Serchhipah Ex-Minister Pu Tlanghmingthanga hovin Remna Ni hman a ni

Serchhip 1st July 2010 : Nimin khan Mizoram hmun dang rualin MNF Serchhip Block buatsaihin ‘Remna Ni’ hman a ni.
He Ni puala inkhawm Pu Lalremsiama Kawlni In, Serchhip Bazar Vengah neihah hian Health Minister hlui Pu R.Tlang hmingthanga chuan thu sawiin, Remna leh muanna hi a hluin, a man a tam a; a vawng nung zel turin kan pawimawh theuh a ni a ti a. Remna Ni chu Party dang ten MNF ta bik emaw an ti nia sawiin, hei hi an hriat chian tawk loh vang a ni a ti a. Remna Ni hi a hlu a, MNF party chuan hman lova liam tir mai mai hi a tum lo a ni a ti.
He inkhawm MNF Block President Pu C.Darbiaka kaihhruaiah hian Pu R.Tlang hmingthanga chuan, thil mak deuh mai chu Congress sorkar hian opposition emaw an la inti char char a, an nih phungah mi va sawichhiat hi an bansan thei lova, MNF sorkar-a Minister-te chu phihawh tumin an bei an bei a, amaherawhchu a vawtu zawkin ek a cheh tih ang mai an ni mek a ni a ti a. Ram kaihruai turin ram thuthlung kengtute, ram hmangaiha thi leh thau pawlha lo tang tawhte chu an tha ber a ni a ti bawk.
Remna Ni hi PAMRA chuan a hrangin P&E Venga Pu C.Vanlal siamthar Inah an hmang ve bawk.

Tualchhung

Dist. Level Farmers training
Vawiin chawhma dar 11 hian Horticulture Deptt. buatsaihin New Serchhip YMA hall-ah District Level Farmers training neih a ni dawn a. Dist. Bawrhsap Pu H.Darzika’n khuallian niin a hmanpui ang.

Sports Comtt. inthlang dawn
Vawiin chawhnu dar hian DC’s meeting room-ah District Sports Com mittee chuan MJA Serchhip District-te kaih hruaina hnuaiah hruaitu thar an thlang dawn.

Day pualin Free Clinic
Vawiin Doctors Day pual hian Indian Medical Association Serchhip Branch chuan Serchhipa Orphanage Home-ah thilpek an hlan dawn a. Hei bakah hian Home-a naupangte pualin medical free clinic an nei dawn bawk niin thu kan dawng.

State Level TT Championship
State Level Table Tennis Champion ship 2010 chu nimin khan Serchhip Town Hall-ah Dist.Bawrhsap Pu Darzika’n a hawng. He Championship-ah hian Mizoram hmun hrang hrang atangin mipa team 16, hmeichhe team 8 telin, player 177 an awm a ni.

Inrawn khawm dawn
Vawiin chawhma dar 10 hian SSA BRC hall-ah DEO kaihhruaina hnuaiah Serchhip town-ah Higher Secondary School dang din belh chungchang inrawnkhawmna neih a ni dawn.

Health Care scheme tih theih
Sorkar hnathawk lote damdawia an inenkawlna, RSBY leh Mizoram Health care scheme atana enrollment chu VC hrang hrang huamchhungah neih tan mek a ni a, a ti turte chu mahni inngaihven mai tur a nih thu kan dawng.

Tualchhung

Remna Ni hmang dawn
Vawiin hi Mizoram leh India sorkar-in inremna thuthlung an ziah champha ‘Remna Ni’ a ni a. Sorkar-in pisa chawlha a puan angin zirna In leh pisa te khar a ni ang. Remna Ni hi Serchhipah chuan MNF Block buatsaihin Pu Remsiama Kawlni In Serchhip Bazar Vengah hman a ni dawn a ni.

Health Care scheme
Sorkar hnathawk lote damdawia an inenkawlna, RSBY leh Mizoram Health care scheme atana enrollment chu tun thla thar atang hian tih tan theih a ni dawn.

Tuialhthei rate thar
Sorkar-in tuialhthei man a tihsan angin hetiang rate thar hi hman a ni.
Station Petrol Diesel
Aizawl Rs. 49.21 Rs. 36.12
Lunglei Rs. 49.21 Rs. 36.12
Serchhip Rs. 49.21 Rs. 36.13
Saiha Rs. 49.22 Rs. 36.13
Hnahthial Rs. 49.16 Rs. 36.10
Lawngtlai Rs. 49.15 Rs. 36.09
Champhai Rs. 49.34 Rs. 36.19
Kolasib Rs. 49.09 Rs. 36.06
Vairengte Rs. 49.04 Rs. 36.04
Petrol tha chi, Extra Premium man hi Petrol pangngai aiin Rs.2.50-in a sang a, Diesel oil tha chi, Extra Mile pawh Diesel Oil pangngai aiin litre 1 zelah Rs.1.75 in a sang a ni.
Eirawngbawlna gas rate thar Serchhipah Rs. 361 niin, show room-ah Rs. 339.35 a ni.

Sorkar hnathawk ten kan thiam lohte thiam lo nih ngam hi a tha a ni - RD Minister

Serchhip 30th June 2010 : Nimin khan Rural Development Minister Pu R.Lalzirliana chuan sorkar hnathawk ten kan thiamlohte thiam lo nih ngam a, mithiam zawkte rawih ngam hi a tha a, chu chuan hmasawnna a thlen thin a ni a ti.
North East Consultancy Services (NECS)-in an buatsaih "Union Budget Kan Ta" (Expenditure Budget 2010-2011, NECS Series - I & Budget Estimates for NE States, NECS Series - I 'A') lehkhabu tlangzarhna inkhawmah he thu hi sawiin, khuallian Minister Pu R.Lalzirliana chuan, department hrang hrangin project-te siama Union Budget atanga hmasawnna sum an haichhuah chu sorkar duhdan a ni a, chutiang kawnga puitu atan he lehkhabu tlangzarh tak leh NECS ngei pawh a tangkai theih a rin thu a sawi a. Sorkar hnathawk ten kan thiamlohte thiam lo nih ngam a, mithiam zawkte rawih ngam a that thu leh chu chuan hmasawnna a thlen zawk thu a tarlang bawk.
He hunah hian Pu Robert Romawia Royte chuan thusawiin lehkhabu tlangzarh zinga pakhat zawk NECS Series - I - Expenditure Budget 2010 - 2011 ah chuan Central-a Ministry hrang hranga sum awmdan a lan vek thu leh State tana State hrang hrang tana hamthatna awm dan zawng zawng a lan vek thu a sawi a. Tin, NECS Series - I 'A' ah chuan NE State tan bika department hrang hranga sum awm dan zawng zawng a lan thu a sawi. NECS chu NE States-a Department leh sorkar tana ding a nih thu sawiin tuna lehkhabu tlangzarha sum lang bak hi khawi state mahin sum an hmuh theih loh thu a sawi a ni.

Lawrkhawm

Mahni fapa kaphlum
Nizan hmasa dar 12:00 vel khan Lalruatfela (26) Sihphir Chhanhim Veng chu a pa Lalthawma’n a kaphlum a, Police ten an la nghal a ni. An sawi danin, Lalruatfela hi a nu u fate nen an Inah awmin, zan rei hnua a pa-in tape a play ring lutuk chu thenawmte an zahawm tiin a off sak a, hemi hnu hian a unaute nen a pi te In, an thenawma inkhel en turin an kalsan a, dar 12:00 vela a pi te In an luh dawn hian a pa hian rawn pan hnaiin a ulhbun silaiin a kap ta mai nia sawi a ni.

Dawihzep thlak ti
Mizoram sorkar Economic & Statistic Deptt. chuan Statistic Day nimin khan Aizawlah an hmang a. Hun hmanpuitu Minister Pu S.Hiato chuan Statistic pawimawhna a sawi bakah Sakawlh hlau ten chhiarpuia tel an duh lo chu dawihzep thlak a tih thu sawiin, sorkar-a tel duh lo; sorkar sum mamawh leh si nih chu thil awmze nei lo a ni a ti.

Lock up-ah inawkhlum
New Verveka Police Lock-up ah nizan hmasa khan mi tang pakhat Ngurhmingthanga(26) chu Police ten a inawkhlum niin an sawi a, nimin khan a ruang postmortem a ni. Tlangval intihbuaina avangin Police-te hian midang telin, Ngur hmingthanga hi an man tel ve a, parda hmangin a inawkhlum niin an sawi.


IWDP meeting
Nimin khan Secretariat Confe rence Hall-ah Pu Vanengmawia IAS, Secretary, Rural Development hovin Integrated Watershed Mana gement Programme (IWDP) chung chang sawi hova. Meeting-a tarlan a nih danin 2010 - 2011 chhungin IWDP hnuaiah hian Rs. 9882 lakh hmangin khaw 64 tuam tum a ni a. Senso zawng zawngah hian State sorkarin 10% a tum ang a, a bak 90% chu Sorkar laipuiin a tum dawn a ni.

Nungcha chanchin tlangzarh
Nimin khan ASEP President Pu K.Lalmuansanga lehkhabu ziah "Nungchate Chanchin Vol.-II" chu Environment & Forest Minister Pu H.Rohluna'n a office chamber-ah a tlangzarh.Minister chuan Mizoram tan leh thangthar lo la awm zel tur te tana tangkai tur Zorama Sava chi hrang hrang awmte chanchin chhiar theih tura tlangzarh a ni chu lawm awm a tih thu sawiin, , khawvel nun changkang zelah nungchate hlutzia kan hrethiam telh telh a ni a ti.

Mizorama LPG Rate thar

Eirawngbawlna gas man thar rampum huapa tihsan a nih angin Mizoram chhunga zawrh chhuah na tur zat chu Food, Civil Supplies and Consumer Affairs Dept. chuan a hnuai a mi ang hian a bithliah thar. He rate thar hi June ni 26, 2010 atanga hman tan a ni.
Home Delivery Ex-Godown/Show Room
1. Aizawl Rs. 361.00 Rs. 339.35
2. Vairengte Rs. 360.00 Rs. 338.25
3. Kolasib Rs. 361.00 Rs. 339.35
4. Champhai Rs. 361.00 Rs. 339.35
5. Serchhip Rs. 361.00 Rs. 339.35
6. Lunglei Rs. 361.00 Rs. 339.35
7. Tlabung Rs. 361.00 Rs. 339.35
8. Saiha Rs. 361.00 Rs. 339.35
9. Lawngtlai Rs. 361.00 Rs. 339.35
10. Hnahthial Rs. 361.00 Rs. 339.35
11. Khawzawl Rs. 361.00 Rs. 339.35

Tualchhung

DC-in ruihtheih thil a halral
Damdawi hmansual leh ruihhlo dona ni pualin Inrinni zing khan District Bawrhsap Pu H.Darzika’n DC’s office tualah mankhawmsa ruih thil engemaw zat a halral. Heng halral tak ruihtheih thilte Excise Department-in an man Ganja 525 gm. bakah Drugs Inspector-in a man ruihhlo atana hman damdawi chi hrang hrang 6, engemaw zat a ni
He Ni pual hian New Serchhip Private Middle School zirlai leh zirtirtute chuan College peng atanga DC Office thleng kawng zawhin, ruihhlo dona thuziak chi hrang hrang kengin, an au rual bawk.

