ni.

Khapna thupek ti chhuak
I&PR huaihawtin Aizawl Darshan kumin atan a vawi 2 nan Serchhip Dinthar Veng MUP ten nimin khan Aizawl khawpui chhung hmun hrang hrang Raj Bhavan, Doordar shan Kendra, Aizawl Theological College, Museum, New Capital Complex Secretariat leh Solomana Temple te an tlawh a, MUP member kalte hi member 20 an ni a. Khaw chhe karah pawh tluang taka an fan hman avangin an lawm hle.

Maxi cab chesualah mi 2 an thi
Aizawl leh North Vanlaiphai inkara tlan, Maxi Cab (sumo) chu nizan hmasa dar 6:30 vel khan Chawngtui leh North Vanlaiphai inkar, Chawngtui atanga km 2 vela hla-ah a chesual a, mi chuang pariat zinga pahnih an thi a, paruk chuan hliam na tak an tuar. He Sumo MZ-06 2352, ‘Run Tlang’ hi Sawmliana, Chawngtui khaw ta a ni a, a chetsual chhan chiah hi hriat a la ni lo.
He sumo hian North Vanlaiphai-ah passenger a dah hnu-in, Chawngtui lam hi a pan leh a, hetah hian a chesuala, motor khalhtu Lalremruata (21) s/o Lalrodinga, North Vanlaiphai Dawmdawi In Veng leh Lalkulhpuia (5), Chawngtui-te chu a hmun-ah an thi a ni.

Serchhip Dist.ram hman dan tur ruahmanna Atlas tlangzarh a ni

Serchhip 30th March 2011 : Mizoram Remote Sensing Application Centre (MIRSAC); Science, Technology & Environment Wing, Planning Department-in Serchhip District chhunga khawtin te ram hman dan tur ruahmanna (Integrated Land Use Planning) Atlas, Remote Sensing leh Geographic Information System (GIS) hmanga a buatsaih chu nimin khan Serchhip D.C. Pu H. Darzika’n Serchhip DC Conference Hall-ah tlangzarh.
Khuallian Pu H. Darzika chuan thu sawiin, Mizo chanchin hriat theih china kan eizawn dan ber chu tlangram Lo neih a ni a, kumtin ramngaw kan vat chereu a, hal a, chumi hnu a thlai ching thin hnam kan ni a, hetianga lo neih hi a hlawklo mai ni lovin ram ngaw tih chereuna leh lei chunglang hang tha luanraltirna a ni a, hei hian kan ram sik leh sa thlengin nghawng tha lo a neih phah mek a ni ti a sawiin, Serchhip District chhunga leilung hausakna behchhana ram hman dan tur nghet leh tha, Mizoram Remote Sensing Application Centre(MIRSAC) in science thiamna hmanga an han buatsaih chu tha a tih thu a sawi a.Atlas Bu hi NLUP tihhlawhtlinna atan leh development department-te tan pawha tangkai tak tur a nih thu a sawi bawk.
He tlangzarhna inkhawm kaihruaitu Pu Lalnunsiama Kawlni, Senior Scientist chuan Serchhip District hi Mizoram chhunga district laili ber a nih avangin leh leilet leh thingtlang lo neia eizawnna hmun a nih avangin, a bul tan nan hman a nih thu a sawi a, ruahman ang chiah chiaha Atlas hi hman theih a nih loh pawhin kaihruaitu atana hman a nih chuan an hlawkpui tham a nih thu sawiin, Remote Sensing leh GIS technology te hi kawng hrang hrangin hman mek a nih mai bakah nasa zawka hmang tangkai zel tura theihtawp chhuaha hmalak zel tum a nih thu a sawi.
He inkhawmah hian Pi Hmingthanpuii, Scientist-in PowerPoint Presen tation hmangin technical report a pe a, Remose Sensing leh GIS hmanga ruahmanna an siam dan sawiin Serchhip District chhungah hian leilet (WRC) atan 1.19 % lai ram tha a awm a. Terrace siamna atan 4.01 % ram rem tha a awm bawk thu te, Agro-Horticulture atan 5.36 %, Agri/Horti Plantation atan 4. 34 % leh mipui chak lakna atan leh ran vulhna atan 11.76 % ruahman a nih thu te leh ramngaw siam belh tur 10.53 % lai ruahman a nih thu a sawi a. Tunah hian he district chhungah hian ramngaw te, mau hmun te leh plantation hmun te hi 61.52% lai a awm thu a sawi bawk a ni.
Pu K. Lalrammuana, Sr. Scientist pawhin lawmthu sawina hun hmang in he Atlas buatsaihna ah hian Serchhip DC leh a thawhpuite thahnemngaihna fakawm a tih thu leh, sawrkar department hrang hrangte leh VC te chungah lawmthu sawiin, a tul anga inpuih tawn zel a duh thu a sawi a, tangkai taka Atlas hi hmang turin mipui kal khawmte a ngen nghal bawk.

