SERCHHIP-AH NLUP SEM LEH A NI

Vawiin nileng khan Serchhip DC Conference Hall-ah Agriculture Department leh Soil & Water Conservation Department hnuaia NLUP Trade thlangtute hnenah NLUP sem a ni a, Agriculture Department hnuaiah chhungkaw 141 leh Soil & Water Conservation Department hnuaiah chhungkaw 128 hnenah NLUP sum hi sem a ni.
Vawiin NLUP sem inkhawma thusawitu Serchhip bawr hsap Pu H.Darzika chuan NLUP dawngtute chu dik tak leh taima takaan sum dawnte hmang turin a chah a, NLUP chu Mizoram Sawrkar Flagship Programme anih avangin Sawrkar pawh a fimkhur a, a hlawhtlintheih ngeina turin mipuite leh Sawrkarin rilru hmuhkhat pu a an thawhho a ngai a ni a ti a, NLUP sum sem danah pawh a dawngtu dik tak te nilo midangin an lo pawh hek ve theih loh turin bank kaltlanga tih vek a ni tiin mipuite chu sum hmangthiam hle turin a chah a ni.

Bawrhsap chuan NLUP sum dawngtuten an hman dan pawh Sawrkar Department hrang hrang ten uluk takin an vil reng dawn a, Line Department hrang hrangte pawhin NLUP hna thawk tha ber nih tuma an in el avangin mipuite an pawimawh hle a ni a ti a, NREGS pawh Maharashtra State-in bul a tan a, a hlawhtlin em avangin India ram pumah hman chhunzawm a ni a, hetiang chian hian NLUP hi Sawrkar Laipuiin a tuipui a, a hlawhtlin a India ram puma hman zui tlaka kan siam chuan Mizote hmingthatna thlen tu a nih mai bakah Kristian kan nihna nen pawh a inhmeh hle dawn a ni a ti in, BPL awmlohna State nih kan duh chuan NLUP hi kan tihlawhchham thianglo a ni a ti a, February thla chhungin kum 2010-2011 chhunga NLUP dawng turte pek vek tum anih thu leh hemi atan hian sum pawh hmuh kim vek tawh a nih thu a sawi bawk.

Serchhip MLA Constituency, Bungtlang, Keitum leh Hriangtlanga NLUP Trade Agriculture Department hnuaia thlangtute kum 2010-2011 chhunga pek tur te chu pek kim tawh an ni a, thawhtanni hian Thenzawl, Thenzawl Vengthar leh Buangpui ami te pek an ni ang a, tun thla chhungin a dang zawng pawh pek an ni ang. Vawiina NLUP dawngtute hi WRC-I hnuaiah chhungkaw 65, WRC-II hnuaiah chhungkaw 48, Sugarcane chhungkaw 8 leh Oil Palm chhungkaw 20 an vaiin chhungkaw 141 an ni.

Hetih rual hian Soil & Water Conservation Department hnuaia Trade hrang hrang thlangtu chhungkaw 128 hnenah NLUP tanpuina sem a ni a, tun thla chhunga sem zawh vek tum a ni bawk. Ruahman lawk ang chuan karleh thawhlehni hian Fisheries Department hnuaia Trade thlangtute hnenah NLUP tanpuina hi pek leh tum a ni.