lamkal

2012-01-24T04:49:00.000-08:00

SERCHHIP BAWRHSAP-IN A THLAWNA ZIRLAIBU SEM TUR VAI LIAM

Tukin(24.1.2012) zing dar 8:00 khan SSA Mission, Serchhip bultumin Serchhip Deputy Commissioner Office tualzawlah kum 2012 Academic session atan Serchhip District chhunga Class I atanga Class VIII zirlaite tan zirlaibu a thlawna sem tur thawn chhuahna inkhawm hman a ni a, District Bawrsap Pu. P.Lalchhuanga’n heng zirlaibu thawnchhuahte hi a vai liam (flag-off) a ni.

Zirlaibu thawnchhuah inkhawmah hian District Bawrhsap chuan India ram Danpui (Constitution) in zirlaite an lo puitlina chhawr tlaka an hlawhtlin theih nana ruahmanna a siam bawhzuina atana sawrkar laipuiin Right to Education Act a siam hi thil chhinchhiah tlak, a bik takin miretheite tana hlu tak anih thu a sawi a, a bik takin thingtlang lama zirlaibu lei tur a van mai bakah a leina tur pawisa neih a harsat thu leh amah ngei pawh hetiang harsatna lo hmachhawn ve tawh thin anih thu a sawi a, SSA hnuaia Cluster hrang hrang 12 (sawmpahnih) a Village Council 40 (sawmli) vel a zirlai naupang nu leh pa te lu tihaitu ber ni tur zirlaibu man harsatna a hun taka phuhruk anih theih nana District Project Coordinator, SSA Mission Serchhip District leh a thawhpuiten Sawrkar ruahmanna bawhzuia chak taka hma an la chu lawmawm a tih thu sawi bawkin, hei hian India rama ziak leh chhiar thiam tamna ber District an nihna a chhawm nun tir zel a beisei thu a sawi bawk. Serchhip District chhungah hian kum 2012 Academic Session atan Class I atanga Class VII zirlai naupang 9080 hnenah zirlaibu a thlawna semchhuah tura ruahman niin, hei hi kum hmasa (2011) enrolment behchhana siam a ni a, Right To Education Act a awm tak avangin zirlai pek tur hi hei aiin a la tam thei a, chutiang thil a awm anih chuan ruahmanna thar siam anih tur thu DPC, SSA Mission Pu C.Lalthanzira’n a sawi a ni.

Zirlaibu hi Serchhip District chhunga Government Primary School leh Government Middle School naupang daih tur sem niin, Government-Aided (Adhoc, Deficit leh Lumpsum) school ah te pawh sem a ni a, Serchhip District chhungah chuan Middle section chauh Adhoc-Aided Schhol a pawm a nih rih avangin Private School te chu pek a theih rih loh a ni. Zirlaibu man hi Sawrkar laipui ruahman dan chuan naupang pakhat tan Rs. 150/- zel ruahman a ni a, hei hian eng tham mah a daih loh avangin Aizawl a SSA hotu lian ten ngaihtuahna nasa tak senga ruahmanna chi hrang hrang siamin zirlaiten an quota pangngai aia tam zirlaibu an dawng kim thei dawn a ni. Tun dinhmunah chuan Class I leh Class V Mizo Tawng zirlaibu a la thleng hman lova hei pawh hi a thlen veleh thawnchhuah nghal tur anih thu leh a hun taka sem chhuah kim hman vek beisei anih thu DPC in a sawi a, Zirlaibu te hi khawtina Village Education Committee Secretary te hnenah dah a ni ang a, an nin hma la in an huamchhunga Sikul tinah an sem darh leh ang.

Tukin flag off programme ah hian Serchhip District chhunga CRC panga - North Vanlaiphai, Hmuntha, Lungpho, Chhingchhip leh Khumtung a zirlaibu sem tur te Motor panga in an phurchhuak a, chhun lamah Serchhip khawchhungah sem leh a ni bawk dawn a ni. Nimin (January ni 23, 2012) khan CRC sawm – Khawlailung, Chekawn, Piler, Sialsir, East Lungdar, Sailulak, Leng, Thenzawl, Buangpui leh Neihloh ah te a thlawna zirlaibu sem tur hi phurh chhuah a lo ni tawh bawk a ni. Tukin zirlaibu thawnchhuah inkhawm hi Pu C. Lalnunzira, District Project Coordinator, SSA Mission Serchhip District in a kaihruaia, District bawrhsap Pu P.Lalchhuanga leh Pi Lallianzuali Bawitlung, SDEO ten thusawi na hun an hmang a, Serchhip Primary School Teachers’ Association leh Serchhip Middle School Teachers’ Association hruaitute bakah thuthar lakhawmtute an tel tha hle a ni.

2012-01-17T04:39:00.000-08:00

Serchhip Darnam Vengah Road Roller in mi 1 chilhlum

Nizan, January ni 16 zan dar 8:30 vel khan Serchhip Darnam Vengah Road Roller in hnam dang mi pakhat a chil hlum. Kawng chil mamna motor, Road Roller in nizana a chil hi Jharkhan mi, Babulal Murmu kum 31 mi niin, PWD ten Mat phai zawlpui panna kawng alkatra an luannaa inhlawh a ni a. Roller hi a light a chhiat avangin torch light kengin Roller kawng entuah a tang a. Helai hmun an thlen lai hian kea kalin, torch light pawh hmet eng lova an kal chu Roller operator Rajesh Hemron kum 26 mi Jharkhan lam mi chuan a hma lamah a kal emaw a ti a, a sir lama Babulal-a kal chu Roller ke hnung lam hian inbarh lut palhin a lu a chil keh a, a chil lai hian aw a chhuah lova, operator hian a chil tih pawh a hriat loh avangin an bula kea kal pakhatin ding tura a auh hnua an din fel meuh chuan Babulal hi a lo thi fel hman tawh nia hriat a ni.

Babulal hian a lu a hliam na tak a tawrh bakah a khup ding lam a tliak a, a taksa leh a banah hliam pilh a awm nual bawk, Nizan khan amah awmpui thintu New Serchhip College road a Pu C.Lalsawmliana inah lumen a ni a, vawiin khan JN Hospital-a postmortem a nih hnuah Presby terian New Serchhip Pastor, Rev Lalhmachhuana’n a vui liam. Babulal hi PWD ten Zawlpui kawng metal hna an thawhnaah a thian te nen Theka-a kawng luan hna thawkin an zo fel tawh a, an rawn haw chhuak chu vanduaina hi an tawk ta a ni. He thil thleng an hriat ve leh Serchhip Police te pawh a hmunah kal nghalin thil tul ang ang an buaipui a, Serchhip Police station ah thubuai Case no 4 of 2012 Dt 16/1/12 Under section 279/304A IPC RW 181 MV Act an ziak lut nghal.

2012-01-13T04:26:00.000-08:00

SERCHHIP-AH LARSAP HMUAH DAN TUR NGAIHTUAH

January ni 17 (Thawhlehni) a Serchhip tlawh tur Mizoram Larsap Pu Vakkom Purushothaman hmuah dan tur leh lo dawnsawn dan tur ngaihtuahin vawiin chhun khan Serchhip D.C’s Meeting Room-ah District bawrhsap Pu P. Lalchhuanga hovin Serchhip-a Sawrkar Department hrang hrang hotute leh Tlawmngai Pawl hrang hrang hruaitute an thukhawm. Vawiin District bawrhsap hova thurel ah chuan venhimna lam uluk leh zual anih theih nan Larsap hi 14 Assam Rifles ten an lo mikhual ang a, tlai dar 4:00 ah 14 Assam Rifles Auditorium ah Larsap lawmna inkhawm buatsaih tur niin heath hian Serchhip-a sawrkar hnathawk sawm bikte, Tlawmngai pawl hrang hrang aiawhte leh Kohhran hrang hrang aiawhte, thuthar thehdarhtute leh sawm bik mithenkhatte an tel anga, District Bawrhsapin Serchhip District chanchin sawiin hun a hmang ang a, Serchhip Sub-Headquarters YMA Cultural Troup ten hnam lam hmuhnawm tak an entir bakah zaithiam sawm bikte an zai ang. Larsap pual hian 14 AR Commandant Col. Ratnakar Trivedi chuan zanriah a buatsaih bawk ang. Larsap hmuahna inkhawm hi Local Cable TV ten mipui thlir theih turin an pe chhuak ang.

Larsap hi a nupui Dr. Lily Purushothaman, Pu K. Lalnghinglova IAS Secretary to Governor leh Pu Robert Lalchhuana, Editor Romei Daily Newspaper ten an tawiawm ang. Ruahman lawk dan chuan Larsap hian January ni 17 chhun dar 12:15 ah Thenzawl lutin amah lawmna inkhawm buatsaihah a tel ang a, hemi hnu hian Thenzawla Handloom Centre thlan bikte tlawh kualin an hnathawh dante a hmunah a en ang. Tlai dar 3:30 ah Serchhip lutin zan a riak ang. January ni 18(Nilaini) zingah Serchhip chhuahsanin Baktawng a Pu Ziona leh a chhungte a tlawh ang a, Thingsul Tlangnuam a 24 Task Force, Project Pushpak Headquarter-ah chhun chaw fakin hemi hnu hian Aizawl panin a haw ang.

2012-01-12T04:20:00.000-08:00

DoNER Minister-in tun thlenga Referral Hospital
a taka hman theih a la ni lo chu pawi a ti

Serchhip 12th Jan. 2012 : Zan khat riaka Mizoram rawn tlawhtu,Ministry of Development of North Eastern Region (DoNER) changtu Union Minister of State Pu Paban Singh Ghatowar chuan nimin khan Mualpuia Rajiv Gandhi Stadium sak mek leh Falkawn a State Referral Hospital a tlawh.
DoNER Minister chuan Mualpuia Rajiv Gandhi Stadium sak mek chu a hmuna enin hna kal dan tha a tih thu leh a hun takah an zawh ngei a beisei thu a sawi a, peihfel a nih hun chuan hmarchhak State zinga Stadium tha ber a ni ang, a ti. Union Minister hian Pitarte tlanga Indoor Stadium pawh tlawhin tha taka sak a ni chu lawmawm a tih thu a sawi bawk.
Falkawna State Referral Hospital pawh a hmunah tlawhin DoNER Minister hian tun thlenga Hospital a taka hman theih a la nilo chu pawi a tih thu a sawi a. Mipui ten a tangkai thei ang berin hmang thuai se a duh thu sawiin, Hospital hi a taka hman a nih thuai theih nan sum mamawh engemawzat pek a inhuam thu leh Health Minister Pu Lalrinliana Sailo hnenah a tul anga bawhzuia Detailed Project Report thehlut tura a hriattir tawh thu a sawi.
Pu Paban Singh Ghatowar chuan DoNER Ministry chu Finance Ministry in guidelines a siamsak hnuaia kal, hmarchhak State 8 enkawl tura tih an nih hre reng chungin an sum neih atanga Mizoram hmasawnna tura theihtawp chhuah pui a inhuam thu a sawi a. NEC Chairman ni bawk Pu Paban hian Mizoram chu remna leh muanna Mizoramin a chawinun tlat avanga chhuanawm a tih thu leh duhsak tlak nia a hriatthu sawiin Arunachal Pradesh dawtah chuan hmar chhak State zinga NEC atanga sum hmu hnem ber an nih thu a tarlang bawk.

2012-01-09T05:13:00.000-08:00

Tun Thal chhung hian kawngpui siamthat tum a ni
Tuirial leh Serchhip inkar erawh siam hman a beiseiawm loh

PWD changtu Parliamentary Secretary Pu Lalthanzara chuan Mizorama kawngpuite tun Thal chhunga siamtha turin chak taka hmalak mek a ni a ti.
Pu Lalthanzara chuan National Highway ngaih pawimawh hmasak a nih thu sawiin, Silchar ramri atanga Aizawl inkar kawng chu double lane-a siam mek a nih thu leh he kawng siam hna hi nakuma zawh hman tum a nih thu a sawi a. Lengpui atanga Tripura inkara NH-44A chu kum 2014 a siam zawh tura tih niin, Bairabi atanga Bilkhawthlir inkar NH-154 pawh kum 2014-a double lane-a siam zawh tura ruahman a ni a. Seling Zero point atanga Tipaimuk NH-150 pawh double lane a siam turin DPR siam mek a ni a ti bawk.
Hetihlai hian Aizawl atanga Tuirial inkar chu tun thal chhunga siam that hman turin hna thawh mek a nih thu PWD hotu ten an sawi a.Tuirial atanga Serchhip inkar erawh a hma atanga harsatna chi hrang hrang awm tawh avangin sanction thar nghah leh mek a ni a.Serchhip atanga Hrangchalkawn inkar pawh thal chhunga zo turin ruahman a ni a. Hrangchalkawn atanga Tuipang inkar erawh hna a hautak avangin zawh hman an inring lo deuh tih an sawi bawk.
Tun dinhmunah Mizoram hmun hrang hrang kawngpuite hi zawh tlak hmang loh khawpin a chhe tawh a ni.

Serchhip District-ah Voters 43034 an awm

2012-01-08T00:19:00.000-08:00

Election Commission thu anga Mizoram hmundangte ruala Photo Electoral Roll siam thara a landan chuan Serchhip District-ah Vote nei Mipa 21,256 leh hmeichia 21,778, an vaiin 43,034 an awm a, Mipa aia hmeichhia an tam zawkna hi vote 522 a ni.

Serchhip District chhungah Assembly bial 3 awmin Hrangturzo bial chu vote nei thei tamna ber niin vote nei mipa 7172 leh hmeichia 7260, an vaiin 14,432 an awm a, Serchhip bialah Vote nei Mipa 7075 leh hmeichhia 7456, an vaiin 14531 an awm a, Tuikum Assembly Constituency-ah vote nei mipa 7009 leh hmeichhia 7062, an vaiin 14,071 an awm thung a, Serchhip District chhunga Electoral Roll-a awm zawng zawngte chuan EPIC hi an nei vek bawk a ni.

Vote nei thei tlem berna Polling Station chu Buhkangkawn niin, Vote nei mi 58 an awm a ni.

Baktawnga pitar kum 66 mi pawngsuala thah a ni

2011-12-06T04:06:00.000-08:00

Pi Ralliantawni (Pi Tawni) kum 66 mi chu nizan (Dec 5) dar 8:10 vel khan a chenna ina ama khumah thiin hmuh a ni. Pi Tawni hi chempuiin a nghawngah nasa taka zai niin a langa a khum lu bulah chempui thi kai hnuang mai chu hmuh a ni a, fel takin rizai a sin thlap lawi si niin a ruang mita hmutu te chuan an sawi.

Pi Tawni hi pitar hlimthei leh fiamthu duh tak a ni a, pitar sa pan lam tiang nena kal kheu kheu thin a ni. Khawsak harsa tak a ni a, YMA leh VC te pawn theih ang anga an tanpui thin a ni. Amah chauhin a khawsa thina thlakhat vel liamta atang khan a fanu Lalramnghaki Hualtu-a pasal nei, let leh te nen an cheng ho-a, Nghaki hian fapa kum 3 mi vel a nei niin thudawnna chuan a sawi. Nizan thimhlim khan Nghaki leh a fapa te hian an kawmchhak lawka an chhungte inah chanchinthar ngaithlain an leng chhova, dar 8:10 vela an hawng chuan khum chunga a nu nghawng chhum lek lek ruang chu an hmu ta mai a ni.

Tualthihna rapthlak tak a thleng tih hriat a nih veleh a hria apiang an tlan khawm nghal a, Serchhip Police hriattir nghal a ni. Thil awmdan en hian Pi Tawni hi amaha in zai nitheiin a lang lova, mi kut tuar ngei ni a a lan avangin khawtlang hruitute chuan rinhlelhawm thei tur te an dap nghal a, tlangval pakhat chuan thimhlimah Pi Tawni in bul velah hian Zothanpuia (Puia ti a koh thin) chu a hmuh thu a sawi a, Puia hian a kalloh thu a sawi bawk si..an thu a inkalh tlat avangin an rilru a buai hman viau a ni. Khawtlang hruaitu te chuan hmaichhana in chaltuah tir mai te pawh an rawt hman deuh rum rum tih VCP Pu Tawnvela chuan min hrilh. Hei bakah hian Pi Tawni fanu Nghaki te leng hawng tur hian Zothanpuia hi an inlam atanga a rawnkal an tawk bawk a, Puia chuan zamna nei miahlovin an ina len a tum thu te a sawi niin hriat a ni bawk. Puia hi ruang buaipui leh mitthi ina chet velna ah pawh a phur phurah atanga a awmdan atang chuan rinhlelh har takin a awm niin thudawnna chuan a sawi.

Serchhip Police an rawn thlenga, ruang awmdan uluk taka an enfiah hnuah zing dar 3 velah Pi Tawni ruang chu Postmortem turin Serchhip lam an panpui ta a, hetah hian Pi Tawni te in bula thimhlima Puia hmutu leh amah Puia hi Police te chuan an hruai phei tel ta a, Serchhip an thlen hnuah Police Stationah rei pawh an awm hmain Zothanpuia hian a pawngsual hnuah midang hnena sawi a tum avangin a thah tak mai thu a sawi niin thudawnna chuan a sawi.

Tlangval Zothanpuia kum 25 mi hi Zohmun khua niin kum 3 vel chu Baktawngah hian miinah a awm ve tawh thin a, a awmna te hian a nungchang thalo avangin an in atanga chhuak turin an ti a, Aizawl lamah chhuk thlain thla khat vel liamta atang khan Baktawngah hian a let leh a, thiantha te belin a awm kual vel mai mai niin Baktawng VCP Pu Tawnvela chuan min hrilh.

Pi Tawni in hian kawng a hnaih deuh bakah sak that te a ngai tawh a, VC ten’ a in hi sak that a sawn hret an tum mek lai a ni a, Pi Tawni pawh hian chu chu a nghakhlel em em thina hetiang thil rapthlak tak a chunga a thleng ta mai hi hriatthiam har an ti a, khawtlang rilru a na takzet niin VCP hian a sawi bawk.

2011-12-02T04:10:00.000-08:00

SERCHHIP-AH SSA MISSION BULTUMIN ZIRLAI NAUPANG RILRU LEH TAKSA A HARSATNA NEI TE ZAWNCHHUAH BEIHPUI THLAK

Vawiin atang hian ni hnih awh tur, zirlai naupang, rilru leh taksa a harsatna neite zawnchhuah beihpui/ Assessment Camp for Children With Special needs (CWSN) 2011 chu Presbyterian School Annexe Serchhip AOC Veng-ah SSA Mission, Serchhip District bul tumin neih a ni a, he Assessment Camp-ah hian Presbyterian Hospital Durtlanga Specialist Doctor 3 leh anmahni puibawmtu thawktu dang 7 ten naupangte hi an en a ni.

Assesment Camp hawnna inkhawm buatsaih ah Pu C. Lalnunzira DPC, SSA Mission Serchhip District chuan Assessment Camp buatsaih anih chhan leh a tumte a sawifiah a, naupangten rilru leh taksa a harsatna an neih, a thente phei chu anmahni pawhin an hriat lem lohte zawnchhuah a, tluang taka an zirna chhunzawm thei tura puih leh chhawmdawl chu a tum ber pakhat a ni tih thu a sawi bawk.

Tuntum Assessment Camp-ah hian naupang entir mamawh chhinchhiah tawh (Identified Children) 500 aia tlemlo in entir tura beisei an ni.-DIPR

2011-11-29T05:12:00.001-08:00

SERCHHIP AH PARAGLIDING FESTIVAL CUM SPOT LANDING COMPETITION

Vawiin chhun khan Mizorama a vawikhatna atan Serchhip leh Keitum inkar “Chuanhnuai” ah Paragliding Festival leh Spot Landing Competition neih a ni a, Pi B.Sairengpuii, Tourism Secretary chuan he Festival hi a hawng a ni.

Pi B.Sairengpuii chuan paragliding chu mite ngaihsan leh nuamtih, sum hailuhna tha bawk si a ni tih sawiin Adventure Sport hi khualzin hipna atana hmanraw tha tak anih bakah Mizo thalaite telna chi tak anih bawk avangin Mizoram sawrkar pawhin a ngaipawimawh a Adventure Tourism leh Aerosport tihhmasawn nan theihtawp a chhuah mek ani tih sawiin Mizoram ah ngei Aerosport training Institute din tuma hma lak mek anih thu leh hemi atan hian Sawrkar laipui pawhin pawisa pek a inhuam thu a sawi bawk a ni.

Serchhip District Bawrhsap Pu P.Lalchhuanga pawhin India ram chhung leh rampawn hmun hrang hrang atanga he intihsiakna a rawn tel te chu lo lawmin Serchhip District chu Mizoram chhunga hmasawn chak ber District te zing ami a nih thu a sawi a, Paragliding Competition Serchhip District chhunga nghah ani chu lawmawm tiin hun dangah pawh Serchhip hi hetiang atan hian a inhawng reng ani tih thu a sawi bawk. Paragliding Festival and Spot Landing Competition ah hian mi 38 telin Sweden atangin pilot 1, Nepal atangin pilot 18, Sikkim atangin pilot 10, Mizoram atangin pilot 6, Himachal Pradesh atangin Pilot 2 leh Maharashtra atangin pilot 1 an rawn tel a ni.

Spot Landing Competition hi nithum awh tur niin nimin atang intihsiakna hi tan a ni a, vawiin ah zo felin naktukah Aizawlah lawman semna inkhawm chu neih a ni ang. Spot Landing Competition a tel te hian Serchhip leh Keitum inkar “Chuanhnuai” kham atanga Parachute hmanga thlawk thla in Zawlpui phai ah an tum thla a, an tumna tura siam metre 5 rinbial chhungah tum dik tumin an in el a ni. Vawiin Competition tan hma hian Pi B.Sairengpuii, Secretary Tourism Department, Pi Zosangi, Deputy Director, Tourism Department leh Pi K.Vanlalruati, SDO(Sadar), Serchhip te chu Parachute hmang hian pilot ten Chuanhnuai atanga Zawlpui phai thleng an thlawh pui a ni.

He Festival cum Competition hi Mizoram Tourism Detartment leh 3 Dimension leh Mizoram Aerosport Association tang ho buatsaih niin Serchhip VC-II hotuten an lo puibawm a, mipuiten an hlutin vawiin pawh hian zirlai naupang thahnem takin an telpui bawk a ni.

Vawiin Festival hawnna inkhawmah hian Tourism Secretary Pi B.Sairengpuii, Pu P.Lalchhuanga, Serchhip DC, Pu A.S Chima, AIG-III, Pu Milind Dumbere, S.P. Serchhip bakah District chhunga mipawimawh thahnemtak an tel a ni.-DIPRO

Pune Mizo te inkhawmna Biak in a kang, bungrua kangral vek

2011-11-28T03:05:00.000-08:00

Tukin zing dar 7:30 vel khan Pune Mizo Chhistian Fellowship te inkhawm thin na Biak in Hindustani Covenant Church, Solapur Road chu bungraw engmah chuh hman lohvin a kangral vek a, PMCF bungrua biak ina riah ho chu a kangral vek.

PMCF bungraw kangra hi Rs. 1.5 lakhs man hu vel nia chhut a ni a, bungraw liantham deuh te chu hriat theih chinah: Steel Almirah, Mixer, Amplifier, Sound Box, Keyboard, Electronic Drum set, Microphone and cables, Bible leh hla bu etc. te an ni.

Hindustani Covenant Church ah hian PMCF te hian 2003 atang khan inkhawmna kan nei thin a, member tam lai berin sang chuang te niin tunah hian member 250 vel kan awm mek a ni.

Biak in kan chhan hi Electric shortage vang nia hriat a ni a, nizan khan Biak in chawkidar hi Biak inah hian a riak a, tukin zing a haw hnu ah Biak in hi a kang ta a ni. Electric short vanga kangral nia ngaih mah ni se tam tak chuan minute 15 chhunga meipuiin a tuam hman vek danah hian mi tam tak chuan ngaihdan siam thiam har an ti hle. Pune Christian hruaitu (Pune diocess Bishop pawh) leh biak ina lawi Christian te vawiin khan biak inah hian an kal khawm bawk a ni.- Lawrkhawm

2011-11-25T05:35:00.000-08:00

SERCHHIP DISTRICT ANTI-TOBACCO SQUAD LEH TASK FORCE JOINT MEETING NEIH A NI

Vawiin chawhma dar 11 khan Serchhip DC Office Meeting Room-ah Serchhip District Anti-Tobacco Squad leh Task Force Joint meeting neih a ni a, meeting hi Dr. Jane R. Ralte, State Nodal Officer-cum-Project Officer, Mizoram State Tobacco Control Society chuan telpuiin Cigarettes and Other Tobacco Products (Prohibition of Advertisement and Regulation of Trade and Commerce, Production, Supply and Distribution) Act, 2003 (COTPA Act) chungchangah sawrkarin amendment a siam tharte leh thil tul dangte sawifiahna hun a hmang a ni.

Dr. Jane.R.Ralte chuan zirchianna an neih ah Serchhip khawchhunga vaihlo leh a kaihhnawih hmang an tlem sawt zia thu sawi langin he hmasawnna atana Serchhip District Anti-Tobacco Squad te tan lakna leh thahnemngaihna chu lawmawm a tih thu a sawilang a, nasa lehzuala tan la turin kalkhawmte a sawm a, Anti-Tobacco Squad ten harsatna an tawh thin te sawilangin, a bik takin meizu leh vaihlo hmang ho an vai thin naah police te tel ve ziah thei thin se ti a an rawtna chu Dr. Jane-i hian Serchhip S.P. Pu Milind Dumbere, IPS hnenah a thlen nghal a, S.P. pawhin theihtawp chhuah a hmalak zui nghal anih tur thu a sawi a ni.

