Tualchhung

Pu Hawla damlovin a haw
Bialtu MLA, Chief Minister Pu Lal Thanhawla chu Inrinni zing khan khawtlang hruaitute nen an inkawm laia a pum a nat thut avangin Aizawlah Helicopter-in phurh thlak a ni.
Pu Hawla hi engemaw chen ngaih chan a nih hnuah Helicopter hmangin Aizawlah phurh a ni a, Doctor ten a dinhmun enfiah nghalin, a mita lungte awmsa a tla fual nia hmuh a ni.
Pu Hawla hova a hming chawia Higher Secondary School Managing board meeting ah hian Pu Hawla chuan, Education reform commission dina Mizoram zirna siamthat tum mek a nih thu a sawi a.Mizoramah ziak leh chhiar thiam an tam ang aia hman tlak thiamna nei an tam lo chu zirna siamthat ti ngai tu a ni a ti a. Lehkha thiam kuthnathawh hmusittute chu mi sum chhuh saka hel pawl anga insiam, Manipur state-a awm mek anga an kal chhoh ve mai a hlauh thawn thu a sawi a ni.

Hri danna pe dawn
Vawiin(1.11.2010) chawhnu dar 1 hian Presbyterian School Serchhip leh Presbyterian Hospital Durtlang tangkawp buatsaihin hriselna chungchang sawihona neih a ni dawn. Chawhma lamah hri danna chi hrang hrang; zirlai leh a duh apiangte hnenah pek an ni dawn bawk.

Tualchhung

Electoral roll ennawn dawn
Election Commission thupek anga Mizoram Assembly electoral roll ennawnna summary revision Oct. ni 30 atangin neih tan a ni dawn. Vawiin khan hemi chungchang hi Serchhip DC’s Conference hall-ah zirho a ni a. Tarlan a nih danin Serchhip District-a electoral roll-a hming chuang zawng zawng zinga 94% te chuan EPIC an nei tawh a, zaa za nei tura hmalak mek a ni.

Khapna thupek ti chhuak
District Magistrate Pu H.Darzika chuan Serchhip Dist. chhungah mi tumahin lui dunga sangha leh nungchate manna atan Tur, puaktheithil, electrict hmanrua leh chinai te hman leh hralh a khap.

Science Exhibition khar ta
State level Student Science Exhibition Govt. High School Serchhipa neih chu vawiin khan lawmman sema kharna hun hman a ni. He exhibition- High Secondary School bikah St.Pauls Higher Secondary School Aizawl 1-na an ni a, St.Peters Higher Secondary School Chhingchhip 2-na niin, Govt.Higher Secondary School Serchhip 3-na an ni.
High School bikah Greenland H/S Chatlang 1-na niin, St.Pauls H/S 2-na niin, Don Bosco school Saiha 3-na an ni.

Kawng a tlang leh ta
Hun engemaw chen Chhingchhip Mualpuia National High way kawngpui chhuat chhiat avanga lirthei a kal tlang theih tawh loh hnuah naktuk hian lirthei chitin kaltlang theiha hawn a ni dawn. Helai kawng chhia hi PWD ten Lei hmanga dawh kaiin, naktuk hian Bialtu MLA-in a hawng dawn a ni.

Awareness campaign
Naktuk chhun dar 12:30 hian Serchhip Bazar ah Pu H.Rohluna Supply Minister hovin Consumer Awareness Campaign neih a ni dawn.

Mi pawngsual leh sattu a tlan bo Police ten ngawrh takin an zawng mek

Serchhip 28 Oct. 2010 : Khawzawl bul Ramlaitui-a inhlawhfa Zahminga (54), Armed Veng Aizawl ami chu a thawhpui mi pakhat satah leh hmeichhia pawngsualah puh a ni a, amah hi a tlanbo a, police ten an zawng mek.
An sawi danin tun Pathianni khan Tuichang kama Pu Hrangkaia, Khawzawl hnena inhlawh Zahminga hian inhlawhfa ve tho hmeichhe pahnih chu zurui chungin khawih a tum a, hmeichhe pahnih leh mipa pahnih, inhlawhfa ve tho te chuan hlauin khuaah, anmahni chhawrtu Pu Hrangkaia Inah hian an hawsan a, Zahminga hian umzuiin Inah hian a luhchilh a, an zinga mi Paungaihthang (16) Ngaizawl khua chu a lu-ah a sat a ni.
He thil thlen lai hian In neitu Hrangkaia te hi damlo kana an chhuah lai a ni a, Zahminga hian a pu te hriat lohin a inhlawhfakpui te hi ram lamah a hruaikir leh vek a, Paungaihthang hi a hliam a nat deuh avangin Thawhtanni zing khan Khawzawl damdawi inah inentir turin a haw leh a, a lu kak hi feet chanve vel niin a luruh a khi deuh nia hriat a ni a, Aizawl lam panpui a ni.
Paungaihthang hian Khawzawl police station-ah FIR a thehlut a, police te hian Zahminga man tum hian an riahna hmun hi an pan nghal a, a lo hmuh hmasak avangin a tlanbo ta nia sawi a ni. Amah hi ramvachal tak, chaw tel lo pawha ni engemaw zat khawsa thei niin an sawi nghe nghe.
An sawi zel danin an riahpui hmeichhiate hi Zahminga hian a pawngsual thin a, Khawzawl damdawiinah enfiah an ni tawh a, medical report-a a lan danin an puhna hi thil ni thei a nih thu Khawzawl police te chuan an sawi.
He thil thleng an hriat hian Paungaihthang te khua, Ngaizawl thalai 40 rual vel chuan Thawhlehni khan Khawzawl an rawn pan a, Khawzawl police leh Group YMA hruaitute chuan khaw daiah lo nghakin thil awmdan an inhrilhfiah hnu leh, pawikhawihtu nia puh hi zawn mek a nih thu an lo hrilhhnuah an kir leh ta a ni.
Pu Hrangkaia hian hlawhfa 7 - Tuitawh, Burma ami tleirawl 5, mipa 3 leh hmeichhe 2 kum 14 mi ve ve bakah hliam tuar Ngaizawl mi Paungaih thanga leh pawi khawihtu Zahminga hi a ruai a ni.

