Hmun dang rualin Serchhipah World No Tobacco Day hman a ni

Serchhip 31st June 2010 : Vawiin khan Serchhip DC’s Conference Hall-ah Indian Society on Tobacco & Health (ISTH) Serchhip District huaihawtin ‘World No Tobacco Day’ hman a ni.
Vaihlo laka fihlim ni pual inkhawm Pu Lalhmangaiha Chawngthu, Vice President ISTH Serchhip kaihhruaiah hian khuallian District Bawrhsap Pu H.Darzika chuan thu sawiin, kan thil chin tha lo, zuk leh hmuam leh a kaihhnawih dang zawng zawngte avangin Mizoram hi khawvel pum huap pawha cancer vei tamna ber zing ami a ni a. A bikin mihring tam dan atanga chhutin Serchhip District hi cancer vei tamna ber a ni tih sawiin, Mizote vaihlo laka fihlim turin sorkar, tlawmngai pawl leh kohhrante hian ralpui phiara beih a ngai tawh a ni a ti.
He hunah hian Dr.Malsawma CMO chuan zuk leh hmuam that loh zia kalkhawmte zirtirna a pe a. Zuk leh hmuam ngei dan Pi Lalthlamuani’n zirtirna a pe bawk. He huna kalkhawm zirlaite chuan zuk leh hmuam laka fihlim turin ban pharin an intiam a ni.
Khuallian Pu H.Darzika hian ‘Hriselna atana zuk leh hmuam hlauhawm zia’ tih thupui hmanga hla inpuahsiak leh High school zirlaite puala zuk leh hmuam hi hriselna ti chhetu a ni tih thupui hmang essay inziah siak result puangin, lawmman a hlan nghal a ni.
Essay lawmman dawngtute :
1. Jessica Lalruatmawii d/o P.Sangnawna, Govt.JM High School
2. B.Lalruatpuii d/o B.Darremmawia, Marian High School
3. H.Lalnunpuii d/o H.Lalduhawma, Marian High School

Hla inpuahsiak lawmman dawngtute :
1. J.Laldula Sailo, E.Lungdar Kawn Veng
2. Lalrammuana, Serchhip Ramthlun Veng
3. Fela pa, Serchhip

Saitluk that loh chhan MPCC-in a sawifiah

Mizoram chhim lam tana thlawhna tumhmun (Airport) siam tumna kal mekah Kawmzawl Airport ruahmanna hun engemawchen chawl tawh chu tharthawh leh mek a ni a, Major Domestic Airport atana beisei Saitluk ram erawh chu ngun taka enfiah a nih hnuah a 'fit' tawk loh tih hmuhchhuah a nih avangin, Tawipui North leh South inkara Thlisam ram chu survey tura ruahman mek a ni.

Saitluk rama Major Domestic Airport siam tum thulh leh rih a nih chungchangah hian MNF party chuan Lungleia meeting neihah Congress sorkar demna thu an sawi chhuak a, Assembly Session-a resolution pass meuha tarlan a nih tawh laia, Congress sorkarin hmundang a dap leh chu hriatthiam har an tih thu an tarlang a. Hemi chungchang hi sawifiahin Parliamentary Secretary S.Laldingliana chuan, "MNF sorkar khan chhim lama airport siam hi an sorkar chhung khan an ngaipawimawh tehchiam lo. YMA Sub-Hqrs.-a ka inhman ve laiin, Lunglei Airport Survey Committee-ah min telh ve a, kan Secretary Pu J.Lalhmingliana kha hetiang lama mithiam a ni a, a mi hrilh ang ang kha kan ring ve tawp mai a, Assembly Session-ah pawh resolution meuh pulutin ka sawi a, Assembly-ah thu dik tawk lo ka lo sawi kha pawi ka ti em em a ni," a ti.
S.Laldingliana chuan kum 10 chhung MNF sorkarin Saitluk Airport atan hian Survey Committee din bak chu hma an lak loh thu te, Engineer pawh tirh an nih loh thu leh Revenue lam atangin surveyor pakhat erawh an tirh chauh thu a sawi a. Chief Minister thahnemngaihna leh inhawnna avangin, Airport siam nan Saitluk ram a remchan tak meuh loh avangin Thlisam ram chu mithiam ten riahchilh meuha uluk taka an zirchian hnu-ah survey tlaka ngaiin hma lak mek a ni, a ti.

Dr.R.Lalthangliana, MLA in 13th FC-a pawisa dil pek a nih loh avanga Saitluk Airport tur pamtul anga a sawi chu a dik tawk lo tih sawiin, 13th Finance Commission-ah hian cheng vaibelchhe 250 dil a ni a, mahse, Detail Project Report chu sawi loh, Concept Paper pawh a awm mumal lo a, 13th FC tan pek ngaihna a awm lo hrim hrim, a ti a. Saitluk rama Airport siam tum chu pawisa hmuh loh vang ni lovin, mithiam ten an zirchian hnu-ah chhunzawm tlak a ni lo an tih vang zawk a ni, a ti.
Mizoram sorkar Civil Aviation-a Principal Consultant Wg.Cdr. (retd) Lalzawma chuan Saitluk rama Airport siam a remchan loh chhan chu ruam thuk tak chhunkhah tur leh tlang rawt tur a awm a, a panna kawng a chhia in, a hranpa ngata Lunglei atanga kalpawhna tur kawng dang siam a ngai a, keima ho ngeia engineer te nen a hmunah tlawha kan enfiah atangin Major Domestic Airport atan chuan fuh tawk loa hriat a ni, a ti a. "Saitluk ram dinhmun dik tak hre tur hian Aviation lam atangin tu mahin an lo la tlawh hauh lo a, ralkhat atang erawh chuan an thlir," a ti bawk.

Saitluk ram chu Airport Authority of India (AAI) lam mithiamte pawhin enfiah se an hnawl leh tho tur nia an ngaih thu Lalzawma chuan a sawi a. He hna a chelh hmaa Chief Minister hoa Airport Authority of India (AAI) mithiam ten an enfiah tumin khua a chhiat avangin a hmuna tlawh tul an tih thu an sawi a, anni pawh hian rawn enin rawn zirchiang se an hnawl tho tur niin a lang, a ti a. Hei vang hian sum tamtak senga buaipuia pamtul leh ngawt ai chuan, hmun dang dap leh mai chu finthlak zawka an hriat thu a sawi.