Vawiin meetingah hian Serchhip District chhunga COTPA dan kenkawh leh hmalak zel dan tur thil pawimawh tak tak sawiho a ni a, Task Force pawh mumal taka hnathawk thei tura ruahmanna te siam niin Anti Tobacco Squad pawhin ngawrh leh zuala Anti-Tobacco drive neih tumin inrinni apianga thawkchhuak turin tan an la thar dawn a ni.Vawiin Meeting hi Dr. Malsawma, CMO, Serchhip District in kaihruaiin, Pu Milind Dumbere IPS, S.P. Serchhip, Pu Lalfakzuala Additional DC, Pi K.Vanlalruati SDO (Sadar) bakah Anti-Tobacco Squad member thahnem tak an tel a ni.-dipr

2011-11-25T05:34:00.000-08:00

SERCHHIP AH JSSK MEDICAL SPELLING BEE NEIH A NI DAWN

Vawiin chawhnu dar 1 khan Serchhip Chief Medical Officer Conference Hall-ah February ni 20, 2012 atanga Marchi ni 30, 2012 thleng neih tur “JSSK Medical Spelling Bee 2012” khuh hawnna neih a ni a, hetah hian intihsiakna neih anih chhan leh intihsiak dan tur kalphungte sawifiah anih bakah intihsiakna a hman tur Medical Vocabularies & Abbreviations tih bu Dr. Malsawma, CMO buatsaih chu tlangzarh a ni.

He intihsiakna hi Sawrkar Laipuiin Nu leh nausen hriselna tihthat lehzual na tur atana ruahmanna a siam Janani-Shishu Suraksha Karyakam inzirtirna leh zirlaite medical course lama awareness an neih belh theihna tur atana ruahman a ni a, he intihsiakna hi Serchhip District chhunga Middle School leh High School zirlaite tana tih niin School hrang hrang inelna a ni ang.

Intihsiak hi Category hnih – Middle School (Category I) leh High School (Category II) ah then a ni a, intihsiakna atana sum senso zawng zawng hi CMO Serchhip in a tum dawn a ni. He intihsiakna hi CMO Serchhip, Serchhip Sub Headquarters Mizoram Secondary School Teachers’ Association leh Middle School Teachers’ Association tang hovin an buatsaih dawn a ni. Intihsiaknaah hian Zawhna chihnih Vocabulary leh Abbreviations ah te in el ani ang a, Vocabulary hian 80% marks pu in Abbreviations hian 20% marks a pu dawn ani.

Intihsiakna a tel tum school te chuan December ni 8, 2011 ral hma in CMO hnenah in report tur a ni a, December ni 15, 2011 ral hmain tel tumte hnenah an inbuatsaihna tur lehkhabu semchhuah a ni ang a, Final Round Top 20 leh Top 10-a Serchhip khaw pawn atanga tel zirlaite leh anmahni kaihruaitu zirtirtute chu an khua atanga Serchhip kal leh hawna Suma fare tum sak an ni dawn bawk a ni.

Vawiin inkhawm hi Pu P.C. Kapliana, Vice-President, MISSTA Sub-Headquarters in a kaihruai a, Dr. Malsawma,CMO in intihsiakna buatsaih anih chhan sawiin Pu S.Lalrintluanga, Secretary, Organising Committee in intihsiakna kalphung a sawi fiah bawk a ni.-DIPR

Tualchhung

2011-11-25T05:31:00.000-08:00

Zirtirtute hun hmanpui
Nimin khan DIET-ah District chhung High School Headmaster-te koh khawm niin, zirna kalphung thar hman chungchanga an hriat duh leh sawi duhte inhrilh hriatna hun an hmang a. He hun hi DEO Pu C.Zolawma leh zirna lama Dist. thuneitu dang ten an hmanpui a ni. Vawiin hian Middle School Head-te pualin hun hman leh a ni ang.

Kohhran hmeichhe Ni
Vawiin hi Presbyterian Kohhran Hmeichhe Ni niin, Kohhran hrang hrang ten he Ni pual hian hun hmangin, chawhma lamah Pathian biak inkhawm neiin, chawhnu lamah member -te intihhlimna hun an hmang dawn a. Kohhran thenkhat chuan ruaite pawh an buatsaih dawn.

TKP Bial inkhawmpui
Zanin atang hian New Serchhip Baptist Kohhran Biak In-ah Serchhip Bial TKP inkhawmpui neih tan a ni dawn a, he inkhawmpui-ah hian Rev. J.Lalduhawma, Serchhip Bialtu Pastor chu Speaker a ni ang a, zaithiam lâr, Rosy K.Remsangpuii leh Lalfakkimi-ten he hunah hian zaia rawngbawlna an nei bawk ang.

AIDS Awareness campaign
Gov’t. Serchhip College-a Red Ribbon Club te chuan Thawhtanni khan an College Zirlaite zingah Aids Awarness Campaign neiin, hetah hian zirlai zingah nulat tlangval laia Sex hmang lo tura intiamna Signature Campaign an kalpui nghal a ni.

2011-11-21T03:14:00.000-08:00

SERCHHIP-AH BAWRHSAP HOVIN HUNPUI LO THLENG TUR THLIR LAWK

Vawiin hian Serchhip DC Conference Hall-ah Serchhip District Bawrhsap Pu P.Lalchhuanga kaihhruainain District chhunga Department hrang hrang aiawhte, NGO/Tlawmngai Pawl hrang hrang aiawhte, V.C aiawhte leh media aiawh ten kum 2011 hunpui “Krismas leh Kumthar” lo thleng tur mipuiten hlim tak leh thlamuang taka an hman theihna tur atana hma lak dan tur ngaihtuahin an thukhawm.

Bawrhsap chuan Krismas leh Kumthar hlimawm tak leh muanawm tak hman a pawimawh thu a sawi a, mi chi hrang hrang ten hunpui lo thleng tur hman kan tum dan a in an loh thin avangin midangte tana hnawksak leh khawtlang tana hnawksak a che an awm loh nan theihtawp chhuah a tul thu a sawi a, mipuite him zawk nan sawrkarin khapna thupek (Prohibitory) order chi hrang hrang – Ran Khuahkhirh, Ruihtheih thil (MLTP Act) te bakah November ni 3 atanga hman tan tur thla hnih chhung awh Puakthei (Halpuah leh a kaihhnawih) hal, zawrh leh hralh khapna thupek tihchhuah anih tawh thu te, dan zawmlo te chunga dan anga hma lak anih tur thu te a sawi a, heng zawng zawng hlawhtlinna atana tanrual a pawimawh zia a sawi bawk.

Hmalakna tura ruahman chi hrang hrang sawi ho a ni a, Excise &Narcotics Department chuan December ni 15 atanga tanin Special Drive an nei dawn a, ngawrh leh zuala ruihhlo zuar leh zu zuarte dapin, zurui/nam te pawh dimdawih an nih dawn loh thu sawi a ni a, veng tinah YMA duty post siam a ngawrh taka duty tur niin YMA duty te hian khawtual an fan thin dawn bakah Police leh Excise&Narcotics ten mobile patrol ngawrh takin an nei reng dawn bawk a ni.

Halphuah leh a kaihhnawih chungchanga sawrkarin khapna thupek a lo chhuah tawh chu tha leh zuala zawm anih theih nan mipuite hnenah ngenna (appeal letter) sem tura ruahman a ni a, in tinah he lehkha hi thleng tura ruahmanna siam a ni bawk. Kawngpui dunga lirthei intlansiak leh motor/bike silencer-a proton vuah a ring tak taka tlan pawh khap niin dan bawhchhiate na taka hrem an nih tur thu sawi a ni bawk a, Krismas hma ngeiin “Talk Show” buatsaiha, mipuiten dan leh hrai chungchangte, faina chungchangte leh thilpawimawh hrang hrang sawiho tur niin, he talk show ah hian mipuite tel ve theihna turin ruahmanna siam a ni dawn bawk a ni.

Hunpui lo thleng tur atan faina ngaihpawimawh niin, V.C tina Village-level Sanitation Squad din tura tih niin, la din lo te pawh a rang lama din tur leh hma la thuai thuai tura hrilh an ni a, Pu S.T. Lalhmingmawia, DLAO/Sanitation Officer-in faina chungchanga ruahmanna siam leh hmalak zel dan tur a sawifiah a, Pu T. Lalhmachhuana Judicial Magistrate pawhin Prohibitory Orders sawrkarin a tihchhuahte sawifiahin zawhna te a chhang nghal bawk a ni.-DIPR

2011-11-17T03:28:00.000-08:00

Mizoramin Sum Harsatna a tawk mek?

October thla tawp (25/10) a RBI a Mizoram sum awm zat chu Cheng vbc 250.75 chauh a ni a, November thla laihawl kan thleng leh tawh a, tunah tak hian cash balance eng zat tak awm ang maw?

September 14,2011 a Fin. minister ho a Finance dept. leh Planning dept. officer lawkho meeting -ah Mizoram sorkarin kumin chhunga chhiah leh thil dang atanga sum a thawhchhuah ve tur Cheng vbc 79.30 chu nasa taka a phak loh tur thu sawi chhuah a ni a. Sum hmuh tur ang hmuh tlin theih a nih dawn loh avang hian kum thar Annual Plan tur pawh hi chumi (revenue collection deficit) mil a tihtlem mai a tul thu pawh an sawi lang bawk.

Minister-te hian an department chan theuh te Revenue collection chungchangah hmalakpuiin lo monitor uluk leh zual se tha an tih thu Finance minister hoa officer-ho meeting hian an sawi lang bawk. Sum indaih lohna nasa tak sorkarin a tawh mek lai hian kumina Power leina atana sum mamawh belh ringawt pawh hi Cheng vbc 9558.53 lai a tling!

Sorkar hnathawk nghet leh nghet lo zingah hian Plan sum atanga hlawh la tam tak an awm a, an hlawh belhkhawm hi kum khatah Cheng vbc 400 vel zet a ni a. Tunah hian december thla hlawh la thei lo an awm ang tih hlauin sorkar hotu lu thenkhat lu a hai hle.. Krismas a lo thleng dawn hnai si a. Plan sum atanga hlawh la thenkhat chuan October thla atang khan hlawh an la tawh lo. Hetihlai hian tunah hian plan sum atanga hlawh pek tur hi Cheng vbc 80 vel zet a ngai bawk si a, heti zozai hi khawi atanga pawhkhawm tur nge ni ang le??

Tunah hian sorkarah bill tang/bill pek theih, sum harsatna vanga pek loh tam tak a awm bakah sorkar hnathawkte DA Arrear leh DA pung pek loh a la awm bawk..heng zawng zawng hi pek ni ta se Mizoram sum bawm a ruak nghal vek ang a, chu pawh chuan a daih lo ang a, bat belh teuh a ngai hial ang.

Hetianga financial crisis tawk mek hi state dang pawh an awm nual tho a, a chhan erawh a inang vek lo thung..engpawhnise, sorkar chak tak hian hma a la zel turah ngai ang aw..

NB : state sum thawhchhuah tur zat mila state annual plan hi siam thin tur a ni a, mahse keini sum thawhchhuah mil hian siam ve ta sela chuan Cheng vbc 800-1000 vel chauh a ni dawn a, plan sum tihtlem hi politician-ten an ngam loh avangin kumtin an nawr pung zel a, a punna chhan hi leiba leh a pung awma puk vang a ni thin a, chu chuan liability/debt a ti tam zual zel thin..Annual plan sum pung hi politics a hlawhtlinna tehfung pakhata ngaih a nih miau avangin tu sorkar mahin tihtlem an erawh ngam ngai lo...Source: lawrkhawm.com

Tualchhung

2011-11-16T04:12:00.000-08:00

MHIP-te an zin dawn
14 Assam Rifles bultumin P&E Veng Branch MHIP te chuan Rih dil leh a chheh vel an fang dawn a. Tukin dar 8 hian Assam Rifle camp chhungah zinchhuak turte thlahna hun hman a ni dawn.

Seminar on ICDS
Vawiin hian Hmar Veng YMA Hall-ah Project level seminar on ICDS neih a ni dawn a, Dist.Bawrhsapin khuallian niin a hmanpui ang.

Childrens Day hmang
Nimin khan Little Flower Convent School ten Childrens Day hlimawm takin an hmang a. He hunah hian naupang ten an thiam thil chi hrang hrang an entir bakah lawmman te sem an ni.

Chhim Veng pakhatna
Inter-Branch YMA Quiz competition nizan hmasaa neih zawh takah Serchhip Chhim Veng YMA Branch 1-na an ni.

2011-11-13T04:16:00.000-08:00

Champhai-ah Grape chingtute leh Excise inep;
November ni 17 thleng nghak leh dawn

Champhai grape Grower Society chuan Tlangsam WInery atanga an siam chhuah Zawlaidi chu nimin chawhma dar 11 atang khan a bottle-a insem vek an tum a, hetihlai hian Excise Deptt. chuan Zawlaidi hi Winery atanga lakchhuah a nih chuan Dan anga man zel an tum avangin boruak a tang hman hle a, Champhai DC leh SP te an inrawlh hnu-ah Grape Growers lam hian November ni 17 thleng sorkar ngaihchan leh an remti nia thu dawn a ni.

Mizoram sorkar, Excise Deptt. chuan kumina Zawlaidi man thar atan, Winery atanga pekchhuahna chu Bottle khat Rs. 110.52 ni turin a bituk a, hei hi Grape chingtute chuan a hniam lutuk, tiin nikuma a rate pangngai, bottle khat Rs.133 tal ni leh turin sokar an ngen a, sorkar bituk anga an hralh chuan loan an lakna, a pung pawh an rul thei dawn lo niin an sawi. Hei bakah hian, thil man a pun zel laia Zawlaidi man tihhniam a ni chu kuthnathawktute rahbehna-ah an ngaih thu an sawi bawk.

Zawlaidi hralhna rate tur chungchang ngaihtuah hian October ni 27 khan Venglai Community Hall-ah Grape chingtute an inkokhawm a, heta kalkhawmte hian sorkar hnenah ngenna thlen leh phawt nise tiin, November ni 10 thleng an ngaichang a, hun an tiam chhung hian sorkarin thuthar engmah a neih tak loh avangin November ni 8 khan Grape Grower Society OB te chu inhmukhawmin, nimin chawhma dar 11 khan Grpae an lakna leiba chu Grape chingtute hnenah a pawisa ni lovin, a bottle-in an insem an tum a, Excise lamin gate leh Winery an kalh a, rei vak lo an innawr hman a ni.
Hetianga boruak a lum chhoh deuh takah hian DC leh SP te chuan Grape Growers te chu vawikhat tal sorkar dawr leh turin an ngen a. Excise Minister-in inbiak leh a remtih bawk avangin November ni 17 thleng sorkar ngaichang leh turin, zawlaidi bottle-a insem an tum chu an titlang ta lo a ni, thudawnna chuan a ti.

Excise lam chuan Zawlaidi hi Excise Deptt. in a control a ni a, dan hnuaiah chauh hralh theih a ni, a ti a. Dan lova Winery atanga an lakchhuak a nih chuan dan anga man nghal zel a ngai dawn tih sawiin, Zawlaidi man hi hmanni lawkah tihdanglam a ni a, tunah mai chuan sorkar tan tihdanglam leh mai theih a ni tawh lo a ni, a ti a. Grape chingtuten an phalna zat Kg.ah Rs. 33 in an pe a, hei hi a taka kuthnathawktute chan chu a ni, an ti bawk.

Thudawnna sawi danin, Grape chingtute dinhmun hi a tha tawh lo hle nia hriat a ni a, kum 5 chhung kumtin loan rulhna Rs.35,20,000/- an pek a ngai a, winery-a tanky siamna man Rs.14,60,000/- leh grape man ba cheng nuai 54 leh hlawhfa rawihna thlatin Rs.84,000/- vel sen a ngai ziah thin bawk. Tunah hian sorkarin zawlaidi man a tihtlawmsak avangin case 2,000 (case 1-ah bottle 12) vel chu hralh lohin a awm mek. Champhai Grape Growers te ang bawk hian Hnahlan Grape Growers-te pawh an buai ru tawh hle nia hriat a ni.

Mizo Idol 2011-ah Lalthut.haa thlan a ni ta

2011-11-09T03:23:00.000-08:00

Biakmuana & ThuthaaNizan khan ZONET Mizo Idol 2011 chu zawhfel a ni ta a, Serchhip Chhiahtlang tlangval Lalbiakmuana chu SMS Vote-ah Saiha tlangval Lalthut.haa chuan khumin, Lalthut.haa chu Mizo Idol pathumna atan puan a ni ta.

Mizo Idol thlanna Grand Finale-a mipuiten SMS Vote hmanga an thlannaah Lalthut.haa hian vote 88,022 a hmu a, Lalbiakmuana'n vote 63,577 a hmu thung a, an inthlauhna chu vote 24,445 a ni.

Mizo Idol Season 3 atan LALTHUTHAA, Saiha thlan a nih result puan a nih rualin amah lawmpuitu Saiha Mipuiten Lirthei chi hrang hrang hmangin Saiha khawpui a fang kual a, an lawmpuina au hla te chhamin Saiha khawpui an fan hneh hle niin thudawnna chuan a sawi a, hetihlai hian Serchhip leh Chhiahtlang lamah pawh nizana Result puan lai hian mipui t.hahnem tak pungkhawmin, Big Screen hmangin Result puang lai hi an en ve bawk a ni.

Mizo Idol hian a tirah `52,000/- a dawn bakah thla 12 chhung, thla tin ` 4,000/- a dawng ang a, tangkafai a dawn tur hi a vaiin `1,00,000/- a ni dawn a, hemi bakah hian Scooty a dawng bawk.

Pahnihna hian tangkafai `30,000/- a dawng a, tangkafai bakah hian finalist pahnih hi D-3 Business Enterprise, LG Distributor-in LCD TV t.ha tak an pe a, heng bakah hian mimal, pawlho leh dawr hrang hrang engemawzatin pawisafai leh thilpek t.ha tak tak an pe bawk a, Top 10 thleng chinte hian tangkafai leh Certificate an dawng vek bawk a ni.

Pu Thangruma In kang senghawi hnatlang neih a ni

2011-11-04T06:37:00.000-07:00

Nizan hmasa (Ningani zan) dar 6:30 vela Pu Thangruma Serchhip Bilzel Veng ami In kang, ruhrel chu nimin khan khawtlangin hnatlangin an senghawi a, karleh Thawhtanni khian In sak hnatlang koh a ni.
Ningani zan dar 6:30 vel khan Pu Thangruma te In hi Assam type, chhawng thum niin, chhungkaw pathumin an luah a. He kangmei hi In hnuai ber atanga chhuak tan niin, gas bur a puak a. Hei vang hian kangmei hi a nasa-in, bungrua engmah an chuh hman ta lo a ni.
Kangmei a chhuak tih hriat veleh Fire Department kangthelh motor 2 leh mi tlawmngai ten thelh tumin an bei a, nasa taka an beih hnuah he In hi kangral vek lovin, a ruhrel senghawi tur a awm thei a ni. Kangmei tuartu chhungkua te hi District thuneitute bakah mi tlawmngai thahnem takin tanpuina an pe mek zel a ni.

2011-11-04T06:00:00.000-07:00

SOCIO ECONOMIC AND CASTE CENSUS TRAINING SERCHHIP-AH NEIH A NI

Vawiin chawhma dar 10 khan Serchhip DC Meeting room-ah Serchhip District chhunga Socio-econimic and Caste Census 2011 neih tura atana inbuatsaihna -‘Training of Enumerators and Supervisors’ neih a ni a, Charge officer pahnih Pu ST. Lalhmingmawia SO (charge – I) leh Pu C. Lalthanzira DPC(SSA) (Charge – II) ten an ho a ni.

He trainng hi Serchhip District Bawrhsap leh Principal Census officer ni bawk Pu P. Lalchhuanga chuan hawngin a hmanpui a, Supervisor leh Enumerator tura ruatte chu an kal kim vek a ni. Serchhip District Principal Census Officer Pu P. Lalchhuanga chuan Enumerator leh supervisor atana ruatte chu hna pawimawh tak thawk tur an nih inhria a taima leh rintlak ngei tura hna thawk turin a chah a. Hmaih nei miah lova in tin tlawhchhuak vek turin a chah bawk a ni.

He training-ah hian Pu Zorammuana, Master Trainer, Lecturer, Government Serchhip Higher Secondary School chuan Supervisor leh Enumerator turte hi uluk takin training a pe a ni.

2011-11-01T03:42:00.000-07:00

Pathian nen kan inkar a fel – CM Lalthanhawla

Chief Minister Pu Lalthanhawla chuan “Pathian nen kan inkar a fel a, sawiselna satliah hian min tizam lo. A lama kan tan chhung chu kan lamah Pathian pawh a tang zel dawn a ni” a ti. He thu hi vawiin(1st Nov. 2011) a Serchhip Block Congress Comtt. buatsaih Political Training, New Serchhip YMA Hall a neih ah sawiin Pu Hawla chuan MNF ho kha kum 20 chhung an rammut hnu ah an peih tawh ngang lova., kan tanpuina in an lochhuak a, chumi hnu ah kum 10 chhung zet Mizo khawtlang nun an rawn tichhe leh a, Vantlang inkhawmna hma a in auh el te, Poster intar khum te hi tu te chin chhuah nge tih mipuiin kan hai lo a ti.
A sawiselna ah CM Hawla chuan ACB ten ka In an dap a, ka in hlutna an chhut chhuak dip dep a, lungawi takin ka paltlang a, chuti chung chuan thiam lohna engmah ka neilo tih Court in a finfiah tawh a, MNF te chu an hotupa ber PRISM ten a sum lakluh leh a thilneih a inphu lo tiin an hek a, Guwahati High Court in ACB te a chhuitir a, a In an dap dawn apiangin midang a punkhawm a, a In hlutna chhutchhuak tur Engineer leh a thil neih dap tur ACB te pawh an lut hlei thei lova, ACB in an dap dawn tih a hriat rualin Aii Puk hungna a dah botir vek bawk a, “Misual chu um lohvin an tlanchhia” tih ang mai a ni a ti.
MNF in Congress nu ho – Mahila te leh Congress Driver Welfare te CM Bunglow ah an inhmukhawm a, Pol. Training te neiin a kawtah an lam a, CM Bunglow an ti bawrhbang nasa a ni tia an puhna pawh sawilangin CM Hawla chuan 15th Aug. 2006 a helpawl 2 khawma CM Bungalow a helpawl pakhat – United People Front din kha CM Bungalow tihbawrhbanna a ni zawk lovem ni? a ti a, CM Bungalow ah hian Mikhual – Guest Room 3 a awm a, chung te chu MNF Sorkar lai khan an hotupa berin Kudam ah a hmang a, a eiruk thil chhekkhawlnan, Ramhlun a a In sakna tur chheknan a hmang thin a, kha lo liama CM Bungalow tihbawrhbanna a awm chuang lo a ti bawk.
CM Hawla chuan MNF sorkar lai khan Health Minister R.Tlanghmingthanga hovin Contractor 1 hnenah Rs.nuai 21 an lo la a, chu chu EE pakhatin nuai 4 a puk ve a, a rul tawh a, thamna la ve midang Dr.N.Palai pawhin a rul tawh a, R.Tlanghmingthanga’n Rs.nuai 10 a lak a la rul ve lo a ni a ti. NLUP chungchang pawh sawilangin Pu Hawla chuan NLUP kan sem hmasak kha kan huang kan lo tizau deuhva, Party dang te pawh thei miah lovin kan lo pe a, an nin an ti tha leh duh si lova, chuvang chuan a hlawhtlinna Percentage pawh a hniam phah a ni a ti a, tun tumah erawh chuan a hma aiin kan khauh dawn a, a hmang tha lo chu kan pek chhunzawm dawn lo satliah lova, kan pek chhun pawh kan rulhtir leh vek dawn a ni a ti.
Serchhip Block Congress Comtt. buatsaih Political Training hi Serchhip Block Congress Comtt. President Pu PC Vanlalsawma’n a kaihruai a, CM Lalthanhawla hi a nupui Pi Riliani bakah LAD Minister Pu PC Lalthanliana, HPC Vice Chairman Pu Joseph Lalhlimpuia, KVI Board Chairman Pu K.Lianzuala leh ZENICS Chairman Pu Ronald Sapa Tlau ten an rawn tawiawm a ni.

Aizawl to Serchhip MST Bus chhuah hun tidanglam hret

2011-10-31T04:29:00.001-07:00

Transport Deptt. chuan vawiin, Oct. ni 31 atanga hman tan turin Serchhip to Aizawl MST tlandan a bithliah thar a, chumi ang chuan Aizawl atangin chhun dar 12:30pm ah Sobji Bazar Bus Stand, Power House hmun hlui atangin a rawn chhuak tan anga, Aizawl Temple pan pheiin Booking Counter ah a in report anga, heta tang hian chawhnu dar 1 ah chhuak lehin Milennion Centre kawtah a ding leh anga, heta tang hian dar 1:15pm ah chhuak lehin Chaltlang a Transport Deptt. Directorate ah a inreport leh anga, chumi hnu ah Serchhip panin a chhuak chauh ang. Serchhip atang chuan a pangngai angin zing dar 6 ah Aizawl panin a chhuak thin dawn a ni.

2011-10-31T04:26:00.000-07:00

ADB loan rulh nan Road tax ti sang
Sorkar dan siam a inkalh

Serchhip 31st Oct. 2011 : Mizoram sorkarin ‘The Mizoram Motor Vehicle Taxation (Amendment) Act, 2011’ a siam behchhana lirthei atanga chhiah lak (road tax) tihsan mek chu Asian Development Bank (ADB) atanga sorkarin loan a lak, Health Care Scheme atana hman rulhna tur leh kawngchhe siamna tur nia sawi a ni.
He dan siam, a bu-a Transport department-in a tihchhuah chu a inmil lo a. Mizoram sorkar Transport Deptt.-in lirthei chhiah a lakna dan hman mek, sorkarin Gazetted-a a tihchhuahah hian bu khat theuh si inang lo a awm a, Rate of Tax on Vehicles Schedule-I Section-III ah chuan Bus in an chawi tur tarlan a ni a. Bu 1-ah Mizoram chhung atan Rs.2500/- (only), Mizoram pawna tlan seat 18 ah Rs.3,500/- a ni a; mahse, Transport Deptt.-in dan (tax) bu a hralhchhuah dangah chuan (e) Rs.2,500/ leh Rs.3,500/- bakah hian Rs.120/- leh Rs.150/- in seat 18 chunglam chu a tarlang leh si niin an sawi.
Hei bakah hian, October ni 18, 2011-a Transport Minister hova meeting an neihnaah Transport Deptt. Jt. Director Remmawia chuan, road tax tihsan a nih chhan hi ADB (Health Care Scheme atana sum hman) puk rulh a ngai tawh avanga, a rulhna tura tih a nih thu leh kawng siamthatna tur a nih thu a sawi, an ti bawk.
Lirthei chhiah lak mek chu sang uchuak an tih avang leh tha lo an tih avangin chhiah pe tur tam tak chu tui lai rapin, chi-ai takin an awm mek tih an sawi a. Mizoram Motor Vehicle Taxation Refinement Demand Co-ordination Committee (MMVTRDCC) chuan he dan hi a siamtha turin sorkar an phut a, November ni 7 thleng sorkar hmalakna an ngaichang ang a, bawhzuina mumal a awm loh chuan a tul anga hmalak an tum tih an sawi.