Lawrkhawm

Khuai leh Rul lakah thi
Nilaini khan Lunglei thlang Chithar tlangval Nghenchhanliana (38) s/o K.Lalmuana chu a ram vahnaah Khawidangin a zuk hlum. Nghenchhanliana hi ramah a kal a, lengkir kotlanga a awm laiin, Khawidangin vawilehkhatah an lo bawh thut a, a tlanchhiat chuan a thlang lengkir a ni tawh bawk si a, a thu tawp ringawt a, Khuai chuan an zuk rawn ta a, harsa taka insa sengin, In a thleng thei hrama, a khua nasa taka sikin, hemi zan dar 7 vel khan a thi ta a ni.
Hetihlai nimin khan Hriphaw khua Zairemmawia(46) chu Antam huana a kalnaah Rultuha-in a chuk a, hemi hnu reilo te ah a thi zui ta mai nia sawi a ni.

MHIP-in suma inral uar duh
MHIP Gen.Hqrs. chuan chhiatni ah puan leh pangparte a pe tur awmte chauhvin pek nise, remchan anga lusun chhungte sum leh paia ral uar zawk nise an ti. Nimina an office-a thutharlakhawmtute an kawmnaah he thu hi sawiin, MHIP chuan Veng, khua leh MHIP Branch awmna hmun hrang hrang ah chhiat tawk an awmin kuang khuh chei mawi leh pangpara chei mawi thin chu a tul a nih chuan MHIP-in buaipui thin nise an ti a, dinhmun a inang loh avangin pangpar dawn angate thlalakpui tawh loh nise an ti bawk.

Naktuk atangin NLUP
October, 2010 thlaa NLUP sem a nih tur thu Mizoram mipuite hnena Chief Minister Pu Lal Than hawla'n a lo tiam lawk tawh angin naktuk hian Darlawn leh Sakawrdai ah sem tum a ni a. naktuk (30.10.2010) hian N.Hlimen khua ah te sem a ni ang. Tun tumah hian Soil & Water Conservation Department hnuaia Hmunphiah chingtu turte hnenah sem a ni ang tih sorkar thuchhuah chuan a tarlang.

Bungraw phurh man thar
Transport Department chuan bungraw phur Truck hman man rate thar a siam a, rate thar ang chuan National Highway leh State Highway ah bungraw phur Truck te chu an bungraw phurh man kilometre tinah Quintal khat pawisa 90 (Rs 0.90 paise per Quintal per Kilometre) zel a lak tawh tur a ni ang. Rate thar hi he thu chhuah anih tanga hman nghal tur hi a ni.

Myanmar Tlangval pahnihin Rangvalmualah nula pakhat an pawngsual rawn

Serchhip 27th Oct. 2010 : Tun Thawhtanni, Oct.ni 25, tlailam dar 5 vel khan Aizawl Rangvamual thlen hma kawngpui sira nula pakhat ding chu, tlangval pahnihin a hnunglam atanga kuah phut in a ka an hup a, kawng thlanglamah pawt thla-in an pawngsual rawn ta a ni.
He nula hian a sawi dan chuan, amah hi bawnghnute zuar niin a bawnghnute zuar zo Aizawl lama rawn haw tum chu, taxi pakhat lo pharin he taxi ah hian zurui deuh deuh an lo chuan avangin he nula hian chu taxi chu chuang leh duh lovin motor dang a lo nghah leh lai chuan tlangval pahnih te hian an rawn bei ta mai niin a sawi.
Heng tlangvalte hian kawng thlang lama an hnuhthlak rual hian a kawr an pawhchhiat sak a, theihtawp chhuahin he nula hi nasa takin a tang a, tlangvalte hian a bul thlamah hnuk lutin an pawngsual rawn ta a ni. Oct 26 khan Police lam chuan theihtawp chhuaha pawngsualtute hi an zawn hnuah Myanmar mi ve ve Lalchawiliana (19) leh Vanlalpekliana(18) Aizawl Zohnuaia khawsate chu manin thubuai an siamsak a ni.
Hetihlai hian Lunglei Ramthar tleirawl pahnih YMA Gen.Conference laia bo te kha Ruata intiin Tlabungah Rickshaw-a phur thlain a lo khuaikhem tih hriatchhuah a ni. Lunglei Police Station atanga tarlan danin tleirawl pahnihte hi tun thla ni 21 zana an haw tur chu Rickshaw hian phurin Dinpuii Hotel bula chhuk an tum chu Rickshaw Driver Ruata inti hian a phur tlang a, Tlabung lamah a phur thla ta daih a, a upa zawk hi hmeichhiat mipatna a hmanpui a, a naupang zawk erawh chu a hmanpui hman lo a ni.
Ruata hian Tlabunga an Inah hruai hawngin chaw te a eitir a, hetihlai hian Ruata pa hian hmeichhiate hi a hau a, Ruata te In chu chhuahsanin, Motor remchangah lo chhovin Lunglei PS-ah an thil tawn an report a ni. Ruata hi Tlabung Police ten manin pawngsual Case 376 an siamsak a ni.

