LUNGDAI NU VAI BAWNGCHAW ZAWNGIN PAWNGSUALIN SAT HLUM

Lungdai Nu, Pi Lalawmpuii w/o Lalthlengliana chu tukin(22.10.2012) zing dar 9-10 inkar khan Vai Bawngchaw zawngin pawngsualin a sat hlum.

Lungdai Branch YMA hruaitu Pu R.Lalrinawma chuan tukin zing chaw eikhama Chawhmeh la tura Lungdai thlang (Kolasib lam) Sazai kawn pengah Pi Lalawmpuii kum 40 la tling lo deuh hliam na tak tuara hmuh a ni a, a kekawrte lastic chawpa pawhthler a ni a, a tukkhum leh a ban bung thelha sah a ni a, Aizawl lam panpui a nih lai Sakawrhmuituai tlang vel an thlenin a chat thla ta a ni.

Pawngsuala rawng taka sattu hi Samir Ali Bawngpu, Vairengte bul Delaipur khua ni a rin a ni a, he chanchin ziahlai hian thalai 400 chuang rualin an zawng mek niin Lungdai Branch YMA Fin.Secy Pu R.Lalrinawma chuan a sawi bawk.

Nu khawngaih thlak tak Pi Lalawmpuii kum 40 la tling lo deuh hian Pu Lalthlengliana nen fa 4 hmeichhe 3 leh mipa 1 an nei niin thudawnna chuan a sawi.

Khawtlang an tin ur, rapthlak an ti a, a titu Samir Ali hi man chhuah ngei an duh a, reilote chhungin Lungdai thalai leh mi tlawmngai 200 atanga 400 velin Silchar motor kawng tlangdung zawngin an chhuak nghal a, tun tlai dar 1 thleng hi chuan man ala ni lo niin Pu Lalrinawma chuan a sawi.

REVENUE MINISTER PU J.H.ROTHUAMA HOVIN INDIA INDEPENDENCE DAY VAWI 66-NA SERCHHIP-AH LAWM ANI

Vawiin chawhma dar 10:30 khan Khawtetlang Field, New Serchhip-ah Independence Day ropui taka lawm a ni a, Pu J.H.Rothuama Revenue Department, Excise & Narcptics Department etc., changtu Minister chuan khuallian niin a hmanpui. He India ram zalenna champha lawmna niah hian March Past Contingent 24 (Armed Contingent-3, Unarmed Contingent-2 leh School Contingent-19) an awm a, 14 Assam Rifles Pipe Band in India hnam hla an rem bakah march past neih laiin rimawi an tum bawk a ni.

Minister hian Independence Day lawmna hmun a thlen veleh hian India hnam puanzar a pawt pharh a, hemi zawh hian March past nei tur parade contingent 24 te chu endikin Parade Commander Inspector C.S Lalrinzuala, 2nd batallion M.A.P kaihhruai March past parade contingent te chibai buk a chhanglet nghal bawk a ni.

He ni lawmnaah hian khuallian chuan vawiin hi dikna, beiseina nung leh hmasawnnate lantirtu anih thu sawiin, ram tana zalenna sualtu mualliam tawh mihuaisente, martar-te leh hruaitu ropui tak tak te chhuanawm zia leh kan thinlunga kan hriatreng a pawimawh thu a sawi bawk.

Minister chuan India ram chu hnam chi hrang hrang leh sakhaw hrang hrang betu teintluktlanna hmun anih thu sawiin kan zavaia lungrual taka cheng za tur kan ni a ti a, Mizoram Sawrkar pawhin boruak ralmuang leh muanawm tak hnuaiah hlemhletna tel lo rorelna kalpui turin theihtawp a chhuah a, hma a la chhunzawm zel dawn ani a ti bawk.

NLUP chungchang pawh sawi langin Minister chuan NLUP chu Mizoram mipui zawng zawngten a zar kan zo theih tura ruahmanna siam a ni a ti a, Planning Commission pawhin NLUP ruahmanna tha a tih avangin NLUP atana sum senso tura ruahman pawh kum 2011-2012 a cheng vaibelchhe 234 kha kum 2012-2013 atan chuan cheng vaibelchhe 370 zet a ruahman a ni a ti a, 11th Plan hun tawp lamah hian tlangram lo neihna atana ram kan hman pawh 42% laia a tlakhnuam hman thu a sawi bawk. Kum kalta lama NLUP dawng tura thlan tawh chhungkaw 90,139 belhchhah turin kumin chhung hian chhungkaw 29,861 thlan an nih tur thu sawiin, Serchhip District a NLUP dawngtu chhungkaw 3075 hnenah pawisa Rs. 18,65,01,231 /- sem tawh anih thu leh, Serchhip-a NLUP First Phase hnuaiah hian beneficiaries te hnathawh 72% aia hniam lo hlawhtlinna hmuh beisei anih thu a sawi bawk.

Ama department enkawl te sawi langin Minister chuan M izoram sawrkarin Co-operative Society te kalphung tur policy mumal tak siam a mipuiten tangkai taka an chhawr theih nan Co-operative Development Council din tura hma lak mek anih thu a tarlang a, Primary Agricultural Cooperative Society 132 te sum hloh belhkhawm cheng vaibelchhe 24.58 zet thaibo anih theihna turin Short Term Cooperative Structure atan Mizoram Sawrkarin Sawrkar Laipui leh NABARD nen MoU a ziahfel pui tawh thu a sawi bawk.

Revenue Department pawhin inrelbawlna a felfai zawk nan House Site Cadastral Survey leh ruahmanna dangte chak taka a kalpui mek thu sawilangin Minister chuan kumin chhung a lei chhian atanga sum hmuh tawh zat chu cheng vaibelchhe 3.67 lai a ni tawh a ti a, National Land Record Modernisation Programme chu Serchhip District- ah tan thuai anih tur thu a sawi bawk. Social Welfare Department hnuaia Ekalavya Residential Hostel sakna tur Serchhip Vengchung ami te, Higher & Technical Education Department hnuaia New Polytechnic sakna tur ram Chhiahtlang ami te, Oil India Limited ten tuialhthei laichhuahna hmun tur Thenzawl ram hectare 3.68 a zau te, Serchhip to Buarpui inkar ADB sum hmanga laih za tur atan hna chak tak thawh mek a ni a ti bawk. Hei bakah hian Serchhip District chhunga Sawrkar Department hrang hrang ten hmasawnna hna an thawh hrang hrangte a tarlang bawk a ni.

Minister hian March Past Parade contingent te hnenah hian lawmman a sem nghal a, a titha zualte chu : Pakhatna – Little Flower Convent School Pahnihna – Ramlai Middle School Pathumna – Marian High School te an ni a, parade contingent zawng zawng hnenah participation prize sem vek a ni. Vawiin Independence Day lawmna inkhawmah hian Serchhip District chhung atanga India ram huap naupang huaisen lawmman (Jeevan Raksha Padak Award) dawngtu Baktawng khaw naupang Lalpuihzuali d/o Thanmawia hnenah a award dawn hi hlan a ni a, India President aiawhin khuallian Revenue Minister in a hlan a, he award hian tangka fai Rs. 40,000/- bakah medal leh citation a keng tel a ni. Naupang huaisen Lalpuihzuali hi April ni 4, 2002 a piang a ni a, kum 2010 khan a thiannu khama tla tur chhan a tumna lamah amah pawh hi tla tel ve in hliam na tak a tuar a, rei tak enkawl anih hnu ah a thachhuak leh a, a thiannu pawh hi a damchhuak a ni, hetih lai hian Lalpuihzuali hi kum 8 a upa a ni.

Vawiin Independence Day lawmna inkhawm ah hian hnam zia rang tarlang thei item hmuhnawm tak tak entir a ni a, MHIP Sub-Headquarters Serchhip- in Par Lam an entir a, 14 Assam Rifles ten Khukri Dance, Bihu Dance leh Bhangra Dance entirin, Sub-Headquarters YMA Serchhip Cultural Troupe ten Siktuithiang Lam leh Tlang Lam an entir bakah SSA Choir, Serchhip ten zaipawl hla mawi tak an rem bawk a ni.

Independence Day pual hian nimin (August ni 14) chawhnu khan JNM Hospital, Serchhip, Orphanage Home, Zoar Rescue Home leh Shalom Special School ah te tanpuina pek a ni bawk.

Independence Day pual inkhawm zawh anih hnu hian DC’s at Home chu sawmbikte tan DC Bungalow ah neih a ni.- DIPRO

Serchhip ah Zirlai ten zirtirtu ngiatin kawng an zawh, naktuk atangin School khar tum

Vawiin Dt 6th August 2012 chawhma 10:00-11:00 Am khan Govt Higher Secondary School Serchhip zirlai 350 chuang zet te chuan zirtirtu an neihloh chungchanga lungawiloh lantir nan Govt Higher Secondary School Serchhip atanga bazar thleng (1/2 Km vel) kawng an zawh a. Kawng zawhtute hian Serchhip Bazar ah mual inkhawm tawi neiin, Govt Higer Secondary School Students Union President R.Lalfamkima leh Mizo Zirlai Pawl Headquarters Serchhip Vice President Lalramnghaka Kawlni ten thu an sawi. GHSS Serchhip zirlai te hian naktuk(7th Aug.) atang hian an zirtirtu te Class kal tur pawh dang a, Sikul khar an tum a ni.
Kawng zawhtute hian “Sawrkar hian kan mamawh zirtirtu min pe rawh se”, “RMSA zirtirtu kan duh lo”, “Sawrkar hian min bum tawh suh se” tih te leh, “Sawrkar hian kan mamawh ang Mathematics leh History Lecturer min pe rawh se” ti te in uar takin an au rual a. Tin, placard leh poster hrang hrang ah zirtirtu an mamawhna thu ziak kengin hmun hrang hrang ah an tar bawk. Boruak muanawm tak hnuaiah kawng zawhin Serchhip Bazar ah intawhkhawmna neiin resolution pathum an pass a, Chungte chu :
1. Mizoram sawrkar hian State atanga hlawhla ngei (RMSA hnuai a mi ni lo) History Lecturer contract tal zirtirtu min pe rawh se.
2. Mathematics a zirtirtu pakhat chauh kan nei hi a dan tur ang takin pakhat dang min pek belh rawh se.
3. Heng kan thil phut te hi a hlawhtlinnna a tak ngei a kan hmuh hma chuan a tul dan angin kan kal zel ang.
Govt Higher Secondary School Serchhip te hian science subject zirna an neih tirh atangin mathematics zirtirtu hi pakhat chauh tun thleng hian an la neiin an in daihlo hle a, (Sawrkar norms ang chuan subject tin ah zirtirtu pahnih theuh tur a ni) Course pawh an zo hman manglo thin a ni. Govt Higer Secondary School Serchhip ah hian History subject leh Education a zirtirtu pahnih Aizawl ah sawn an ni a. Zirlaite nawrna avang in an aiawh tur hian Contract pakhat (edn) leh History zirtirtu tur RMSA atangin pek an ni a. RMSA bik hi zirlai ten rem an ti lo chung leh an duhlo chung sawrkar lam hotuten contract a thlak leh thuai tura an intiam avang leh, Deputy Comissioner Serchhip leh District Education Officer ngenna avangin lungawilo tak chungin an lo pawm tawh a.
An hlauhthawn ang ngeiin kar hnih hnu ah chuan History Lecturer chu RMSA atanga rawn lak kir a ni leh ta a ni. Serchhip DC leh DEO ten lakir lo tura an ngenna pawh ngai pawimawh thei loin sawrkar Official pakhat, Education Deptt. Deputy Director, Aizawl DEO Charge la mektu leh RMSA a DPC ni bawk Pu R.Kapzauva phei chuan “RMSA mi leh sa a ni a, a hna a thawk tur a ni. In duh leh lo nuar leh mai rawh u” tiin Principal leh zirlai te hnenah a sawi nghe nghe a niin Serchhip MZP Hqrs. hruaitute leh GHSS Serchhip zirlai hruaitu ten kan palai an hrilh. Heng te avang hian zirlai te chuan RMSA zirtirtu hi hun lo kal leh zel tur thlirin an duh tawh lo niin an sawi bawk.