Pawl hrang hrang 16 intelkhawmna MMVTRDCC hian nimin khan an Chairman, R Lalhmunmawia hovin Aizawl Press Club-ah thuthar lakhawmtute an kawm a. Mizoram sorkarin Road Tax a tihsan chu tha lo an tih takzet thu leh, October ni 18-a Transport Minister hova meeting an neih thuchhuak sorkarin a tihchhuah leh dan pawh a dik tawk lo tiin, dan awm sa tha an tih loh avanga a siamtha tur Team/Group din an rel zawk tih an sawi a ni.
Road Tax tihsan hi Assembly House-a Minister-in a sawi dan chuan Transport Vehicle-ah 50% leh Non-Transport Vehicle-ah 20% a tihsan tur a tih laiin, a taka hman a nih chuan 20% leh 50% aiin a to daih zawk a ni, an ti a. He dan hman mek Section 17-a inziak angin, Assembly House-a pharh kher ngai tawh lovin, tihsan emaw tihhniam emaw theihna a awm thu leh a rang lama siamthat ngei an phut thu an tarlang a. “Transport Deptt. hian a thil tih phuailuai tak hi siamthat hreh suh se,” an ti bawk.

Tualchhung

2011-10-28T03:02:00.000-07:00

Keitumah NLUP sem a ni
Nimin khan Horticulture Deptt chuan Hrangturzo bial, Keituma chhungkaw 57-te hnenah NLUP 2nd installment an sem. Lakhuihthei thlangtu chhungkaw 39, Serthlum thlangtu chhungkaw 18 bakah Bungtlang khua Lakhuihthei thlangtu chhungkaw 10, bakah Serthlum thlangtu chhungaw 2 te hnenah tanpuina sum hi pek an ni a. Lakhuihthei thlangtute hnenah hian Rs.30000 semin, Serthlum ah Rs.20000 sem a ni.

SOC-in Pu Rama an thlah
Transfer-a Khawzawla awm tur Soil District Officer Pu Lalramliana chu nimin khan Serchhip Officers Club ten a office-ah thlahna hun hmangin, ngaihhruina thuziak an hlan.Pu Rama hi HL.Chung nunga’n a rawn thlak dawn a ni.Pu Rama hian karleh lam khian Serchhip a chhuahsan dawn nia hriat a ni.

Kaisan lawmpui
Nimin khan Staff Nurse Pi Remziki kaisan chu Serchhip Damdawi Ina thawhpui ten an lawm. Pi Remziki hi Ward Superintendent-ah a kaisang a ni.

TB Awareness campaign
Christian Medical Society of India te buatsaihin nimin khan CMO’s Confe rence Hall-ah TB Awareness campaign neih a ni a. He hunah hian District chhunga tlawmngai pawl hrang hrang sawm bikte telin, TB natna do dan leh a natna hriat theih dan leh Malaria chungchangte inhrilhhriata inzirtir a ni.

Zirlaite Ni hmang
Nimin Zirlaite Ni chu hmun hrang hranga zirna School-ah hlim taka hman a ni a. Zirlai leh zirtirtu ten chanvo neia intihhlimna hun hman a ni.

Volleyball final dawn
Serchhip District Volleyball Association buatsaih, Dist. Volleyball Championship Serchhip Chhim Venga khelh mek chu vawiin chawhnu dar 2 hian kharna inkhawm neiin, khar a ni dawn ta a. Final-ah Serchhip Chhim Veng-I leh Serchhip Vengchung ten an khel dawn a ni.

2011-10-28T02:57:00.000-07:00

AGRICULTURE DEPARTMENT HNATHAWKTUTE CHAWIMAWI AN NI

Ni 25.10.2011(Thawhlehni) khan WDPSCA Project, Mandarh leh Upper Mat Chhingchhip hnuaia lo neitute chuan anmahni bialtu Agriculture Department hnathawktute chawimawina Farmers Information and Advisory Centre, Agriculture Complex, Serchhip ah an hlan.

He hunah hian WDPSCA project enkawltu Pu Lalthansiama, DAO Serchhip, Pi Lallawmzuali, AEO leh Pi Lalbiakzami WDT te hnenah chawimawina thuziak an hlan a.

Chawimawina hlantu Chhingchhip khuaa loneitu te chuan Chhingchhip-a Project pahnih- Mandarh leh Upper Mat-zau Loneitute hnenah cheng nuai 80 chuang tanpuina sem chhuah a ni tawh chu lawmawm an ti a, an tu leh fate thlenga an rin tur ro chhe mai mai tawh lo tur WRC, Terrace leh tuikhur an siam sak te chu lawmawm an tih tak zet thu an sawi a ni.

Pu Lalthansiama, DAO Serchhip District chuan chawimawina an dawn chu anmahni dawn bik a ni lova, DAO Serchhip Staff zawng zawngte dawn a nih thu sawiin, hetiang tihna chang hria loneitu an awm chu a lawmthu a sawi a. Chhingchhip khua chu Serchhip District chhunga khaw entawn tlak ber te zinga mi a ni a ti. Agriculture Department hmalakna hrang hrang sawiin, ATMA kaltlangin Serchhip District chhungah loneitute tan hma lak ani dawn a, loneitute chu lo inbuatsaih turin a chah bawk. Tuna an hmalaknaah hian duhtawk mai lova, an Project kal lai a tawp hunah pawh hmasawn zel tura tan la turin a chah bawk a ni.

He inkhawmah hian Chhingchhip-a loneitute bakah DAO, Serchhip staff an tel tha hle a ni.
source : DIPR

2011-10-25T04:39:00.000-07:00

SERCHHIP DISTRICT NLUP IMPLEMENTING COMMITTEE AN THUKHAWM

Vawiin (25.10.2011) chawhma dar 10 khan Chairman, Serchhip District NLUP Implementing Committee leh District Bawrhsap ni bawk Pu P. Lalchhuanga hovin a office-ah NLUP thawhhnihna sem leh tura trade hrang hrangte thlangin line Department hotute an thukhawm a, District chhunga Line Department hotute an tel tha hle. Chairman hi Serchhip District NLUP Nodal Officer Pu Robert C. Lalhmangaiha SDC in a tawiawm a ni.

He meeting-ah hian Serchhip District chhunga Cluster pathum, Serchhip, Tuikum leh Hrangturzo bialte tan NLUP trade hrang hrang sem leh dan tur an ngaihtuah hova. Sawrkar hma lo lak tawh hman tangkai chhunzawm zel dan te, a ram leilung hausakna leh ngeih zawng te, hralh sum a chan thlenga hnathawktute kawng zawh tur te leh mipui duhthlanna te behchhana siam rem tum a ni. NLUP hi a hlawhtlin ngei theihna turin mithiam ten an vil a an enkawlpui reng a tul takzet a. An thar chhuah leh deh chhuahte hralh thu ah pawh remchanna a tam zawk avangin a theih chen chenah trade hrang hrangte hi a hlawm thei ang bera dah tum a ni.

Serchhip District chhunga NLUP cluster pathumah hian NLUP thawh hnihnaah chhungkaw 3050 tan pek leh tura ruahman a ni.

2011-10-25T04:33:00.000-07:00

Mualthuam khaw dai-ah Lalsangzuali ruang chhar a ni : Rinhlelh thu-ah police ten a pasal man

A pasal kut tuara thi nia hriat Lalsangzuali kum (37) Mualthuama cheng, Serchhip Chhiahtlang ruang chu Oct 23 zan thimhlim khan Kawrtethawveng leh Mualthuam inkarah chhar a ni.
Lalsangzuali pasal hi Lalhmachhuana kum 35 4th IR-a thawk lai a ni a, Mualthuamah Post mek a ni. Thudawnnain a sawi dan chuan Sangzuali te nupa hian Mualthuamah hian Dawrte siam an tuma, chumi atan chuan an pa GP Fund te pawh an puk a, chu pawisa chu kengin Dawr bungraw lak tumin Sangzuali hi Aizawl lamah a chhova, a thang rei tak deuh avangin an pa hian phone-in thil awmdan te han zawh a tum fo thina phone tlang theih loh chang a nei fo niin an sawi. Oct 23 zing dar 8 vel khan Lalhmachhuana hian an nu hi phone in a bia a, a thinrm hle a “rawn hawng rawh ka lo hmuak ang che…hriamhrei erawh ka keng lovang..” a ti niin an inbiak lai hria te chuan an sawi niin thudawnna chuan a sawi bawk.

Thudawnna chuan Lalsangzuali hi Aizawl atangin Mamit a thleng thla a, Inrinni (22 oct) khan Mamit atangin Kawrtethawveng lam panin a chhuak tih hria an awm a, Kawrtethawveng hi 23rd Oct Chawlhni khan a thleng thla tih hriat a ni bawk. Chutia Kawrtethawveng a awm chu an pa hian Mualthuam atangin nimin sunday zing dar 8 velah khan phone chuan a be leh ta a ni. Sangzuali hi Dawr bungraw lak tuma Aizawl kal a ni na a, engmah hawn lovin, pawisa pawh hawn let tawh chuang lovin kut ruakin a hawng thla nia sawi a ni.

An inbiak hnu (Chawlhni) hian Sangzuali hian Kawrte atangin Mualthuam a pan ta a, an pa hian Mualthuam atangin a mah tawk turin a lo hmuak ta a nih hmel. Kawtethawveng leh 4t IR ho awmna Mualthuam inkar hlatzawng hi KM 12 vel a ni a, kawngpui blacktop loh a ni. An sulhnu atanga a lan danin, Kawrte leh Mualthuam inkar, Kawrte lam hnaih kawngpuiah khaini bur sah phel phawk te, hmeichhe hmaihnawih incheina lam thil sah phel leh tanbun te leh kuhva fun darh neih nuaih te bakah thisen far hmuh tur a awm nual bawk a, chulaihmun atang chuan kut an inthlak tan ni a an rin thu thudawnna chuan a sawi. Chulai hmun atang chuan Mualthuam lam panin kut inthlak zel chungin an inchhawm ta a nih hmel a, kawngpui leh kawngsir velah hnim pe sensun leh thisen hmuh tur a khat tawkin a awm zel a, kut inthlak tanna nia rin atanga Mualthuam lam KM 2.5 velah Sangzuali ruang hi hmuh a ni.

Lalsangzuali ruang hi kawngsir thingzaisa tiankhawm chungah zalh a ni a, changel hnah pahinihin khuh a ni. A tukkumah chema sahna hnuhma ang tak hmun thumah a awm a, a lai ami chu a kak thukin a sei bera, 2.5 inch vel zet a sei a ni. A awm, a hnute bawr vel atangin a dul vun vel a pilh nasa hle a, kawngpui dungah kutthlaktu hian a hnuk hrep a nih a rinawm. A tukkhum atanga a hnungzang a mawngtam leh a mal dungtluanin a duk vek a, a malpui hmalam pawh a duk khat deuh vek. A kutphahah thuk takin a kak a, a kephah dinglam thuk takin a kak bawk niin mita hmutu chuan a sawi bawk.

Oct 23 chawhnu dar khat leh dar hnih inkar vel khan Electoral Roll-a in ziahluh tum Tukuk thenkhatin Sangzuali ruang awmna hmun bul kawngpui hi an paltlang a, chutih lai chuan Sangzuali pasal Lalhmachhuana hian Tuikuk ho chu tui in tur te a lo dil niin an sawi a, Tuikuk ho chuan “hmeichhia hi kawngsirah a mu a, a kut a ti che a, mahse a tawng lo..a kawng te chu a duk vek a, mipa chuan chem phek zawngin a mawngah a hem” an ti niin an sawi bawk.

Oct 23 thimhlim khan Lalhmachhuana hi Mualthuamah zualkoin ruang hmuh a nih thu leh a awmna te a sawi a, tlawmngai pungkhawmin ruang hi an va hmu ta a ni. A nupui thih thuah Lalhmachhuana hi Kawrthah Police ten an la nghal a, Lalsangzuali ruang hi Postmortem a nih hnu nimin khan a nu leh pate In Serchhip Chhiahtlangah vui a ni.

Serchhip Vety Doctor sawn dânah ranvulhtute lungawi lo

2011-10-24T04:19:00.000-07:00

Ni 16 October, 2011-a Serchhip khaw chhunga Bawng vulhtute (MULCO) leh Vawkvulh Association (PIGFED) te inhmukhawm chuan Serchhip Vety Doctor, Dr.C.Khawlthangmawia, Bawng kaitu mi pakhatin zahlo taka a lo tih avanga hêkna tlinglo chhete hmanga Saiha-a Transfer a ni chu an hriatthiam loh thu sawiin, sawrkar chu Transfer Order sût leh tura an phut thu an sawi.
Ranvulhtu te inhmukhawm chuan, Dr.C.Khawlthangmawia chu mi hming\ha leh taima, laklawh nei ngailo, vawk kahrai leh Bawnglian bika harsatna (infertility)-ah a bik taka thiamna nei a ni, tih an sawi a, transfer a ni mai tur chu Serchhip mipui leh ran vultuten an hriatthiam loh thu sawiin, NLUP kalpui mekah pawh harsatna tam tak an hmachhawn phah dawn niin an sawi a ni.
An sawi zel danin, Mizoram Animal Movement Act, 2000-in a phût angin Burma a\anga ran rawn lût - Bawng, Vawk, Lawi, Ar etc. te hi an hriselna uluk taka lo endika sawrkarin endik man a bithliah angin an laksak \hin a, kum 9 chhung lek Serchhip-a a thawh chhungin Sawrkarah sum (Revenue) `7,24,487/- a chhung lut hman niin an sawi.
Ranvulhtute kalkhawm chuan chhuanlam tling lo leh chhan \ha tawk behchhan tur awm miah lo hêkna chhete vanga Phurra, Saiha District-a sawn (transfer) a ni leh Gazetted Officer meuh si, an hêkna chungchanga insawifiahna hun siamsak lo leh Bialtu MLA, Chief Minister ni bawk hriatpui loh bâkah a Department changtu Minister hriatpuina tel lova hmun danga sawn a ni thei hi thil mak tak, khawvela la awm ngailo niin an sawi bawk a, thudawn dânin Dr.C.Khawlthangmawia hi Explanation Call a ni a, insawifiah tura hun an pek ral hmain amah sawnna tur, Transfer Order hi a dawng zui leh nghal niin thudawnna chuan a sawi.
Ranvulhtu kalkhawm te chuan Resolution siamin, Dr.C.Khawlthangmawia transfer Order hi Cancel tur leh a hmun ngai luahtir leh turin sawrkar chu an ngen a, an Resolution siam hi Chief Minister leh AH & Vety Department changtu Minister te an pe bawk a ni.

2011-10-21T05:24:00.000-07:00

SERCHHIP-AH SANITATION SQUAD DIN A NI

Nimin chhun dar 12:00 khan Serchhip District Bawrhsap Pu P. Lalchhuanga kaihhruaina in Serchhip Town thianghlim leh felfai zawka enkawl a nih theih nan meeting pawimawh tak, DC’s Meeting room-ah neih a ni.

He meeting-ah hian Serchhip Town Sanitation Squad din nise tih a ni a, Chairman atan District Bawrhsap leh working Chairman atan CMO Serchhip chu ruat a ni a, hei bakah hian Member atan Addl. SP, DIPRO, DLAO, EE(PHE), EE(PWD) leh ex-officio members atan VC member te leh YMA hruaitute ruat an ni bawk.

Hei bakah hian VC ten anmahni area chhungah sanitation squad din vek ni bawk se tih a ni a, Faina hapta hman dan ennawn nghal a ni a, faina hapta hi kumpuanah hman ni se, Novenber 2011 atanga tanin 2012 faina hapta hman hunah kum khat chhunga veng fai berte hnenah lawmman pek nise tih a ni a. Quarter tinah Sanitation Squad te hian veng tin te Sanitation Inspection uluk takin an nei thin dawn a ni. He Meeting-ah hian Head of Department te leh VC te an kal tha hle a ni.

2011-10-19T03:44:00.000-07:00

MIZO INFIAMNA KUTPUI VAWI LI-NA SERCHHIP-AH HMAN A NI

Vawin chawhma dar 10:30 khan ni hnih awh tur North East Zone Cultural Centre, Art & Culture Department, Mizoram leh Sub-Headquarter YMA, Serchhip-te tangkawpte huaihawtin Serchhip Field No.-II-ah Mizo Infiamna Kûtpui vawi 4-na hman a ni a, Pu Zolawma District Education Officer, Serchhip chu khuallian a ni.

He hunah hian Pu Zaliana, Senior Research Officer, Tribal Research Institute, Art & Culture Department chuan he kût hman a nih chhan leh an lo kalpui tawh dan tlangpui te a sawi a. Khawvel hmasawnnain zawi zawia kan hnam nunphung leh ziarang hlu tak takte min nuai bo sak zel avangin kan hnam ro hlute humhalha chawi nun zel nan hetiang kut hi siam a ni a ti a. Kum 2008 khan Sialhawkah nei tannin hlut a hlawh hle a, 2009-ah Aizawl khawpui chhung Chaltlangah nghah leh a ni a, rinphak baka a hlawhtlin thu leh 2010-ah pawh hlawhtling takin Kolasib-ah hman a lo nih tawh thu a sawi a.

Kuminah Serchhipa nghah a nih chhan sawiin Pu Zaliana chuan Serchhip chu Mizoram hmun laili ber a nih avangin kan hnam ziarang, nunphung leh hnam rohlu ten ngaihhlut an la hlawh leh hlawh loh enna tur darthlalang tha leh rintlak bera an ngaih vang a nih thu a sawi a. Tin, inelna ang ringawt ni lova KÛT anga kalpui an duh chhan pawh sawiin, inelna rilru dah lian lutuk lova hlim taka mahni hnam ro leh thil hlute thangtharte mithmuha pho lang zel tur leh vawn him zel chu an tum ber a nih zawk thu a sawi bawk a ni.

Khuallian Pu Zolawma DEO pawhin thu sawiin mahni hnam tihdan bosala hnamdang tih dan ringawt entawn chu hnam boralna a ni a, hmasawnna leh culture chu kal kawp tlat tur an nih avangin kan Mizona tel lova changkan kan tum chuan kan hnam hi a boral mai dawn a ni a ti a. Hmana kan infiamna tam tak thangtharte hriat hlawh phak tawh lote, tunlai mite hmuh tura pho chhuah leh an ni tur chu lawmawm a tih thu sawiin vawng nung reng a chawi lar zel tur leh hlim taka kût turin kalkhawmte a chah bawk a ni.

He Mizo Infiamna kûtpui hi naktuk ni 20, October 2011 chawhnu dar 1:00 hian Pu. PC Zoram Sangliana, Art and Culture Minister-in a khar ang.

2011-10-18T03:22:00.000-07:00

INDUSTRY DEPARTMENT HNUAIA NLUP DAWNGTUTE TAN SERCHHIP-AH TANPUINA SEM A NI

Vawiin chawhma dar 10 khan Sub- Divisional Industries Officer Pu Malsawmtluanga hovin an SDIO Office, Darnam Tlangah Industry Department hnuaia trade hrang hrangte tan NLUP tanpuina thawhkhatna sem zawh a ni. He hun hi Pu T. Thangtluanga Extension Officer-in a kaihruaia, Industry Department-in tanpuina an sem har chhan te sawifiahin a thawktu lam chu an inpeih reng thu leh an department-ah sum sem tur rawn dah luh ala nih loh avanga sem hma thei lo an nih thu a sawi.

Tun tumah hian Serchhip District chhunga 1st installment, batch hnuhnung ber turin Serchhip town huam chhunga Village Council panga-te tan sem a ni. Trade hrang hrang 15 atangin chhungkaw 74 hnenah tanpuina hi sem a ni a, Desktop Publishing leh Auto Rickshaw bik chu nakin hun remchang dangah 2nd installment ruala la sem leh tur a ni.

Industries Department hi NLUP line department-ah chuan trade hrang ngah ber zing a mi an ni a, tun tumah pawh hian trade hrang hrang 15 atan tanpuina hi pek a ni a. Chung zinga thlangtu tam deuh te chu Petty Trade atan chhungkaw 32, Chhungkaw 12 tan carpentry, chhungkaw 8 tan Agarbati Stik siamna, chhungkaw 7 tan Puanthui leh Workshop siamna atan chhungkaw 3 hnenah tanpuina hi sem a ni a. Trade pakhat chhungkaw mal chauhin an thlan pawh 9 lai awm bawkin an tanpuina dawn zat pawh a inang lova, cheng 10000 atanga cheng 25000 inkar an dawng hlawm a ni. DIPR

2011-10-12T03:54:00.000-07:00

Serchhipah Fai lawmman semna hun hman a ni

Serchhip 12th Oct. 2011 : Nimin khan Serchhip DC’s Conference Hall-ah Faina Hapta, kawng hrang hranga titha te hnena lawmman sem inkhawm neih a ni.
He inkhawm DLAO, Sanitation Officer ni bawk Pu S.T. Lalhming mawia kaihhruaiah hian khuallian Dist. Bawrhsap Pu P.Lalchhuanga chuan Faina Hapta hi rampum huapa hman anih rualin Serchhip Dist.ah chuan kum tluana kalpui tum anih thu a sawi a, Faina Hapta huaihawttute ruahman dan chuan Faina Hapta bik chauh a endik hna thawk tawh lovin, quarterly in endiktute an intir chhuak tawh ang a, heng endik hna thawh zawh hnu a mark khawl hnem apiang kha Faina Hapta hman anih leh hunah lawmman pek an nih tawh zawk tur thu a sawi a, Faina Hapta hlawhtling taka hman anih theih nan a sulsutu zawng zawngte lawmthu hrilhin media te tha hnemngaihna leh thawhrimna chu lawmawm a tih thu a sawi bawk.
Faina Hapta hman anih chhung hian Faina kawnga inelna chi hrang hrang siam a ni a, heng a tithe zualte hnenah hian lawmman sem nghal a ni bawk, lawmman sem anih dawn hian category tina Judge ten endikna an kalpui dan tlangpui report an pe a, heng intihsiakna hrang hrang a lawmman dawngtute chu :
VC Fai lawmman : 1-na Serchhip-V Village Council; 2-na Chhiahtlang Village Council; 3-na Serchhip-I Village Council
Sorkar Office Fai lawmman : 1-na DIET Office; 2-na PWD Office; 3-na- District Information & Public Relations Office
Primary School Fai lawmman : 1-na Govt. Primary School Chanmari Serchhip; 2-na Govt. Primary School-I, Chhiahtlang; 3-na Govt. Primary School Chhim Veng, Serchhip
Middle School Fai lawmman : 1-na Govt. Modern Middle School, Serchhip; 2-na Govt. National Middle School, Chhiahtlang; 3-na Govt. Middle School, Serchhip
High School/Higher secondary School Fai lawmman : 1-na Marian High School Serchhip; 2-na Presbyterian English Medium School (High School Section) Serchhip; 3-na Govt. PCR High School, New Serchhip
Hotel/Restaurant/Canteen Fai lawmman : 1-na Hill View Guest House New Serchhip; 2-na PHE Office Canteen New Serchhip; 3-na New Land Hotel IOC Veng
Sweeper tha ber lawmman Pi Lalthantluangi, Chhim Veng, Serchhip hnenah hlan a ni a. Tin, MHIP P&E Veng Branch-in an Veng chhunga BPL& AYY Family fai an thlante hnenah lawmman hlan an ni bawk.
VC area fai lawmman hian certificate bakah pakhatna in Rs. 7000, pahnihna in Rs. 5000 leh pathumna in Rs. 3000 a keng tel a, Zirna In leh sorkar Pisa fai lawmman hian Certificate bakah pakhatna in Rs. 1500. Pahnihna in Rs. 1000 leh pathumna in Rs. 700 a keng tel a, Hotel/Restaurant/Canteen fai lawmman hian certificate bakah pakhatna in Rs. 1000, pahnihna in Rs. 700 leh pathumna in Rs. 500 a keng tel a, Sweeper tha ber hnenah hian lawmpuina thuziak (certificate) leh tangka fai Rs. 500 hlan a ni bawk.

2011-10-10T05:24:00.000-07:00

SERCHHIP-AH RTI WEEK HMAN A NI

Right to Information Week (5th October – 12th October) neih mek denchhenin vawiin chawhma dar 10 khan Serchhip DC’s Conference Hall-ah hun hman a ni a, Mizoram State Chief Information Commissioner Pu Lal Dingliana IFS (Rtd) chuan khuallian niin a hman pui.

Chief Information Commissioner chuan Right to Information Week hman anih chhan te sawifiahin Mizoram chhungah RTI inhrilhhriat (Awareness) Campaign beihpui thlak a ngaih nasat zia a tarlang a, ram thang chak leh hmasawn chu RTI hmang tangkai ram an nih thin thu sawiin, sawrkarin mipuite laka thil a zep tit tet thin a ngaihna hmun, RTI hman tangkai a theih loh na hmun apiang chu ram hnufual an nih zel thu a sawi a ni. Information Commission chu Court thuneihna engemaw chen nei a nih thu sawiin RTI hmanga sawrkar tha leh dik, rintlak neih anih theih nan theihtawp chhuah a tum a, hemi hlawhtlinna tur atan erawh chuan sawrkar, mipuite, NGO leh Media te nen thawhhona tha neih a tanrual a tul thu a sawi bawk a ni.