Mi 45 vel chuan theihna ATR 42 tum theihna tura ngaih Kawmzawl Airport, kum 2000 April thlaa project report peih tawh chu MNF sorkar kum 10 chhungin bawhzuina a awm mumal lo tih Lalzawma chuan a sawi a. Principal Consultant hna a thawh hnu-ah, tunhmaa Kawmzawl Airport atana hmalakna te chu phawrhchhuak lehin tharthawh leh mek a ni, a ti a. He project atan hian cheng vaibelchhe 45 vel senna tura ruahman, NEC project-a kalpui tura rawt chu tunah hian Engineer te ennawn (revise) tir mek an ni a, tunah chuan cheng vaibelchhe 60 aia tam mah sen a ngai tawhin a rinawm, a ti. Kawmzawl Airport siam tur hian runway awmna lai turah Km 1 vel dawn Lunglei khawpui chawmna tui pipe lian tak a awm a, hei hi divert hmasak phawt a tul dawn tih a sawi bawk.

Mualcheng South bula Thlisam ram pawh enfiah a nih tawh thu sawiin, Saitluk ram ai chuan a zia-awm a, ngun taka enfiah a nih hnu-ah survey chhunzawm tlaka ngaih a ni, a ti a. Airport siam chu politics-a inbeihna chi a nih loh thu leh, ram leh mipui tana thil tha, rotling tur tak tak a nih avangin politics dahthaa ngaihtuahna a sen thu sawiin, “Mizoram-a Wing Commander chawl tawh pathum chauh kan awm a, heng ka unaute hi Saitluk ram dinhmun dik tak enfiahpui-ah ka sawm a ni,” a ti bawk. Amah bak Wing Commander retired a sawi pahnihte hi Lalnghinglova, tuna NLUP Marketing Cell-a Chairman ni mek J.Lalhmingliana te an ni.

MPCC Secretary Lalrozara chuan tunhnaia MNF hotuten World Bank kawng leh chhim lama Multi-Modal Transport Project, an kut chhuak ni awm taka an sawi chu thil dik a nih loh thu chanchinthar lakhawmtute a hrilh a. World Bank kawng atan hian Congress sorkar hmasa hun laiin ruahmanna siam a nih thu leh, Multi-Modal Transport Project chu state sorkar tih pawh ni lo, kum 1992-a sorkar laipuiin a ruahman chhoh a ni, a ti.

Serchhip Media ten NREGS a VMC an nihna atangin banna an thehlut

Nimin May ni 28, 2010 chawhma dar 11 khan Serchhip a tualchhung chanchinbumi te leh Vision a thawk inthurual te chuan MGNREGA hnuaia Vigillance & Monitoring Committee Member a ruat an nihna chu awmze nei lo leh a taka chhawr tangkai tumna awm lo nia hria in Pu Sangdingliana, Dist. Programme Officer, MGNREGA, Serchhip District leh DRDA Project Director ni bawk chu Office a la kai loh avangin New Serchhip a a chenna Inah kal chilhin banna lehkha an thehlut a, a Copy hi Prime Minister Dr.Manmohan Singh, Serchhip Bialtu MLA leh Chief Minister ni bawk Pu Lalthanhawla, Rural Development Minister Pu R.Lalzirliana, Principal Secretary RD Deptt. Mizoram leh Chief Secretary Pu Vanhela Pachuau te pawh pek an tum.


Serchhip a tualchhung chanchinbu leh Vision enkawltute hi July ni 27, 2009 khan MGNREGA, Serchhip District hnuaia Vigillance & Monitoring Committee Member ah ruat an ni hlawm a(Vide No.B.12016/1/2008 Dated Serchhip the 27th July 2009), Serchhip Dist. chhunga khaw hrang hrang an bial tur te pawh siam fel a ni a, mahse an ruatna anga hman tangkai an nih leh si loh avang hian a hming tumtu nih ve satliah chu him lohna chin awmin an hria a, vawi tam tak an sawiho hnu ah banna lehkha an thehlut ta a ni. An banna lehkha a hming ziak te chu hengmite hi an ni – Pu Lalremruata Ralte Editor, Ramlai Arsi & President MJA, Serchhip Dist., Pu C.Lalhminghlua Editor, Laisuih & Vice President MJA Serchhip Dist., Pu C.Ramengmawia Editor, Lamkal & Gen. Secretary MJA, Pu Zonunsanga Kawlni Editor, Lenkawl & Joint Secretary MJA, Pu Lalmuanawma Hnamte Editor, Ram Nieng & Fin. Secretary MJA, Pu Kapliana Pachuau Editor, Serchhip Times, Pu PC Vanlalhruaia Production Manager, TT Vision, Pu R.Lalmuansanga Joint Editor, Serkhawpui.
MGNREGA, Serchhip District hnuaia Vigillance & Monitoring Committee Member ten a hu hova banna an thehluh rual hian MGNREGS, Serchhip Dist. hnuaia Communication Expert atana ruat(Vide No.B.12016/1/2008-NREGS(SCP) Dated at the Serchhip 3rd Nov. 2009) Pu Kapliana Pachuau Editor, Serchhip Times pawhin ruat a nihna anga hman tangkai ni lova inhria in banna lehkha a thehlut ve nghal bawk a, a banna hi Dist. Prog. Officer Pu Sangdingliana’n a lo dawnsak nghal bawk a ni.

Tualchhung : 28.5.2010

Marova a boral
Tukin dar 5:45 khan Tv. Lalrozuala c/o Zopari Serchhip Bazar Veng chu Lungna avangin Aizawl Civil Hospital-ah a boral a, a ruang hi Serchhipah lak mek a ni a, zanin lumen a ni ang.

SGSY sum hmu dawn
Sorkar laipuia Ministry of Rural Development chuan Mizoram district 8-a Swamjayanti Gram Swarozgar Yojana (SGSY) atana hman tur tanpuina sum Rs.93,91,000/- a pe dawn. Hei hi 1st installment niin sorkar kum kal lai mek 2010-2011 chhunga hman tur a ni a, district tina DRDA hnenah sem a ni ang.
1. Aizawl - Rs. nuai 220.38
2. Champhai - Rs. nuai 15.12
3. Lunglei - Rs. nuai 16.05
4. Kolasib - Rs. nuai 7.40
5. Mamit - Rs. nuai 8.80
6. Lawngtlai - Rs. nuai 12.52
7. Saiha - Rs. nuai 5.93
8. Serchhip - Rs. nuai 7.71

Darnamah ran enkawlna
Dist. AH & Vety Department chuan niminpiah khan mipui awlsam zawkna atan Serchhip Darnam tlangah ran damlo enkawlna tur Sub-Centre a hawng.