Tualchhung

Pu Rochhunga a boral
Nimin tlai dar 3:30 khan Pu C.Ro chhunga(80) f/o David C.Lalremliana Serchhip Hmar Veng chu Lungna avangin a boral a, lumen a nih hnu vawiin hian vui a ni ang.

U-19 Footbal final dawn
Khawtetlang field-a Inter-Dist. U-19 Football Championship khelh mek chu vawiin hian Aizawl leh Lunglei team ten final khelin zawh a ni. Hemi puala SDFA-in lucy ticket a buatsaih pawh vawiin hian field-ah vawr nghal a ni ang.

Sipai la leh dawn
Thla thar April ni 12-15 chhung khian Serchhipah sipai chi hrang hrang lakna neih a ni leh dawn.

Tualchhung

RTE Live Phone-in
Naktuk zan dar 7 atang hian Right to Education Act leh Continuous & Compre hensive Evaluation chungchangah Live Phone-in prog. buatsaih a ni dawn a. Education Deptt. DIET, DRC leh SSA-a thawk Officer ten zawhna an chhang dawn a, Phone No. 226205 ah biak theih a ni ang.

Pik-Up chesual
Pu Vanlalsawma Sailo(Masawma) Serchhip Bazar veng ami motor (Pik-up) chu tukin khan Serchhip Vengchung thlanmualah a bek liam a, feet 50 vel lumin, a driver Serchhip Damdawi Inah enkawl mek a ni.

Revenue Deptt. hna thawh that loh avangin thenawm khawveng innghirnghona a tam - CM

Chief Minister Pu Lal Thanhawla chuan, Revenue Department-in dik lo taka hna an thawh avangin thenawm khawveng innghirnghona an siam sak tam hle a ni a ti.
Nimina Budget Session-a zawhna leh chhanna huna Chitelui kama ram inchuh buai chungchanga a hming a lan ve avanga thu a sawinaah he thu hi sawiin, Pu Lal Thanhawla chuan, Revenue Department-ah thil dik lo a tam lutuk avangin ACB emaw CBI emaw la chhui tir a tum thu a sawi a. Revenue Department chu a buarchuar lutuk tih sawiin, LSC fel tak awm, a ram pawh an lo hralh darh vak a ni a ti a. Hengah hian serveyor ho an tel teuh tih a sawi bawk.
Chitelui kama P.Patta area chhungah midang ram dik lo taka pek tumna a awm nia sawi avanga a ram enfiahnaah Chief Minister a tel nia sawi chungchangah Pu Hawla chuan a nu leh pate zarah ram a mamawh loh nasat thu a sawi a. Sorkar-in ram enkawl zo lo ten sorkar-ah pekluh vek tur tise a lawm viau tur thu a sawi a. Ram enfiahnaa kal anga sawi pawh midangin a ram an lo ser, thlir a duh vang leh World Bank kawng tharah a la kal loh avanga a kal duh ve avanga thlir a nih thu a sawi a ni.

Chief Minister Pu Lal Thanhawla chuan sorkar khalh ngil turin Politician tel lohna Ethics Committtee a hma aia tha din a ni ang a ti.
Governor thusawi chungchanga lawmthu sawina motion sawihona a khaikhawmnaah he thu hi sawiin,Pu Lal Thanhawla chuan Ethics committee-a tel politician pakhatin a chanchinbua a thu ziah atangin member dang ten committee atanga an ban leh ban loh an hre ve chauh a, an ban leh ban loh zawt tura a hnen an pan chuan a ni pawh hian a hriat bik loh thuin a chhang ve tho tih a sawi a ni.
Tunah hian committee thar din turin ngaihtuahna sen mek a ni tih sawiin, member dangte duhdan angin Chairman leh Secretary te pawh sorkar-in ruat lovin, a thlana thlan an nih tur thu a sawibawk.

