MJA Serchhip District Conf. leh hruaitu thlanna neih a ni

Nimin Jan 30 khan I&PR Conference Hall Serchhip ah Mizoram Journalist Association, Serchhip District ten Annual Conference vawi 5-na hun an hmang a, hetah hian District Bawrhsap Pu P. Lalchhuanga chu khuallian a ni. He hun hmannaah hian khuallian Pu P. Lalchhuanga chuan thusawiin chanchinbu chu mipuite tan a pawimawhzia thu a sawi a, sawrkar hmalakna te sawisel ngawt lova mipuite hriata sawrkar hmalakna te puanzar a a tha lai fak sak hi a tul hle a ni tih a sawi. Thu a sawi zel naah dan leh thupek kenkawh chungchangah mipuite zirtirna pe uar turin chanhcinbu mite chu a chah bawk.

Chawhnu lamah hian President Pu Lalremruata Ralte kaihhruainain rerelna neih a ni a, hengte hi thu passed a ni -
1. Media Workshop Serchhipa neih anih theih nan hmalak ni rawh se.
2. Electronic Media ten advertisment rule an neih theih nan MJA Gen Hqrs ah thlen ni rawh se.
3. Serchhip khawpui chhung kawngpui(national Highway 54) siamthat anih theih nan hmalak ni rawh se.
4. Mizoram Journalist Welfare Rules hi huamzau zawka siamthat a nih theih nan hmalak ni rawh se.
5. Journalist ten pension kan neih ve theih nan chak lehzualin MJA in hma la rawh se.

Rorel neih anih zawh hian Serchhip District I&PR Officer Pu Andrew H. Lalremruata kaihhruaina hnuaiah hruaitu thar thlan a ni a, heng mite hi kum 2012-2014 chhung atana MJA Serchhip District hruaitu atana thlanchhuah te an ni-

President : Pu Kapliana Pachuau
Vice President : Pu Lalremruata Ralte
Treasurer : Pu C. Lalhminghlua
Executive members:
1) Tv Zonunsanga Kawlni
2) Pu PC Vanlalhruaia
3) Pu C. Ramengmawia
4) Pu PC Zonunsanga
5) Pu R. Lalmuansanga.

SERCHHIP BAWRHSAP-IN A THLAWNA ZIRLAIBU SEM TUR VAI LIAM

Tukin(24.1.2012) zing dar 8:00 khan SSA Mission, Serchhip bultumin Serchhip Deputy Commissioner Office tualzawlah kum 2012 Academic session atan Serchhip District chhunga Class I atanga Class VIII zirlaite tan zirlaibu a thlawna sem tur thawn chhuahna inkhawm hman a ni a, District Bawrsap Pu. P.Lalchhuanga’n heng zirlaibu thawnchhuahte hi a vai liam (flag-off) a ni.

Zirlaibu thawnchhuah inkhawmah hian District Bawrhsap chuan India ram Danpui (Constitution) in zirlaite an lo puitlina chhawr tlaka an hlawhtlin theih nana ruahmanna a siam bawhzuina atana sawrkar laipuiin Right to Education Act a siam hi thil chhinchhiah tlak, a bik takin miretheite tana hlu tak anih thu a sawi a, a bik takin thingtlang lama zirlaibu lei tur a van mai bakah a leina tur pawisa neih a harsat thu leh amah ngei pawh hetiang harsatna lo hmachhawn ve tawh thin anih thu a sawi a, SSA hnuaia Cluster hrang hrang 12 (sawmpahnih) a Village Council 40 (sawmli) vel a zirlai naupang nu leh pa te lu tihaitu ber ni tur zirlaibu man harsatna a hun taka phuhruk anih theih nana District Project Coordinator, SSA Mission Serchhip District leh a thawhpuiten Sawrkar ruahmanna bawhzuia chak taka hma an la chu lawmawm a tih thu sawi bawkin, hei hian India rama ziak leh chhiar thiam tamna ber District an nihna a chhawm nun tir zel a beisei thu a sawi bawk. Serchhip District chhungah hian kum 2012 Academic Session atan Class I atanga Class VII zirlai naupang 9080 hnenah zirlaibu a thlawna semchhuah tura ruahman niin, hei hi kum hmasa (2011) enrolment behchhana siam a ni a, Right To Education Act a awm tak avangin zirlai pek tur hi hei aiin a la tam thei a, chutiang thil a awm anih chuan ruahmanna thar siam anih tur thu DPC, SSA Mission Pu C.Lalthanzira’n a sawi a ni.

