ADB loan rulh nan Road tax ti sang
Sorkar dan siam a inkalh

Serchhip 31st Oct. 2011 : Mizoram sorkarin ‘The Mizoram Motor Vehicle Taxation (Amendment) Act, 2011’ a siam behchhana lirthei atanga chhiah lak (road tax) tihsan mek chu Asian Development Bank (ADB) atanga sorkarin loan a lak, Health Care Scheme atana hman rulhna tur leh kawngchhe siamna tur nia sawi a ni.
He dan siam, a bu-a Transport department-in a tihchhuah chu a inmil lo a. Mizoram sorkar Transport Deptt.-in lirthei chhiah a lakna dan hman mek, sorkarin Gazetted-a a tihchhuahah hian bu khat theuh si inang lo a awm a, Rate of Tax on Vehicles Schedule-I Section-III ah chuan Bus in an chawi tur tarlan a ni a. Bu 1-ah Mizoram chhung atan Rs.2500/- (only), Mizoram pawna tlan seat 18 ah Rs.3,500/- a ni a; mahse, Transport Deptt.-in dan (tax) bu a hralhchhuah dangah chuan (e) Rs.2,500/ leh Rs.3,500/- bakah hian Rs.120/- leh Rs.150/- in seat 18 chunglam chu a tarlang leh si niin an sawi.
Hei bakah hian, October ni 18, 2011-a Transport Minister hova meeting an neihnaah Transport Deptt. Jt. Director Remmawia chuan, road tax tihsan a nih chhan hi ADB (Health Care Scheme atana sum hman) puk rulh a ngai tawh avanga, a rulhna tura tih a nih thu leh kawng siamthatna tur a nih thu a sawi, an ti bawk.
Lirthei chhiah lak mek chu sang uchuak an tih avang leh tha lo an tih avangin chhiah pe tur tam tak chu tui lai rapin, chi-ai takin an awm mek tih an sawi a. Mizoram Motor Vehicle Taxation Refinement Demand Co-ordination Committee (MMVTRDCC) chuan he dan hi a siamtha turin sorkar an phut a, November ni 7 thleng sorkar hmalakna an ngaichang ang a, bawhzuina mumal a awm loh chuan a tul anga hmalak an tum tih an sawi.

Pawl hrang hrang 16 intelkhawmna MMVTRDCC hian nimin khan an Chairman, R Lalhmunmawia hovin Aizawl Press Club-ah thuthar lakhawmtute an kawm a. Mizoram sorkarin Road Tax a tihsan chu tha lo an tih takzet thu leh, October ni 18-a Transport Minister hova meeting an neih thuchhuak sorkarin a tihchhuah leh dan pawh a dik tawk lo tiin, dan awm sa tha an tih loh avanga a siamtha tur Team/Group din an rel zawk tih an sawi a ni.
Road Tax tihsan hi Assembly House-a Minister-in a sawi dan chuan Transport Vehicle-ah 50% leh Non-Transport Vehicle-ah 20% a tihsan tur a tih laiin, a taka hman a nih chuan 20% leh 50% aiin a to daih zawk a ni, an ti a. He dan hman mek Section 17-a inziak angin, Assembly House-a pharh kher ngai tawh lovin, tihsan emaw tihhniam emaw theihna a awm thu leh a rang lama siamthat ngei an phut thu an tarlang a. “Transport Deptt. hian a thil tih phuailuai tak hi siamthat hreh suh se,” an ti bawk.