Tualchhung

Serchhipah Fimkhurna hapta
Nimin zing khan Dist.Bawrhsap Pu H.Darzika’n ZDU buatsaih Fimkhurna Hapta Serchhip Bazar-ah a hawng. Hawnna thu sawiin, Pu Darzika chuan, fimkhurna hapta hman ngaia kan la awm chu pawi a tih thu a sawi a. A hranpaa fimkhurna hapta hman ngai lova a nuna nunpui tum zawk nise a ti a. ZDU hruaitute chu hetianga fimkhurna hapta kan hman hian hmasawnna a awm em tih lo tura chahin, hmasawnna awm mang si lo hian kumtin hi kan lo hmang liam ve mai mai thei a ni a ti.
Pu Zika chuan, driver-te chu khualchhawntu ber an nih avangin khawtlang leh ram hmel pholangtu, darthlalang an ni a ti bawk.
He hun ZDU Sub-Hqrs. President Pu T.Rosiama kaihhruaiah hian Addl.SP Pu Lalrinawma bakah Pu MC.Sang chunga DTO ten thu an sawi bawk. ZDU-te hian flag eng an buatsaih chu lirthei kal velte hnenah an remchan dan angin an lei tir a ni.
Hetihlai hian Serchhip Traffic Police-te chuan tunlai hian khauh zawkin duty hna an thawk a, hei hian lirthei che vel leh dah danah awmzia a nei thui hle.

Crusade/ Camping
Zanin atang hian Serchhip Town Hall -ah Vanlalsailova speaker-a hmangin Crusade neih a ni dawn a. Hetihlai nizan atang khan Serchhip Vengchung Kohhran ah Dintharlehna camping neih tan a ni bawk.

Tuirial-ah Myanmar mi 4-in an chipui kutthlak rawnin, an ti hlum

Serchhip 30th Nov. 2010 : Nimin zinga Tuirial kawng Awithangpa field-a Myanmar Tidim mi Chinlianmung thattu mi 4 zinga 3 te chu nimin zing vek khan man nghal an ni.
Chinlianmung(30) hi nimin zing dar 7 leh dar 8 inkar vel khan Myanmar mi vek Zokhanthang(19) Tidim, Chuansiankip(28) Chinnamen(28) te chuan Taxi-a an hruaikual hnuah nasa takin kut an thlak a. Tuirial Awithangpa point an thlen pui hnuah Aizawl panpui a nih laiin a hliam tuar lovin a thi a ni.
Chinlianmung kutthlak a nih lai hi Traffic police 1 chuan lo hmu in an zinga mi 3 Zokhanthang Chuansiankip leh Chinamen te hi man nghal an ni a. An zing ami Hualngo tia hriat erawhchu a tlan chhiat thut avangin man hman a ni ta lova, Police ten zawng nghalin, nimin tlai thleng khan man a la ni lo.
Police-te hnena heng mi 3 te sawi dan chuan Chinlianmung hi Electric Veng atanga phurin, Berawtlangah an hruai a, hemi hnu hian Tuirial kawng Awithangpa point-ah an hruai leh niin an insawi a. Chinlianmung hi misual tak, vawi tam tak an mahni lo bum tawhtu a nih avanga kut thlak ta mai niin an insawi a ni.

Tualchhung

Pu Vanlalliana vuiliam a ni
Robert Vanlalliana(41) s/o Aihrangi Chanmari Veng chu tukin (28.11.2010)Pathianni zing lam dar 2:30 khan mitliam avangin a boral a, nimin vek khan vuiliam a ni.

Thisen unit 43 pe
Rawpui Unit TKP chuan an unit din champha Golden Jubilee pualin Inrinni khan Serchhip Blood Bank-ah thisen unit 43 an pe a, an zingah hian hmeichhia 10 an tel a ni. Rawpui Unit TKP hian an golden Jubilee hi thla thar ni 2 -5 chhung hian ropui taka lawm an tum a ni.

Volleyball championship zo
Serchhip Dist. Volleyball Associa tion buatsaih Dist. Championship 2010 Serchhip Chhim Venga Inrinnia khelh zawh tak mipa team-ah Serchhip Vengchung an champion-a, hmei chhe team-ah Mapuia memorial team Serchhip an champion bawk. He championshipa lawmman te hi Pu C.Zokhuma’n a nu leh pa Pu C.Thangsanga leh Pi V.Biakchhungi te hriatrengna atana a tum sak niin, lawmman a sem nghal bawk.

Thalaite Kut tiak ta
Mizo Kohhran Serchhipin Inrinni atanga ‘Thalaite Kut’ an hman chu nimin khan chhunzawmin, an tiak ta.Tun tum hi Mizo Kohhranin Thalaite a hman vawi khatna a ni.

Maxi Cab Zemabawka daia chesualah mi 3 thi in, mi 7 an hliam

Serchhip 28th Nov. 2010 : Inrinni zing dar 3 vel khan Zemabawk daiah Night Sumo a chesual a, mi 3 an thi a, 7 in hliam an tuar.
Night Sumo MZ-01D 2373 hi Zokhawthar atanga Aizawl pan a ni a, Inrinni zing dar 3:15 vel khan Zemawbawk dai Supply check gate piah Bus turning point bul kawng ngil lai takah a tlan liam a, metre 180 zet a lum a, motor pawh a chhe hle a, a hmunah hian Sumo khalhtu Zirliana (55) s/o Zohrata Champhai Bethel veng chu a boral a, Civil Hospital, Aizawl thlenpui hnuin Kamkhamkual (21) s/o Pausuannang, Tiddim, Myanmar lam mi chu a thi ve leh a, Inrinni vek tlai lam khan Dalkhanmung (46) s/o Zachinlian, Tiddim, Myanmar chu a thi ve leh bawk a ni.
Maxi Cab Sumo-ah hian driver telin mi 10 an chuang a, mi 7 te hian hliam an tuar a, mi 2 chu an na deuh a, a dang 5 chu ngaihtuahawm an awm lo.
Motor hi document atanga a lan dan chuan PC.Laldinthara Armed Veng ta a ni a, chetsualna hmun hi kawng ngil lai tak anih avangin driver hi a muthlu nia rin a ni.
Driver Zirliana ruang hi Civil Hospital, Aizawl ah PME tih anih hnuin an khaw lamah phurh a ni a. Kamkhamkual ruang hi PME tihlohvin an phur chho a, Saitual leh Champhai PS te hriattir an ni a.Chetsualna hmunah hian Zemabawk atangin mi tlawmngaiten thi leh hliamte la chhuakin an buaipui a, a hmuna thi Zirliana hi a ruang YMA Hall-ah lain kuang an siam sak a a ni.