Zirlaibu hi Serchhip District chhunga Government Primary School leh Government Middle School naupang daih tur sem niin, Government-Aided (Adhoc, Deficit leh Lumpsum) school ah te pawh sem a ni a, Serchhip District chhungah chuan Middle section chauh Adhoc-Aided Schhol a pawm a nih rih avangin Private School te chu pek a theih rih loh a ni. Zirlaibu man hi Sawrkar laipui ruahman dan chuan naupang pakhat tan Rs. 150/- zel ruahman a ni a, hei hian eng tham mah a daih loh avangin Aizawl a SSA hotu lian ten ngaihtuahna nasa tak senga ruahmanna chi hrang hrang siamin zirlaiten an quota pangngai aia tam zirlaibu an dawng kim thei dawn a ni. Tun dinhmunah chuan Class I leh Class V Mizo Tawng zirlaibu a la thleng hman lova hei pawh hi a thlen veleh thawnchhuah nghal tur anih thu leh a hun taka sem chhuah kim hman vek beisei anih thu DPC in a sawi a, Zirlaibu te hi khawtina Village Education Committee Secretary te hnenah dah a ni ang a, an nin hma la in an huamchhunga Sikul tinah an sem darh leh ang.

Tukin flag off programme ah hian Serchhip District chhunga CRC panga - North Vanlaiphai, Hmuntha, Lungpho, Chhingchhip leh Khumtung a zirlaibu sem tur te Motor panga in an phurchhuak a, chhun lamah Serchhip khawchhungah sem leh a ni bawk dawn a ni. Nimin (January ni 23, 2012) khan CRC sawm – Khawlailung, Chekawn, Piler, Sialsir, East Lungdar, Sailulak, Leng, Thenzawl, Buangpui leh Neihloh ah te a thlawna zirlaibu sem tur hi phurh chhuah a lo ni tawh bawk a ni. Tukin zirlaibu thawnchhuah inkhawm hi Pu C. Lalnunzira, District Project Coordinator, SSA Mission Serchhip District in a kaihruaia, District bawrhsap Pu P.Lalchhuanga leh Pi Lallianzuali Bawitlung, SDEO ten thusawi na hun an hmang a, Serchhip Primary School Teachers’ Association leh Serchhip Middle School Teachers’ Association hruaitute bakah thuthar lakhawmtute an tel tha hle a ni.

Serchhip Darnam Vengah Road Roller in mi 1 chilhlum

Nizan, January ni 16 zan dar 8:30 vel khan Serchhip Darnam Vengah Road Roller in hnam dang mi pakhat a chil hlum. Kawng chil mamna motor, Road Roller in nizana a chil hi Jharkhan mi, Babulal Murmu kum 31 mi niin, PWD ten Mat phai zawlpui panna kawng alkatra an luannaa inhlawh a ni a. Roller hi a light a chhiat avangin torch light kengin Roller kawng entuah a tang a. Helai hmun an thlen lai hian kea kalin, torch light pawh hmet eng lova an kal chu Roller operator Rajesh Hemron kum 26 mi Jharkhan lam mi chuan a hma lamah a kal emaw a ti a, a sir lama Babulal-a kal chu Roller ke hnung lam hian inbarh lut palhin a lu a chil keh a, a chil lai hian aw a chhuah lova, operator hian a chil tih pawh a hriat loh avangin an bula kea kal pakhatin ding tura a auh hnua an din fel meuh chuan Babulal hi a lo thi fel hman tawh nia hriat a ni.

