Naupang khuaikhem vangin Lungpho khawtlang lungawi lo

Serchhip : Kum 2010 Krismas leh Kumthar vuakvet lai khan Lungpho khuaa hmeichhe naupang kum tling lo pakhat chu ei tur leh nepnawi thil dang hmanga thlema khuaikhem fo-ah Lalengmawia s/o Lalhmingliana, Lungpho chu puh a ni a, hei vang hian Lungpho khawtlang chu an lungawilo hle nia hriat a ni. He thil thlen hunlai hi Krismas leh kumthar bawr vel lai a ni nain tunkar tir lamah khan hetiang thil hi a thleng a ni tih hriatchhuah a ni chauh va. He thil thlen thu hriat anih veleh naupang nu leh pate hi an rilru a na hle a, police lama report pawh an duh viau laiin an dinhmun harsat avangin an report mai ngam lova, an rilru a dam theih si loh avangin MHIP lamah an zualko ta a. MHIP te hian theihtawpa hmalakpui an intiam thu an sawi a, tin NGO lam te pawh an inhmukhawm tawh ni a hriat a ni a. Amaherawhchu engtin nge an kal zel dawn tih erawh an la hre mai thei rih lo niin kan thudawnna chuan a sawi. Lalengmawia hi a awmna chin hriat lohvin a bibo mek niin thu lakna chuan a sawi a. Tunhma pawhin naupang khuaikhem chungchangah rinhlelh a lo kai tawh thin niin an sawi. Hman deuhah pawh Primary School kal lai hmeichhe naupang pakhat chu a lo khuaikhem tawh bawk ni a sawi a ni a, hemi tum hian khawtlang hruaitute nen inberemin an ngaidam nia hriat a ni.