RTI Act kum 5 chuang hman anih tawh hnu pawha RTI kaltlanga dilna siam a la tlem lutuk chu a ngaimawh thu sawiin Pu Dinga chuan hei hian mipuite’n RTI Act an la hmelhriat chian loh zia a tilang a ni a ti a, mipuite hmelhriat tir tura tan la thar turin sawrkar hnathawkte a fuih rualin mipuite pawh khua leh tui tha ni tur chuan sawrkar kalphung an hriatchian ve a ngai a, hemi atana kawng pawimawh tak RTI Act hi dilchhut lehzuala belchiang turin a sawm bawk. Mi tam tak ralkapin ral ramah nunna thap a an awm laiin mizoramah chuan ralmuang takin kan awm a, nunna thap meuh a thawh ngai lovin office nuam takah thlamuang takin kan thawk hlawm a, chuvang chuan mipuiten information an duh ang lo pek mai chu thil harsa lo tak a ni a, kan tih ve ngei tur pawh a ni tiin sawrkar hnathawkte a fuih a ni.

Thusawitu dang khual zahawm Pu P.Lalchhuanga, District Bawrhsap pawhin mipuite leh sawrkar hnathawkte pawhin a RTI Act kan hmelhriat dan chu a la khingbai hle a a hriat thu sawiin, RTI chu thudik tarlanna pawimawh tak anih avangin sawrkar hian RTI zawhna te dik taka chhan hi a ba ani a ti a, RTI chu corruption dona leh sawrkar cha chhuahna ringawt a ngai kan tam ni a a hriat thu sawiin, RTI chu sawrkar phih awh tumna mai piah lamah sawrkar thiltih that te leh mipui te tana a hnathawh zozaite zawh chhuah a, sawrkar ti phur leh ti tang lehzual tur a fuihna hmanraw tangkai tak anih ve theih tho thu a sawi bawk a ni. RTI Act chu sawrkar hmelhmang leh ramchhung inrelbawlna siamthat na atana mipuite tel ve theihna pawimawh tak anih thu inzirtir uar deuh deuh zel a tul thu a sawi bawk.

Vawiin RTI puala inkhawm buatsaih hi Pi K.Vanlalruati SDO(Sadar) in a kaihruai a, Pu Andrew H. Lalremruata, DIPRO, Serchhip-in keynote address pe in, zawhna leh chhanna hun benglut tak buatsaih a ni bawk a, he inkhawmah hian Serchhip-a Sawrkar pisa hrang hrang enkawltute, SPIO leh SAPIO te, tlawmngai pawl aiawhte, Political Party hrang hrang aiawhte leh VC aiawhte bakah Media ten an telpui a ni. IPR

Auto-Rickshaw Road Tax punna a sang uchuak

2011-10-08T23:47:00.000-07:00

Serchhip Auto-Rickshaw Owners Association chuan “The Mizoram Motor Vehicles Taxation (Amendment) Bill 2011 anga Auto-Rickshaw Road Tax punna hi a sang lutuk a, Auto-Rickshaw hmanga eizawngtute tan phurrit a nih tak avangin Mizoram sorkar chu he thil ennawna, siamtha turin kan phut a ni.
“The Mizoram Motor Vehicles Taxation (Amendment) Bill 2011 hman a nih hma kha chuan kum 1 atan road tax hi Rs.250/- niin tun dan tharah hi chuan Rs.850/- a tling ta a. Hei hi eizawnna atana hman chi lirthei atanga chhiah lak za zela 20 vela tihpun tur ni a, Mizoram Assembly-a sawiho laia sawi chu a tak a lo thlen chuan a punna chu za zela 240 a tlin daih avangin Auto-Rickhshaw-a eizawngtute tan chuan phur rit leh enghelh tham a lo tlin tak avangin Mizoram sorkar chuan kan dinhmun min hriat thiam pui min ennawn sak turin kan phutin, kan ngen a ni.

Issued by
Serchhip Auto-Rickshaw Owners Association

2011-10-06T06:25:00.000-07:00

Serchhip VC-III Community Hall sak tumna hmun vengchhung mipui ten duh lo
Serchhip 6th Oct: Urban Development & Poverty Alleviation hnuaia Serchhip VC III Community Hall sakna hmun tura tih Pu C. Zangaia leh Pu Thanhnuna te in inkar(step kawng chung) chu helai venga mithahnemngai intelkhawm Modern Veng Welfare Committee, Serchhip Chhimveng te chuan duh lovin tukin(6.10.2011) zingkarah khan an duhloh zia lantir nan helai hmunah hian an duhlohna thu thuziak(poster) te kengin an thukhawm.
Modern Veng Welfare Committee tena helai hmuna Community Hall sak an duhlohnachhan ni a an tarlan te chu hetiang hian an tarlang: 1) Kawng tih nawmloh leh tih hrehawm kan duh lova. Kawng kan neihchhun a ni a, School, Biakin leh Thlanmual kawng a ni. 2) Lei nghet lo, lei che reng anih avangin a bulhnaia awmte tan mangkhawng a ni dawn a, Community Hall hi sak anih chuan an awm ngam dawnlo a ni. 3) Helai hmuna Hall sak chhunzawm zel tur anih chuan veng chhungah buaina a thlen a hlauhawm.
Welfare Committee te hian helai hmun lo pawh hi Community Hall sakna tur hi an vengchhungah hmundang a awm tho thu an sawi a, he an harsatna chungchang hi hma laksak turin thuneitute lamah an thlen bawk.

Hmunphiah thlangtute hnenah NLUP thawh hnihna sem a ni

2011-10-06T06:23:00.000-07:00

Vawiin (6.10.2011) khan Serchhip Dist., Soil & Water Conservation Department hnuaia Hmunphiah chingtute hnenah NLUP 2nd Installment sem a ni.

Vawiin NLUP thawhhnihna dawngtute hi Chhiahtlanga chhungkaw 47, Serchhip-I a chhungkaw 15 leh Serchhip-IV a chhungkaw 10 bakah Hrangturzo biala chhungkaw 20, N.Vanlaiphaia chhungkaw 5, E.Lungdar leh Khawlailunga chhungkaw 4 ve ve, Sialsira chhungkaw 3, Hmunzawl, Biate, Sailulak leh Lungkawlha chhungkaw 1 theuh, an vaiin chhungkaw 92 an ni a. Hengte hi Department-a thawktu ten an khuaah theuh kal chilhin, tangkafai Rs. 5280 theuhvin an sem a.

Vawiin hian Serchhip-II, III, V Thenzawl, Bungtlang leh Keitumah te sem chhunzawm a ni ang.
Niminpiah khan Tlungvel, Darlawng, Khumtung, Baktawng Vengpui Baktawng Tlangnuam, Chhingchhip Thentlang, Lungpho leh Rullam ah te chhungkaw 53 hnenah chhungkaw 145 an ni.

AH & Vety Deptt. Serchhip in NLUP sem

Vawiin (6th Oct.) khan AH & Vety Deptt. Serchhip te chuan Chhingchhip ah NLUP thawhhnihna an sem chhunzawm leh. Nimin Dt 5th October 2011 pawh khan Serchhip District a N.Vanlaiphai, Lungkawlh leh Lungchhuan khuaah Vawk leh Ar vulhtu te NLUP 2nd Installment pek chhunzawm a ni a. Vawk vulhtu te tan Rs. 8150/- theuh leh Ar vulhtu te tan Rs. 8900/- theuh pek an ni. A.H & Vety hnuaia NLUP beneficiaries te hi 2nd Installment Rs. 6000/- theuh kumin August thla khan pek an lo ni tawh bawk a ni. Serchhip District chhunga khaw hrang hrang ah 2nd Installment hi pek chhunzawm zel tura ruahman a ni.

Tualchhung

2011-10-03T03:58:00.000-07:00

Faina Hapta hmang tan dawn
Vawiin atang hian ‘Faina Hapta’ hman tan a ni dawn a. A hawnna hi VC hrang hrangah neiin, thenfai hna tlang thawh nghal a ni ang. Tin, Faina hapta neih chhunga thawk tha inelna lawmman te hi karleh Thawhlehni khian sem a ni ang.

Minister hovin Lo zo dawn
Vawiin hian Agriculture Department leh Zau hrang hrang Association te buatsaihin Agriculture Rest House Zawlpuiah Leilet neite tan Lo zawhna hun an hmang dawn a. He hun hi Agriculture Minister Pu H.Liansailova’n a rawn hmanpui dawn a ni.

KNP Inkhawmpui a tiak
Serchhip Bial Baptist Kohhran Sunday School naupang, Kohhran Naupang Pawl inkhawmpui Ebenezar Biak In P&E Venga neih chu nizan khan an tiak ta.

CABINET MEETING NEIH A NI

2011-09-29T05:55:00.000-07:00

Vawiin khan Chief Minister Pu Lal Thanhawla kaihhruaina hnuaiah Council of Ministers ten Chief Secretary’s Conference Room, New Secretariat Building, Khatla ah meeting pawimawh tak an nei.

He Cabinet Meeting-ah hian official agenda 8 chhawpchhuah a ni a, Chung zingah chuan The Mizoram Police Bill, 2011 chu pawm a ni a, he bill hian Mizoram police inenkawlna te leh inrelbawl dan zawng zawng a huam vek dawn a ni. PWD hnuaia Architech Cell siam that leh thuam that rawtna chu bithliah siama pawm a ni bawk a. Mizoram sorkar hnuaia Regularisation of contract employees scheme 2008 a para 4(2) siam that rawtna pawh remtih a ni.

Sericulture Department hnuaia Serchhip, Lawngtlai leh Mamit district atan DSO posts 4 siam belh rawtna pawh pawm a ni a. Heng bakah hian Kolasib-ah Legal Metrology hnuaia Assistant Controller Office hawn rem tih a ni bawk a, Mizoram College of Nursing tana posts siam belh pawh pawmin, Oil Palm Development hnuaia Private Entrepreneurs (GODREJ Oil Palm Ltd) in Bukvannei rama Oil Palm Company an dinna tura sorkar-ah phalna an dil chu pawmpui a ni bawk. Mizoram District Court Services Rules duanlawk chungchang erawh la ngaihtuah that atan dah a ni.-DIPR

Rickshaw neitu ten Road Tax pung sawisel

2011-09-29T05:53:00.000-07:00

Mizoram Autorickshaw Owners Association chuan “The Mizoram Motor Vehicles Taxation (Amendment) Bill 2011 anga autorickshaw road tax tihpun dan chu hleihluak lutuk niin an sawi. Hemi chungchanga Lungleia an Gen. Hqrs.atanga thu chhuah an siamah Mizoram Autorickshaw Owners Association chuan, tun hmalama kum 1-a road tax an pek, Rs.250/- chu road tax lak dan tharah chuan Rs.850/- a tling ta niin an sawi a, eizawnna atana hman chi lirthei atanga chhiah lak za zela 20 vela tihpun tur ni a, Mizoram Assembly-a sawiho laia sawi chu a tak a lo thlen chuan a punna chu za zela 240 a tlin daih avangin hei hi Autorickhshaw-a eizawng tute tan chuan phur rit leh thil hriatthiam har niin an sawi a, ennawn turin sorkar an ngen a ni.

Tualchhung

2011-09-29T05:51:00.000-07:00

SDCDRF ah hna ruak
Serchhip Dist.Consumer Disputes Redressal Forum ah member post 2 a ruak a, kum 35-60 inkar mi, Bachelor Degree nei te tan dil theih a ni a, a dil duhte tan plain paper-a ziakin dil theih a nih thu President SDCDRF & DC, Serchhip Dist. hnen atangin kan dawng.

Training pe
Nimin khan DC’s Conference Hall-ah Election-a mawhphurtu hrang hrangte pualin training buatsaih a ni.

Thenfai hnatlang nei
Nimin khan Govt.LM Middle School Darnam tlang leh Presbyterian School ten Social service day an hmang a. Vantlang thenfai hnatlang an neih rual hian an school building leh hmunhma thenfai hna an thawk bawk.

Tualchhung

2011-09-28T04:42:00.000-07:00

NSS ten thisen an pe
NSS Foundation Day pualin nimin khan Govt. Higher Secondary School Serchhip zilai NSS ten Serchhip damdawi Ina a mamawh apiangte hman atan thisen an pe a. Thisen petute hi 76 niin an zingah hian hmeichhia 42 an tel a ni.

Pu Chungnunga boral
Nimin chawhnu dar 2:45 khan PC.Lalchungnunga(86)f/o PC.Zarzoliana New Serchhip chu thluak natna(stroke ) avangin a boral a, lumen a nih hnu vawiin hian vui a ni ang.

Mobile phone dan thar
Ram chhunga Mobile Phone hmangtu tam takin an nin em em Service provider te atanga customer-te call leh SMSdawn thin tih tawpna tur dan thar chu nimin atang khan ram pumah hman a ni ta.
Hetihlai hian Telecom Regulatory Authority of India (TRAI) chuan ‘per day per sim’ tiin ni khatah post paid leh pre paid atangin SMS za aia tam thawn theih lohna tur dan a hmang tan ve ta bawk.

2011-09-26T04:46:00.000-07:00

Serchhip leh Keitum inkarah Maxi Cab a Accident
Hliam na tak tak an awm

Vawiin chawhnu dar 1:10pm khan Serchhip leh Keitum inkar Paihtetui (Chuanhnuai) zawnah kawngkawia Maxi Cab(Sumo) inpel tur pahnih zinga pakhat chu kawng thlangah tlanliamin metres 220 chuang zet a lum a, vanneihthlak takin thi an awm lova, hliam tuar erawh an awm thung a,an zinga 2- Suikimmawii leh Rohmingsangi Sangau te chu he thu ziahlai thleng hian biak theih an la ni lova, an dinhmun a ngaihtuahawm deuh a ni.
He Sumo chesual hi Sangau khaw Maxi Cab (TMS) MZ-03-2505 niin, Pu Rothanga Sangau ta a ni a. Sangau leh Aizawl inkarah tlan thin niin, Aizawl lam pana an tlan lai a ni a, vawiin chawhnu dar 1:30 vel khan Serchhip leh Keitum inkarah hian Noth Vanlaiphai khaw Sumo MZ-06 0999 nen kawng kawia an inpel zo chu Sangau Sumo zawk hi kawngthlangah a tlanliam zui nghal ta ringawt mai a ni.
He motor-ah hian Sangau khaw mi vek chuangin, Driver hi Lalrinfela a ni a, Passenger te hi hmeichhe naupang 1 telin hmeichhia 7 leh driver telin mipa 5 an ni a, Driver leh midang 2 chuan hliam na lutuk an tuar lova, an vai hian Serchhip Hospital panpui nghal an ni.
Driver Lalrinfela sawi danin, a motor Bol-join a tliah thut avanga thunun thei lo chu a tlan liam ta mai niin a sawi a. Hetihlai hian an mahni peltu N.Vanlaiphai Sumo-a chuangte chuan motor chesual ta chu chak nanem lova tlan an nih thu an sawi ve bawk.
Accident-na hmunah hian Serchhip leh Keitum atanga mi tlawmngaite rang takin an tlankhawm nghal a, Sumo Accident-na hmun hi a awih em avang leh a thui em avangin hruizen hmangin an inpawtchhuak hial a ni.

Tualchhung

2011-09-26T03:36:00.000-07:00

Mei zu mi 21 man an ni
Anti Tobacco Squad, Serchhip te chuan Inrinni zingkar khan Serchhip Bazar leh a chheh vel, Dan phal lohna hmuna Mei zu an vai a, mi 21 zet an man a. Hengmite hi pawisa chawi tirin an chhuah leh nghal a ni.

E/roll toll free buatsaih
District Bawrhsap Pu P. Lalchhuanga hmalaknain Serchhip District chhunga Electoral Roll chungchanga zawhna zawt duh leh hriat fiah duh nei tan Deputy Com missioner’s Office, Serchhip, Election Branch ah toll free Telephone No. 1950 dah a ni a, mi tupawh Electoral Roll chungchanga zawhna zawt duh tan he Telephone number-ah hian man chawi lovin Office hun chhungin zawh theih a ni e.

Chhungkaw Pathianni
Nimin Pathianni kha Presbyterian Kohhran chuan Family Sunday, Chhungkaw Ni atan hmangin, hemi pual hian thuchah ngaihthlak a ni.
Inrinni khan Baptist Kohhran New Serchhip chuan an Kohhran Biak Inah Nau pang lang camp an buatsaih a, naupang thahnem tak an tel a ni.

Khuai-in a zukhlum
Bungtlang nu Khawivanrialin a zuk hlum. Pi Lalnithangi(48) hi Inrinni khan a pasal nen an khuai bu hual hnuai an samfai a. A pasalin a hnuai changel a sah veleh a chunga khuai awm chu an chim tla huk a. Khuai hian an nupa-a zukin, an sahim nan hmun hrangah an tlan ve ve a. A hnu ah a pasal hi kir lehin a nupui na tuara let reng chu hmuin Pu Lalfakawma hi khuaah zualkovin a tla a. Pi Lalni thangi hi khua thlenpui hma-in a thi ta a ni. Pu Lalfakawma hi Serchhip Dam dawi Inah dah ni a, ngaihtuahawm a ni lo. Pi Lalnithangi hi Pu Hmuaka Ser chhip Dinthar, Gate-kawi ami fanu a ni.

2011-09-21T05:44:00.000-07:00

Serchhip Dinthar Veng leiminin National Highway-54 a hnawh ping

Tuntlai (21.9.2011) dar 4 vel khan Serchhip Dinthar Venga Pu Ch.Biak chhunga kawm chhak, National Highway-54 kawngpui ko chu minin, leimin hian motor kawngpui hnawhin lirthei eng chi mah a kaltlang thei lo a ni.
He leimin avang hian hlauhthawnawma hriat a nih avangin UPC(NEI) Pastor Quarters leh Pu Ch.Biakchhunga te chu nimin tlai, thim hlim khan an inthiar chhuak a. Helai leimin pekna leikhi huam chin hi a zau avangin a khi chin hi a min zo a nih chuan heng In 2 te hi a hnawl thei mai dawn niin a lang.
Leimin hi a kal reng avangin mihring tan pawh kea kal kai a hlauhawm a. Leimin lung lumin Pu Ch.Biakchhunga te kawm thlang Pu Zazawna(L) In ban 3 pawh a vawm chhia a. Helai huam chhunga awm In 3 te hi dinhmun hlauhawmah an awm mek avangin zanin pawh hian riak chhuak dawn a ni.
Helai kawng chhak leimin hi tun Pathianni atanga inmung tan kha niin, ruah a sur zel chuan leikhi zawng hi chu a min zawh theih hial rin a ni.

2011-09-21T03:51:00.000-07:00

Public Information Campaign Thenzawlah neih a ni

Nimin(20.9.2011) khan Chief Minister Pu Lal Thanhawlan Press Information Bureau leh I&B Ministry hnuaia Media Units hrang hrang – DDK, AIR, DAVP, DFP, Song & Drama Division, Mizoram Sawrkar leh Mizoram Journalists Association (MJA) te buatsaih Public Information Campaign on Bharat Nirman/ Flagship Programmes Thenzawla Tualvungi Hall-ah a hawng. Hawnna inkhawm hi Pu Mangjangam Touthang, Core Committee Chairman in a kaihruai a ni.

Hawnna thu sawiin Chief Minister chuan UPA sorkar-in thingtlang mite hmasawnna atan programme tam tak a buatsaih a, heng programme leh scheme te hi mipuite hamthatna programme anih angin a kalphung leh a kaihhruaina te chiang taka mipuiin an hriat theihna turin Public Information Campaign hi ruahman a ni a. Chuvangin mipuite pawhin a taka kan chhawr tangkai theih nan heng zirtirna te hi thahnem ngai taka ngaithlaa hriatthiam loh lai te pawh a enkawltu department officer te hnenah zawh nise la, mipuite tana department in duhthusama an enkawl loh pawhin RTI hmangin zawhfiah theih zel a ni, a ti.

He PIC ah hian khual zahawm Pu P. Lalchhuanga, Serchhip DC leh Pu L. Sailo, Serchhip VCP ten thu an sawi a. Lawmthu Pu Lalsiama Fambawl, Dy. Director, I & PR in a sawi bawk.

Bharat Nirman/Flagship Programmes hrang hrang – PM’s New 15-Point Programmes for the welfare of Minorities, PMGSY, Minor Irrigation, NRHM, IAY, SSA, RGGVY , Mid-Day Meal, ICDS, JNNURM, RTI , MGNREGS etc. nihphung leh Mizorama tih hlawhtlin a nih dan inhrilhfiahna/ inzirtirna neih a ni a. Mipui tan Campaign hi a tangkai lehzual nan heng thupui atangte hian Zawhna leh Chhanna hun siam a ni bawk.

He PIC ah hian Govt. Middle School Compound-ah KVIC, KVIB, MSACS, IGNOU, etc. ten Exhibition an nei a. Bharat Nirman/Flagship Programmes hrang hrang te tih hlawhtlin a nihna thlalak phochhuah (Photo Exhibition) a niin Central Media Units ten Photo Exhibition an nei bawk. Govt. Primary School-III Compound-ah Free Clinic neih a ni a. National Rural Health Mission (NRHM) bultumin Aizawl Civil Hospital atangin Doctor Specialist-te he Free Clinic nei tur hian an kal a ni. Heng Exhibition leh Free Clinic-te hi a hmunah Chief Minister hian a tlawh kual nghal a ni.(DIPR)

Tualchhung

2011-09-19T03:59:00.000-07:00

Senior Deptt. meet a tiak
Nimin Pathianni hmanga Presbyterian Kohhran Pastor Bial hrang hrang Senior Department meet hman chu nizan khan a tiak ta.Tarlan tawh angin Serchhip Vengchung Bialin Chhim Veng Kohhran ah an hmang a, Serchhip Bialin Hmar Veng Kohhranah niin, New Serchhip bialin, Bukpui Kohhranah an hmang a ni. He meet-ah hian Bible quiz leh hla hmangtea inelna neih a ni hlawm.

Vengchungah thihna
Nimin zing lam dar 12:20 khan Pi Lalthlamuani(70) w/o Biakmawia Serchhip Vengchung chu cancer avangin a boral a, nimin vek khan vui a ni.
Niminpiah Inrinni khan Pu Lungmuana f/o Zomuana Serchhip Vengchung vek chu cancer vangin a boral a, Inrinni vek khan vui liam a ni. Tunhnai ah Serchhip Vengchungah hian mithi an nei indawt zut a ni.

Iron rod hralhruk mansak
Inrinni tlai dar 4:30 vel khan Serchhip Field No.II Gallery sak nana Pu PC.Van lalsawma Iron Rod hman 2 Qtls lai tur chu naupang 3 in an ruk, thirchhe zawng hnena an hralh chhawn leh tawh man sak an ni a, naupang te hi kum tlinglo an nih avangin man erawh an ni lo.

Martar Day hmang dawn
Naktuk chawhma dar 11 hian Hmar Veng YMA Hall-ah MNF Serchhip Block buatsaihin Martar Day hman a ni dawn a. Dr.R.Lalthangliana MLA-in a rawn hmanpui ang.

2011-09-17T21:33:00.000-07:00

PUBLIC INFORMATION CAMPAIGN (PIC), THENZAWL PROGRAMME

Press Information Bureau leh I&B Ministry hnuaia Media Units hrang hrang - DDK, AIR, DAVP, DFP, Song & Drama Division, Mizoram Sawrkar leh Mizoram Journalists Association (MJA) ten tangtlanga an buatsaih Public Information Campaign on Bharat Nirman/ Flagship Programmes, Serchhip District-a ni 20 – 23 September 2011 chhunga neih tur chu inbuatsaihna a kal tluang zel a. September ni 20, 2011 (Thawhlehni) hian Thenzawl-ah a hnuaia tarlan ang hian programme neih tur a ni ang.

Serchhip District chhunga Public Information Campaign (PIC) hi Mizoram Chief Minister, Pu Lal Thanhawla’n khuallian niin he Campaign hi Tualvungi Hall, Thenzawl-ah zing dar 11.00 hian a hawng ang.

Bharat Nirman/Flagship Programmes hrang hrang - PM’s New 15-Point Programmes for the welfare of Minorities, PMGSY, Minor Irrigation, NRHM, IAY, SSA, RGGVY , Mid-Day Meal, ICDS, JNNURM, RTI , MGNREGS etc. nihphung leh Mizorama tih hlawhtlin a nih dan inhrilhfiahna/ inzirtirna neih a ni ang a. Mipui tan Campaign hi a tangkai lehzual nan heng thupui atangte hian Zawhna leh Chhanna hun awm tura ruahman a ni bawk.

He PIC neih chhung hian Govt. Middle School Compound-ah KVIC, KVIB, MSACS, IGNOU, etc. ten Exhibition an nei ang a. Bharat Nirman/Flagship Programmes hrang hrang te tih hlawhtlin a nihna thlalak phochhuah (Photo Exhibition) a nih dawn bakah Central Media Units ten Photo Exhibition an nei bawk ang.

Govt. Primary School-III Compound-ah he mi ni vek hian Free Clinic neih tur a ni a. National Rural Health Mission (NRHM) bultumin Aizawl Civil Hospital atangin a hnuaia Doctor Specialist –te hi he Free Clinic nei tur hian an kal dawn a ni.

1. Dr. P.C. Lalramliana, Eye Specialist
2. Dr. Lalhmingmawii, ENT Specialist
3. Dr. Lalmalsawmi Hmar, Paediatric Specialist
4. Dr. Vanlalhruaia, Medicine Specialist
5. Dr. Z.R. Thiamsanga, Gyneacology Specialist

Anni bakah hian Nurse-te leh thawktu pawimawh dang engemaw zat an kal bawk ang.