Babulal hian a lu a hliam na tak a tawrh bakah a khup ding lam a tliak a, a taksa leh a banah hliam pilh a awm nual bawk, Nizan khan amah awmpui thintu New Serchhip College road a Pu C.Lalsawmliana inah lumen a ni a, vawiin khan JN Hospital-a postmortem a nih hnuah Presby terian New Serchhip Pastor, Rev Lalhmachhuana’n a vui liam. Babulal hi PWD ten Zawlpui kawng metal hna an thawhnaah a thian te nen Theka-a kawng luan hna thawkin an zo fel tawh a, an rawn haw chhuak chu vanduaina hi an tawk ta a ni. He thil thleng an hriat ve leh Serchhip Police te pawh a hmunah kal nghalin thil tul ang ang an buaipui a, Serchhip Police station ah thubuai Case no 4 of 2012 Dt 16/1/12 Under section 279/304A IPC RW 181 MV Act an ziak lut nghal.

SERCHHIP-AH LARSAP HMUAH DAN TUR NGAIHTUAH

January ni 17 (Thawhlehni) a Serchhip tlawh tur Mizoram Larsap Pu Vakkom Purushothaman hmuah dan tur leh lo dawnsawn dan tur ngaihtuahin vawiin chhun khan Serchhip D.C’s Meeting Room-ah District bawrhsap Pu P. Lalchhuanga hovin Serchhip-a Sawrkar Department hrang hrang hotute leh Tlawmngai Pawl hrang hrang hruaitute an thukhawm. Vawiin District bawrhsap hova thurel ah chuan venhimna lam uluk leh zual anih theih nan Larsap hi 14 Assam Rifles ten an lo mikhual ang a, tlai dar 4:00 ah 14 Assam Rifles Auditorium ah Larsap lawmna inkhawm buatsaih tur niin heath hian Serchhip-a sawrkar hnathawk sawm bikte, Tlawmngai pawl hrang hrang aiawhte leh Kohhran hrang hrang aiawhte, thuthar thehdarhtute leh sawm bik mithenkhatte an tel anga, District Bawrhsapin Serchhip District chanchin sawiin hun a hmang ang a, Serchhip Sub-Headquarters YMA Cultural Troup ten hnam lam hmuhnawm tak an entir bakah zaithiam sawm bikte an zai ang. Larsap pual hian 14 AR Commandant Col. Ratnakar Trivedi chuan zanriah a buatsaih bawk ang. Larsap hmuahna inkhawm hi Local Cable TV ten mipui thlir theih turin an pe chhuak ang.

Larsap hi a nupui Dr. Lily Purushothaman, Pu K. Lalnghinglova IAS Secretary to Governor leh Pu Robert Lalchhuana, Editor Romei Daily Newspaper ten an tawiawm ang. Ruahman lawk dan chuan Larsap hian January ni 17 chhun dar 12:15 ah Thenzawl lutin amah lawmna inkhawm buatsaihah a tel ang a, hemi hnu hian Thenzawla Handloom Centre thlan bikte tlawh kualin an hnathawh dante a hmunah a en ang. Tlai dar 3:30 ah Serchhip lutin zan a riak ang. January ni 18(Nilaini) zingah Serchhip chhuahsanin Baktawng a Pu Ziona leh a chhungte a tlawh ang a, Thingsul Tlangnuam a 24 Task Force, Project Pushpak Headquarter-ah chhun chaw fakin hemi hnu hian Aizawl panin a haw ang.

DoNER Minister-in tun thlenga Referral Hospital
a taka hman theih a la ni lo chu pawi a ti