Pi Rozingi a boral
Pi Rozingi(78)w/o Kapkunga Ser chhip P&E veng chu nimin chawhm dar 10:15 vel khan a boral a, lumen a nih hnu vawiin hian vui a ni ang. Pi Rozingi hi an In bulah tlusual palhin, hun engemaw chen a bawksawp hnuah a boral ta a ni.

Lalpiangliana Thihdan Ngawrh Takin Chhui

Lalpiangliana thihdan sawrkarin ngawrh takin an chhui zui. June 25 khan Sawrkar pawhin Jail ah Magisterial Inquiry la tur mi a tir. Lalpiangliana Hliam tawrh hian sawi a hlawh hle hemi chungchang ah hian June 19 Inrinni a Lalpiangliana Jail a dah luh a nih hian a nau Pakunga jail Wader chuan a thawhpui Saithanhlira nen High Mask hnuaiah a hliam chu a en sak tih sawiin,a hnung zang duk a hmuh thu a sawi a,a mah chu Central Jail Two Ward-B ah dah a nih thu leh an ward leader pawh a Unaupa a ni tih a hrilh thu a sawi, Pakunga chuan June 20 Pathianni ah a u chu zingah a tlawh thu sawiin,an Ward Discipline vawngtu chu tui lum saka in bual tir turin a tih hnu ah Bual in ah an va in bual thu sawiin chumi hnu chuan a lu chu a lo kak tih an hria a,a mit ko pawh chu a vung chak hle niin a sawi bawk.

He mi chungchang ah hian Jailer chuan Lalpiangliana chu Jail ah a rawn in pek lai in a awm thu leh ,chumi hnu ah Jail a tanga Police pawh phone tu a nih thu a sawi.

Lalpiangliana hi June 17 zana Jail a,a in pek dawn hian Pawn gate bulah an nupui Sunita nen tlai thim tawh thlenga an awm a vangin Jail Warder Thanzama chuan a ko lut tih Jail a hnathawk te chuan an sawi a,chumi hnu ah chuan a mah chu tual thattu a ni tih a sawi vangin ,Police hrilhhriat an nih tak thu an sawi.

Lalpianga Kawppui Sunita in Tanhril VC member R.Lalhlimpuia a hrilh dan chuan A pa Rai-a nen an in tihbuai hian Rai-a hian a mit ko dinglam ah a hnek niin a sawi a, a mit ko vung hi jail a luh pawh hian amah lo hmutu te chuan an hmuh thu an sawi bawk.

Jail hnathawktu pakhat chuan lalpiangliana hian Jail tang zingah Na nei an awm em ti a zawhna a siam pawh in Lalpiangliana hian na a neih thu a sawilo a,nimahse a mit ko vung leh a chal belkang bak ah a hmui a pilh deuh vanga nuamlo hmel a pu tih a hmuh thu a sawi a,nimahse Lalpiangliana hian a nau in Na a nei em tih a zawh pawh in na neilo angin a sawi a,a teikual leh thin tih a sawi bawk.

Police in Lalpiangliana an sawisakna hmun nia sawi Zohnuai PWD Site Office Chowkider F.Lalremruata chuan a riahna chu tunhnai ah a riah chhuah san lo niin a sawia, In chhung ah phei chuan hetianga in khawihna hi a thlen a rinloh thu leh a mah pawh dar 11 velah mu in chhunglam ah Kawngkhar a kalh thu a sawi thung.

Jail hnathawk pakhat chuan magistrate in Warrant fel tak seal leh hming ziak a rawn tihhnan tawh chuan,kan lo dawng mai thin tih a sawi a,Lalpiangliana Case ah hi chuan a Chal Belkang leh a Hnungzang duk leh a ke vung chu kan hmu ngei a,Nimahse hetiang a ke vung leh pem satliah ang deuh a lang hi chu Vawi tamtak kan lo dah lut tawh thina tun tuma Lalpiangliana Hliam tawrhna taksa dang kan lo enfiahlo hi chu kan tihsual a ni a ti.

Tualchhung

Pu F.Zoliana a boral
Nimin zing dar 9 vel khan Pu F.Zoliana (60) h/o Lalramthangi Serchhip Chanmari Veng chu Pumpui hnun pawp avangin Aizawl ah a boral a, a ruang hi nimin tlai khan an chenna In rawn thlen a ni a, lumen a nih hnu vawiin hian vui a ni ang.

Rulngan thattu man a ni
Nilaini khan ni 19.6.2010 a Vanchengte rama Rulngan thattu Pu Lalzauva Khiangte Serchhip P&E Veng chu Thenzawl DFO Pu C.Lalbiaka’n a man.
Pu Lalzauva Khiangte hi manin Judicial Magistrate Pu T.Lalhmachhuana hnenah a hruai nghal a, Magistrate phalna in Rs.5,000/- in Bail a chhuah leh nghal a ni.Rulngan hi nungcha humhalh ngai - Scheduled Animal niin Part - II of Schedule - II ah dah a ni a, hmuhna apianga thah theih leh lawmman hmuh hial theihna anga ngaihna awm thin hi thil diklo leh pawi tak mai a ni tih DFO Pu C.Lalbiaka chuan a sawi.

MD Rai Thattu Police Hnena A Inpek Hnuah Kut Tuarin A Thi

June ni 18 tarlan tawh MD Rai kum 74 Tanhril thattu Lalpiangliana kum 46 chu Hliampui tuara Aizawl Civil Hospitala dahluh a nih hnu ah June ni 23 zinglam dar 3:15 vel khan a boral a, he thihna thlen chung chang ah hian Police Officer 3 leh constable 1 chu suspend nghal an ni.

June ni 18 a rawn tarlan tawh angin MD Rai kum 74 Tanhril chu a makpa Lalpiangliana hian a that a, a rilru a nawm theih loh avangin June ni 17 tlai khan Central Jail Staff te hnen ah inpe in a in puang a, Dan angin Police te chuan a tul angin hma an la nghala Vaivakawn Police Station ah lakchhoh a ni a, hetia hliampui tuara a boral tak chung chang a kan palaiin in Tanhril khawtlang hruaitu te hnen atanga thu a dawn dan chuan a taksa langtheiah hliam leh duk engemawzat a awm avangin police custody-a a awm laia kut tuar nia rinna a awm a ni.

He thil thlengah hian Judicial Megisterial Enquiry leh Police enquiry tih nghal a ni a. Enquiry lak tur ah hian Lalpiangliana Police Custody a a awm zana mawh phurtu ni a ngaih mi 4 – SI VL Ramhluna OC Lungmual Out Post, ASI Prem Nath Vaivakawn Police Station, ASI Probi Nath Lalrinchhana leh Constable Chanchinliana te chu Suspend nghal an ni.

Lalpiangliana hi a inpuan hnu khan police ten la-in a puzawn ruang a phumna hmunah hruai a ni a, ruang an phawrh fel hnuah June 18 zing dar 1:30 velah Vaivakawn P/S ah dahluh a ni a, police te hnenah pawh hian a thiltih hi a puang vek a, police te hian ‘judicial’ nghalin June ni 19 tlai dar 4:00 vel khan Central Jail-ah dahluh a ni a. Jail a a luh hian a taksa a hliam hi a awm tawh nia sawi a ni a, a taksa a chakloh em avang hian June ni 21 thawhtan ni khan Jail hotute remtihna in Aizawl Civil Hospital-ah dahluh a ni a, vawiin June ni 22 zing dar 3:15 vel khan a boral ta a ni.

Lalpiangliana hi a chhipah inches khat vel kak a awm a, a mit dinglam koah hliam a tuar a, a duk vek a ni. A hnungzang, a ngum chung chu a vun a pilh phei vek a, a ke phah ding lam chu a chunglam vun a pilh deuh vek bak ah a vung nasa hle a, a malpui thlengin a duk a, a kutphah veilam hnung chu a vun a pilh nasa hle a, a ke dinglam hmawr chu pilhin a vung nasa hle bawk. A taksaa hliam a tawrh danah hian kut thlakna ni ngeia an hriat avangin Tanhril khawtlang mipui chu an thinur hle a ni.Piangliana nau Pakunga sawi danin a u hi central jail-a a luh hian a mit ko, chal, kephah leh a kuta hliam tuar hi a lo hmu nghal a, ward-a a luh hma hian a ek a chhuah thu a sawi a. Inthiar tura a hruai pawh hian amahin a thu tha hleithei lo niin a sawi.

A unaupa Pakunga hian chanchinthar thehdarhtute a hrilh danin a u hian Vaivakawn P/S-a a awm lai hian mimal ta Sumo-in police 4 leh civil mi 3-in an hruaichhuak a, Vaivakawn Zohnuai-a PWD site office chhungah kut an thlak ni a a sawi chu Mobile phone a an Record thu pawh a sawi bawk a ni.

Lalpianglina ruang hi Postmortem zawh a nih hnu ah Tanhril mipuite chuan Dawrpui West lam atanga zawn hawngin kawng an zawhpui nghal a, Boruak thalo thleng palh thei venthawn thu ah Vaivakawn Police Station panna ah Police thahnem tak leh Magistrate te inralrin tir an ni a, Vaivakawn Police Station peng ah dinpui niin a ruang zuitu mipui leh Police lam chu an intawng buai nasa hman thelh a, he thil ah hian Police lam leh Tanhril mipui lam atangin Hliam na vak lo tuarte pawh an awm a ni.

Hetiang a mipui lungawilo pungkhawm hian Lalpianga thih thu a mawh phurtu ni a ngaih te chu sawrkar in zawng chhuak ngei se, an hna atanga Suspend mai ni lovin an hna atanga ban turin an phut a, Lalpianga Nupui chu sawrkarin Zangna dawmna tha tawk tak pe turin an phut bak ah tun hnu ah Tanhril mi kher ni lo mi tupawh in Police Custody chhung ah thihna khawp in rikrapna an tuarleh a nih chuan nasa taka chet lak an inhuam thu khawtlang hruaitute hjian an sawi a ni.

Mipui Lungawilo pungkhawm hi an tin darh mai duhlova, Khawtlang hruaitute pawn an thunun zolo lek lek thin a, hetihlai hian Central YMA chuan ban pharin Lalpianga thih dan chu rang taka Sawrkar in chhuichhuak tura an duh thu leh an duhthusam anga thil a kal lo a nih chuan Central YMA pawhin theihtawp chhuah a hmalak zui a tum thu CYMA hruaituten an sawi hnu ah Lalpiang ruang hi Tanhril lam an panpui thei chauh a ni.