NIT dahna tur sawn avanga Thenzawl mipui pungkhawm leh Police innawr

Aug ni 1 hian NIT Thenzawla dah tura tih tawh Lengpuia awm tura sawrkarin a sawn leh tak duhloh lantirna Thenzawl ah neih a ni a, kawngpui lun laiah an pungkhawm a dan leh thupek kengkawhtute nen an in nawr nasa hle a, mi 6 in hliam an tuar. Thenzawl MZP Sub-Hqrs. bultumin, Thenzawl khawchhunga Political Party hrang hrang te leh NGO (YMA, MHIP, MUP, MSU) ten NIT Thenzawl-a awm tura Sorkar hotu lu ten an sawi leh an puan tawh Lengpui-a dah tura tih anih leh tak chungchangah Lungawiloh lantir nan Thenzawl Field Veng, Aizawl – Lunglei (World Bank Road) kawngpui lun laiah an pungkhawm a. Motor dan an tum chu thuneitu lamin remti lovin, tum 2/3 lai an innawr a, hetia mipui leh Police innawrnaah hian Thenzawl East VCP Pu Lalropuia Sailo chuan a lu ah hliam a tuar a, Thenzawl Community Health Centre (Damdawiin)ah hruai niin, First Aid pek a ni a, a hnuah chhuah leh a ni. A ni bakah hian, midang 5 lai Dawmdawiin-ah hruai an ni a, first aid pek an ni bawk.

Mipui pungkhawm te hian a tir lamah chuan kawngpui hi an dang thei lova, a hnu-a pungkhawm an tam deuh hnu chuan kawngpui dangin, kawng an zawh a, pawl hrang hrang aiawh ten thu an sawi a. An kawng zawh chhung hian darkar khat leh a chanve vel kawngpuiah hian lirthei kal tlang thei lovin an tangkhang a ni.

He Lungawiloh lantir naah hian MZP Sub-Hqrs, President V. Laltlanzova bakah, MZP Headquarters, Lunglei President Eric Zomuanpuia, MZP Headquarters Serchhip hruaitute leh Party hrang hrang leh NGO aiawh ten thu an sawi a. Thusawitute chuan, Thenzawl-ah NIT hi dah ngei an duh thu te, Thenzawl-a Sorkar hmun pawimawh sawn chhuah thin anih an duh loh thu leh, hmun pawimawh apiang Aizawl leh a chhehvel ringawta ekbeng thin an duh loh thu te, Chhim lam enhrang bik nia an inhriat thu te an sawi hlawm a ni.

Kawng zawhtute hi au rualin, NIT Thenzawl-a dah tura ngaih tawh, sawn ani leh an lungawiloh thu te, Thenzawl-a NIT dah let leh an duh thu te, VCP kuthlak tu an dem thu leh hrem an phut thu te an aupui a ni.

Mipui kawng zawh hi an thahnem hle a, Police lam pawh PTC, Thenzawl a mi leh Serchhip atangin DSP hovin thahnem tak an duty a, buaina lian tham lutuk chhuak lovin,  kawng zawh hi an zo fel a ni.

Kawng zawh mai bakah hian, vawiin dar 9 leh dar 11am inkar khan Thenzawl khawchhunga Dawr zawng zawng khar niin, Sorkar Office pawh khar vek tura ngen an ni a, In -ah Puandum an zar a, Lirthei an che chhuak lo bawk.

MZP hruaitute chuan Thenzawl Forest Division sawn chhuah tumna awm te, Thenzawl-a Sorkar Office-a awm tur hnathawk awm lo tam lutuk te, tun thlenga SDO(C) Office leh Quarter pawh la awm lo te chu Sorkar-in an khua  a hlamchhiah zia tilangtu an ngaih thu sawiin,  theihtawp chhuaha hmalak chhoh zel an tum thu an sawi a ni.

NIT vangin puandum nen naktukah Thenzawlah Road Block

Serchhip 31st July : Tukin zingah khan MZP Sub-Hqrs Thenzawl kaihhruaina in Thenzawlah NIT chungchangah Meeting neih a ni a, hetah hian Thenzawl a NGO hrang hrang te bakah Political Party(Rulling Party te pawh telin) te an kal tha hle. He inhmuhkhawmnaah hianMizoram sawrkarin Thenzawl hmuna NIT dah tura a tihfel vek tawh Lengpui lama dah tura Assembly House a tarlan a ni leh ta chungchanga hmalak dan tur ngaihtuah a ni a. Naktuk hian lugawilohna lantir nan zing dar 9-11 inkarah Thenzawlah Road Block siam nise puan dum zar ni bawk se an ti.
Thenzawla Road Block neih anih chhung hi chuan Thenzawl khaw kaltlanga motor veivak zawng zawng khualzin motor leh private motor te pawh dan vek an tum a ni. He inhmuhkhawmnaa kalkhawm tam zawkte chuan ni 2 chhung vel road block hi siam an duh a, mahse mipui te tana harsatna siam zawnga chet vak kha a thalo tiin darkar 2 chhung Road Block hi an rel thlu ta niin thudawnna chuan a sawi. He Meeting hi MZP Sub-Hqrs President Laltlanzovan a kaihruai a, NIT chungchanga lungawilohna lantir dan chungchangah hian NGO leh Political Party hrang hrang te pawh an lungrual hle niin thudawnna chuan a sawi.
Chief Minister in NIT hmun Thenzawla dah a tiam hnu a Lengpui a dah anih leh tak chungchangah hian tunhnaiah khan pawi an tih thu Serchhip District MJA leh MZP Headquarters Serchhip te chuan thuchhuah siamin an lo tarlang tawh nghe nghe a ni.

SERCHHIP BAZARA SA ZUAR TE MAGISTRATE HOVIN ENDIK

Serchhip: 28th July, 2012:  Serchhip khawpui chhunga sa zawrhna rate zawm tur District Bawrhsap Pu P.Lalchhuanga’n July ni 18, 2012 a thuchhuah a lo siam tawh chu zawm that a nih leh nih loh enfiahin tukin (inrinni) khan Serchhip Bazarah Magistrate Pu H.Lalrinpuia, MCS hovin police te an duty a, hemi rual hian Sa zuar te buk lung hman lai chu a dik leh dik loh an enfiah nghal bawk.

 Pu H. Lalrinpuia chuan tukin enfiahna ah hian Bawrhsap thupek bawhchhia an awm lo ni a a hriat thu a sawi a, buk lung pawh sa zuar ten an hmang dik tih sawiin, amaherawhchu Trade&Commerce Department in sa zuarte an kuta bukna (Weigh) khai lova, thingah emaw bukna hi khai tura a tih chu zawm an awmlo tih thu a sawi a, a rang thei ang bera sawrkar duh dan anga bukna hi thinga khai vek tur a an hrilh nghal thu a sawi bawk.

Serchhip Dist. MJA ten Thenzawl a NIT dah tumna tlawlh pawi an ti

Inrinni(28th July) khan Serchhip Dist. MJA te chuan an Office, Serchhip Bazar ah Meeting pawimawh tak neiin hemi hnu hian thuchhuah an siam nghal a, Mizoram sorkar in Thenzawl a National Institute of Technology(NIT) dah tura ruahmanna a siam a tlawlh leh ta si chu pawi an tih thu an tarlang.
Serchhip Dist. MJA thuchhuah chuan Mizoram sorkarin duhsak taka Thenzawl a NIT dah tuma hma a la chu lawmawm an tih thu an tarlang a, chutihlaikara Mizoram sorkar duhdan a hlawhtling leh a si lo chu pawi an tih thu tarlangin Thenzawl hi Mizoram hmun laili taka awm, ram rem tha tam tak awmna a nih avangin Zoram tana thil tha leh pawimawh dahna atan Mizoram sorkar in hmang zel se an duh tih an tarlang tel bawk.
Inrinni a Serchhip Dist. MJA Meeting hian NLUP chu Party mal ni lo, Mizoram sorkar Flagship Programme a nih tawh avangin a hlawhtlin ngei theihnan theihtawp chhuah ve ni se an ti a, hemi atana tih theih an neih ve ang te naktuk(July ni 30) chawhnu dar 1 hian Serchhip Dist. Bawrhsap Pu P.Lalchhuanga, a Office ah hmu in sawipui nise an ti.
Hei bakah hian Serchhip Dist. MJA te hian thla 1 kalta atanga Serchhip JN Hospital Canteen awm ta lo chu damlo tam tak ten harsatna an tawh phah nia hria in ngaimawhawm an tih thu an sawi a, hemi chungchang ah hian naktuk(July ni 30) chawhma dar 11 hian Serchhip Dist. Medical Superintendent Dr.Lalawmpuia, a Office ah lengin sawipui nise an ti bawk.