INTER-DISTRICT UNDER-19 FOOTBALL CHAMPIONSHIP 2011

Mizoram Football Association (MFA) leh Serchhip District Football Association (SDFA) tangkawpin an buatsaih Inter-District Under-19 Football Championship, 2011 chu vawiin chawhnu dar 1:30 khan Khawtetlang Field, Serchhip-ah tan a ni a, he hun hi Serchhip Bawrhsap Pu H.Darzika chuan khuallian niin a hmanpui a ni.

Serchhip Bawrhsap chuan infiamna engpawh hi eizawnna tling anih avangin tihtakzeta tih na thinlung leh tumruhna nen chuan a hlawhtlin theih a ni tih sawiin infiammi kalkhawmte chu insumtheihna leh huaisenna nen tan la turin a fuih a, Mizoram bakah India ram tihmingthatu ni tura tan la turin a chah nghal bawk a ni.

Bawhsap chuan Khawtetlang Field chu a dung metre 120, a vang metre 90 a zau anih thu sawiin Mizoram Chief Minister Pu Lal Thanhawla hmalakna a tihchangtlun lehzual tum anih thu a sawi a, mipui thutna tur gallery,motor parking leh infiammi mikhual riahna tur hmunte siam tel vek tum anih thu te leh a siamna tur pawisa pawh a awm tawh thu a sawi a, reilote ah hna tan nghal mai anih dawn thu a sawi bawk.

MFA hian Inter-District Under-19 Football Tournament hi kum 1999 atanga buatsaihin tuna mi hi a vawi ruk na a ni a, tun tumah hian Mizoram chhung District hrang hrang paruk ten infiammi an rawn tir a, Saiha leh Lawngtlai District atangin an tel thei lo a ni. He Tournament a khel tha te chu an kum azirin age group hrang hrang U-16, U-17 leh U-19 a Mizoram aiawh turin thlan an ni nghal dawn bawk a ni.

Tournament a tel Team 6 te hi Group hnih ah Team thum ve ve in then an ni a, Group tina team awm te an inkhelh kual vek hnu ah a sang pahnih ve ve ten Semi-Final an lut ang a, 28th March, 2011 hian Final khelh a ni ang. - DIPR

MJA-te pualin Workshop on Tobacco neih a ni

Mizoram State Tobacco Control Society (MSTCS) buatsaihin nimin chawhnu khan Serchhip Chief Medical Officer’s Conference Hall ah Serchhip MJA member te vaihlo chungchang inhrilhhriatna “Sensitization Workshop on Tobacco” neih a ni a, Dr. Malsawma, Chief Medical Officer, Serchhip District leh Vanlalzari, District Coordinator, MSTCA, Serchhip ten thuthar thehdarhtute hi vaihlo leh dan in vaihlo a khap dan chungchanga hriat tur pawimawh zualte an hrilhfiah a ni.
Dr. Malsawma, Serchhip CMO, District Anti-Tobacco Squad Member Secretary chuan thuthar thehdarhtute chu thawhhona tha neih pui atan a sawm a, mipuite vaihlo thatloh zia fah ngun a tul thu leh kum 2010-a Serchhip leh Chhiahtlanga In tina luta survey an neih thu sawiin, mihring 17,335 awm zinga 13,900 ( 80%) chu kum 10 chung lam an nih thu leh an zinga mi 4488 (32%) chu mei zu nasa hriat chian an nih thu a sawi a, zuk leh hmuam do kawnga tan lak a ngaih nasat thu sawiin Mizote cancer natna chi hrang hrang vei nasa ber hnam kan ni hi thlak danglam thei tura tan lak a pawimawh zia a sawi a ni.
Vanlalzari, District Co ordinator pawhin Anti-Tobacco Squad te hmalakna mipuiten an hria a ni tih sawiin, meizuk chungchanga sorkar dan siamte pawh an zawm tha tan hle tih a sawi a, tan lak nasat a la ngaih thu pawh sawi langin MJA te chu mipuite hnenah zirtirna uar zawka pe leh turin a ngen a, vaihlo do a tulzia leh a pawimawh zia hriatchian a tul zia uar takin a sawi a ni. He hunah hian thusawi tute hian powerpoint hmanga a lem entirin, an sawifiah a ni.
Thutharlakhawmtute chuan an ngaih pawimawh thil chi hrang hrang bakah thurawnte an pe bawk.