Cabinet Sub-Comtt. on 6th Pay-in an report Chief Minister hnenah an hlan ta

Serchhip 27th May 2010 : Mizoram sorkarin a hnuaia hnathawk ten 6th Central Pay an lak ve theihna tura Fitment Committee Report leh Federation of Mizoram Government Employees & Workers (FMGE&W) hnuaia association hrang hrang ten rawtna sorkara an thehluhte zir chianga recommendation siam tura ni 12 January 2010 a din, Cabinet Sub-Committee on 6th Pay Implementation chuan nimin khan Chief Minister Pu Lal Thanhawla hnenah Report an thehlut fel ta.
Cabinet Sub-Committee hian hna an thawh chhung hian tum hnih hun pawhsei sak an ni a. An thawh chhung hian Sorkar hnuaia service association hrang hrang 84 zet te rawtna te ngaithla in, fitment committee rawtna te pawh a zirchiang a. State dang Punjab, Haryana, Orissa, Meghalaya, Tripura leh Arunachal Pradesh ah zin chhuakin an pay chungchangte khunkhan takin an zir bawk a ni.
Committe hian an rawtna hi ni 1.1.2010 atanga hman tan turin a ti a. An recommend zingah hian contracta thawk leh MR te a huam lova, College, pension leh judicial te a huam lo bawk a ni. Committee hian IVth Grade te chu kaisanna neilo an nih avngin an dinhmun chu duhsak bik an nih thu an sawi lang bawk a. Sorkar hnathawkte chu sorkar neitu dik tak, kan sum dinhmun pawh hretu an nih avangin Committee member-te chuan arrear an phut loh an beisei thu an sawilang bawk a ni.

Tualchhung : 26.5.2010

Home Minister hlui lo kal dawn
Minister hlui Pu Tawnluia chuan vawiin hian Serchhip a rawn tlawh dawn a.Zanah Pu LP.Lalsanglura In Venglaiah amah kawmna hun Block MNF-in an buatsaih dawn.

Sipai tur la mek
Serchhip Field-II a sipai lakna runpui neih mek chu tluang taka kalpui a ni a. Medical test nei chho lehin, written test erawh Aizawlah an buatsaih thung dawn.

Mizoram rawn tlawhtu Union Home Minister, CM leh a Cabinet ten an kawm

Aizawl 26th May 2010 : Union Home Minister P. Chidambarama'n nimin khan langa Aizawl rawn tlawhin, Raj Bhavan-ah Chief Minister Pu Lal Thanhawla leh a Council of Ministers ten an kawm.
Mizoram sorkar chuan Union Home Minister P. Chidambarama hnenah hian Memorandum lo thehlutin, chumi zulzui chuan inkawmna hi neih a ni a. Union Home Minister chuan Tripura-a Bru raltlante Mizoram sorkar-in an laklet leh danah lungawithlak a tih thu sawiin, Mizoram sorkar chu tha taka hnathawh chhunzawm chho zel turin a chah a. Vawiin thlenga Bru lokir te chu chhungkaw 215 an nih thu tarlangin, P.Chidambaram chuan Bru te chu Mizote nen ralmuang taka khawsa tlang tura chahin, Mizorama la kir lo zawng zawngte chu October thla chhunga kir vek turin a chah a ni.
Union Home Minister chuan state dangte nena intelligence lam thawhhona tha zawk a awm theihna turin Subsidiary Multi Agency Centre hmang tangkai turin a chah bawk a ni. Indo Bangladesh Border Fencing chungchangah Home Minister chuan a siamtu ten siam hna zo thuai turin a ti a. Hemi kaihhnawih Compensation leh tul dangte siamfel turin Secretariat atangin sorkarin senior officer ruat mai se a ti bawk a. District Administration kengkawhtute chu ring ngam tawk turin BSF te chu hrilh an ni ang a ti bawk.
Ramri chhehvela motor kawngpui siam that hna 2293 Kms. a thui, cheng vaibeichhe 2604.28 senna tur pawh tihfel thuai a ni ang Home Minister chuan a ti a. Chhatisgarh a 2nd IR Bn. te enkawlna senso Mizoram sorkar in ala hmuh tur Cheng nuai 302.26 pawh Ministry of Home Affairs (MHA) atanga tih fel thuai a ni ang a ti bawk a ni.
Hel inpekna leh chhawmdawlna pek theihna dan Mizorama hman ve tura ngenna chu Home Minister chuan MHA atangin Surrender Policy hi Mizoram sorkarah rawn thawnin a tul ang zelin bawhzui nise a ti a. Security kaihhnawih senso awm te chu MHA atangin additional funds rawn pek a nih tur thu P.Chidambaram chuan a sawi a ni. Mizoram State Commando te tana ramdang siam silai lei dilna chungchangah Home Minister chuan silai mamawh ang te chu MHA ah thlen a, chuta tangin Central Procurement S ystem anga lo kaipui mai ni zawk se a ti bawk a ni.
Union Home Minister hi G.K. Pillai, Home Secretary, R.N. Ravi, Special Director, Safi Rizvi, OSD to Home Minister, R.R. Jha, Director (NE) leh Ajay Kanowjia Deputy Secretary ten an rawn tawiawm a ni.

Chhiarpui-a inchhiarteltir ve duh lote zawng chhuak dawn

Serchhip District Principal Census Officer, DC Pu H.Darzika hova thukhawm chuan Chhiarpui neih mekah harsatna a awm loh nan Serchhip District chhung kohhran tinah ngenna siam nise tiin, Chhiarpui-a inchhiarteltir ve duh lote zawng chhuakin, anmahni kawmna neih nise an ti bawk.
      Kum 2011 chhiarpui hmahruai House listing leh National Polupaltion Register chungchang sawihona hi nimin khan DC Office-ah neih a ni a, he Meeting-ah hian Chhiarpu chu ram tan thil pawimawh tak a nih avangin thawktute lo \awiawm a, an huam chhungah a \ul anga theihtawp lo chhuahpui tur leh uar taka puanzar hna lo thawk turin Branch YMA leh VC te ngen nise an ti a. Serchhip District-ah Chhiarpui neih mek chu tluang tak leh harsatna awm lova zawh fel a nih theih nan theihtawp chhuaha hmalak nise an ti a ni.
Mizoram hmun \henkhata thil thleng awm ang bawkin Serchhip District-ah pawh mi \henkhat chuan Chhiarpui neih mek chu Sakhuana nena inremlova ngaia Chhiarpuia inchhiar teltir ve duh lo an awm a, nimina \hukhawm te chuan heng Chhiarpuia inchhiar teltir ve duhlote hi hun remchang hmasa berah DC, Serchhip District Census Principal Officer ni bawk chuan thil awm zia hrilhin lo kawm se an ti a, kohhran tinah thil awmzia sawifiahna lehkha pek vek ni se an ti bawk.
Hei bakah hian Chhirpuia Enumerator zirtirtitute thawhna School-in harsatna an neih report la awm lo mahse, harsatna tawk an awm chuan Census Principal Officer hnenah hriattir nise tih te pawh an thurel zingah a tel bawk a ni.
Nimin Meeting-ah hian VCP, Census Charge Officer, Election Officer leh Sub Hqrs YMA President te an tel a ni.