Ursuline Franciscan Congregation kum 125-na Serchhipah hman a ni

Nimin khan Aizawl Diocese-a Ursuline Franciscan Congregation te chuan Serchhip-ah an congregation din cham vawi 125na (Post Centenary Silver Jubilee) an lawm a, Most Rev. Bishop Stephen Rotluanga CSC Aizawl Bishop leh Pu P. Lalchhuanga District Bawrhsap ten khuallian leh khual zahawm niin an hmanpui.
He Jubilee lawmna pui ber chu an congregation hmun pui ber Mangalore-ah April 12, 2012 khan neih a lo ni tawh a, Aizawl Diocese pual tan vawiin hian he jubilee lawmna hi buatsaih a ni. He Jubilee lawmna hi chhawng hniha neih a ni a, a chhawng khatna chu Our Lady of Assumption Church, Serchhipah ah Bishop hova Lawmthu sawina Mass hlan a ni a, chumi hnuah Little Flower Convent School Hall-ah a lawman hun hman ho leh nghal a ni. He hun hmang tur hian Bishop mai bakah Aizawl Diocese Vicar General Rev. Fr. Arullapan te, Ursuline Franciscan Congregation, North East Province-a an Mother Superior, Sister Milly Fernandes te leh Puithiam leh Sister thahnem tak an lo kal a ni.
Ursuline Franciscan Congregation te hi Catholic Kohhranin Mizorama hmeichhe pawl rawngbawltu an neih pawl hrang hrang 12 zinga pahnihna niin kum 1976 atang khan rawngbawl hna an rawn thawk tan a, tunah hian Mizoram hmun hrang hrang pariatah rawng bawl mekin an rawngbawlna pui ber chu zirna in enkawl a ni a, chumi piah lamah rinna lama kohhran mipuite kaihhruai te, thingtlang mipuite ei leh bar zawnna kawnga tihhmasawn te, tihdamna lam te leh vantlang rawngbawlna chi hrang hrang an kalpui mek a ni. Mizorama an rawngbawlna hmun langsar deuh te chu, Little Flower Convent School Serchhip te, St. Peters School (Elementary Section) Chhingchhip te, Sacred Heart School Lunglei bakah St. Mary’s School Aizawl Electric veng te hi an ni.
Ursuline Franciscan Congregation hi kum 1887 April thla khan German Puithiam Urban Steina’n Mangalore-a Rosario Cathedral-ah a din a ni a. Tunah hian India ram state hrang hrang 12 bakah Europe ram leh Africa ram lam te thlengin an inzar pharh tawh a. Tun dinhmunah rawngbawltu sister puitling 821 leh sister ni tura zir lai mek engemaw zat an awm mek a ni.

SERCHHIPAH SA ZUAR TEN DC THUPEK ZAWM LOVIN SA AN HRALH

Serchhip: 21^st July. 2012: District Bawrhsap, Pu P. Lalchhuanga hmalaknain Serchhip Town Area Rate and Wages Control Committee din a ni a, he committee hian district hrang hrang a thil man te leh a lak luhna lamte ngaihtuahin Serchhip town atana hman tur rate a bithliah a, chu rate thar chu hman nghal turin DC hian July ni 18, 2012 khan thupek a chhuah a ni.

He thupek ang hi chuan Bawng sa chu; a ti Rs. 200/Kg, a ruh Rs. 180/Kg leh a thin chu Rs. 250/kg zel a hralh tur a ni a. Amaherawhchu he thupek zawm lo hian tukin zing khan Serchhip a sa zuar thenkhat te chuan bawng sa ti hi Rs. 220/Kg-in an zuar lui leh a, heng mite hi Police te chuan la nghalin thu an zawtfiah nghal a. Police-te chuan heng mite hi thupek zawm lova rate sang a an zuar lui leh a nih chuan an chungah dan ang a action na taka lak tawh tur a nih thu an hrilh a ni.

SERCHHIP-AH SA RATE LEH MISTIRI HLAWH BITHLIAH FEL A NI

Vawiin chawhma dar 11 khan Serchhip DC’s meeting Room ah Serchhip Town Area Rates & Wages Control Committee chu an Chairman District Bawrhsap ni bawk Pu P.Lalchhuanga hovin, Serchhip town area a sa chi hrang hrang hralh chhuahna rate leh mistiri leh hlawhfa rate ngaihtuahin an thu khawm a, hemi chung chang lo zirchiang tura din Study Group report zulzuiin Serchhip khawpui huamchhunga sa leh mistiri hlawh hetiang hian bithliah fel a ni.

1. Bawngsa rate : A ti Rs 200 /- per kg, A ruh Rs. 180 per kg, A thin Rs. 250/- per kg.

2. Vawksa rate hmanlai Rs. 180/- per kg

3. Arsa : Rate hmanlai Rs. 200/- per kg

4. Sangha : Dil sangha Rs. 200/- per, Phai Sangha erawh chu phai lam atanga Serchhip a rawn thlenna rate azira hralh tur a ni.

5. Thing leh Lung Mistiri : Thing leh Lung Mistiri hlawh hi Rs. 300/- aia hniam lo leh Rs. 500/- aia sang lo (Rs.300/- leh Rs. 500/- inkar ), a chhawrtu te leh Mistiri te inbiak rem dan azirin hemi ruahman sa in a huam chin ah hian in chhawr tur a ni ang. Hlawhfa (Labour) nikhat hlawh atan mipa in Rs. 220 /- aia sang lo, hmeichhia in Rs. 180/- aia sang lo a ni tawh ang.

6. Cement Mistiri leh Helper : Cement Mistiri hian nikhatah Rs. 350/- a hlawh ang a, Helper in nikhatah Rs. 200/- a hlawh ang.

7. Lumeh Man : Mipakhat lumeh man Rs. 30/-

8. Thingzai zawrhna rate : 4”x4” hi tlawn khat Rs. 520 /- aia to lo, leh 4”x3” hi tlawn khat Rs. 420/- aia to lo a zawrh/hralh tawh tur a ni ang.

9. Thing zaina rate : 4”x4” phel phawk Rs. 15 /-, 4”x3” phel phawk Rs. 10/- a zai tawh tur a ni.

Committee chuan MRP nei chi reng reng chu a dan dik taka hralh thin turin Serchhip khawchhunga dawrkai zawng zawngte a ngen a, mipuite pawh thil an lei dawnin MRP en hmasa zel turin leh MRP aia to a lei lo turin a ngen nghal bawk, thu chhuak zawm lo te chungah dan angin action lak a nih tur thu Bawrhsap chuan a sawi a, MRP neilo chi dawr bungrua hrang te pawh Study Group hian a zirchiang leh anga, an zawh fel hnu ah committee in a ngaihtuah leh dawn a, hei bakah hian Serchhip Town Area Rates & Wages Control Committee hmalakna te mipuiten an hriatchian leh zual theih nan hun remchang hmasa berah Cable TV ah talk show –cum- live phone-in programme hman tur a rel a ni bawk.-DIPR

MIZORAM BUDGET 2012-13 HIGHLIGHTS

# Budget sum hman tur zawng zawng Cheng vbc 5176.25
# Hmuh tur zawng zawng Cheng vbc 5179.92
# Sorkar hnathawk hlawh a kal tur Cheng vbc 2057.76
(Non-Plan – Cheng vbc 1615.64, Plan – Cheng vbc 416.15 & CSS/NEC/NLCPR – Cheng vbc 25.97)
# NLUP atan Cheng vbc 370 dah a ni a, NLUP dawngtu (beneficiaries) 29,861 in an pun belh ang a, kumin chhung hian NLUP dawngtu tura ruahman zawng zawng chhungkaw 1,20,000 tuam chhuah tum a ni. Hei bakah hian RKVY hnuaia sum hmuh tur Cheng vbc 40 chu NLUP atan hman tum a ni!
# Inthlan kum a ni bawk a, MLA ten an bial chhung hmasawnna atana an hman tur MLAD fund pawh Cheng nuai 25 atangin Cheng nuai 30 ah tihsan a ni.
# Tun sorkarin a ngaihpawimawh em em Lunglei High Powered Committee hman tur Cheng nuai 600 dah a ni a, District dang panga – Aizawl, Champhai, Mamit, Kolasib leh Serchhip te a District Planning Committee hman tur Cheng nuai 500 dah a ni. Hei bakah hian Sialkal Tlangdung Development Committee hman tur Cheng nuai 50 dah a ni bawk.
# Budget a thil thar lo lang chu Visual Arts chawisanna atan Cheng nuai 20 dah a ni
# State chhunga kawng siamthat/chei thatna atan Cheng vbc 329.37 ruahman a ni.
# Ruling leh opposition party-ten lawmthu an sawina Annual plan sum Cheng vbc 2300 chu Agriculture in Cheng vbc 504.88 an chang dawn a; Rural Dev – Cheng vbc 49.29; Irrigation & Flood Control – Cheng vbc 115.36
# School Education budget 20% dawn laiin a pung.
# Inthlan kum a ni dawn bawk a chhiah thar hlak lak tur ruahman a ni lo Gas (LPG) a chhiah 4%, Petrol 20% HS Diesel a 12% lak mek chu chhunzawm a ni dawn. Vehicles Tax ennawn tur a nih thu leh committee din a nih thu tarlan a ni. TUI BILL tihsan a ni dawn.
# State leiba tlingkhawm chu Cheng vbc 3759.76 ni a chhut a ni.

Tualchhung

Tualchhung (13.7.2012)

DIPRO leh Journalist-te
 Nimin(Zirtawpni 13.7.2012) khan Dist.Information Officer Pu Andrew H.Lalremruata’n a office-ah Serchhip District-a Accredited Journalist-te thingpui inpuiin, chanchinthar theh darh kawnga hma sawnna tur leh inrel bawlna hrang hrang a sawipui a. Thawh hona tur hrang hrang an sawi tlang bawk.

Prelim exam paltlang
 Thla hmasa, June ni 28-a MCS (Combined Competitive Examination 2012)  Prelim Exam neih Result chu tihchhuah a ni ta a, heng mite hi Serchhip atanga tling niin,Mains Exam an la hmachhawn leh dawn a ni.
1) Lalnunfela Chawngthu
    s/o Ch.Biaksanga, Field Road
2) HC.Kapchhunga
    s/o H.Sanghleia, Venglai, New Serchhip
3) K.Lalrinchhana
    s/o K.Zonghinga, New Serchhip
4) Lalrinmawia
    s/o Lalbiakliana, Chanmari Veng

Camping chhuak
 Serchhip Vengchung Kohhrana Camping zo felin, camper-te nimin chhun khan an rawn chhuak. Camping hi karleh lamah neih leh tura ruahman a ni.

SERCHHIP DC OFFICE IN “ZAMZO AWARD 2012” DAWNG

Vawiin chawhma dar 11:00 khan Serchhip D.C. Conference Hall-ah District Bawrhsap Pu P. Lalchhuanga hovin Head of Department te leh Serchhip District Anti-Tobacco Squad member ten vaihlo khuahkhirhna dan COTPA, 2003 an zir ho a, hetih rual hian Serchhip District chhunga puipunna hmun a vaihlo khu laka fihlim ber lawmman “Zamzo Award-2012” chu Deputy Commissioner Office hnen ah hlan ani nghal bawk.

Vawiin a inkhawm hmanpuitu District Bawrhsap chuan vaihlo leh a kaihhnawih do chungchanga District Level Task Force leh Anti-Tobacco Squad te hmalakna chak tak avang a hmasawnna hmuh theiha a awm chu lawm awm a tih thu sawiin Cancer vei tamna ber District kan nihna pawh hi reilote ah kan ti rehthei in ka ring tlal a ni a ti a, Bible in mahni taksa vawng thianghlim tura min tih laiin kan taksa tana tha tur eitur tuihnai leh hrisel ei tam lova, kan chhiatpui tur vaihlo leh a kaihhnawih laka kan insum duhlo hi apawi a tih thu a sawi bawk.