Tualchhung

MJA-te tan workshop
Vawiin chawhnu dar 2 hian CMO’s Conference hall-ah Mizoram State Tobacco Control Society leh Anti Tobacco Squad Serchhip District-te buatsaihin, Sensitization workshop for MJA Serchhip District neih a ni dawn.

Mei zu vai
Inrinni zing khan Serchhip District Anti Tobacco Squad ten Bazar leh a chheh vela meizu vaiin, mi 25 an man a, hengmite hnen atanga an pawisa chawi tir tling khawm chu Rs.1150 a ni.

MUP Conference dawn
Vawiin hian SSA BRC hall-ah MUP Sub-Hqrs. Serchhip Assembly neih a ni dawn a, member-te kal theuh turin an inhriattir a ni.

Tui sem pangngai chho zel
Hun engemaw chen harsatna leh rokhawlhna avanga PHE-in mipui hnena tui a sem thin a khaihlak hnuah a pang ngai anga sem chhoh mek zel a ni a. Hetihlai hian tui la sem ve lohna Vengah erawh an la harsa hle.

High School Games
High School Games Aizawl ah neih turah tukin hian Serchhip atanga kal tur ten Serchhip an chhuahsan dawn.

Lawrkhawm 21.3.2011

Naupang pawngsualtua puh man
S.Vanlalpeka (18) S/o S.Palawma Lungpuizawl chu Lungpuizawl hmeichhe naupang Kum 9 mi pawngsuala puh a nih avangin Lunglei Police ten an man a, Zirtawpni khan District Jail Sazaikawnah dahthlak nghal a ni.
Police Station atanga thudawnnain a sawi danin, nikum October leh December inkar vel khan Vanlalpeka hian he hmeichhia naupang hi vawi 4 vel a lo khawih hman a, hemi hnu hian Vanlalpeka hi a piangthar a, KNP hruaitute ni chhoin, Evangelist-te a zui a, tunhnaiah nikuma thil thleng chu mi khawlai ti ti atangin hmeichhe naupang pa hian a hria a, a fanu chu a zawt a, hetiang hi a thleng ta a, hmeichhe naupang hi a khawih chhe hman chiah lo niin an sawi bawk.

Geletine puak
Sorkar laka lungawilo nia hriat ten Zirtawp zan khan Aizawl Rang vamuala Transformer-ah geletine kamin, an ti puak a. Hunthar Venga an geletine kam erawh a tlawlh thung. Geletine puak hian pawi nasa lutuk a thlen lova, transformer oil erawh a put nasa hle a, Veng thenkhatah eng pek theih a nih loh phah a ni. He thil thleng hi Police te chuan an chhui mek a ni.

Lawngtlai Dist. Jail hawng
Sorkar laipui hnuaia Jail chei thatna tur scheme sum Rs. nuai 365 senga sak, Lawngtlai District Jail thar chu Inrinni khan hawn a ni. Lawngtlai khaw dai, Mampui kawnga awm he District Jail hi Parliamentary Secretary Pu Lalrinmawia Ralte-in a hawng a. Hmasawnnain thil tha tam tak a thlen rualin thil tha lo pawh a pung zel a, hei hian Jail mamawhna pawh a lian a, Jail chu insiamthatna hmun a ni a ti bawk.

Bru hel ten truck an suam
Nimin chawhma dar 10:30 vel khan Kanhmun leh Luimawi inkar Kanhmun thlen hma Km 1 velah Bru hel nia ten silai hmet puakin, Truck 1 an suam a, hnam dang 1 an kap hliam a ni. Teak thing phur he motor hi Hel nia hriatte hian lo ti dingin, motor headlight an vaw chhia a, motor ke hnung lam an kap keh a, mobile phone leh motor chahbi an laksak zui a ni. Hetia an che vel hi hnamdang 1 Bike-a Kanhmun atanga kal chuan hmu-in, Kanhmun lamah a kir lehnghal a. Helte hian silaiin vawi 3 an kap zui a, a taksa vei lamah an kap hliam a ni. Police ten an hriat ve leh helte hi an umzui nghal a ni.

Libya ram bei mek
India chuan boruak atanga Libya beih a ni chu pawi a tih thu sawiin, pawisawilo civil mite bakah he rama la awm ramdangmite tawrhna a thlen phah loh a beisei a ni a ti a. Boruak ti chhe zual zawnga thil ti lo tur leh sipai chakna hmanga beihna ang chite ti lo turin a ngen a ni. Hetih lai hian Libya ram hruaitu Muammar Gaddafi chuan khawthlang ramte beihna laka an ram chhan him turin civil mite chu silai leh ralthuam in a thuam an tih a sawi. He ram civil mite himna tur resolution UN Security Council-in a pass hnu Inrinni zan atang khan US leh Europe ramte chuan an bei tan a ni.