Thuthar

PIC zo fel
Bharat Nirman Public Informa tion Campaign Mamit Dist.a ni 3 chhung neih chu Inrinni khan zawh fel a ni ta. Campaign hnuhnung ber hi Inrinni khan Phuldungsei community hall-ah neih a ni a. Bialtu MLA VL.Robiaka’n a hmanpui a ni.

Trade Fair-ah lawmman
Hapta ni 2 chhung awh Indian International Trade Fair, New Delhi-a neih zawh takah Mizoram Pavilion chuan thil phochhuah nalh ber lawmman dawngin, Mizoramin he lawmman a dawn vawikhatna a ni. State category-ah Gujarat-in gold medal a dawng a. Exhibition nei tha berah Gujarat thlan a ni bawk. Foreign category-ah Afgha nistan-in gold medal la-in, Thailand -in silver medal a la a ni. Sorkar laipui hnuaia Ministry hrang hrang zingah Health & Family Welfare Ministry-in gold medal a dawng bawk.

Bru hel an inlar leh ta ?
Zirtawp tlai thimhlim khan Kanhmun dai Assam ramriah Bru hel nia rinhlelh hmai tuam mi 7 ten silai hmetpuakin, mi thenkhat kut an tlak bakah pawisa leh an thil neih thenkhat an lak sak. He thil thleng hi Police-te chuan ngaihven in, an chhui mek a ni.

Naupang 2 tuiah tlahlum
India leh Myanmar inri-na Tiau luiah Inrinni khan Vangchhe khaw hmeichhe naupang 2 an tla hlum. He naupang zinga 1 chu an thawm hria khualzin hria-in an chhan chhuak hman a ni.

Pak. Thlawhna chesual
Pakistan-a nimin zinga bungraw phur thlawhna chesualah a chuang zawng zawng mi 8 an thi vek a, lei lama awm mi 7-in hliam an tuar bawk.

Tualchhung

Tar enkawlna In hawng dawn
Vawiin chhun dar 12 hian Salvation Army-in Tar enkawlna In an buatsaih New Serchhip, PRC High School hmun hluia an building-ah an hawng dawn.

Dist. Volleyball tournament
Vawiin atang hian Serchhip Dist. Volleyball Association buatsaihin Serchhip Chhim Veng Volleyball court-ah Dist. Championship tournament mipa leh hmeichhe tan khelh tan a ni dawn.
He tournament hi Mizoram State Sports Council Secretary Pu Lianzuala’n a hawng dawn a ni.

Road safety week hmang mek
Thawhtan zing khan Serchhip Bazar hmunah Road Safety week hawnna inkhawm neih a ni a. Dist. Bawrhsap Pu H.Darzika’n hawngin, passenger phur lirthei khalhtute chu mihring nunna kawltu an nih avangin fimkhur turin a chah. Superintendent of Police Pu John Zothansanga pawhin thu a sawi a ni.

Pu Maka vuiliam a ni
Pathianni zan dar 10:15 khan Pu C.Lalmaka(78) f/o C.Lalhminghlua Ser chhip Kanaan Veng chu cancer avangin a boral a, lumen a nih hnu Thawhtanni khan Chhim Veng thlanmualah vuiliam a ni.

Bilkhawthlir khaw nu thattu man a ni ta

Kumin February ni 19-a Bilkhawthlir Keicham khaw nu Zorammuani rawng taka thata a ruang Vairengte thlang Lailapui kawng sira hnutchhiahtu Zakir Hussain(45) Gunggur khua chu Vairengte Police ten an man.
Tualthattu rinhlelh an neih zawngin Vairengte Police te chuan hnu chhui hna hi an thawk reng a, vawi engemaw zat amah hi man tumin an veh tawh a. Zirtawp tlai dar 3:30 vel khan a chenna Gunggur-a Atalbaspia Inah Gunggur Medical College area Police-te tanpuina-in Vairengte Police-te hian an man ta a ni.
Tualthattu hi Vairengte Police Station-ah lak nghal a ni a. Police-te hmaah Pi Zorammuani chu ama thah ngei a ni tih a inpuang a ni.
Pi Zorammuani hi kumin February ni 18 khan Bagha-ah kalin, zanah a haw lova, a tuk Feb. ni 19 zing khan Vairengte thlang Lailapur bulah a ruang hi kawng thlangah saruaka hmuh a ni.

Bilkhawthlir khaw nu thattu man a ni ta

Kumin February ni 19-a Bilkhawthlir Keicham khaw nu Zorammuani rawng taka thata a ruang Vairengte thlang Lailapui kawng sira hnutchhiahtu Zakir Hussain(45) Gunggur khua chu Vairengte Police ten an man.
Tualthattu rinhlelh an neih zawngin Vairengte Police te chuan hnu chhui hna hi an thawk reng a, vawi engemaw zat amah hi man tumin an veh tawh a. Zirtawp tlai dar 3:30 vel khan a chenna Gunggur-a Atalbaspia Inah Gunggur Medical College area Police-te tanpuina-in Vairengte Police-te hian an man ta a ni.
Tualthattu hi Vairengte Police Station-ah lak nghal a ni a. Police-te hmaah Pi Zorammuani chu ama thah ngei a ni tih a inpuang a ni.
Pi Zorammuani hi kumin February ni 18 khan Bagha-ah kalin, zanah a haw lova, a tuk Feb. ni 19 zing khan Vairengte thlang Lailapur bulah a ruang hi kawng thlangah saruaka hmuh a ni.