tualchhung 21.5.2010

Family land record zirtirna pe
Nimin khan DC’s conference hall-ah chhungkaw hrang hrang ten In hmun lo ram an neih dan enfiahna Family land record operation dan tur Branch YMA hrang hrang aiawhte zirtirna pek an ni.
    He training ASO-II Pu Lawmkima kaihhruaiah hian Bawrhsap Pu Darzika chuan mumal taka ram neih leh enkawl a tul thu sawiin, ram nei duh chuan chhiah pek a ngai pawimawh tur a ni a ti a. Kuthnathawk duh ten an thawh theih nana ram ruak leh ram ruak lo awm dan  chiang taka hre tura hmalak chu thil tangkai a nih a rin thu sawiin,heta thawktu tur YMA-te chu tih tak zet thawk turin a chah a ni.
    Training-ah hian Pu C.Lalring liana Asst.Director Servey land record bakah Serveyor 2 Pu Rosiamliana leh Pu Dengthantluang ten YMA Branch  hrang hrang aiawhte zirtirna an pe a ni.

SEDNOC-in Gynae Doctor thu thlen
Serchhip District NGO Co-Ordination Committee te chuan May ni 19 Nilaini khan Fax hmangin Chief Secretary Pu Vanhela Pachuau hnenah Serchhip Hospital a Hmeichhe lam Doctor Gynaecologist an awm mumal loh avanga mi tam tak an mangan thu an thlen.         Tunah hian Gynae hi Dr.Catherine Ngurbiakveli an nei a. Mahse Joining Report a pek ni atangin Leave a la la char char a, hmeichhe lam natna nei leh nau nei tur te tan pawh Doctor an awm miau loh avang hian mi tam tak chuan harsa chung chungin Aizawl an pan phah a. Hei vang hian SEDNOC te chuan Chief Secretary hnenah Gynae an mamawh thu hi an thlen ta a ni.

Sum hman dan inzirtir
Serchhip Dist. CMO’s Confe rence hall-ah mipui hriselna tura thawktu ten hmalakna tura pawisa fai lo kal tangkai taka hman dan tur zirhona an nei mek. He hunah hian  CMO Dr.Malsawma chuan sum hman dan tur leh ruahmanna awmsa te a sawifiah a. Pu Vanlalsiama Dist. Account Manager-in report siam dan kalphung sawifiahin, a zirtir a ni.

Pu Dawnga vuiliam
Nimin zing dar 3:30 vel khan Pu MS.Dawnliana(59) New Ser chhip chu cancer-in a boral a, nimin vek khan vuiliam a ni.

Naupang pawngsual
Thawhleh zan khan Pu R.Vanlal hruaia(53) New Serchhip a mi chuan an thenawm hmeichhe naupang kum tling lo a pawngsual a puh a ni a. He thil thleng hi Police-ah FIR thehluh niin, amah Pu Vanlalhruaia hi a tlanbo avangin zawn a ni,

Tualchhung : 20.5.2010

Draft roll tarchhuak
 Electoral roll, draft roll tarchhuah mekah hetiang hi bial tina vote nei thei awm dan a ni.
                       Mipa  Hmeichhia    Total
Serchhip Bial    6668    7062    13730
Tuikum Bial    6574    6665    13239
Hrangturzo    6824    6813    13637
Dist. pumah    20066    20540    40606


Sipai lakna runpui
Tun thla ni 24 atanga ni 27 inkar chhung hian Serchhip Field-II ah sipai lakna runpui neih a ni leh dawn a. Kum 17 atanga kum 23 inkar pawl 8 pass chinte intlar theih a ni ang.


RZ-i vuiliam
Thawhlehni tlai dar 5:30 khan B.Lalrinzuali(19) d/o B.Vanlalhruaia Tuikhuah Veng chu SLE natna in Aizawlah a boral a, a ruang hi lumen a nih hnu nimin khan Chhim Veng thlan mualah Pastor Lalnunmawia’n a vui.

Tualchhung

Sub-Hqrs. YMA Conf. thu rel
Sub-Hqrs.YMA Serchhip Conference vawi 2-na N.Vanlaiphaia neih mekah nimin khan rorel a ni a. Vawiin hian vantlang inkhawmah khuallian Lok Sabha MP Pu CL.Ruala’n thu a sawi ang.
    Rorel thu pass langsar zual zing ah hengte hi a tel :
Sorkar khawih : Serchhip Sub-Hqrs. huamchhunga ILP dik lo taka hmang leh Mizo hming hawha hnamdang sumdawngte dapchhuah kawngah chak taka hmalak ni rawh se, Thenzawl khua hi Mizoram State capital atan plan ni rawh se, Kangmei venna kawngah tun aia chak zawkin sorkar-in hma la rawh se tih te a ni a.
YMA khawih : YMA Sub-Hqrs. huapin lui dunga nungchate humhalh kawngah hmalak ni rawh se, tih te a tel a ni.

Lawrkhawm

Minister banna la ngaihtuah lo
 Education Minister Pu Lalsawta banna thehluh chungchangah thu tlukna siam a la ni lova, hemi chhung hian Chief Minister-in Education Deptt. chu a enkawl rih dawn. Hemi chungchang hi thutharlakhawm tute hmaah sawiin, Chief Minister Pu Lal Thanhawla chuan, Pu Lalsawta banna chungchang hi a thawhpui senior te an awm loh avangin sawiho a la ni rih lo a ti a. Technical entrance result chu ennawn that leh a ni ang tih a sawi bawk.

Zirlai ti tha chawimawi
MSU buatsaihin nimin khan Aizawlah HSSLC result chhuak ta  subject hrang hranga Mizo zirlai ti tha zual 3 theuhte chawimawina hun hman a ni. He hun hmanpuitu Minister Pu Zodintluanga chuan, MSU-te chu an ke pen uluk tura a duhthu sawiin, mahni hmakhaw nun siam tha tu zir thiamna chu hlamchhiah a thiang lo a ti. Minister hian zirlaite hnenah hian chawimawina a hlan a ni.

Ei leh bar harsa ti
 MNF Gen.Secretary, Minister hlui Pu K.Sangthuama chuan Congress sorkar-ah buhfai quota a tlem ta chu mipui chanai lak sakna a ni a ti. Nimina MNF Office Aizawla thutharla khawmtute a kawmnaah Pu K.Sang thuama chuan MNF sorkar-ah APL buhfai thla 1 Qtls. 39050 man tlawma pek thin, kumin April thla atanga Qtls.10460 a tih tlem a ni chu hriat thiam harsa a tih thu a sawi a. Fur atana tun thla chhunga  tih fel a nih loh chuan mipuiin harsatna an tawh a rin thu a sawi bawk.