Tualchhung

2011-09-16T05:42:00.001-07:00

Dist.PYKKA Sports khar ta
Serchhip Dist. PYKKA Sports chu nimin khan zawh fel a ni ta. He sports kharna inkhawm hi Field-II ah neiin, Dist. Bawrh sap-in a hmanpui a. Serchhip RD Block chu 1-na niin, E.Lungdar Block 2-na an ni.

Faina Hapta hmang dawn
Niminpiaha DC’s meeting room-a Faina Hapta chungchang Dist. Level meeting chuan, Faina hapta hman tan ni Oct. ni 2 chu kuminah Pathiannia a tlak avangin a tuk Thawhtanni ah VC hrang hrangah hawnga hman nise an ti a. Hapta a ti tha te lawmman hlanna hun Oct. ni 11 ah neih nise an ti a ni.

A nu chhanin electric-in man hlum
Nilaini khan Thenzawl bul, Zote khuaah a Nu chhanin Pu Lalhruaia (32) chu Electric current kalsualin a man hlum.
Pu Lalhruaia hian a nu puan pho seng lai Electric current kalsualin a man chu kut lawngin chhan a tuma, amah zawk chu alo man hlum ta a ni.
A nu Pi Sawichhingi hi Chhipphir PHC ah hruai a ni a, a kal thei lova, biak theih a ni thunga, an tlangban thir zai chu Electric bana thlun a ni a, current kal sual hi tlang ban thirzaiah hian a kal nia hriat a ni.

Pu Laihnawka vuiliam
Niminpiaha boral, Laihnawka(88) f/o R.Kapzauva New Serchhip, Sihphir Veng chu vuiliam a ni. Pu Laihnawka hi Hmar Venga awm thin niin, tunhnai khan a fapa Pu Kapzauva te Inah a awm a ni.

2011-09-12T06:07:00.000-07:00

SERCHHIP DISTRICT LEVEL VIGILANCE AND MONITORING COMMITTEE NEIH A NI

Vawiin chawhma dar 11:00 khan Serchhip District Bawrhsap Committee room-ah Chairman Pu CL Ruala; MP, Lok Sabha leh Co-Chairman,Pu Lalhmingliana; MP, Rajya Sabha hovin District Level Vigilance and Monitoring Committee neih a ni a, Member Secretary Pu P. Lalchhuanga, District Bawrhsap, Project Director, DRDA, Serchhip ni bawk in a kaihhruai a, Hrangturzo Constituency Bialtu Pu Lalthansanga MLA, pawhin a hmanpui a ni.

He meetingah hian Serchhip District chhunga Rural Development Programme hrang hranga hmalaknate thlir ho a ni a, programme hrang hrangah hmasawnna tura siam that ngai laite leh a siam that dan tur te an sawi ho a ni.

He inkhawmah hian Chairman Pu C.L. Ruala chuan MGNREGS hnuaia Job Card chuang a tam thu tun hnaia chanchinbu lama lang zing tak chu a vei thu leh ram mipuite hmel tichhetu ni a a hriat thu a sawi a, theihtawp chhuaha tih tawp a tul thu sawiin corruption intanna a nih thu leh a nihna ang taka sum te hmang turin kalkhawmte a chah a, chutiang ti tur chuan sawrkarin a mi leh sa officer te bak midang chhawr tur a nei chuang lo a ni a ti bawk.

He inkhawmah hian programme hrang hranga hmalakna te kimchang taka sawi ho a ni a, khaw tam takah IAY dawng tur thlan dan a fel loh thin thu leh official ten uluk taka an enpui a ngaih fo sawi lan a ni a, District bawrhsap Pu P. Lalchhuanga chuan he harsatna hi sut kian a nih theih nan meeting a koh tur thu a sawi nghal bawk a ni. Power & Electricity Department hmalakna ah contractor te vil ngun leh uluk lehzuala an hnathawhte official ten an enpui fo a tul thu te uar tak a sawi a ni bawk.

Social Welfare Department hmalakna chungchangah Block leh District ramri then dan leh Department ramri then dan a inmil loh avangin ICDS hna thawh dan chungchangah harsatna a awm fo thu sawilan a ni a, hemi tireh tur leh mipuite tana tangkai lehzual zawka hna thawh anih theih nan Serchhipah District Social Welfare Officer a awm ve a tul thu sawilan a ni bawk.

Chairman chuan Monitoring chungchangah State level meeting neih a khat lutuk chu an harsatna a nih thu leh zing zawka neih theih a nih tawh a beisei thu sawiin, District Level meeting neih anih leh hunah chuan hun thawl zawk siamin worksite inspection neih ngei an tum tawh thu a sawi bawk a ni.

Meeting-ah hian Serchhip District chhunga sawrkar pisa hrang hrang hotute an tel kim hle a ni.

Serchhip ah Samir Uddin na taka hliam a ni

2011-09-12T06:02:00.000-07:00

Nizan (Pathianni zan) khan Serchhip Bazar bul, Ramthlun Veng peng, Kawn Tuikhur bula cheng Samir Uddin chu mi tu tih hriat loh ten khawihin a chalah na taka hliam a ni a, a hliamna hmuamhma hi inches4 vel laia zau niin a thuk zawng pawh inches 2 vel lai niin a lang. Samir Uddin hi Serchhip a a awmna a la rei vaklo nia hriat a ni a, a u nen mi In luahin an khawsa a, hliam a tawrh lai hian a U hi Silchar lama a zin lai niin Police ten an sawi.
Tukin zing khawvar hnu khan Samir Uddin-a rumri hi a thenawm ten hriain kawngka an han hawn chuan a khum leh a thosilen ah te thisen a lo kai nasa mai a, an hmuh tirh hian Samir Uddin hi a la harh tha hle a, tawng pawh a la tawng thei a, mahse amah khawihtu tunge tia an zawhin “Nakinah ka la hrilh mai ang che u” tiin a chhang tlat a, tichuan a thenawm khawveng te chuan a Vai thian te kovin Hospital an panpui ta a, Hospital an thlen hian a biak theih loh zui nghal ta mai a, vawiin chawhma dar 10:30am vel khan Aizawl Civil Hospital an panpui ta nghal a ni.
Salim Uddin-a hliam tawrh chungchangah hian Serchhip Police ah Case Register nghal a ni a, he thu ziahlai thleng hi chuan rinhlelh man an la nei rih lo niin Serchhip Police te chuan Serchhip Times palai an hrilh. Samir Uddin-a In ah hian PHE Tui Pipe hlam chen vel hmuh a ni a, a bak hriamhrei hmuh a ni lo niin Police ten an sawi bawk. source Serchhiptimes

YMA PS tualah pungkhawm

2011-09-07T06:48:00.000-07:00

An Branch YMA chanchinbu Editor Police-in an koh avangin Serchhip Field Veng YMA Branch hruaitu leh member 80 vel te Police Station-ah an pungkhawm.
An Branch huamchhung Field-I a Auditorium sak mekna hmanrua ring-rod chu tun Inrinni zing dar 5 vel khan mipa naupang 3 ten ruk an tum lai Auditorium sak hnathawktu ten nang chingin, an zinga pakhat an man a. Hemi hi Field Veng YMA-ah hlanin,YMA hruaitute chuan hemi tlai vek hian heng naupang 3 te hi an nute kovin an zilh hauva, kut erawh an thlak lova. Hemi hnu hian Pathianni chhuak an YMA chanchinbu-ah he thil thleng chungchang hi chiang taka tarlan a ni a. Naupang 3 ziga 1 chhungte chuan Thawhtanni khan Police-ah FIR thehlutin thil awm dan dik tak chhui chian sak turin FIR-ah chuan an ngen a. He thil kal zelah hian nimin khan YMA Chanchinbu Editor chu koh niin, a thlavang hauh nan Field Veng Branch YMA member-te hi an pung khawm ta a ni.
Hun engemaw chen inbiakna neih a nih hnuah FIR thehluttu hian nimin chhun khan a FIR thehluh chu a hnuh kir leh tak avangin buaina leh harsatna lian thleng lovin an tin darh leh ta a ni.

2011-09-06T04:42:00.000-07:00

SERCHHIP-AH VC TEN 13TH FINANCE COMMISSION CHUNGCHANG ZIRHO

Local Administration Department, Serchhip District bul tumin vawiin nilengin Serchhip DC’s Conference Hall-ah Village Council-te pualin 13th Finance Commission kaltlanga khawtlang tihhmasawnna tur atana sum ruahmante zirchianna neih a ni a, Serchhip District chhunga khaw hrang hrang aiawh Viilage Council President leh Treasurer te an tel kim hle a ni.

Vawiin Training hawnna inkhawm hi Pu S.T. Lalhmingmawia, DLAO Serchhip-in kaihruaiin training tura kalkhawmte hriattur pawimawh leh training kalphung sawifiahna hun a hmang a, VC te chu an hnathawh atanga mipuiten VC tha an nih leh nih loh an the thin avanga fimkhur a tul thu the, 12th Finance Commission hnuaia sum hmuh atanga VC hrang hrangte hmalakna pawh tha thawkhata a hriat thu leh an hmalakna report te, thlalak an thehluh atangte a enin sum hmuh leh hnathawh in ang rau rauvah VC hrang hrangte kuthnu a in ang lo thin hle tih sawiin tan la thar lehzual turin a chah a, VC-te chu khawtlang thatna tur atana an thuneihna hmang tangkai thiam tur leh lang tlang taka thawka lepse pawh cho hliah hliah turina chah bawk a ni. Faina chungchanga VC te hmalakna fakin nasa lehzuala hmasawn tum turin a ngen bawk a ni.

Thusawitu dang Pu Lalfakzuala, Additional D.C pawhin VC kalkhawmte chu training ngaipawimawh turin leh ho lam taka namnul mai mai lova, tuina rilru tak tak nena an ngaihtuahna te seng turin a chah a, an thil zirte chu a taka hmang tangkai nghal thei ngei turin leh an lungawina khawpa chinga thil an hriatthiam hma chuan lungawilo turin a chah bawk a ni.

Vawiina Training hi hun hnih a then niin hun hmasa zawkah chuan 13th Finance Commission atanga khawylang hmasawnna hna thawhna tur sum hmuh chungchang zir chian a ni a, hnathawh dan tur te, sum vawn dik dan chungchangte leh thil pawimawh tam tak an zir a ni. Hun hnihna ah hian Village Council Election chungchang inzirtirna hun hman niin enrollment chungchangte leh thil pawimawh dang tam tak an zir a ni.

Vawiina training pek an nih bakah hian, Serchhip DLAO staff-te chuan inthendarhin Serchhip District chhunga khawtinte tlawhchhuak veka zirtirna an khua ngeia pe turin ruahmanna an siam bawk a ni.

2011-09-05T05:51:00.000-07:00

SERCHHIP-AH TEACHERS’ DAY GOLDEN JUBILEE ROPUI TAKA LAWM A NI

Vawiin (5.9.2011) khan Serchhip DC Office tualzawlah Teachers’ Day vawi 50-na (Golden Jubilee ropui taka lawm a ni a; He hun hi District Bawrhsap Pu P.Lalchhuanga chuan khuallian niin a hmanpui a, he hunah hian Serchhip District chhung atanga Zirtirtu tha chawimawina (National & State Awards) lo dawng tawh mi pathuim hnenah chawimawina hlan an ni a, Serchhip khawpui chhunga zirna in hrang hrang atangin zirtirtute an tel tha hle a ni.

Vawiin Teachers’ Day lawmna inkhawmah hian India Prime Minister Pu Manmohan Singh-a leh Pu Lalsawta, Mizoram Education Minister ten Teachers’ Day puala thuchah an siam chuan zirlaiten an chhiarchhuak a, District bawrhsap Pu P.Lalchhuanga pawhin Teachers Day tobul bengvar thlak tak sawi langin ramhruaitu ropui leh zirtirtu chhuanawm Dr. Sarvepalli Radhakrishnan duhthusamte tihlawhtling turin zirtirtute a cho thar leh a ni.

Bawrhsap chuan zirna hlutzia sawiin zirna hi a thlakna tur (substitute)atana a tlukpui dang awm lo, nu leh pa ten fa te hnenah an thilpek theih hlu ber te zing ami a ni a ti a, hmalam hun atana inruahmanna (future investment) awmze nei leh tangkai ber anih avanga zirtirtute mawhphurhna san zia leh pawimawhzia tarlangin, zirtirtute chu inthlahdah lova tang mar pat tur leh khawvel hmasawnna mil ang zela an finna leh an thiamnate tipung zel turin a fuih nghal bawk a ni.

Vawiin Teachers’ Day Golden Jubilee lawmna inkhawmah hian Serchhip District chhung atanga National Award for Teachers dawngtu mi pakhat leh State Award for Teachers dawngtu mi pahnihte hnenah chawimawina thuziak Bawrhsap Pu P.lalchhuanga’n a hlan a, heng zirtirtu ropui chawimawi te hi ;

1) Pu R.Lalruala, Headmaster (Rtd)
Government Bungtlang Primary School-I
National Award for Teachers, 2001
2) Pu V.Thanhranga, Teacher (Rtd)
Government Serchhip Middle School
State Award for Teachers, 1998
3) Pi Lalramthangi, Headmistress(Rtd)
Government Khumtung Primary School-II
State Award for Teachers, 2002, te an ni.

Vawiina Teachers’ Day Golden Jubilee lawmna in khawm hi zirlaiten kaihruaiin, Serchhip town area a Zirna In hrang hranga zirlaiten an talent leh thiamthil chi hrang hrang benglut leh mit ti tlai tak atak an entira, Serchhip Sub-Headquarters YMA Cultural Troupe ten Mizo hnamlam chi hrang hrang hmuhnawm tak an entir bawk a, zirtirtu he hun hmanga kal zawng zawngte hnenah chawimawina zirlai ten an hlan theuh bawk a ni. Serchhip khawchhunga sawrkar pisa hrang hrang hotute leh tlawmngai pawl hrang hrang hruaitute pawhin he hun hi an hmanpuia, Pi Lallianzuali, SDEO in lawmthu sawina hun a hmang bawk a ni.

Serchhipah TB natna veite enkawl dan training neih a ni

2011-09-02T06:03:00.000-07:00

Nihnih awh Ngawr (TB) natna veitute enkawl dan tur inzirtirna chu Christian Medical Association of India leh YMA Sub-Headquarters, Serchhip tangkawp buatsaihin Chief Medical Officer’s Conference Hall, Serchhip-ah nimin leh vawiin nileng khan neih a ni a, YMA Sub-Headquarters, Serchhip huam chhunga YMA Branch hrang hrang aiawh mi thahnem tak an tel a ni.

Nimin September ni 1, 2011 khan “Capacity Building of CBO’s, Serchhip” ti a vuah training hi Lalrempuii Fanai, District Coordinator , Christian Medical Association of India chuan kaihruaiin, Dr Lalhlunpuii, District TB Officer -in TB chung chang, a lanchhuah dan, a enkawl dan te leh MDR-TB, HIV-TB chung chang te a sawi a, Dr. T. Lalhlimpuii, District Programme Manager, NRHM chuan midangte nena thawhhona tha neih theih dan tur (communication skills) kawng kawhhmuhin zirtirna a pe bawk a ni.

Vawiin nilengin Training hi neih chhunzawm niin chawhma lamah Pu H. Laltanpuia, Senior Treatment Supervisor, District TB Centre, Serchhip in Directly Observed Treatment, Short Course ( DOTs) leh a ei dan kimchang a sawi a, chawhnu lamah Lalrempuii Fanai, District Coordinator, CMAI-in TB natna leh a kaihhnawih thila mipuite zirtir chhawn leh dan tur te, natna enkawl dan tur chung changa Trainee te mawhphurhna leh hriat tur hrang hrang te a sawipui bawk a ni.

Kum 2010 khan Serchhip District chhung ah TB damlo mi 52 enkawl an ni a, TB vanga nunna chan mi 4 an awm bawk . Kumin kum tan tir atanga August ni 31 thleng khan Serchhip District chhung ah TB vei enkawl lai mi 45 an awm a ni.

Christian Medical Association of India(CMAI) hi kum 1905 ah Indian rama Christian Missionary ten a huhova Pathian rawng an bawl theih nan leh miin thlarau leh taksa a damna an lo chan theih nan Medical Missionary Association tih hming pu in an din a. Kum 1926 ah a hming hi Christian Medical Association of India(CMAI) tiin thlak a ni ta a ni.

CMAI hian HIV/AIDS, Malaria, Women issue, Disaster Response, Substance Abuse leh TB lamah India ram pumah hma a la mek a, TB Project bik hi ‘Project Axshya’ tiin a hming hi vuah a ni a. He project bik atan hian Serchhip District chhungah YMA Sub-Headquarters, Serchhip, Serchhip Area Baptist Council, Ramlai Presbytery leh Chhimchhak Presbytery te nen MOU sign tum mek a ni a.Mipui te TB natna chungchang zirtirna ngunthluk taka pek thin a ni. Lunglei District ah pawh Lunglei South Area Baptist Council ( ABC), Lunglei North ABC, Hnahthial ABC leh Buarpui ABC te nen MOU sign tum mek a ni.

Mizoramah he project hi kumin April atang khan tan niin Lunglei, Serchhip, Mamit, Kolasib leh Champhai District ah te he project hi kalpui mek a ni a, nakum ah Aizawl, Lawngtlai leh Saiha District ah pawh hma lak tum a ni.

Mizoram Larsap thar lakluh a ni

2011-09-02T05:57:00.000-07:00

Mizoram Governor thar Pu Vakkom B. Purushothaman chu vawiin tlai dar 5:15 khan Raj Bhawan Durbar Hall-ah Gauhati High Court Chief Justice, Justice M B Lokur chuan rinawmna thu tiam tirin lakluh a ni ta.
Kum 83 a upa dan hremi, politician hlun, Kerala Assembly a MLA, Minister leh Speaker lo ni tawh, MP Lok Sabha leh Andaman and Nicobar Islands a Lt. Governor hna lo chelh tawh Mizoram Governor atana lakluh inkhawm tawi fel leh urhsun takah hian India President in Mizoram Governor ni tura a ruatna chu Chief Secretary Pu Van Hela Pachuau chuan a chhiar chhuak hmasa a. Gauhati High Court Chief Justice, Justice MB Lokur in saptawnga thu tiam tirin lakluh a ni ta a ni.

Lakluh inkhawm anih zawh hian Larsap thar hian chanchinbu mite a kawm nghal a ni.

Larsap thar hi April ni 12, 1928 khan Vakkom khua Kerala ah a piang a. Kum 1946 khan student Congress-ah lutin, 1953 khan Vakkom Panchayat hruaitu atana thlan a ni a. President DCC Thiruvananthapuram, General Secretary leh Vice President KPCC nihna te lo chelh tawhin, kum 25 chuang zet AICC member a ni tawh bawk.

Kum 1970, 1977, 1980,1982 leh 2011 ah te khan Attingal Constituency atangin MLA a thlan tlin niin Ministerial Porfolio hrang hrang a lo enkawl tawh thin a. Kum 1982 – 1984 leh kum 2001 – 2004 chhung khan Speaker Kerala Legislative Assembly a ni a. Kum 1984 – 89 leh 1989 – 91 chhungin Lok Sabha MP a ni leh a. MP ni chung hian Chairman, Committee on Public Undertakings leh Committee on Subordinate Legislation of Parliament bakah kum 5 chhung Chairman Consultative Committee of Experts to the CIDP of Inter Parliamentary Union, Geneva a ni tawh nghe nghe a ni.

Larsap thar hi kum 1993 khan Lt. Governor, Andamans & Nicobar Islands a ruat niin kum thum vel he hna hi a thawk a. Kum 1996 khan Global Conference on the Sustainable Development of Small Island Developing States, Barbados a neih ah Indian Delegation hruaitu a lo ni tawh bawk a ni.
Larsap nupui hi Dr. Lily Purushothaman a ni a, fapa pahnih leh fanu pakhat an nei

Tualchhung

2011-09-01T04:07:00.000-07:00

Iddul Fitter hmang
Muslim sakhaw vuantute ni pawimawh ‘Iddul Fitter’ chu nimin khan khawvel pumah urhsun taka hman a ni a. Serchhip ah chuan Assam Rifles camp chhungah Muslim sakhaw vuantu ten tawngtai rualna hun an hmang a ni.

Khawtetlang field ni 15 atangin
New Serchhip Playground & Building Committee thukhawm chuan Khawte tlang Field-a phûl phun chuan a nih dan tur ang a ni zo tawh nia hria-in, Sept. ni 15, 2011 atang hian hman theih tura hawn leh tawh nise an ti a. Field hming tur rawt theih hun hawn nise a ti a, September ni 11 thlengin Committee Chairman leh VCP ni bawk, Pu S.Zoliana hnenah ziakin a duh apiang tan rawtna thehluh theih a ni a, rawtna lut atang hian Field hming tur hi thlan a ni ang.

Smoke free Office
Ni 26 August, 2011-a Serchhip Dist. Anti-Tobacco Squad-in khaw chhunga sorkar Office hrang hrangte tlawhkuala meizuk lohna (100% Smoke Free) Office 7 an thlang chhuak anga tarlan chu Meizuk lohna hmun an thlang ni lovin, heng Office 7 te hian an Office chu meizuk lohna hmun ni turin an intiam tihna zawk a ni tih Dr.Malsawma, Member Secretary, Anti-Tobacco Squad, Serchhip District chuan a sawi a. Anti Tobacco Squad hian hetianga meizu lo tura intiam thei hi an la zawng zui zel dawn tih a sawi bawk.

Ramthar Ni hmang
Nimin kha Presbyterian Koh hran Ni pawimawh ‘Ramthar Ni’ a ni a. He Ni pual hian Kohhran inkhawm neiin, urhsun taka hman a ni. He Ni hi Mizo rama Presbyterian Kohhran dintu Wales Missionary Zosap hluia’n kum 1897 Aug. ni 31-a Mizoram a rawn luh ni niin, Ramthar Ni tia vuah a ni ta a ni.

Beihrual thla
Mizorama Kohhran hrang hrangin an lo hman thin angin tun thla thar September thla chhung hian ‘Beihrual Thla’ hman a ni leh dawn a. Kohhran hrang hrangte chuan zanin atang hian thupui thlan bik hmangin hun an hmang tan leh dawn ta.

Sub-Hqrs. YMA Serchhip ten Legal Awarness Campaign Cum Media Workshop nei

2011-08-31T04:20:00.000-07:00

Vawiin (31.8.2011)chawhma dar 11 khan Sub-Hqrs. YMA Serchhip hnuaia Legal Committee buatsaihin Serchhip Town chhung leh Direct a Sub-Hqrs. YMA in a awp Bungtlang leh Keitum a Branch YMA Chanchinbu enkawltute pualin Zoluti Hall, Serchhip Vengchung ah Legal Awarness Campaign Cum Media Workshop neih a ni a, Resource Person ah Pu Andrew H.Lalremruata MIS, Dist. Information & Public Relations Officer niin Resource Person bakah hian Pu T.Lalhmachhuana Judicial Magistrate, Serchhip Dist. leh Pu T.J. Lalnuntluanga Advocate, Sub-Hqrs. YMA Legal Adviser thar ni bawk te, Pu V.Tlangthuama Sub-Hqrs. YMA Fin. Secretary ten thu tha tak tak an sawi bawk.
Vawiin a Legal Awarness Campaign Cum Media Workshop neih hi Legal Committee Chairman Pu Kapliana Pachuau, Serchhip Times Editor ni bawkin hneh takin a kaihruai a, Pu Andrew H.Lalremruata’n chanchinbu enkawl chungchanga hriattur pawimawh Paper a buatsaih zir hovin Dan lampang chungchangah nen zawhna leh chhanna hun thawl tha tak an hmang bawk a, kalkhawm ten hlawkthlak an ti hle.
He Legal Awarness Campaign Cum Media Workshop ah hian tunlaia Central YMA in Mizo hming hawhna Dan lova hnamdang sumdawng te chungchang pawhin sawi a hlawh hle a, Pu T.Lalhmachhuana Judicial Magistrate leh Pu T.J. Lalnuntluanga Advocate, Sub-Hqrs. YMA Legal Adviser te chuan YMA te chu Dan hnuaiah Dan leh Thupek kengkawhtute phungbawm a sawmin ILP leh Trade Licence check chungchangah pawh an duhdanin hma a lak theih reng a ni an ti a, mahni duh thu a Dan lo lekkawh ve mai erawh a him ber lo tih an sawi bawk.

Tualchhung

2011-08-31T04:12:00.000-07:00

Legal & Media workshop
Vawiin chawhma dar 11 hian Zoluti Hall Vengchungah Legal Committee YMA Sub-Hqrs. buatsaihin Legal Awareness & Media Workshop neih a ni dawn a. YMA Branch chanchinbu enkawl tute leh hruaitute sawm an ni.

Seminar nei dawn
Vawiin chawhma dar 10:30 hian Serchhip Hmar Veng YMA hall-ah SEDAL buatsaihin ‘Leng lal Saihnuna’ Seminar neiin, Saihnuna thu leh hla te zir ho a ni ang a. SEDAL lehkhabu buatsaih ‘SEDAL Robawm’ tlangzarh a ni bawk ang.

Pi Zadingi a boral
Nimin tlai dar 4:15 khan Zadingi(37) d/o Hranghulha Dinthar Vengsang chu Kalna avangin a boral a, lumen a nih hnu vawiin hian vui a ni ang.

Iddul Fitter chawlh
H Vawiin hi Muslim sakhaw vuan tute ni pawimawh ‘Iddul Fitter’ niin sorkar pisa chawlhah puan niin, pisa leh zirna inte khar a ni ang.

SHG training
Nimin khan IWMP Serchhip-I hnuaia Self Help Group ten DRDA Conference Hall-ah training an nei. He training hmanpuitu Proj.Imple menting Agency Pu R.Lalramliana chuan IWMP chu awmze nei leh tangkai taka kalpui tum a nih thu a sawi.

CMAI training pe
Christian Medical Association of India te chuan damdawi lama thawk tu ten thiamna hmantlak an neih theih nan Serchhip Damdawi Ina thawktute pualin nimin khan CMO Conference hall-ah zirtirna an pe.