Hmeichhe kumtlinglo Pawngsualtu Kumtling lo pahnih man an ni

Serchhip 21st Nov. 2010 : Champhai District-a Lianpui hmeichhia kum 16 mi pawngsualtua puh Sesih rawlthar pahnih, kum 14 leh kum 15 mi chu Zirtawpni khan man an ni a, Inrinni khan Court-ah an inlan.
An sawi danin Nov. 16 khan Lianpui tleirawl hi Champhai atangin Khawbung Sumo service-in an khaw lam panin a haw a, Sesih kaltlanga an khaw panna (pumpelh-ah) ke a kal tumin a chhuk a, Sesih a pan lai hian he khaw mi rawlthar pahnihte hi a bulah kal ve-in Sesih thlen hma km. 1 vela pioneer camp ruakah hmeichhia hi an pawtlut a, an pawngsual rawn ta niin an sawi.
Hetihlaia Khuangleng bus lo tlante chuan hmeichhia hi hmu-in amah pawngsualtute hi an tlanbo nghal a, an thawmhnaw thenkhat an tlansan nghe nghe nia sawi a ni. Heng mi pahnihte hi Nov. 16 zan khan Bulfek-ah an riak a, Nov. 17 zanah Sesih daiah riak lehin Nov. 18 khan Burma lama Khawthlir-a an chhungte Inah an riak a, Nov. 19-a an khaw lama an haw chu tlai dar 5:00 velah police ten an man ta a ni.
Pawngsualtu mi pahnihte hian Nov. 16 hian Khuangleng-ah dendrite bur hnih an lei a, hmeichhia an hmuh hma hian an lo hip hman tawh niin police te hnenah an sawi a. He thil thleng avang hian Lianpui khua pawh an inpunkhawm deuh niin sawi a ni a. Police te an inrawlh vat avangin boruak duhawmlo thleng erawh a awm lo a ni.

Hmeichhe kumtlinglo Pawngsualtu Kumtling lo pahnih man an ni

Serchhip 22nd Nov. 2010 : Champhai District-a Lianpui hmeichhia kum 16 mi pawngsualtua puh Sesih rawlthar pahnih, kum 14 leh kum 15 mi chu Zirtawpni khan man an ni a, Inrinni khan Court-ah an inlan.
An sawi danin Nov. 16 khan Lianpui tleirawl hi Champhai atangin Khawbung Sumo service-in an khaw lam panin a haw a, Sesih kaltlanga an khaw panna (pumpelh-ah) ke a kal tumin a chhuk a, Sesih a pan lai hian he khaw mi rawlthar pahnihte hi a bulah kal ve-in Sesih thlen hma km. 1 vela pioneer camp ruakah hmeichhia hi an pawtlut a, an pawngsual rawn ta niin an sawi.
Hetihlaia Khuangleng bus lo tlante chuan hmeichhia hi hmu-in amah pawngsualtute hi an tlanbo nghal a, an thawmhnaw thenkhat an tlansan nghe nghe nia sawi a ni. Heng mi pahnihte hi Nov. 16 zan khan Bulfek-ah an riak a, Nov. 17 zanah Sesih daiah riak lehin Nov. 18 khan Burma lama Khawthlir-a an chhungte Inah an riak a, Nov. 19-a an khaw lama an haw chu tlai dar 5:00 velah police ten an man ta a ni.
Pawngsualtu mi pahnihte hian Nov. 16 hian Khuangleng-ah dendrite bur hnih an lei a, hmeichhia an hmuh hma hian an lo hip hman tawh niin police te hnenah an sawi a. He thil thleng avang hian Lianpui khua pawh an inpunkhawm deuh niin sawi a ni a. Police te an inrawlh vat avangin boruak duhawmlo thleng erawh a awm lo a ni.

Tualchhung

Damdawi man sak
Sub-Hqrs. YMA Serchhip hnuaia ruih hlo do pawl SADS leh Excise Deptt. tang dun chuan Thawhlehni zan khan Serchhip P&E Venga Ngurthanmawia(32) s/o Raltawna In luah, lei hnuai atangin Proxyvon mum 601 an man. He damdawi neitu nia puh Ngurthanmawia hi Excise Deptt. chuan thubuai siamsakin an la kawl a ni.

Red Ribbon Choir
DDK Aizawl leh MSACS tangdunin HIV/AIDS darh zel tur venna leh dona atana an buatsaih, Kohhran Zaipawl intihsiak, Red Ribbon choir Serchhip Zone intihsiak chu tun thla ni 30 khian BCM Kohhran Biak inah neih a ni dawn.

Tualchhung

Pi Nuzawni a boral
Nimin chhun dar 11:40 khan Pi Nuzawni(80) m/o Vanlalkunga Serchhip Vengchung chu Zunthlum natna avangin a boral a, lumen a nih hnu vawiin hian Vengchung thlanmualah vui a ni ang.

Valhminga vuiliam a ni
Tukin dar 3 vel khan Valhminga s/o Chaldengi Serchhip Ramthlun Veng chu pum na avangin a boral a, vawiin vek khan vuiliam a ni.

SP-in hriattirna ti chhuak
Superintendent of Police Pu John Zothansanga chuan hriattirna ti chhuak in, Serchhip AOC Veng, Pu Chhunthang vunga building kawt, LPG semna bak atanga hmar lam chu Auto-Rickshaw stand atan siam a ni a ti.
Hetihlai hian Serchhip khawpui chhunga lirthei chet vel dan thununtu Traffic Police-te duty thar lehin, lirthei khalhtute leh kea kalte fimkhur turin an hriattir.

