US sipai ten Osama Bin Laden an kaphlum

Tun Pathianni kalta, May ni 1, 2011 zan khan Kum 2011, Sept. ni 11 khan World Trade Centre beihna a mawhphurtu bera puh, US in Khawvel puma an hmelma No.1 a an chhal hial, kum 10 chuang tehmeuh thapui thawha an lo zawn tawh Al-Qaeda hotupa ber Osama Bin Laden chu Pakistan ramchhung Islamabad Khawpui atanga km 40 vela hla Abbottabad khua ah US sipai ten an kaphlum ta. Tukin zing tukthuan eikham vel khan US President Barrack Obama pawhin Osama Bin Laden-a thih thu hi Official in Khawvel pum hriatah a puang a ni.

Washington Post leh The New York Times ten an ziahdan chuan Bin Laden a hi US Intelligent Department CIA ten an kaphlum niin an tarlang a, Bin Laden-a tawmrukna hmun hi Pakistan sipai hmun pawimawh leh an Military Academy dinna hmun ni hialin an tarlang a, hei hian Pakistan leh Al-Qaeda inzawm chianzia a tarlang chiang hle nia an ngaih thu an tarlang tel bawk.
Bin Laden-a ruang hi US sipai ten an hlawm nghal a, he thu ziahlai thleng hi chuan mipui hmuh theih tura tarlan a la ni lova, kahhlum a ni tih bak engtianga thah nge a nih tih te pawh US sorkar chuan a la thup tlat rih a, chu mai ni lovin a thi tawh hnu thlalak pawh vantlang hmuh theih turin an la tarlang duh rih lo.

White House a US President Barrack Obama’n Osama Bin Laden-a thih thu Official a a puannaah hian Obama chuan “Dikna chu kenkawhin a awm ta” a ti a, mifirfiak, pawisawi lo tam tak nunna la thintu te chu US sorkar chuan kawlkil thleng rawkin a umzui zel dawn a ni tih sawiin mifirfiak te laka Khawvel tiralmuang turin US sorkar chuan a theihtawp a chhuah zel dawn a ni a ti a, Bin Ladena kaphlumtu US sipai te chu fakin an thawhrimna leh huaisenna zar hi Khawvel mipui ten kan zo dawn chauh a ni a ti bawk.
Bin Laden-a thah thu hi nimin nileng khan Khawvel ram hrang hrang Media lian ho te chuan Breaking News ah an tarlang vek a, a thih thu hria hian Pakistan ram hmun hrang hrang leh US ramchhung hmun tam takah te chuan mi tam tak pungkhawmin Bin Laden-a thah a ni ta chu an lawm a ni.