Home Minister Pu R.Lalzirliana chuan he thil thleng pawi a tih zia thu sawiin Lalpiangliana hian thilsual a ti a ni tih inhria in a rilru a nuam lova thuneitute hnen ah himna zawngin a inpe a, hetiang thil a thleng ta mai vanduaithlak tak zet a ni a ti a, Tanhril khawtlang in an phut zangna dawmna chu dan anga tih a nih tur thu a sawi a, Police Officer 3 leh Constable 1 chu Suspend an nih thu a sawi bawk. source -buanel.com

Tualchhung

Pu Malsawma a boral
Nimin chawhma dar 11 vel khan Pu Malsawma (73)h/oDartluangi(L) Serchhip Vengchung chu pumna in a boral a, lumen a nih hnu vawiin hian Pu Zathanga’n a vui ang.

Green Mizoram Day hmang
Nimin khan Govt. Serchhip College-a thawktute leh zirlai ten Green Mizoram Day hmangin, College campus-ah thing tiak 74 an phun a. College leh a vela thing awmsa tuaihnumin, an samfai bawk.

Hindi school exam mek
Mizoram Hindi Prachar Sabha hnuaia Serchhip Dinthar Hindi School-a zirlai ten term exam neiin, Class-X leh Class-XII ten board exam an nei mek bawk. He School-ah hian zirlai 60 vel awmin, exam hi tun kar Zirtawpni khian an zo ang.

Buhfai harsa lo ti
Food Civil Supplies & Consumer Affairs Department chuan thu chhuah siamin, Hrangturzo biala buhfai thlen that tawk loh avanga ration quota sem tam theih loh anga sawi chu thil hriat sual palh a nih thu a tarlang.
Hemi chungchangah hian District Civil Supply Officer, Serchhip zawhfiah nghal a ni a. Hrangturzo bial Thingsai, Cherhlun, N. Vanlaiphai leh Khawlailung ah te hian buhfai fur tla tur chhek khawl vek a ni tawh a, buhfai chungchangah hian harsatna a awm lo. Harsat a hnekin 14 June 2010 atang khan ration quota pawh kartin 2 kgs a sem thin kha 3 kgs a sem tir a ni zawk a ti.

Lawrkhawm

Sorkar-in Rs. nuai 80 hloh
Mautam laia mau riral mai mai tur ven nana mau hmanga sum dawnna tan tura sorkar leh mimal in an din Venus Bamboo Ltd. leiba a rulh sak avangin sorkar-in Rs. nuai 80 a hloh. He company chhuitu Commission report danin, Venus Bamboo hian Rs. vaibelchhe 287.84 Central Bank of India-ah a puk a. Hemi chhanchhuah nan hian khatih laia MNF sorkar khan ZIDCO kaltlangin nuai 226.83 a a hman tir a, hei vang hian Mizoram sorkar chuan Rs. nuai 80 a hloh a ni a ti.

Chhiah lak tumna dem
Eptu party 2 - MNF leh ZNP chuan sorkar-in petrol leh diesel atanga chhiah, pawisa 50 lak a tum chu thil tih awma an ngaih loh thu an sawi.MNF chuan kum 10 an sorkar chhung khan mipui nitin mamawh atanga chhiah lak leh mipui tawrhna thlen turin chhiah an la ngai lo tih an sawiin, Mizoram mipuiin kan quota kan kham tawh lo chung leh mautam Tam lai pawh khan chawi belh chunga buhfai leiin, hei vang hian chhiah an la ngai chuang lo tih an sawi. ZNP chuan, Petrol pump neitu ten VAT chhiah an chawi a, VAT baka chhiah lak belh a ni tur chu hriatthiam harsa an tih thu leh sorkar sum hloh phu hrukna atana mipui hnena sorkar-in chhiah lak a tum chu sorkar chak loh zia tarlanna a ni an ti.

SFMC-in dan lek a tum
Smoke Free Mizoram Committee (SFMC) chu nimin khan an Chairman, Health Minister Pu Lalrinliana Sailo Office ah hmalak dan tur hrang hrang thlirin an thukhawm a. Nasa zawk a vaihlo do dan tur leh Mizoram chu meizuk lohna state a siam ngei tura tan lak dan te an ngaihtuah hova.Meizuk khapna dan kenkawh chungchangte, mipui mimirte hnena meizuk that loh zia puanzar lehzual dan tur te, meizial leh a kaihhnawih thil atanga chhiah tam tawk lak dan tur chungchang leh meizial lam thil tawlhruk chungchangte pawh an sawiho a ni.

Delhi MLA-te lo zin
Nimin khan Mizoram Legislative Assembly-a Committee of Estimates Member-te leh Delhi Legislative Assembly-a Committee of Esti mates leh ST/SC/OBC & Minority Committee member rual rawn zin te chuan Assembly Committee Room ah meeting an nei.

CM hovin Cabinet meeting neih a ni

Nimin chhun khan Chief Minister Pu Lal Thanhawla hovin CM Office Cabinet Room-ah Cabinet Meeting neih a ni a, rel tura chhawpchhuahte zingah hengte hi Cabinet meeting chuan a pawm :
1. Amendment of Mizoram Air & Water (Prevention & Control of Pollution) Rules.
2. Petrol leh Diesel hralhna litre khatah Rs. 0.50 paise a tih san nise.
3. Mizoram Home Guards Volunteers-te duty allowance tihsan.
4. The Mizoram Energy Conservation Fund Rules, 2010
5. Science, Mathematics and English subject zirtirtu tur lak theih nana Recruitment Rules tum khat atan chauh (one-time) relax nise.
6. Sainik School leh a kaihhnawih Home Department atanga School Education department hnuaia dah ni se.
NLUP Grant-in-aid Rules, 2010 (Grant-in-aid to Executing Agencies and Individual from NLUP Board leh Grant-in-aid NLUP Board from the Government) neih rawtna chu hun danga la ngaihtuah that leh atan rel a ni a, Implementing of the Scheme of Revision of Pay of Teachers and Equivalent Cadres in Universities & Colleges on the Recommendation of the Sixth Central Pay Commission leh Secretariat chhunga Department hrang hrang post siam rem chungchangte chu a thuphungin pawm a ni a, Sixth Pay Commission report pawh Cabinet chuan an thlir hova, a thuphungin pawm a ni a, Federation-in en that/ ennawn tur an tih te ennawnin, a hma thei ang bera hman nise an ti bawk a ni.

Tualchhung

NLUP Workshop
Vawiina DC’s Conference hall-a NLUP Serchhip District Workshop neih tura tih chu CM phaia a zin chhuah dawn avangin thulh a ni.

Rulngan sat hlum
Inrinni khan Pu Lalzauva Khiangte(53), Serchhip P&E Veng ami chuan Vancheng rama an huanah Rulngan nu, a tui awplai a sat hlum.Pu Lalzauva hi Rawnal tuai khawrh tura kal niin, hetah hian Rulngan hian beih a lo tum a, hei vang hian a a sat hlum ta a ni.

Tualchhung

NLUP Workshop buatsaih dawn
Naktuk Thawhlehni khian DC’s Conference hall-ah Chief Minister Pu Lal Thanhawla hovin NLUP Serchhip District Workshop neih a ni dawn.

VC-V Secretary thlak
Serchhip-V Village Council Secretary Pu R.Thangkima chu a hrisel lohna leh an chhungkaw harsatna avangin Secretary hna a chawlhsan a. A aiah Pu F.Vanlalro puia s/o F.Lalrinliana dah a nih thu VCP Pu R.Thanchuanga hnen atangin ziakin kan dawng.

KTP members meet tiak
Serchhip Vengchung Pastor Bial KTP members meet Chhim Veng Kohhrana neih chu nizan khan an tiak.

Rualbanlote Ni hmang
Nimin Pathianni kha Presbyterian Kohhran chuan Rualbanlote Ni ah hmang in, he Ni pual thilpek an la khawm bawk.
Nimin Pathianni kha Salvation Army chuan Pate Ni atan hmangin, naupang ten an pa te duhsakna lantirna ni ah hmangin, thil pekte an hlan a ni.

PHEK 256 VENUS BAMBOO INQUIRY COMMISSION REPORT THEHLUT

Vawiin khan Pu S.Hiato, Minister, Industries Department hnenah Venus Bamboo Ltd. chungchang chhuitu Inquiry Commission chuan Report a thehlut. Minister Office chamber ah Report hlanna hi neih a ni, Parliamentary Secretary, H.Zothangliana, Inquiry Commission member te - Pu Rualzakhuma, IAS(Rtd.) leh Pu K.Lalchhunga, IPS(Rtd.) bakah Pu R.Lalrinawma, IRS, Industry Commissioner leh department Official pawimawh te an tel.
Minister chuan Venus Bamboo Ltd. Pu K.K. Shah-a kaihhruaina hnuaia hun enge maw ti chhung lo kalpui tawh chu an kalphung leh an hnathawhte rin a hlawh tak loh avangin chhui chian ngai sawrkarin a ti a, chuvang a Inquiry Commission din chu chhuitir a nih thu a sawi. Inquiry Commission te chuan hun tlem te chhunga an thil hmuhchhuah te, an thiamna leh theihna te hmanga huaisen taka an puitlin theih avangin an fakawm hle a ni a ti.Venus Bamboo Ltd. hi kal chhohpui zel a nih tur thu leh Electric Connection an dilna te pawh Chief Minister Pu Lal Thanhawla, Power Department changtu ni bawkin a remtih tawh thu a sawi. Inquiry Report hi Volume-I leh Volume-II ah then a ni a, volume-I hi Inquiry report niin Volume-II hi Statement of Witnesses a ni thung.Volume-I ah hian phek 107 awmin Volume-II ah hian phek 149, interview vawi 22 neih tawh atanga siam a nih thu Inquiry Commission chuan a sawi.

Pu R.Lalrinawma,IRS, Industry Commissioner pawhin Venus Bamboo Ltd. chu Mizoram tan a hlawk thei ang bera kal chhohpui zel sawrkarin a tum a ni a ti.Venus Bamboo Ltd. a khawl manto tak tak te chu rei tak lo dah tawl tawh(unutilized) anih avangin siamthat leh tuaihnum hna thawk turin Taiwan atangin Engineer rualte chah chhoh mek an nih thu a sawi.Inquiry Commission member te - Pu Rualzakhuma,IAS(Rtd.) leh Pu K.Lalchhunga, IPS(Rtd.) chuan an thil hmuhchhuah te an sawi hnu in rawtna hrang hrang leh hmalak dan tur te he hun ah hian sawiho nghal a ni.Inquiry Commission chuan an hnathawh hun chhung zawngin harsatna lian an tawh loh thu leh sawrkar mi leh sa leh hotulian te an hnathawhna rawn ti sukuk zawng a khawsa an awm lo chu lawmawm an tih thu an sawi tel bawk.Inquiry Report hi Minister leh Commissioner hnenah an copy 1(Volume-I,II) ve ve an pe nghal.- DIPR

Tualchhung : 18.6.2010

Pu Thana a boral
Nizan dar 9 vel khan Pu K.Thanliana(62) Govt.Serchhip College Principal chu Aizawlah cancer avangin a boral a, vawiin hian Serchhip Chanmari Veng thlanmual ah vui a ni ang.

Pu Ngaia a boral
Nimin zing dar 9 khan Pu Lalramngaia(48)h/o Lalliani Hmar Veng chu Thawhah avangin a boral a, lumen a nih hnu vawiin hian vui a ni ang.