Sa Rate tisangtu te Serchhip DC in ni 10 

chhunga insawifiah turinhriattir

Serchhip Dist. Bawrhsap Pu P.Lalchhuanga chuan Serchhip Sazuar Association te hnenah hriattirna pe in May ni 5, 2012 atanga Serchhip a Bawngsa Rate Kg. ah Rs.200/- ni thin Rs.220/- a an tihsan chhan May ni 16, 2012 ral hma ngeia insawifiah turin a hriattir a, Bawngsa man pawh Kg. 1 ah Rs.200/- a tihniam lehnghal turin a hriattir.
Serchhip Dist. Bawrhsap Pu P.Lalchhuanga chuan April ni 10, 2012 khan Serchhip Town huamchhunga Sa leh thildang rate khuahkhirh a, control-tu tur Serchhip Town Area Rate & Wages Control Committee din a nih tawh thu sawiin he Committee ah hian thilman/rate tihsan duhtu te chuan dilna an thehluh hmasa phawt thin tur a ni tih a tarlang a, hemi ngai pawimawh lova Bawngsa Rate lo tisangtute chu an rate tihniam lehnghal tur leh a ranglama insawi -fiah turin a hriattir ta a ni.
April thla tir lam khan Serchhip a Mistiri Association te pawhin an Rate chu Rs.400/- atangin Rs.500/- ah an tisang a, chu chu DC hova din Serchhip Town Area Rate & Wages Control Committee hian an lo tihhniam sak tawh bawk a ni. Serchhip Town Area Rate & Wages Control Committee hian thilman dang pawh khuahkhirh zui zel an tum nia hriat a ni.

SERCHHIP HORTICULTURE DIVISION HNUAIA NLUP BENEFICIARY 844 TE THIRD INSTALLMENT PEK AN NI

Vawiin khan Serchhip Horticulture Division hnuaia NLUP dawng tura thlan chhungkaw 844 te hnenah NLUP 3rd Installment pawisa pek chhuah kim a ni.

NLUP 3rd Installment hi Serchhip District a Hrangturzo Cluster a NLUP Horticulture beneficiary te hnenah April ni 18, 2012 khan semchhuah vek a ni tawh a, Bank awmna khuaah chuan NLUP beneficiary te hian Bank account hawngin Bank kaltlanga sem a ni a, Bank awmlohna khuaah te chuan a sumfai a sem a ni. Semna centre te chu Keitum, Bungtlang, Khawlailung, East Lungdar, North Vanlaiphai, Mualcheng leh Biate te an ni.

Vawiin April ni 20, 2012 hian Serchhip leh Tuikum Cluster ah te sem leh a ni a, heng cluster pahnihah te hian Bank awmna khuaah chuan beneficiary te bank account ah pawisa dahsakin Bank kaltlanga sem a ni a, Bank awmlohna khuaah te chuan tangkafaia sem a ni bawk. Vawiin hian Serchhip, Chhiahtlang, Thenzawl, Chhingchhip, Baktawng, Khumtung, Hualtu leh Thentlangahte NLUP 3rd Installment hi sem a ni a, Pu Lalhmangaiha DHO, Serchhip leh a thawhpuiten hmun hrang hranga inthendarhin NLUP tangka hi an sem a ni.

NLUP 3rd installment kaltlang hian Serchhip Horticulture Division hnuaia Grape thlangtu chhungkaw 7 hnenah Rs. 32,380/- theuh sem a ni a, Aloe Vera atan chhungkaw 4 hnenah Rs. 20,000/- theuh, M.Orange atan chhungkaw 607 hnenah Rs. 30,000/- theuh, Pineapple atan chhungkaw 198 hnenah Rs. 19,000/- theuh, Tea (Thingpui) atan chhungkaw 22 hnenah Rs. 27,500/- theuh, Tung atan chhungkaw 4 hnenah Rs. 26,500/- theuh leh Chayote (Iskut) atan chhungkaw 2 hnenah Rs. 28,500/- ve ve sem an ni.

SERCHHIP-AH DISTRICT INFORMATION AND GRIEVANCE REDRESSAL SYSTEM KALPUI DAN TUR SAWIHO

Mipui ten Sawrkar kalphung leh hmalakna chungchang a an vui vai na te an thlen na tur leh a thawidam dan tur kawng ngaihtuahin vawiin chhun khan Serchhip DC Meeting Room ah District Bawrhsap Pu P.Lalchhuanga hovin District chhunga sawrkar pisa hrang hrang enkawltute an thukhawm.

Vawiin thutkhawmah hian District Bawrhsap Pu P.Lalchhuanga chuan Sawrkar chak leh tha nei tur chuan sawrkar hmalakna leh kalphungah duhkhawp lohna leh thahnemngaihna an neih changin mipuiten an lungawilohna an thlenna tur an hriatchian a ngai a, Sawrkar Laipuiin a ngaihpawimawh ber pakhat anih bawk avangin ngaihthah chi a ni lo a ni a ti a, hemi atan hian Public Grievance Redressal System mumal tak kalpui tum a ni tih sawiin Mizoram chhunga District Public Grievance Redressal System nei tha ber ni tura tan lak a tum thu a sawi bawk.

Additional DC Pu Lalsangliana pawhin mipuite harsatna a rang thei ang bera sutkian pui a tul thu sawiin sawrkar pisa dawrtu te duhsak bik nei lova tha taka dawnsawn a tul bakah tawngkam tha a lo dawr zel a tul a ni a ti a, “a theih loh” emaw, “kan tih tur a ni lo” emaw ti a lo chhang bung nghut zel lova an kal zelna tur tha taka lo kawhhmuh zel a pawimawh thu leh, mipuite rilru tina lo thei ang bera awm a ngaih thu a sawi bawk.

Vawiina thurel zingah chuan Sawrkar pisa tinah Public Grievance Redressal Nodal Officer ruat sa awmlohna a la awm anih chuan a rang thei ang bera in ruat nise an ti a, mipuiten an vuivaina awlsam taka an thlen theihna turin Complaint Box siam vek a, hmuh awlsam theihna lai tur berah dah thin tur anih bakah kartin nilaini apiangin Complaint Box hi hawna complaint lut zawng zawngte a rang thei ang bera chhanlet zel tur a ni bawk. Grievance Redressal Nodal Officer te hming, nihna leh biakpawh theihna te tarlan tur a ni a, kartin nilaini (Wednesday) apiangin zing dar 10 atanga chawhnu dar 1 inkarah office ah thut ngei ngei tur a ni bawk, hei hi mipuiten an harsatna leh vuivaina chungchanga an dawr theih nana tih a ni, hemi hun chhung hi chuan tul bik tak thil anih loh chuan meeting dang neih loh nise an ti bawk.

Sawrkar pisa hrang hrang ten an Department chanchin, hmalakna te leh mipuite tana an hnathawh te leh an Department chhunga mipuite dawngsawng thintute phone number zawng zawngte kimchang taka ziak a a soft copy nen April ni 20, 2012 hma ngei a District Bawrhsap hnena thehlut turin rel a ni a, hengte hi uluk taka remkhawm anih hnuah District chhunga Village Council zawng zawng leh sawrkar pisa zawng zawngah semchhuah a ni ang a, mipuiten an duh a an chhawr tangkai theih turin chhawpchhuah tur a ni ang.

Sawrkar pisa hrang hrang ten District Bawrhsap hnenah Monthly Grievance Redressal Report prescribed format in thehluh thin tawh tur a ni a, hetah hian thlakhat chhunga complaint an dawn zat te leh an chinfel zat te, la chinfel loh te tarlan vek tur a ni. Hei bakah hian tualchhung chanchinbu te hnenah mipui ten sawrkar laka vuivaina an neih an sawichhuah theih na tur column siam tura ngen tha tih a ni bawk.-DIPR

EDUCATION MINISTER PU LALSAWT-A’N CHHIAHTLANGA WOMEN POLYTECHNIC HMUN TUR TLAWH

School Education Minister Pu Lalsawta chuan vawiin chawhnu khan Chhiahtlanga Women Polytechnic hmun tura ruahman chu tlawhin hma lak chhunzawm dan tur khawtlang hruaitute a sawipui.

Women Polytechnic hmun tur atana ruahman hi Aizawl lam atanga kala National Highway 54 zawhin Chhiahtlang khaw tawntirh Mulen Tlang ah a awm a, a ram zau zawng hi bigha 15 vel niin Supply Department ram dep ah a awm a ni. Minister chuan Women Polytechnic hmun tur chu tha a tih thu leh a lungawithlak a a hriat thu a sawi a, khawtlang hruaitute chu a hmun hma uluk taka zirchianga approach road siam dan tur te leh tul dang te lo enthlithlai zui nghal turin a chah a, Revenue Department lam pawhin a ramri chin tur te pawh a rang thei ang bera teh fel nghal an tum thu an sawi a ni

Minister hi Pu P.Lalchhuanga, Serchhip District Bawrhsap leh Serchhip District chhunga Education Department hotute bakah Chhiahtlang Village Council Member ten an tawiawm a ni.-DIPR

H&TE MINISTER PU LALSAWT-A’N SERCHHIP COLLEGE TLAWH

Vawiin chawhnu dar 4:00 khan Higher & Technical Education Minister Pu Lalsawta chuan Serchhip College tlawhin zirtirtute nen Principal Office ah inkawmhona hun tha tak a neihpui bakah Serchhip College campus chipchiar takin a fang bawk.

Minister hi Serchhip College a zirtir hna thawktute hnenah fuihna thu sawiin, Mizorama zirna kalphung kan neih hmanga thiamna kan chhar chhuah hian khawvel thangzel in a mamawh thiamna a phuhruk zawh meuh tawh loh avangin, Education Reforms Commission din a ni a, he Commission thupui ber chu zirna hian eizawnna mumal a tinzawn tur ani tih a ni a ti a, mihring thiamna hman thei tura inchherchhuah (skill development) hi an ngaihpawimawh ber anih thu a sawi bakah hna thawk tak tak tur chuan English leh Hindi thiam a pawimawh zia a sawilang bawk.

Minister chuan sawrkar laipui duhdan ang a zirlaibu (textbook) thar siam turin hma lak mek anih thu sawi a, zirthiamna hi Mizote bungraw (asset) neih that ber ani tih sawiin zirtirtute chu an mawhphurhna hrechianga, Mizo hnam tizahawm theitu leh hemi atana hmahruaitu leh bul tan tu an ni tih inhre turin a chah a, zirtirtute chu zirlaibu chhung ngawr ngawr nilovin zirlaibu in a kaihhnawih thil tangkai dangte zirlaite hnena fah belh thei tura tan la a internet leh hmanraw dang dangte chhawr tangkai turin a fuih bawk a ni.