Tualchhung

Science Exhibition khar dawn
State level Student Science Exhibition Govt. High School Serchhipa neih mek chu naktuk (28.10.2010) hian result puan a nih hnuah khar a ni dawn ta.

Foreigner sumdawng ngaimawh
Nizan hmasaa Serchhip Hmar Veng Branch YMA Executive Comtt. Pu Lungmuana Sailo(L) te Ina thukhawm chuan tunlaia Serchhip veng hrang hranga Foreigner sumdawng, In tina lut lawra vak kual thin te an ngaimawh thu sawihovin chhungtinte him zawkna atan an Branch YMA huamchhungah chuan Foreigner, In tina lut lawra sumdawn an phal tawh lo tih an tarlang a, YMA duh dan pawisa lova Foreigner sumdawng hmu leh hria te chuan YMA hruaitute hnenah emaw, Police lamah emaw report vat thin turin an duh tih an tarlang tel bawk.

Silai inkahsiak
Vawiin(27.10.2010) khan Serchhip Town Hall ah Serchhip District Rifles Association buatsaihin 10 mtrs. Air Rifle Scho- oting Com petition neih a ni a, mipui in an hlut hle.

Hna thawh en ho
Sorkar laipuiin Thingtlang mipuite dinhmun chawikanna tura scheme leh prog. chi hrang hrang a duan chhuah, Mizorama kalpui a nih dan rawn entu phai lam chanchinbumite chuan vawiin khan Thenzawla NREGS hnuaia kawng laih an en a, Dist. Bawrhsap Pu H.Dar zika leh official dang ten lo dawn sawng in, Dist. dinhmun tlangpui a hrilh fiah a.Kumin chhung hian NREGS hnuaiah ni 75 inhlawhna siam a nih tawh thu Bawrhsap chuan a sawi a ni.

Tualchhung

Science Exhibition nei mek
Ni 3 awh tur, State level Student Science Exhibition chu vawiin (26.10.2010) khan Govt. High School Serchhipah SCERT Jt.Director Pi Sangthanmawii’n a hawng.
He hun DEO Pu C.Zolawma kaih hruaiah hian Pi Sangthanmawii chuan, science chu kan nitin nun nena inzawm tlat an nih avangin zirlai ten an thiam a pawimawh a ni a ti. He exhibition ah hian Mizoram hmun hrang hrang atanga High School leh Higher Secondary School 14 atangin zirlai 80 ten science thiamna hrang hrang an entir a ni.


Thlai lu man sawiho
Vawiin khan Hmar Veng YMA Hall-ah Agriculture Department buatsaihin, thlai lu man (Crop insurance) chungchang inzawhfiahna hun hman a ni. He hunah hian AEO Pu K.Laltlanmawia, Pu Chhiar kunga, Pu C.Lalramzauva Manager Apex Bank ten Loneitu kal khawmte zawhna an chhang a ni.
Tarlan a nih danin kuminah hian Dist. chhunga chhungkaw 121 ten buh leh vaimim an insured-a, nakum lamah thingtlang leh leilet buh bakah vaimim leh iskut-te pawh insure theih tawh tura ruahmanna a siam a ni.


Ruatkimi vuiliam
Tukin zing dar 4:30 khan Lalruatkimi(3) s/o B.Lalpian mawia Kikawn Veng chu khawsikpui avangin a boral a, nimin vek khan vuiliam a ni


MHIP Lentlang Block hawng
Vawiin khan MHIP Block thar Lentlang Block chu Tuikum Bialtu MLA Pu K.Lianzuala’n a hawng a. Dist. Bawrhsap Pu H.Darzika’n khualzahawm niin a hmanpui bawk

Sorkar-in NLUP kalpui tum dan chu bang thlang lam pinna tura bang chhak sah thlak ang a ni

Serchhip 26th Oct. 2010 : MNF Party President Pu Zoramthanga chuan, sorkar chu NLUP kalpuina tura Department thenkhat sum pawtkhawmah puhin, sorkar-in NLUP kalpui a tum dan chu bang thlang lam pinna tura bang chhak lam sahthlak ang a ni a ti.

MNF leh MPC party hruaitu ten a huhova vawiina Aizawl Press Club-a thutharlakhawmtute an kawmnaah he thu hi sawiin, Pu Zoramthanga chuan, NLUP kalpuina tur sum hi sorkar laipui chuan pawmpui tawh mah se, Mizoram budget-a kum 2 chhung sum dah a nih tawh hnuah pawh sorkar laipui chuan cheng khat mah a la pek belh loh niin a sawi a. Department engemaw zatin plan sum an neihte NLUP kalpuina tura pawh then sak an nih avangin Department tam takin harsatna an tawk mek niin Chief Minister hlui Pu Zoramthanga chuan a sawi bawk.