Politics boruak awm
Tunlai hian Serchhipah Politics boruak inlumlet chho awmin, nimin khan MNF Gen.Hqrs. hruaitute bakah PC hruaitu ten Serchhip rawn tlawhin, tunlai politics an party mite an sawipui.

14thAssam Rifles ten Weapon Display nei

2011-08-30T04:41:00.000-07:00

Vawiin (30.8.2011)chawhnu dar 2 khan Serchhip a inkhuar 14th Assam Rifles te chuan Govt. High School, Serchhip ah zirlai naupang te pualin Indian Army leh Assam Rifles a luhdan an zirtir a, he huna thusawitu 14th Assam Rifles Commandant Col. Ratnakar Trivedi chuan “Sipai a tan hi eizawnna tha tak a nih bakah ram leh hnam rawngbawlna pawimawh tak a ni” a ti a, Assam Rifles te chu “Friends of the Hill People – Tlangmite thian” an intih ang ngeiin an awmna hmun apiangah Civil mite nasa taka an tanpui thin thu a sawi a, Mizoramah pawh an theih ang anga Mizo te tanpui tura an inkau reng thu a sawi bawk. He hunah hian zirlai 250 chuang zet an tel a ni.
Vawiin a 14th Assam Rifles te’n Govt. High School, Serchhip zirlai te puala sipai tandan an zirtir pah hian an ralthuam neih te phochhuahna – Weapon Display an neih zui nghal a, zirlai ten an hlut hle.

2011-08-30T04:39:00.001-07:00

LARSAP LT.GEN (RETD) M M LAKHERA’N MIZORAM MIPUI TE HNENA A THUCHAH

Thian Duhtakte U, Zaninah hian rilru khingbai takin in hmaah thu ka sawi a lo ngai ta. A chhan chu Mizorama ka hun hman theih chin a lo zo dawn ta a, ka awfis chhuahsanin September ni 1, 2011 hian Mizoram ka chhuahsan alo ngai dawn ta a ni.

Mizoram ka rawn thlen tirh phat khan nuam ka ti in ka tlangnel nghal hle mai a Khawtual mi ang chiahin ka in ngai nghal a ni. Uttarakhand tlangram a piang leh seilian ka nih avangin Mizoram pawh hi ka tan chuan a danglam vak bik lova, ka in pahnihna ah ka ngai hmin nghal hmiah mai a ni. Mizoram chhung district hrang hrang pariat te hi ka tlawh kim vek tawh a, Mizo mipuite ngainatawmna leh rilru thatnate, mikhual chunga in ngilneihzia te leh min duhsak ziate hi ka dam chhungin ka theihnghilh tawh ngai lovang.

Mizoram hian hmasawn turin hamthatna tak a nei a, heng theihna leh hamthatnate hi in haichhuah a chak taka hmasawnna atana in hman ngei ka ring nghet tlat a ni. Pathianin Mizoram hi a duhsak a, hmalam hun eng tak in neih theih nan ram zau tak, , sik leh sa nuam tak, duhthusam a tha a pe che u a. In chakna chu hmun dangah nilovin he in ramah ngei hian a awm a. Sik leh sa dinhmunin a zir em avangin ram ngaw leh thlai behchhanin industry chi hrang hrangte hmanga eizawnna leh hnathawh tur tam tak a siam belh dawn a ni.

Mizo thalaite u, tu hnuaiah mah in awm bik lo ani tih ka hrilh duh che u a, hlawhtlinna sang ber ber tawng pha turin theihna leh chakna in nei. Mahni inringtawk ula, intheihna kha ring tawk bawk ang che u, hlawhtlin tumna rilru nghet pu ula, taimakna leh thawhrimna, tawrhchhelna leh inpumpekna dik nena in tih phawt chuan in hlawhchham ngai lovang tih ka tiam a che u. Hriatna zau zawk leh thiamna sang zawk nei turin Mizoram pawna chhuah hreh suh ula, Mizoram chhungah inkhung bo lovin khawvel zau zawk hi dai dar ula, khawvel ngamtu nih tum ang che u. Infiamna bikah phei chuan India ram mai nilo, khawvel huap pawhin Mizo thalaiten hmelhriat an hlawh tan mek a, in theihna te tipung zelin kawng tinrengah Mizoram tihmingthatu ni ang che u.

Mizo mipuite u, in thinlunga remna thu in ziah kha chhawm nung zelin tihlu zel rawh u, remna leh muanna zar zotu dik tak in nihzia hi India ram mai nilo, khawvelin rawn hmu in entawn che u rawh se. Zonun zemawi “Tlawmngaihna”, mahni inphata midangte tana malsawmna thlentu nihna, hi chhawm nung zel ang che u.

Mizo mipuite tawiawmna leh thlawpna tha tel lo chuan Mizorama ka hun kha ka hmang tluan thei dawn lo tih hi ka hre chiang em em a. In mi tawiawmna leh thawhpuina tha tak avangin ka thinlung tak takin in chungah lawmthu ka sawi a ni. September 2008, a ka nupui thluaka bawk awm zai anih tum leh kumin February thla a ka lung zai (by-pass graft surgery) anih tum a Mizo mipuite min tawngtaisakna, hmangaihna, duhsakna leh min ngaihtuahna zawng zawng te avang khan lawmthu ka sawi a, in mi duhsakna leh thlamuanna zawng zawngte kha kan nupa leh kan chhungkaw tan chakna min petu, hun harsa leh khirh pawh huaisen taka min pal tlang tir tu an ni. Lawmthu sawisen loh Mizo mipuite chungah kan ba a ni.

A tawp berah chuan Mizorama ka awm chhunga hun nuam leh hlimawm tak min hmantir avangin in zavaiin lawmthu ka hrilh nawn leh che u a ni. In zavaiin hmalam hun hlimawm leh nuam tak nei theuh turin duhsakna ka hlan a che u.

Dam takin, Mangtha vek u le.

Tualchhung

2011-08-30T04:33:00.000-07:00

Pu Muana vuiliam
Nizan hmasa dar 8:45 khan Pu Lalthlamuana(46) h/o Laldinpuii Ser chhip P&E Veng chu Lung na avangin a boral a, lumen a nih hnu nimin khan vuiliam a ni.

Anita-i lawmpui
13th Female National Wrestling Championship neih zawh taka Mizoram tana Gold medal rawn hawntu Anita Lalsiamkimi d/o Rengkhuma Serchhip Chanmari Veng chuan nimin khan Serchhip a rawn thleng a, Dist.Wrestling Association buatsaihin amah lawmna inkhawm Serchhip Bazar tuala neihah chawimawina leh lawmpuina hlan a ni.

Legal Awareness
Naktuk Nilaini khian Zoluti Hall Vengchungah dan leh hrai zirna Legal Awareness Campaign neih a ni dawn a. A duh apiang tel tura sawm an ni.

Lawrkhawm

2011-08-29T04:08:00.000-07:00

Bru hel an inpe
Zirtawpni khan Kanhmun PWD InspectionBangalow-ah Bru Libera tion Army hel pawl a mi, Lt. Bisuram leh Corporal Romasai Reang te Pu H. Sangawia SP, Mamit kutah an in pe.Heng Hel pawl inpe-te hnen atanga thudawn SP Mamit-in a sawidan chuan hel inpe te hian 9mm Pistol-2, Magazine-4 Pistol mu -10, AK-47 mu-41, leh SLR mu-48 an surrender pui bawk a ni.

CM-in ILS a enfiah
Chief Minister Pu Lal Thanhawla chuan Zirtawp tlai khan Lengpui Airporta khaw chhiat pawha thlawhna tum tir leh thlawhchhuah tir theitu, Instrument Landing System (ILS) bun fel tawh chu a hmunah a en. Chief Minister chuan Mizoramin Airport puitling nei tura hma alo lak tawhna thin te sawiin, mithen khatin fiamthu thawh nan an hman thin thu sawiin, India rama state sorkar siam leh state sorkar ta airport awm chhun kan nei thei hi Pathian hna thawh a ni a ti.

Tui tla ruang zawng
Inrinni zing dar 7 leh dar 8 inkar khan Bawngthah kai chhakah Thingzaia ramriak Muanga(20) chu Tlawngluiah a tla a, a ruang hi nimin thleng khan Bawngthah YMA leh helai chhehvel tlawmngai ten zawn hna hi an thawk a, tui a tam avangin ruang zawn a harsa hle nia sawi a ni.

Tui tla zawng tuiah tla hlum
Zirtawp tlaia Chhimluang luia tla 5th IR Police Nak.Vanlalrema(37) Chite Veng ruang zawngtute zing ami Lalbiaknunga(23) Sairang Venglai chu nimin khan luiah che sualin a tlahlum ve leh. Lalbiaknunga ruang hi a tlak hnu rei vak lohvah hmuh nghal a ni a, a tla lai hmu an awm lova, tui a luhna lamah a chesual ta nia rin a ni. A ruang hi zanin lumen a nih hnuah vawiin hian vui a ni ang.

Hazare chaw nghei ti tawp
Lokpal Bill siam danglam a duh avanga ni 12 chhung chaw nghei Anna Hazare chuan nimin zing, a ni 13-na ah khan coconut leh khawisu chawh pawlh, naupang 2 pek in in a chaw nghei a ti tawp ta. Hetianga chaw nghei a tih tawp tak chhan hi Parliament In 2-a member ten Lokpal chungchang an ngaihtuahho hnuah Anna Hazare-a thil ngiat 3 telh an remtih tak vang a ni. Hetihlai hian Political party hrang hrangte chuan Hazare-a’n a chaw nghei a ti tawp ta chu lawmawm an tih thu an sawi a ni.

2011-08-26T06:51:00.001-07:00

SERCHHIP ANTI-TOBACCO SQUAD TEN MEIZU AWMLOHNA (SMOKE-FREE) SAWRKAR OFFICE THLANG

awiin khan Serchhip District Anti Tobacco Squad te chuan Serchhip District chhunga sawrkar pisa hrang hrang te tlawh kualin meizuk awmlohna (100% Smokefree) office an thlang chhuak a. Heng sawrkar pisa thlanchhuahte hi chu :

1) Chief Medical Officer\'s Office
2) State Bank Of India, Serchhip Branch
3) Apex Bank
4) District Horticulture Office
5) Excise & Narcotics Office
6) I&PR Office
7) Executive Engineer\'s Office, PWD

Hei bakah hian NEREFS office pawh thlan tel a ni a, heng pisa hrang hrang hnenah hian meizuk ngailohna (100% Smokefree) office a puan an nih chawimawina thu ziak hlan an ni. Serchhip khaw chhunga heti zat meizuk awmlohna office thlan chhuah tur an awm hi Vanlalzari, District Coordinator, Mizoram State Tobacco Control Society chuan lawmawm a tih thu sawiin, heng office chhuanawm tak tak te hi office dangte pawhin entawna 100% Smokefree nih ve tuma tan la turin a ngen a ni.

Sub-Hqrs.YMA Serchhip in Kumpuan ah Khawtlang Nun Siamthat an thlang

2011-08-26T06:49:00.000-07:00

Vawiin (26.8.2011) khan Chhiahtlang YMA Library Hall ah Sub-Hqrs. YMA, Serchhip ten Executive Meeting, nilengin an nei a, YMA General Conference Agenda tur te thlifimin Special Item nei tur te an thlang fel nghal bawk. He Meeting ah hian Central YMA inthlan lo awm turah Dan bu in a sawi angin mi 3 Nominate siam ve nise an ti a, chungmite chu Pu T.Sangkunga, Pu JH Zoremthanga leh Pu Lalbiakzuala te an ni. Kolasib a YMA General Conference lo awm turah Sub-Hqrs. YMA Zaipawl leh Cultural Troope te tirh ngei nise an ti bawk.
Tin, YMA General Conference Agenda atan 1) Sorkar hian Ruihhlo Khuahkhirhna Dan tha zawkin siam rawh se, 2) Mizoram Contractor chhe lutukte hremna dan sorkar in siam rawh se tih te leh 3) Foreigner Electoral Roll a awm mek te paihchhuah an nih theihnan C.YMA in hma la rawh se tih te an pass a, YMA Kumpuan ah “Khawtlang Nun siamthat” tih lungrual takin an passed bawk.

Tualchhung

2011-08-26T06:37:00.001-07:00

College week hawng
Nimin atang khan Govt. Serchhip College chuan week an hmang tan a, chaw hma dar 10 khan Principal-in Khawtetlang field-ah week hi hawngin, infiamna tam zawk chu Field-II ah khelh a ni ang.

SAROA Assembly
Nimin khan Serchhip Auto-Rickshaw Owners Association ten New Serchhip YMA Hall-ah Assembly hmangin, an pawl inkaihhruaina hrang hrang sawiin ro an rel a. Chawhnu lamah hruaitu thlang tharin hengmite hi thlan an ni :
President : R.Malsawmtluanga
Vice Pre. : Biakchungnunga
Secretary : C.Ramengmawia
Asst.Secy. : F.Lalchungnunga
Treasurer : Lalchhuanpuia
Fin.Secy. : Lalzuiliana

Headmaster an thlah
Nimin khan Modern Middle School Headmaster Pu V.Tlangthuama, Govt. Middle School Vengchunga awm tur thlahna hun hman a ni.

Inbiak chhunzawm tura nawr nan kawng zawh a ni

2011-08-25T06:56:00.000-07:00

Mizoram Dist. 2-a Hmar chen tamna khaw 3 ah vawiin (25.8.2011) khan HPC(D) Mizoram sorkar inbiak chhunzawm tura nawr nan kawng zawh a ni.
Sinlung Council hnuaia All party Jt. meeting invuah huaihawtin Aizawl District-a Sakawrdai leh Suangpuilawn bakah Kolasib District-a Saiphai khuaah te kawng zawh a ni a. Kawng zawhtute hian resolution in ang an siam chu pass-in, remna leh muanna nei tura Mizoram sorkar leh HPC(D) te inbiakna chu chhunzawm leh ni rawh se an tih bakah kum 1994-a Mizoram sorkar leh HPC(D) te inremna lo siam tawhte chu tih puitlin ni rawh se an ti a ni.
Heng kawng zawhna hmunah te hian thil duhawm lo thleng hriat tur a awm lova, hriat danin Sakawrdaiah mi 500 atanga mi 600 velin kawng an zawh a. Saiphaiah mi 400 velin kawng hi an zawh a ni.
Hemi hma nikum November ni 11 khan Mizoram sorkar leh HPC(D) chuan inremna lailawk siamin, HPC(D) chuan a hel zawnga chetna reng reng thla 6 chhung atan tih tawp a remti a. Amaherawhchu he inremna hi bawhzui a ni leh tawh lo nia sawi a ni.

Natna hrik laka buh ven dan inzirtir a ni

2011-08-25T06:53:00.000-07:00

Natna hrikin buh a bei tih hmuhchhuah a ni
Serchhip 25th Aug. 2011 : Mizoram sorkar-in buh thar tam kum a puan zawhzuina kalzelah tun thla ni 23 atang khan Serchhipa Agriculture Deparment chuan ni 3 chhung awh tur natna hrik laka buh ven dan training a buatsaih a, he training hi nimin khan field visit neiin zawh fel a ni.
He training hi FIAC, Agri. Complex Serchhipah neih niin a nikhatna ah hian Theory-in zirtirna hi neih a ni a. Pu Lalnithanga APPO Aizawlin zirtirna pein, he training-ah hian field staff leh WDT mi 20 an tel a ni.
Nimin khan field visit neiin, Thuhruk leh Zawlpui zaua leilet hrang hrangte tlawhkual a ni a. Nimin khan Chekawn leh North Vanlaiphaia leilette tlawh lehin, leilet hrang hranga buhte hi natna hrikin a bei tan tih hunah hian hmuhchhuah a ni. Leilet neitute chu Agri.Office-ah rannung venna hlo la tura hriattir nghal an ni bawk.
Nikum 2010 khan Serchhip Dist.ah hian buh qtls.63900 thar niin, kumina buh thar tam kumah hian qtls. 1,11,255 thar theih beisei a ni.
Serchhip Dist. ah hian ram hactare 336-a zau ah mi 554-in SRI-in buh an ching a, Improved method-in mi 336 in ram hactare 254 a zau ah buh an ching bawk a. Hei hi Serchhip Dist. puma leilet za zela 89 a tling phak a ni. Kuminah hian buh tam zawk thar chhuah anih theih nan Serchhip Dist.ah hian fertilizer chi hrang hrang qtls.1464 lai pekchhuah a ni tawh a. Hei bakah hian weedicides, hnim thlawhna hlo litres 1400 zet pekchhuah a ni tawh a, rannung kahna tur sprayer 86 sem tura ruahman a ni bawk.
Vawiina field visit neihnaah hian Chekawn FMC leh N.Vanlaiphai FMC hruaitute kutah sprayer pek an ni.

Tualchhung

2011-08-24T06:20:00.000-07:00

Alkatra rutu man an ni
Kawngpui siamna tur Alkatra barel 8 Serchhip PWD Division Office tuala dah leh hmun dang amite pawh lo ru tawh nia puh mi 8 chu Police ten an man. An mi man te hi Lalchhuanmawia Lawngtlai-III nia insawi leh a bul tumtu nia puh Anu Hussain Lunglei Electric Veng nia insawi bakah an mi chhawr lai mi 6 an ni.

Pi Chalngeni a boral
Nimin tlai dar 5:20 khan Chalngeni(71) w/o Saiaithanga Field Veng chu cancer avangin a boral a, lumen a nih hnu vawiin hian vui a ni ang.

Sazuar Assembly
Vawiin hian Hmar Veng YMA hall-ah Sazuar Association ten Assembly hmang in, chawhnu lamah MJA kaihhruaiin hruaitu an thlang dawn.

Tualchhung

2011-08-23T02:06:00.000-07:00

AH & Vety-in NLUP an sem
NLUP hnuaia Ar leh vawk vulh thlang tute hnenah a thawhhnihna atan nimin khan Serchhipa AH&Vety Department chuan tanpuina a sem chhuak.Tanpuina hi Ar vulh thlangtu chhungkaw 15 hnen ah Ar note leina tur Rs.6000 theuh semin, Vawk vulh thlangtu chhungkaw 39 hnen ah vawkpui tur vawk note 2 leina tur Rs.6000 a sem chhuak bawk. Tanpuina te hi Vanchengte, Sialhau, Hriangtlang Bungtlang Serchhip-III, IV leh New Serchhip VC huam chhunga thlan bik ten an dawng a ni.

Teachers Day meeting
Nimin khan DC hovin Teachers Day lo thleng tur hman dan tur chungchang sawia, meeting neih a ni.

School Office a kang
Thenzawl Higher Secondary School Office building chu nimin zing dar 3:30 vel khan a chhung bungrua engmah chuh hman lovin a kangral vek. Kangmei chhuah chhan hi hriat chian ni lo mahse a kan dan atangin electric current kalsual palh vang nia rin a ni.

Tualchhung

2011-08-22T06:29:00.000-07:00

Bible Quiz result
Serchhipa Cable Network TT.Vision in naupang puala BIBLE Quiz a buatsaih chu Inrinni khan Final round neiha zawh fel a ni ta a. Hetiang hi result a ni :
Group B Result (Kum 9 hnuailam)
1st - Amos PC Lalnuntluanga s/o PC.Khawldinliana Hmar Veng
2nd - Zothankimi d/o Vanlaldika, Serchhip Vengchung
3rd - Stephen Lalnunpuia s/o John Lalthuamliana P&E Veng

Group A Result (Kum 10-13 inkar)
1st - Laldintluanga s/o C. Lalenthanga Serchhip Chhim Veng
2nd - Abisak Lalduhzuali d/o H. Lalmuanawma Bazar Veng Serchhip
3rd - Catherine Lalhruaizeli d/o Lalringngheta Serchhip Chhim Veng

Tournament dawn
14 Assam Rifles Comman dant Colonel Ratnakar Trivedi leh Serchhip District Basket ball Association tangkawp chuan tun thla tawp lam hian Basketball Tournament an buatsaih dawn a, hetah hian SDBA atangin team 5 leh AR atangin team 3 ten 14 AR Basketball Court-ah an khel dawn a ni.

VC-IV thendarh tha an ti
Serchhip Chanmari huam chhunga Political party hrang hrang leh NGO-te Joint meeting chuan Serchhip-IV Village Council chu then tha an tih thu resolution siamin an pass a. A tul angin sorkar-ah bawhzuia hmalak nise an ti bawk.

Tualchhung

2011-08-21T01:47:00.000-07:00

Mi 20-in MCS exam an bei
MPSC hnuaia MCS (Junior Grade) lakna tur atan nimin atang khan Mizoram hmun hrang hrangah mi 810-in exam an bei a. Serchhip Centre, Gov’t Higher Secondary School-ah mi 20- mipa 15, leh hmeichhia 5 -in an bei a ni.

PIC Serchhipah
Press Information Bureau bultuma Central Media Units-te leh State sorkar tangrualin an buatsaih thin Bharat Nirman Public Information Campaign chu ni 20 - 23 Sept. 2011 chhung hian Mizorama a tum 17-na atan Serchhip District-a khaw 3 Thenzawl, E. Lungdar leh Chhiahtlang ah te neih a ni dawn.

Tualchhung

2011-08-18T05:00:00.000-07:00

Headmaster tur an duh lo
Thawhleh zan khan New Serchhip Village Council leh tlawmngai pawl hrang hrang – YMA, MHIP, MUP hruaitu kalkhawm chuan Government Middle School, New Serchhip Headmaster atan Pu T.Pahlira dah an tum chungchang an sawihova, hetiang hian Resolution an passed:
“Government Middle School, New Serchhip Headmaster atana dah tum T.Pahlira hi a thawhna hmasa LM Middle School, Serchhip zirlai nu leh pa leh khawtlang pawhin an duh loh a ni a. Hetiang mi, khawtlang leh a thawhna school zirlai nu leh pa te pawhina an duh loh hi New Serchhip khawtlang chuan kan venga thawk atan kan duh lova. Dah luih tum a nih chuan theihtawp chhuahin kan dodal dawn a ni” tiin.
Hemi chungchang hi Serchhip SDEO Pi Lallianzuali Bawihtlung chuan ngaih tuaha a tul anga hmalak an tum thu a sawi.

Vawksa rate-ah lungrual lo
Thawhtanni atanga Serchhipa Vawksa rate thar Kg.1 Rs. 180 a tih chu Sazuar Association thuchhuak a nih loh avangin thu a rual lova, sazuar thenkhatin rate pangngai Rs. 150 an la hmang.

MCS exam dawn
MPSC hnuaia MCS (Junior Grade) lakna tur chu vawiin hian Mizoram hmun hrang hrangah exam tan a ni dawn a, Serchhipah pawh Gov’t Higher Secon dary School-ah exam neih a ni ang.

Hlemhlet dona dan duh

2011-08-18T04:58:00.000-07:00

PRISM huaihawta hlem hletna do kawnga hmalak dan tur sawihona nimina Aizawla neihah chuan corruption duh lohna leh corruption venna dan tha a awm theih nana India against conrruption hmalakna thlawp an duh tih an sawi.
Nimina sawihonaah hian thusawitu hrang hrangte chuan thingtlanga retheihna nasa zia leh hetihlaia khaw puia sorkar hnathawk lian an hlawh phu lova In lian leh tha nei hmuh tur an awm chu a veiawm an tih thute an sawi a. Hlemhletna chu suahsualna pun chhan nia sawiin, a ruka sum chhehrelh te chu politics khelh nan hman zui leh a ni thin tih an sawi a ni.
ACB thuam chak anga sawi chu a hming mai nia an hriat thu sawiin, officer-te charge sang pek belhin, lirthei leh hnathawk dang dah belh ni mahse, dan kenkawh chung chang leh dan siam kawngah thuneihna pek tak tak an ni lo nia hriat a ni an ti.

Chief Minister hovin Cabinet meeting neih a ni

2011-08-18T04:54:00.000-07:00

Serchhip 18th Aug. 2011 : Chief Minister Pu Lal Thanhawla kaihhruaina hnuai ah nimin khan New Secretariat Complex a Chief Secretary Conference Hall-ah Council of Ministers meeting neih a ni a. Meeting-ah hian agenda 25 ngaihtuah tur chhawpchhuah zingah a hnuaia tarlan te hi hriat theih chinah pawm an ni.
Cabinet Meeting-in a pawmte zingah hian DP&AR hnuaia Modified Assured Career Progression Scheme,2010 (MACPS,2010), The Mizoram Secretariat Service (Amendment ) Rules,2011, Mizoram Secretariat Service (Compulsory Training) Regulations,2011, Draft Mizoram Ministerial Service Rules,2011, Draft Mizoram Ministerial Services (Assistant and UDC Grade) limited departmental Examination and Assistant, UDC and LDC Grade Direct Recruitment Examination Regulations,2011, Department hrang hranga post thenkhat, Gazetted Status pek rawtna chungchangah siam that ngai siam tha a pawm an nih bakah Recommendation of manpower Assessment Committee chu siam that ngai siam tha a pawm a ni a.
FCS&CA hnuaiah The Mizoram Trade Articles (Licensing and Control) Ordes, 2011 te pawm an ni bawk a. Finance hnuaia Revision of Delegation of Financial Powers pawh siam that ngai laite siam tha a pawm a ni bawk a ni.