Minister hian zirtirtute a kawm zawh hianSerchhipCollegecampus chipchiar takin a fang a, DoNER Ministry leh UGC kaltlanga infrastructure tih hmasawnna hna kal mek te pawh a hmuna kalin a enpui vek a ni.

SerchhipCollegehi kum 1973 a din niin tun dinhmunah hian Faculty 40 (16 contract, 24 regular) an awm a, Department 13 (Arts 7, Science 5 leh BCA) awmin zirlai 263 an awm mek a ni.-DIPR

Chhiahtlang pa Pu Lalhmingthanga mi kut tuarin boral

Pu Lalhmingthanga Chhiahtlang Chhimveng a khawsa kum 47 a upa chu nizan(Pathianni zan) khan a zan mu tu tih hriatlohin a vit a, a vittu hi tunge ani tih tun thlengin hriat a la ni lo.
Pu Lalhmingthanga hi amaha khawsa a ni a, a vittu hian a hnute ding lamah a vit a. Zan reiah hian an thenawm ten ‘min chhan ru’ ti a au thawm an hria ni a sawi a ni a. Pu Lalhmingthanga hi an hmuh hian biak theih a ni tawh lova. Serchhip damdawi inah lak phei nghal a ni a, a hliam tuar lovin vawiin chawhnu dar 1:00 velah khan a boral ta a ni. Hemi thil thleng chungchangah hian Serchhip Police Station ah FIR thehluh a ni a, pawi khawihtu hi Police ten an chhui mek a ni.

Pawngsualtu-a puh man a ni;
N.Vanlaiphai naupang pawngsuala thattu la hre rihlo

Serchhip-a kum 37-a upa Hmeichhe pakhat pawngsualtu a puh chu Inrinni tlai (Dt. 10th March, 2012) khan Serchhip Police ten manin, nimin khan Aizawl-ah thawn a ni.
Serchhip Police te hnen atanga thudawn danin, he hmeichhia hian tunkar Ningani zan khan Tlabung lam mi, Lalramthanga (28), Pu Sawithanga fapa, tuna Serchhip Ramthlun Veng-a khawsa mek chuan hnathawka an riahna Zawlpui Phai-ah a pawngsual nia sawiin, Zirtawpni khan Serchhip Police Station-ah FIR a thehlut a, hemi bawhzui hian Serchhip Police te chuan pawngsualtu a puh hi Inrinni khan an man a, nimin khan Magistrate hmaah hruaiin, darkar 48 kawl an dil a, amaherawh chu fimkhur thu hla ah Aizawl lamah an thawnthla ta zawk a ni. Pawngsual tawktu nia insawi he hmeichhia hi Medical test neih nghal a ni bawk.
Hetihlai hian tun thla tira North Vanlaiphai hmeichhe naupang kumtlinglo pawngsual hnua thah chungchang chu Police ten an la chhui zui mek zel a, a tira rinhlelh thila an man mi 4 zingah mi 2 chu Police ten chhuah tawhin midang 2 chu thu zawhfiah atan an la kawl mek a, he thil thleng chungchangah hian East Lungdar Block MHIP Conference tun thla ni 7 leh 8-a Lungchhuan khua a neih chuan resolution siamin, kum tlinglo hmeichhe naupang pawng sual anih hnua thah a ni chu an dem thu leh tun thlenga pawikhawihtu man ala nilo chu an dem thu sawiin, pawikhawihtu hi a rang thei ang bera manchhhuak turin thuneitute an phut thu an tarlang bawk.

No Vehicle Day
Serchhipah hlawhtling taka thlawp a ni

Serchhip 10th March 2012 : Serchhip a khawpui chhung kawng chhe lutuk siam that anih theih nana Serchhipa lirthei nei inzawmkhawm pawl Serchhip Town Vehicle Owner Association(STVOA) ten nimina ‘No Vehicle Day’ an huaihawt chu hlawhtling taka thlawp a ni a, lirthei veivak hmuh tur a awm meuh lova, tin sorkar office lama thawkte leh School naupangte pawh ke deuh vekin office an kal hlawm a. No Vehicle Day hi tlai Dar 3:00 khan tihtawp a ni.
STVOA hotute chuan tuntuma No Vehicle Day an buatsaih hi kan Serchhip khawtlang thatna tur atana ti an nih thu an sawi a, he an thil ruahman hi sorkar intihmualpho tumna lam nilovin, khawtlang hmangaih vang zawka ti an nih thu an sawi a, an thiltihah hian politics a inrawlh lo a ni tih an sawi.
STVOA tena No Vehicle Day an siam hi Mizoram Road Transport Union(MTRU) te chuan an thlawp thu Press Release siamin an tarlang a. Serchhip khaw chhung kawng chhiat lutuk avanga No Vehicle Day hman a ngai ta mai chu Mizoram PWD te mawh liau liau a ni tih sawiin, tun thal chhung hian tha takin Serchhip khaw chhung kawng hi siamthat ngei ni se MRTU chuan an duh tih an thuchhuahah chuan an tarlang.
Tin Serchhip-a MNF te pawhin No Vehicle Day hi an thlawp a ni tih thuchhuah an lo siam tawh bawk.
Hetih lai hian Serchhip Block Congress te chuan nimin khan thuchhuah siamin No Vehicle Day hman chu Politics-a intih mualpho tumna niin an sawi a. Serchhip khaw chhung kawngchhe chungchang hi sorkar ah thlen a ni tawh a, tunah hian hna thawh mek a ni a, tunhnaia ruah sur leh hnathawktu an neih tlem avangin duh angin an thawk chak theilo mai a ni tih an sawi a. No Vehicle Day buatsaih pawh hi ram leh khawtlang hmangaihna avanga huaihawt ni lovin mipuite rilru kaihpen tumna mai a ni tiin an thuchhuahah chuan an tarlang ve thung.

Serchhip No Vehicle Day

Serchhip Town Vehicle Owners Association (STVOA) chuan tunkar Zirtawpni (9.3.2012) hian Serchhip Town chhung kawngpui siamthat a nih theih nan ‘No Vehicle Day’ a hmang dawn a. He Ni ah hian Public Carrier bakah private lirthei hrang hrangte pawh lirthei lekchhuak lo turin a ngen a.

Kawngpui tha zawk duhzia lantir nana he No Vehicle Day hian sorkar-ah awmzia a la neih loh fo chuan Total Bandh hial thlenga huaihawt STVOA chuan a la tum bawk.- Secretary STVOA

Darlawn bula MST Bus chesualah mi 16 an thi
Minister-in banna a thehlut

Serchhip 5th March 2012 : Inrinni chhun dar 12:30 khan Aizawl atanga Vaitin pan, MST Bus chu Darlawn bulah chesualin, kawngthlangah a lum a, mi 34 chuang zinga 16 an thi a, a dang an hliam vek bawk.
He MST Bus hian Inrinni zing khan Vaitin lam panin Aizawl a chhuahsan a, Darlawn Venghlun atanga ‘short cut’ ah tlanin, kawng pangngai an pawh leh hma in a chesual ta a ni. Pmpelh kawng hi PWD kawng, black top loh a ni a, pum pelh hi Km 1 vela thui niin, kawng pangngaia tlan chuan pumpelh atanga an tlana kawng pangngai an pawhna tur Khumlohzawl chu Km 5 vela thui a ni thung.
MST Bus (MZ 01/G-9083) chesual hi F.Lalthangliana, Bawngkawn, Aizawl khalh niin, handyman Vanlalchhawna, Upper Republic, Aizawl nen an vaiin mi 34 an chuang a. Kawng thlangah metres 300 vel lumin, hliam ngaihtuah awm tak tak an la awm bawk.
Thi zingah hian Driver leh Conductor-te pawh an tel a, an chetsualna kawng hi black top loh a nih avangin thal lai lo chuan motor an tlan ngai meuh lova, Bus chesual chhan hi, tunlai ruahsurin lei a chiah hnip deuh avangin, Bus hi a lei rahin zo lovin a chimpui ta nia hriat a ni a. He Bus-a chuang zinga pakhat chuan Bus-in lei a rah chuan dawl lovin kawngthlangah hian an tla riai riai niin a sawi.
Motor chetsualna hmun hi Darlawn Police leh khawtlang mipuiten rang taka thlengin ruang lakchhuah leh hliam bawihsawm hna an thawk nghal a. Accident-na hmunah hian mi 9 te chu ka pawh chhawn lovin an thi nghal a, hliam na zual 7 in accident hnu deuhah an thih belh leh a ni.

ACCIDENT-A THITE CHU :–
1. Rinmawii (32) d/o Thianhlima, Sakawrdai
2. Pahlira (54) s/o Hminga, Sakawrdai
3. Thamami w/o Pahlira, Sakawrdai
4. Lalngilneii w/o Lalthudika, Vaitin
5. Lalsawmliani w/o Tlangruata Vaitin
6. Rosanga H/o Tangrochhingi,Vervek
7. Tlangrochhingi w/o Rosanga, New Vervek
8.Engmawii w/o Thangliana, Khawdungsei
9. Vanlalhriata s/o Dengchhunag, Khawdungsei
10. Rothagkimi w/o Autea, Sawleng
11. Lalthanzama, Sunhluchhip
12. F. Lalthangliana (Driver), Bawngkawn, Aizawl
13. Vnlalchhawna (Conductor) Upper Republic, Aizawl
14. C Lalnuntluangi (2) d/o Lalthianghlima, Luangmual
15. Dingpuii, Khawdungsei
16. SK Bartra, (Electric Deptt.) Vaitin

Magisterial Inquiry Din
Aizawl; Nimina MST Bus chetsual chungchangah hian Chief Minister Lal Thanhawla hmalaknain Magisterial Inquiry din nghal a ni a, Sangchin Chinzah, Additional DC, Aizawl District chu hma la tura tih a ni. Accident chungchang a hriat veleh Chief Minister Lal Thanhawla chuan Transport leh Forests Minister te bakah Magistrate leh Police te a hmunah a tir nghal a. Mitthi te chu Aizawlah post mortem ti tura phurh kher ngai lovin, a tul ang ti turin Chief Minister hian Doctorte leh mamawh turte kengin a hmuna buaipui turin a tir nghal a. Aizawl Civil Hospital chu inring reng turin a hrilh bawk.

MINISTER-IN BANNA THEHLUT
Aizawl; Transport Minister PC Zoram Sangliana chuan he vanduaina thleng hi a mawhphurhna (moral responsibility) ah ngaiin Chief Minister hnenah nimin la la khan Minister atanga banna a thehlut nghal bawk. Minister banna pawm leh pawm loh chungchang hi chu Chief Minister thu thu a ni.