Tripura-a Bru camp-ah kangmei a chhuak Mi thahnem tak hliamin, engemaw zat an th

Serchhip 21st March 2011 : Tripura a Bru Refugee Camp Naisingpara ah kangmei rapthlak tak chhuakin In 3000 vel a kang a, mi engemaw zat an kang hlum.
Tripura a Tuikuk Refugee chenna Camp lian ber Naisingpara Camp ah hian Inrinni chhun dar 12 vel atang khan kangmei a chhuak a, kengmei hi Block D camp bul atanga chhuak a ni a, khua a rovin thli a thaw bawk si a, hun reilote chhungin In tam tak hi a mankai a, kangthelh motor pahnih chuan kang thelh tumin an bei a, mahse tihngaihna a awm lova. He camp In 3500 zinga In sang thum zet a kang nia hriat a ni, Inrinni tlai dar 4 dawn khan kangmei hi a mit fel chauh a ni.
He thu buatsaih lai hian kanghlum mi 19 ruang an chhar tawh a, hliam tuar mi 40 zet an awm tih a hmuna awm Bruhno Mishra chuan a sawi a. Kanghliam na zual mi 5 vel chu helicopter hmangin Agartala lamah phurh an nih thu a sawi bawk.
Tripura sorkar atangin Magistrate leh Police te, Assam Rifle ten he chhiatna hmun hi an thleng nghal a ni. Thudawn danin kang zingah hian Sevethday Adventist Kohhran Biakin pahnih pawh a tel a ni. He kangmei chhuah chhan hi hriat ala ni lo.

Sawmna leh Hriattirna

Ni 18th March 2011 (Zirtawpni) hian kan Pa C.Thansanga (Awardee) National Teachers, hriatrengna leh Bawngchawm Kohhran hriatrengna lung Bawngchawm khaw hmunah phun kan tum a. Min hlutpuitu zawng zawngte lo tel turin kan sawm a che u. Tin, Bawngchawm khaw chhuak te phei chu lo tel ngei tura beisei in ni e.

- C.Zokhuma, Serchhip Tuikhuah Veng

Thlai chin enfiah

Nimin khan Mat phaia thlasik thlai chin hrang hrangte tlawha fangkualin, Horticulture Deptt. leh MJA Serchhip member-te an kal a. Hetah hian zikhlum leh thlasik thlai dangte chu nikum aia a thar hlawk loh tur thu tarlan a ni. Hetianga a thar hlawklohna tur chhan hi kumin kumtir lama Mat tuilianin a tih chhiat vang leh a tih khawtlai vang a nih thu tarlan a ni bawk. He hunah hian DHO Lalhmangaiha chuan MJA-te hi kai hruaiin, hmunhma-te a kawhhmuh a ni.

Lunglei Zotlangah Parawl Lalrokima ruang chhar a ni

Serchhip 17th March 2011 : Nimin zing khan Lunglei Zotlang-ah ruang chhar a ni a. He ruang hi Lalrokima (48) s/o Darchuha (L) Zotlang a ni tih finfiah nghal a ni.
Lalrokima hi mahni chauha awm niin, nimin zing khan a chenna Inah thisen hmuh a nih laiin, amah tak erawh a awmna hriat a ni loh avangin mi thenkhat ngaih tha lo chuan a In chhunga thisen far chu chhuiin, a chenna In atanga ft. 260 vela hla, bawlhhlawh paihna bul kawr-ah ruang hi an chhar ta a ni.
Rokima hi eng vanga thi nge a nih tih leh, engtik hunlaia thi nge a nih tih hriat a la ni lova. Police hotute hnen atanga thudawn dan chuan Rokima nghawngah hian zaina hnuhma niawm tak a awm a, hei bakah hian a thin bul velah chemtea vihna hnuhma niawm tak hmuh a ni bawk a. A taksaa hliam awm dan atang leh ama Ina thisen kai chemte hmuh a nih avangin mi kut tuara thi ni ngeia ngaih a ni a. Lunglei Police station-ah pawh tualthah thubuai ziahluh a ni.
Police atanga thu dawn danin, Rokima hi Thawhtanni velah kha chuan hmu an la awm a. Hei vang hian Thawhtanni zan emaw, Thawhlehni velah emaw, thah a nih an ring a. A ruang hi a chhiat tan tawh avangin Thawhtanni zan vela thah a nih a rinawm zawk mah tiin, kan thudawnna chuan a sawi a ni.
Rokima hi amah chauha awm a nih avangin a thi tih pawh hi hriat a ni lawk lova. Nimin zing khan pa pakhat zing chhuak chuan kawng atangin au a, chhangtu an awm loh avangin a kalsan leh mai a.