Aizawl Municipal Council inthlan turah eptu pawl lam thlang tling lo tura mipuite sawi thaihah Chief Minister chu puhin, Pu Zoramthanga chuan Municipal council-in hmasawnna hna a thawhna sumte chu sorkar laipui scheme hrang hrang atanga lo kal turte a nih avangin state sorkar-in a hrek thei lo niin a sawi bawk.
Pu Vanlalhlana kaihhruai he hunah hian MPC Party working President Col.Lalchungnunga Sailo pawhin thu a sawi a ni.

Meizu man tur hmu lo

Nimin Thawhlehni (26.10.2010) khan Serchhip a Anti-Tobacco Squad leh MZP Hqrs. Serchhip te chuan Nl. Vanlalzari, District Coordinator, Mizoram State Tobacco Control Society hovin Serchhip khawchhunga zirna In hrang hrang te tlawhin School Com pound chhunga Mei zu an awm leh awm loh an check a, hemi bakah hian zirna in atanga feet 300 biala dawr ah te kalin vaihlo leh a kaihhnawih zuar an awm leh awm loh an endik a, tin vaihlo leh a kaih hnawih zuartu dang te tlawhin kum 18 hnuailam hnena vaihlo leh a kaihhnawih zawrh phal anih loh thu an hrilh bawk. A vaiin zirna In 16 zet an tlawh a, phal lohna hmuna Mei zu man tur pakhatmah an hmu lova, an lawm hle a ni.

ITFT-a zir tur Mizo thalai ten an senso rul let leh turin Mizoram sorkar an phut

Serchhip 24th Oct. 2010 : Chandigarh-a ITFT-a zir tura Mizoram sorkar-in a thlan tawh hnuah an zir leh theih dawn tak loh avangin zirlai thlan tawhte chuan Mizoram Youth Commission hnenah an senso tawh zawng zawng hmu let leh thei turin leh an zirna ngai zir zawm theih nana hmalak sak turin an phut.
Inrinni Aizawla thutharlakhawmtute an kawmnaah zirlaite aiawha ding Lalkhawngaiha chuan Mizoram sorkar leh ITFT inremna chu kumin Aug.ni 18 khan Chief Minister ngeiin hawngin, a rintlak a ni tih a sawi a. Sorkar aiawha a hmuna endiktu pakhat pawhin a that tawk thu leh a him tawk thu a report hnuah zirlai tam tak chuan sorkar hmalaknaah rinna an nghat a, amaherawhchu hetiang dinhmun hi kan thleng ta a ni a ti a. An dinhmun hetiang a nih takah chuan zirlaite leh zirlai nu leh pa te tum thum an inhmuhkhawm hnuah thu tlukna siamin, sorkar chuan an zir zawmna tur leh an insenso tawhna zawng zawng rul let ngei turin an phut tih Lalkhawngaiha chuan a sawi a. Mizoram Youth Commission(MYC) leh Chief Minister-te hnenah an thil phut ziahna memorandum an thehlut tawh tih sawiin, a bawhzuina engmah a awm loh avangin Chief Minister an hmu leh a; a ni chuan MYC chuan ITFT thawhpui chu a remti lo chunga kalpui luih a ni tih a lo hrilh niin zirlaite chuan an sawi a ni.
Tunhnaiah ITFT hi rinhlelhna a awm avangin chhui chian a ni a, belh tlaka ngai lovin, sorkar hnena thawhdunna thuthlung an lo ziak tawh chu Mizoram sorkar chuan a sut leh ta a ni.

Tualchhung

Global IDD Day hmang
Iodine tlakchham avanga piansualna pumpelh tura beihpui thlak Ni, Global IDD Day chu hmun dang rualin nimin khan Serchhipah pawh hman a ni a. He hunah hian CMO Dr.Malsawma leh mi thiam dang ten Iodine tlakchham avanga awrpuar leh thatlohna dang thleng thei leh a pumpelh theih dante an sawi a ni.

Tuialhthei harsa mek
Tuialhthei harsatna chuan Serchhip khawpui chhunga lirthei neitute a nghawng mek a. A bik takin petrol hmang, vantlang hman chi lirthei auto Rickshaw leh Taxi-te chuan nimin atang khan petrol harsat chhung atan rate an ti sang.

YMA inkhawmpui lian Lungleia neih chuan kumpuan atan Khawtlang nun siam that a thlang

Lungleia YMA Gen.Conference neih mek chuan nakuma Gen.conference thleng turin Kolasib an ruat a, kumpuan atan ‘Khawtlang nun siamthat’ tih chu an thlang nawn leh a ni.
CYMA President Pu Lalchungnunga kaihhruai nimina rorel inkhawmah rorel palai 1107 telin, an thu rel zinga YMA kaihhnawihah YMA kalphung inzirtir uar nise tih leh thing chereu zel tur ven nan kuang atan thingphel hmang tlema remchang dang hmang zawk turin CYMA-in hma la rawh se tih an rel a. Sorkar lam nena thawhho ngai chi an rel zingah Mizo hming hawha hnamdang sumdawngte ti tawp turin CYMA-in hma la rawh se tih leh halpuah leh halmawi hi eng hunah pawh khap chhunzawm zel turin sorkar ngen ni rawh se tihte, Mizoram mil turin Mizoram drug control act siam ni ve rawh se tih te leh National Highway 54 hi sorkar-in national highway a nih anga a enkawl theih nan zir chianga hmalak nise tih te a tel a ni.