Phai lam chanchinbu miten Serchhip leh a chheh
vela NLUP hnuaia hmalakna an enfiah

Serchhip 1st March 2012 : Serchhip leh a chhehvela NLUP tanpuina dawngtute hmalak dan zirchiang turin phailam chanchinbu mi pahnih Pu Deepak Dewan, North-East Sun Chief Editor leh Pu B.B. Lakhar, Assam Tribune te chuan niminpiah khan Serchhip an tlawh a, Journalist te hi Pu David L. Thangliana MIS, NLUP Chief Media Officer in a rawn hruai a ni.
Chanchinbu mite hi Serchhip District Bawrhsap Pu P. Lalchhuanga leh District chhunga NLUP Line Department hrang hrang ten lo mikhualin an hmalak dan te leh an hmasawn dan te an lo hrilh a, Mat phaia Oil Palm Nursery (Agriculture Dept.) te, Zawlpuia NLUP beneficiary te Sangha Dil (Fishery Dept.) te an tlawh a, Dawngzawlah chhun chaw fakin Saphai Rama Sangha Dil te, Khangpui Zau, Keitum leh Bungtlang a Agriculture, Horticulture leh Sericulture Department hnuaia NLUP tanpuina dawngtute hmalakna an en a, Serchhip khawchhunga AH&Vety Department hnuaia NLUP Vawk leh Ar vulh te an en bakah Tarpi tlanga Soil & Water Conservation Department hnuaia NLUP hmunphiah hmun te an en bawk.
Chanchinbu mite hian niminpiah tlai khan Serchhip District Bawrhsap Pu P. Lalchhuanga chu a chenna inah hmuin, NLUP chungchanga District chhunga hmalak anih dan te leh ruahmanna kalpui zel dan tur te an zawt a, NLUP dawngtute hmalakna chu hmuhnawm an tih thu leh anmahni pawh a tih phur ve zia sawiin; NLUP hi a nih dan tur ang taka hlawhtlinpui anih chuan rampum tan entawn tur tha tak anih dawn a an hriat thu an sawi a, tuna Mizoram sorkar hmalak dan chu entawntlak nia an hriat thu an sawi bawk.

VC inthlang result

Serchhip Village Council inthlan zawh taka thlan tlinte :
Serchhip-I:
1. K.Saimawia(ZNP)
2. P.C Zairemmawia(INC)
3. R. Sanglawma(INC)
4. R. Lalhmingmawia(MNF)
5. Lalremmawia(INC)
6. R. Hrangmana(INC)
7. Ralliana(ZNP)

Serchhip-II:
1. T.Zadingliana (MNF)
2. T.Lalrinsanga (MNF)
3. B.Ramthangliana(MNF)
4. Ramherliana (INC)
5. Zamlova(INC)

Serchhip-III :
1. Lalramliana Sailo (INC)
2. PC.Siamliana(INC)
3. C.Lalhminghlua(INC)
4. K.Tlangthanmawia(MNF)
5. David Zaithankima(MNF)

Serchhip-IV:
1. C.Lalkunga(INC)
2. K.Hmangaihzuala(INC)
3. Lalzuiliana(INC)
4. Tea Renthlei(INC)
5. V.Romawia(INC)
6. B.Lalbuatsaiha(MNF)
7. Lalhmachhuana(MNF)

Serchhip-V :
1. B.Lalthuami
2. F.Lalhmangaiha
3. G.Vanlalngaia
4. Kaptluanga
5. John R.Lalhmangaiha

New Serchhip:
1. H.Vanlalsawma(INC)
2. Lalrinthanga Sailo(INC)
3. PC.Lalhela(INC)
4. S.Lalrinliana(INC)
5. PC.Dengthuama(MNF)
6. Rengliana(MNF)
7. R.Zakapa(ZNP)

Village Council inthlan
boruak muanawm tak hnuaiah neih zawh a ni

Serchhip 24th Feb.2012 : Mizoram hmun dang rualin nimin khan Serchhipah Village Council inthlan vote thlak boruak muanawm tak hnuaiah neiin, nizan khan result puan nghal a ni.
Inthlan vote thlak hi zing dar 7 atanga tlai dar 4 inkar chhung khan neih a ni a, vote thlakna booth hrang hrangah MPF te duty awmin, vote tlak turte an lo tanpui a. Hei hian voter-te awlsamna a siamin, boruak a ti muanawm hle a ni.
Village Council Voter Vote tla percentage
Serchhip-I 1797 1454 80.9%
Serchhip-II 1419 1165 82.10
Serchhip-III 1246 1018 81.71
Serchhip-IV 2333 1715 73.51
Serchhip-V 1261 877 69.54
New Serchhip 2588 1983 76.62
Chhiahtlang 2696 1930 71.58
Keitum 1317 1032 76.36

Hetiang hi Village Council seat lak dan a ni :
Thinglian INC-1 MNF-2
Hriangtlang INC-2 MNF-1
Buangpui INC-3
Bawktlang INC-2 MNF-1
Leng INC-2 MNF-1
Thentlang INC-3
Thenzawl Vengthar INC-1 MNF-2
Thenzawl ‘N’ INC-1 MNF-2
Thenzawl ‘W’ INC-2, MNF-4,ZNP-1
Vanchengpui INC-2 ZNP-1
Hmunzawl INC-2 ZNP-1
Chekawn INC-1 MNF-1
Hualtu INC-3 MNF-2
Khawbel INC-2 MNF-1
Sailulak MNF-3
Lungkawlh MNF-3 Ind.-1
Mualcheng INC-1 MNF-4
Lungpho INC-3
Ngentiang INC-3
Bungtlang INC-3, MNF-1, UDA-1
Hmuntha MNF-2 MPC-1
Khumtung MNF-2 MPC-1 INC-1 Ind.-1
Baktawng Tlangnuam INC-5
Hmawngkawn INC-3

REMNA LEH MUANNA PUALIN 14 ASSAM RIFLES TEN SERCHHIP-AH “HALF-MARATHON RACE” LEH BLOOD DONATION CAMP HUAIHAWT

Mizoramin kum 25 lai remna leh muanna hmel a hmuh lawmna kal zel ah Serchhip a 14 Assam Rifles awm te chuan tukin khan Serchhip mipuite tan “Half-Marathon Race” hlawhtling takin an buatsaih a, chhunah thisen pek runpui (blood donation camp) an buatsaih bawk.

Half-Marathon Race hi tukin zing dar 6:15 khan tlan tan a ni a, Serchhip District Bawrhsap Pu P.Lalchhuanga’n he hun hi hmanpuiin thalai rual kalkhawmte chu remna leh muanna hlutzia leh a man a tam zia thinlunga vawng reng turin leh a tichhe zawnga chetna reng reng dodal tlat turin a chah a, 14 Assam Rifles ten remhre taka ruahmanna tha tak an siam chu lawmawm atih thusawiin mipui te leh Assam Rifles te inkarah inhriatthiam tawnna leh inkungkaih tawnna tha zawk a thlen ngei a beisei thu a sawi bawk.

Half-marathon race atana an tlan kawng (route) hi kilometre 12 a thui a ni a, thalai leh naupang 200 vel telin 14 AR Headquarters main gate bul atang an tlan tan a, Serchhip khawchhung hmun hrang hrangah tlankualin a tawpah 14 AR Parade Ground ah tlan lut a, hetah hian Half-Marathon Race kharna inkhawm neih niin a titha thlanchhuahte hnenah lawmman sem a ni a, 14 AR ten thingpui ruai an buatsaih chu kilho nghal a ni bawk.

Half- Marathon race ah hian Mipa zingah Johnny Lalramluaha s/o Laltluanga, New Serchhip chu pakhatna niin lawmman ah Rs. 5000/- a dawng a, T. Lalchhuansanga s/o T. Johana, Darnam Veng chu pahnihna niin Rs. 3000/- a dawng a, pathumna Lalzidinga s/o PC. Lalchana, Tlangnuam chuan Rs. 2000/- a dawng bawk a ni. Hmeichhe lamah chuan Remlalhruaii d/o KC. Rosanga, Saron veng chu pakhatna niin VL. Nunramngaii d/o F. Lalhualhima, Chanmari Veng chu pahnihna a ni a, T. Lalremmawii d/o T. Pachhunga, Saron Veng chu pathumna a ni bawk. Anni ho bakah hian intlansiakna a tel naupang zual thlanchhuah mi paruk hnenah lawmman pek an ni bawk a, heng lawmman te hi District Bawrhsap Pu P.Lalchhuanga’n a hlan a ni.

Vawiin vek khan chawhma dar 10:30 atanga tanin 14 AR Hospital-ah 14 AR ten a mamawh apiangte tan thisen pek runpui (blood donation camp) an buatsaih nghal a, he blood donation camp hi 14 AR Commandant Colonel Ratnakar Trivedi-a’n hawngin an nupui Pi Shalini Trivedi nen thisen pe hmasa berah an tang nghal a ni. Thisen hi JNM Hospital, Serchhip atangin Medical Officer pahnih Dr. B.Lalduhawma leh Dr. Lalnunhlima te leh anmahni puibawmtu mi panga ten 14 AR Hospitalah kal chilhin an lak sak a, thisen hi unit 30 la in mipa 28 leh hmeichhia 2 in thisen hian pe a ni. Thisen lak zingah hian Blood Group O – 10, A – 12, B-7, AB-1 niin a vai hian positive (+ve) vek an ni.

Medical Officer Dr.B.Lalduhawma chuan thisen pe tur hian mi za chuang an in pek thu leh an duh anga tam thisen an lak theih loh thu sawiin, a chhan chu tunhnai hian Serchhipah kohhran leh tlawmngai pawl hrang hrang ten thisen an pe nasa a, tun dinhmunah dahkhawl sa (standing stock) unit 40 an nei a, thisen lak te hi thlahnih hnu ah chuan a hman theih tawh loh (expire) thin avangin tuna Unit 30 an lakbelh hian an mamawh chin phuhru turah an ngaih thu leh, Assam Rifles hotute nen inbia a hun remchang dang melh a thisen lak sak leh turin ruahmanna an siam thu a sawi a ni.
Written by Andrew H. Lalremruata MIS, IPRO Serchhip DATED: 20th Febr

Serchhip Town Lirthei neitu pawl thar din a ni
Kawngpui siamthat thuah Feb. thla chhung sorkar ngaihchan an tum

Serchhip Town chhunga Lirthei neitu pawl hrang hrang Inrinnia Pu Remsiama Kawlni In Bazar Venga inhmukhawm chuan Pawl thar ‘Serchhip Town Vehicles Owners Association’ an din a. An hruaitute -
President : Pu Remsiama Kawlni, STOA, Sr.Vice President : Pu Lalro tluanga, 407/Truck, Vice President : Pu H.Lawmzuala Maxi Cab, Secretary : Pu Lalrinpuia STOA, Asst.Secretary : Pu C.Rameng mawia SAROA, Treasurer : Pu Ral zatawna Town Bus, Fin.Secretary : Pu T.Zabiaka Pik-up/207
He pawl hian Serchhip Town kawngpui chhe lutuk siam hnatlang thawh an tum a, amah erawhchu, tun thla February chhung hi sorkar hmalakna ngaih chan leh phawt nise, hemi hnua hmalakna a awm loh chuan a tul anga hmalak nise an ti a ni.
He pawl Serchhip Town Vehicles Owners Association(STVOA) hian a bik takin lirthei hmanga ei zawngtute tana inthlunkhawmna tangkai leh chhawrna-awm tak nih an tum thu an sawi.