Serchhip 12th Jan. 2012 : Zan khat riaka Mizoram rawn tlawhtu,Ministry of Development of North Eastern Region (DoNER) changtu Union Minister of State Pu Paban Singh Ghatowar chuan nimin khan Mualpuia Rajiv Gandhi Stadium sak mek leh Falkawn a State Referral Hospital a tlawh.
DoNER Minister chuan Mualpuia Rajiv Gandhi Stadium sak mek chu a hmuna enin hna kal dan tha a tih thu leh a hun takah an zawh ngei a beisei thu a sawi a, peihfel a nih hun chuan hmarchhak State zinga Stadium tha ber a ni ang, a ti. Union Minister hian Pitarte tlanga Indoor Stadium pawh tlawhin tha taka sak a ni chu lawmawm a tih thu a sawi bawk.
Falkawna State Referral Hospital pawh a hmunah tlawhin DoNER Minister hian tun thlenga Hospital a taka hman theih a la nilo chu pawi a tih thu a sawi a. Mipui ten a tangkai thei ang berin hmang thuai se a duh thu sawiin, Hospital hi a taka hman a nih thuai theih nan sum mamawh engemawzat pek a inhuam thu leh Health Minister Pu Lalrinliana Sailo hnenah a tul anga bawhzuia Detailed Project Report thehlut tura a hriattir tawh thu a sawi.
Pu Paban Singh Ghatowar chuan DoNER Ministry chu Finance Ministry in guidelines a siamsak hnuaia kal, hmarchhak State 8 enkawl tura tih an nih hre reng chungin an sum neih atanga Mizoram hmasawnna tura theihtawp chhuah pui a inhuam thu a sawi a. NEC Chairman ni bawk Pu Paban hian Mizoram chu remna leh muanna Mizoramin a chawinun tlat avanga chhuanawm a tih thu leh duhsak tlak nia a hriatthu sawiin Arunachal Pradesh dawtah chuan hmar chhak State zinga NEC atanga sum hmu hnem ber an nih thu a tarlang bawk.

Tun Thal chhung hian kawngpui siamthat tum a ni
Tuirial leh Serchhip inkar erawh siam hman a beiseiawm loh

PWD changtu Parliamentary Secretary Pu Lalthanzara chuan Mizorama kawngpuite tun Thal chhunga siamtha turin chak taka hmalak mek a ni a ti.
Pu Lalthanzara chuan National Highway ngaih pawimawh hmasak a nih thu sawiin, Silchar ramri atanga Aizawl inkar kawng chu double lane-a siam mek a nih thu leh he kawng siam hna hi nakuma zawh hman tum a nih thu a sawi a. Lengpui atanga Tripura inkara NH-44A chu kum 2014 a siam zawh tura tih niin, Bairabi atanga Bilkhawthlir inkar NH-154 pawh kum 2014-a double lane-a siam zawh tura ruahman a ni a. Seling Zero point atanga Tipaimuk NH-150 pawh double lane a siam turin DPR siam mek a ni a ti bawk.
Hetihlai hian Aizawl atanga Tuirial inkar chu tun thal chhunga siam that hman turin hna thawh mek a nih thu PWD hotu ten an sawi a.Tuirial atanga Serchhip inkar erawh a hma atanga harsatna chi hrang hrang awm tawh avangin sanction thar nghah leh mek a ni a.Serchhip atanga Hrangchalkawn inkar pawh thal chhunga zo turin ruahman a ni a. Hrangchalkawn atanga Tuipang inkar erawh hna a hautak avangin zawh hman an inring lo deuh tih an sawi bawk.
Tun dinhmunah Mizoram hmun hrang hrang kawngpuite hi zawh tlak hmang loh khawpin a chhe tawh a ni.

Serchhip District-ah Voters 43034 an awm

Election Commission thu anga Mizoram hmundangte ruala Photo Electoral Roll siam thara a landan chuan Serchhip District-ah Vote nei Mipa 21,256 leh hmeichia 21,778, an vaiin 43,034 an awm a, Mipa aia hmeichhia an tam zawkna hi vote 522 a ni.

Serchhip District chhungah Assembly bial 3 awmin Hrangturzo bial chu vote nei thei tamna ber niin vote nei mipa 7172 leh hmeichia 7260, an vaiin 14,432 an awm a, Serchhip bialah Vote nei Mipa 7075 leh hmeichhia 7456, an vaiin 14531 an awm a, Tuikum Assembly Constituency-ah vote nei mipa 7009 leh hmeichhia 7062, an vaiin 14,071 an awm thung a, Serchhip District chhunga Electoral Roll-a awm zawng zawngte chuan EPIC hi an nei vek bawk a ni.

Vote nei thei tlem berna Polling Station chu Buhkangkawn niin, Vote nei mi 58 an awm a ni.