SSA Mission Serchhip District buatsaihin Right to Education Act zirhona neih a ni

Serchhip 21st Oct. 2010 : Nimin khan Serchhip District SSA Mission chuan Serchhip District huamchhunga Primary leh Middle School zirtirtute tan Right of Children to Free & Compulsory Education Act, 2009 chungchang zirna (Training) DC’s Conference Hall ah buatsaih a ni.
He huna khuallian Parliamentary Secretary Pu Lal Thanzara chuan, Right to Education Act (RTE) chu sorkar laipui hmalakna pawimawh tak, India ram chhunga naupang tam tak zirna mumal nei lo, a then phei chu zirna sikul la rap ngai miah lo ten zirna an dawn ngei theihna tura duan a nih thu leh Mizoram chhungah pawh a hlawhtlinna tura sorkar-in theihtawp a hma a lak mek thu a sawi a. Sorkar laipui chuan SSA hmanga Elementary Education siamthat mai chu duh tawk lovin, Secondary leh Higher Secondary Education siamthat nan RMSA a rawn hma chho ta zel a, heng hmalakna a hlawhtlin theihna tur a pawimawh em em chu zirtirtute an nih thu sawiin, Parliamentary Secretary chuan Mizoram a sikul naupangte tana zirna tha pe a, zirlai chhawr tlak tam tak chher chhuak ngei turin kalkhawm te chu a fuih a ni.
School Education Secretary leh Director ni bawk Pi Esther Lalruatkimi pawhin thu sawiin, RTE training hawnna programme-ah hian he dan in a tum leh a awmzia te sawi fiahin Mizoram sorkar hmalak tawh dan leh a hma chhawp tlangpui te a tarlang a.
Pi Esther Lalruatkimi chuan, sorkar laipuiin India ram pum a April ni 1, 2010 a hman tan tur a a tih he RTE Act hi Mizoramah pawh hman tan mek a nih thu leh he danin a phut anga State Advisory Council leh Right to Education Protection Authority din a nih tawh thu a sawi a, Rules pawh duan mek a nih thu Secretary chuan a tarlang nghal bawk.
Right to Education Act zirhona (training) hi Dist.Bawrhsap Pu H. Darzika’n hawnna inkhawm hi a kaihruai a. Chawhnu lamah Pi Laldawngliani Chawngthu, Joint Director SCERT leh Pi D. Ramdinthangi, Deputy Director SCERT ten zirtirna pe in zawhna leh chhanna hun an hmang zui nghal a ni.

Aizawl Thakthing Vengah hmeichhe naupang kum 5 mi thah a ni

Serchhip 19th Oct. 2010 : Aizawl Thakthing Vengah nimin zing khan hmeichhe naupang kum 5 mi ruang chhar a ni.
He hmeichhe naupang Zomuanpuii hi an chenna Thakthing Venga Pu Thangkhuma In luaha a nute nena awm an ni a. Nimin zing dar 6 vela an kawta a nau nena an awm chu a nute hriatpui lohvin mi pakhatin thil lei saka thlemin a hruai niin a nau chuan a sawi a. Tukthuan ei huna a haw mai loh avangin a chhung ten zawngin Pu Zonunsanga te garrage-ah thia hmuh a ni ta a ni.
He hmeichhe naupang ruang hi garrage-a bike dahtu mi pakhatin a hmuh hnuah Police-te hriattir nghal an ni a. Forensic lam pawhin an tih tur angte an tih hnuah ruang hi postmortem a ni a. A nute khua Sabual ah a ruang hi lak a ni ta a ni.
Kulikawn Police-te sawi danin naupang hian a lu leh nghawngah hliam a tuar a. Pawngsual hnua thah ni ngeia hriat a ni.
Thakthing Veng tlawmngai pawl hrang hrang leh VC-te chuan hetianga naupang pawisawilo kutthlaka a nunna hial laksaktu hi an dem tak zet tih sawiin, a thih dan chhui chhuak a, a ti tu tak man chhuak thuai tur leh a phu tawk hremna pe ngei turin thuneitute an ngen tih an sawi a ni.
Nimin vek khan Aizawl Republic Veng leh Venghlui inri-na kawrah hmeichhe ruang chhar a ni a. He ruang hi Republic Vengthlanga cheng Zonunsangi(21) ruang tih hriat a ni a, a thih dan chhui mek a ni.

Hmeichhe naupang kum tlinglo pawngsualtu man

Niminpiah(17th Oct) tlai dar 4 vel khan F.Laltlankima, Zozam Veng a mi chu naupang kum tlinglo pawngsuala puh a nih avangin Police ten an man.
Tlankima’n naupang a pawngsual nia sawi hi Zozam veng a mi bawk a ni a, tunah kum 9 mi a ni. He naupang hi inrinni kalta 16th Oct. khan an veng tuikhurah an insuk laiin Tlankim-a’n Rs.100 pek a tum a la pek miah loh thu a sawichhuak a, chu chu a bula puitling lo awm ten engvanga Tlankima’n Rs.100 pek tum nge a nih an zawt a, a tir chuan hmeichhe naupang hian a sawi duh lawk lova, tichuan a tuk Pathianni chawhnu lam khan naupang hi a chhung ten dawp chhuakin Tlankima hian nikum lam saih tawh khan(A hun a sawi mai thei lova) pawisa pek tiamin a lo khuaikhem ngei a ni tih an hrechhuak ta a, Police ah report in an man ta a ni.
Nizan hmasa vek khan Tlankima’n a pawngsual hmeichhe naupang hi Medical Test neihpui nghal a ni. Tlankima hi vawiin hian Aizawl lamah phurhthlak nghal a ni ang.