HCS atan thla 3
July ni 1 atanga Health Care scheme kalpui leh dan tur zirhona niminpiah khan Serchhip CMO Conference hall-ah neih a ni a. He scheme-a inziak luh duhte tan thla 3 chhung hun hawn a nih tur thu he hunah hian tarlan a ni.

Cyber Crime zirho
Sub-Hqrs.YMA Serchhip leh Informa tion & Communication Technology Deptt. tangkawp buatsaihin nimin khan Hmar Veng YMA Hall-ah Cyber Crime chungchang zirhona neih a ni. Inbiakpawhna hman rua-in khawtlang nun a tih chhiat theih dan leh IT hmanga ram rorelna tha siam theih dan zirhona Pu Kawlthuama Tresurer Sub-Hqrs.YMA kaihhruaiah ah hian Pu Lalthlamuana PIO chuan, ram hmasawn na-in a ken tel Information & Technology - Mobile, Internet, Computer etc. te chu a hman dan kan thiam loh chuan chhiatna min thlentu a ni thei a ni a ti a. Hetiang hmanruate thiam tak leh tha taka hman hi a him a, hetiang hmang sualtute hremna dan pawh a awm a ni a ti.

Zirlaite fuih thar
Prof.Laltluangliana Khiangte chuan nimin khan Govt. Serchhip College-ah special lecture pein, Mizote chu hma sawnna tur kawng dap peih lova nuam ti taka zalen taka dil zau tak cheng dul dul ang kan ni a ti a. Zirlaite thahnem ngai taka zir turin a chah bawk.
Prof. Laltluangliana Khiangte hian vawiina Hmar Veng YMA hall-a Rev.Liangkhaia chanchin zirhona neih tur a hmanpui leh nghal dawn a ni.

Tualchhung

Green Mizoram Day
Vawiin hian Mizoram hmun hrang hrang ah Green Mizoram Day hman a ni dawn.
Green Mizoram Day hawnna inkhawm hi New Serchhip YMA Hall-ah tukin dar 10 hian neih a ni dawn a, District Bawrhsap Pu H.Darzika khual lian niin Day a hawng ang a, hemi hnu hian Sorkar Department hrang hrang ten thing tiak an phun nghal dawn a ni.

YMA Day hmang
Mizorama tlawmngai pawl lian ber YMA Day chuan nimin khan kum 75 a tling ta. YMA Day hi Branch YMA hrang hrang ten an mahni remchan dan anga hmangin, veng chhung thenfai hnatlang neih a ni a. Branch tam zawk chuan awmni khama hun hmangin, ruai te pawh an theh a. Damdawi Inah thisente pein, Hnuchham In leh rualbanlote Ina tan puina pe an awm bawk.

Kawng siam that hna
National Highway 54 BRTF kut atanga PWD ten an lak hnuah Serchhip khawpui chhung kawngpui chhe nasa zual lai thenkhat chu hnathawktu ten lung hmang in an hnawh lailawk a. A vaia siamthat hna chu favang lama thawh an tum nia sawi a ni.

Serchhip Civil Hospital sawnchhuah remtih a ni A hmun tur dap mek

Serchhip 16th June 2010 : Niminpiah Thawhtannia Serchhip Block Congress Committee huaihawta Serchhip khawtlang aiawh DRDA Conference hall-a inhmukhawmte chuan Serchhip Civil Hospital hmundanga sawn chhuah an remti.
He hun Block Congress President Pu PC.Vanlalsawma kaihhruaiah hian Serchhip Civil Hospital chu khum 100 awm theihnaa tih len a nih theih nana sorkar thuneitute dawr nise, tuna a awmna hmun chu khawpui thang zelah a fuh tawk loh avangin hmun dangah sawn chhuah nise, Casualty erawh a hmun ngaiah hian la awm chhunzawmin, a hmun tur chu la ngaihtuah nise an ti a, a hmun atan hian Serchhip Chanmari chhuah lam Pu Zotawna(L) ramte, Kawlri tlangte, New Serchhip BRTF camp leh Chhiahtlang hmar lam ram te chu awm an tih thu sawi lan a ni.
Hei bakah hian Serchhip District-in faina leh thianghlimna lama hma a sawn theih nan DLAO kaihhruaina hnuaiah VC tinin Sanitation Committee din nise an ti bawk.
He hunah hian Govt.Serchhip Higher Secondary School chungchang report petu, zirtirtu Pu RK.Sanghmingthanga tarlan danin GHSS-a zirlai 20 chuang admit thei tawh lo khawpa an chep leh zirtirtu indaihlohna thuamthat nan Rs. nuai 2 sorkar atanga hmuh a ni a. School building cheithat leh zirtirtu indaihlohna chungchanga mawh la turin DEO chu ruat a ni bawk.
Khawtlang tana inrawnkhawmna hunah hian YMA & MHIP Branch aiawh, VC, Zirtirtu pawl hrang hrang, khawtlang parawn, chanchinbumite leh rulling party aiawhte an tel a ni.

YMA Platinum Jubilee Lungphum Hawng

Mizorama tlawmngai pawl intelkhawm lianber YMA chuan kum 75 a tling dawn ta a, nimin ni 14 zingkar khan YMA Paltinum jubilee hriatrengna lungphun hawnna hun, YMA documentary film leh YMA Directory tlangzarhna hun hman a ni.

Mizorama tlawmngai pawl intelkhawm lianber YMA chuan kum 75 a tling dawn ta a, hun hmang tur hian Branch hrang hrang te chuan inbuatsaihna hun rei tawh tak atang khan an kalpui mup mup reng a, a khaikawm tu lam Central YMA puipa lam pawhin inbuatsaihna hi nasa taka kalpuiin damlo mamawhtute tana thisen pek te, mirethgei harsa zawk in sak sak te, vengchhung faina hnatlang neih te leh vantlang tana thil tha tih chi hrang hrang neih chhoh a ni tawh a, Jubilee pual ropui taka neih a lo ni tawh a, June ni 15 hian hmun hrang hrang ah Branch hrang hrang ten Jubilee hi ropui takin an lawm dawn a ni.

June ni 14 zingkar khan YMA Platinum Jubilee hriatrengna lung chu central YMA pisa tual Tuikhuahtlang ah Pu Lalchungnunga CYMA President in a hawng a, YMA Documentary film chu Pu JH Zoremthanga Central YMA vice president chuan a tlangzarh bak ah kum 2 dana siamthat thin Central YMA Telephone Directory chu Pu lalbiakzuala Gen.secy Central YMA chuan a tlangzarh bawk a, he hun ah hian Central YMA hruaitu thahnem tak an tel a, Pu RL Pianmawia MLA pawhin he hun hi a hmanpui a ni.June ni 15 a YMA Platinum Jubilee lawmna tur pual a Central YMA president Pu lalchungnunga thuchah chu Media hrang hrang tih chhuah a ni.

Pu lalchungnunga chuan thuchah a sawi ah YMA chu tanpuingaite tanpuitu a nih anga YMA ten hmeithai in an sa YMAten mi rethei te tanpui hna an thawk tih te hi ngaihthlak a nuam mai ni lovin a dawngtu tan a hlu em em a ni a ti a, YMA in kum 75 zin kawng a zawh chhung hian kawng bumboh tak tak paltlangin tluksual palh hlauhthawn awm ah tum engemawzat a ding a, mahse engtiklai maha YMA thlahthlam ngailo tu kan Pathian chuan vawiin thleng hian YMA hi a la hmang chho reng a ni a ti a, kumin YMA Platinum jubilee pual hian mi hrang hrang 9 hnen ah cheng sing 6 hlan a ni tih sawiin he YMA hunpui a lo thlen hian YMA member te chu YMA chu tanpui ngaite tanpuitu a ni tih hrethar theuh turina chah a, Khawtlang nunsiamthat kumpuan an neih mek ah pawh a hlawhtlin ngei beiseina nen an thlir tih a sawi bawk a ni.- source buanel.com

Infiamna hi intihhlimna mai ni lovin eizawnna tling a ni - Sport Minister

Serchhip 14th June 2010 : Sports Minister Pu Zodintluanga chuan Mizo thalai ten infiamna chu intihhlimna mai ni lovin, eizawnna tling a ni tih an pawm a ngai a ni a ti.
He thu Inrinnia Chief Minister trophy, Mizoram open Badminton Championship 2010 Serchhip Town hall-a kharna inkhawmah sawiin, Minister chuan, sorkar-in India ram bakah khawvel huapa Mizo thalaite infiamna lama an lan theih nan catch them young policy a kalpui mek a. Hei hi Aizawl mai bakah Mizoram District khawpui hrang hrang ah kalpui tum a ni a ti a. Naupan lai atanga infiamna lama zirna tha a awm chuan Mizoram chu infiamna lamah sang tak thleng thei dinhmunah a ding a ni a ti.
Minister Pu Zodintluanga chuan, Serchhipah mi 5000 len theihna Field siam tura tender koh mek a nih thu a sawi a. Hei bakah hian infiamna lam ni lo thil danga hman theih tur Auditorium Serchhipin a neih tur thu sawiin, Serchhip Town hall leh New Serchhip Community hall-te chu chei that a nih tur thu a sawi a. Rs. vaibelchhe 23 chuang sengin Serchhip khawpui chei a nih tur thu a sawi bawk.
He championship Nilaini atanga khelhah hian Mizoram hmun hrang hrang atangin infiammi 60 chuang an tel a. Mipa single ah MRP player Lalnunpuia a champion a, hmeichhe single-ah MPR player bawk Lalrinzuali a champion a ni.

Tualchhung

Hmeichhe lam Doctor thar
Serchhip Civil Hospital-a hmeichhe lam Doctor(Gyne) chu Aizawlah sawn a ni a, a hmunah hian Dr.B.Lalduhawma chu sorkar chuan a rawn dah thar a, a hna hi a rawn zawm thuai beisei a ni. Hetianga Doctor rawn dah a ni ta hi lawmawm an tih thu hemi chungchanga hmalatu SEDNOC chuan an sawi a ni.

Pu Hnawka vuiliam
Pu Hnawkchina(78) f/o R.Hrang mana Saron Veng chu Kalna avangin Inrinni chawhnu dar 1:30 khan a boral a, lumen a nih hnu nimin khan vui a ni.


YMA Day hmang dawn
Naktuk hi YMA Day (Kum 75 tlin champha) niin, Branch YMA ten uar taka hman an tum a, kum dang ang bawkin MJA member-te enkawl chanchinbu chu hemi Ni hian an chawl ve leh dawn a ni.

FIFA World Cup khelh tan a ni ta

FIFA World Cup chu nizan atang khan S.Africa-a Jonnesburg khelmualah khelh tan a ni ta.
He infiamna ah hian khawmualpui 6 atanga team 32 ten lawmman chi hrang hrang US dollar maktaduai 420 hu inchuhin, Stadium hrang hrangah vawi 63 inkhelh a ni ang a, July ni 11 Final khelh a ni ang.