Chief Justice thar
 Justice Sharos Kapadia chu Chief Justice of India 38-na ni turin nimin khan rinawmna thu tiam tira lakluh a ni. Chief Justice thar lak luhna inkhawm hi President kaih hruaina hnuaiah neiin, sorkar mi pawimawh thahnem tak an tel a ni.

Libya thlawhna a chesual
 Nimin khan Libya-a khualzin phur thlawhna Airbus 330 chesualah mi 100 chuang an thi a,  he chetsualna ah hian Dutch naupang chiah a dam khawchhuak niin thuneitute chuan an sawi. He chetsualna hi Libya-a Tripoli airport-a thleng niin, South Africa -a Johannesburg airport atanga a thlawk chhuak niin, Tripoli-a a tum dawn laiin a kang a, hemi hnu hian a puak darh zui nghal ta a ni.
   

International Nursing Day Aizawlah hman a ni

Aizawl 13th May 2010 : Nursing hnathawk hmasa bertu leh a hmuchhuaktu, Florence Nightingale pianchampha denchhena khawvel puma International Nursing Day  chu khawvel hmun dang rualin nimin khan Aizawl Chanmari YMA Hall-ah Trained Nurses Association of India, Mizoram Branch buatsaihin hman a ni.
    He huna khuallian Chief Minister Pu Lal Than hawla chuan, doctor-te chu damlote pa an nih angin, nurse te chu damlote nu in ni a ti a. An file khawihte chu mihring, mahni pawh inenkawl theilote leh mibawrh sawmte an ni a, chuvangin in hna bikah hian dawh theihna te, teirei peihna te, tenchhiatloh te leh chhelna a pawimawh hle a ni a ti a.
    Pu Lal Thanhawla chuan Mizote hi mahni hriselna lam ngaihthah mi, ei leh ina duh uluk lo, kan it zawng leh chak zawngte um mai thin hnam kan nih avangin kan hriselnain a tawrh phah nasa hle a ni a ti a. Chuvangin hriselna ngaihpawimawh a tulzia mite hrilhhriatna kawngah nurse te chu an pawimawh hmasak ber thu sawiin, hemi lama tan la turin nurse te chu a chah a.  Kristian za a za inti hnam hi hrisel ber awm tak, khawvela hnam hrisel lo tak, cancer vei tamna ber kan ni hi ei leh in leh faina lama kan inthlahdahzia tilangtu a ni a, a vanduaithlak hle a ni a ti.
    Nurses Day ah hian Health Worker Training School atang te, RIPANS te,  Apollo School of Nursing te leh Mizoram College of Nursing atang te in hun hman a ni a. Kum 1964 a Trained Nurses Association of India, Mizoram Branch a President nilai, Pi Ramfangzauvi leh Pi C.Lalrintluangi, Nursing Education & Research Committee atang te in thusawi ngaihthlak a ni bawk a.Chawhnu lamah variety programme in a chhunzawm a ni.

tualchhung

Thisen unit 52 pe
Serchhip Pastor Bial KTP-te chuan Inrinni khan a mamawh apiangte hman atan Presbyterian Hospital Durtlanga dah turin thisen unit 52 an pe. Thisen petu te hi an zavaiin mi 52 niin, an zinga mi 8 chu hmeichhia niin, Hospital-a thawktu ten an rawn pan a ni.

School building thar luah dawn
atang hian Presbyterian English School-a zirlai pawl hniam zawk te chuan an building thar AOC Vengah school an kai tan tawh dawn.

Nute ni hmang
kha khawvel pum huap Nu-te ni Mothers day a ni a. He ni pual hian Salvation Army-te chuan hun hmangin, naupang ten pangpar leh thilpek chi hrang hrang an nute an hlan a ni.

Technical entrance result tihchhuah nawnah thil fel lo a la awm fo -MZP

Serchhip 10th May 2010 :MZP chuan tunhnaia Technical entrance result ennawn tawh hnu; tih chhuahah thil dik lo a la awm fo niin an sawi.
MZP President Kroshnehzova sawi danin, zirlai 2-in RTI Act hmanga an exam chhanna paper an dilah mark pek dan dik tawk loh hmuh a ni a. An chhanna dik rengah mark pek an ni lo tihte hmuh a ni a, answer paper 2 a thil diklo hmuh a nih avang hian zirlai dang answer paper ah pawh dik lo a awm thei nia an hriat thu an sawi.
Zirlai lungawi lo thenkhat ten RTI hmangin an result (answer sheet leh question) an dil chhuak a, chu chu In lamah mithiamte rawnin ennawn leh a ni a, mark pek sual an ni nasa hle tih hmuh chuah a ni a. A bikin Chemistry subject-ah Group D chhangte mark a hniam fal hle.
Zirlai pakhatin RTI hmanga question leh answer sheet an dil chhuah hnuin Chemistry hi ennawn leh a ni a, chuta tanga a lan dan chuan mark 80 lai a hmu thung. Heti hian Medical group-ah mark 232 hmuin tun result atanga a lan dan chuan 4-na a ni pha hial a ni. Engineering group lamah pawh mark 186 hmuin tun result atang chuan 9-na a ni pha hial bawk.
Heng tarlante bakah hian midang eng emaw zat dik lo a awm tih hmuh chhuah a ni bawk. Zawhna thenkhatah chuan a dik ngei pawh dik lo tihsak an ni nual bawk a, zawhna thenkhatah chuan chhanna thuhmun reng pawh mi thenkhatah dik tihsak an nih laiin thenkhatah chuan dik lo tihsak an ni lawi si a ni.
Hemi chungchang hi vawiina neih tur MZP Gen.Hqrs. Executive meeting-ah ngaihtuah a ni dawn a ni.

Pi Khuangliani vuiliam

Inrinni chawhnu dar 4 khan Pi Khuangliani (89) m/o Zosangi Staff Nurse Serchhip Chhim Veng chu Pum na avangin a boral a, lumen a nih hnu nimin khan vuiliam a ni.

Khaw danga pem leh mithi tawh mi 29-te NREGS Job card hmangin hlawh lak a ni

Serchhip 7th May 2010 : Serchhip-IV VC hluite chuan vawiin khan Pu T.Lalhming thanga In Bazar Vengah chanchinbumite kawmin, RTI Act hmanga VC-IV hnuaia NREGS kalpui dan an zawhna atanga an thil hmuhchhuahte an hrilh.