Vawiin Idul Zuha chawlh
Vawiin hi ‘Idu’l Zuha’ niin, sorkar pisa chawlha puan a nih angin pisa leh zirna In te khar a ni ang.

Thal inkah siak dawn
Vawiin hian Serchhip District Archery Association buatsaihin Thal inkah siak neih a ni dawn a, a duh apiang tel turin an sawm.

Mizorama Bru lak kir mek thawhhnihna chu dodalna avangin a pamtul

Serchhip 14th Nov. 2010 : Tripura camp atanga Mizorama Bru lak let hna thawh mekah Inrinni khan Camp 3-a chhungkaw 101-te Mizoram mi dik tak an nih leh nih loh en dik a ni a, amaherawhchu dodalna a awm avangin chhungkaw dangte erawh endik hman a ni ta lo.
A thawh hnihnaa Mizorama lak let leh turte hi chhungkaw 148 vel an ni a. Inrinni khan Zawlnuam BDO hovin Mizoram sorkar staff ten Camp 3- Khakchang para, Hausapara leh Kaskar ah te an kal a. Hetah hian chhungkaw 101 te dinhmun zir chian a ni a, hemi hnua Naisingpara leh Asapara-a kal leh tur Mizoram sorkar hnathawkte chu inbiakna phut avanga Bru lak kir thawhhnihna dodaltu ten kawngah an lo dang a ni.
He kawng dan pinnaah hian hmeichhiate hmatheh niin, kawngah tuma kaltlang theih lovin an thu nia sawi a ni.
Hetihlai hian Bru Coordination Committee leh Repatriation Implementation Committee Kanchanpur-a thukhawm chuan venhimna tha tak ruahmanna siam a nih loh chuan Bru lak letna hian harsatna a tawk chho dawn a ni an ti a.Venhimna uluk zawka kengkawh turin Tripura sorkar ngen nise an ti a ni.Tun tuma laklet leh tur Bru-te hi Mamit District-a Sihthiang khuaah dah an ni dawn a. Mizoram sorkar leh Tripura sorkar chuan ruahmanna an siamte ngawrh takin an bawhzui zel a ni.

Tualchhung

Thawnthu inpuah siak result
DIET buatsaih Middle School thawn thu inpuah siak, nimina Serchhip Town hall-a result puan takah F.Malsawmzuali (Class-VII) Chhiahtlang Presbyterian School chu 1-na a ni a. Lalruatkimi (Class-VI) Little Flower Convent School 2-na niin, Mary Lalthansiami (Class-VI) Little Flower Convent School chu 3-na a ni.

Combined exam buatsaih dawn
MPSC-in Mizoram sorkar hnuaia Deptt. hrang hranga hnaruak hnawh khahna turin combined competitive exam chu Nov. ni 15 - 23, 2010 chhung hian a buatsaih dawn.

NAAC-in Serchhip College enfiah
National Assessment and Accredit Committee chuan nimin khan Govt. Serchhip College chu UGC-a Accredi tation nei tlak a ni em tiin, kawng hrang hrangah an enfiah.

Lawrkhawm

Zawlaidi khel dawn
Synod Executive Committee, Aizawla thutkhawm chuan grape wine (Zawlaidi) chungchangah thutlukna siam lovin December thla-a Synod Inkhawmpui-ah ngaih tuah law law nise an ti. Zawlaidi chungchang hi Synod Khawmpui lo awm turah hian agenda-ah a luh tho avangin SEC hian thui pawh an sawi zui lo a ni.

Manipur Journalist lo zin
All Manipur Working Journa lists' Union, Mizorama Press Tour rawn nei tura lo kal te chuan nimin khan Mizoram Journalists Associa tion(MJA) hruaitute leh Mizoram chanchinbu mite nen Press Club ah an in kawm a. Hemi zawh hian I & PR Conference Hall ah power point presentation hmangin Pu P.L. Thanga, Vice Chairman NLUP Imple menting Board chuan NLUP chung chang chipchiar takin Manipur chanchinbumite chu a hrilfiah a ni.

Pawngsual duh loh entirna
Hmeichhiate chunga hleilenna pawngsuala thahna hial thleng thin duhloh lantirna nimina MHIP Gen.Hqrs. Aizawla a buatsaih chuan thlawp a hlawh hle. He huna mipui pungkhawm chuan he suah sualna laka Mizoram chhanhim turin Pathian an au a, sorkar mi pawimawh leh MHIP hruaitu ten thu an sawi bawk.

Mizoram sorkar leh HPC(D) inkahhaina thuthlung an ziak

HPC(D) chuan niminpiah atanga tan turin thla 6 chhung sorkar dova chetna hrang hrang chawlhsan an remti.
Nizan hmasa Mizoram sorkar leh HPC(D) aiawhte inbiaknaah he inremna hi siam niin, he inremnaah hian Mizoram Home Secretary Pu Lalmalsawma leh HPC(D) Commander in chief invuah Lalropuia ten hming an ziak hnan a ni.
An inremnaah chuan thla 6 chhung hian Mizoram Police ten HPC(D) te lakah beihpui an thlak lo ang a, HPC(D) te pawhin Police leh midangte ralthuam nen an bei lo ang a, central security force-te pawhin he thu hi an zawm ve ngeina turin Mizoram sorkar-in sorkar laipui a ngen ang.
HPC(D) mi leh sate chu ralthuam keng lova Mizoram chhung hmun hrang hranga an vahvel phalsak an ni a. An demand area ah politics an khelh pawh phalsak an ni dawn bawk.