NREGS-ah thil dik lo awm ngei ti

MGNREGS hnuaia Serchhip-IV-a hnathawhnaa thildiklo awm anga sawi chu chhui chian a nih hnu-ah, thil diklo a awm ngei tih hmuhchhuah a ni a, he thil diklo hi MGNREGS hnathawhnaa khawl hman a nih vang a nih thu leh chinfel a nih tawh thu, hemi chungchang chhui chiangtu RD Department Secretary Pu Lalhmingthanga Sailo chuan a sawi.
Pu Lalhmingthanga Sailo chuan Serchhip leh a chhehvel-ah dânin a phalloh angin khawl hman a ni tih sawiin, khawl hman man hi ziahfel a ngaih avangin Job Card zawng zawng atan hlawh siam a ni a, hemi vang hian pem bo tawhte Bank Account-ah pawisa chhunluh a tul ta tih a sawi a, hetianga thil diklo awm chhan hi a bul ber chu khawl hman vang a nih thu sawiin, he thil diklo hi tih luih a ni nge tihpalh a ni tih a sawi theih loh thu a sawi a, tunhnu-ah chuan khawl hmang tawhlo turin DC pawh a hrilh nghal thu a sawi a.Thil diklo awm ang ang chu chinfel a nih tawh thu sawiin, DRDA Account-a pawisa dahlet zawng zawng chu Rs. 97,512/- a nih thu a sawi bawk.

Lawrkhawm : 12.6.2010

NLUP inhrilhfiah
NLUP Implementing Board chuan nimin khan MLA-te, khawtlang leh NGO hruaitute bakah Kohhran hruaitute leh thutharlakhawmtute NLUP chungchang an hrilhfiah. Hetah hian Chief Minister Pu Lal Thanhawla chuan kalkhawmte chu NLUP chungchanga sorkar hmalak dan, an hmuh dante tlang taka sawi chhuak turin a sawm a. NLUP chu Mizoram a kuthnathawktu mahni kham khawp pawh thawkchhuak thei tawh lo, mi harsa chhanchhuahna tura hma lakna a nih thu sawiin, a sum tam lam aiin a hlawhtlinna chu sorkar chuan a ngai pawimawh zawk a ni a ti.

Health Care-ah BPL duhsak
Mizoram Health Care Scheme leh BPL-te damdawia an inenkawl na senso Rs.30000 thlenga bill theihna Mizoram Health care scheme leh RSBY kal kawp tir turah APL tan natna khirh bik sorkar-in a pawm chi 17 a huam dawn a, natna satliah inenkawlna chu BPL tan chauh a bill theih dawn tih nimina hemi chungchang zirhona Aizawla neihah tarlan a ni.

Eizawnna ngaihtuah ngai ti
Nimin khan Horticulture Minister Pu H. Liansailova chuan "Sustainable Development Through Medicinal Plants Cultivation in Mizoram" tih thupui hmang a zirhona Horticulture Deptt, Mizoram State Medicinal Board leh Dept. of Economics, Mizoram University te buatsaih chu I&PR Auditorium-ah a hawng. Khuallian chuan kalkhawmte hnenah Mizoram chu thlai chi hrang hrang that theihna hmun ram tha nimahse ami cheng tam zawk loneih a eizawngte dinhmun erawhin tlak hniam lam a pan a, chuvangin a thlakna tur eizawnna tha ngaihtuah a ngai ni a ti.

Power Tiller pe chhuak
Nimin khan Kolasib Dist. Agricul ture Officer chuan an District chhunga lo neitu mi 15 te hnenah buh leh thlai hlawk zawka an thar theih nan Power Tiller a pe chhuak a. DAO Pu Rina chuan, Power Tiller dawng tute hian sorkar leh mimalah mawh phurhna sang tak kan nei ta a ni tiin, tha taka hmang turin a chah.

Puhna pha
Madhya Pradesh CM hlui Arjun Singh chuan Union Carbide hotu Waran Anderson-a bail-a chhuahtir a nih chungchangah inhnam hnawiha amah an puhna chu thu dik lo a nih thu

Tualchhung

Zanin atangin FIFA World Cup
Khawvela infiamna mite ngaihven ber FIFA World Cup 2010 chu zanin atang hian S.Africa-ah khelh tan a ni dawn ta. Opening Ceremony hi dar 5:45 ah neih tan a ni ang a, zan dar 7:30 ah a thlengtu S.Africa leh Mexico ten khelh hawnna khelin, zan dar 12 ah Uruguay leh France ten an khelh leh bawk ang.

YMA-in In sakthat sak
Serchhip Chanmari Veng YMA Branch chuan nimin khan an Veng pa, Pu Ralkap thanga te chenna In, assam type-in an sak that sak. YMA-te hian sorkar Deptt. hrang hrangah venbur an khawn hnuah hna tlangin In hi an sa a ni.

Zangnadawmna pe chhuak
Ramsa-in an buhbal a tihchhiatsak Lonei tute hnenah nimin khan Forest Deptt. chuan zangnadawmna a pe chhuak.

Tualchhung

Serchhipah Legal Metrology
Serchhip Dist.Consumer Associa tion-te ngenna avangin Serchhip-ah Legal Metrology Department Office dah a ni dawn. Bukna leh tehkhawng enfiahtu Department hi Inspector hova dah tum niin, an office atan DC Office bula Dist. Consumer Office building room rem chang hman tum a ni.

E.Roll hearing nei mek
Electoral roll ennawn mekah hming thun thar dilte enfiahna (hearing) chu District chhung khaw hrang hrangah neih chhoh mek a ni. Hearing hi uluk leh fimkhur taka kalpui niin, hearing paltlangte hi electoral roll ah thun thar an ni ang.

Mizoram Open Badminton
Nimin zing atang khan Serchhip Town Hall leh New Serchhip Community hall-ah te Chief Minister Trophy, Mizoram Open Badminton Champion ship 2010 khelh tan a ni a. Dist. hrang hrang atangin infiammi engemaw an rawn tel.

Mithiam bik, zirlaite leh Mizoramin kan mamawh a ni

Serchhip 10th June 2010 : Higher and Technical Education Minister Pu Lalsawta chuan, Research beitute chu mithiam bik, zirlai te leh Mizoram in kan mamawh an ni a ti a. Mizoram hi ziak leh chhiar thiam tamna nimahse chhawrtlak a thiamna ril tak nei kan tam em tih hi kan inbihchian a ngai a ni a ti.
He thu hi nimina Govt Hrangbana College leh Education Department, Mizoram University te buatsaih “Research Methodology and Preparation of Proposal” tih thupui hmanga zirhona chu Golden Hall, Hrangbana College-a a hawnnaah sawiin, Pu Lalsawta chuan, Research beitute chu mithiam bik, zirlai te leh Mizoram in kan mamawh an ni a ti a.
Pu Sawta chuan, Mizoram hi ziak leh chhiar thiam tamna nimahse chhawrtlak a thiamna ril tak nei kan tam em tih hi kan inbihchian a ngai a ni a ti. Kan ram a zirna siamtha tur chuan Primary School atanga University zirna sang ber thleng hian siam that a pawimawh thu a sawi a. Phailamah mi neinungten an fate zirna school tha ah an dah a, chutiang ti thei ve lo te tan mithiam bik Mizo ni kher lo te pawh Mizoram School leh College te hian kan mamawh a ni a ti a. Mizoram University zirtirtu atan pawh a thiam leh tha apiang, hnam vanga inthliarna awm lo va lak hi sorkar duh dan a nih thu a sawi bawk.
He Workshop ni 3 awh tur hawnna inkhawmah hian Pu K Liantuala, Principal Hrangbana College chu Chairman niin, keynote address Prof. R.P. Vadhera, Dean, School of Education and Humanities, MZU chuan a pe a ni.

Lawrkhawm

Bru-te lakir turin
Tunhnaia Mizoram rawn tlawhtu Union Home Minister P.Chidam beram-a’n kumin Oct. thlaa Bru-te Mizorama kir tir tura a tih angin Mizoram sorkar chuan hma a la mek a. Nikum Nov. ni 16-a chhinchhiah danin Bru lo let turte hi Electoral ID-a chuang mi 12538 leh an chhungte tih an ni a, an mahni lakluhna tur hian sum Rs. vbch. 2, nuai 43, sing 8 chu Home Ministry chuan a thawh khatna atan Mizoram sorkar a pe tawh a ni.

Manipur dinhmun chhia
Manipur-a All Naga Students Association of Manipur ten an lungawilohna lantir nana National Highway pawimawh 2 thla 2 dawn an dan pin tawh avangin he State hian nitin mamawh thilah harsatna namenlo a tawk mek a ni. Zirlai ten kawngpui an dan pin nachhan hi Autonomous Hills Dist. Council inthlanna huaihawt tum a nih an duh loh vang a ni.

GOM sorkar-in a din
Kum 26 kaltaa Bhopal gas hlauhawm putchhuak mi tam takin an thih phahna case-a court thu tlukna puan a nih hnuah lungawi lohna a nasat avangin sorkar laipui chuan gas putchhuak tuartute chhawmdawlna leh inbenbelna pek dan thlirtu tur Group of Ministers a din.

Referral Hospital tlawh
Thawhlehni khan Pu Lalrinliana Sailo, Health Minister chuan Referral Hospital, Falkawn ami; hun eng emaw chen chawlhsan hnu a chhun zawm leh mek chu a hmunah a tlawh. Tuna awmsa khum 50 bakah hian khum 170 dah theihna turin Rs.4.62 crores senna tur a thawh mek a ni a, zawh thuai beisei a ni.

Victoria Memorial hall tlawh
Nimin khan Art & Culture Minister Pu P.C. Zoramsangliana chuan Victoria Memorial Hall, Kolkata a tlawh a, Victoria Memo rial Hall Director Dr. Chittaranjan Panda nen an inkawm nghal.Pu P.C. Zoramsangliana leh Dr. Chittaran jan Panda inkawm chuan Cheraw troupe mi 50 vel Victoria Memorial Hall kawta lam tura tirh te an remti a, heng atana senso te hi Victoria Memorial Hall enkawltute tum vek tur a ni a, hei bakah hian kumin September 2010 ah hian Aizawlah Painting Competition neih tura rel a ni bawk.

Mizoram Police-te hman tur ralthuam thahnem tak lei a ni

Central sorkar puihna leh state sum hmangin Mizoram police te chu ralthuam chi hrang hrang hmanga thuam changtlun mek an ni a, tunhnaiah ralthuam chi hrang hrang lei a nih tawh bakah tunah hian VVIP lo kal changa hman tur bullet proof car Rs. nuai 46.34 man chu lei niin reilote-ah Aizawla lo thlen beisei a ni a, central sorkar sum hmang -in foreign silai tam tham tak lei tum mek a ni bawk.

Mizorama Comando Company 2 din turten an hman tur foreign silai chu lei tura ruahman mek a ni a. Tunhnaia Union Home Minister P.Chidambarama hnenah khan he thu hi lo thlen niin, Mizoram mamawh hi a tam tham loh avangin Home Ministry hian thil dang rualin an tender anga, Mizoramah rawn thawn mai tura ruahman a ni.