GAD SECRETARY RENU SHARMA-I’N SERCHHIP DISTRICT A TLAWH

Vawiin chawhma dar 11:00 khan Pi Renu Sharma, Secretary GAD, Finance etc. Government of Mizoram chuan Serchhip District tlawhin DC meeting Room-ah Serchhip District chhunga officer kalkhawnte a kawm. District Bawrhsap Pu P. Lalchhuanga kaihhruai inkhawmah hian Pi Sharma-i chuan Secretariat Office-a thu ringawt lova District inrelbawl dan a hmuna tlawh a, an dinhmun leh harsatna neihte a hmun ngeia hmuh theih chu tha a tih thu leh nuam a tih thu a sawi a ni.

He inkhawmah hian Bawrhsap chuan Pi Sharma-i chu Serchhipin a lo lawm tih hrilhin Serchhip District dinhmun tlangpui leh department hrang hrangte hnathawh leh hmachhawpte powerpoint hmangin a lo entir a. Serchhip District chu district te ber ni mahse ram lailia a awm avang te, ziak leh chhiar lama kan san avang te leh dan leh thupek kengkawhtute thahnemngaihna azarah, district ralmuang ber leh thubuai te pawh a nei tlem ber kan nih thu te a sawi a. Serchhip District-in District Jail kan neih loh avanga department hrang hrangte harsatna te, DC office leh a pengte-a hna ruak hrang hrang hnawh khah loh tam tak ten hna thawh an tih harsat thin thu te a lo hrilh bawk a ni.

Pi Sharma-i pawhin a ngaihpawimawh zawngte sawiin sawrkar hnathawk hlawh la thei lo an awm leh awm loh thu te, Ration card lem man chhuah chungchang te leh Internet connectivity rintlak a awm a tul thu te sawiin District Bawrhsap Office-ah mipui ten an vui vaina leh harsatna an thlenna hmun tur Public Greviance Redressal Officer incharge dah ngei tul a tih thu te pawh a sawi bawk a. Hei bakah hian Socio Economic & Caste Census atana hman tur PC Tablet chu a siamtu company ECIL ten vawi lehkhata an pek chhuah rual vek theih loh avangin Aizawl leh Kolasib District te pek phawt an ni a, March 1st atangin Serchhip District a hman tur a lo thleng dawn a, hun tiam chunga zo hman ngei turin Charge Officer-te an lo inpeih ngei ngei a tul dawn a ni tih a sawi bawk.

Officer-te nena meeting an neih zawh hian District inawpna atana pawimawh em em District Jail Building, Chhiahtlang a mi chu a kaihhnawih department sawm bikte nen Pu Robert C. Lalhmangaiha SDC leh NLUP Nodal Officer ni bawk kaihhruainain an en ho nghal a ni.-DIPR

DISTRICT LEVEL VIGILANCE & MONITORING COMMITTEE-SERCHHIP-AH

Vawiin chawhma dar 10:00 khan Chairman Pu C.L. Ruala, MP (Lok Sabha) kaihhruaina hnuaiah Serchhip District Level Vigilance and Monitoring Committee meeting chu Serchhip DC Committee Room-ah neih a ni a, Co-Chairman Pu Lalhmingliana MP (Rajya Sabha) leh Pu Lalthansanga MLA, Hrangturzo bial leh Pu P. Lalchhuanga District Bawrhsap leh Mebmer Secretary ni bawk ten an tawiawm a ni.

He meeting-ah hian sawrkarin mipuite tana hmasawnna hna a thawhna programme hrang hrangte sawi ho a ni a. Committee hmasa lama an thurel tawh bawhzui a nih dan te leh an hmasawnna te pawh enlet a sawi ho a ni. Committee hmasain a lo rel tawh, Serchhip District-ah District Social Welfare Officer an awm ve theihna tur atana hmalak ni se tih chu hmasawnna hmuh tur a la awm loh avangin bawhzui chhunzawm leh tura tih a ni bawk.

Chairman Pu C.L.Ruala chuan MGNREGS kan kalpui dan chu hnam tana him tawk lo leh kan rilru puthmang tichhe thei a nih tawh thu sawiin dik taka kalpui a nih theih nan ngaihtuahna seng a hma lo la thar leh turin a enkawltute a chah a. Tin, tunhnaiah district thenkhatah sawrkar hnathawkte tana Job Card pek tawh loh tumna pawh sawi kaiin state pumah rualkhai zawka kalpui a nih theih nan State Level Meeting-ah ngaihtuah a nih tur thu a sawi bawk a ni.

He meeting-ah hian Pu C.L. Ruala chuan kan sum leh paite hi hmasawnna min thlentu leh kan nun tichhe theitu an ni ve ve a ni tih sawiin, a tha zawnga hmang tangkai turin kal khawmte a chah a. Sawrkarin ram hmasawnna atana a ruahman sum tam tak enkawltu sawrkar officials te phei chu an pawimawh lehzual a ni tih sawiin ram leh mipuite tan rawngbawlna rilru pu a, inpekna leh tlawmngaihna nen, an theih tawka a tha thei ang ber chhuah theuh turin a sawm a ni.-DIPR

MJA Serchhip District Conf. leh hruaitu thlanna neih a ni

Nimin Jan 30 khan I&PR Conference Hall Serchhip ah Mizoram Journalist Association, Serchhip District ten Annual Conference vawi 5-na hun an hmang a, hetah hian District Bawrhsap Pu P. Lalchhuanga chu khuallian a ni. He hun hmannaah hian khuallian Pu P. Lalchhuanga chuan thusawiin chanchinbu chu mipuite tan a pawimawhzia thu a sawi a, sawrkar hmalakna te sawisel ngawt lova mipuite hriata sawrkar hmalakna te puanzar a a tha lai fak sak hi a tul hle a ni tih a sawi. Thu a sawi zel naah dan leh thupek kenkawh chungchangah mipuite zirtirna pe uar turin chanhcinbu mite chu a chah bawk.

Chawhnu lamah hian President Pu Lalremruata Ralte kaihhruainain rerelna neih a ni a, hengte hi thu passed a ni -
1. Media Workshop Serchhipa neih anih theih nan hmalak ni rawh se.
2. Electronic Media ten advertisment rule an neih theih nan MJA Gen Hqrs ah thlen ni rawh se.
3. Serchhip khawpui chhung kawngpui(national Highway 54) siamthat anih theih nan hmalak ni rawh se.
4. Mizoram Journalist Welfare Rules hi huamzau zawka siamthat a nih theih nan hmalak ni rawh se.
5. Journalist ten pension kan neih ve theih nan chak lehzualin MJA in hma la rawh se.

Rorel neih anih zawh hian Serchhip District I&PR Officer Pu Andrew H. Lalremruata kaihhruaina hnuaiah hruaitu thar thlan a ni a, heng mite hi kum 2012-2014 chhung atana MJA Serchhip District hruaitu atana thlanchhuah te an ni-

President : Pu Kapliana Pachuau
Vice President : Pu Lalremruata Ralte
Treasurer : Pu C. Lalhminghlua
Executive members:
1) Tv Zonunsanga Kawlni
2) Pu PC Vanlalhruaia
3) Pu C. Ramengmawia
4) Pu PC Zonunsanga
5) Pu R. Lalmuansanga.

SERCHHIP BAWRHSAP-IN A THLAWNA ZIRLAIBU SEM TUR VAI LIAM

Tukin(24.1.2012) zing dar 8:00 khan SSA Mission, Serchhip bultumin Serchhip Deputy Commissioner Office tualzawlah kum 2012 Academic session atan Serchhip District chhunga Class I atanga Class VIII zirlaite tan zirlaibu a thlawna sem tur thawn chhuahna inkhawm hman a ni a, District Bawrsap Pu. P.Lalchhuanga’n heng zirlaibu thawnchhuahte hi a vai liam (flag-off) a ni.

Zirlaibu thawnchhuah inkhawmah hian District Bawrhsap chuan India ram Danpui (Constitution) in zirlaite an lo puitlina chhawr tlaka an hlawhtlin theih nana ruahmanna a siam bawhzuina atana sawrkar laipuiin Right to Education Act a siam hi thil chhinchhiah tlak, a bik takin miretheite tana hlu tak anih thu a sawi a, a bik takin thingtlang lama zirlaibu lei tur a van mai bakah a leina tur pawisa neih a harsat thu leh amah ngei pawh hetiang harsatna lo hmachhawn ve tawh thin anih thu a sawi a, SSA hnuaia Cluster hrang hrang 12 (sawmpahnih) a Village Council 40 (sawmli) vel a zirlai naupang nu leh pa te lu tihaitu ber ni tur zirlaibu man harsatna a hun taka phuhruk anih theih nana District Project Coordinator, SSA Mission Serchhip District leh a thawhpuiten Sawrkar ruahmanna bawhzuia chak taka hma an la chu lawmawm a tih thu sawi bawkin, hei hian India rama ziak leh chhiar thiam tamna ber District an nihna a chhawm nun tir zel a beisei thu a sawi bawk. Serchhip District chhungah hian kum 2012 Academic Session atan Class I atanga Class VII zirlai naupang 9080 hnenah zirlaibu a thlawna semchhuah tura ruahman niin, hei hi kum hmasa (2011) enrolment behchhana siam a ni a, Right To Education Act a awm tak avangin zirlai pek tur hi hei aiin a la tam thei a, chutiang thil a awm anih chuan ruahmanna thar siam anih tur thu DPC, SSA Mission Pu C.Lalthanzira’n a sawi a ni.

Zirlaibu hi Serchhip District chhunga Government Primary School leh Government Middle School naupang daih tur sem niin, Government-Aided (Adhoc, Deficit leh Lumpsum) school ah te pawh sem a ni a, Serchhip District chhungah chuan Middle section chauh Adhoc-Aided Schhol a pawm a nih rih avangin Private School te chu pek a theih rih loh a ni. Zirlaibu man hi Sawrkar laipui ruahman dan chuan naupang pakhat tan Rs. 150/- zel ruahman a ni a, hei hian eng tham mah a daih loh avangin Aizawl a SSA hotu lian ten ngaihtuahna nasa tak senga ruahmanna chi hrang hrang siamin zirlaiten an quota pangngai aia tam zirlaibu an dawng kim thei dawn a ni. Tun dinhmunah chuan Class I leh Class V Mizo Tawng zirlaibu a la thleng hman lova hei pawh hi a thlen veleh thawnchhuah nghal tur anih thu leh a hun taka sem chhuah kim hman vek beisei anih thu DPC in a sawi a, Zirlaibu te hi khawtina Village Education Committee Secretary te hnenah dah a ni ang a, an nin hma la in an huamchhunga Sikul tinah an sem darh leh ang.