Tualchhung

Chief Justice lo zin
Gauhati High Court Chief Justice, Justice Madan B. Lokur chuan Inrinni tlai khan Serchhip rawn tlawhin, Dist. Bawrhsap Pu H.Darzika leh Judicial Magistrate Pu T.Lalhmachhuana ten lo dawngsawngin, DC office-ah an inkawm ho.

Tuizem chimin delh
Nimin dar 9:30 vel khan Lungchhuan khuaa ruahtui dahkhawlna zem siam chu a siamtu hnamdang mistiri helper ten siam zo vek tawha an inngaih avanga a dona an phehnaah chimin, a chelhtu mi 2 a delh a, mipui ten chhanchhuah hna an thawh hnu ah lachhuakin, N.Vanlaiphai Damdawi inah enkawl mek an ni. Hetiang zem hmun dang amite pawh a rintlak lohva ngaih a ni.

Ulhbun silai puak palh nia sawi avangin Engineer pakhat a thi

Zirtawp zan dar 8:50 vel khan Thenzawl leh Sialsuk inkar Chalkhan-a Tinbiaka Hotel-ah Engineer vai pakhat chu Ulhbun silai puak palh nia sawi vangin a boral.
He vaipa hi Yuken Company hnuaia Electrical Engineer, Nithin Nayak (24), Maharastra lam chhuak a ni a, silai neitu hi Paul Zothanpuia John s/o PP John, Khatla, Aizawl a ni.
Paul Zothanpuia ho hian Maicham Hydel Project-a an hnathawhna hmunah khawl chhe siam turin Engineer-te nen an vaiin mi 5 an kal a, Maicham-a an khawl siam zo haw lam chu Chalkhan Hotel ah hian chaw an ei a, silai neitu hian a thutna bul bang thlanglam nghengin silai hi a tung a. Silai hi tlu in a puak ta nia sawi a ni.
Silai mu hian Engineer Nayak-a chalah kapin, a luruh a thlawh chho a, a mit veilam pawh hmuh tur a awm lova, a thluak a per darh hneh hle bawk. Amah hi, a ID atanga a lan danin, Yuken Company West Zone Office, Karnataka-a Electrical Engineer hnathawk lai a ni.
He thil thleng chungchangah hian Sialsuk Police OC, K. Romalsawma chuan Case an Register thu leh uluk taka an enfiah hnuin silai hi tih luih leh tum reng vanga puak ni lovin, tihpalh nia an hmuh thu a sawi a. Amah erawhchu, he thihna hi fimkhur tawk loh vanga thil thleng a nih avangin silai neitu hi case an siamsak thu leh Sialsuk Police Station-a an kawl rih thu a sawi.Silai hi paltluk nge, engtianga tlu nge tih sawi thei he chetsualna hmuna mite an awm lova, zu an rui deuh hlawm nia a lan thu an sawi bawk.

Tualchhung

Scout & Guide training
Serchhipa a vawikhatna atan Scout & Guide training camp chu Model Middle School-ah neih mek a ni. He camp-ah hian Scout 29 leh Guide 23-te an riak lut a ni.

MPSC exam buatsaih
MPSC hnuaia Mizoram Finance & Account Service exam chu hmun dang rual in nimin khan Serchhip exam Centre GHSS School-ah tan a ni a, mi 10-in exam hi beiin, tun thla ni 25 ah an zo ang

In kang sa tha
Thawhlehnia Kikawna In kang chu niminpiah khan khawtlangin hnatlangin an sak that sak. He hnatlangah hian Chhiahtlang YMA Branch-te pawh an thawk chhuak a ni.