Naupang pawngsuala puh man a ni

F.Laltlankima Serchhip Zozam Veng chu zanin khan hmeichhe naupang kumtling lo pawngsuala puh avangin man a ni. Tlankima hian he naupang hi nikum lam khan a lo khuaikhem tih zanin khan hriatchhuah a ni. Thu kimchang kan ron tarlang leh ang.

Bru hel pawl lo kirleh te hnenah sorkar-in a sum pek tur a pe tlak ta

Serchhip 17th Oct. 2010 : Nungphung pangngai zawm tura kum 2008-a Mizorama inbengbel BLFM Returnee 337 ten sorkar atanga sum an dawn tur chu Inrinni khan pek tlak a ni ta.
Heng mite hnenah hian Mizoram sorkar chuan Rs.30000 theuh Inrinni khan Mamit DC Office-ah a hlan a. Tuna pawisa dawngtute Mizoram chhunga khawsa te an ni. BLFM returnee-te hi an vaiin 804 an ni a, midang 467 te chu Tripura transit camp-a awmte an nih avangin tun tumah hian pek an ni lova, Mizorama an lo let leh huna pek tura ruahman a ni.
BLFM-te hi Mizoram sorkar chuan Rs.80000 theuh a pe tur a ni a, hemi hma lam hian Rs.50000 lo pe tawhin, tun tumah hian Mizorama cheng BLFM returnee-te chu Rs.30000 theuh pe lehin an dawn tur ang an dawng kim ta a ni.
Hetihlai hian Tripura transit camp 6 a Bru chengte thla leha la kir thei turin ruahmanna siam mek a ni a. Inrinni khan Bru zinga Mizorama lo let leh duhte intelkhawmna committee chuan thuchhuah siamin, Mizoram, Tripura leh Central sorkar-in an kir lehna tura ruahmanna an siam chu tha an tih thu leh he ruahmanna hi an thlawp tlat tih an sawi a. An hruaitu Mizoram Bru Displace Peoples Forum President Elvis Choki mimala beihna chu tawp tawh se an duh thu an sawi a. Mizorama an kir lehna tur kawngah harsatna siama thu veivir thinte thil tih chu tha an ti lo tih sawiin, Bru mipuite chuan sorkar leh hotute thu anga awm thei tura inruahman nise an ti bawk.

Serchhipa Faina hapta hman chhunga faina kawnga ti thate hnenah lawmman sem a ni

Serchhip 11th Oct. 2010 : Serchhipa Faina hapta hman chhunga kawng hrang hranga inelna buatsaiha lawmman dawngtute hnenah vawiin (11.10.2010) khan lawmman hlan a ni.
Lawmman semna inkhawm DC’s Conference hall-a neih, Pu ST.Lalhmingmawia Sanitation Officer kaihhruaiah hian khuallian District Bawrhsap Pu H.Darzika chuan, hriselna hi changkang leh changkang lo tehna a ni a, hriselna nei tur chuan fai a ngai a ni a ti a. Faina hapta hman ngaia kan la awm hi kan failohna ti langtu a nih avangin faina kawnga hmala tur hian mitinin mawh kan phur a ni a ti.
He hunah hian khuallian chuan, Mizoram State Tobacco Control Society-in Serchhip District-a sorkar Deptt. office thianghlim bera a puan Chief Medical Office chu ‘Zamzo Award’ a hlan a ni.
Lawmman semna inkhawmah hian Rev.Hrangaia Hmar-in hunserh a hmang a. Rosy Lalhmingsangi, Michael Lalramsiama leh YMA Sub-Hqrs. Zaipawlte zaiin, C.Laldinpuia’n fiamthu a thawh bawk.
Lawmman hrang hrang dawngtute -
Hotel, Restaurant, Tea stall & Canteen :
1. District Hospital Canteen
2. PHE Office Canteen
3. Midway Cafe, Serchhip Bazar

Primary School :
1. Govt.Chanmari Primary School
2. Govt. Chhim Veng Primary School
3. Govt. Chhiahtlang Primary School

Middle School :
1. Govt. Ramlai Middle School
2. Little Flower Convent School
3. Presbyterian English School

VC Area (Veng) fai :
1. Village Council-V
2. Chhiahtlang
3. Village Council-I

Department Office :
1. PHE Division Office
2. Soil & Water Conservation Office
3. Taxation Office

High School, Higher Secondary & College :
1. Govt. PCR High School
2. Marian High School
3. Zoluti Memorial High School

UD&PA hnuaia tual hmunphiat (Sweeper) tha ber :
Pi Lalkimi Kanan Veng

Chanchinbu faina lama thuziak tha ber :
Lamkal nitin chanchinbu
P&E Veng MHIP Branch chuan an Veng huamchhunga BPL/ AAY chhungkaw fai an lo thlan chhuah chhungkaw 5 te hnenah lawmman hlan an ni bawk.

