Serchhip 19th Sept. 2010 : Chief Minister Pu Lal Thanhawla chuan, miretheite khai chhuahna tur programme NLUP thla leh October thlaah pek fel tum a ni a ti.
Inrinnia Aizawla Press Conference a neihnaah he thu hi sawiin, Pu Lal Thanhawla chuan, tun dinhmunah NLUP dawng tur khaw inpeih tawhte chu pek an nih tawh thu a sawi a. Haulawng tlangdung chuan NLUP hi an dawng tawh a ni a ti a. Dik taka hman a nih theih nan tehna chi hrang hrang hman tur a ni tih sawiin, Lunglei Dist. chuan tih that ber an tum an sawi thu a tarlang a, a ti tha te chu lawmman pek ngei an ni ang a, District a ti tha ber, MLA bial, Village level leh mimala ti tha ber thlanna neih a ni dawn tih a sawi bawk.
Chief Minister hian tunhnaia USA-a a zin chungchang thutharlakhawmtute hi hrilhin, Mizo Day a hmanpuinaah Mizo hnahthlak tam tak chuan Mizoram hmasawnna atan an theihna zawnah tanpui an intiam thu an sawi a ni a ti a. Mizoram hmasawnna kawnga tanpui tura World Bank hotute a kawm chungchang pawh sawiin, hriselna lam, kawng sial leh ni zung leh thli chakna hmanga kawlphetha siam chhuah tura hmalakna an sawiho tih a sawi a. Sairanga Rel lut tura ruahman mek chu kum 2014 ah peih fel theih turin Railway authority kutah dah a ni a ti bawk.
No comments:
Post a Comment