Lawrkhawm

Manipur Hel man
Manipur hel, Kangleipak Com munist Party (Mobile Task Force) member mi pali te chu Thawhleh zan dar 11 vel khan Manipur Police te chuan Bawnkawn-ah an man.The Telegraph-in a tarlan dan chuan heng mi 4 zingah hian hmeichhe pakhat a tel a, an vai hian mi In luahin an khawsa ho a ni.

BCM Assembly nei mek
Mizoram Baptist Kohhran rorelna sang ber BCM Assembly vawi 115 na chu BCM Rahsi Veng Biak In Lungleiah neih mek a ni a, Mizoram leh ram pawn atangin palai 1000 an chuang tawh a ni.

Pawngsualtu man ta
Nikum January ni 22-a Khuang thing khaw hmeichhe naupang pawngsualtua puh Lalrimawia (46) Khuangthing khua chu Cham phai Police ten niminpiah khan an man ta. He thil thleng hi hriat a nih ve leh MHIP ten Police-ah report an thehlut nghal a, amaherawhchu an beisei anga hmalakna a chak loh avanga lungawilohna lantir kawng te pawh an lo zawh hial tawh a ni.

Libya buaina
Libya ram hruaitu, Col.Muam mar Gaddafi-a'n an ram buainaah eptute leh Al-qaeda mi firfiakte chu amah phiar ru-a dik lo taka mipui fuihpawrha a rorelna paih thlak tumah a puh leh.

Tualchhung

UPC inkhawmpui
Nizan atang khan UPC(NE) Aizawl East District Inkhawmpui lian chu Serchhip Biak Inpuiah neih tan a ni a, Pathianni zan thleng awhin, vawiin lam pawh hian inkhawmpui palai an la rawn thlen belh zel dawn.

Lung phun dawn
Kum 2005-a boral, Pi Chalmawii Ramthlun Veng hriatrengna lung chu vawiin hian a tu leh fa ten ruai nen an phun dawn.

Tuiah harsatna tawk nasa
PHE Deptt.in khawl lam leh thawktu lama harsatna a neih avanga mipui hnena tui sem a khaihlak mek avangin chhungkaw tam takin harsatna an tawk mek.

Tualchhung

Pu Vanchhunga vuiliam
Niminpiah zing dar 3:30 khan Pu Vanchhunga(80) Serchhip Hmar Veng chu thisen sang avangin a boral a, nimin vek khan Hmar Veng thlanmualah vuiliam a ni.

YMA-in Stadium sak enpui
Nimin zing khan Serchhip Hmar Veng Branch YMA hruaitute chuan an Vengchhung, Sports Complex a Stadium sak mek a hmunah an tlawh. He Football Stadium sak mek hi mi 5000 len theihna tur niin, Cheng Vaibelchhe 20.22 senna tur a ni a, NBCC hnuaiah BGM Company ten an thawk mek a, helai hmuna hman raw Supply-tu, Mizo thenkhat ten pawisa chhuhsak a tihbuai an ching nia an hriat avangin Hmar Veng Branch YMA te hian an thlavang hauh pahin an harsatna an enpui a ni.

Pu Hawla School hawng dawn
Higher Secondary School hawn tan leh ni April ni 19 atanga tan thei turin Lal Thanhawla Private Higher Secondary School Serchhipah din a ni dawn. Hemi chungchang hi niminpiah khan he school managing board thukhawmnaah rel a ni a, School hmun atan hian New Serchhipa BRTF ram chhuahsanah a remchan dan anga kalpui nise tih a ni.

New Serchhip, Kikawn-ah In kâng

Vawiin, ni 8.3.2011 chhun dar 10:30 vel khan New Serchhip Kikawn Venga Pu Lalbiaknia te in luah lai chu bungrua engmah chuh hman lohin a kangral vek.

He in kâng hi a chung di, a bang dap leh a rel atan thingtuai hman niin, Pu C.Lalrotluanga, New Serchhip Bazar Veng ta a ni a, in kan chhan hi he in awmna mual let liama lo hâlnaa mei si per atanga kang tan a ni a, lo hi chhunah hian hâl a ni.

In kan tan lai hian in luahtu Pu Lalbiaknia nupui leh a fate 3 awmin, an fasen chu Pu Lalbiaknia nupui hian pua-in a fate pahnih, kum 3 leh kum 4 mi vel chu inchhungah an awm a, mei si per hi an inchungah tla-in, an inchung a kan lai hian Pu Lalbiaknia nupui hian a fate hi a tlanchhuahpui hman hlauh a ni.