He hunah hian VC hluite chuan kumin March ni 23 khan RTI Act hmangin VC-IV hnuaia NREGS hna kalpui dan zawhna an siam a, April ni 1 khan an zawhna te chu thuneitu lam ten chhangin, hetah hian Job card nei; Serchhip atanga pem chhuak tawh leh mithi tawh mi 29-te hminga inhlawhna pawisa chu VC thar din atanga kumin NREGS inhlawhna kalpui chhung zawng khan a la tu hriat lovin, lak thin a ni an ti.
Inkhawm kaihruaitu Pu T.Lalhmingthanga chuan, kan hunlai khan DPC duh dan angin NREGS inhlawhna hi dik leh a tha thei ang berin kan kalpui a. Aikal lak phal loh tihte, sorkar hnathawk awmthei deuh thawh phal loh tih te chu a taka kalpui tumin hmalak a ni a. Khaw danga pem chhuak leh thi tawhte job card pawh cancel-in thuneitute kutah hlan a ni a. Amaherawhchu heng job card-te hi vawiin thlenga hman a lo la ni hi a makin, dik lo taka sum siam nan hman a ni a ti a.
Thu sawitu dang Pu H.Lalthianghlima pawhin thusawiin, hetianga RTI act hmanga thil an chhui chu VC-IV dinglaite an beihna a nih loh thu leh mipui ten thil dik hria se an tih vang a nih thu a sawi a. NREGS sum dik lo taka hmangtu VC-te chu hrem an ni ang lo ti tu sorkar hian engtin nge he thilah hian hma a lak dawn ? a ti bawk.

MZP Hqrs. Serchhip hruaitu

MZP Hqrs. Serchhip hruaitute
Nimin MZP Hqrs. Serchhip chuan MJA Serchhip kaihhruaina hnuaiah kum 2010 -2012 chhung atana an hruaitu tur an thlang a, heng mite hi an ni.
President : Lalramnghaka Kawlni
Vice Pre. : R.Lalnunsiama
Secretary : JS.Lalsiammawia
Jt.Secy. : RD.Lalnunpuia
Treasurer : H.Lallawmkima
Fin.Secy. : C.Lalmalsawma

Tualchhung 7.5.2010

MSTA Sub-Hqrs. Conference
Nimin Serchhip Hmar Veng YMA hall -ah Mizoram Middle School Teachers Association Sub-Hqrs. ten conference hmangin hruaitu thar an thlang. He hun hmanpuitu Dist.Bawrhsap Pu Darzika chuan, zirtirtute chu hna pawimawh missionary hna chelhtute an nih avanga thahnemngai lehzuala thawk turin a chah a ni.
MSTA Sub-Hqrs. hruaitu tharte :
President : V.Tlangthuama
Sr.Vice : Lalhmachhuana
Vice Pre. : Sangliana Hnamte
Secretary : H.Ronghaka
Jt.Secy. : T.Pahlira
Inf.Secy. : PC.Lianchhunga
Treasurer(GF) : CL.Rokhuma
Treasurer (EF) : H.Lianhnuna

Ex-VC-IV Press conference
Serchhip-IV VC hluite chuan RTI hmanga NREGS hnathawh leh sum kal vel dan chungchang an zirchianna vawiin hian Pu T.Lalhmingthanga In Bazar Vengah chanchinbumite an hrilh dawn.

Lawrkhawm

AIDS hrik pai mi 1306
Positive network of Mizoram-in Mizorama ruihhlo hmang a chhin chhiah mi 4381 zinga mi 1306 te chu HIV/AIDS hrik pai an ni. He thu hi nimina an pawlin Aizawla workshop an buatsaihah tarlangin, ruihhlo ti thin zinga HIV hrik pai Aizawl leh Lunglei amite chu zir chian zui an ni a, an zinga 55.4% chu mipa niin, 45.6% chu hmei chhia an ni. HIV hrik pai zawng zawng 74.4% chu Aizawl khawpui chhunga awm an ni a, 14.9% chu khawpui danga awm an ni.

ZDU-in kawng tha ti lo
ZDU Gen.Hqrs. chuan Aizawl leh Lunglei inkar kawngpui world Bank sum hmanga siam zawh tep an en kualnaah lungawina an hmuh loh thu an sawi. Nimina Aizawla thutharla khawmtute an kawmnaah ZDU hruai tute chuan highway reng rengah a lai tihpawn tur a nih laiin he kawng ah hian a lai tih pawn pakhatmah an hmu lo tih sawiin, he kawnga Lei dawh pawh a chhe hle tih an sawi bawk.

Mo hruai chuanna chesual
Nimin tlai dar 4 vel khan Kolasib atanga Saiphaia mo hruaite chuanna 407 truck Rengte tlangsang lai motor kawngpuiah chesualin, kawng laiah a let. Motor-a chuang zingah hian thi an awm lova, mi 14 erawh an hliam thung a, an zinga 1 chiah a ngaihtuahawm deuh nia sawi a ni.

Central service result puang
UPSC chuan nimin khan civil service 2009 main exam result a ti chhuak a. IAS turin mi 131 thlan an ni a, IFS turin mi 30, IPS turin mi 150 thlan an ni a. Hei bakah hian central service hrang hranga group ‘A’ officer turin mi 582 thlan niin, group ‘B’ atan mi 96 thlan chhuah an ni bawk. He result ah hian Mizo tel an awm lo a ni.

Kasab-a khaihlum turin ti
Mumbai beihnaa dama man awm chhun, Ajmal Kasab chu thi tura a chung thu rel a ni ta a. Judge ML Tahaliyani-a chuan Kasab-a hi khai hlum turin thu a puang a mahse an khai hlum tur ni erawh a sawi tel lova. A ukil-in Kasab-a hremna ti nep tura a ngenna chu chhangin Court chuan Kasab-a ang mihring hi mahni insiamthatna hun pek theih an ni lo tih a sawi a ni. Court hian Kasab-a hi thubuai 4 ah thi turin a chungthu a rel bakah thubuai 6 dangah dam chhung tang turin a ti bawk a ni.

State Sports Council thukhawm
Mizoram State Sports Coun cil General Body Meeting chu nimin khan I&PR Auditorium-ah an President Sports Minister Pu Zodintluanga hovin an thu khawm.
General Body Meeting hian thu ngaihtuah tur engemaw zat a chhawpchhuak a, chung zing ah chuan District tina Sports Committee ruangam siam that rawtna te; District Sports Com mittee aiawh Council a dah rawtna te; Electrician Grade III post Council-in a neih mek chu a tangkai zawk beiseina avang in Stenographer Grade III ah leh ni se tih te; meeting hmasa in a lo rel anga Sports Associa tion-te tan infiamna hmanrua lei chungchanga lawmthu sawina te a tel a. Kum 2010-2011 chhunga Sport Council Budget tur tlangpui pharh a ni a, cheng nuai 862 chu pawm a ni.

