Serchhip 25th Feb. 2011 : Nimin khan Bialtu MLA, Chief Minister ni bawk, Pu Lal Thanhawla chuan Serchhip leh Hriangtlang khaw inkalpawhna tur Lei pahnih a hawng.
Lei hawn te hi Tuikum Lei (Suspension Bridge) leh Tuichawm Lei (RCC Bridge) te an ni a, Tuikum Lei hi Serchhip atanga Km. 7 vela a hla Tuikum Lui chungah dawh a ni a, Tuikum Lei atang hian Hriangtlang khua hi Km.6 vela hla a la ni. Tuichawm Lei hi Tuichawm Lui chungah RCC a din a ni a, heng Lei pahnih hi inhnaihte metre 200 vel kar dana awm an ni.
Lei hawngtu Chief Minister Pu Lal Thanhawla chuan Hriangtlang khaw mipuite chu duhsakna thu hlan pahin, Lei tangkai taka chhawr thiam turin a chah a, Hriangtlang khua atanga motora phurhchhuah theih eitling nei ngei tura fuihin, theihtawp chhuaha hmasawnna kawng zawh turin a chah nghal bawk.
Chief Minister tawiawmtu Minister Pu PC. Zoramsangliana chuan khawtlang leh ram kan enkawlna thuah Lal Isua ngaih pawimawh ber a tul thu uar takin a sawi a. Minister Pu Lalrinliana Sailo pawhin sorkar hna thawkte fakin thahnemngai leh rim taka an hnathawh rah a lang tan mek a ni tih thu a sawi bawk.
Lei hawnna inkhawm hi Pu H.Darzika, Serchhip Bawrhsap-in a kaihruai a, Pu David Zodingliana A.E., DRDA Serchhip-in Technical Report a pe a ni.
Hriangtlang Lei hi feet 200 a sei niin, a zau zawng hi feet 9 a ni a, a ban san zawng hi Serchhip lam hnaihah feet 22, Hriangtlang lam hnaihah feet 18 a sang a ni. February ni 14, 2010 atanga Lei siam hna hi tan niin December ni 1, 2010 a thawh zawh a ni a, Cement bag 1667 hman niin, Iron Rod quintals 167.95 hman zawh a ni bawk. GI pipe 65mm tlawn 60 a hnuaia za atan kham a ni a, thingzai 712.5 cubic ft. hman zawh niin avaia sum senral hi Rs. nuai 27.50 a ni.Hei bakah hian Lei panna kawng kilometer 2 chu laih zau a ni a, a bak zawng hi chu NREGS kaltlangin V/C ten an chhunzawm ve thung a ni. Tuichawm Lei hi feet 44 a sei, feet 12 a zau a ni a, RCC a sak niin, Rs. nuai 9 senga sak a ni.
No comments:
Post a Comment