Serchhip Auditorium leh Sports Stadium sakna tur lungphum phum a ni

Serchhip 10th Oct. 2010 : Serchhipa Sports Stadium leh Auditorium sakna tur lung phum chu Inrinni khan District Bawrhsap Pu H.Darzika’n a phum.
Hemi puala inkhawm Field School-a neihah District Bawrhsap Pu H.Darzika chuan, heng hmasawnna hna thawh turte hi tluang taka a kal theih nan hnathawktu hnamdangmite chu Serchhip khawtlang mipui ten kan tawiawm a ngai a ni a ti a. Lungphum chu Chief Minister phum tur ni mah se, a hman remchan loh avang leh sak hna tan thuai a tul tawh bawk si avangin a aiawha phum a nih thu a sawi a. DC chuan, hmasawnna hnathawh tur hi thawh zawh a nih chuan Serchhip District hmel nasa takin a ti danglam ang a ti bawk.
Auditorium Serchhip Field-I a sakna atan hian Union ministry of Urban Development sum; Rs.vaibelchhe 21.26 ruahman niin, mi 1000 len theihna, Sq.mtre 2350 zau, a sir kual chhuakin kangmei leh rikrum thlen thulha chhanchhuah hna awlsam tak thawh theih nan Fire service motor tlan kual theihna tur ruahman a ni a.Auditorium sa tur hian ban khur hmun 4 ah laih a ni tawh a, hnathawktu tur NBCC mi 60 velin an awm chilh tawh bawk.
Heng hna te hi NBCC thawh tur niin, kum 2 chhunga thawh zawh hman an inbeisei a. Serchhip Hmar Venga Rs.vaibelchhe 15. 2 senga sak tur sports stadium erawh a panna kawng chhia siam that a la tul rih avangin a sak hna a la tan theih rih loh a ni.

Chhimchhak Presbytery Inkhawmpui neih mek a ni

Mizoram Presbyterian Kohhran Inkhawmpui lian ber dawttu Presbytery chu Mizoram hmun hrang hrangah neih mek a ni a. Hetih rual hian Presbytery upa tak pakhat Chhimchhak Presbytery pawhin New Serchhip Kohhran Biak Inah inkhawmpui hi an hmang ve mek bawk.
Tun tum Chhimchhak Presbytery Inkhawmpui neih mek hi a vawi 87-na a ni a, tun tum inkhawmpuiah hian thlarau lam thupuiah "Lal Isua a lo kal leh dawn(Tirh 1:11) tih chu hman a ni. Tun tum Chhimchhak Presbytery inkhawmpuiah hian Moderator Rev Lalrinsanga Serchhip Bialtu Pastor niin secretary(Sr) chu Upa H.Vanlalhruaia a ni.
Chhimchhak Presbytery huamchhungah hian Pastor Bial 4 awmin Kohhran 22 an awm a. Kohhran Dan zawhkim 9074 an awm a, Kohhran member zawng zawng hi 13222 an ni. Kum 2010 April-Sept chhunga Chhimchhak Presbytery huam chhunga Kohhran tena Synod a an sum chhunluh belhkhawm chu Rs 57,87,379/- a ni.
Kohhran inchhiarna(2009-2010) a Chhimchhak Presbytery huamchhunga Pastor Bial tinte dinhmun tlangpui chu hetiang hi a ni -

Serchhip Pastor Bial:
Kohhran awmzat : 4
Kohhran Upa : 29
Tual Upa : 5
Pem upa : 4
Dan zawhkim : 2775
Kohhran member : 3986
Chhungkua : 800
Nau piang : 45
Mitthi : 20
Synod sum(Apr-Sept 2010) : Rs 20,81,179/-
SS zirtirtu : 200
SS Zirlai : 2946

Serchhip Vengchung Pastor Bial:
Kohhran awmzat : 6
Kohhran Upa : 37
Tual Upa : 16
Pem upa : 2
Dan zawhkim : 2292
Kohhran member : 3362
Chhungkua : 712
Nau piang : 60
Mitthi : 22
Synod sum(Apr-Sept 2010) : Rs 19,15,196/-
SS zirtirtu : 277
SS Zirlai : 2468

New Serchhip Pastor Bial:
Kohhran awmzat : 5
Kohhran Upa : 19
Tual Upa : 10
Pem upa : 4
Dan zawhkim : 1601
Kohhran member : 2336
Chhungkua : 468
Nau piang : 39
Mitthi : 8
Synod sum(Apr-Sept 2010) :Rs 15,04,326/-
SS zirtirtu : 252
SS Zirlai : 1755

Chhiahtlang Pastor Bial:
Kohhran awmzat : 7
Kohhran Upa : 45
Tual Upa : 18
Pem upa : 2
Dan zawhkim : 2406
Kohhran member : 3538
Chhungkua : 656
Nau piang : 62
Mitthi : 24
Synod sum(Apr-Sept 2010) : Rs 14,3,339/-
SS zirtirtu : 358
SS Zirlai : 2733