Minister-in Serchhipa sorkar Department hmalakna hrang hrang a tlawh

2011-08-17T04:52:00.000-07:00

Serchhip 17th Aug. 2011 : UD&PA Minister Pu Zodintluanga chuan Thawhtan tlai khan Serchhip khawpui chhunga Urban Development & Poverty Alleviation Department hmalakna hmun hrang hrangte a hmunah kalin a tlawh a, hnathawktute pawh kawmin, an harsatnate a ngaihthlak sak bakah hnathawh a sawt theih nana chak zawka hma lak anih theih nan ruahmannate a siam sak bawk.
UD&PA Minister hian Serchhip Field-II tlawh hmasa berin field chei hna thawh mekte a endik nghal a, Serchhip VC-III huamchhunga Community Hall sakna tur hmun tlawhin a enfiah a, hemi hnu hian Field-I-a auditorium mi 1100 len theihna tur sak mek pawh tlawhin, a satu contractor leh engineer ten an lo dawngsawng a, anni hian May 2012 ah chuan sak zawh hman an inbeisei thu lo sawiin, hna chak lehzual zawka thawh anih theih nana an mamawhte Minister hnenah hian lo thlenin Minister chuan a tul dan angin rem a ruatpui nghal zel a ni.
Minister hian VC-II leh VC-IV huamchhunga Indoor Stadium sakna tur hmun a tlawh bakah New Serchhip-a Indoor Stadium sakna tur hmun leh Boxing Hall sak mek te pawh a tlawh nghal a, hna chak taka thawk turin hnathawktute chu a chah a, an intiam hun chhung ngeia hna zo turin leh a tul chuan zanah pawh thawk mai turin a hrilh bakah uluk leh belhchian dawl taka thahnemngai turin a chah tel bawk a ni.

CENSUS RESULT VOLUME I PAPER II TLANGZARH

2011-08-17T04:48:00.000-07:00

Nimin khan India ram chhiarpui result, Volume 1 Paper II chu Chief Secretary Pu Vanhela Pachuau-in I&PR Conference Hall ah a tlangzarh.
Kum 2011 India ram chhiarpui ah Mizoram a mihring cheng zawng zawng zat chu 1,091,014, mipa - 552,339 leh hmeichhia - 538,675 a ni a; mipa 1000 zelah hmeichhia 975 an awm a ni. Aizawl district chu mihring tamna ber niin 404,054 an cheng a, mihring tlemna ber Saiha district ah chuan 56,366 an cheng a ni.
Kum 2001 atanga Mizorama mihring punna hi 22.78% a ni a. Square km 1-ah mihring 52 zel cheng ang an ni. Naupang kum 6 hnuai lam zat chu 165,536 niin kum 2001 atanga naupang punna hi 15.17% a ni a. Mipa naupang 1000 zelah hmeichhe naupang 971 awm ang a ni.
Tun chhiarpui ah hian ziak leh chhiar thiam mi za zelah 91.6% niin India ram pumah Mizoram chu Pathumna a ni ta a. Serchhip district chu ziak leh chhiar thiam tamna ber niin 98.8% in ziak leh chhiar an thiam a. Literacy hniamna ber, Lawngtlai district ah ziak leh chhiar thiam 66.4% an awm a ni.
Kum 1901 atang Mizoram mihring pun chhoh dan hetiang hi a ni :
1901 - 82,434
1911 - 91,204
1921 - 98,406
1931 - 1,24,404
1941 - 1,52,786
1951 - 1,96,202
1961 - 2,66,063
1971 - 3,32,390
1981 - 4,93,757
1991 - 6,89,756
2001 - 8,88,573
2011 - 10,91,014

SERCHHIP-AH INDEPENDENCE DAY 2011 ATANA INPUAHCHAHNA THLIR HO

2011-08-10T04:17:00.000-07:00

Vawiin chawhma dar 11 khan Serchhip District Bawrhsap Pu P.Lalchhuanga hovin DC’s Meeting Room-ah Serchhip a Department hrang hrang leh tlawmngai pawl hrang hrang aiawhten Independence Day 2011 Serchhipa hman tur atana inpuahchahna te an thlirho a, Bawrhsap chuan Department hrang hrang ten an hmalakna report a ngaihthlak hnuin tha taka an chanvo an hlen avanga lawmawm a tih thu a sawi a,programme duan sa te pawh sawiho a pawm nghal a ni bawk.

Serchhip Independence Day lawmna inkhawm hi Serchhip Field Number II ah August ni 15, 2011 chawhma dar 10:30 ah tan a ni ang a, Pu Zodintluanga, I&PR, UD&PA leh SYS changtu Minister chu khuallian a ni ang a, Minister hian chawhnu dar 2:45 ah Serchhip District tan sports discipline pali ah “Catch Them Young” Policy a hawng nghal dawn bawk a ni.

Independence Day zing ni chhuah rualin Sawrkar office zawng zawng leh mimal in ah te India Hnam Puanzar khai vek tur a ni a, zing dar 7 ah JNM Hospital, Orphanage Home, Zoar Rescue Home leh Shalom Special School ah te Independence Day lawmna thilpek sem a ni ang. Independence Day lawmna ah hian Parade Contingent 21 (Armed-2, Unarmed-19) an tel ang a, a tithate hnenah lawmman sem ani bawk ang, Parade Contingent te Marchpast hi SSA pipe band ten rimawi nen an lo awi ang a, an ni hian pipe band display hmuhnawm tak an entir nghal dawn bawk a ni.

Independence Day lawmna hmun leh a chheh velah vaihlo zuk leh hmuam khap tlat a ni a, COTPA Act 2003 khauh taka kenkawh a ni dawn a ni.

Minister Pu H.Liamsailova’n Mizoram Science Centre-ah 3D Theatre a hawng

2011-08-09T04:28:00.000-07:00

Serchhip 9th Aug. 2011 : Nimin khan Planning & Programme Implementation Minister Pu H.Liansailova chuan Mizoram Science Centre Berawtlang-ah 3D Cinema leh Documentary-te en theihna 3D Theatre a hawng.
Pu H Liansailova chuan hawnna inkhawm a thusawiin, Mizoram Sorkar hnuaia Science & Technology lamah thawktute hmalakna leh remhriatna avanga Hmarchak a 3D Theatre nei State dawttu kan ni chu lawmawm tiin, naupang leh zirlai tan thil tangkai tak a nih ngei a beisei thu a sawi. Pu H.Liansailova chuan Science leh Technology thiamna chu ram hmasawnna hnuk pawimawh a ni tiin Ram hmasawnna leh Sumpai dinhmun chawikan nan Science leh Technology behchhan ah ruahmanna siam a pawimawh thu a sawi.
3D Theatre hawn nan hian sorkar laipui ah National Science Council of Science Museum (NSCM) chuan hmanrua(Equipment) zawng zawng cheng nuai 12.5 man hu zet a tlawnin a rawn pe a. Cheng nuai 4 sengin State Sorkar chuan mi 40 lenna tur 3D Theatre leh a thutna an buatsaih bawk a ni. 3D Theatre Show en man chu zirlai tan cheng 10 leh midang tan cheng 20 niin ni khatah vawi thum show ruahman tum a ni.
3D Cinema hi a bika siam tarmit hmanga en tur a ni a, tunlai Cinema khawvel a technology sang ber a ni.
Kum 2003 a din Mizoram Science Centre hian Mizoram a Science tihlar leh thehlar kawngah nasa takin an thawk mek a ni. A din tirh atangin mi 154032 in an tlawh tawh a; hemi zingah 66968 chu zirlai an ni.

Lawrkhawm

2011-08-08T04:48:00.000-07:00

Tuilian thlen theihna
Mizoram puma luituiin a luah theih zat ram, Km 89.84 awmah tui lian thlen theihna hmun chu Km 37.25 a zau a ni a. Leimin nasa tak thlen theihna hmun hlauhawm Km 1823 a awm bawk. Mizoram Remote Censing Application Centre-in a tarlan danin tui lian thlen theihna hi hmun hniam lam lui lian deuh awmnaah a ni tlangpui a ni a. Lei min thlen theihna zau ber chu Aizawl Dist. niin, Saiha Dist. leh Serchhip Dist. in a dawt a ni.

Mizoramah AIDS a hluar zel
Mizoram State AIDS Control Society chhinchhiah dan thar berah kumin June thla khan mi 4562 thisen test atangin HIV hrik pai mi 114 hmuh belh leh an ni a. Kum 1990 Oct. thla atanga kumin June thlenga Mizo rama mi 1,53544 thisen endik tawh atangin HIV+ hmuhchhuah tawh zat chu mi 5896 an tling tawh a ni. Kumin June thlaa HIV+ hmuh chhuah thar zinga 74 te chu mipat hmeichhiatna hman atanga kai an ni.

SC-in hriattir
Kum 2008-a India leh US-in nuclear hmanraw chungchanga inremna thuthlung an siam dawn khan Parlia ment member-te ngaihdan laknaah vote inlei a awm nia sawi chung chang chu chawlhkar 3 chhunga chhui chhuak ngei turin Supreme Court-in Delhi Police-te a hriattir.

MIZORAM JOURNALIST WELFARE SOCIETY-IN RALNA HLAN

2011-08-05T06:36:00.000-07:00

Vawiin chhun dar 12:30 khan Serchhip DIPRO’s Conference Hall-ah Mizoram Journalist Welfare Society chuan Serchhip-a Senior Journalist Pu Lalthianghlima (60) June ni 6, 2011 a boral ta ralna hun a hmang a, he hun hi District Bawrhsap Pu P.Lalchhuanga’n a hmanpui bakah Aizawl atangin Pu Lalsiama Fambawl, Deputy Director, I&PR, MJWS Governing Board Executive Officer ni bawk leh MJA General Headquarters aiawhin MJA General Secretary Pu R. Lalhmangaihzuala leh MJA Treasurer Pu Zonunsanga Khiangte ten an nhmanpuia, MJA hmingin ralna thilpek an hlan nghal bawk a ni.

Pu Lalthianghlima ralna inkhawm hi Andrew H. Lalremruata, DIPRO, Serchhip-in a kaihruai a, he huna thusawitu District Bawrhsap chuan mihringte hian kan thih hnu a midangten kan chanchin an sawi dan tur ngaihtuah reng chunga nitin nun hman a pawimawh thu tarlangin, MJA memberkalkhawmte chu chanchinbu mi an nihna anga an pawimawhna hre thar leh zual deuh deuh thin turin a chah a ni.
Thusawitu dang Pu Lalsiama Fambawl, Deputy Director chuan MJWS kaltlanga chanchinbumi chhiat tawk te tanpui theih dan kalhmang te a sawi a, Pu Zonunsanga Khiangte, MJA Treasurer pawhin Mizoram Sawrkarin chanchinbu mite a ngaipawimawh thin chu lawmawm a tih thu sawiin chanchinbu mi te hamthatna atana hmalaksaktu Minister te leh I&PR hotute chungah lawmthu a sawi bawk.
MJWS hminga ralna hi tangka fai Rs 70,000 niin District Bawrhsap Pu P.Lalchhuanga’n Pu Lalthianghlima nupui Pi Lalthanpari hnenah a hlan a, MJA hminga ralna tangka fai Rs. 10,000 chu Pu R.Lalhmangaihzuala, MJA General Secretary-in Pi Lalthanpari hnenah hian a hlan bawk ani.
Pu Lalthianghlima hi unau thum zinga upa ber niin June ni 6, 2011 khan ama huan siama a hnathawk lai a chau thut a, damdawiin pan pui tura buatsaih anih laiin a boral ta a ni, a boral hian kum 60 mi a ni a, a nupui Pi Lalthanpari nen hian fa pathum an nei a, a fapa upa ber Pu R.Lalremruata hi tuna Serchhip MJA President ni lai mek a ni.

Pu Lalthianghlima hi Serchhip District a chanchinbu hmasawnna atana sulsutu pawimawh tak a ni a, kum 1993 khan chanchinbu karkhata vawithum chhuak “Ramlai Aw’ in bul a tana, kum 1997 khan Ramlai Arsi ti a hming thlakin nitin chanchinbu a chhuah leh a, hei hi a fapa Pu R.Lalremruata’n chhunzawmin tun thlengin tluang takin a la kal a ni. Pu lalthianghlima hi Serchhip District atanga MJA Direct member ni hmasa ber a ni bawk.

Mizoram Journalist Welfare Society kaltlang hian chanchinbu mi Accredited Journalist boral an awmin Rs 1,00,000 in ral thin an ni a, Working Journalist boralte chu Rs. 70,000 in ral thin an ni.

Tualchhung

2011-08-04T04:09:00.000-07:00

BDO Office Jubilee lawm dawn
Vawiin chawhnu dar 1 hian BDO Office Golden Jubilee lawmna hun BDO Office-ah neih a ni dawn a. Dist. Bawrhsapin hman puiin, lungphun a hawng ang a, ruai theh a ni bawk ang.

CM-in NIT hmun tur a thlir
Nimin chawhnu khan Chief Minister Pu Lal Thanhawla’n Thenzawla National Institute of Technology (NIT) hmun tura ruahman chu a hmunah kalin a thlir a, Education Minister Pu Lalsawta, Parlia mentary Secretaries Pu Chawngtin thanga leh Pu H.Zothangliana te bakah Higher& Technical Education Depart ment hotute bakah Thenzawl khawtlang aiawh te leh chanchinbumi thahnem takin an tawiawm a ni.
Nimin vek khan Ni 4 awh tur Vantawng Group YMA Sports Meet vawi 2-na chu Thenzawl khelmualah Chief Minister hian a hawng nghal bawk.

Tualchhung

2011-08-01T05:07:00.000-07:00

Chess Academy hawng
Aizawl tih loh Dist. dang zinga a hmasa ber ni turin Inrinni khan YMA Hall New Serchhipah Catch Them Young atanga kalpui tur, naupangte Chess khelh zirtirna Serchhip Dist.Chess Academy thar chu Dist Bawrhsap Pu P.Lalchhuanga’n a hawng. Bawrhsap chuan chess game chu tumruhna leh dawhtheih zirna atana game tangkai a ni tiin, zirlai thar te chu he game hlawhtlin pui turin ruihtheih thila fihlim turin a chah a ni.
He Chess academy Serchhip Dist Chess Association te kaihhruaina hnuaia awm mekah hian chess khelh zir turin naupang 24 ten hming an pe a, Inrinni tin SDCA hruaitu – Pu Vanlalzarliana, Pu David Laldintluanga, Pu PC.Khawldin liana leh Pu Zosangzuala ten an zirtir thin dawn a ni. He hun remchanga hmang hian YMA Hall New Serchhipah hian puitlingte tan One Day Chess Tourna ment khelh nghal a ni bawk.

Jubilee lawmna khar
Baptist Kohhran Thalai pawl ‘ TKP’ Diamond Jubilee lawmna chu nizan khan a tiak ta. Tarlan tawh angin Inrinni khan Branch hrang hrang ten ruai an theh a ni.

Tualchhung

2011-07-27T05:09:00.000-07:00

Bible Quiz vawiinah
Nimin khan TT.Vision Bible Quiz Competition chu Serchhip Hmar Veng YMA Hall-ah Serchhip District MKHC Chairman Pastor Lalrinsanga’n a hawng. Intihsiakna hi vawiin atangin tan a ni ang a, hming pe te hi kum 9 hnuai lam mi 42 leh kum 10-13 mi 70 an vaiin 112 an ni.

Myanmari mi hawhtir remti lo
Serchhipa Nul ram neitu pawl, Serchhip Matphai Vegetable Land Owners’ Associa tion (SEMVOA) chuan mi tumahin Myanmar mite ram hawhtir loh nise an ti. Myanmar mi ten ram hawh man ngam sang mah se, ram leh hnam tan a him loh bakah zu siam nan an hmang tel thin tih hria-in mi tumahin ram hawhtir loh nise, Serchhip khaw pawn mi, nûl ram nei te pawh ramdangmi nul siamtir lo tura ngen nise an ti bawk.

SERCHHIP D.C HOVIN INDEPENDENCE DAY 2011 HMAN DAN TUR REL

2011-07-21T03:54:00.000-07:00

Vawiin chawhnu dar 1 khan Serchhip DC’s Meeting Hall-ah kumin August ni 15-a Independence Day Serchhip-a lawmdan tur rel a ni a. Serchhip District chhunga sawrkar Department hrang hrang hotute leh tlawmngai pawl hrang hrang aiawhte an tel tha hle a ni.

Meeting kaihruaitu, District Bawrhsap chuan India Independence Day pawimawhna sawiin, member te chu theihtawp chhuaha Independence Day hlutna leh pawimawhna phawk chhuak thei ngei tura tang tlang turin a ngen a ni.

Meeting thurelah chuan kumin Independence Day lawmna inkhawm hi Serchhip Field No. II ah August ni 15, zing dar 10:30 ah tan tura ruahman niin, sawrkar thuchhuakah chuan Sports & Youth Services Minister, Pu Zodintluanga chu khuallian tura ruat a nih thu sawi lan a ni a, kum danga tih thin ang bawkin Independence Day Parade neih leh tura tih niin, hetah hian Armed Contingent 2(Police & 14 Assam Rifles) leh Un-armed Contingent 29 tel thei tura beisei an ni a. Parade hi endiktu siama a ti thate hnenah lawmman sem tur a ni ang.

Independence Day chim tur hian Shalom Special School-a vohbik naupangte chu a bik taka sawm a, thuthmun tha tak ruahman sak tura remruat a ni bawk.

Meeting-ah hian Independence Day lawmna atana thil pawimawh chi hrang hrang– Electric Power Supply, tui thianghlim in tur, First Aid, Pavillion siam leh chei dan tur te, Field chei dan tur te uluk taka ruahman niin, mawhphurhna Department hrang hrang te leh tlawmngai pawl hrang hrangte hnenah sem rual a ni a, Independence Day zing karah JNM Hospital a damlo te, Zoar Orphanage Home leh Shalom Special School te tlawha thilpek hlan tum a ni bawk.

Independence Day ah hian chawhnu dar 1:30 ah D.C Bungalow, Khawtetlangah ‘D.C’s at Home’ neih tura ruahman a ni.

District Bawrhsap chuan District chhunga Department hrang hrangte thawh hona tha chu lawmawm a tih thu Meeting ah hian a sawi chhuak a ni.

Tualchhung

2011-07-19T23:13:00.000-07:00

Pawisa nawi Siki a thi ta
Sorkar laipui chuan December ni 20, 2010 khan thuchhuah siamin June ni 30, 2011 atang hian pawisa nawi, siki leh a aia tlem chu hman theih a nih tawh dawn loh thu mipui a hriattir a. Thil man leh chhiah hrang hrangte siam rem turin a hriattir nghal bawk.

NREGS inhlawna tan
Kumina a hmasa ber atan niminpiah khan Serchhip-V te chuan MGNREGS inhlawhna an thawk tan leh ta a. Bilzel atanga Tlangnuam Veng kea panna kawng an lai a ni.

MST Serchhip atangin lehlang
Serchhip - Aizawl inkara tlan, MST Bus chuan a tlan dan ti danglamin,tukin dar 6 atang hian Serchhip atanga chhuakin, chawhnu dar 1 ah Aizawl atangin Serchhip panin a rawn chhuak tawh thin dawn.

Lawrkhawm

2011-07-19T23:11:00.000-07:00

Putu insat hlum
Nimin zing dar 7 vel khan Lalhun liana (34) Sesawng Field veng chu a tupa (a farnu fa) Johan Lalmal sawma (21) chuan chempuiin a sathlum. An sawi danin Lalhunliana hi zu in nasa a ni a, nimin khan a nu pawisa a dila khawlaiah chem nen a um chhuaka a tupa Johana pawh chu kut a thlak a. Chutianga chem nena inhrosa ta chu Johana hian bawhthluin a chem chu a chhuhsaka a sat zui ta mai a ni. A pu sathlumtu Johan Lalmalsawma hi tlangval ngawichawi leh mi pawisawi ngailo tak niin thudawnna chuan a sawi bawk.

Sum dinhmun tha lo ti
Session neih mekah Finance Minister Pu H.Lliansailova chuan tun budget ah hian sawi nawn ngai lovin sorkar sum dinhmun that loh zia chu a lang a, amaherawhchu, sorkar chhiah a pung chho chu thil lawmawm tak a ni a ti.

Zirtirtu indaihlohna
Education Minister Pu Lalsawta chuan Mizoram hmun hrang hrang zirtirtu indaihlohna zualpui thla 2/3 chhunga chinfel a beisei tih House a hrilh. Zawhna chhangin Minister chuan thingtlang School thenkhat ah zirtirtu nei miah lo te, 2/1 chiah neite an awm tih sorkar-in a hria a, an mamawh phuhru turin sorkar-in a enfiah mek a. Hetih rual hian khawiah mah zirtirtu indaih takna hmun a awm lova, Aizawlah erawh pension hnai tawh leh chak-vak lo tawh te erawh an tam deuh a ni a ti.

NIT Thenzawlah
Tun thla ni 21 atanga tan tur Mizoram NIT Class chu Thenzawl ah tan a ni dawn tih Chief Minister chuan a sawi. NIT enkawltu mi 7 awmna Board of Director ten NIT din nan hian Thenzawl an thlang fel tih sawiin, NIT hi vawi lehkhatah changtlung taka kalpui nghal theih erawh a ni dawn lo tih a sawi bawk.

SSA leh RMSA hna lak enfiah
MSU chuan SSA leh RMSA hnuaia hna laknaah sorkar-in a phut ang thiamna zo lo mi 40 chuang an awm tih a sawi a. He hnalak a thil felhlel awm nia sawi chhuitu Verification committee chuan an hna zo felin tun thla ni 1 khan report sorkar-ah an thehlut a. Thil dik lo engemaw zat an hmu chhuak a ni.

2011-07-19T23:10:00.000-07:00

National Highway chhiat chhan chu zawh loh
nghawngkawl bah vang a ni - Chief Minister

Serchhip 20th July 2011 : PWD changtu Chief Minister Pu Lal Thanhawla chuan Mizoram National Highway kawngpui chhiat chhan chu mahni zawh loh nghawngkawl bat tura sorkar hmasa a intiam vang a ni a ti.
He thu hi nimina Session-ah sawiin, Chief Minister chuan kawngpui chhia chu pawi a tih thu sawiin, sorkar hmasa khan kawngpui enkawl hna hi BRTF kut atanga lak a lo dil avangin an sorkar chuan loh theih lovin sum awm lo chung pawha zo leh zo lo chungin he hna hi a kalpui a ngai ta tih a sawi a. An ni chuan BRTF kut atanga kawngpui enkawl hna lak hi an duh ngai lo tih a sawi a ni.
Kawngpui enkawl hna hi a hautak mai bakah State PWD-in a la pha lova, sorkar khawl neih pawhin a la pha lo a ni a ti a. Hei bakah hian hna thawktu tur labour pawh Mizoram chhungah an awm lo tih sawiin, Chief Minister Pu Lal Thanhawla chuan PWD hnuaia kawng siam tur tender chhuah pawhin Mizoram awmna pawh la hre lovin an chhan thin avangin thil tih a harsa a ni a ti a. Tuna Koladyn Multi-Model project siam mekah pawh harsatna nasa tak an tawk dawn nia a hriat thu a sawi a. A mimal ngaihdanah chuan tun thlengin BRTF kut atanga kawngpui enkawl hna lak hi tha a ti lo tih a sawi a.Sum pawh awm se kawngpui enkawl hi sorkar-in a zawh viau chuan a rinloh thu a sawi bawk.

Tualchhung

2011-07-17T06:16:00.000-07:00

Naute vuiliam
Inrinni zing dar 4 khan Lalhma ngaihzuali(thla 11) d/o Lalchhuanmawia Serchhip Dinthar Veng chu Septicemia natna-in a boral a, hemi ni vek hian vuiliam a ni.

Chawlh hmang mek
Tunlai hian Elementary School zirlai, School hrang hrang ten chawlh an hmang mek a, thla thar August khian an lut leh ang.

College & Middle School rawk
Tun Inrinni kalta zan khan Govt. Serchhip College-a Principal Room chu rawk a ni a, pawisa dahna Safe kar hawn an tum chu an hlawhtling lo niin College a thawk ten an sawi. College rawktute hian tukverh frame tichhia in an lut a, thisen far te pawh an hnutchhiah nual a, Sana lian an vaw chhe vek bawk a, dawhkan pawhdawh zawng zawng an hai a, thil bo liantham erawh a awm lo. Hetih rual, hemi zan vek hian Govt. Middle School New Serchhip pawh rawk tuma beih niin,thil bo lian tham hriat a ni lova, he thil thleng hi Police ten enfiahin, an chhui mek.

Thisen an pe
YMA Sub-Hqrs. Serchhip hnuaia Cultural Troupe te chuan Inrinni khan a mamawh apiangte hman atan JN Hospital Serchhip Blood Bank-a dah turin a thlawnin thisen an pe a, thisen petute hi Mipa 12 leh Hmeichhia 8 niin Thisen hi Unit 20 an pe a ni.

YMA-in mak an ti
July ni 13 a Sub-Hqrs. YMA Kumpuan Comtt. leh Serchhip Dist. Drugs Inspector ten damdawi an mansak avanga Drus Inspector Pu Vanlalsiama’n July ni 13 atanga ni 21 chhung atana an damdawi zawrhna dawr khar a a Seal sak mi 3 te dawr chu he Drugs Inspector thupek vek hian a tuk July ni 14 ah Dawr Seal-na te chu phelh leh nghal vek a ni a, he Drugs Inspector chetdan hi mak an tih thu Sub-Hqrs. YMA hruaitu ten an sawi.Hetihlai hian tun Inrinni thleng kha chuan heng dawr 3 te hi hawn an la ni lo thung.

MST Serchhip atangin
Serchhip leh Aizawl inkara Mizoram State Transport Bus Service thar chu mipui ngaihhlut a hlawh hle a, a tlan tantirh tuk atangin Ticket a Full deuh reng a. Hetihlai hian Serchhip atanga Aizawl lehlanga service ni phei se chuan tun ai hian mipuiin an bawh zawk dawn nia hriatna a awm avangin hun reilote hnuah Serchhip atanga lehlanga tlan tir tum a nih thu thawktu ten sawiin, hemi atan hian hmalak mek a ni.

Serchhip a Swimming Pool hmasa ber hawng

2011-07-14T05:38:00.000-07:00

Vawiin (14.7.2011) chawhnu dar 3 khan IOC Quarry Road, P&E Veng mawnglama Soil & Water Conservation Deptt. ten IWMP Serchhip-I hnuaia Entry Point Activity(EPA) sum Rs.nuai 4 hmanga siam, Serchhip Dist. a Swimming Pool hmasa ber chu Serchhip Dist. Bawrhsap Pu P.Lalchhuanga’n a hawng. Thu sawiin Pu P.Lalchhuanga chuan sorkar bungrua te hi kan Sitting Room ang bawka kan duat thiam a ngai a ni a ti.

