CHHIAHTLANG BRANCH YMA LIBRARY HAWN A NI

Vawiin chawhma dar 11 khan Raja Ram Mohan Roy Library Foundation kaltlanga sak Chhiahtlang Branch YMA Library, Chhiahtlang Community Hall bul ami chu bialtu MLA Pu K.Lianzuala’n a hawng.

Hawnna thusawitu Pu K.Lianzuala chuan library tha tak nei thei tura Chhiahtlang YMA hruaitute leh member te hmathlir thu zia leh thahnemngaihna te fakin, khawtlang mipuite leh tlawmngai pawl hrang hrangte nena thawh hona tha tak an nei thin chu lawmthu a sawi bawk. Library chu lehkhabu dahkhawmna tih ringawta hriat nilo se a duh thu sawiin kum up ate leh naupang chena hman tangkai theih nise a duh thu a sawi a, kum upate chu khawtlang tan leh hnam tan ‘library’ pawimawh tak an nih thu sawiin an finna leh an tawnhriatte chu thangtharte tana tangkai thei ang bera hmang thin turin a chah nghal bawk a ni. Pu K.Lianzuala chuan Chhiahtlang mipuite chu Sawrkar duhsakna dawng tlaka sawrkar programme leh ruahmannate chhawr tangkai zel turin a fuih a, Sawrkarin thliar bik a neih loh thu leh a tithe apiang duhsak an nih zel tur thu sawiin NLUP hlawhtlinna tur atan YMA pawhin mawhphurhna an nei ve a ni ti a sawiin NLUP sum dawngtu ten a hmanna dik taka an hman theih nan tanlakpui turin a sawm nghal bawk. Chhiahtlang YMA library hi chhawng thum a sak niin a sak nan hian Raja Ram Mohan Roy Library Foundation atang pawisa cheng nuaih ruk (Rs. 600000) hmuh a ni a, hei hi instalment hnih a pek niin tumkhatah cheng nuaih tum (Rs. 300000) zel a pek an ni a, hei bakah hian bialtu MLA in MLA Fund atang Rs. 30000 a thawh belh a, hmun dang dang atanga tanpuina an dawn belh ten en Library sak pum nan hian Rs. 868000 /- sen a ni. Hnatlang tha 170 sen niin tunah hian lehkhabu chi hrang hrang 1804 lai a awm a, Librarian pahnih H.Lalrinawma leh Rozual ten an enkawl a ni. Vawiin YMA Library hawn inkhawm hi Pu Lalremliana, President, Library Committee in a kaihruai a, Technical Report Pu D.Lalthianghlima, Secretary, Library Committee-in pe in, Khualzahawm Pu Lalramliana, Mizoram State Librarian bakah Pu C.Lawmzuala, President, Mizoram Library Association leh Pu Lalzuiliana, President, Sub-Hqrs YMA Serchhip ten thu an sawi bakah tualchhung tlawmngai pawl hrang hrang MHIP, MUP aiawhte bakah School Zirtirtirtu thahnemtakin he hun hi an hmanpui a ni.