ZOHANCO hnathawktu ten an harsatna sutkian sak turin sorkar an ngen

Serchhip 8th Oct. 2010 : Mizoram Handloom & Handicraft Development Corporaton Ltd.(ZOHANCO) hnathawktute chuan thla 6 chhung hlawh an lak tawh loh avanga harsatna tawhte chinfel sak turin sorkar an ngen.
Nimina thuchhuah an siamah ZOHANCO employees association chuan an harsatna tawhte mipui hmaa puangzar tura press conference koh an tum chu sorkar thuneitu ten chawlhkar khat chhunga an harsatna sutkian sak an tiam avangin an thulh tih an sawi a.
An harsatna te chu kum rei tawh tak atanga lo intan tawh a nih thu sawiin, ZOHANCO hnathawkte chuan hlawh lak loh ringawt chu an harsatna a ni lova, handloom leh handicraft ti hmasawn tura hmachhawp hrang hrang leh hmalak zelna turah pawh sum an nei lo tih an sawi a. Mizo hnam zia-rang tarlanna tura an thil siam ten hmasawnna an neih theih nana hnathawk thei tur leh an dam khawchhuahna turin sorkar-in an mamawh tawk sum ngaihtuahsak se an duhin, an phut tih an thuchhuahah chuan an sawi a ni.

Tualchhung

ATI-in training buatsaih
Nimin khan ATI buatsaihin DC’s Conference hall-ah Sorkar hnathawk ten tha zawka hna an thawh theih dan tur leh an hamthatna awm theite zirhona neih tan a ni.
He training ni 4 awh tur hi hawng in, District Bawrhsap Pu H.Darzika chuan, sorkar hna kalphung hriaa thiam taka thawk thei chu an thawh chhan mi rethei chhungkua leh sorkar tan bakah an mahni tan pawh hamthatna a nih avangin chutianga thiam taka thawk thei tura thil hriat thar nana hmang turin sorkar hnathawk kalkhawmte chu a chah a ni. He training-ah hian ATI-a mi thiam hrang hrang ten sorkar hna kalphung chi hrang hrang zirtirna an pe a ni.

ICDS Office tur sa mek
Serchhipa sorkar Department awm hmasa ICDS chuan Office hmunhma nei lova hun rei tak an awm tawh hnuah tunah hian P&E Veng, Field-II bulah Office building an sa mek.

Zawlaidi hralhchhuah a ni dawn hnai Litre 1 zelah Rs.14 chhiah lak a ni dawn

Serchhip 5th Oct. 2010 : Hnahlan leh Champhai winery atanga siamchhuah grape zu(Zawlaidi) chu karleh tawp lam atangin license nei ten winary atangin an lei chhuah hman beisei a ni a, mipui hnena hralhchhuah hun tur leh a man tur erawh sawi theih a la ni rih lo.
Hemi chungchang hi vawiin (5.9.2010) khan Aizawl Press Club-ah thutharla khawmtute hrilhin, Mizoram Excise & Nercotics Department Commissioner Pu Lalbiakmawia Khiangte chuan, Champhai District-ah hlawhtling takin grape huan siam a ni a, mahse grape-te chu a tha chi an nih loh avangin a thura ei atan hralh a kal lem lova.Wine tha tak siam chhuah nan pawh a hman theih chuang lova, heti chung hian wine atana siam mai loh chu a neitute tan kawng dang a awm ta lo tih sawiin, hemi avang hian a chingtute chuan an thiam dan danin wine-ah an siam a. Alcohol a tel ve avangin hralh pawh a kal ta viau a, amaherawhchu alcohol tel; in tur siam leh hralhte chuan dan ding lai MLTP Act 1995 a kalh avangin siamthata Mizoram Excise & Nercotic wine rules 2008 siam a ni a. He dan hmang hian Hnahlan leh Champhai Grape Grower Society-te chu kum 2008 khan license pek an ni a ti a.
Kum 2010-a grape tharchhuah atangin winary 2 te hian excise & nercotic endikna hnuaiah hna an thawk tan ta tih sawiin,Pu Lalbiakmawia chuan, hmun danga winary ang thlapin heng winary ah te hian danin a phut angin winary neitu ten qualified chemist ruaiin, laboratory an nei ve thlap a ni a ti a. He grape zu, Zawlaidi atanga excise duty lak zat tur chu litres 1 zelah Rs. 14 a ni a ti a bawk.

Dawngzawl ram hralhna chungchang

Serchhip Dawngzawl ram, BSF hmun atana ram inleisak chungchanga lungawilo mi thenkhat ten Vanglaini chanchinbua an thu tarlanah thil hriat fuh loh leh man fuh loh a awm a.

Keini a ram neitu dik tak (Ram leitute) Pu C.Zokhuma, Pu B.Vanlalhruaia, Pi F.Aizami leh C.Lalhmangaihsanga te hian ram leina man Rs.15,25,48,460/- hi a bo a bang awm lovin kan la/dawng a. Ram neitu hmasa (Hralhtute) aiawh Pu T.Rosiama, Pu H.Lalliana leh Pu B.Vanlalsawma te hnenah ni 15.4.2010 khan inremna lo siam tawh angin Rs.70,00,000/- (nuai sawmsarih) kan hlan ve leh chhawng a ni.



Sd/- Sd/-
(C.Zokhuma) (B.Vanlalhruaia)




Sd/- Sd/-
(F.Aizami) (C.Lalhmangaihsanga)

Serchhip : Mizoram