Tualchhung

SSA Residential Com. training
Ni 2 awh tur SSA kalphung inzirtir tharna Residential community training chu nimin khan Serchhip BRC hall-ah neih tan a ni. He training hi State Project Director Pu T.Rohmingliana leh hotute dang ten Aizawl atanga rawn hmanpuiin, Dist. chhunga VEC Secretary leh zirtirtu thlanchhuah mi 88 te zirtirna pek an ni.

Buhhum rate siam
Serchhip Joint Village Council nimin piaha thukhawm chuan Serchhipah ramdangmi leh hnam dangmi In tina lut lawr sumdawn khap nise an tih bakah. Buh rate siamin, ramah tin 1 Rs.140, Inah Rs. 150 nise an ti a ni.

Dan leh hrai inzirtir
Nimin khan Govt.JM High School zirlaite pualin, an school-ah dan leh hrai inzirtir neih a ni. National Legal Services Day puala he hun buatsaih, Headmaster Pu Lalzuiliana kaihhruaiah hian District Judicial Magistrate Pu T.Lalhmachhuana’n zirlaite chu dan leh hrai an hriat tur pawimawh te hrilhin, a zirtir a ni.

Field leh kawng siam
Serchhip-V VC-te hmalakna -in Serchhip Field-II chei that hna thawh mek a ni a. Hetihlai hian PWD-in P&E Veng kawng pui alkatra luan hna an chhun zawm mek bawk.
Field-II hi NREGS sum leh MLA fund hmanga chei that a ni.

Muallungthu Naupang Thah A Ni; A Thattu Mipui Kut Tuarin A Thi

Muallungthu naupang Kum 5 a Upa Lalhlimpuii Pu.Daniela Fanu chu Nov.8 chawhnu dar 2:30 vel khan Chunga Henrry tia koh thin chuan Ramhnuai ah hruai in a that.

Thudawnna in a sawi danin nimin chawhnu dar 2:30 vel khan Lalhlimpuii (Abawihi), kum 5 mi,Pu. Daniala, Muallungthu Khua ami fanu chu mi pakhatin Ramhnuai lam ah a hruai a. Naupang thiannu, Zomuana fanu sawi danin tlangval pakhat t-shirt hring leh kekawr dum hain Abawihi hi a nu thingphurh-naa kal tura insawiin a hruai a, thlanmual an thlenin amah (naupang pakhat zawk) chu haw turin a ti a, Abawihi hi a kalpui ta niin a sawi. Abawihi nu Pi. Muansangi thingphur haw hnu pawh Abawihi hi in ah a haw tak loh avangin tlai dar 5:00 vel atangin khawtlangin an zawng ru tan a, rinhlelh sa an neih avangin a tirah police pawh pun loin dama hmuh leh an beisei hle niin Muallungthu khawtlang hruaitute chuan an sawi.

Kan Palai in a sawi dan in,Abawihi hi hmuh tur a awm tak mai loh avangin Muallungthu khawtlang bakah, Kulikawn police leh Muallungthu khaw thenawm te chuan Nov.8 zan lal la khan meichher nen mi bo zawn hna hi an thawk nghala, zan dar 12:10 khan Muallungthu khaw hnuai Darnam lui leh Aisih In finna thlanga kawr sir ah Abawihi ruang hi an hmuh ta a ni. Lalhlimpuii Abawihi hi saruakin bawkkhup zawngin a lo awm a, mau hnahin a lo inkhuh a, a lu ah hliam a tawrh bakah, a taksa hmun dangah ‘khawichhiatna’ hnu hma hmuh tur a awm bak ah A taksa a berh hle a, pawikhawihtu hian a ruang a dahna hmunah hian a hnuk thleng nia ngai te pawh a awm a ni..

Muallungthu khawtlang hian Sateek-ah an mi rinhlelh hi hmuh a ni tih an hriat ve leh Vawin Nov.9 zing khan Sateek hi pan nghala, tukin dar dar 6:00 vel khan an man a, amah hi thu an zawta, Chunga hian a thawmhnaw hak chu lo thlak tawh in naupangin a thawm hak a hmuh a sawi zawk chu Bag ah a lo khung a chumi a tang chuan Khawtlang hruaitute hian Chunga tih an finfiah thei ta a ni. Chung henrry tia hriat bawk hi Kum 35 mi vel ani a,Nov.8 chawhnu dar 2 vela Muallungthu a a chaweina Pi.Chuai-i.chuan chhungte emaw a neih a hriatloh thu leh a changa an hmuh thin bak leh Myanmar lam a tanga lokal nia a hriat thu a sawi.

Chunga hi Muallungthu-ah hian kar khat kalta vel khan awm tanin thingzai tur zawng nia in sawi a ni. Nuapng Aibawihi Nu Pi.Muansangi chuan Chunga hi an Inah pawh hian kal thin in a pasal Daniela nen pawh Inhria niin a sawi. chunga hian Nimina pawi a khawih hnu hian Sateek lam hi pan nghalin zan dar 7:00 velah a thleng a, thing zai tura a sawm a thiante Inah thlengin a mantu ten an va hmuh lai hian pawnah thing a lo ek niin sawi a ni.

Chunga man a ni tih Muallungthu leh a bul hnai khuaa miten an hriat veleh hian sateek lam pan in an kal nasa hle a, Muallungthu khua mite hian khawih lova Muallungthu thlenpui an tum a, Tachhip khaw hnuaiah police ten lo dangin an kuta hlan turin an ti a. Hetia an indawr buai chhung hian Chunga hian kut a lo tuar palh a, zing dar 7-8 inkar velah police hian.an la a,Muallungthu khawlai ah mipui thinrim in kal tlangpui an phallo chu hun rei deuh tak an dang khawtlai a, Chawhma dar 10:55 vel khan Aizawl lam panpui niin Mel 8 ah a hliam tuar lovin Chunga hi a Boral ta ni a sawi a ni. source : buanel.com