Central sum hmanga foreign silai lei tur te hi M/S Colt Defence LCC, 547 New Park Avenue, West Hartfort, Connecticut, USA siam Colt M 4 carbine sawmkua (90) leh Colt M4 CQB sawmthum (30) te a ni a. M/S Bretta Frebrica d’ Armi, Italy company siam Bretta 90two (pistol) za sawm leh paruk (116) leh Sako TRG 22 (sniper rifle) pali (4) te lei tum a ni.

India rama venhim ngai zual (Z plus category) VVIP ten Mizoram an lo tlawh changa hman tur bullet proof car, Mitshubishi Pajero chu Rs. nuai 46.34 a lei niin thuam changtlun mek a ni a, reilote-ah Aizawl a rawn thlen beisei a ni.

Tunhnai khan Mizoram sorkar chuan 4th leh 5th Indian Reserved Battalion tan ralthuam tam tham tak a lei tawh bawk a. Ralthuam a lei zingah hian INSAS (Indian Small Armed System) 1280 (Rs. nuai 73.8 man) te, INSAS tho LMG ang chi 39 (Rs. 34,02,279 man) te, INSAS pistol Auto 9mm 1A 118 (?Rs. 23,25, 515 man) te, SI mm mortal 36 (Rs. 40,90,560 man) te, Carbine Machine 9mm 320 (Rs. 74,20,210 man) te lei a ni tawh a ni.

Central sorkar, Ministry of Home Affairs chuan commando company 2 te ralthuam lei nan hian Rs. vbc 6 a phalsak a, state sum lo hman phawt a, chumi hnuah re-imburse leh tura ruahman nia thu dawn niin, tunah hian Police Training Centre, Lungverh-ah mi 118 te chu Commando Course neihpui mek ania thu dawn a ni bawk.

Foreign silai lei turte:

Silai hming Lei tur zat A man Pakhat man

Colt M4 Carbine 90 Rs. nuai 54 Rs. 60,000/-
Colt M4 CQB 30 Rs. nuai 27 Rs. 90,000/-
Bretta 90two (pistol) 116 Rs. nuai 29 Rs. 25,000/-
SAKO TRG 22 (sniper rifle) 4 Rs. nuai 14 Rs. 3,50,000/-

Everest tlang lawnchhuaktu Dr.Samuela hnenah Cash Incentives Award hlan a ni

Serchhip 9th June 2010 : Nimin khan Sports & Youth Services Minister Zodintluanga'n a Chamber-ah Cash Incentives Award Rs.1,00,000/- leh Certificate of Appreciation, Dr. Samuel Lalrintluanga, A.M.C. Mizo zinga Mount Everest lawn chhuak hmasaber leh awmchhun hnenah a hlan.
He Award hlanna inkhawmah hian Minister Zodintluanga chuan thu sawiin, Mizo thalaiten kan tih ve theih turah pawh kan dah ngai loh chu Capt. Dr. Samuel Lalrintluanga hlawhtlinna hian Mizo thalaiten kan ti ve thei a nih tih a tilang a, Samuela hlawhtlinna hian Mizo thalaite tan rahbi thar tuk sakin, chona nasa tak a siam a ni, a ti. Samuela hlawntlinna hian Games &Sports Activities ruala Adventures lamah pawh tan la zual sauh turin phurna thar min pek ngei a beisei thu a sawi bawk.
Capt. Samuel Lalrintluanga hi kum 1981, 25th March a piang niin, kum 2006, October khan Army Medical Corps-a Medical Officer hna hi a zawm a, kum 2007 March khan Nehru Institute of Mountaineering-ah post niin, Indian Doctor zinga Alpine Climbing Course Training zo hmasa ber a ni. Khawvela tlang sang ber Mt. Everest chu ni 21 May 2009 khan a lawn chhuak.
He Incentive Cash Award hlanna inkhawm Pu Zoliana Royte, Director, Sports & Youth Services kaihruai ah hian Sportd & Youth Services Officer an tel thahnem hle.

Tualchhung

Chhiarpui dotute ti ti pui
Nizan hmasa khan Dist.Bawrhsap Pu Darzika’n Chhiahtlang khuaa chhiarpui leh National Population Register (NPR)-a inziaklut ve duh lote a ti ti pui a. Heng mite hian sakhaw thila rinna nghet tak an neih avanga inziaklut duhlo an nih thu sawiin, NPR phei chu sakawlh chhin chhiahna intanna tur nia an ngaih thu leh an hlauh vang aiin an do zawk tih an sawi a. Pu Zika chuan, sorkar hmalakna pawi mawh tak a nih avanga inziahluh vek a nih tur thu leh thawktute tawiawm chu khua leh tuite bat a nih thu a hrilh bawk a ni.Chhiahtlangah hian inziakluh duh lo chhungkaw 35 an awm a ni.

Mizoram Open Badminton Championship
Mizoram Open Badminton Championship Chief Minister’s Trophy -2010 chu vawiin ni 9 - 11 hian Serchhip Town Hall leh New Serchhip Community hall-ah tan a ni dawn. Lawmman 55000 leh trophy mawi tak a awm a ni.

Tualchhung

Pi Ruati vuiliam
Pathiannia boral Pi Vanlalruati(38) w/o R.Sawiluaia P&E Veng chu lumen a nih hnu nimin Thawhtanni khan an Veng thlanmualah vuiliam a ni.

Buh chi duh tan
District Agriculture Deptt. ah Leilet buh IR-64 a thleng thar a, a ching duh turte chuan an mamawh zat in report tur a nih thu DAO Pu Lalthanzira hnen atangin kan dawng.
Hetihlai hian ruahtui a that avangin kumin atana Leilet siam tumte pawhin hma an la leh tan mek a ni.

Tualchhung

Pi Ruati vuiliam
Pathiannia boral Pi Vanlalruati(38) w/o R.Sawiluaia P&E Veng chu lumen a nih hnu nimin Thawhtanni khan an Veng thlanmualah vuiliam a ni.

Buh chi duh tan
District Agriculture Deptt. ah Leilet buh IR-64 a thleng thar a, a ching duh turte chuan an mamawh zat in report tur a nih thu DAO Pu Lalthanzira hnen atangin kan dawng.
Hetihlai hian ruahtui a that avangin kumin atana Leilet siam tumte pawhin hma an la leh tan mek a ni.

Lawrkhawm

Health Care thla tharah
Sorkar hnathawk lo ten damdawia an inenkawlna senso engemaw zat sorkar-a an bill ve theihna tur Mizoram Health care scheme chu thla thar atanga hman tan ngei turin ngawrh taka kalpui mek a ni a. Health care scheme kengkawh tur hian National Insurance company thlan fel a ni a, engkim peih thaw khat a ni tawh niin thuneitute chuan an sawi.

Meidum Thlanmual min
Ruahsur nasat avangin Pathianni zing khan Bairabi khaw bula Meidum khaw thlanmual a min a, thlan 12 vel a min pui nia sawi a ni. He thil thleng hi hriat a nih veleh mi tlawmngai ten ruang (ruhro) zawn khawm hna hi thawk nghalin, ruang 8 an hmu let thei a, a bak chu tuiin a la bo nia rin a ni. Heng ruhro te hi kuang hran theuvah dahin, hunserh hman a nih hnuah thlan pangngaiah phum leh nghal vek an ni. Kolasib Dist-ah hian leimin a tam hle nia sawi a ni.

CADS-in mi 59 man tawh
Thla hlui May ni 20 a din, Central YMA hnuaia Central Anti-Drug Squad chuan an thu bawhzuiin, nimin thleng khan proxyvon mum 4160, Nitro mum 34, Ganja 2.92, fun 29 leh zial 416 an man tawh a, Heroin No.4 hawng 1, chhinsen 60 an man tawh bawk. Heng an ruihhlo man khawmte hi Rs. 3,26,400 man hu niin, mi 59 an man tawh bawk

Mi 8 thiam loh chantir
Nimin khan court-in kum 26 kaltaa Bhopal gas puta mawhphur tu nia puh mi 8 thiamloh a chantir. Gas put avanga hnathawktu mi 15000 thihna thlenga mawhphura puh, thiam loh chantir mi 8 zingah hian kum 85-a upa, Union Carbide Chairman hlui, Kesak Mahindra pawh a tel a ni.

Hming pe lut
June ni 17 Rajya Sabha By-election chuh turin nimin khan Union Commerce & Industries Minister Anand Sharma-a’n a hming a pe a, a rual hian Congress member 2 dang pawhin an hming an pe lut bawk.

PM J&K-ah a zin
Prime Minister Dr.Manmohan Singh chuan nimin khan J&K tlawh turin Srinagar khawpui a thleng. A cham chhung hian political party hrang hrang hruaitute leh inlakhran tum pawlte a kawm dawn a ni.

Sub-Committee on Fire Prevention an thukhawm Ram ti kang tlem berah Lawngtlai District

Serchhip 8th June 2010 : Nimin khan Chief Minister Conference Hall-ah Sub-Committee of Fire Prevention chu an Chairman Pu Lal Thanzara, Parliamentary Secretary hovin an thu khawm.
Pu Lal Thanzara chuan, kumin chhunga Kangmei venna lama District ti tha pathum, District hrang hrang Deputy Commissioner theuh ten an District chhunga kangmei vengtha khua an thlan pathum theuh te leh I & PR Department ten kangmei venna atan leh kangmei chungchang ziak tam ber Chanchinbu pathum an thlante puanna an neih tur thu a sawi a.
He Committee in District hrang hrang fangrual a, ram kang leh kanglo awmna te endiktu tur an tirhchhuah ten report an pe hlawm a, an kalna khua theuh atanga thu dawn an neih danah Lo hal hma a tul thu an report tel bawk a ni.
Kumin chhunga ram kang venna leh tikang tlem ber te chu, pakhatna ah Lawngtlai district, pahnihna ah Lunglei district, pathumna chu Serchhip district an ni.
Aizawl district chhungah heng khuate hian kangmei ti chhuak tlem ah puan an ni - 1) Hmuifang, 2) Sumsuih leh Sihfa, 3) Mualcheng.
Lunglei district ah 1) Serkawn, 2) S. Khawlek, 3) Rotlang 'E'
Kolasib district ah 1) Phainuam, 2) Phaisen, 3) Nisapui.
Champhai district ah 1) Chhiahpui, 2) Vankal, 3) Vaphai.
Mamit district ah 1) Lengte, 2) Saithah,
Lawngtlai district ah 1) Bualpui 'NG', 2) Rulkual, 3) Rawlbuk.
Serchhip district ah 1) Buarpui, 2) Khawbel, 3) Khumtung.
Saiha district ah 1) Lopu, 2) New Laty, 3) Tisi.
Chanchinbu kangmei chungchang ziak tam ber pathum te chu hetiang hian thlan an ni - 1) Zoram Thlirtu, 2) Aizawl Post, 3) Chhawrpial
Lawmman pek dan tur chu district titha 1) Rs. 20,000/- , 2) Rs. 15,000/-, 3) Rs. 10,000/-
Village ti tha 1) Rs. 10,000/-, 2) Rs. 7,000/-, 3) Rs. 5,000/-. Newspapaer 1) Rs. 5,000/- , 2) Rs. 3,000/-, 3) Rs. 2,000/- bakah lawmman la zawng zawng hi certificate Green Mizoram Day ah pek an ni dawn a ni.

