|
|
|
|
|
|
|
Ni thum awh tur Hriselna Kutpui (Health Mela) chu vawiin chhun khan Serchhip Field No. 2 -ah neih tan a ni a, Kut hawnna inkhawm vawiin chhuna neih ah Mizoram Chief Minister Pu Lal Thanhawla chuan khuallian niin Health Minister Pu Lalrinliana Sailo chu khualzahawm a ni. Chief Minister hi a nupui Pi Lal Riliani, Transport Minister Pu PC Zoram Sangliana, Parliamentary Secretary Pu S.Laldingliana leh mipawimawh dang ten an tawiawm a ni. |
Chief Minister chuan Hriselna Kut buatsaihtu Health Department hnena lawmthu sawiin Serchhip District chu Khawvela cancer vei tamna ber District anih avangin Hriselna Kutpui neih chu thil tha tak anih thu a sawi a, hriselna chungthu ah tan lak nasat a ngaih thu a sawinaah ringtute chu mite aia hrisel tur, taima tur leh thianghlim tur kan nih avangin kan in uluk em em a ngai ani tih a sawi bawk.
Mahni hna a rinawm leh tui a pawimawhzia sawiin Chief Minister chuan Pathianin min hunna hmuh apiang hi a rawngbawl tura min dahna ani tih hriat kan hriat a tul a ni tiin Pathian chawimawina tha ber chu kan hnathawha lan tir hi a ni tih a sawi a, Sawrkar hnathawk rinawm leh tha tak tak an awm laia mahni tanghma hai leh hlawh ringawt buaipui an la tam chu pawi a tih thu sawiin Sawrkar hnathawk, kuthnathawk leh sumdawngte’n mahni nunah rinawmna, dikna leh tumruhna an sengluh theih hunah malsawmna tluantling chu kan hmu dawn a ni a ti bawk.
Chief Minister chuan hriselna kutpui a hlawhtlin theihna tur chuan faina leh thianghlimna ngaihpawimawh a tul thu sawiin ei leh in, zuk leh hmuamahte pawh insumtheihna a pawimawh a, Sawrkar, kohhran leh tlawmngai pawl kuta dah mai lovin mimal tinin mawh kan lak a ngai a ni a ti bawk. Chief Minister chuan kan chhehvel hnam hrang hrang ten Mizoram chhungah hnathawh sen loh hmu a an chhungte an la chawm theih laia ram mleilung faten thawh tur a vang kan ti hi inenchian nan hman a ngai a ni tih sawiin tunah hian kan inthlahdah avangin mi nuaih hnih dawn kan thawh peihloh thawkin hnam dang Mizoramah an rawn cham bang a, hei hian kan ram than nasa takin a ti thu a ni a ti a, taihmakna leh rinawmna keng chunga thawh hreh neilova kan awm hunah hmasawnna a chak lehzual dawn a ni a ti bawk.
Chief Minister chuan Kristiante a chhe lai siamthatu tura koh kan nih hian kan mihring pui te mai ni lovin Pathianin duh taka a siam ram leilung leh nungchate humhalh leh tih that hi a tel ani tih hriat a tul thu a sawi a, hemi atana hmanraw tangkai tak mai NLUP Pathianin Mizote mon chhawpchhuah sak hi a tihlawhchham tu kan nih a thiang lo mai nilovin ringlo mite hnena kan Kristianna tarlang tu hmanraw tangkai tak, kan rawngbawlna tur a ni a ti a, NLUP chu Mizoram ram nuam, thangthar lo awm zel turte tana chenna tlak leh eizawnna ngelnghet siam sak tu ni tura hmanraw pawimawh tak anih thu a sawi bawk.
Hei bakah hian Chief Minister chuan hlemhletna do kawngah Sawrkar hmalaknate thlawp turin mipuite a sawm a, thil ti diklo tih hriat reng pawh in hum tuma insawipui ching hnam kan ni hi ban san a hun tawh a, dikna a lal theihna turin hei hi kan tih ngei ngei a ngai a ni a ti bawk.