Mizo mipuite chu sorkar nei lo ang mai kan ni - Dr.R.Lalthangliana

Serchhip 8th Nov. 2010 : MNF Vice President, Dr.R.Lalthangliana MLA chuan Mizoram sorkar chu mipuite mamawh ei leh bar hnianghnara pe thei lovah puhin, Mizo mipuite chu sorkar nei lo ang mai kan ni a ti.
Inrinnia Lungleia MNF Sub-Hqrs. Office-ah thutharlakhawmtute kawmin, Dr.R.Lalthangliana chuan, mipui nawlpuiin sorkar kan hriatna ber chu nitin ei leh bar leh eirawngbawlna gas-ah te a ni a. Tun sorkar ah hi chuan nitin mamawh man a sang em em a, buhfai phei chu a harsa tak zet a ni a ti.
Dr.R.Lalthangliana chuan tun anga kawngpui chhe lutuk leh eirawngbawlna gas harsa lutuk hi MNF sorkar-ah kha chuan a awm ve ngai lo niin a sawi a. Aizawl Municipal Council inthlanna zawh fel tak result chu Mizoram politics tehna pawimawh tak a tling a ni a ti bawk.

Tualchhung

Rul chuk avangin Zonuna a thi
Zonunsanga(24) s/o Rangkhuma Serchhip Vengchung nizan hmasa khan dar 12:50 khan Rul chuk avangin a boral a, nimin khan vuiliam a ni. Zonunsanga hi kar kalta Inrinni khan a ram kalna lamah Rultuha-in a chuk a, hun engemaw chen Damdawi Ina enkawl a nih hnu ah a boral ta a ni.

UPC(MZ) Inkhawmpui
UPC(Mizoram) District Conference chu nizan atang khan Serchhip UPC (Mizoram) Hebron Biak Inah neih tan a ni a, Pathianni zanah an tiak ang.

Art exhibition Serchhipah
Thla leh December ni 7-11 hian Serchhip leh Hnahthialah NEZCC leh A&C Mizoram buatsaihin Mobile Art Exhibition buatsaih a ni dawn.
District hrang hrang 3 Aizawl, Lunglei, Serchhip leh Champhai bakah Nagaland leh Tripura atangin an lemziak thehlut turin an hriattir.
Mizoram Artist Society-in an lemziak 10, Mi-zoram Academy of Fine Arts-in 10, School of Fine Arts-in 10, Lungleiin 10, Champhaiin 10, Serchhipin 5, Nagaland 2, Tripura 2 an thehlut thei dawn a ni.
Ni 7-9 December 2010-ah Serchhip ah hun hman a ni anga, Dec.ni 9-ah Hnahthialah pheiin hun hman a ni leh anga, December ni 11-ah Hnahthialah Closing Programme hman a ni dawn a ni.

Tui tla ruang hmu ta
Niminpiah Ningani-a Tuichang luia chesual Lalmuanawma ruang chu nimin khan a tlakna atang metre 15 vela hla, hlam 5 vela thukah hmuh a ni. Lalmuanawma(18) s/o Lung khama Khawlailung Bangla Veng hi a thiante nen nghakuai khaiin Tuichangluiah hian an kal a, an chaw ei kham; tui an cheng chu chesualin a tla ta a. Khawlailung leh a chheh vel khua mi tlawmngai ten chhun zan zawma an zawn hnuah nimin khan hmuh a ni ta a ni.

Pawngsual thu sawiho
Niminpiah Ningani khan Thenzawl Police Station huam chhunga khawtlang hruaitute leh Police hotu ten tunlai Mizo khawtlang nuna pawngsual hluar zel chungchang leh hmei chhiate himna chungchang an sawiho. He hunah hian pawngsual, a bikin naupang kumtlinglo pawngsual leh khuaikhem hluar chho mek do let dan turte, he thil tha lo ti bo tura nu leh pa leh khawtlang hruai tute mawhphurhna an sawi hova. He thil hluar chhan chu chhungkaw inrelbawlna fuh tawk loh vang nia hriat a nih thu tarlan a ni.

MPF-in AMC inthlan an thlir let Pu Hawla thusawi nia sawi mak an ti

Serchhip 6th Nov. 2010 : Mizoram Peoples Forum(MPF) Hqrs. hruaitute an President Rev.C.Chawngliana hova nimina Aizawla thukhawm chuan Aizawl Municipal Council inthlanna neih zawh tak chungchang an thlir ho.
AMC inthlanna hmasa ber tluang tak leh buaina leh harsat lian tham awm lova neih theih a ni chu lawmawm an tih thu an sawi a. AMC Councellor thlan thar zawng zawngte lawmpuina leh duhsakna hlanin, Mizoram khawpui leh Mizote hmel lanna pawimawh ber pakhat Aizawl khawpui chu uluk leh tha taka enkawl tur leh chumi atana an hmalaknaah theihtawp chhuaha dik tak leh rinawm taka thawk zel turin an ngen bawk.
He meeting-ah hian inthlan vuakvetah political party-te nena thawhhona thuthlung siam chuan zawm leh ngaih pawimawh a hlawh tha tih an sawi a. Hetih laia Chief Minister-in MPF buatsaih joint platform chungchang a sawinaa MPF-in dawt sawi an phal tia a sawi nia sawi chu mak an tih thu thuchhuah siamin an sawi a. MPF Hqrs. leh Local Forum hruaitute chuan engtik lai mahin dawt an sawi an phal ngai lo tih sawiin, chutiang laka inthliar fihlim tur chuan zirtirna an pe chhuak reng zawk tih an sawi a. Joint platform atanga candidate leh campaigner dang ten thu dik tluantlinglo an lo sawi palh a nih pawhin MPF phalna a ni lova, an mahni mawhphurhnaah an ngai tih an sawi a ni.
Hetihlai Thawhtanni khian sorkar chuan Council thar dinna tur hriattirna a ti chhuakin, hemi atanga ni 7 chhungin Councellor-te chu lakluh an ni ang.