Hawnna inkhawm hi DRDA Project Director Pu Sangdingliana’n kaihruaiin Pu R.Lalramliana PIA IWMP Serchhip-I & DSCO Soil & Water Conservation Dept. Serchhip in Technical Report a pe a, Pu Rama chuan he Swimming Pool hi a dung 54 ft. leh a vang 19 ft. a thuk zawng – a chanve 3ft, a chanve dang leh 4 ft a nih thu a sawi. Tui chen man hi kum 14 hnuailam tan mipakhatah Rs.10 a ni a, kum 14 chin chunglam tan Rs.20 niin Pawl ho tan mi 5 chin Rs.300/-, mi 10 chin Rs.500/-, mi 10 aia tam Rs.800/-, mi 20 chin chunglam Rs.1200/- a hman theih a ni.

SERCHHIP DISTRICT HUAM CHHUNGA AGRICULTURE DEPARTMENT HNUAIA NLUP OIL PALM TRADE THLANGTUTE TAN TRAINING BUATSAIH A NI

2011-07-13T04:13:00.000-07:00

District Agriculture Officer, Serchhip District hmalakna in vawiin(13.7.2011) chhun khan Serchhip DC’s Conference Hall-ah Serchhip District a NLUP Oil Palm Trade thlangtute tan training buatsaih a ni a, District Bawrhsap Pu P.Lalchhuanga, MCS chuan khuallian niin he training hi a hawng a ni.

Training hawn inkhawm tawite neih ah District Bawrhsap chuan beneficiaries kalkhawmte chu mitlemte thlanchhuah zinga an tel avanga an vanneihzia inhre tura chahin, tanpuina dawng tura thlan an nih chiah atang khan mawhphurhna pawimawh tak an nei theuh ani a ti a, taima taka thawka midangte tihhmuhtu ni turin a chah a ni. Bawrhsap chuan NLUP hmasa zawk sem anih laia a tawnhriatte sawilangin khatih laia thawk tha duh leh thawk tha duhlo te dinhmun inthlauh tawhzia a sawilanga, inchhir fe fe an tam a ni tiin beneficiaries te chu tunah bul an tan chauh a, fimkhur hun lai tak anih thu sawilangin taima taka hlawhtlin tum tlat tan chuan hlawhtlin pui tham sawrkarin tanpuina leh zirtirna a pe ani a ti bawk.

Bawrhsap chuan Oil Palm chingtute vanneih bikzia sawiin sawrkarin hralhna tur rate a siam sa vek a, a hralhna tur angaihtuah sa vek bawk a, kawng sialsak vek an nih avangin an hlep tur zat hre lawk sa in hna an thawk ani tiin khawlin a chawm zawh tawk tur thar chhuak ngei ngei turin beneficiaries te chu a fuih a, hlawhtling tur chuan rinawmna a pawimawhzia thu sawi langin beneficiaries te chu an pawisa dawn te NLUP atan chauha hmang turin a ngen a, Sawrkarin pawisa fai a pek chhuah hunah pawh savings bank account a dah a, mamawh dan ang zela pawisa lachhuak thin turin a chah bawk a ni.

Training hawnna inkhawm kaihruaitu Pu Lalthansiama, DAO pawhin NLUP 2nd instalment chu sem tura peihfel tep anih tawh thu sawiin, a sem dan tur mumal taka ruahman anih thu a sawi a, Oil Palm chingtute chu mithiamte thurawn zawm hram hram tura chahin, enkawl uluk lamah taimak chhuah lehzual a ngaih thu a sawi bawk.

NLUP beneficiaries-te hi Pu Lalremngheta, Food Fats & Fertilizers Ltd. Chuan training pe in, Oil Palm ching hlawhtling tura tih ngai zawng zawngte leh a hralchhuah dan tur thlengin projector hmanga a lem nen entirin zirtirna hi a pe a ni.

Training zawh hnu hian Pu K.Laltlanmawia, AEO kaihhruainain NLUP 2nd instalment sem dan tur leh hmalak chhunzawm dan tur beneficiaries te leh Department aiawhten an sawi ho a, NLUP Oil Palm 2nd instalment ah hian mi pakhat tan Rs. 40,000/- theuh ruahman sak an ni a, heta tang hian Oil Palm khur laih nan leh a bul vel laihzawl nan Rs. 8000/- ruahman a ni a, Oil palm chin hlawhtlin anih hma a a chingtuten sum hnar dang an lo neih theihna atana bul tanna tur Rs. 5000/- dah a ni bawk a, Oil Palm a puitlin tak tak hma a, a kung inkara thlai dang lo chin lailawk (intercropping)na turin Rs. 10,000/- ruahman a ni bawk a, Oil Palm chinna hmun thlawhfaina leh oil palm tiak an huana an phurh thlenna atana sen so turin Rs. 7000/- ruahman a ni bawk a, leitha (fertilizers, weedicides etc.) lei nan Rs. 10,000/- ruahman sak an ni bawk.

Fertilizers(Urea, DAP,MOP), BAVISTIN(Oil Palm te natna laka veng tu damdawi), Furadon G(oil palm eichhetu rannung laka vengtu), GLYCEL(weedicides) te hi beneficiaries te tan Aizawla lei a buaithlak avangin Department in a leisak dawn a, heng zawng zawng leina tur Rs. 5078/- leh Aizawl atanga beneficiaries te thlai chinna hmun thlen puina tur (transportation) sen so Rs. 700/-, avaiin Rs. 5778/- chu an pawisa dawn tur atanga cut sak an ni ang a, tangka fai 2nd instalment atanga beneficiaries te kuta lut tur chu Rs. 34,222/-ani dawn a ni.

Serchhip District ah hian Agriculture Department hnuaiah beneficiaries 582 awmin an zinga 293 in WRC-I (Leilet) an thlang a, 169 in WRC-II (Terrace) an thlang a, 46 in Sugarcane (Fu) thlangin 74 in Oil Palm an thlang a ni.

Serchhip-ah hian Oil Palm tharchhuah te process na tur khawl lian Rs. Nuaih 250 man bun tura ruahman mek a ni a, kumin kum tawp lamah chuan bun fel theih beisei anih thu DAO Pu Lalthansiama’n a sawi a, Serchhip District ah hian Oil palm hnuaiah ram hectare 800 vel cover a ni a, khawl hian hectare 1200 vel chawm zo tura beisei a ni.

Tualchhung

2011-07-13T04:11:00.000-07:00

Damdawi man sak
Nimin tlai khan Sub-Hqrs.YMA Serchhip hnuaia ruihhlo do pawl leh Drugs Inspector ten Serchhip damdawi zawrhna dawr 3 atangin license-in a huam loh, ruih nana hman thin damdawi thahnem tak an man.

Field-II chei tha mek
Tunlai hian Serchhip Dist. Football Association chuan Field No.II cheithat hna an thawk mek. Football Club hrang hrang te inhlawhin an inthawhchhawk thin dawn a ni. Kumin Independence Day Football Tournament khelhna hmun atan Field No.II hi ruahman a ni a, hei vang hian Field cheithat hna hi DC in NREGS Material Component Fund atangin Rs.1,30,000/- sengin SDFA te hi a thawhtir mek a ni. Tunah hian a khuar diak lutuk lai lei chhungin an tirualrem mek a, Field No.II tlaklam ball liam tur danna Fencing pawh thil pal hmanga siam a ni leh dawn a ni.

Khapna thupek
Dist.Bawrhsap, District Magistate ni bawk chuan Pu P.Lalchhuanga chuan hri leng laka District mipui an him zawk nan Foreign, State dang atanga vawk leh vawksa atanga thil siam chi te lakluh a khap. He khapna hian thla 2 chhung a huam ang.

Serchhip Bazar Building chunga dawr rawk
Inrinni kalta zan khan Serchhip Bazar Building chunga Dawr hrang hrang awm te chu rawk an ni a, rinhlelh thilah Police ten Bazar Chawkidar fapa an la a, vawiin khan an chhuah leh rih.
Serchhip Bazar Building hi a kawngkhar leh a kalhna felfai tak a awm a, hei hi Chawkidar in a kalhna chahbi a kawl thin a, hetianga kalhkhum fel vek a nih thin avang hian Dawr nei tam tak chuan dawr sira an thawm-hnaw zawrh te a chhung lamah an kalhkhum ngai lem lo a ni. Tun tuma Bazar rawkna a thil bo hlutzawng hi Rs.18,000/- bawr vel niin Serchhip Police ten kan palai an hrilh.

ENVIRONMENT & FORESTS DEPARTMENT–IN SERCHHIP DISTRICT CHHUNGAH NLUP (2010-2011) TUIZEM SEM

2011-07-12T04:53:00.000-07:00

Vawiin (12.7.2011) khan Chhiahtlang-ah leh New Serchhip-ah Serchhip District-a MLA Constituency pathum – Serchhip, Tuikum leh Hrangturzo huam chhunga Environment & Forests Department hnuaia NLUP (2010-2011) beneficiaries chhungkaw 47 zinga chhungkaw 26 hnenah ruahtui khawlna tur Tuizem siamsa (Polytop Synthetic tank) litres 2000 dawng sem a ni a, Thenzawl-ah chhungkaw 11 tan June thla khan sem a ni tawh bawk. Vawiina Tuizem sem hi NLUP Bamboo Plantation Trade hnuaia 2nd instalment tanpuina pawisa in a ken tel a ni.

Bamboo Plantation thlang chhungkaw 47 zinga Tuizem dawng chhungkaw 37 te hi an duhthlanna in Sawrkarin Tuizem hi a ngaihtuah sak a, 2nd instalment sum an dawn tur Rs. 27,086/- atangin Tuizem man tur hi Rs. 14,400/- theuh cut sak an ni a, tangka fai chu Rs. 12,686/- theuh an dawng thung a ni, a dang chhungkaw 10-te erawh chuan anmahni duhthlanna in an pawisa dawn atangin RCC tuizem an sa theuh thung dawn a ni.

Tuizem hi chawhma dar 10 khan Chhiahtlang-ah sem a ni a, hetah hian chhungkaw 11 hnenah pek chhuah niin chawhnu dar 1 khan New Serchhip-ah khaw hrang hrang 6 atanga thlan chhungkaw 15 hnenah sem leh a ni a, Tuizem te hi Environment & Forests Department hnathawktuten an sem a ni.

Environment & Forests Department hotute report dan chuan NLUP Beneficiaries te hmalakna enfiah (spot verification) hna hi vawi 2 neih ani tawh a, Beneficiaries te tan Training vawihnih ( 16th February, 2011 leh 25th April, 2011) pek a ni tawh bawk a ni. NLUP dawngtute apiangte hian anmahni bialtu VCP hriatpuina nen ngei an dawn bakah intiamkamna leh Actual Payees Receipt an sign nghal zel thin a ni.

Tualchhung

2011-07-12T04:40:00.000-07:00

LPG a double theih
Kum 2010 Nov. hma lama Gas Connection Single nei, Double duh te tan July ni 14 ralhma in MIZOFED Office, AOC Veng, Serchhip ah inreport tur a nih thu Manager hnen atangin kan dawng.

Hall lailawk tur duh
Serchhip Dist. NGO Co-Ordination Comtt. (SEDNOC) chuan Serchhip in Hall hman tur kan neih mumal loh chungchangah hma la in Auditorium sak chhunga Hall hman lailawk tur sak a nih theih nan hma an la mek a, Bazar Building chung zawl ah Hall hi sak a nih theih nan CM dawr thuai nise an ti a, a hmun pawh tehfel in PWD SDO Pu Makhuma’n Estimate a siamsak tawh a, remchang hmasa berah CM dawr tura Aizawl kalpui thuai an tum.

World Population Day hmang
Hmun dang rualin nimin khan Serchhip Hmar Veng YMA Hall-ah World Population Day hman a ni. He Ni pual hian High School zirlai ten kawng an zawh a. DEO Pu C.Zolawma kaihhruai inkhawmah DIET Principal Pu Lalram mawia’n zirlaite hmakhua sawiin, nun uluk turin a chah.

Matluanga vuiliam a ni
Inrinni zan dar 9:30 khan Pu C.Lian tluanga(40) s/o Pu C.Kapchawla(L) Serchhip Bazar Veng chu Thinro avangin a boral a, lumen a nih hnu Pathianni khan vuiliam a ni.

Serchhip - Aizawl MST Bus tlan tan tir a ni

2011-07-11T06:24:00.000-07:00

Vawiin chawhnu dar 1 khan Serchhip leh Aizawl inkar MST Bus service thar tur chu tlan tan tir a ni a, he Bus service thar hi Serchhip District Bawrhsap Pu P.Lalchhuanga’n Serchhip IOC Veng a DTO Office atangin a vailiam a ni.

MST Bus service thar puala inkhawm tawite neih ah District Bawrhsap chuan mipuite harsatna leh mamawh hria a sawrkarin MST Bus a service tir chu thil lawmawm tak anih thu sawiin, mipuiten tangkai taka an hman theih ngei a duh thu a sawi a ni.

DTO Pu Sangchunga pawhin zinmite tan MST Bus a zin chu a pawimawh thu a sawi a, Sawrkar motor te hi insured vek an nih avangin chhiat tawh palh awm thilah pawh a tuartu passengerte tan lukhawng a awm thei thin a ti bawk.

Serchhip to Aizawl MST Bus service hi Thawhtanni, Nilaini leh Zirtawpni apiangin National Highway No. 54 (Seling tlangdung) ah a tlan thin dawn a, Aizawl atangin zing dar 6 ah Serchhip panin a chhuak ang a, Serchhip atangin chawhnu dar 1 ah Aizawl lam panin a chhuak leh ang. Bus chuan man hi mipakhat tan Rs. 95/- zel a ni ang a, Serchhip-ah chuan IOC venga DTO Office atangin Bus ticket lak thin tur a ni.

2011-07-07T04:42:00.000-07:00

SERCHHIP DISTRICT CHHUNGA SERICULTURE DEPARTMENT HNUAIA PANGANG VULH THLANGTUTE HNENAH NLUP 1st PHASE

Vawiin chawhma dar 11 khan Sericulture Department bultumin Serchhip DC’s Conference Hall-ah Serchhip District chhunga MLA Constituency pathum a NLUP pangang vulh thlangtutechhungkaw 65 hnenah NLUP 2nd installment sem a ni a, District bawrhsap Pu P. Lalchhuanga’n khuallian niin a hmanpui a, tanpuina sum pawh a sem nghal bawk a ni.

Bawrhsap chuan NLUP tanpuina dawngtute chu rinawm tura fuihin tanpuina sum an hman dik loh chuan anmahni tanpuitu sawrkar an tihbeidawn mai bakah a hlawhchham nasa ber tur chu anmahni, tanpuina sum dawngtute chu an ni a ti a, NLUP atanga tanpuina an dawn te chu sawrkar an hma ngai em em tu duh dan ang taka eizawnna ngelnghet neih nan leh an tu le fate thlenga innghahna tlaka dinchhuahpui tum turin a chah bawk.

Bawrhsap chuan Serchhip District chu Chief Minister pawhin "model district" atana siam a duh a, a thahnemngaihna a zahawm em em ani tiin hemi tihlawhtling tur hian Chief Minister-in amah ringawtin tih theih a nei tam lova, Sawrkar hnathawkte pawhin tih theih an nei tam lova, mipuite nena inpawhna tha tak nena tanrual anih chuan hlawhchhamna chhan tur erawh a awm lo tih thu sawiin NLUP pawh hi bul tan na peng pakhat atana hman theih anih thu a sawi a, tanpuina dawngtute chu 1st installment an lak dawna an intiamkamna hre reng tura chahin mahni thutiam bawhchhia mi dingchhuak an awm ngailo tih thu a sawi bawk.

NLUP 2nd instalment sem anih dawn hian Serchhip District Sericulture Officer Pu C.Lalrinawma leh a thawhpuiten beneficiaries 1st instalment dawngte chu an hmunah tlawhin uluk takin an hmalakna te an enfiah a, tun tuma tanpuina sem hi thingtheihmu tang leina turte, a phunna tur khur laihna turte, leitha leina turte, a phunna tana senso leh a hmunhma thlawhfaina tur te a ni a, heng atan hian chhungkaw khat hnenah Rs. 25528 theuh sem an ni a, thingtheihmu phun hun hi May thla leh June thla a ni a, beneficiaries te hian an theih ang angin hma an lo la a, heta an senso leh an hnathawhte hi 2nd Year component hnuai ami tho anih vangin leh an senso te phuhruk anih theihnan 2nd instalment ah hian telh vek an ni.

Vawiina tanpuina sum dawngtute hi Tuikum Constituency atangin chhungkaw – 37, Serchhip Constituency atangin chhungkaw – 23, Hrangturzo Constituency atangin chhungkaw – 5, anvaiin chhungkaw -65 an ni.

Vawiin NLUP sem inkhawm hi Pu C.Lalrinawma, District Sericulture Officer-in a kaihruaia, Pu V. Zothansanga, Sericulture Promotion Officer, Serchhip-in report pe in District Bawrhsap Pu P.Lalchhuanga leh District Nodal Officer, NLUP Pu Robert C.Lalhmangaiha ten tanpuina sum hi a dawngtute hnenah an hlan a ni.

Tualchhung

2011-07-07T04:27:00.000-07:00

Tawng thei lo tawng thei
Aw bawm that loh vanga kum chanve zet tawng thei tawh lo, Doctor-te pawhin an beidawn pui tawh, Pi Lalenkawli d/o Kawlhu liana New Serchhip chuan Pi B.Lal remtluangi rawngbawlna atangin Pa thian tih dam na changin July ni 3 khan a tawng leh thei ta.

MHIP Day uar taka hman a ni
Nimin MHIP Day vawi 37-na chu Serchhip Branch hrang hrang ten uar taka hmangin, khawtlang tan leh member-te intihhlimna hun atan hman a nih bakah Damdawi In leh hmun dangah thilpekte an hlan bawk.
Dinthar Branch-in Pu Vanlalzapa Inah MHIP Day hi an hmang a. Chhim Veng -in Modern School-ah, Vengchungin Zoluti Hall-ah, Chanmari-in YMA Runah, P&E Branch-in Convent School-ah, Serchhip Kawnpuiin BRC Hall-ah, Hmar Vengin Primary School-ah te an hmang a ni.

Serthlum tiak sem
Niminpiah khan IWMP Serchhip-I hnuaia Watershed Comtt. hrang hrang kaltlangin Huan neitute hnenah Serthlum tiak sem leh a ni a, Serchhip-II VC huamchhung a mite tan Darnamtlang ah, Serchhip-III VC huamchhung a mi te tan Salvation Army Biak In bul, Chhim Veng ah, Serchhip – IV VC huamchhung a mite tan Hmar Veng YMA Hall kawt leh New Serchhip a mite tan College peng ah sem a ni a. Serthlum tiak hi a vaiin 4500 vel semral a ni.

Tualchhung

2011-07-04T05:17:00.000-07:00

SAY-in thisen an pe
Salvation Army thalai pawl, SAY Serchhip Corp chuan Inrinni khan an pawl Founder Day pualin Serchhip Damdawi Inah thisen unit 21 an pe a, an zingah hian hmeichhia 8 an tel a ni.

Pu Senawna vuiliam a ni
Inrinni zing dar 3:30 vel khan Pu Senawna(84) f/o Rokima Serchhip Dinthar Veng chu a boral a, hemi ni vek hian vuiliam a ni.

Tuialhthei man a sang leh ta
Oil Company-in ei rawngbawlna gas man, bur khat zela Rs 3.80 a a tihpun avangin ei rawngbawlna gas man chu tlemin a pung leh. Food, Civil Supply and Consumer Affairs Dept. thu chhuak angin, Showroom-a gas man thar chu Rs 403 a ni ta a,khawlaia phur chhuaka hralhna man pawh Rs 424.85 a ni ta bawk. Dealer Commission tlema tihsan a nih avangin Petrol leh Diesel man pawh Zirtawpni atang khan Mizoram pumah tlem-in a pung a, Serchhip-ah XP. Rs 64.96 niin, diesel EM. Rs.45.58 a ni ta.

SERCHHIP-AH REMNA NI CHAMPHA VAWI 25-NA LAWM A NI

2011-06-30T05:06:00.000-07:00

MNF leh India sawrkar ten Remna Thuthlung an ziah champha vawi 25-na (Silver Jubilee) lawmna vawiin chawhma dar 11 khan Serchhip D.C’s Conference Hall-ah neih a ni a, thupui atan "Remna siamtute chu an eng a thawl e (Matthaia 5:9)" tih hman a ni a, inkhawm zawh hian thingpui ruai tuihnai tak kilho nghal a ni. Mizoram Kohhran Hruaitu Committee, Serchhip Sub-Headquarters leh Deputy Commissioner, Serchhip District tangkawp ten an huaihawt Remna Ni Silver Jubilee inkhawm hi Serchhip District Bawrhsap Pu P.Lalchhuanga’n a kaihruai a, Bawrhsap chuan Mizoram Buai hrepha ve lo thangthar ho tan Remna Ni pawimawhzia leh Remna leh Muanna hlutzia hi hriatthiam a har hle dawn a ni tih sawiin kan nu leh pa te leh rual u zawkte hnen atanga Remna hlut zia zirthar zel hi a pawimawh a, Remna leh Muanna hi hloh tawh lo tur leh vawng nung zel zawk tura tan lak thar zel a tul thu a sawi a ni.

Remna Ni Report petu Upa Vanlalchhunga, Secretary, MKHC Serchhip Sub- Headquarters pawhin Mizorama Remna leh Muanna a lo awm theih nana kohhran hrang hrang hruaitute hmalakna leh tawrhna te tarlangin, kumdang anglo taka Remna Ni Kum 25-na champha a MKHC te an inrawlh ve nachhan te pawh a sawifiah nghal bawk a ni.

Remna Ni thuchah sawitu Rev. Lalrinsanga, Chairman, MKHC Serchhip Sub- Headquarters chuan Remna hlut zia leh a man to zia sawiin Kristian te tan chuan Remna hi hloh mai mai chi anih loh bakah Remna tluantling awm theih nan mimal tin ten kan tihtur pual kan tih theuh a pawimawh thu a sawi bawk.

Vawiin Remna Ni Silver Jubilee inkhawm hi Rev. C.Lalengliana, U.P.C (NEI) chuan hunserh hmangin a tan a, Zaipawl hrang hrang UPC (NEI) Serchhip Bial Zaipawl, Baptist Bial Zaipawl, Serchhip, New Serchhip Presbyterian Kohhran Pastor Bial Zaipawl leh YMA Sub-Headquarters Zaipawl ten Remna Ni pualin hla mawi tak tak an rem a, Father Francis, Serchhip Parish Priest-in Remna Ni Souvenir leh Bookmark a tlangzarh

a, Pastor C.Lalduhawma, Vengchung Presbyterian kohhran-in lawmthu sawi tawngtai rualna hun a kaihruai a, Pi K.Vanlalruait, SDO (Sadar)-in lawmthu sawina hun a hman zawhin Captain Lalringngheta, SA-in tawngtainain inkhawm hi a khar a ni.

Tualchhung

2011-06-29T04:04:00.000-07:00

Housing loan hmu tur tarchhuak
Housing Loan Advisory Board, Serchhip District hnuaia Housing loan 2010-2011 hmu turte nimin khan LAD Office-ah tarchhuah a ni a. MIG-ah mi 9 in an hmu dawn a,LIG-ah mi 23 in an hmu dawn a ni.

ATM DC-in hawng dawn
State Bank of India Serchhip Branch ATM AOC Veng ami chu tukin dar 9:30 hian District Bawrhsap Pu P.Lalchh- uanga’n a hawng dawn.

Tuai khawrh khap awm zia awm
DFO Thenzawlin Raw/Mau tuai eizawn nana khawrh a khap hnuah a lang apauva zawrhchhuah a ni ta lova, lei tur erawh a awm tho niin a lang.

Bawlhhlawh khawn thei lo
LAD bawlhhlawh paih motor pakhat zawk chhiat avangin Veng thenkhatah bawlhhlawh a khawn thei lova, hei hi lo hrethiam turin LAD hotute chuan mipui a ngen.

Remna Ni hmang dawn
Naktuk, Remna Ni lo thleng tur chu Dist.Bawrhsap hovin DC’s Conference hall-ah hman a ni dawn a. Hemi rual hian PAMRA chuan Remna Ni hi Serchhip Hmar Veng YMA Hall-ah uar leh urhsun taka hman tumin an inbuatsaih bawk.

Tualchhung

2011-06-27T03:28:00.000-07:00

Serchhip ah ATM hman theih ta

Serchhip History a thil chhinchhiahtlak tak pakhat ATM(Automatic Teller Machine) chu ni 24.6.2011 atang khan Serchhip AOC Veng ah hman theiha peihfel a ni ta. A hawnna erawh chu thla thar lamah Official a neih tur a ni. ATM Room chhungah hian Video Camera dah vek a ni a, Police Station lam atangin Live a en reng a ni dawn bawk a, ATM a pawisa ruk tum te tan chuan a tihchi loh mai mai ngawt ang!!! Tunah hian State Bank of India Serchhip Branch a kan pawisa chevel hi nitin a chawhrualin Rs.nuai 12 vel a ni a, nuai 15 vel a tlin hnu ah ATM Booth hran kan nei leh thei dawn niawm tak a ni.

LPG, Diesel & K.Oil man a sang
H Sorkar laipuiin eirawngbawlna gas, Diesel leh khawnvartui man a tihsan hnuah Inrinni atang khan Mizoram sorkar pawhin rate thar hi a hmang ve nghal a.Eirawngbawlna gas Show room-a hralhna man chu Rs.396.15 a ni ta a, tuallaia hralhchhuahna ah bur 1 Rs. 418 a tling ta a ni.
Diesel man tih sanna hi litre 1 zelah Rs.3 a nih avangin Serchhipa a man chu Rs. 40.42 a ni a. Khawnvartui man pawh a hma aiin litre-ah Rs. 2 a sang bawk.