In kang thelh tur hian Fire & Emergency Services chu koh an ni a, mahse kangthelh pawl an lo thlen chuan in hi a kangral hneh tawh hle a ni.

Kangmei tuarte tanpuina tur hian mimal leh sawrkar lam atangin pawisa fai leh thilpek engemawzat pek an ni tawh a ni.

Mizoram hmun hrang hrangah Zoram Ni hman a ni

Inrinni, March ni 5 khan Mizo Zirlai Pawl (MZP) bultumin Zoram ni hman a ni. Zoram ni pual hian mi engemawzatin Aizawl Millenium Centre tual zawl atangin Vanapa hall kawt thleng kawng an zawh a ni. Kawngzawh bul tanna Millenium Centre kawta neihah S.Lalrin awma Vice MZP President VL Krosshnehzova chuan he ni hman a tul chhan chu March 5 kum 1966 khan India sorkar-in Armed Force Special Power Act.1958 Mizorama a hman mek chu bawhchhia-in a hmanraw neih that ber zing a mi Jet Fighter hmangin Mizoram hmun hrang hrang meivap a a rawn chantir ni champha kha a ni a, kha ni kha ni lungngaihthlak Zofate tawrhna leh Pathian nasa taka kan auh ni a ni a, hei hi Zofaten kan hriat reng theih nan hman a ni ta a ni a ti.
VL Kroshnehzova chuan Mizote chu hnam ah chianga Kohhran leh Kohhran inkarah te Party leh Party inkar ah leh Pawl leh pawl inkar ah te insawiselna leh inelrelna a tama hei hi kan zavaia kan paih a,Mizo Hnam tana hmasawnna kawng kan ngaihtuah a tul a,hmasawnna hi enganga ropui pawh chawlut ila leilung fate thuneihna leh chanvo a awm si loh chuan awmzia a neilo a ti.
NESO Vice chairman Lalmuanpuia Punte chuan Mizote hi hnam insit tak a nih avangin India sorkar lakah hian kan inthlahrung mah mah a, chawm hlawm kan nihnate hi kan in zahpui thin a,hei hi a pawi hle a ni a ti. India sorkar in min chawm peih loh chuan vawiin atang hian min chhuahsan mai rawh se, ram dang te ang bawkin kan ke hian kan ding ve thei a . Independent sual leh tharum cho chhuak zawngin chu chu sawi kan nilo Lalmuanpuia Punte chuan a ti,
Zoram ni hmangtute hian Zoram ni au hla Zoram hi kan ram a ni, Kan ram hi Krista kan pe: Mizote hi Bomb chimih theih kan ni lo, Martar te thisen a luang ral lo ang etc. hmangte in an au rual a ni.

Health Department-in mihring hriselna atana hlauhawm nia hriat Damdawi chi 6 a puangzar

Serchhip 7th March 2011 : Mizoram sorkar Directorate of Health Services chuan mihring hriselna atana hlauhawm theia hriat damdawi chi hrang 6 puangzarin, Drugs & Cosmetics Act, 1940-in thuneihna a pek angin India sorkar-in heng damdawite hi siam, hralh leh semchhuah a khap tih thu chhuah siamin a tarlang.
Drugs & Cosmetics Act, 1940 hmanga damdawi khapte hi naupang kum 12 hnuailam tana nachhawkna atana hman tlanglawn tak (Nimesulide formulations) i.e.Sumo, Nise etc. te (hetiang damdawi hi thin lamin a tuar thei); hritlang leh nachhawkna atana hman Cisapride leh hetiang lam chi leh Phenylpropanolamine leh hetiang lam chi damdawi (hetiang damdawite hian thinphu rang a siam thei) te; Human Placental Extract leh hetiang lam kaihhnawih damdawi (hetiang damdawi hi chhul atanga damdawi siamchawp a ni a, hri tha lo inkai theih a ni i.e. Placentrex etc.) te; intihcher nana mi thenkhatin an hman thin Sibutramine leh R-Sibutramine leh a kaihhnawih damdawi (hetiang damdawi hian thawk lama harsatna a siam thei) te a ni.
Health Department thuchhuah chuan heng damdawi tarlan te hi Mizoram chhunga damdawi zuar zawng zawngte chu kawl leh zuar lo turin a hriattir tawh a. Heng damdawi thlaktu tur damdawi dang a awm tho avangin sorkar laipui hian Drugs & Cosmetics Act, 1940 tlawhchhan hian a khap tih a tarlang bawk.