Farm Information & Advisory Centre Serchhip Agriculture Complex-ah hawn a ni

Serchhip 4th Nov. 2010 : Vawiin khan Pu C.Lalzarliana M.Sc.(Agri), Director of Agriculture(CH), Aizawl chuan Serchhip Agriculture Complex ah ‘Farm Information and Advisory Centre’ a hawng.
Hawnna thu sawiin, Agriculture Director thar, Pu C.Lalzarliana chuan, Agriculture Department-in a tum ber chu Buh thar tam a ni a ti a. kumtin Mizoram Buh thar zat Central-a Report a pek thin hi a dik a, a lo diklo palh a nih pawhin a Report tu mipuite mawrhphurhna a ni a ti a, Buh thar zat kan report avang hian Agriculture Deptt. in Central atangin sum cheng khatmah kan hmuh phah lova, Ration buhfai kan lakluh a nghawng bawk lova, khel chiam chi a ni lo a ti.
A sawizelna ah Pu Lalzarliana chuan Satellite atanga a landanin Mizoram hian Buh thar theihna ram 75,000 Hectares vela zau kan nei a, mahse heng zinga 15,000 Hectares vel chauh kan la cheibawl thei a, Zawlpui Mat phaiah ringawt pawh 100 Hectares vel zeta zau leileta siam loh a la awm a ni a ti a, Buh thar tam ngaihpawimawh ang bawkin Oil Palm chin uar pawh Agriculture Deptt. chuan kan ngaipawimawh dawn a ni a ti.

NLUP chungchang pawh sawilangin Agriculture Director chuan NLUP duangtu mipathum zinga pakhat a nih ve thu a sawi a, nikum chhung ringawt pawh khan NLUP buaipuiin vawi 18 zet delhi a kal thu sawiin Cabinet Committee on Economic Security in Cheng Vaibelchhe 2560 zet min pass sak a, First Installment atan Rs.234.82 Crore min rawn released tawh nghe nghe a, tu ten emaw "Bang chhak sahthlak a, bangthlang pin nana hman ang chauh" tia an sawi chu a diklo tih sawiin, sum lokalna turin Central Scheme kan neihah te kan luanluhtir mai a ni a ti bawk. Director chuan chhungkaw 1,20, 000 te'n Cheng nuai 1 theuhva an insem tur hi a awm reng a, mahse thawk peihlo chu kan pe lovang a ti a, Agriculture Deptt. hlawhtlinna chu loneitu, a taka thawktu te ah 90% a innghat a ni a ti bawk.
He Centre sakna atan hian Rs.3,20,000 zet sengralin Sound System leh mi 120 thutna tur thutthleng pawh chhawp nghal vek a ni a. Hawnna inkhawm hi Serchhip DAO Pu Lalthansiama'n a kaihruai a, Pu B.Vanlalfinga Chairman, Tuipui NWDPRA, Leng khua a mi leh Pu R.saikhuma Chairman, Upper Mat WDPSCA, Chhing chhip ten thu an sawi bawk a, Nl.Zodinthari thiam taka zaiin Comedian VL Dinsanga a che bawk a, chawhnu lamah Training neih zui nghal a niin, tlaiah Ruai an kilho nghal bawk.

Tualchhung

Free Medical camp
Vawiin(4.11.2010) khan 4th Assam Rifles ten Little Flower Convent School, Serchhip ah zirlai naupang te tan a thlawna inentirna (Free Medical Camp) an buatsaih a, 4 Assam Rifles Doctor 2 ten naupang te hriselna hi endikin zirlai 300 chuang zet an en a, a thlawnin damdawi thahnem tak an semchhuak bawk.

Assessment camp buatsaih
Serchhip Dist. SSA Mission bul tumin vawiin (4.11.2010) khan Serchhip town hall-ah Primary leh Middle School zirlaite hriselna din hmun enfiahna, Assessment camp neih a ni a. Presbyterian Hospital Durtlanga thawk Doctor leh an thawhpui ten zirlaite hriselna dinhmun an en a ni. He hunah hian Serchhip SDEO hnuaia zirlai 182, Thenzawl zirlai 56, N.Vanlaiphai zirlai 117 enin, tukin hian chhunzawm a ni ang.

NAAC-in tlawh dawn
National Accredited & Assess ment Council chuan tun thla ni 11 hian Govt. Serchhip College chu tlawhin, an rawn enfiah dawn a. Hemi atan hian College chu tunlai hian ngawrh takin an inbuatsaih mek.

Naktuk Diwali
Naktuk hi Hindu sakhaw vuantute Kut pawimawh ‘Diwali’ niin, sorkar pisa chawlhah puan a ni.

Lawrkhawm

Congress leh ZNP an chak
Aizawl Municipal Council hmasa ber inthlan result vawiina(4.11.2010) puan tak ah Congress leh ZNP tangdun chuan seat 10 hmuin, sorkar-na an chang hram. MNF leh MPC tangdun chuan seat 9 an hmu a ni. He inthlanah hian tlang rin loh takin Congress-in seat 5, ZNP-in seat 5, MNF-in seat 5 leh MPC-in seat 4 an hmu a ni.

Congress a uang thei lo
Chief Minister Pu Lal Thanhawla chuan AMC inthlannaah hian Pathianin Congress sorkar chu tlin loh phal si lovin chapo leh uangthuang thei lo dinhmunah min dah a ni a ti a. Inthlan result chuan a beisei a pha lo tih a sawi a. Congress tlin theihna chu thingtlang lam vote a nih thu sawiin, Aizawl chu tun hma atanga Congress party tlin harsatna hmun a ni ve reng a ni a ti bawk. Pu Hawla chuan, sorkar hmasa kih hnawk thian chunga an kal mek thu a sawi bawk.

