Serchhip Tuikhuah Venga Pu Biakthanga In a kangral vek

Tukin(8th May) zing dar 4:15am vel khan Serchhip Tuikhuah Veng a Pu S.Lalbiakthanga S/0 S.Lalpianga te chenna In chu bungraw engmah chuh hman lohvin a kangral vek a, a kawt a Two Wheeler Workshop pawh kangchhe vekin Two Wheeler 10 chuang zet a kangchhe vek bawk. Rang takin Fire Deptt. te koh nghal an ni a, mahse kangthelh motor pahnih hmanga kangmei chhuahna hmun an rawn thlen phei meuh chuan thelh rual lohvin a lo kang hman tawh a ni.Kangmei hi choka lam atanga rawn chhuak tan nia hriat a ni a, he thu ziahlai thleng hi chuan kangmei chhuahchhan hriat a la ni lova, kangmeiin a tihchhiat hi Rs.nuai 10 hu vel nia hriat a ni.

Kangmei hi Pu S.Lalbiakthanga fanu in hre hmasa berin a pa te a kaitho nghal a, mahse an han inkaihthawh fel meuh chuan an choka leh sitting room zawng zawng chu meialh leh meikhu in a lo khat vek tawh si a, tichuan Pu Biaka te pafa chuan an bang, kawngpui lam hnaih chu tile tikehin chuta tang chuan an chhuak ta ringawt mai a, an thawm hria a rawn tlanchhuah Pu Biaka nau Pu S.Lalrintluanga’n a rawn pui bawk a, bungrua chu sawiloh, mihring nunna pawh an inchhan hman hram a ni ber. Pu Biaka te hi an nupa bakah an fate 2 nen an cheng mek a, an inhnuai hi Pu Biaka Ni Pi Vanlalengi’n luah mekin a ni pawh a insaseng hman hram.
Vawiin chhun khan khawtlang mitlawmngai te tukthuan eikham veleh hnatlangin an thawkchhuak nghal a, DC Pu H.Darzika pawh rawn kal ve in Pu Biaka te hi tanpuina pawisa fai Rs.35,000/- leh hnatlang te thingpui lumna tur Rs.3000/- a pe a, Pi Vanlalengi hi Rs.10,000/- a pe bawk.
Kangmei chhuahna In thenawm chiah te hi RCC rel lai mek a nih avangin a kangchhe tam lo hlauhva, a lehlam Pi Vanlalfaki te In erawh chu a hliau nasa hman hle a, vanneihthlak takin an tukverh Frame bak kanchhiat a nei mumal lo hlauh. Pi Faki monu Pi Thanthuami erawh kangthelh tura a tui khaina lamah tlusualin a banruh veilam a titliak a, DC in Rs.7,000/- leh Mobile Van pe in vawiin la la khan Aizawl lamah phurhthlak nghal a ni.

Kangmei tuartu Pu S.Lalbiakthanga te hi Pu Hrangsata te chhungkua, Dinthar Veng chuan Rs.10,000/- an pe a, MIZOFED Manager thar Pu Lalrinthanga chuan Gas Connection thar, a thlawnin a pe dawn a, mimal leh pawl thahnem takin thilpek chihrang hrang an pe hlawm.