Chief Minister-in Mizoram Govt. Doctors’ Association Gen.Conference a hmanpui

Serchhip 7th May 2010 : Nimin khan Mizoram Government Doctors' Association chuan General Conference vawi 27-na Tourist Lodge, Chaltlang-ah an hmang.
Khuallian Chief Minister Pu Lal Thanhawla chuan Doctor hna hi hna zahawm ber te zing ami a ni a, Pathian-in a anpuia a siam mihringte enkawltu anih angin thinlung leh tih tak zetin, fimkhur takin, mahni hrehawm pawh pawi sa lova midangte tana inpek a ngai a, Pathian tihna nena hnathawh a nih phawt chuan he hna zahawmna hi zahawm lehzual dawn a ni a ti a.
Chief Minister chuan Doctor-te chu mihring hmachhawn tam ber tu an ni a, damlo leh mi chi hrang hrang, a lian ber atanga a te ber thlengin inang tlang vek a dawngsawng turin leh Mizo ze mawi tlawmngaihna leh hawihhawmna te vawng nunga mite hnena chetzia lantirin hriselna siamthat kawngah nen mite zirtirtu tangkai ber an ni a. Mizo nunphung tlahniam mek zel ah hian Doctor-te chu hriselna lamah mithiamte an nih avangin a siamthat lehna kawngah mawhphurhna sang tak an neih avangin tangkai thei ang ber a thawk turin a fuih bawk.
He inkhawmpui Dr. K. Lalbiakzuala Vice President, MGDA kaihhruai
ah hian Pu Lal Thanhawla chuan Civil Hospital Aizawl-ah hian BPL card neite tan man chawi lovin OPD card lak a, Investigation tih ngai zawng zawng pawh a thlawn a tihsak tur an ni a, BPL chhungkaw ami boral palh an awm chuan Aizawl chhung bik ah chuan a thlawnin an ruang dah sak an ni ang a ti.

Lawrkhawm

Ration buhfai quota ti tlem
Tunlaia ration buhfai mi 1 quota tih tlem chu kumdanga tih thin ang tho a nih thu Food Civil supplies & Consumer affairs Deptt. chuan a sawi a. Kum dang tun ang hunah hian buhfai a harsat thin avangin buhfai sem zat hi tih tlem a ni tih sawiin, thingtlangah kartin Kg.2 ang zela sem a ni a, hei hi harsatna tawh chhung atana ruahmanna chauh a ni tih Deptt. chuan a sawi.

Bru raltlan-te la kir dawn
Nikum Nov.thlaa Bungthuam tlangval thah a nih avanga Mizoram chhuahsan Bru chhungkaw 400 vel te chu tun thla ni 11 atang khian Mizorama lak kir tan turin Mamit DC Pu Zothankhuma chuan Mizo ram sorkar home secretary-ah rawtna a thlen a. A rawtna siam ang chuan Bru-te hi an chhuahsan tak khaw 8 a an awmna ngaia letleh tur an ni a, a hlawma luh tir lovin, ni 11-15 chhungin ni 1 zelah khaw 2/3 a luh tira, Mizoram mi dik tak an nih leh nih loh enfiah nise a ti a ni.

Lakhuihthei sawngbawl dan zir
Nimin khan Aizawlah Lakhuih thei sawngbawl dan leh a hralh dan chungchang NLUP line depart ment hotute hrilhfiah an ni. Hetah hian Mizorama lakhuihthei sawng bawl leh a hralhchhuahna lam buaipuitu ten zirtirna an pe a, NLUP Implementing Board Chairman Pu R.Selthuama’n thu a sawi bawk.

Indawp nan hman khap
Thil chhuitu pawl, Investigating agency-te tana hnawksak tham turin Supreme court chuan thil sual tia rinhlelhte dawp nana thudik hriatna hmanrua atana ruihtheih thil hmanga intih muthilhna leh thluak endikna lam ang chite hman chu dan lo a ni tih a sawi a. Mimal duhdan vang ni lova hetianga intih luih theih a ni lo tih Supreme court chuan sawiin, hetianga tih hi mihring dikna chanvo palzutna a ni a, loh theih lohva dan hnuaiah hman a tul pawhin Human rights pawlte kaihhruaina hnuaiah chauh hman theih a ni ang a ti.

Thlawhna service ti khaihlak
Iceland-a tlang kangin vut a vawrh chhuah leh tak avangin Europe ram thlawhna service-te chu a kaihlak leh ta a. Vut invawrh chhuak hian boruaka a him chin a pel thei dawn nia hriat a nih avangin Britain-ah chuan thuneitu ten Scotland boruak leh Ireland boruak te chu nimin atang khan tiam chin awm lovin a khar a ni.

Tualchhung 5.5.2010

Pu Hawla interview a hawng
A Bial tlawha rawn zin, Pu Lal Than hawla Chief Minister chuan tukin dar 7 atang hian P&E Rest House Bukpui ah amah kawm duhte tan interview hun a hawng dawn.


Innei dawn
Vawiin chawhma dar 11 hian H.Lal duhsaka s/o H.Chhuanmawia New Ser chhip leh Laltanpuii (A-tani) d/o Zokunga Tuikhuah Vengte chu New Serchhip UPC Biak Inah an innei dawn.


Hun pawtsei
Serchhip Dist. chhunga Middle & High School Hindi zirtirtu written test-na tura admit card lam theih hun chu ni 14.5.2010 thleng pawhsei a ni.


Infiamna atan sum ruahman ti
Nimina Town hall-a thusawitu, Sports Minister Pu Zodintluanga chuan, Ser chhip auditorium sakna turin Delhi ah tender koh mek a ni a ti a.Sports complex bakah Indoor stadium te, Khawtetlang field leh Field-II te cheithatna tur sum pawh ruahman fel vek a nih tawh thu a sawi bawk.


Ei in siam ti thianghlim turin chah
Hotel, thingpui dawr leh Restaurant neitu ten thianghlim zawka ei an siam a tul thu bakah zuk leh hmuam ti tlem tura hma an lak a tul thu nimin khan DC’s Conference hall-ah hrilhhriat an ni a. CMO Dr.Malsawma chuan, ei leh in siamtute chu hriselna kawltu an nihna inhria-a thianghlim leh fimkhur taka buatsaih thin turin a chah.

Wadi worker training pe
Nimin khan ICDS Ser chhip North Circle-a Angan wadi worker leh helper ten tha zawka hna an thawh theihnan zirtirna New Serchhip YMA hall-ah pek an ni.

