Serchhip Dist. a zirlaibu a thlawna sem tur vailiam

Tukin zing dar 9:30am khan SSA Mission, Serchhip District chuan kum danga tih thin angin kum 2011 academic session atana sorkar sikul leh sorkar puihnaa din sikul (Govt. & Govt. Aided Schools)-a zirlai, Pawl 1 atanga Pawl 8 zirlaite hnenah zirlaibu a thlawna sem tur Motor 7 a phurh chu Pu C. Lalthanzira, District Project Coordinator, SSA Mission, Serchhip District chuan Town Hall kawt atangin a vailiam.

DPC Pu Zira chuan thusawina hun tawi te neiin “Tun dinhmunah Supplier hnen atanga la dawn loh zirlaibu tlem ala awm avangin zirlaite hnena semchhuah tham an dawn chin zawngte semchhuah a ni” a ti a. Tuna la dawnloh te pawh dawn a nih veleh a rang thei ang bera sem a nih tur thu a sawi tel bawk.

A sawizelna ah Pu Zira chuan SSA Mission, Serchhip District chuan zirlaibute hi sikul tanni-a semchhuak nghal thei turin theih tawka lo inbuatsaih lawk a ni a ti a. Tin, zirlaiten an dawn tur ang angte a kim ngeia semchhuah an tum avangin a thlen kim hun an han nghak ren rawn a, amaherawhchu, supplier lamin sikul tan hmaa an phurh thlen kim hman tak loh avang leh vawiin ni thleng pawha dawnloh an la neih avangin an dawn ang angte zirlaite hnenah an semchhuak ta a ni tiin tuna la dawnloh te pawh an dawn thuai beisei a ni a, tuna semchhuah tak hmanga a remchan dan ang anga zirlai leh zirtirtu ten zirna an kalpui theih nghal a beisei thu a sawi tel bawk.