Tukin flag off programme ah hian Serchhip District chhunga CRC panga - North Vanlaiphai, Hmuntha, Lungpho, Chhingchhip leh Khumtung a zirlaibu sem tur te Motor panga in an phurchhuak a, chhun lamah Serchhip khawchhungah sem leh a ni bawk dawn a ni. Nimin (January ni 23, 2012) khan CRC sawm – Khawlailung, Chekawn, Piler, Sialsir, East Lungdar, Sailulak, Leng, Thenzawl, Buangpui leh Neihloh ah te a thlawna zirlaibu sem tur hi phurh chhuah a lo ni tawh bawk a ni. Tukin zirlaibu thawnchhuah inkhawm hi Pu C. Lalnunzira, District Project Coordinator, SSA Mission Serchhip District in a kaihruaia, District bawrhsap Pu P.Lalchhuanga leh Pi Lallianzuali Bawitlung, SDEO ten thusawi na hun an hmang a, Serchhip Primary School Teachers’ Association leh Serchhip Middle School Teachers’ Association hruaitute bakah thuthar lakhawmtute an tel tha hle a ni.

Serchhip Darnam Vengah Road Roller in mi 1 chilhlum

Nizan, January ni 16 zan dar 8:30 vel khan Serchhip Darnam Vengah Road Roller in hnam dang mi pakhat a chil hlum. Kawng chil mamna motor, Road Roller in nizana a chil hi Jharkhan mi, Babulal Murmu kum 31 mi niin, PWD ten Mat phai zawlpui panna kawng alkatra an luannaa inhlawh a ni a. Roller hi a light a chhiat avangin torch light kengin Roller kawng entuah a tang a. Helai hmun an thlen lai hian kea kalin, torch light pawh hmet eng lova an kal chu Roller operator Rajesh Hemron kum 26 mi Jharkhan lam mi chuan a hma lamah a kal emaw a ti a, a sir lama Babulal-a kal chu Roller ke hnung lam hian inbarh lut palhin a lu a chil keh a, a chil lai hian aw a chhuah lova, operator hian a chil tih pawh a hriat loh avangin an bula kea kal pakhatin ding tura a auh hnua an din fel meuh chuan Babulal hi a lo thi fel hman tawh nia hriat a ni.

Babulal hian a lu a hliam na tak a tawrh bakah a khup ding lam a tliak a, a taksa leh a banah hliam pilh a awm nual bawk, Nizan khan amah awmpui thintu New Serchhip College road a Pu C.Lalsawmliana inah lumen a ni a, vawiin khan JN Hospital-a postmortem a nih hnuah Presby terian New Serchhip Pastor, Rev Lalhmachhuana’n a vui liam. Babulal hi PWD ten Zawlpui kawng metal hna an thawhnaah a thian te nen Theka-a kawng luan hna thawkin an zo fel tawh a, an rawn haw chhuak chu vanduaina hi an tawk ta a ni. He thil thleng an hriat ve leh Serchhip Police te pawh a hmunah kal nghalin thil tul ang ang an buaipui a, Serchhip Police station ah thubuai Case no 4 of 2012 Dt 16/1/12 Under section 279/304A IPC RW 181 MV Act an ziak lut nghal.

SERCHHIP-AH LARSAP HMUAH DAN TUR NGAIHTUAH

January ni 17 (Thawhlehni) a Serchhip tlawh tur Mizoram Larsap Pu Vakkom Purushothaman hmuah dan tur leh lo dawnsawn dan tur ngaihtuahin vawiin chhun khan Serchhip D.C’s Meeting Room-ah District bawrhsap Pu P. Lalchhuanga hovin Serchhip-a Sawrkar Department hrang hrang hotute leh Tlawmngai Pawl hrang hrang hruaitute an thukhawm. Vawiin District bawrhsap hova thurel ah chuan venhimna lam uluk leh zual anih theih nan Larsap hi 14 Assam Rifles ten an lo mikhual ang a, tlai dar 4:00 ah 14 Assam Rifles Auditorium ah Larsap lawmna inkhawm buatsaih tur niin heath hian Serchhip-a sawrkar hnathawk sawm bikte, Tlawmngai pawl hrang hrang aiawhte leh Kohhran hrang hrang aiawhte, thuthar thehdarhtute leh sawm bik mithenkhatte an tel anga, District Bawrhsapin Serchhip District chanchin sawiin hun a hmang ang a, Serchhip Sub-Headquarters YMA Cultural Troup ten hnam lam hmuhnawm tak an entir bakah zaithiam sawm bikte an zai ang. Larsap pual hian 14 AR Commandant Col. Ratnakar Trivedi chuan zanriah a buatsaih bawk ang. Larsap hmuahna inkhawm hi Local Cable TV ten mipui thlir theih turin an pe chhuak ang.

Larsap hi a nupui Dr. Lily Purushothaman, Pu K. Lalnghinglova IAS Secretary to Governor leh Pu Robert Lalchhuana, Editor Romei Daily Newspaper ten an tawiawm ang. Ruahman lawk dan chuan Larsap hian January ni 17 chhun dar 12:15 ah Thenzawl lutin amah lawmna inkhawm buatsaihah a tel ang a, hemi hnu hian Thenzawla Handloom Centre thlan bikte tlawh kualin an hnathawh dante a hmunah a en ang. Tlai dar 3:30 ah Serchhip lutin zan a riak ang. January ni 18(Nilaini) zingah Serchhip chhuahsanin Baktawng a Pu Ziona leh a chhungte a tlawh ang a, Thingsul Tlangnuam a 24 Task Force, Project Pushpak Headquarter-ah chhun chaw fakin hemi hnu hian Aizawl panin a haw ang.

DoNER Minister-in tun thlenga Referral Hospital
a taka hman theih a la ni lo chu pawi a ti

Serchhip 12th Jan. 2012 : Zan khat riaka Mizoram rawn tlawhtu,Ministry of Development of North Eastern Region (DoNER) changtu Union Minister of State Pu Paban Singh Ghatowar chuan nimin khan Mualpuia Rajiv Gandhi Stadium sak mek leh Falkawn a State Referral Hospital a tlawh.
DoNER Minister chuan Mualpuia Rajiv Gandhi Stadium sak mek chu a hmuna enin hna kal dan tha a tih thu leh a hun takah an zawh ngei a beisei thu a sawi a, peihfel a nih hun chuan hmarchhak State zinga Stadium tha ber a ni ang, a ti. Union Minister hian Pitarte tlanga Indoor Stadium pawh tlawhin tha taka sak a ni chu lawmawm a tih thu a sawi bawk.
Falkawna State Referral Hospital pawh a hmunah tlawhin DoNER Minister hian tun thlenga Hospital a taka hman theih a la nilo chu pawi a tih thu a sawi a. Mipui ten a tangkai thei ang berin hmang thuai se a duh thu sawiin, Hospital hi a taka hman a nih thuai theih nan sum mamawh engemawzat pek a inhuam thu leh Health Minister Pu Lalrinliana Sailo hnenah a tul anga bawhzuia Detailed Project Report thehlut tura a hriattir tawh thu a sawi.
Pu Paban Singh Ghatowar chuan DoNER Ministry chu Finance Ministry in guidelines a siamsak hnuaia kal, hmarchhak State 8 enkawl tura tih an nih hre reng chungin an sum neih atanga Mizoram hmasawnna tura theihtawp chhuah pui a inhuam thu a sawi a. NEC Chairman ni bawk Pu Paban hian Mizoram chu remna leh muanna Mizoramin a chawinun tlat avanga chhuanawm a tih thu leh duhsak tlak nia a hriatthu sawiin Arunachal Pradesh dawtah chuan hmar chhak State zinga NEC atanga sum hmu hnem ber an nih thu a tarlang bawk.

Tun Thal chhung hian kawngpui siamthat tum a ni
Tuirial leh Serchhip inkar erawh siam hman a beiseiawm loh

PWD changtu Parliamentary Secretary Pu Lalthanzara chuan Mizorama kawngpuite tun Thal chhunga siamtha turin chak taka hmalak mek a ni a ti.
Pu Lalthanzara chuan National Highway ngaih pawimawh hmasak a nih thu sawiin, Silchar ramri atanga Aizawl inkar kawng chu double lane-a siam mek a nih thu leh he kawng siam hna hi nakuma zawh hman tum a nih thu a sawi a. Lengpui atanga Tripura inkara NH-44A chu kum 2014 a siam zawh tura tih niin, Bairabi atanga Bilkhawthlir inkar NH-154 pawh kum 2014-a double lane-a siam zawh tura ruahman a ni a. Seling Zero point atanga Tipaimuk NH-150 pawh double lane a siam turin DPR siam mek a ni a ti bawk.
Hetihlai hian Aizawl atanga Tuirial inkar chu tun thal chhunga siam that hman turin hna thawh mek a nih thu PWD hotu ten an sawi a.Tuirial atanga Serchhip inkar erawh a hma atanga harsatna chi hrang hrang awm tawh avangin sanction thar nghah leh mek a ni a.Serchhip atanga Hrangchalkawn inkar pawh thal chhunga zo turin ruahman a ni a. Hrangchalkawn atanga Tuipang inkar erawh hna a hautak avangin zawh hman an inring lo deuh tih an sawi bawk.
Tun dinhmunah Mizoram hmun hrang hrang kawngpuite hi zawh tlak hmang loh khawpin a chhe tawh a ni.

Serchhip District-ah Voters 43034 an awm

Election Commission thu anga Mizoram hmundangte ruala Photo Electoral Roll siam thara a landan chuan Serchhip District-ah Vote nei Mipa 21,256 leh hmeichia 21,778, an vaiin 43,034 an awm a, Mipa aia hmeichhia an tam zawkna hi vote 522 a ni.

Serchhip District chhungah Assembly bial 3 awmin Hrangturzo bial chu vote nei thei tamna ber niin vote nei mipa 7172 leh hmeichia 7260, an vaiin 14,432 an awm a, Serchhip bialah Vote nei Mipa 7075 leh hmeichhia 7456, an vaiin 14531 an awm a, Tuikum Assembly Constituency-ah vote nei mipa 7009 leh hmeichhia 7062, an vaiin 14,071 an awm thung a, Serchhip District chhunga Electoral Roll-a awm zawng zawngte chuan EPIC hi an nei vek bawk a ni.

Vote nei thei tlem berna Polling Station chu Buhkangkawn niin, Vote nei mi 58 an awm a ni.