Result tih chhuah hma tum
Education Minister Pu Lalsawta chuan Technical entrance exam result chu zirlaite harsatna thlen lo zawngin a hma thei ang bera tih chhuah tum a ni a ti. He thu hi nimina Serchhip Town hall-a inkhawm buatsaihah sawiin, Pu Lalsawta chuan, entrance zirlai exam zingah Minister fa 3 tling lo an awm chuan he thilah hian induhsakna a awm lo tih a ti lang a ni a ti

Mipui ten a dawnthleng leibura an ken chhung chuan NLUP sum sem kan tum lo - CM

Serchhip 5th May 2010 : Chief Minister Pu Lal Thanhawla chuan, mipui ten a dawnthleng leibura an ken chhung chuan NLUP tanpuina pawisa awm reng mah se, sem kan tum lo a ti.
He thu hi nimina Serchhip Block Congress buatsaiha amah Pu Lal Thanhawla’n a thubuai lak ata thiam a chan lawmna inkhawm Serchhip Town hall-a neihah sawiin, Pu Lal Thanhawla chuan, roreltu dik kan mamawh angin mipui dik, taima leh thianghlim kan mamawh a, mipui ten a dawn thleng leibura an ken chhung chuan NLUP tanpuina pawisa awm reng mah se, sem kan tum lo a ni a ti.
He inkhawm Pu PC.Vanlalsawma kaihhruaiah hian Pu Hawla chuan, pawisa sen pawh a eiruk ngai loh thu leh a eiruk ngai dawn loh thu a sawi a, eirua puhtu ten a sorkar hmasaah Supreme court-ah an khin thu leh Court-in politics-a intih mualpho tumna a ni tia an hnawl hnuah leh a sorkar tawh loh hnuah High Court-a khinna thehluh leh a nih thute sawiin, heng zawng zawngah hian Pathian ringtu a nih avanga a mangan ngailoh thute, an party mipuite mangan rukna erawh a tawrhpui zawk thin thu a sawi a. An party chuan mimal emaw Minister chhungte emaw bial bik emaw pawh tih hmasawn a tum lova, Mizoram pum zawk hi tih hma sawn a tum tih sawiin, mipuite chu thlamuang taka awm turin a chah a ni.
Chief Minister hi a nupui bakah Minister 4- Zodintluanga, H.Rohluna, Lalsawta, H.Liansailova, PC.Lalthanliana bakah Dy.Speaker John Rotluangliana leh Parliamentary Secretary 4, MLA 4 ten an rawn tawiawm a ni.

Thenzawl tlangval leh Police inkarah inhriatthiamlohna a thleng

Thenzawl tlangval rual leh Thenzawl Police-te inkarah inhriatthiam lohna a thlen avangin Police ten mi 9 an man.
Inhriatthiamlohna hi Thenzawla Vantawng Group YMA Conference tiak zan, Zirtawp zan atanga intan kha niin, tlangval zu rui buai Police ten an umdarhna atanga intan niin, mi 2/1 Police an la a. Hei hi hrethiam lovin tlangval rualte hi Police Station tualah an inhawrkhawm a. Khawtlang hruaitute nen an inbiakrem hnuah an mi mante pawh chhuah lehnghalin, mipui pawh an tin mai a. Amaherawhchu Police leh thuneitu lam an dam loh avangin nizan hmasa Pathianni zan khan he buainaa che firfiak deuh nia lang mi 9 te chu man tha lehin, nimin khan Dist. Judicial Magistrate Pu T.Lalhmachhuana court-ah hruai an ni a. Magis trate-in bail-a chhuah a lo phal sak angin nimin tlai thimhlim khan an zavai hian chhuah lehnghal vek an ni.

Tualchhung ni 4.5.2010

Pu Hawla thiam chan lawm dawn
Bialtu MLA, Chief Minister Pu Lal Thanhawla a thubuai lak ata thiam a chan lawmna hun chu vawiin chawhma dar 11 hian Serchhip Town Hall-ah Block Congress buatsaihin neih a ni dawn a, tlai ah khawtlang huap ruai theh tum a ni a, Block Congress hruaitute chuan mi zawng zawng tel turin an sawm a ni.

Pu Zuala a boral
Nimin tlai dar 3:30 vel khan Pu Lalthanzuala Sailo(46) h/o Darmawii Serchhip Field Veng chu a boral a, lumen a nih hnu vawiin hian Field Veng thlan mualah vui a ni ang.

Assam Rifles-in computer pe dawn
H Vawiin hian Assam Rifles chuan Presbyterian English Medium School hnenah computer set an pe dawn a, hemi pual inkhawm an school-ah an hmang dawn.
Presbyterian School hian Synod ram lei tak (AOC zawl) ah pawl hniam zawkte kaina atan School building an sa mek bawk.

Chief Minister hovin sorkar senior officer-te meetingin, infuih tharna hun an hmang

Serchhip 4th May 2010 : Chief Minister Pu Lal Thanhawla leh Mizoram sorkar senior officer-te nimin khan Aizawl Vanapa hall-ah inhmukhawmin, sorkar hmathlir sawi hovin, infuihtharna hun an hmang.
He meeting Chief Secretary Pu Vanhela Pachuau kaihhruaiah hian Chief Minister chuan sorkar hma thlir zau taka sawiin, chumi ti hlawhtling tur chuan sorkar hnathawk senior officer-te an pawimawh zia uar takin a sawi a. Mipui rilru sukthlek a tha zawnga her danglam tur leh hmasawnna kawnga ke pen turin a inzirtir theih tih sawiin, mahni zawn theuhvah tan la thar turin a fuih a. Sorkar flagship programme NLUP hmanga mipui retheihna khur atanga chhanchhuak thei lova a hlawhchham chuan hnam mualphona a ni a ti.
Pu Lal Thanhawla chuan Mizoram sorkar hmalakna hrang hrang bakah CSS leh Prime Minister flagship programme-in a tuar tur chinte chu thleng pha ngei tura hmalak nise a ti a. Sorkar hnathawkte hlawh chungchang sawiin, 6th Pay zulzuia hlawhbi thar hman tur chu pay structure buai chinfel tur a tam avanga khawtlai a nih thu a sawi bawk.
Thusawitu dang Home Minister Pu R.Lalzirliana chuan, dan leh thupek zawm kawngah mipui thu awihna a fak a. Mi hlemhlete hnualsuat ngama mi dik leh rinawmte chawimawi tura kalkhawmte chu fuihin, Mizo hnam than chhoh zelna atana senior officer-te mawhphurhna leh pawimawhna a tarlang a, mahni hna theuhva thahnem ngai turin a fuih bawk.
Agriculture Minister Pu H.Liansailova pawhin thu sawiin, a kum tela Mizoram economic tlakchhiatna chu vei tlan a tul nia a hriat thu a sawi a.Chhanchhuah hna rang taka thawh a nih loh chuan Mizo hnam hian tih dam theih loh harsatna a tawk ngei ang a ti.