NATIONAL DISASTER RESPONSE FORCE TEN SERCHHIPAH ZIRTIRNA AN PE

Vawin chawhma dar 10:30 khan Serchhip DC Conference Hall-ah National Disaster Response Force (NDRF) ten leilunga chhiat rupna lo thleng thut thei laka inven dan leh chhanchhuahna hna thawh dan tur zirtirna an nei a, Serchhip District huam chhunga Department hrang hrangte leh Sikul leh college lam atangin aiawh an kal tha hle. He hunah hian an Commander A.K. Singha chuan powerpoint presentation hmangin NDRF lo din dan te, Central thlenga an inthuizawm dan te, an hna thawhte leh an nihphung hrim hrim te a entir bakah chhiatrupna lo thlen thulha damlo leh hliam te enkawl dan leh chhanchhuah hna thawh dan tur te sipai ten an entir a ni. Hemi bakah hian DC office tualah chhanchhuahna hna thawhna hmanrua chi hrang hrangte an entir bawk. NDRF team lo kal te hi Inspector A.K. Singha Comander-in a rawn hova, ani bakah hian Sub Inspector M.K. Ojha leh Sipai 23, an vaiin 25 an ni a, Delta Coy, Team – D3, Ist Battalion, NDRF Guwahati atanga lo kal an ni. Serchhipah hian feb ni 13 thleng an cham ang a, an cham chhung hian 4th Bn. Assam Riffle Serchhip ten lo mikhualin, Serchhip khawchung leh a chhehvela pawl leh institution hrang hrangte tan Serchhip Town Hall-ah Familiarization Exercise (FARMEX) an la nei zel dawn a, ni 14, February-ah hetiang bawk ti leh tur hian Lunglei an pan dawn a ni. NDRF-te hi phone leh email hmang ten biak pawh theih reng an ni a. Anni battalion hi India Hmarchhak pumpui bialtu an nih angin vanduaina leh chhiatna lian tham lo thlen thut thil thuah pawh direct-in phone-a biak pawh theih reng an ni a, Email hmanga dawr duh tan 01ndrf@yahoo.com or 01ndrf@hotmail.com –ah te biakpawh theih an ni a, tin emergency thilah pawh Control Room 0361-2840284-ah hian commandant leh Adjutant-te direct-a biak pawh theih reng an ni.