Mipuiin Congress an kham ti
Aizawl Municipal Council inthlan result chungchanga thutharla khawmtute zawhna chhangin, MNF President Pu Zoramthanga chuan MNF leh MPC tangdun chu beisei aiin an chak daih tih a sawi a. Tun inthlanah hian sorkar mo thar chu tluk an inbeisei ngam loh laiin hetiang dinhmun an din theih avangin mipui hnenah lawmthu a sawi a. He inthlan result hian rorel lai Congress party chu mipuiin an kham ta tih lantirna a ni a ti.

Bru lak kir thawhkhatna
Tripura Camp-a Bru awmte Mizo rama lak kir hna, thawhkhatna chu zawh fel a ni ta a, a thawh hnihna chu karleh lam khian chhunzawm tum a ni. A thawhkhatnaah hian chhungkaw 53 lak kir an ni a, Mizoram sorkar chuan kar khat chhung ration a thlawna a pek dawn bakah an inbenbelna tur Rs. 80000 theuh a pe dawn bawk.

PPP Model training
Vawiin (4.11.2010) khan Secretariat Conf. Hall, New Secretariat Complex-ah Public Private Partnership leh Muni cipal Administration chungchang zirhona hun hman a ni a. Kolkata Metropolitan Development Autho rity (KMDA) hnuai a PPP Cell Advi sor ni lai Pu Kalyan Roy in zirtirna pe in Workshop hi Chief Secretary Pu Van Hela Pachuau in a hawng a ni.

Tripura atangin Bru chhungkua 53-te lak kir an ni

Tripura Camp-a Bru awmte Mizorama lak kir hna chu nimin chawhnu khan venhimna khauh tak hnuaiah tan a ni a, harsatna thleng lovin chhungkaw 53-te chu Mizoramah hruai thlen an ni. Hemi hma lam hian Tripura sorkar chuan Mizorama Bru-te lak kir dodaltu pawlte chu dodal lo tur leh harsatna siam lo turin a lo hriattir tawh a ni.
Nimin khan Naisingpara, Asapara camp atangin chhungkaw 35 hruai chhuah an ni. Bru mipui lak kir hna thawhkhatnaah hian chhungkaw 50 atanga 60 vel la kir tura ruahmanna siam a ni a, vawiin pawh hian chhunzawm leh a ni ang.
Heng chhungkaw lo kir hmasa te hi Mamit District Kolalian khuaa cheng tur an ni a, an awm lailawkna camp atanga Mizoram an rawn panna lirthei hmante hi Tripura sorkar ruahman niin, sum erawh Mizoram sorkar-in sorkar laipui atanga fund a hmuh danin a tum dawn a ni.

Aizawl Municipal Council Election Result

Aizawl Municipal Council inthlan vote chhiar chu Nov. ni 4 hian neih ani a, MNF leh MPC tangdun in Seat 9, an la a, ZNP leh MPCC tangdun in, seat 10 la in, sawrkarna an siam dawn ta.

Result of General Election to Aizawl Municipal Council, 2010
Ward No.	Name of Elected Candidate	Party Affiliation	Total Votes Polled
I	Lalrinenga Sailo	MNF	3552
II	Hmingthanzami	ZNP	3124
III	Lalthanliana	MPC	3315
IV	Lalmalsawmi	MNF	3486
V	Rosiamngheta	MPC	2513
VI	Zamanthangi	MNF	2178
VII	Zarzoliana	ZNP	3192
VIII	PC Lalhmingthanga	MNF	2078
IX	PC Lalruatsanga	MPC	2859
X	Lalzirliana	INC	2350
XI	Lalchhuanmawii	ZNP	2918
XII	Laldinsangi	INC	3187
XIII	W. Chhuanawma	ZNP	2090
XIV	Lal Rimawia	ZNP	3283
XV	CT Zakhuma	INC	2854
XVI	C. Lalsawivunga	MPC	3412
XVII	F. Lalhuthangi	INC	2825
XVIII	Biakthansanga	MNF	4351
XIX	Ramhlunsanga	INC	3069
INC = 5; ZNP = 5; MNF = 5; MPC = 4
INC & ZNP = 10
MNF & MPC = 9 source : buannel.com

Naupang kumtling lo mutpui tumtu-in naupang nu ban a sat bung

Serchhip 2nd Nov. 2010 : Inrinni khan Sangau atanga Km 17-a hla, Cheural khuaa hmeithai pakhat chu a fanu kumtling lo mutpuia sawmtu tlangval kum 19 mi-in a ban dinglam a sat bung.
Inrinni chawhma dar 10:30, feh kal hnu mi reh lai takin he tlangval Lalnunzama hian hmeithai Pi Vantharmawii Inah lutin, TV ena a lo mu lai chu chempuiin a sat a. Pi Vantharmawii hi lo indangin a ban ding lam a sah bun sak a, a vei lam pawh a thling lang rawt khawpin a sat a ni.
Hetianga a chet nachhan hi tunhnaiah Pi Vantharmawii fanu kum 10 mi, mutpuiah tum hnih a sawm tih a nu-in a hriat hnuah Lalnunzama awmna pa a hrilh vang a ni a. Zirtawpni zan khan Lalnunzama awmna chhungkuaah hian kalin thil awm dan a sawi a. Hemi zan pawhin Lalnunzama hian an nufa hian a lo sawisa a, Pi Vantharmawii phei chu a kal tha hlei thei lo nia sawi a ni. Hemi zan hian an thlabar avangin midang inah an riak chhuak a. A tuka an Ina an haw hnu lawkah Lalnunzama hian chempuiin a bei leh ta a ni.
Lalnunzama hi Sangau Police-te kutah inpe-in, nimin khan Saiha-ah kalpui a ni. Lalnunzama hi tunhma pawha buru tak taka lo che tawh nia sawi a ni. He thil thleng avanga Cheural nunau thlabara siamtu hi a phu tawk hremna pek an phut tih Sangau Sub-Hqrs. Lai Women Association chuan an sawi a ni.