Zirtawpni, ni 14 dar 11:00 khan Serchhip DC Conference Hall-ah Serchhip District huam chhunga NLUP semna hun hmasa ber chu hman a ni a, Home Minister Pu R.Lalzirliana chu khuallian niin NLUP dawngtura thlanchhuahte zinga mi 30 hnenah NLUP sum hmahruai hi a hlan nghal bawk a ni.
Home Minister chuan NLUP hi miretheite leh kuthnathawktuten lei rem an rah ve theih nana ruahman anih thu sawiin, vawiin hi retheite leh kuthnathawktute chhanchhuahna programme intan lehna ni a nih avangin Mizoram Chief Minister Pu Lal Thanhawla chuan kum tin Mizoram puma hman tawh turin January ni 14 hi “Kuthnathawktute Chhanchhuahna Ni” atan a puang a, he ni hi kumtin Sawrkar ni pawimawh atan hman anih thin tawh tur thu a sawi bawk.Home Minister chuan NLUP hmang diklo te chungah Sawrkarin hremna khauh takin a lek kawh dawn a, hremna hlauh vang nilova, thahnemngaih vang leh mahni intodelh duhvang zawka tih takzeta thawk turin NLUP sum dawngtute chu a chah.
Serchhipah hian District Level NLUP Committee din anih bakah khawtinah Village-Level NLUP Committee din vek a ni a, Serchhip District chhungah hian MLA Constituency pathum – Serchhip, Tuikum leh Hrangturzo te awmin, NLUP sum dawng tur hian chhungkaw 13365 survey a ni a, heng zingah hian chhungkaw 10791 thlan niin kumin chhunga NLUP tanpuina dawng turin chhungkaw 2999 thlanchhuah leh an ni a, an zing atang hian chhungkaw 311-in vawiin NLUP sum hmasa hi an dawng a, an sum dawn hi chawhrualin Rs. 20000/- theuh a ni. NLUP sum dawngtura thlan tawh la dawng lo te pawh a tahtawlin pek zel tura ruahman a ni.
Nimina NLUP sem inkhawm hi Pu H.Darzika Serchhip DC-in a kaihruai a, Pu R.Selthuama, MLA, NLUP Implementing Board Chairman, Pu K.Lianzuala, Tuikum Bialtu MLA, MKVIB Chairman ni bawk leh Hrangturzo Constituency bialtu MLA Pu Lalthansanga ten thu an sawi a, Home Minister hi Pu Lalthansanga, Secretary, Finance Department, Pu Rosanga Colney, Director, Sericulture Deptt. leh sawrkar mipawimawh dang ten an tawiawm a ni.
No comments:
Post a Comment