Tualchhung

Lungawiloh lantir tumna thulh
Govt.Serchhip Higher Secondary School-a zirtirtu indaihlohna avanga vawiin atanga zirlai ten school kai loh an tumna chu sorkar-in a rawn tih hlawhtlinsak tak avangin an thulh.

Hmeichhe Doctor beisei zel
Serchhip Civil Hospital-a hmeichhe lam Doctor (Gyne) awm mumal lo chung changah SEDNOC chuan hma la mek zelin, hun reilote hnuah Doctor dang sorkar chuan rawn dah a tum nia sawi a ni.

Lawrkhawm

Zawhna putru lo ti
Mizoram High School leh Middle school Hindi teachers 1308 lak thar tur, written test exam zawhna a putru nia sawi chu thu dik lo niin Mizoram Hindi Student Union hruaitu te chuan an sawi.Inrinnia Aizawla thutharlakhawmtute an kawmnaah Hindi zirlai pawl hruaitute chuan thla hlui May ni 18-a written test zawhna paper putru nia sawi chu thu belh chiandawl lo a ni an ti a. An pawl chuan he thu a hriat veleh hian chhui nghalin,engmah a awm lo niin an sawi.


April thlaah HIV+ hmu tam
Mizoram State AIDS Control Society chhinchhiah danin, kumin chhungin April thla kha HIV+ hmuh chhuah tam ber thla a ni a.Thisen 3281 test atangin mi 126 HIV an kai tih hriatchhuah a ni a, AIDS vei mipa 49 leh hmeichhia 39 ten mipat hmeichhiat hmanna atangin an kai a.Ruihhlova inchiuna atang in mipa 32 leh hmeichhia 1, nu naupai in a fa a kai mipa leh hmeichhia 1 ve ve an awm a, mipa 3 dang an kai nachhan hriat loh an awm bawk.


Maxi cab leh Bike insu
Nimin tlai dar 4 vel khan Kolasib Shalom Vengah khualzin phur Maxi cab leh Bike 1 an insu a. Hetah hian Bike khalhtu Lallawmsanga (15) Khuangpuilam Veng chu a hmunah a thi a, a mi phurh Lalruat kima pawh a na hle nia sawi a ni.

Counselling dawn
Higher & Techincal Deptt chuan Technical entrance exam-a tling tharte tan counselling neih hun tur a ruat fel a. Tunkar Ningani khian Biology group atanga tanin, Roll No. indawt dana kalpui a tum tih Department thu chhuah chuan a tarlang.

Environment Day hmang
Environment & Forest Minister Pu H.Rohluna chuan a awlsam leh heksak lo zawnga nun dan zir a tul a ni a ti. World Environment Day pualin, Inrinni zinga AIR Aizawla thuchah a sawiah Minister Pu Rohluna chuan mitinin mamawh kan neih theuh bak chu inrenchem zawnga nun a tul tawh a.Mihring ten mahni hmasial taka thil siam dangte dinhmun ngaihtuah chang lek lova hmasawnna leh chang kanna kan zawnna kawngah inbuk tawk leh inphuhru tawna chengza tur kan ni a ti. World Environment Day pual hian Mizoram hmun hrang hrangah hun hman a ni.


Buhfai harsatna thleng
Champhaia buhfai harsatna phu hrukna tur buhfai qtls. 3000 chu Inrinni khan Champhaiah phurh thlen a ni a, vawiin hian mipui hnenah sem chhuah a ni ang. Champhaiah hian buhfai a harsat avangin Zirtawpni khan DCSO office mi engemaw zat pung khawmin, buhfai pe turin an ngen a ni.

MNF, Serchhip Block ‘E’ ten CM Pu Lalthanhawla bang turin an ngen

Mizo National Front, Serchhip Block ‘E’ te chuan June ni 5, 2010 inrinni khan thuchhuah siamin chhan hrang hrang vangin Serchhip bialtu MLA leh Chief Minister ni bawk Pu Lalthanhawla chu bang turin an ngen a, bang tura an ngenna chhan langsar zual zingah chuan Corruption hi a tak taka pho ro tumna nei lo leh bial mipui te ngaihsak tawk lova an puh vang te a ni ber. An thuchhuah chu a ngai ngaiin hetiang hi a ni

PRESS RELEASE
Chief Minister
Pu Lalthanhawla bang rawh se

“1. Serchhip tualchhung chanchinbumi 9 te chuan MGNREGA Serchhip District hnuaia Vigllance & Monitoring Committee Member a ruat an nihna chu a taka chhawr tangkai tumna awm lo leh tu ten emaw hmingthat lak an tumna mai mai nia hria in, him lovin an inhria a, chuvang chuan May ni 28, 2010 khan Pu Sangdingliana, District Programme Officer, MGNREGA, Serchhip District hnuaiah banna an thehlut ta a ni. Serchhip a tualchhung chanchinbumi kan neih te hi Political Party a tan lam nei lem lo, nihna pawh nei lo an ni deuhvek hlawm a, an thuchhuah te pawh hi ngun taka chiktu tan chuan a lai hlawm viau zel a, chuvang chuan mipui pawhin kan ring em em a ni.
Hetiang taka mipui in an chunga rinna kan nghah chanchinbumite meuh pawhin inrawlhna tlak a an ngaih loh leh a thurualpuitu nih ringawt pawh him lo nia inhre khawpa kan chanchinbumi ten Vigllance & Monitoring Committee Member atanga an ban phah hnuah pawh sorkar lamin tun thlenga a la haider zui reng mai hi mipui zah lohna lian tak a ni a, Corruption, a zung nen lama karphawng a, phoro tum sorkar hian an thutiam a an din leh ngam tak tak si loh zia a lang chiang hle. Chuvang chuan mahni insawi anga Corruption pho ro leh ngam si lo hi mnf Serchhip Block ‘E’ MNF chuan Chief Minister ni zui zel tlakah a ngai lova, Pu Lalthanhawla hi Chief Minister a nihna ata bang turin kan ngen a ni.

2. MZP Hqrs. Serchhip leh Serchhip Higher Secondary School zirlaite chuan zirtirtu an neih tlem avanga zirtirtu pe tura sorkar an ngenna a hlawhtlin theih loh avangin an lungawi lo a, June 7, 2010 thlenga zirtirtu pek an nih loh chuan, lungawi lohna lantir nan zirlaite’n sikul kai loh an tum a, hei hi Chief Minister bial a thil thleng atan chuan a inhmeh lo hle. May 13 khan Serchhip HSS-a Mizo zirtirtu, C Laldinliana chu Chaltlang HSS-ah sawn a ni a, a hnu lawkah Geography zirtirtu a boral bawk. Hetianga an zirtirtu pahnih lai an chân hnu hian, Serchhip MZP leh HSS zirlaite chuan zirtirtu pe turin sorkar an ngen thin a, mahse tun thlengin a bial mipui ten harsatna an thlen hi Chief Minister hian a la tihlawhtling thei lova, mahni bial chhung harsatna pawh sukiang thei lo hian Mizoram pum harsatna phei chu a sukiang lo hul hual ang tih kan ring a, chuvang chuan mahni hna tlin lo Pu Lalthanhawla hi Chief Minister atanga bang turin kan phut tlat a ni.

3. India rama zirna sang ber te zinga mi National Institute of Technology(Nagpur) chu Mizorama din turin nikum lam daih tawh khan Union Cabinet pawhin a lo passed tawh a. MNF, Serchhip Block ‘E’ leh Serchhip Dist. NGO-Co-Ordination Comtt. ten an ngen lawm lawm chung pawhin Serchhip Bialtu MLA, Chief Minister ni bawk Pu Lalthanhawla hian Aizawl District chhungah ngei dah a tum tlat a, Mizorama Polytechnic 4, Kolasib, Saiha, Lawngtlai leh Champhai a a dah zingah pawh Serchhip Dist. hi min hmaih lui tang tang a, Dam lo, hmunpui pan ve thei lo ten hmun leh hmuna Computer hmanga damdawi lam thiam te an rawn ve theihna tur TELE MEDICINE pawh Mizoram Dist. Capital 8 zingah 7 ah an dah mek laiin Serchhip District chiah min hmaih lui leh a, hei vang hian “Vairengte leh Tuipang inkara khaw pakhat ve mai” a lo tih tawhna rilru kha a la pu reng niin kan hria a, min bialtu MLA leh Chief Minister ni bawk Pu Lalthanhawla berin min duhsak miau loh avangin hmasawnna hian Serchhip Bial chu min thlawhkhum duai duai reng a ni ber. Heti taka bial mipui, Chief Minister dinhmun hial a luah theihnana thlang tlingtu min zah lotu hi MNF Serchhip Block ‘E’ chuan min bialtu MLA leh Chief Minister ni reng tlakah a ngai lova, a rang thei ang bera bang nghal turin a phut tlat a ni.

Issued by Mizo National Front, Serchhip Block ‘East’
Serchhip : Mizoram

tualchhung

Chhiatna entute Thenzawlah
Kumina ruahsur leh thlipui thawk in Mizoram hmun hrang hranga chhiatna thleng vanga sorkar laipui a chhawmdawlna dil mek ngaihtuah tur leh a hmuna thil awm dan enfiah tur Inter-Ministerial team -te chuan nimin khan Thenzawl an tlawh a. District Bawrhsap Pu Darzika leh Thenzawl khawtlang hruaitu ten lo dawng sawngin, chhiatna thlenna hmunte an tlawh bakah video thlalakte an enpui a ni.


Vawk vulh training
Niminpiah khan Chhiahtlang Women Pig Producer Society leh AH & Vety Deptt. tangkawp chuan vawk vulha tui mite hnenah vawk vulh lama hmasawnna tur training neih a ni. He training Pi Mawizuali Pig Producer Society Chair man kaihhruaiah hian Dr. K.V.L. Rochhar zela, Vety Surgeon -in training a pe a ni.


Serchhipah mobile company 6
Mobile Phone service company pakhat ‘Idea’ chuan Serchhipah connec tion an pe chhuak ve leh ta a. Idea company hian MJA member-te chu SIM card a thlawnin an pe chhuak a, midang tan pawh hun an hawng mek bawk. Heti hian Serchhipah mobile company 6 - BSNL, Relience, Airtel, Aircel, Indicom leh Idea te an awm ta a ni.

Tualchhung

School kai loh tum
MZP Hqrs. Serchhip leh Serchhip Govt. Higher Secondary School zirlaite te chuan hun rei tak zirtirtu an neih that loh avanga lungawilohna lantir nan karleh Thawhtanni atang khian tiam chin awm lova school kai loh an tum.
Zirtirtu indaihlohna hi sorkar-ah vawi tam tak an lo thlen tawh chunga vawiin thlenga hnawhkhah a la ni lo chu zirlaite hian hrethiam lovin, Karleh Thawhtanni hmaa an duhnate tihpuitlin a nih loh chuan School kai an tum lo a ni

Buhfai sem mek
Food Civil Supply & Con sumers Affairs Department chuan retailer-te kaltlangin AAY leh BPL buhfai a sem chhuak leh mek.