Chief Minister chuan UPA Sawrkarin thingtlang loneitute leh kuthnathawktute a ngaihpawimawh avangin Bharat Nirman programme a duang chhuak a, chung zingah chuan NRHM hi a ngaihpawimawh ber pakhat a ni tih a sawi a, kuthnathawktute tel lovin hnam a kal theih loh avangin Sawrkar chuan hrisel turin a duh ani tih a sawi bawk. Mizoramah Community Health Centre 12, Primary Health Centre 57, Sun-Centre 370, Urban Health Centre 5 lehSub-Centre Clinic 60 a awm thu sawiin Chief Minister chuan mihring awmzat atanga chhutin India ramah a ziaawm ber pawl kan ni chungin hriselna chungthuah erawh chuan a hniam ber pawl kan la ni si hian ngaihtuah a ti thuiin tan lak nasat a ngaihzia a tilang chiang a ni a ti bawk.
Khualzahawm Pu Lalrinliana Sailo pawhin hriselna hi ram changkang tehna pakhat anih avangin kan ngaihpawimawh a tul a ni a ti a, natna kan tawh thinte hi kan nunphung leh khawsak phung azirin a danglam chho zel a, hetih lai hian inkaichhawn theihloh natna chi hrang hrang Thisen Sang, Zunthlum, Cancer etc. a la tam em em a, hei hi kan in enfiah a tul a ni a ti a, natna kan hnehtheih loh TB, Malaria leh AIDS te la awmin heng natna te hneh anih theih nan hian kan tanrual a ngai a ni a ti bawk.
Pu Rinliana chuan hriselna ngaipawimawh tak Chief Minister te nupa kan nei hi a vanneihthlak thu sawiin an thahnemngaihna tihlawhtling tur leh an tha ti chak turin tan kan lak ve a ngai ani tih sawiin a bik takin Infant Mortality Rate leh Maternal Mortality Rate ah te thahnemngai leh zuala tan la turin thawktute a fuih a, nausen leh a nu thih tir hi kan remti tur a ni lo tiin kalkhawmte a chah nghe nghe a ni.
Vawiin Hriselna Kut hawnna inkhawm hi Pu R.Lalvena, IAS, Special Secretary-in a kaihruai a, Dr. Lalkailiani, Jt. Director(P)-in Hriselna Kut chungchang sawifiahna hun a hmang a, Hriselna lam hawi lemchan tawi entir anih bakah Hriselna Programme hrang hrang – Blindness Control Programme, AIDS Control Programme, IDD & Leprosy Control Programme, Health Care Scheme & RSBY, Malaria Control Programme, Drugs Control Programme, Reproductive & Child Health Programme, Indian System of Medicine (AYUSH) Programme, EPI & School Health Programme leh Revised National TB Control Programme chungchangah mithiamten zirtirna an pe a, Serchhip Bawrhsap Pu H. Darzika’n lawmthu sawina hun a hmang bawk a ni.
Health Mela hi February ni 25 (Zirtawpni) thleng awh tur a ni a, naktuk February ni 24 (Ningani) hian a thlawna inentirna neih tan a ni ang a, zing dar 7:00 atangin inentir turte tan hming ziak (registration) tih thei a ni ang a, zing dar 7:30 atanga chawhnu dar 3:00 thleng inentir theih a ni ang a, naktip February ni 25 (Zirtawpni) ah pawh a ngai anga kalpui niin chawhnu dar 3:00 ah Health Mela kharna inkhawm neih a ni ang. Health Mela chhung hian Doctor thiam tak tak ten a thlawnin damlote an entir bakah damdawi pawh a thlawna sem a ni ang a, Health Mela hmang tur hian Aizawl atangin Doctor thiam rual 30 vel an rawn kal a ni. Source :DIPR
No comments:
Post a Comment