Badminton Championship
SDBA bultumin, June ni 9-11 chhung hian Mizoram pum huap Badminton Cham pionship, Chief Minister Trophy 2010 chu Serchhip Town Hall-ah New Serchhip Hall-ah te neih a ni dawn.

Amateurs Photographs Exhibition Aizawlah neih mek a ni

Serchhip 4th June 2010 : Nimin khan Aizawla Millenium Trade Centre Ground Floor-ah Post Event te buatsaih 'Amateurs's Photographs Exhibition cum Sale' chu Pu Lal Thanzara, Parliamentary Secretary in a hmanpui.
He Photographs exhibition hi Information & Public Relation Deptt, Environment & Forest Deptt, PHE Deptt, Photo House, Dawrpui, Homer Hardware, Dinthar leh NIKON bultum niin, thlala thiam 23 te'n thlalak mawi tak tak 80 en tur leh lei nghal theihin an rawn pho chhuak.
Paliamentary Secretary chuan, Post Event te hmalakna chu bengvar tlak hle in a hria a, Siamtu kutchhuak mawi tak tak thlalak hmang a pho chhuah chu Pathian chawimawina kawngkhat a nih thu a sawi. Thlalak mawi tak tak rawn phochhuak tute chu talent tha tak nei te an ni a ti a. Mihring nuna thlalakin pawimawhna a neih dan kawng hrang hrang leh thlalakna in hma a sawn chhoh dan te a sawi bawk.
He Exihibition buatsaihtu Post Event te chuan Mizo te chu thlalak (photography) ah hma kan sawn hle tawh niin an sawi a. Thlalak pho chhuah te hi a hmunah pakhat Rs 1000/-(cheng sangkhat) zel in an zuar nghal a, thlalak pholan zing a 'mawiber' zawnna Viewers' choice poll result chu tun Inrinni lo awm turah puan an tum. He intihsiakna a tel tum form la chhuak mipa 49 leh hmeichhe 4 zing a mi 23 (mipa 19 leh hmeichhe 4) te'n an thlalak 80 an rawn phochhuak a ni.

Lawrkhawm

Chhiatna enfiahtu lo kal
Kumina ruahsur leh thlipui thawk in Mizoram hmun hrang hranga chhiatna thleng vanga sorkar laipui a chhawmdawlna dil mek ngaih tuah tur leh a hmuna thil awm dan enfiah tur Inter-Ministerial team ten Aizawl an rawn thleng a. Nimin khan Bukpui, Thingsulthliah leh Tlungvel khuate an tlawh a ni.

Buhfai phurh tih tawp
Mizoram Truck Driver Union leh Kolasib Truck Owners Associa tion thurel angin nimin atang khan Kolasib leh Bairabi inkar kawng puiah buhfai phur motor tlan tih tawp a ni. Hetianga hma an lakna hi helai inkar kawngpui chhe lutuk avanga lirthei leh a khalhtu ten harsatna an tawh vang niin an insawi a, he kawng enkawltu PWD in an siam that hma chu buhfai phurh chu chhunzawm rih loh nise an ti a ni. Hetihlai hian PWD chuan hmalak mek niin a sawi.

India sipai lal ban a ni
India sipai, Indian Armed Forces tana thil zahthlak tlakin, Lt.Gen. AK.Nanda mipat hmeichhiatna thila a inhnamhnawiha puh avang in a hna atangin ban tir a ni. Army. Engineer-in-Chief Lt.Gen. AK.Nanda hi Israel-a a zin tuma ama technical secretary nupui a khuaikhema puh a nih avangin Army Chief Gen. VK.Singh-a thu angin ban a ni.

Minister-in lawmawm ti
Nimin khan Pu J.H. Rothuama, Excise Minister chuan Central YMA leh Excise& Narcotic department hotute an hmalak mek 'Ruihhlo Do' chungchang a sawipui a. CYMA hnenah an hmalakna puihna atan Rs 50,000/- a hlan nghal a ni. Minister chuan Excise Department hmalak mekna 'Ruihhlo Do' kawng a CYMA in ke a rawn pen leh chu lawmawm a tih thu leh sorkar hmalakna ti chak tura tlawmngaih chhuah zel turin CYMA chu a sawm a ni.

MZP-in result zirchian tum
MZP chuan Technical entrance result chhuak thar chuan result chhuak hmasa chu a dik loh zia a ti lang chiang hle nia sawiin, result chhuah nawn leh hi a dik tawh ngei an beisei tih an sawi a. Tuna result chhuak thar ber hi MZP chuan ngun takin a zir chiang leh dawn a, a dik lo hmuhchhuah leh a nih chuan zirlai ten an chanvo dik tak an chan theih nan hma an la dawn tih thuchhuah siamin an sawi.

Tualchhung

NPR training buatsaih a ni
Nimin khan DC’s meeting room-ah YMA Sub-Hqrs., MHIP Sub-Hqrs. leh MJA Serchhip Dist. te pualin National Population Register(NPR) chungchang trianing buatsaih a ni. He huna thu sawitu District Bawrhsap Pu H.Darzika chuan NPR-in a tum ber chu ram chhunga cheng mi zawng zawng chhinchhiah a, kum 15 chin chung lamte thlalak leh kutze lak a ni a,hei hi Sakawlh nen inzawmna a nei lo a ni a ti a. Chhiarpui (Census) hian a tum ber chu khua leh tui dik tak zawn chhuah lam ni lovin, ram chhunga mihring cheng tawh phawtte chhiar a ni a ti. Thusawitu dang Pu Zira SSA DPC pawhin NPR chu khua leh tuite tana nakina awlsamna leh tangkaina nasa tak la nei tur a nih thu sawiin, sakhuana nena kan sawi zawm luih tlat avanga lo hlau tawk kan awm hi chu kan hriat chian tawk loh vang a ni a ti bawk.

Maxi Cab-in lungawilohna lantir
Serchhip leh Aizawl inkara tlan thin Maxi Cab service-te chuan thil thawn chungchangah lungawilohna an neih avangin tunkar chhung hian eng thil thawn mah an ken theih loh tur thu an sawi. Tunkar tir khan Sumo 1 ah Aizawl atanga Serchhipa dah tur sumdawnna thil chu a chin hriat lovin a bova, hemi chungchang ah hian thil thawntu ten FIR an thehluh leh si avangin Maxi Cab service-te hian lungawilohna lantirin, tun hnuah reng reng thil eng pawh thawn se a hu tawk kal man lak zel an tum tawh a ni.

MST Bus Khualzinphur accident

MST bus khualzinphur chu nimin June ni 1 chawhnu khan Saiha bulah a chesuala mi 3 an thi a midang 8 vel natakin an hliam, he mst bus mz-01 8720 hi tuipang atanga saiha pana tlan ani a, vawiin chawhnu dar 2 leh a chanve vel khan maubawk leh theiva inkara a tlan laiin a chesual ta a ni, a chetsual chhan hi steering fail nia thudawn a ni, thite hi hmeichhia 2 kum 70 mi leh 35 mi leh mipa pakhat kum 70 mi nia thu dawn ani he busah hian mi 17 vel an chuang nia hriat a ni a, hliamte hi saiha civil hospital panpui an ni a , an chetsualna hmun hi Saiha atanga km 50 vel nia hriat a ni, Transport minister PC Zoramsangliana chuan MST bus chesuala thita chhungte hi saiha Bawrhsapin Rs 10000(Sing) theuh, hliam na zualte Rs 5000 theuh, hliam dangte chu Rs 1000 theuh a pe dawn tih a sawia,bus hi insured vek a nih a vangin insurance company atangin zangna dawmna an beisei thei dawn a ni tih sawi in hemi kawngah hian Transport Deppt. in theihtop a chhuahpui dawn tih a sawi bawk.

Chhiarpui neih mek pawm thei lote chungchang sawiho a ni

Serchhip 2nd : Serchhipa Mizoram Kohhran Hruaitute Committee chuan nimin khan District Bawrhsap Pu H.Darzika hovin a office-ah sakhaw pawm dan danglam neih avanga chhiarpui neih mek pawm thei lote chungchang an sawiho.
Serchhipah hian Mizoram chhung hmun dang ang bawkin ram pum chhiarpui neih mek kalpui dan chu an rinna nena inrem lo leh him lova ngai an awm ve a. Heng mite hian chhiarpuiah inchhiar tel tir ve loh an tum a. Hemi chungchang sawihonaah hian chhiarpui tangkaina leh tel ve duh lote avanga harsatna thleng theite sawilangin, sorkar duh dan ang ngeia a bo a bang awm lova kim taka chhiarpuia inziah luh a nih theih nan theihtawpa hmalak nise an ti a.
MKHC leh sorkar aiawhte chuan hemi chungchangah hian thu chhuah intawm siam nise an ti a. Mipui inzirtirna atan vawiin hian DC’s Conference hall-ah Kohhran hruaitute leh sorkar hotu ten sawihona nei se an ti a. Hei bakah hian hmalakna chikhat atan tlawmngai pawl aiawhte leh MJA Serchhip District-te nen chhiarpui neih mek leh National population registrer chungchang training buatdaih nise an ti bawk.

tualchhung

Census-a tel duh lo
Ram pum chhiarpui neih mekah thil hriat fuh tawk loh avanga sakawlh intanna bul nia ngaite chu sorkar-in a chhin chhiah mek zel a. He census-a inchhiar tel tir ve duh lo hi report a nih danin Serchhip ah chhungkaw 50 vel an awm a. Aizawlah chhungkaw 129, Vairengtea ah chhungkaw 30 vel leh Champhaia Pu Lalzawna pawl te an ni.

Buhfai a vang
Tunlai hian Supply Department chuan Dealer-te kaltlangin khawnvartui a sem chhuak mek. Hetihlai hian buhfai ah chhungkaw tam takin harsatna an tawk mek a. Bazar-ah pawh a man tova lei tur a vang hle a ni.

America Scientist-ten Hnute cancer damdawi siam chhuah theih in beisei

America Scientist-te chuan, hnute Cancer damdawi siam chhuah theih an in beisei tih an sawi. Hnute cancer chungchang zirchiangtu mi thiamte hian, an damdawi siam chhuah hi sazu-ah an enchhin tawh a, mihringah a taka hman theih a ni dawn em tih enchhin leh an la tum a, mihringah pawh a hlawhtlin ngei an beisei tih an sawi. He thil zir chiangtu zinga mi Vincent Tuohy chuan, he an damdawi siamchhuah hi hmeichhe hnute cancer neiten tangkai taka an la hman theih ngei a beisei tih a sawi a, sazu-a an enchhin ang taka mihringa hna a thawk ve thei anih chuan hmeichhe cancer veiten an dam phah ngei dawn niin a sawi bawk. - Mizobazar.com